Oktubre

Ang atong gitudlo ug gituohan gibase sa Pulong sa Diyos. Bisan pa niana, daghan ang nagsalikway sa atong mensahe kay naghunahuna sila nga ang atong paagi sa pagsimba simple ra kaayo ug nga ang atong gitudlo lahi sa gusto nilang madungog. Unsay atong buhaton aron dili mawala ang atong pagtuo? Giingnan ni apostol Pablo ang mga Kristohanon sa Roma: “Ang usa ka tawo motuo lang human siya makadungog sa pulong. Ug madungog ang pulong kon naay mosangyaw bahin sa Kristo.” (Roma 10:17) Busa mapalig-on ang atong pagtuo pinaagi sa pagtuon sa Bibliya, dili pinaagi sa pag-apil sa dili kasulatanhong relihiyosong mga seremonyas bisag unsa pa ni ka nindot tan-awon. Kinahanglang makabaton tag lig-ong pagtuo nga gibase sa tukmang kahibalo kay “kon walay pagtuo imposible nga mapalipay ang Diyos.” (Heb. 11:1, 6) Busa dili kinahanglang makakita tag talagsaong ilhanan gikan sa langit aron pamatud-an nga atong nakaplagan ang kamatuoran. Ang pagtuon pag-ayo sa makapalig-on sa pagtuo nga mga pagtulon-an sa Bibliya igo na aron makombinsir ta ug mawala ang bisan unsang pagduhaduha. w21.05 4-5 ¶11-12

Si apostol Pablo nag-atubang ug daghang problema. Ilabinang nagkinahanglan siyag kusog sa dihang siya gibunalan, gibato, ug gipriso. (2 Cor. 11:23-25) Miangkon si Pablo nga usahay kinahanglan niyang suklan ang negatibong mga pagbati. (Roma 7:18, 19, 24) Nag-antos sab siyag “tunok sa unod,” tingali usa ka problema sa panglawas, nga gusto kaayo niyang wagtangon sa Diyos. (2 Cor. 12:7, 8) Gihatagan ni Jehova si Pablo ug kusog aron makapadayon sa iyang ministeryo bisan pa sa mga problema nga iyang giatubang. Tagda kon unsay nalampos ni Pablo. Pananglitan, samtang siya gipriso sa usa ka balay didto sa Roma, maisogon niyang gidepensahan ang maayong balita atubangan sa Hudiyong mga lider ug tingali sa mga opisyales sa gobyerno. (Buh. 28:17; Filip. 4:21, 22) Gisangyawan sab niya ang daghang Praetorianong Guwardiya ug ang tanang mibisita kaniya. (Buh. 28:30, 31; Filip. 1:13) Niana pong panahona, gigamit sa Diyos si Pablo sa paghimog mga sulat nga nakahatag ug kaayohan sa tinuod nga mga Kristohanon hangtod karon. w21.05 21 ¶4-5

Tungod sa garbo, si Haring Uzzias sa Juda wala modawat sa tambag ug mihimo sa butang nga dili niya angayng buhaton. Si Uzzias daghag nalampos. Malamposon siya sa pagpakiggubat, sa pagpanukod ug mga siyudad, ug sa pagpanguma. “Ang matuod nga Diyos naghimo kaniyang mauswagon.” (2 Cron. 26:3-7, 10) ‘Apan dihang gamhanan na siya, siya nahimong mapahitas-on nga miresulta sa iyang kadaot,’ ang Bibliya nag-ingon. Una pa niana, si Jehova nagsugo nga mga saserdote lang ang puwedeng maghalad ug insenso diha sa templo. Pero si Haring Uzzias miadto sa templo aron maghalad ug insenso bisag wala siyay katungod sa paghimo niana. Si Jehova wala malipay ug gihampak niyag sanla ang maong mapahitas-ong tawo. (2 Cron. 26:16-21) Posible ba nga mahimo tang garboso ug malit-agan sama kang Uzzias? Posible, kon maghunahuna ta nga importante kaayo ta. Atong hinumdoman nga kang Jehova gikan ang bisan unsang katakos nga atong nabatonan ug ang bisan unsang pribilehiyo nga atong nadawat diha sa kongregasyon. (1 Cor. 4:7) Kon mapahitas-on ta, dili ta gamiton ni Jehova. w21.06 16 ¶7-8

Si Jesus nahibalo nga dili pirmeng maayo kaayo ang maeksperyensiyahan sa iyang mga tinun-an diha sa ministeryo. Gani, wala ta mahibalo kon pila niadtong naestorya sa mga tinun-an ang nahimong Kristohanon. Kinahanglang masabtan sa mga tinun-an nga ang kalipay wala lang magdepende sa ilang kalamposan, kondili sa pagkahibalo nga si Jehova nalipay sa ilang mga paningkamot. Kon molahutay ta sa atong ministeryo, maangkon nato ang kinabuhing walay kataposan. Samtang naningkamot ta sa pagpugas ug pagpatubo sa mga binhi sa kamatuoran bahin sa Gingharian, kita sab “nagpugas maylabot sa espiritu” kay atong gitugotan ang balaang espiritu sa Diyos sa paggiya kanato. Kon dili ta “mohunong” o “maluya,” si Jehova nagpasalig nga atong madawat ang kinabuhing walay kataposan, bisan pag wala gyod tay Bible study nga nabawtismohan.​—Gal. 6:7-9. w21.10 26 ¶8-9

Dihay higayon nga si Jesus ug ang iyang mga tinun-an gikapoy pag-ayo kay daghan kaayo silag gisangyawan. Nagkinahanglan silag dapit nga kapahulayan, pero daghan kaayong tawo ang nangadto didto. Kay naluoy, si Jesus misugod pagtudlo kanilag “daghang butang.” Gibutang ni Jesus ang iyang kaugalingon sa kahimtang sa mga tawo. Nakita niya nga nag-antos sila pag-ayo​—nga nagkinahanglan gyod silag paglaom—​ug gusto niyang motabang kanila. Ingon ana sab ang kahimtang sa mga tawo karon. Bisag malipayon silang tan-awon, sila samag mga karnero nga nangasaag ug walay magbalantay nga naggiya kanila. Si Pablo miingon nga ang mga tawo nga sama niini wala makaila sa Diyos ug walay paglaom. (Efe. 2:12) Dihang hunahunaon nato ang espirituwal nga kahimtang sa mga tawo diha sa atong teritoryo, ang gugma ug kaluoy magpalihok nato sa pagtabang kanila. Ug ang labing maayong paagi sa pagtabang kanila mao ang pagtanyag kanilag pagtuon sa Bibliya. w21.07 5 ¶8

Ang garbosong tawo kaugalingon ray gihunahuna. Ang masinahong tawo wala lang magtinguha sa nabatonan sa uban kondili mangandoy sab nga mawad-an sila sa ilang nabatonan. Busa, ang tawo nga nasina sa laing tawo sa pagkatinuod nagdumot kaniya. Ang garbo ug kasina mahimong ipakasama sa mga hugaw nga nakakontaminar sa gasolina sa usa ka eroplano. Ang eroplano makalupad tingali, pero ang mga hugaw makabara sa mga tubo nga agian sa gasolina, maong mahagsa kini. Sa susama, ang usa ka Kristohanon mag-alagad tingali kang Jehova sulod sa pipila ka panahon. Pero kon siya garboso ug masinahon, siya mahagsa. (Prov. 16:18) Mohunong siya sa pag-alagad kang Jehova ug mapasakitan niya ang iyang kaugalingon ug ang uban. Malikayan nato ang garbo, o ang pagpakaimportante sa kaugalingon, kon atong ipadapat ang tambag ni apostol Pablo: “Likayi ang hilig nga makig-away o ang pagpakaimportante sa kaugalingon, apan magpaubos mo ug isipa ang uban nga labaw kay kaninyo.”​—Filip. 2:3. w21.07 15-16 ¶6-8

Ang pipila naghunahuna nga ang tinuod nga relihiyon kinahanglang makatubag sa tanang pangutana, bisan sa mga pangutana nga walay espesipikong tubag ang Bibliya. Pero realistiko ba nâ nga pagdahom? Tagda ang pananglitan ni apostol Pablo. Gidasig niya ang iyang mga isigkamagtutuo nga ‘seguroon ang tanang butang,’ pero giangkon sab niya nga daghang butang ang wala niya masabti. (1 Tes. 5:21) Siya misulat: “Dili pa bug-os ang atong kahibalo.” Dayon, siya midugang: “Hanap pa ang atong makita nga daw kita nagtan-aw sa metal nga salamin.” (1 Cor. 13:9, 12) May mga butang nga wala masabti ni Pablo; mao man sab kita. Pero nasabtan ni Pablo ang pangunang mga kamatuoran bahin sa katuyoan ni Jehova. Igo na ang iyang nahibaloan aron makombinsir siya nga ang iyang gituohan mao ang kamatuoran! Ang usa ka paagi nga makombinsir ta pag-ayo nga nakaplagan nato ang kamatuoran mao ang pagtandi sa sumbanan sa pagsimba nga gitudlo ni Jesus nianang ginahimo sa mga Saksi ni Jehova karon. w21.10 18-19 ¶2-4

Mga tigulang, naa man mo sa bug-os panahong pag-alagad o wala, dako mog mahimo sa pagtabang sa uban. Sa unsang paagi? Paningkamoti nga maka-adjust sa inyong bag-ong kahimtang, pagtakdag bag-ong mga tumong, ug pagpokus sa inyong mahimo imbes sa dili ninyo mahimo. Si Haring David gusto kaayong magtukod ug balay para kang Jehova. Pero dihang giingnan siya ni Jehova nga kini nga pribilehiyo ihatag ngadto sa batan-on pa nga si Solomon, gidawat ni David ang desisyon ni Jehova ug kinasingkasing niyang gisuportahan ang maong proyekto. (1 Cron. 17:4; 22:5) Wala maghunahuna si David nga mas maayong siya ang magtukod sa templo kay si Solomon “batan-on pa ug kulag eksperyensiya.” (1 Cron. 29:1) Nahibalo si David nga ang kalamposan sa maong proyekto nagdepende sa panalangin ni Jehova, dili sa edad o eksperyensiya niadtong nanguna. Sama kang David, ang mga tigulang karon aktibo gihapon sa pag-alagad bisan dihang mausab ang ilang asaynment. Ug sila nahibalo nga panalanginan ni Jehova ang mga batan-on nga nag-atiman sa buluhaton nga ilang ginahimo kaniadto. w21.09 9 ¶4; 10 ¶5, 8

Ang espirituwal nga mga tumong maghatag ug direksiyon ug katuyoan sa atong kinabuhi. Pero kinahanglang magtakda tag mga tumong sumala sa atong mga abilidad ug kahimtang, dili nianang sa uban. Kon magbase ta sa uban, madismayar ug maluya lang ta. (Luc. 14:28) Ingong alagad ni Jehova, importante ka nga membro sa iyang pamilya ug walay lain nga sama nimo. Si Jehova nagkabig nimo dili tungod kay mas maayo ka sa uban. Gikabig ka niya kay nakita niya sa imong kasingkasing nga ikaw mapainubsanon ug andam magpatudlo kaniya ug magbag-o. Makasalig ka nga gipabilhan niya ang imong mga paningkamot sa pag-alagad kaniya. Ang imong paglahutay ug pagkamatinumanon nagpakita nga duna kay “madinawaton ug maayong kasingkasing.” (Luc. 8:15) Busa padayong ihatag ang imong kinamaayohan kang Jehova. Kon imo nang himoon, duna kay maayong rason nga malipay “sa [imong] mga buhat.”​—Gal. 6:4 w21.07 24 ¶15; 25 ¶20

Sagad, kinahanglan tingali tang magpailob samtang magpaabot nga mapahamtang ang hustisya. Pananglitan, sa dihang mahibaloan sa mga ansiyano nga dunay nakahimog seryosong sala diha sa kongregasyon, sila mag-ampo ug mangayog “kaalam nga gikan sa langit” aron masabtan nila ang panglantaw ni Jehova sa kahimtang. (Sant. 3:17) Tumong nila nga kon posible, matabangan ang nakasala nga motalikod “sa iyang sayop nga dalan.” (Sant. 5:19, 20) Gusto sab nilang himoon ang tanan aron mapanalipdan ang kongregasyon ug mahupay kadtong nasakitan sa gihimong sala. (2 Cor. 1:3, 4) Ug sa dihang ang mga ansiyano mag-atiman ug mga kaso sa seryosong sala, kinahanglan una nilang sayron ang tinuod nga nahitabo, nga tingali dangtan ug pipila ka panahon. Dayon, sila mag-ampo, mohatag ug tambag gikan sa Kasulatan, ug mopahamtang ug disiplina “sa hustong paagi.” (Jer. 30:11) Ang mga ansiyano dili magdalidali sa paghimog desisyon. Kon sundon sa mga ansiyano ang giya ni Jehova, ang tanan diha sa kongregasyon makabenepisyo. w21.08 11 ¶12-13

Tungod sa gutom sa Israel, si Noemi, iyang bana, ug duha ka anak nga lalaki mibalhin sa Moab. Samtang nagpuyo didto, ang bana ni Noemi namatay. Ang iyang duha ka anak naminyo, pero makapaguol kay namatay sab sila. (Ruth 1:3-5) Ang maong mga trahedya nakapaguol pag-ayo kang Noemi hangtod nga nawad-an siyag paglaom. Grabe kaayo ang iyang kaguol, ug nakahinapos pa gani siya nga nasuko si Jehova kaniya. Matikdi ang iyang giingon bahin sa Diyos: “Gisilotan ko ni Jehova.” “Gitugot sa Labing Gamhanan nga mahimong pait kaayo ang akong kinabuhi.” Miingon sab siya: “Gisilotan . . . ko ni Jehova nga Labing Gamhanan ug nagpahinabo siyag katalagman kanako.” (Ruth 1:13, 20, 21) Nakasabot si Jehova nga ang lisod nga mga kahimtang “makapabuang sa maalamon.” (Eccl. 7:7) Gipalihok niya si Ruth sa pagpakitag maunongong gugma kang Noemi. Kinabubut-on ug mahigugmaong gitabangan ni Ruth ang iyang ugangan aron mahibalik ang emosyonal ug espirituwal nga panimbang niini. w21.11 9 ¶9; 10 ¶10, 13

Kon magpokus ta sa atong asaynment karon, nagpasabot ba nâ nga dili na ta mangitag mga paagi nga mapalapad ang atong pag-alagad kang Jehova? Wala! Angay tang magtakdag mga tumong nga makatabang nato nga mahimong mas mabungahon diha sa ministeryo ug mas matinabangon sa atong mga igsoon. Makab-ot nato ang maong mga tumong kon kita maalamon ug mapainubsanong magpokus sa pagtabang sa uban imbes magpokus sa atong kaugalingon. (Prov. 11:2; Buh. 20:35) Unsang mga tumong ang puwede nimong kab-oton? Hangyoa si Jehova nga tabangan ka nga mahibaloan kon unsang mga tumong ang puwede nimong makab-ot. (Prov. 16:3) Puwede ba nimong kab-oton ang tumong nga mag-oksilyare payunir o mag-regular payunir, mag-alagad sa Bethel, o makigbahin sa mga proyekto sa pagpanukod? O basin puwede kang magtuon ug bag-ong pinulongan aron mapakaylap ang maayong balita o makasangyaw pa gani sa langyawng teritoryo. w21.08 23 ¶14-15

Gipabilhan pag-ayo ni Jehova ang maunongong gugma. (Os. 6:6) Pinaagi kang propetang Miqueas, ang atong Diyos nagdasig kanato sa “paghigugma sa maunongong gugma.” (Miq. 6:8, footnote) Pero aron mahimo kana, kinahanglan natong mahibaloan kon unsa ang maunongong gugma. Unsa ang maunongong gugma? Ang terminong “maunongong gugma” makitag mga 230 ka beses diha sa Bag-ong Kalibotang Hubad sa Balaang Kasulatan. Unsay gipasabot niini? Sumala sa “Glossary sa mga Termino sa Bibliya” nga makita niana nga hubad, kini nagtumong sa “gugma nga gipalihok sa panaad, integridad, pagkamaunongon, ug suod nga pagbati. Sagad gigamit kini may kalabotan sa gugma sa Diyos alang sa mga tawo, apan gugma usab kini nga ipakita tali sa mga tawo.” Si Jehova ang kinalabwang ehemplo sa pagpakitag maunongong gugma. Kanay rason nga si Haring David miingon: “Oh Jehova, ang imong maunongong gugma misangko sa kalangitan . . . Pagkabililhon sa imong maunongong gugma, Oh Diyos!” (Sal. 36:5, 7) Sama kang David, giapresyar ba nato pag-ayo ang maunongong gugma sa Diyos? w21.11 2 ¶1-2; 3 ¶4

Ang pamilya sa mga magsisimba ni Jehova naglakip kang Jesus, “ang panganay sa tanang kalalangan,” ug sa daghan kaayong anghel. (Col. 1:15; Sal. 103:20) Sa dinhi pa si Jesus sa yuta, iyang gipakita nga puwedeng isipon sa matinumanong mga tawo si Jehova ingong ilang Amahan. Sa dihang nakigsulti si Jesus sa iyang mga tinun-an, iyang gitawag si Jehova ingong ‘akong Amahan ug inyong Amahan.’ (Juan 20:17) Ug sa dihang ipahinungod nato ang atong kaugalingon kang Jehova ug magpabawtismo, mahimo tang bahin sa usa ka mahigugmaong espirituwal nga pamilya. (Mar. 10:29, 30) Si Jehova mahigugmaon nga Amahan. Gusto ni Jesus nga isipon nato si Jehova sama sa iyang pag-isip Kaniya​—ingong mabination ug mahigugmaong ginikanan nga daling duolon, dili ingong way pagbati nga persona nga igo lang mosulti kon unsay angay natong buhaton. Gisugdan niya ang modelong pag-ampo pinaagi sa mga pulong: “Amahan namo.” Puwede unta tang sultihan ni Jesus nga tawgon si Jehova ingong “ang Labing Gamhanan,” “ang Maglalalang,” o “Hari nga walay kataposan”​—nga pulos haom ug binase sa Bibliya nga mga titulo. (Gen. 49:25; Isa. 40:28; 1 Tim. 1:17) Pero gitudloan ta ni Jesus nga tawgon si Jehova ingong “Amahan.” w21.09 20 ¶1, 3

Si Haring Manases wala maminaw sa mga pasidaan nga gihatag ni Jehova pinaagi sa Iyang mga propeta. Sa ulahi, “gidala ni Jehova batok [sa Juda] ang mga pangulo sa kasundalohan sa hari sa Asirya, ug ilang gidakop si Manases pinaagig mga kaw-it ug gigapos siya pinaagig duha ka tumbaga nga kadena ug gidala sa Babilonya.” Samtang napriso sa Babilonya, dayag nga nakapamalandong si Manases sa iyang mga nahimo. Siya “nagpaubos pag-ayo sa iyang kaugalingon atubangan sa Diyos sa iyang mga katigulangan.” Ug dili kay kana ra. “Siya nagpakiluoy kang Jehova nga iyang Diyos.” Gani, si Manases “nagpadayon sa pag-ampo Kaniya.” (2 Cron. 33:10-13) Ngadtongadto, gitubag ni Jehova ang mga pag-ampo ni Manases. Nakita niya ang mga kausaban sa kasingkasing ni Manases, nga nadayag diha sa iyang mga pag-ampo. Natandog si Jehova sa pagpakiluoy ni Manases ug gipasig-uli siya sa pagkahari. Gipahimuslan ni Manases ang maong kahigayonan aron ipakita nga tinuod siyang naghinulsol. w21.10 4 ¶10-11

Si Priscila ug Aquila kinahanglang mobiya sa ilang naandang lugar, mangitag laing puy-anan, ug magsugod na pod sa ilang negosyo nga paghimog mga tolda diha sa bag-ong lokasyon. Sa ilang bag-ong puy-anan sa Corinto, si Aquila ug Priscila nakig-uban sa kongregasyon didto ug mitabang kang apostol Pablo sa pagpalig-on sa mga igsoon. Sa ulahi, namalhin sila sa laing mga lugar nga nanginahanglag dugang magsasangyaw. (Buh. 18:18-21; Roma 16:3-5) Nagkugi gyod sila sa buluhaton sa Gingharian, ug seguradong nakapalipay to nila! Masundog sa mga magtiayon karon si Priscila ug Aquila pinaagi sa pag-una sa Gingharian. Mas maayo nga sa trato pa lang sila, mahisgotan na nila ang ilang mga tumong sa kinabuhi. Kon hisgotan nila ang ilang mga tumong sa pag-alagad ug maningkamot nga makab-ot kana, mas dako silag kahigayonan nga makita ang tabang ni Jehova sa ilang kinabuhi.​—Eccl. 4:12. w21.11 17 ¶11-12

Klaro nga angay natong sundon ang sugo sa Diyos nga pasidunggan ang atong ginikanan. Atong hinumdoman nga ang sugo diha sa Levitico 19:3 nga tahoron ang inahan ug amahan mabasa human sa mga pulong: “Kinahanglan nga balaan mo, kay ako, si Jehova nga inyong Diyos, balaan.” (Lev. 19:2) Nahiuyon sa tambag ni Jehova nga pasidunggan ang atong ginikanan, puwede natong pangutan-on ang kaugalingon, ‘Gipasidunggan ba nako ang akong ginikanan?’ Kon gibati nimo nga kulang ra ang imong nahimo kaniadto, puwede kang mohimog mga kausaban karon. Dili nimo mabag-o ang kagahapon, pero puwede nimong himoon ang imong kinamaayohan karon sa paggahin ug dugang panahon aron makauban ang imong ginikanan. O tingali makahimo kag dugang pa sa pagtabang kanila sa materyal, espirituwal, o emosyonal. Ang paghimo niana nahiuyon sa giingon sa Levitico 19:3. w21.12 4-5 ¶10-12

Si Haring David nakahimog seryosong mga sala. Pananglitan, nanapaw siya uban kang Bat-seba, ug iya pa ganing gipapatay ang bana niini. (2 Sam. 11:2-4, 14, 15, 24) Tungod niana, napasakitan ni David dili lang ang iyang kaugalingon, kondili ang iya pong pamilya, apil na ang uban niyang mga asawa. (2 Sam. 12:10, 11) Sa laing higayon, si David wala magpakitag bug-os nga pagsalig kang Jehova dihang gimando niya nga iphon ang kasundalohan sa Israel, butang nga wala isugo ni Jehova. Unsay resulta? Mga 70,000 ka Israelinhon ang nangamatay! (2 Sam. 24:1-4, 10-15) Maghunahuna kaha ka nga si David dili angayng pasayloon ni Jehova? Lahi ang panglantaw ni Jehova kaniya. Nagpokus si Jehova sa katibuk-ang rekord ni David sa pagkamatinumanon ug sa iyang kinasingkasing nga paghinulsol. Busa, gipasaylo ni Jehova si David sa iyang seryosong mga sala. Nahibalo siya nga si David nahigugma pag-ayo kaniya ug gustong mohimo kon unsay husto. Mapasalamaton kaayo ta nga ang atong Diyos nagpokus sa atong maayong mga hiyas ug panggawi.​—1 Hari 9:4; 1 Cron. 29:10, 17. w21.12 19 ¶11-13

Si Jesus nagpakitag kaluoy niadtong dunay depekto. Hinumdomi ang mensahe nga iyang gipadala ngadto kang Juan nga Tigbawtismo: “Ang mga buta makakita na, ang mga bakol makalakaw na, ang mga sanlahon nangaayo na, ang mga bungol makadungog na, [ug] ang mga patay gibanhaw.” Human makita ang mga milagro ni Jesus, ang mga tawo “nagdayeg sa Diyos.” (Luc. 7:20-22) Ang mga Kristohanon naningkamot nga masundog si Jesus sa pagpakitag kaluoy niadtong dunay depekto. Busa kita nagpakita kanilag kaayo, konsiderasyon, ug pailob. Siyempre, wala ta hatagi ni Jehova ug gahom sa paghimog mga milagro. Pero pribilehiyo nato nga isulti ngadto sa mga buta sa pisikal o espirituwal ang maayong balita bahin sa paraiso diin ang tanan makabatog hingpit nga panglawas ug maayong relasyon sa Diyos. (Luc. 4:18) Kining maayong balita nagpalihok na sa daghan sa pagdayeg sa Diyos. w21.12 9 ¶5

Gibase ni Santiago ang iyang pagpanudlo diha sa Kasulatan. Gigamit niya ang Pulong sa Diyos sa pagtabang sa iyang magbabasa nga masabtan nga si Jehova kanunayng magpanalangin niadtong maunongon Kaniya, sama sa Iyang gibuhat kang Job. Gipatin-aw ni Santiago ang maong punto pinaagig simpleng mga pulong ug eksplinasyon. Nianang paagiha, dili mapokus kaniya ang pagtagad sa iyang mga magbabasa, kondili ngadto kang Jehova. Ang leksiyon: Himoang simple ang imong mensahe, ug ibase sa Pulong sa Diyos ang imong pagpanudlo. Dihang manudlo ta, dili nato tumong nga ipakita sa mga tawo kon unsa ka daghan ang atong nahibaloan, kondili ipakita nato kanila kon unsa ka lawom ang kahibalo ni Jehova ug kon unsa ka dako ang iyang gugma kanila. (Roma 11:33) Makab-ot nato ang maong tumong kon kanunay natong ibase sa Kasulatan ang atong isulti. Pananglitan, imbes sultian ang atong mga Bible study sa atong buhaton kon kita pay naa sa ilang kahimtang, angay nato silang tabangan nga mamalandong sa mga ehemplo sa Bibliya ug masabtan ang panghunahuna ug pagbati ni Jehova. Kon buhaton nato kana, mapalihok sila sa pagpadapat sa ilang nakat-onan kay gusto nilang mapalipay si Jehova, dili kita. w22.01 10-11 ¶9-10

Ang Diyos wala lang mag-ingon nga likayan nato ang paghimog kadaot sa atong isigkatawo. Gisugo sab ta niya sa paghigugma sa atong isigkatawo sama sa kaugalingon. Angay kining buhaton sa usa ka Kristohanon kon gusto niyang mapalipay ang Diyos. Konsideraha kon sa unsang paagi gipasiugda ni Jesus ang kaimportante sa sugo sa Levitico 19:18. Usa ka Pariseo ang nangutana kang Jesus: “Unsa ang kinalabwang sugo sa Balaod?” Si Jesus mitubag nga “ang kinalabwan ug unang sugo” mao ang paghigugma kang Jehova sa tibuok natong kasingkasing, sa tibuok natong kalag, ug sa tibuok natong hunahuna. Dayon, gikutlo ni Jesus ang Levitico 19:18 dihang siya miingon: “Ang ikaduha, nga susama niini, mao kini: ‘Higugmaa ang imong isigkatawo sama sa imong kaugalingon.’” (Mat. 22:35-40) Dunay daghang paagi sa pagpakitag gugma sa atong isigkatawo. Ang usa ka paagi mao ang pagpadapat sa tambag sa Levitico 19:18. Kini nag-ingon: “Ayawg panimalos o paghambin ug kasuko.” w21.12 10-11 ¶11-13

Gikuptan ni Jesus ang kamot ni apostol Pedro ug giluwas siya. Angay natong hinumdoman nga sa dihang si Pedro padayong nagtan-aw kang Jesus, nakalakaw siya ibabaw sa dagat nga gikusokuso sa unos. Pero dihang si Pedro mitan-aw sa unos, gidaog siya sa kahadlok ug pagduhaduha ug misugod pagkaunlod. (Mat. 14:24-31) Duna tay makat-onan sa nahitabo kang Pedro. Pagkawas ni Pedro sa sakayan, gusto gyod niyang molakaw ibabaw sa tubig hangtod nga makaabot siya sa iyang Agalon. Wala siya maghunahuna nga mahadlok siya sa unos ug mosugod sa pag-unlod. Pero imbes magpadayog tan-aw kang Jesus, nabalaka siya sa unos. Karon, dili ta makalakaw ibabaw sa tubig, pero nag-atubang tag mga pagsulay sa atong pagtuo. Kon dili ta padayong magpokus kang Jehova ug sa iyang mga saad, mosugod ta pag-unlod sa espirituwal. Bisag unsang simbolikong unos ang atong maatubang, kinahanglang padayon tang magpokus kang Jehova ug sa iyang katakos sa pagtabang kanato. w21.12 17-18 ¶6-7

Ang pag-ampo, pagtuon, ug pagpamalandong maoy bahin sa atong pagsimba. Dihang moampo ta, nakig-estorya ta sa atong langitnong Amahan, kinsa nahigugma pag-ayo kanato. Dihang magtuon ta sa Bibliya, nagkuha tag “kahibalo [bahin] sa Diyos,” ang Tinubdan sa tanang kaalam. (Prov. 2:1-5) Dihang mamalandong ta, atong gihunahuna pag-ayo ang nindot nga mga hiyas ni Jehova ug ang makapahinganghang mga butang nga iyang himoon para nato ug sa tanang katawhan. Mao gyod ni ang kinamaayohang paagi sa paggamit sa atong panahon. Pero unsay atong mahimo aron mapahimuslan nato ang panahon nga atong gigahin para niana? Kon posible, pangitag hilom nga lugar. Konsideraha ang ehemplo ni Jesus. Sa wala pa niya sugdi ang iyang ministeryo dinhi sa yuta, migahin una siyag 40 ka adlaw didto sa kamingawan. (Luc. 4:1, 2) Nianang hilom nga lugar, si Jesus nag-ampo kang Jehova ug namalandong sa kabubut-on sa iyang Amahan para niya. Nakatabang nâ nga maandam si Jesus sa mga pagsulay nga hapit na niyang atubangon. w22.01 27-28 ¶7-8

Tingali naay ansiyano o hamtong nga brader nga mosulti nato kon unsay angay natong pauswagon. Kon tungod sa gugma ang usa motambag nato base sa Bibliya, angay natong apresyahon ang tambag. Pero basin malisdan kaayo ta sa pagdawat ug direktang tambag. Basin masuko pa gani ta. Ngano? Sayon ra tingali para nato nga moangkon nga dili ta perpekto, pero basig malisdan ta sa pagdawat ug tambag bahin sa sayop nga atong nahimo. (Eccl. 7:9) Tingali ipakamatarong nato ang atong kaugalingon. Basig kuwestiyonon nato ang motibo sa nagtambag o masuko ta sa iyang paagi sa pagtambag. Basig pangitaan pa gani natog sayop ang nagtambag ug maghunahuna, ‘Kinsa god siyang motambag nako? Naa man pod siyay mga sayop!’ Kon dili ta ganahan sa tambag, basig balewalaon nato ni o mangita tag tambag nga gusto natong madungog. w22.02 8-9 ¶2-4

Sa bag-ong kalibotan, masulayan kaha ang atong pagsalig sa pamaagi ni Jehova? Pananglitan, konsideraha ang nahitabo dili dugay human makagawas ang mga Israelinhon gikan sa pagkaulipon sa Ehipto. Ang uban mireklamo kay gimingaw sila sa preskong pagkaon didto sa Ehipto ug giluod na sa mana nga gihatag ni Jehova. (Num. 11:4-6; 21:5) Maghunahuna pod kaha tag ingon ana human sa dakong kasakitan? Wala ta mahibalo kon unsa ka dakong trabaho ang paghinlo sa yuta ug ang anam-anam nga paghimo niini nga Paraiso. Tingali sa sinugdanan, daghan kaayog trabaho ug dili dayon hayahay ang kinabuhi. Moreklamo ba ta sa itagana ni Jehova nianang panahona? Usa ka butang ang segurado: Kon atong apresyahon ang tagana ni Jehova karon, dakog posibilidad nga ato pong apresyahon ang iyang mga tagana nianang panahona. w22.02 7 ¶18-19

Sa tagna diha sa Zacarias 8:23, ang mga ekspresyong “usa ka Hudiyo” ug “kaninyo” nagtumong sa mao ra nga grupo​—ang nahibiling mga dinihogan. (Roma 2:28, 29) Ang “10 ka tawo gikan sa tanang pinulongan sa mga nasod” nagrepresentar sa ubang mga karnero. Sila “mogunit pag-ayo,” o mounong, sa mga dinihogan, nga moduyog kanila sa putling pagsimba. Sa susama, ingong katumanan sa tagna sa Ezequiel 37:15-19, 24, 25, gipahinabo ni Jehova nga ang mga dinihogan ug ang ubang mga karnero bug-os nga magkahiusa. Ang tagna naghisgot ug duha ka estik. Kadtong dunay langitnong paglaom samag estik “alang sa Juda” (ang tribo diin naggikan ang mga hari sa Israel), ug kadtong dunay yutan-ong paglaom samag estik “ni Epraim.” Hiusahon ni Jehova ang duha ka grupo aron mahimo silang “usa ka estik.” Nagpasabot ni nga mag-alagad sila nga nagkahiusa ubos sa ilang usa ka Hari, si Kristo Jesus.​—Juan 10:16. w22.01 22 ¶9-10

Si Jesus naghisgot bahin niadtong nagtabang sa mga pobre, pero gusto nilang makita ni sa uban ug dayegon sila sa ilang gihimo. Maayo ang ilang pagtabang, pero si Jehova wala malipay niana. (Mat. 6:2-4) Tinuod tang maayo kon himoon nato kon unsay husto nga dili magdahom ug balos o pagdayeg. Puwede nimong pangutan-on ang imong kaugalingon: ‘Ginahimo ba gyod nako kon unsay maayong himoon, o kutob ra ko sa paghunahuna? Unsay akong motibo dihang mohimo kog maayo?’ Si Jehova aktibo nga Diyos, ug ang iyang espiritu maoy aktibong puwersa. (Gen. 1:2) Kon maningkamot ta, tabangan ta sa iyang espiritu. Busa angay gyod tang molihok. Pananglitan, ang tinun-ang si Santiago misulat: ‘Patay ang pagtuo nga walay binuhatan.’ (Sant. 2:26) Tinuod pod nâ sa uban pang bahin sa bunga sa espiritu sa Diyos. Matag higayon nga ato ning ipakita, atong gipamatud-an nga naglihok kanato ang espiritu sa Diyos. w22.03 11-12 ¶14-16

Bisan tingalig nakigbahin ta sa lainlaing espirituwal nga kalihokan ug naghimog daghang maayong buhat, dunay importanteng butang nga gipasiugda si apostol Pedro. Sa wala pa siya magdasig nga magmabalaan sa tanan natong panggawi, siya miingon: “Andama ang inyong hunahuna para sa buluhaton.” (1 Ped. 1:13) Unsa nâ nga buluhaton? Si Pedro miingon nga ang dinihogang mga igsoon sa Kristo ‘magpahayag bisan asa sa dalayegong mga hiyas sa Usa nga nagtawag kanila.’ (1 Ped. 2:9) Ug dakong kadungganan sa tanang Kristohanon karon ang paghimo niining labing importanteng buluhaton nga labawng makahatag ug kaayohan sa katawhan. Talagsaon gyong pribilehiyo sa balaang katawhan sa Diyos nga regular ug madasigong makigbahin sa buluhatong pagsangyaw ug pagpanudlo! (Mar. 13:10) Kon maningkamot ta sa paghimo ani, gipamatud-an nato nga atong gihigugma ang Diyos ug ang atong isigkatawo. Ug atong gipakita nga gusto natong ‘mahimong balaan’ sa tanan natong panggawi. w21.12 13 ¶18

Kanunayng positibo ang panglantaw ni apostol Pablo sa mga igsoon. Nahibalo si Pablo nga kon masayop ang usa ka tawo, wala ni magpasabot nga daotan na siya. Gimahal niya ang mga igsoon ug nagpokus siya sa ilang maayong mga hiyas. Kon maglisod sila sa pagbuhat kon unsay husto, maghunahuna siya nga maayo ang ilang motibo ug nagkinahanglan ra gyod silag tabang. Konsideraha kon giunsa pagtratar ni Pablo ang duha ka sister sa kongregasyon sa Filipos. (Filip. 4:1-3) Si Euodia ug Sintique nag-away ug wala na magtingganay. Pero wala sila kasab-i o hukmi ni Pablo. Hinuon, nagpokus siya sa ilang maayong mga hiyas. Matinumanon sila nga mga sister nga maayog rekord sa pag-alagad. Nahibalo si Pablo nga gihigugma sila ni Jehova. Kay positibog panglantaw si Pablo kanila, iyang gidasig sila nga sulbaron ang ilang di pagsinabtanay. Nakatabang pod ni nga makapabilin siyang malipayon ug suod sa mga igsoon niana nga kongregasyon. w22.03 30 ¶16-18

Ang kalinaw nga gikan kang Jehova makahatag natog kalmadong kasingkasing ug makatabang nato nga makahunahunag tarong. Mao nay naeksperyensiyahan sa sister nga si Luz. Siya miingon: “Pirme kong maguol. Tungod ani, mobati ko usahay nga wala ko higugmaa ni Jehova. Pero dihang mahitabo nâ, isulti dayon nako kang Jehova ang akong gibati. Ang pag-ampo nakatabang nga moarang-arang ang akong pagbati.” Sama kang Luz, mabatonan nato ang kalinaw pinaagi sa pag-ampo. (Filip. 4:6, 7) Nahibalo ta nga tabangan ta ni Jehova ug Jesus dihang mamatyan ta. Nadasig ta nga mosangyaw ug manudlo nga may kaluoy tungod kay si Jehova nga Diyos ug si Jesu-Kristo nagpakita niining nindot nga hiyas. Ug nahupayan ta sa pagkahibalo nga si Jehova ug ang iyang minahal nga Anak nakasabot sa atong mga kahuyangan, ug gusto nilang motabang nato sa paglahutay. Naghinamhinam ta sa panahon nga “pahiran [ni Jehova] ang matag luha sa [atong] mga mata”!​—Pin. 21:4. w22.01 15 ¶7; 19 ¶19-20

Si Jesus naghisgot ug duha ka ganghaan nga padulong sa duha ka lainlaing dalan​—“luag” nga dalan ug “gamay” nga dalan. (Mat. 7:14) Walay ikatulong dalan. Kinahanglang mopili ta kon unsang dalana ang atong subayon. Kini ang labing importanteng desisyon nga atong himoon kay usa lang niana nga dalan ang motultol sa kinabuhing walay kataposan. Ang “luag” nga dalan popular kay sayon ra ning subayon. Makapaguol, daghan ang nagpabilin nianang dalana ug nagsunod sa ginabuhat niadtong tanan nga nagasubay niana. Wala nila maamgohi nga si Satanas nga Yawa ang nagdani sa mga tawo nga mosubay nianang dalana, ug ang iyang dalan moresultag kamatayon. (1 Cor. 6:9, 10; 1 Juan 5:19) Dili sama sa “luag” nga dalan, ang laing dalan “gamay,” ug si Jesus miingon nga diyutay lang ang nakakaplag niana. Ngano? Matikdi nga sa sunod nga bersikulo, gipasidan-an ni Jesus ang iyang mga sumusunod batok sa bakak nga mga propeta.​—Mat. 7:15. w21.12 22-23 ¶3-5