Nobyembre

Gitabangan ta ni Jehova sa daghang paagi. Makatabang siya nimo nga magpabiling kalmado dihang makaestorya kag oposer. Makatabang sab siya nimo nga mahinumdom sa haom nga teksto nga basahon ngadto sa interesado nga tagbalay. Ug hatagan ka niyag kusog nga makapadayon sa pagsangyaw bisan dihang ang mga tawo dili maminaw. (Jer. 20:7-9) Gipakita sab ni Jehova ang iyang pagkamaayo pinaagi sa pagbansay kanato alang sa ministeryo. Panahon sa atong midweek nga tigom, makadungog tag maayong pagkaandam nga sampol nga mga pagpakig-estorya, ug gidasig ta nga gamiton kana diha sa ministeryo. Sa sinugdan, medyo makulbaan tingali ta nga mosulay ug bag-ong pamaagi. Pero sa dihang himoon nato kana, makita tingali nato nga ang bag-ong pamaagi epektibo diay sa atong teritoryo. Gidasig sab ta panahon sa atong mga tigom ug kombensiyon nga sulayan ang lainlaing paagi sa pagsangyaw nga tingali wala pa nato mahimo sa una. Basin makulbaan na sab ta niini, pero kon buhaton nato ni, gihatagan natog rason si Jehova nga panalanginan ta. w21.08 27 ¶5-6

Sa sulat ni apostol Pablo sa mga taga-Corinto, naghatag siyag bug-at nga tambag. Unya iyang gipaadto kanila si Tito. Nalipay kaayo si Pablo pagkahibalo niya nga ilang gipadapat ang iyang tambag! (2 Cor. 7:6, 7) Masundog sa mga ansiyano si Pablo pinaagi sa paggahin ug panahon sa mga igsoon. Ang usa ka paagi nga ila ning mahimo mao ang pag-abot ug sayo sa tigom aron maestorya nila ang uban. Sagad, sa pipila lang ka minuto, mahatag na sa mga ansiyano ang pagdasig nga gikinahanglan sa mga igsoon. (Roma 1:12) Ang ansiyano nga nagsundog kang Pablo mogamit pod sa Bibliya aron palig-onon ang pagtuo sa mga igsoon ug pasaligan sila nga gimahal sila sa Diyos. Tan-awon niya ang ilang maayong mga hiyas ug isulti niya kon unsay iyang naapresyar kanila. Kon kinahanglan siyang motambag, iya ning ibase sa Pulong sa Diyos. Espesipiko ang iyang tambag pero dili sakit ang iyang paagi sa pagsulti kay gusto niya nga ipadapat sa mga igsoon ang iyang tambag.​—Gal. 6:1. w22.03 28-29 ¶11-12

Karon, si Jehova naghatag sa iyang katawhan ug “gahom nga labaw sa kasarangan” aron makapadayon sila sa pag-alagad kaniya nga matinumanon. Ang usa ka paagi nga napalig-on ta maoy pinaagi sa pag-ampo. Sa Efeso 6:18, gidasig ta ni apostol Pablo nga mag-ampo sa Diyos “sa matag higayon.” Tubagon sa Diyos ang atong mga pag-ampo pinaagi sa pagpalig-on kanato. Usahay, mabug-atan kaayo ta sa atong mga problema ug dili gani ta kabalo kon unsay atong iampo. Pero si Jehova nagdapit kanato sa pag-ampo kaniya bisan pag maglisod tag sulti sa atong gihunahuna ug gibati. (Roma 8:26, 27) Iya sab tang gipalig-on pinaagi sa Bibliya. Gibasa ni Pablo ang Kasulatan aron mapalig-on ug mahupayan, ug kinahanglan sab nato nang buhaton. (Roma 15:4) Samtang basahon nato ang Pulong sa Diyos ug pamalandongon kini, gamiton ni Jehova ang iyang espiritu aron tabangan ta nga mas masabtan kon sa unsang paagi ang Bibliya makatabang nato sa atong kahimtang.​—Heb. 4:12. w21.05 22 ¶8-10

Nahibalo ta nga importante kaayo ang buluhatong pagpanudlo. Pero tungod sa mga kalisdanan nga atong giatubang, malimitahan tingali ang atong mahimo diha sa buluhatong paghimog mga tinun-an. Malimitahan tingali ta sa atong sirkumstansiya. Pananglitan, ang pipila ka magmamantala tigulang na o dili maayog panglawas. Mao ba nay imong kahimtang? Kon oo, hinumdomi nga nadiskobrehan nato nga makadumala diay tag epektibong mga pagtuon sa Bibliya gamit ang atong mga gadyet! Busa tingali makasugod ug makadumala kag pagtuon sa Bibliya bisag naa ra ka sa imong balay. Ug naa pay laing bentaha. Ang pipila ganahang magpa-study, pero dili sila makalugar sa mga panahon nga sagad maoy gigahin sa mga igsoon sa pagsangyaw. Pero, makalugar tingali sila sayo sa buntag o sa gabii na. Makadumala ka bag pagtuon nianang mga orasa? Gitudloan ni Jesus si Nicodemo panahon sa kagabhion, nga maoy gipiling oras ni Nicodemo.​—Juan 3:1, 2. w21.07 5 ¶10-11

Ang mga tinun-an ni Juan nga Tigbawtismo natingala kay ang mga tinun-an ni Jesus wala magpuasa. Gipatin-aw ni Jesus nga wala silay rason nga magpuasa samtang buhi pa siya. (Mat. 9:14-17) Bisan pa niana, ang mga Pariseo ug ang ubang magsusupak ni Jesus nagsaway kaniya kay wala niya sunda ang ilang mga kostumbre ug tradisyon. Nasuko sila dihang nag-ayo siyag mga masakiton panahon sa Igpapahulay. (Mar. 3:1-6; Juan 9:16) Mapasigarbohon silang miingon nga ilang gisunod ang Igpapahulay, pero dili ra sayop para nila ang pagnegosyo diha sa templo. Nasuko sila dihang gisaway sila ni Jesus tungod niini. (Mat. 21:12, 13, 15) Ug kadtong gisangyawan ni Jesus sa sinagoga sa Nasaret nangasuko dihang si Jesus migamit ug mga pananglitan gikan sa kasaysayan sa Israel aron ipakita kanila nga sila hakog ug walay pagtuo. (Luc. 4:16, 25-30) Kay wala buhata ni Jesus ang gidahom sa mga tawo, daghan ang nagsalikway kaniya.​—Mat. 11:16-19. w21.05 5-6 ¶13-14

Ang usa sa mga paagi nga si Jehova nagpasidaan nato bahin sa garbo ug kahakog mao ang pagdasig nato nga konsiderahon ang nahitabo sa pipila niya ka alagad, sa ingon, malikayan nato ang mga sayop nga ilang nahimo. Kon maghisgot tag kahakog, tingali si Satanas nga Yawa ang atong mahunahunaan. Ingong usa sa mga anghel ni Jehova, seguradong si Satanas daghag nindot nga mga pribilehiyo. Pero gusto niyag labaw pa. Gusto niya ang pagsimba nga angay lang ihatag kang Jehova. Gusto ni Satanas nga maparehas ta niya, busa naningkamot siya aron dili ta makontento sa atong nabatonan. Una nâ niyang gihimo dihang nakigsulti siya kang Eva. Si Jehova mahigugmaong nagtagana kang Eva ug sa iyang bana ug daghang makapatagbawng pagkaon​—“gikan sa tanang kahoy sa tanaman,” gawas sa usa ka kahoy. (Gen. 2:16) Bisan pa niana, gilimbongan ni Satanas si Eva sa paghunahuna nga kinahanglan kining mokaon sa bunga sa gidili nga kahoy. Si Eva wala makontento sa iyang nabatonan; gusto niyag labaw pa. Nahibalo ta kon unsay sunod nga nahitabo. Si Eva nakasala ug ngadtongadto namatay.​—Gen. 3:6, 19. w21.06 14 ¶2-3; 17 ¶9

Gusto sa Diyos nga si Adan ug Eva manganak ug mag-atiman pag-ayo sa yuta. Kon misunod pa sila sa katuyoan ni Jehova para kanila, si Adan ug Eva ug ang ilang mga anak magpabilin untang mga membro sa pamilya sa Diyos hangtod sa hangtod. Si Adan ug Eva may importanteng lunâ sa pamilya ni Jehova. Sa Salmo 8:5, si David miingon bahin sa paglalang ni Jehova sa tawo: “Gihimo nimo siyang ubos ug diyutay sa mga anghel, ug gikoronahan nimo siyag himaya ug kahalangdon.” Tinuod, dili parehas ang gahom, kahibalo, ug mga abilidad nga gihatag ni Jehova sa mga tawo kon itandi nianang sa mga anghel. (Sal. 103:20) Pero, ang mga tawo “ubos [lag] diyutay” sa gamhanan nga espiritung mga linalang. Makapaguol, si Adan ug Eva misupak kang Jehova busa dili na sila membro sa iyang pamilya. Miresulta nig grabeng kadaot sa iyang mga kaliwat. Pero wala mausab ang katuyoan ni Jehova. Gusto niya nga ang masinugtanong mga tawo mahimong iyang mga anak hangtod sa hangtod. w21.08 2-3 ¶2-4

Karon, daghang alagad ni Jehova ang nag-atubang ug pagsupak. Pananglitan, ang uban nagpuyo sa mga lugar nga naay restriksiyon ang atong buluhaton ug sila dakpon tingali ug ‘dad-on atubangan sa mga gobernador ug sa mga hari’ ingong pamatuod kanila. (Mat. 10:17, 18) Ang ubang Saksi lahig giatubang nga pagsupak. Nagpuyo sila sa nasod nga wala idili ang pagsimba kang Jehova, pero nag-atubang gihapon silag pagsupak gikan sa ilang pamilya nga determinado nga mopahunong nila sa pag-alagad kang Jehova. (Mat. 10:32-36) Sa daghang kahimtang, dihang makaamgo ang mga magsusupak nga dili mosaler ang pagsupak nila sa ilang mga paryente nga Saksi, mohunong ra sila. Gani, naay mga oposer kaayo nga nahimong dasig kaayong mga Saksi. Dihang makaatubang kag pagsupak, ayawg undang sa pag-alagad kang Jehova! Magmaisogon. Si Jehova nagtabang nimo pinaagi sa iyang gamhanang balaang espiritu, mao nga wala kay angayng kahadlokan! w22.03 16 ¶8

Ang Bibliya nag-ingon nga gidumtan ni Jehova ang “mapahitas-ong mga mata, bakakong dila, [ug] mga kamot nga nagaula ug inosenteng dugo.” (Prov. 6:16, 17) “Gidumtan [pod niya] ang mga pintas ug malimbongon.” (Sal. 5:6) Gidumtan pag-ayo ni Jehova kini nga mga kinaiya ug binuhatan mao nga iyang gilaglag ang tanang daotan sa panahon ni Noe kay gipuno nilag kapintasan ang yuta. (Gen. 6:13) Ug pinaagi kang propetang Malaquias, si Jehova miingon nga Iyang gidumtan kadtong nagluib sa ilang kapikas pinaagi sa pagplano nga makigdiborsiyo kanila. Dili dawaton sa Diyos ang ilang pagsimba ug papanubagon niya sila sa ilang binuhatan. (Mal. 2:13-16; Heb. 13:4) Gusto ni Jehova nga atong ‘dumtan pag-ayo ang daotan.’ (Roma 12:9) Ang pulong “dumtan pag-ayo” maoy grabe kaayo nga pagbati. Busa kon bahin sa mga butang nga giingon ni Jehova nga daotan, angay nga lud-on ta bisag maghunahuna pa lang niana. w22.03 5 ¶11-12

Sa dili madugay, ang atong langitnong Amahan dagayang magpanalangin kanato pinaagi sa iyang Gingharian. Kadtong padayong nagpaabot kang Jehova makadawat ug daghang panalangin karon ug sa umaabot nga bag-ong kalibotan. Sa bag-ong kalibotan, dili na gyod maeksperyensiyahan sa mga alagad sa Diyos ang mga kabalaka ug problema nga ilang giatubang karon. Wala na unyay inhustisya, ug wala na poy kasakit. (Pin. 21:4) Dili na ta kinahanglang mabalaka sa mga butang nga atong gikinahanglan kay abunda na kining itagana. (Sal. 72:16; Isa. 54:13) Nindot gyod nâ nga mga panalangin! Pinaagi sa pagtabang nato nga madaog ang dili maayong mga kinaiya ug maugmad ang maayong mga hiyas, si Jehova nag-andam kanato karon para sa kinabuhi ubos sa iyang pagmando. Ayawg kadismayar, ug ayawg hunong sa pag-alagad kang Jehova. Dunay maayo kaayong kinabuhi nga nagpaabot nimo! Samtang naghinamhinam ta nianang nindot nga kaugmaon, hinaot nga padayon tang magpaabot nga malipayon ug mapailobon kang Jehova hangtod nga mahuman niya ang iyang buluhaton! w21.08 13 ¶17-19

Wala madugay human madawat sa mga Kristohanon sa Judea ang sulat ni apostol Pablo, kinahanglan nilang biyaan ang ilang balay, negosyo, ug ang ilang dili Kristohanong mga paryente ug ‘nangikyas [sila] ngadto sa kabukiran.’ (Mat. 24:16) Nianang panahona, importante kaayo nga magtinabangay sila. Kon ila nang gipadapat ang tambag ni Pablo sa wala pa ni mahitabo, posibleng naka-adjust ra dayon sila sa bag-o nilang kahimtang. Ang atong mga igsoon dili tingali kanunayng mosulti kon unsay ilang panginahanglan. Busa ipabati sa uban nga dali kang duolon. Sa inyong kongregasyon, segurado nga naa kay nakitang mga igsoon nga kanunayng andam motabang. Dili gyod nila ipabati nga nakapabug-at ta nila. Makasalig ta nga andam gyod silang motabang nato, ug gusto nato silang sundogon! w22.02 23-24 ¶13-15

Sa milabayng mga tuig, naay gihimong kausaban sa pag-organisar sa daghang kongregasyon ug sirkito. Kon hangyoon ta nga mobalhin ug kongregasyon, lisod tingali para nato nga biyaan ang atong mga higala ug pamilya. Giyahan ba sa balaang espiritu ang mga ansiyano kon asa iasayn ang matag igsoon? Dili. Tungod ana, tingali malisdan ta sa pagsunod sa direksiyon nga atong madawat. Pero gisalig ni Jehova sa mga ansiyano ang paghimo niana nga desisyon, mao nga kinahanglan pod tang mosalig nila. Nganong kinahanglan tang mosuportar sa desisyon sa mga ansiyano bisag lahi unta ang atong gusto? Kay pinaagi niana, makatabang ta nga padayong magkahiusa ang katawhan sa Diyos. Ang mga kongregasyon mouswag kon ang tanan mapainubsanong magpasakop sa desisyon sa mga ansiyano. (Heb. 13:17) Labaw sa tanan, ikapakita nato kang Jehova nga naa tay pagsalig niya dihang magpasakop ta niadtong iyang gipili nga mag-atiman kanato.​—Buh. 20:28. w22.02 4-5 ¶9-10

Kon bawtismado ka nga brader, puwede nimong mapauswag ang imong katakos sa pagpakigpulong ug pagpanudlo. Ngano? Tungod kay kon maningkamot ka nga mapauswag ang imong katakos sa pagbasa, pagpakigpulong, ug pagpanudlo, mas makatabang ka niadtong maminaw kanimo. (1 Tim. 4:15) Puwede nimong himoong tumong ang pagtuon ug pagpadapat sa matag katakos sa pagpanulti nga gihisgotan sa brosyur nga Mahimong Hanas sa Pagbasa ug Pagpanudlo. Tagsatagsaa pagtuon ang matag katakos, pagpraktis pirme sa balay, ug paningkamoti nga mapadapat kana sa dihang mopakigpulong ka. Pangayog sugyot gikan sa katabang nga magtatambag o sa ubang ansiyano kinsa “naghago sa pagpanulti ug pagpanudlo.” (1 Tim. 5:17) Ayaw pagpokus sa pagpadapat lang sa leksiyon gikan sa brosyur kondili sa pagtabang sab sa imong mga mamiminaw nga mapalig-on ang ilang pagtuo o mapalihok sila sa pag-aplikar sa ilang nakat-onan. Kon buhaton nâ nimo, mouswag ang imong kalipay ug ang ilaha. w21.08 24 ¶17

Kon atong isipon ang uban nga mas labaw kay kanato, dili ta makigkompetensiya niadtong tingali mas daghag talento ug abilidad kay kanato. Malipay hinuon ta para nila, ilabina kon gigamit nila ang ilang mga abilidad diha sa pag-alagad ug pagdayeg kang Jehova. Ingong resulta, kitang tanan makatabang sa pagpalambo sa kalinaw ug panaghiusa diha sa kongregasyon. Makontrolar nato ang atong tendensiya nga masina kon ugmaron nato ang pagkamakasaranganon, nga nagpasabot nga ilhon nato ang atong mga limitasyon. Kon makasaranganon ta, dili ta maningkamot nga ipakita nga mas maayo o mas hawod ta kay sa uban. Hinunoa, maningkamot ta nga mokat-on niadtong mas abilidaran kay kanato. Pananglitan, ibutang ta nga ang usa ka brader diha sa kongregasyon maayong mopakigpulong. Puwede nato siyang pangutan-on kon sa unsang paagi siya mangandam sa iyang mga pakigpulong. Kon ang usa ka sister maayong moluto, puwede tang mangayog sugyot niya kon unsaon nga mouswag nianang bahina. w21.07 16 ¶8-9

Sa basahon sa Numeros, atong mabasa nga gisentensiyahan ni Jehova ug kamatayon ang usa ka Israelinhon nga nangahoy panahon sa Igpapahulay. Sa basahon sa Ikaduhang Samuel, atong nakat-onan nga gatosan ka tuig sa ulahi, gipasaylo ni Jehova si Haring David sa iyang sala nga pagpanapaw ug pagpatay. (Num. 15:32, 35; 2 Sam. 12:9, 13) Tingali maghunahuna ta, ‘Nganong gipasaylo man ni Jehova ang pagpatay ug pagpanapaw ni David pero gisentensiyahan Niyag kamatayon ang usa ka tawo tungod sa sala nga morag dili ra kaayo bug-at?’ Dili kanunayng ihatag sa Bibliya ang tanang detalye. Pananglitan, nahibalo ta nga si David tinuod gyod nga naghinulsol sa iyang mga sala. (Sal. 51:2-4) Pero unsang klaseha sa tawo kadtong milapas sa balaod sa Igpapahulay? Nagbasol ba siya sa iyang gihimo? Gisupak na ba niya sa una ang balaod ni Jehova? Gipasidan-an na ba siya sa una pero wala niya ni tagda? Walay giingon ang Bibliya. Pero ang atong nahibaloan bahin sa atong Diyos igo na nga makaingon ta nga siya “matarong sa tanan niyang buhat.”​—Sal. 145:17. w22.02 2-3 ¶3-4

Ang makasaranganong tawo dili magdahom ug labaw kay sa iyang mahimo. Ingong resulta, siya magpabiling malipayon ug magpadayon sa pagkugi. Ang tawong makasaranganon puwedeng ipakasama sa usa nga nagdrayb sa subidahon nga dalan. Ang drayber kinahanglan tingaling mokambiyo ug segunda o primera aron makasubida. Tinuod, mohinay tingali ang iyang dagan pero makapadayon gihapon siya. Sa susama, ang makasaranganong tawo nahibalo kon kanus-a siya “mosegunda o moprimera” aron makapadayon sa pag-alagad kang Jehova ug makatabang sa uban. (Filip. 4:5) Matikdi ang ehemplo ni Barzilai, kinsa 80 anyos sa dihang gidapit siya ni Haring David nga mouban niya sa palasyo ug mahimong usa sa iyang mga magtatambag. Gibalibaran sa makasaranganong si Barzilai ang tanyag sa hari. Kay nahibalo siya sa iyang mga limitasyon, girekomendar ni Barzilai ang batabata nga si Kimham nga maoy moadto puli kaniya. (2 Sam. 19:35-37) Sama kang Barzilai, ang tigulang nga mga lalaki malipay nga ihatag ngadto sa batabata nga mga lalaki ang kahigayonan sa pag-atiman sa buluhaton. w21.09 10 ¶6-7

Nalisdan ka ba sa pag-isip kang Jehova ingong mahigugmaong Amahan? Ang pipila kanato nalisdan. Kon ang atong papa dili mahigugmaon, malisdan tingali ta sa pag-imadyin kang Jehova ingong mahigugmaon nga Amahan. Makapahupay gyod ang pagkahibalo nga si Jehova nakasabot pag-ayo sa atong gibati! Gusto niya nga masuod ta kaniya. Busa ang iyang Pulong nag-awhag kanato: “Duol sa Diyos, ug siya moduol kaninyo.” (Sant. 4:8) Gimahal ta ni Jehova, ug siya nag-ingon nga siya ang kinamaayohang Amahan nga puwede natong mabatonan. Si Jesus makatabang nato nga mas masuod kang Jehova. Siya nakaila pag-ayo kang Jehova ug hingpit niyang gisundog ang Iyang mga hiyas mao nga siya miingon: “Kadtong nakakita kanako nakakita usab sa Amahan.” (Juan 14:9) Samag atong magulang, gitudloan ta ni Jesus kon unsaon pagtahod ug pagsunod sa atong Amahan, kon unsaon nga dili Siya mapasuko, ug kon unsaon nga mabatonan ang Iyang pag-uyon. Pero ang tibuok kinabuhi ni Jesus dinhi sa yuta ilabinang nagpakita kon unsa ka buotan ug ka mahigugmaon si Jehova. w21.09 21 ¶4-5

Ang katawhan ni Jehova nagkahiusa sa pagsimba sa bugtong matuod nga Diyos. Gihatagan ni Jehova ang mga ansiyano ug bug-at nga responsibilidad sa pagmentinar sa kahinlo sa kongregasyon. Kon ang usa ka Kristohanon makahimog seryosong sala, gidahom ni Jehova nga susihon sa mga ansiyano kon angay ba siyang magpabilin sa kongregasyon. Kinahanglan pod nilang susihon kon naghinulsol ba gyod siya sa iyang sala. Moingon tingali siya nga naghinulsol siya, pero gidumtan ba gyod niya ang iyang gihimo? Naningkamot ba siya nga dili otrohon ang iyang sala? Kon naimpluwensiyahan siya sa pagpakasala tungod sa dili maayong mga higala, andam ba siyang mobiya nila? Ang mga ansiyano mag-ampo kang Jehova, ug ilang konsiderahon ang detalye sa nahitabo base sa giingon sa Bibliya. Susihon pod nila kon unsay gibati sa nakasala bahin sa iyang gihimo. Dayon modesisyon sila kon ang nakasala angay bang magpabilin sa kongregasyon. Naay mga kahimtang nga kinahanglan gyod siyang i-disfellow.​—1 Cor. 5:11-13. w22.02 5 ¶11-12

Bag-o man tang nabawtismohan o dugay na, gusto natong tanan nga maugmad ang personalidad nga ganahan ni Jehova. Aron mahimo nâ, kinahanglang kontrolahon nato ang atong hunahuna. Ngano? Kay ang atong hunahuna dakog epekto sa atong personalidad. Kon pirme tang maghunahuna sa mga butang nga makapukaw ug makasasalang tinguha, makasulti ug makahimo tag dili maayo. (Efe. 4:17-19) Pero kon maghunahuna tag maayong mga butang, ang atong sinultihan ug binuhatan mas makapalipay sa atong Amahan, si Jehova. (Gal. 5:16) Ugaling lang, di kalikayan nga usahay makasulod sa atong hunahuna ang dili maayong mga butang. Pero kaya nato nang suklan. Sa dili pa ta mabawtismohan, kinahanglan nga undangon na nato ang sinultihan ug binuhatan nga gidumtan ni Jehova. Kana ang una ug pinakaimportanteng paagi nga atong mahukas ang daang personalidad. Pero aron mapalipay gyod nato si Jehova, kinahanglan pod natong isul-ob ang bag-ong personalidad. w22.03 8 ¶1-2

Dili sayon para sa mga ansiyano ang pagkahibalo kon ang usa nga nakahimog seryosong sala tinuod nga naghinulsol. Ngano? Ang mga ansiyano dili makabasag kasingkasing, busa kinahanglan silang mangitag ebidensiya nga nabag-o na gyod ang panglantaw sa ilang igsoon bahin sa iyang sala. Kinahanglan silang makakitag ebidensiya nga nabag-o na gyod ang panghunahuna, pagbati, ug binuhatan sa nakasala. Tingali dangtag taastaas nga panahon aron mahimo niya ang gikinahanglang mga kausaban. Aron ipakita nga tinud-anay ang iyang paghinulsol, ang na-disfellow angayng motambong pirme sa mga tigom ug mosunod sa tambag sa mga ansiyano nga regular nga mag-ampo ug magtuon sa Bibliya. Maningkamot sab siya nga likayan ang mga sirkumstansiya nga maoy hinungdan sa iyang sala. Kon maningkamot siya nga mahibalik ang iyang maayong relasyon kang Jehova, makaseguro siya nga bug-os siyang pasayloon ni Jehova ug nga tabangan siya sa mga ansiyano nga mapasig-uli sa kongregasyon. w21.10 6 ¶16-18

Kay gihigugma pag-ayo ni Jesus si Jehova nga Diyos, si Jehova lang ang iyang gisimba, niadtong didto siya sa langit ug dihang dinhi siya sa yuta. (Luc. 4:8) Gitudloan niya ang iyang mga tinun-an nga himoon sab kana. Si Jesus ug ang iyang matinumanong mga tinun-an wala gyod mogamit ug mga imahen diha sa pagsimba. Ang Diyos maoy Espiritu, busa walay tawong makahimog bisan unsa nga puwedeng magrepresentar sa himaya ni Jehova! (Isa. 46:5) Pero komosta ang paghimog mga imahen niadtong giisip sa pipila ingong mga santos ug pag-ampo niana? Sa ikaduhang sugo sa Napulo ka Sugo, gisulti ni Jehova ang mga pulong sa teksto karong adlawa. Kining mga pulonga nagpakita nga kadtong gustong mapalipay ang Diyos dili angayng mosimba ug mga imahen. Ang mga historyano nag-ingon nga ang Diyos ray gisimba sa mga Kristohanon sa unang siglo. Karon, ang mga Saksi ni Jehova nagsunod sa sumbanan nga gihatag sa mga Kristohanon sa unang siglo. w21.10 19-20 ¶5-6

Gipasidan-an ni Jesus ang mga Kristohanon sa unang siglo nga nagpuyo sa Judea nga moabot ang panahon nga ang siyudad sa Jerusalem ‘libotan sa nagkampong kasundalohan.’ (Luc. 21:20-24) Dihang mahitabo kana, kinahanglan silang “moikyas ngadto sa kabukiran.” Kon moikyas sila, maluwas ang ilang kinabuhi. Pero daghan silag kinahanglang biyaan. Pipila ka tuig kanhi, ang Bantayanang Torre nag-ingon: “Gibiyaan nila ang mga umahan ug kabalayan, nga wala gani magkuha sa ilang mga kabtangan gikan sa ilang kabalayan. Masaligon sa panalipod ug pagpaluyo ni Jehova, ilang giuna ang pagsimba kaniya kay sa laing mga butang nga morag hinungdanon tingali.” Kini midugang: “Mahimong dunay mga pagsulay sa unahan bahin sa kon unsaon nato paglantaw ang materyal nga mga butang; kini ba ang labing hinungdanong butang, o ang kaluwasan nga modangat sa tanan nga dapig sa Diyos mao ang labi pang hinungdanon? Oo, ang atong pagkalagiw maglangkit tingali ug pipila ka kalisdanan ug mga [sakripisyo]. Magmaandam kita sa pagbuhat sa bisan unsa nga gikinahanglan.” w22.01 4 ¶7-8

Wala madugay human mobiya ang mga Israelinhon sa Ehipto, gipaila ni Jehova ang iyang kaugalingon kang Moises pinaagi sa pagsulti sa Iyang ngalan ug mga hiyas. Siya miingon: “Si Jehova, si Jehova, Diyos nga maluluy-on ug mabination, dili daling masuko ug dagaya sa maunongong gugma ug kamatuoran, nagapakitag maunongong gugma sa linibo ka henerasyon, nagapasaylo sa kasaypanan ug kalapasan ug kasal-anan.” (Ex. 34:6, 7) Pinaagi niining nindot nga deskripsiyon sa Iyang mga hiyas, may gipadayag si Jehova kang Moises nga talagsaon kaayo bahin sa Iyang maunongong gugma. Unsa kini? Si Jehova wala lang mag-ingon nga duna siyay maunongong gugma kondili nga siya “dagaya sa maunongong gugma.” Kana nga deskripsiyon makita pag daghang beses diha sa Bibliya. (Num. 14:18; Neh. 9:17; Sal. 86:15; 103:8; Joel 2:13; Jon. 4:2) Sa matag higayon nga gigamit kini nga deskripsiyon, si Jehova lang ang gitumong, dili ang mga tawo. Makapainteres gyod nga sagad gipaila ni Jehova ang iyang kaugalingon nianang paagiha. w21.11 2-3 ¶3-4

Ang mga magtiayon makakat-on sa ehemplo ni apostol Pedro ug sa iyang asawa. Mga unom ka bulan ngadto sa usa ka tuig human niya makaila si Jesus, si apostol Pedro kinahanglang mohimog importanteng desisyon. Si Pedro nagtrabaho ingong mangingisda aron tagan-an ang panginahanglan sa iyang panimalay. Busa dihang gidapit siya ni Jesus nga mahimong iyang sumusunod, kinahanglang konsiderahon ni Pedro ang iyang asawa. (Luc. 5:1-11) Midesisyon si Pedro nga mouban kang Jesus sa iyang buluhatong pagsangyaw. Ug segurado nga ang asawa ni Pedro misuportar sa iyang desisyon. Gipakita sa Bibliya nga human mabanhaw si Jesus, ang asawa ni Pedro mikuyog niya sa pipila ka panahon. (1 Cor. 9:5) Segurado nga ang iyang ehemplo ingong Kristohanong asawa nakahatag kang Pedro ug kagawasan sa pagsulat ug tambag alang sa Kristohanong mga bana ug asawa. (1 Ped. 3:1-7) Dayag nga si Pedro ug ang iyang asawa misalig sa saad ni Jehova nga Siya magtagana sa ilang panginahanglan kon unahon nila ang Gingharian.​—Mat. 6:31-34. w21.11 18 ¶14

Gimahal ni apostol Pablo ang mga igsoon. Naningkamot siya sa pag-atiman kanila. (Buh. 20:31) Tungod ana, gimahal pag-ayo sa mga igsoon si Pablo. Kas-a, ang mga ansiyano sa Efeso “nanghilak pag-ayo” pagkahibalo nila nga dili na nila siya makita pag-usab. (Buh. 20:37) Karon pod, gimahal pag-ayo sa atong kugihang mga ansiyano ang mga igsoon ug ilang ginahimo ang ilang maarangan sa pagtabang kanila. (Filip. 2:16, 17) Pero usahay dili sayon para sa mga ansiyano nga himoon ang tanan nilang buluhaton. Unsay makatabang nila? Ang atong kugihang mga ansiyano makakat-on sa ehemplo ni Pablo. Tawo ra pod siya parehas nato. Dili siya perpekto, ug naay mga higayon nga naglisod siya sa paghimo kon unsay husto. (Roma 7:18-20) Ug nakaeksperyensiya pod siyag daghang kalisdanan. Pero wala moundang si Pablo sa pagtabang sa mga igsoon. Wala pod niya tugoti nga mawala ang iyang kalipay. Pinaagi sa pagsundog kang Pablo, makaya sa mga ansiyano ang ilang mga kalisdanan ug magpabilin silang malipayon sa pag-alagad kang Jehova. w22.03 26 ¶1-2

Ang Levitico 19:3 naghisgot sa pagtuman sa Igpapahulay. Ang mga Kristohanon wala na mailalom sa Balaod, busa wala tay senemanang Igpapahulay. Bisan pa niana, daghan tag makat-onan kon giunsa pagtuman sa mga Israelinhon ang Igpapahulay ug kon sa unsang paagi sila nakabenepisyo sa paghimo niana. Ang Igpapahulay maoy panahon sa pagpahulay gikan sa adlaw-adlawng mga buluhaton ug sa paghatag ug pagtagad sa espirituwal nga mga butang. Kanay hinungdan nga panahon sa Igpapahulay, si Jesus moadto sa sinagoga sa iyang lungsod ug magbasa sa Pulong sa Diyos. (Ex. 31:12-15; Luc. 4:16-18) Ang tambag sa Diyos diha sa Levitico 19:3 nga ‘tumanon ang iyang mga igpapahulay’ angayng magpalihok nato sa pagkuhag panahon gikan sa adlaw-adlawng kalihokan aron makahatag tag dugang pagtagad sa espirituwal nga mga butang. Gibati ba nimo nga kinahanglan kang mohimog mga kausaban nianang bahina? Kon regular kang maggahin ug panahon sa espirituwal nga mga butang, maugmad nimo ang suod nga relasyon kang Jehova nga gikinahanglan sa pagkahimong balaan. w21.12 5 ¶13

Samtang dinhi pa si Jesus sa yuta, siya nakig-uban sa tanang klase sa tawo. Mikaon siya uban sa mga dato ug may awtoridad, pero pirme sab siyang makig-uban sa mga pobre ug dinaogdaog. Dugang pa, siya maluluy-on niadtong giisip sa kadaghanan ingong “makasasala.” Ang pipila nga mapahitas-on napandol sa gibuhat ni Jesus. Sila nangutana sa iyang mga tinun-an: “Nganong mikaon ug miinom man mo uban sa mga maniningil ug buhis ug sa mga makasasala?” Sa pagtubag, gisulti ni Jesus ang mga pulong sa teksto karong adlawa. (Luc. 5:29-31) Sa wala pa moabot si Jesus, dugay nang gitagna ni Isaias nga ang Mesiyas isalikway sa kalibotan. Ang tagna nag-ingon: “Siya gitamay ug gilikayan sa mga tawo . . . Daw gitago ang iyang nawong gikan kanamo. Siya gitamay, ug giisip namo siya nga walay hinungdan.” (Isa. 53:3) Sumala sa tagna, ang Mesiyas likayan sa “mga tawo,” busa ang mga Hudiyo sa unang siglo angay untang magdahom nga si Jesus isalikway. w21.05 8-9 ¶3-4

Dihay pipila ka Kristohanon nga hinayng mopadapat sa mga tambag. (Sant. 1:22) Ang uban nagpakitag paboritismo sa mga dato. (Sant. 2:1-3) Diha poy nalisdan sa pagkontrolar sa ilang dila. (Sant. 3:8-10) Ang maong mga Kristohanon may seryosong mga kahuyangan, pero si Santiago wala mawad-ig paglaom nga magbag-o sila. Gihatag niya ang iyang tambag sa malumo pero prangka nga paagi, ug gidasig niya kadtong naluya sa espirituwal nga mangayog tabang sa mga ansiyano. (Sant. 5:13, 14) Ang leksiyon: Magmarealistiko, pero magpabiling positibo sa imong panglantaw sa uban. Daghan niadtong mga nagtuon sa Bibliya ang malisdan tingali sa pagpadapat sa mga tambag niini. (Sant. 4:1-4) Dangtan tingalig pipila ka panahon una nila mahunong ang daotang mga kinaiya ug mapulihan kanag Kristohanong mga hiyas. Kinahanglang duna tay kaisog sa pagsulti sa atong mga study kon unsay angay nilang pauswagon. Kinahanglan sab tang magpabiling positibo, nga masaligon nga si Jehova magkabig sa mapainubsanong mga tawo ug maghatag kanilag kusog sa paghimog mga kausaban.​—Sant. 4:10. w22.01 11 ¶11-12

Ang tanang Kristohanon gustong magmaluluy-on sama kang Jehova. Ngano? Ang usa ka rason mao nga si Jehova dili maminaw niadtong dili magpakitag kaluoy sa uban. Gusto nato nga paminawon ni Jehova ang atong mga pag-ampo, busa likayan gyod nato ang pagkadili-maluluy-on. Imbes dili magpakabana sa pag-antos sa atong igsoon, kinahanglan nga kanunay tang andam maminaw sa “tawong makaluluoy nga nagpakitabang.” Sa susama, maningkamot ta sa pagpadapat niini nga prinsipyo sa Bibliya: “Ang usa nga dili magpakitag kaluoy hukman nga walay kaluoy.” (Sant. 2:13) Kon hinumdoman nato nga nagkinahanglan gyod tag kaluoy, mahimong mapalihok ta sa pagpakitag kaluoy. Ilabinang gusto natong magpakitag kaluoy dihang ang mahinulsolong makasasala mobalik sa kongregasyon. Ang mga ehemplo sa Bibliya niadtong mga buotan ug maluluy-on makatabang nato sa pagpakitag kaluoy. w21.10 12 ¶16-17

Sa kataposang gabii ni Jesus sa yuta, dihang natapos na ang iyang ministeryo, nangita na pod siyag hilom nga lugar aron mamalandong ug mag-ampo. Ingon ana ang kahimtang sa tanaman sa Getsemane. Nianang higayona, gihatagan ni Jesus ang iyang mga tinun-an ug importante kaayong tambag bahin sa pag-ampo. Pag-abot nila sa tanaman sa Getsemane, gabii na kaayo, tingali lapas na sa tungang gabii. Giingnan ni Jesus ang mga apostoles nga ‘magpadayon sa pagbantay,’ ug siya milakaw aron mag-ampo. (Mat. 26:37-39) Pero samtang nag-ampo si Jesus, sila nakatulog. Dihang nakita niya sila nga nangatulog, giawhag na pod niya sila nga ‘magpadayon sa pagbantay ug sa pag-ampo.’ (Mat. 26:40, 41) Siya nahibalo nga sila na-stress ug gikapoy pag-ayo, ug mabination niyang giila nga “luya ang unod.” Bisan pa niana, duha pa ka higayon nga si Jesus milakaw aron mag-ampo, ug pagbalik niya, naabtan niya ang iyang mga tinun-an nga nangatulog pag-usab imbes mag-ampo.​—Mat. 26:42-45. w22.01 28 ¶10-11