Disyembre

Gitandi ni Jesus ang iyang relasyon sa iyang mga sumusunod ngadto sa suod nga relasyon tali sa magbalantay ug sa mga karnero niini. (Juan 10:14) Haom nâ nga pagtandi. Ang mga karnero nakaila sa ilang magbalantay ug mamati sa iyang tingog. Naobserbahan nâ mismo sa usa ka turista. Siya miingon: “Gusto namong letratohan ang mga karnero ug amo silang gitawag aron moduol namo. Pero wala sila moduol kay wala sila kaila sa among tingog. Dayon, miabot ang usa ka batang magbalantay. Pagtawag niya sa mga karnero, misunod dayon sila.” Ang naobserbahan sa maong turista nagpahinumdom nato sa giingon ni Jesus bahin sa iyang mga karnero—ang iyang mga tinun-an. Siya miingon: “Sila mamati sa akong tingog.” Pero si Jesus tua sa langit. Busa unsaon nato pagpamati kaniya? Ang usa ka importanteng paagi nga ikapakita nato nga namati ta sa tingog sa atong Agalon mao ang pagpadapat sa mga butang nga iyang gitudlo.​—Mat. 7:24, 25. w21.12 16 ¶1-2

Sa wala pa mahimong Kristohanon si apostol Pablo, gilutos niya pag-ayo ang mga alagad sa Diyos. Pero sa ulahi, giila niya nga sayop ang iyang gihimo ug andam siyang magbag-o sa iyang panghunahuna ug personalidad. (1 Tim. 1:12-16) Sa tabang ni Jehova, si Pablo nahimong mahigugmaon, maluluy-on, ug mapainubsanong ansiyano. Imbes magsigeg hunahuna sa iyang mga kahuyangan, misalig siya nga gipasaylo siya ni Jehova. (Roma 7:21-25) Kabalo si Pablo nga masayop gyod siya. Pero naningkamot siya nga mapauswag ang iyang Kristohanong personalidad ug mapainubsanong misalig sa tabang ni Jehova aron matuman niya ang iyang buluhaton. (1 Cor. 9:27; Filip. 4:13) Si Jehova wala magdahom nga perpekto ang mga ansiyano. Pero nagdahom siya nga ilhon nila ang ilang kasaypanan ug ugmaron ang Kristohanong personalidad. (Efe. 4:23, 24) Angayng susihon sa ansiyano ang iyang kaugalingon base sa iyang nakat-onan sa Bibliya ug himoon ang gikinahanglang mga kausaban. Unya tabangan siya ni Jehova nga magmalipayon ug mahimong maayong ansiyano.​—Sant. 1:25. w22.03 29-30 ¶13-15

Unsay angay natong buhaton kon atong maamgohan nga atong gihukman ang usa ka igsoon? Angay natong hinumdoman nga gisugo ta nga higugmaon ang atong mga igsoon. (Sant. 2:8) Kinahanglan sab nga kinasingkasing tang mag-ampo kang Jehova ug hangyoon siya nga tabangan ta nga dili na manghukom. Ikapakita nato nga milihok ta uyon sa atong mga pag-ampo pinaagi sa paggahin ug panahon sa pagpakig-uban sa igsoon nga atong gihukman. Puwede nato siyang dapiton nga makig-uban nato sa pagsangyaw o sa pagpangaon. Samtang maningkamot ta nga mas mailhan ang atong igsoon, puwede natong sundogon si Jehova ug Jesus pinaagi sa pagpokus sa iyang maayong mga hiyas. Niining paagiha, atong gipakita nga namati ta sa sugo sa maayong magbalantay nga dili na manghukom. Sama nga ang mga karnero mamati sa tingog sa ilang magbalantay, ang mga sumusunod ni Jesus mamati sa iyang tingog. Bahin man ta sa “gamayng panon” o sa “ubang mga karnero,” hinaot nga padayon tang mamati sa tingog sa maayong magbalantay.​—Luc. 12:32; Juan 10:11, 14, 16. w21.12 19 ¶11; 20-21 ¶17-18

Dihang si Rehoboam nahimong hari sa Israel, ang iyang mga sakop mihangyo nga pagaanon niya ang gipangayo sa iyang amahan nga si Solomon. Ug maayo ang gihimo ni Rehoboam kay mikonsulta siya sa mga ansiyano sa Israel kon unsay iyang itubag sa mga tawo. Gitambagan sa mga ansiyano ang hari nga kon ihatag niya ang gipangayo sa mga tawo, padayon silang mosuporta niya. (1 Hari 12:3-7) Pero wala maangayi ni Rehoboam ang ilang tambag, mao nga mikonsulta siya sa mga lalaki nga kaedad niya. Ila siyang gitambagan nga mas pabug-atan pa ang mga tawo. (1 Hari 12:9-11) Angay untang mag-ampo si Rehoboam kang Jehova kon asa niana ang iyang sundon. Pero iya hinuong gidawat ang tambag sa iyang mga kaedad. Miresulta tog dili maayo para kang Rehoboam ug sa katawhan sa Israel. Sa ato pong bahin, makadawat tingali tag tambag nga dili maoy atong gusto. Pero kon gibase ni sa Pulong sa Diyos, angay nato ning dawaton. w22.02 9 ¶6

Ang tawo nga mapainubsanon ug makasaranganon magpokus, dili sa kakulag eksperyensiya sa mga batan-on, kondili sa kaya nilang himoon. Isipon niya sila, dili ingong mga kakompetensiya, kondili ingong mga isigkamagbubuhat. Ang mga tigulang nag-isip sa mga batan-on ingong regalo gikan kang Jehova ug mapasalamaton sila sa ginahimo sa mga batan-on. Samtang magkaluya ang mga tigulang, mapasalamaton sila nga dunay baskog pang mga batan-on nga andam mohimo sa mga buluhaton ug moalagad sa kongregasyon. Ang karakter sa Bibliya nga si Noemi maoy maayo kaayong ehemplo sa usa ka tigulang nga mapasalamatong midawat ug tabang gikan niadtong batabata pa. Sa sinugdan, giawhag ni Noemi ang iyang biyuda nga umagad, si Ruth, nga mopauli sa pamilya niini. Pero sa dihang miinsistir si Ruth nga mouban kang Noemi sa pagpauli sa Betlehem, gidawat niya ang tabang ni Ruth. (Ruth 1:7, 8, 18) Ug nakahatag gyod tog kaayohan nilang duha! (Ruth 4:13-16) Ang pagkamapainubsanon magpalihok sa mga tigulang sa pagsundog kang Noemi. w21.09 10-11 ¶9-11

Ang atong Amahan sa langit nakasabot nga lainlain tag kayang himoon. Tingali mas daghan kag mahimo kay sa uban. O kaha mas gamay ra ang imong mahimo tungod sa imong edad, panglawas, o mga responsibilidad sa pamilya. Pero ayawg kaluya. (Gal. 6:4) Dili gyod kalimtan ni Jehova ang imong ginahimo para niya. Kon himoon nimo ang tanan nimong maarangan ug maayo ang imong motibo, malipay siya niana. Makita ni Jehova bisan ang naa sa imong kasingkasing. Gusto niya nga malipay ka sa kon unsay kaya nimong ihatag sa pagsimba kaniya. Naa tay kalinaw sa hunahuna kay nahibalo ta nga si Jehova motabang nato dihang makaatubang tag mga problema. (Isa. 41:9, 10) Naa gyod tay mga rason nga magmalipayon sa atong pagsimba sa atong mahigugmaong Amahan, nga takos “modawat sa himaya ug sa dungog” gikan sa tanan niyang linalang!​—Pin. 4:11. w22.03 24 ¶16; 25 ¶18

Gusto natong sundogon si Jesus, pero dili ta angayng maluya kon dili nato siya perpektong masundog. (Sant. 3:2) Ang usa nga nagtuon ug painting dili gyod perpektong makasundog sa gihimo sa iyang maestro. Pero kon mokat-on siya sa iyang sayop ug maningkamot nga mosundog sa ehemplo sa iyang maestro kutob sa iyang maarangan, mouswag siya. Kon ato pong ipadapat ang atong nakat-onan sa Bibliya ug maningkamot nga mouswag, atong masundog pag-ayo ang ehemplo ni Jesus. (Sal. 119:59) Daghan sa mga tawo karon kaugalingon ray gihunahuna. Pero lahi ang katawhan ni Jehova. Natandog gyod ta sa pagsakripisyo ni Jesus ug gusto nato siyang sundogon. (1 Ped. 2:21) Kon himoon nato ang atong maarangan sa pagsundog kang Jesus, magmalipayon ta kay uyonan ta ni Jehova. w22.02 24 ¶16; 25 ¶18

Si Jehova naghatag ug instruksiyon sa iyang katawhan pinaagi sa iyang Pulong, ang Bibliya. Kon mogahin tag panahon nga pamalandongon ang ginatudlo ni Jehova, masunod nato ang iyang instruksiyon ug matuman nato ang atong ministeryo. (1 Tim. 4:15, 16) Si Jehova naghatag pod ug instruksiyon pinaagi sa “matinumanon ug maalamong ulipon.” (Mat. 24:45) Usahay, kini nga ulipon mohatag tingali ug instruksiyon nga dili kaayo nato masabtan. Pananglitan, makadawat tingali tag espesipikong mga instruksiyon kon unsaon pagpangandam sa kalamidad nga sa atong hunahuna dili mahitabo sa atong lugar. Unsay angay natong himoon kon maghunahuna ta nga dili praktikal ang gihatag nga mga instruksiyon? Pamalandonga ang mga estorya sa Bibliya nga atong nabasa. Usahay, ang katawhan sa Diyos makadawat ug instruksiyon nga morag dili praktikal sa panan-aw sa tawo pero makaluwas diay.​—Maghu. 7:7; 8:10. w22.03 18 ¶15-16

Uban ang bug-os nga pagsalig, giingon ni Jesus ang mga pulong sa teksto karong adlawa. Nahibalo si Jesus nga ang iyang kinabuhi sa umaabot nagdepende kang Jehova, ug segurado siya nga hinumdoman siya sa iyang Amahan. Unsay atong makat-onan sa gisulti ni Jesus? Magpabiling maunongon kang Jehova bisan pag mameligro ang imong kinabuhi. Aron mahimo kana, kinahanglan kang ‘mosalig kang Jehova sa bug-os nimong kasingkasing.’ (Prov. 3:5) Konsideraha ang ehemplo ni Joshua, usa ka 15 anyos nga Saksi nga may makamatayng sakit. Gibalibaran niya ang mga paagi sa pagtambal nga supak sa balaod sa Diyos. Sa hapit na siyang mamatay, giingnan niya ang iyang inahan: “Ma, ako anaa sa mga kamot ni Jehova. . . . Ako nasayod nga si Jehova seguradong magbanhaw kanako. Iyang nabasa ang akong kasingkasing, ug ako nahigugma gayod kaniya.” Ang matag usa kanato kinahanglang mangutana sa kaugalingon, ‘Kon makaatubang kog mga pagsulay sa akong pagtuo nga magpameligro sa akong kinabuhi, itugyan ba nako kang Jehova ang akong kinabuhi ug mosalig nga hinumdoman ko niya?’ w21.04 12-13 ¶15-16

Ang katawhan ni Jehova napalig-on pinaagi sa ministeryo. Sa dihang isulti nato sa uban ang mga kamatuoran sa Bibliya, kita marepreskohan ug madasig, maminaw man sila o dili. Tungod sa ilang mga sirkumstansiya, ang pipila mobati tingali nga gamay ra silag mahimo sa ministeryo. Kon mao nay imong gibati, hinumdomi nga si Jehova malipay kon buhaton nimo ang imong kinamaayohan. Nakita ug naapresyar ni Jehova ang atong tinguha nga makigbahin sa ministeryo bisan pag dili ta makagawasgawas sa balay. Makatabang siya nato sa pagsangyaw niadtong nag-atiman kanato o sa mga doktor ug nars. Kon ikomparar nato ang atong mahimo karon sa atong nahimo kaniadto, basig maluya ta. Pero kon atong maamgohan kon giunsa ta pagtabang ni Jehova karon, mabatonan nato ang kusog nga atong gikinahanglan sa paglahutay sa bisan unsang kalisdanan uban ang kalipay. Wala ta mahibalo kon hain sa mga binhi sa kamatuoran nga atong gipugas ang moturok ug motubo.​—Eccl. 11:6. w21.05 24-25 ¶14-17

Tungod sa kahakog, si Haring David nakalimot kon unsay gihatag ni Jehova kaniya, apil ang bahandi, pagkainila, ug kadaogan batok sa iyang mga kaaway. Mapasalamatong giila ni David nga ang gihatag ni Jehova kaniya “dili . . . masugid sa kadaghan!” (Sal. 40:5) Pero dihay higayon nga nalimot si David kon unsay gihatag ni Jehova kaniya. Bisag daghan nag asawa si David, gitugotan niya nga maugmad sa iyang kasingkasing ang sayop nga tinguha para sa asawa sa laing tawo. Ang babaye mao si Bat-seba, ug ang iyang bana mao si Urias nga Hitihanon. Tungod sa kahakog, si David nakigsekso kang Bat-seba ug namabdos kini. Daotan kaayo ang gihimo ni David, pero mihimo siyag grabe pa niana. Iyang gihikay nga mapatay si Urias! (2 Sam. 11:2-15) Nganong nahimo man to ni David? Nagtuo ba siya nga di siya makita ni Jehova? Bisag dugay na siyang nag-alagad kang Jehova, nadaog siya sa kahakog ug tungod niana nag-antos siya. Pero, makapalipay nga giangkon ra ni David ang iyang sala ug naghinulsol siya. Mapasalamaton kaayo siya nga gipasaylo siya ni Jehova!​—2 Sam. 12:7-13. w21.06 17 ¶10

Wala tingali tay kompiyansa sa atong katakos sa pagdumalag pagtuon sa Bibliya. Basin mibati ta nga nagkinahanglan pa tag dugang kahibalo o katakos aron makatudlo sa uban. Kon kanay imong gibati, konsideraha ang tulo ka butang nga makahatag nimog kompiyansa. Una, giisip ka ni Jehova nga kuwalipikadong motudlo sa uban. Ikaduha, si Jesus, kinsa nakabaton sa “tanang awtoridad sa langit ug sa yuta,” nag-awtorisar kanimo sa pagtudlo. (Mat. 28:18) Ug ikatulo, makasalig ka nga tabangan ka sa uban. Si Jesus misalig sa gitudlo sa iyang Amahan nga iyang isulti, busa makasalig sab ka kang Jehova alang sa tabang. (Juan 8:28; 12:49) Dugang pa, makahangyo ka sa inyong tigdumala sa grupo sa pagsangyaw, sa kuwalipikadong payunir, o sa eksperyensiyadong magmamantala nga tabangan ka sa pagsugod ug pagdumalag pagtuon sa Bibliya. Ang pag-uban sa pagtuon nga gidumala niini nga mga igsoon maoy usa ka paagi nga makabaton kag kompiyansa sa pagdumalag pagtuon. w21.07 6 ¶12

Hapit na kaayo ang kataposan niining daotang kalibotan, maong mas labaw na nga kinahanglan tang mosalig karon sa pamaagi ni Jehova. Ngano? Sa dakong kasakitan, makadawat tingali tag mga instruksiyon nga morag dili haom o dili praktikal. Siyempre, dili direktang makig-estorya nato si Jehova. Posibleng maghatag siyag direksiyon pinaagi sa mga brader nga iyang gitudlo nga manguna kanato. Dili nâ ang panahon nga magduhaduha sa direksiyon o moingon, ‘Desisyon ba gyod ni ni Jehova, o ila ra ning kaugalingong desisyon?’ Nianang importante kaayong panahon, mosalig ba ka kang Jehova ug sa iyang organisasyon? Ang tubag magdepende sa kon unsay imong pag-isip karon sa mga direksiyon sa organisasyon. Kon mosalig ug mosunod dayon ka sa mga direksiyon karon, posibleng mao pod nay imong buhaton panahon sa dakong kasakitan. w22.02 6 ¶15

Gitabangan ni Jehova si Gideon ug ang iyang 300 ka sundalo nga makadaog sa gubat, nga puwede unta nilang ikapasigarbo. Ang mga lalaki sa tribo ni Epraim nakigkita kang Gideon, dili aron komendahan siya, kondili aron makig-away niya kay wala sila dapita nga moapil sa pagpakiggubat. (Maghu. 8:1) Gihatagan sila ni Gideon ug espesipikong pananglitan kon giunsa sila pagpanalangin ni Jehova. Ingong resulta, sila “mikalma.” (Maghu. 8:3) Gitulon ni Gideon ang iyang garbo aron mamentinar ang kalinaw taliwala sa katawhan sa Diyos. Atong makat-onan sa mga taga-Epraim nga dili ta angayng magpokus sa pagpanalipod sa atong kadungganan, kondili sa kadungganan ni Jehova. Kitang mga ulo sa pamilya ug mga ansiyano dunay makat-onan kang Gideon. Kon dunay masuko sa atong gihimo, angay natong sabton kon nganong mao nay iyang gibati. Puwede sab natong komendahan ang maong tawo sa iyang maayong nahimo. Kinahanglan tang magmapainubsanon aron mahimo kana. Pero ang kalinaw mas importante kay sa atong dungog. w21.07 16-17 ¶10-12

Gipakita ni Jehova nga importante ta kaniya pinaagi sa pagbuhat kanato sumala sa iyang larawan. Kay gibuhat ta sumala sa larawan sa Diyos, maugmad ug mapakita nato ang daghan sa iyang nindot nga mga hiyas, sama sa gugma, kaluoy, pagkamaunongon, ug pagkamatarong. (Sal. 86:15; 145:17) Sa dihang ugmaron nato ang maong mga hiyas, atong gipasidunggan si Jehova ug gipakita nga mapasalamaton ta kaniya. (1 Ped. 1:14-16) Dihang molihok ta sa paagi nga makapalipay sa atong langitnong Amahan, kita magmalipayon ug mobatig katagbawan. Ug kay gibuhat ta ni Jehova sumala sa iyang larawan, puwede tang mahimong klase sa mga tawo nga gusto niyang mahimong bahin sa iyang pamilya. Si Jehova nag-andam ug espesyal nga puy-anan para kanato. Dugay nang naandam ni Jehova ang yuta para sa mga tawo sa wala pa niya lalanga si Adan. (Job 38:4-6; Jer. 10:12) Kay siya mahunahunaon ug mahinatagon, daghang maayong mga butang ang gitagana ni Jehova aron malipay ta. (Sal. 104:14, 15, 24) May mga higayon nga namalandong siya sa iyang gipanglalang, ug iyang “nakita . . . nga kini maayo.”​—Gen. 1:10, 12, 31. w21.08 3 ¶5-6

Kitang tanan gisugo sa pagsangyaw ug paghimog mga tinun-an. (Mat. 28:19, 20; Roma 10:14) Gusto ba nimong pauswagon ang imong kahanas niining importante kaayo nga buluhaton? Pagtakdag espesipikong mga tumong samtang imong tun-an ug ipadapat ang imong makat-onan sa brosyur nga Pagpanudlo. Sa dihang magtakdag mga tumong, ayawg kalimti nga usa sa labing importante mao ang pag-ugmad ug Kristohanong mga hiyas. (Col. 3:12; 2 Ped. 1:5-8) Seguradong kitang tanan gustong mohimog labaw pa para kang Jehova kay sa atong mahimo karon. Sa bag-ong kalibotan, makahimo na ta sa pag-alagad kaniya sa bug-os. Sa pagkakaron, kon pahimuslan nato ang bisan unsang kahigayonan nga bukas kanato, puwedeng madugangan ang atong kalipay ug mamenosan ang atong pagkadismayar. Labaw sa tanan, atong mapasidunggan ug madayeg si Jehova, ang atong “malipayong Diyos.” (1 Tim. 1:11) Busa maningkamot ta nga magmalipayon sa mga pribilehiyo nga atong nabatonan! w21.08 25 ¶18-20

Kon gipadako ka ingong Saksi ni Jehova, tingali nakakat-on ka bahin kang Jehova sukad sa bata pa ka. Gitudloan ka nga siya ang Maglalalang, nga siya dunay nindot nga mga hiyas, ug nga duna siyay mahigugmaong katuyoan para sa katawhan. (Gen. 1:1; Buh. 17:24-27) Pero daghan ang dili motuo nga dunay Diyos o nga siya ang Maglalalang. Hinunoa, sila nagtuo nga ang kinabuhi mitungha lag iya ug nagsugod gikan sa simple kaayong mga matang hangtod nga nahimo kining komplikadong mga matang sa kinabuhi. Ang pipila nga nagtuo niini edukado kaayo. Moingon tingali sila nga gipamatud-an na sa siyensiya nga sayop ang Bibliya ug nga kadto lang way grado, dili intelihente, o daling malimbongan ang motuo sa Maglalalang. Bisag unsa na ta ka dugay nga nag-alagad kang Jehova, kinahanglan nga padayon natong palig-onon ang atong pagtuo. Kon himoon nato nâ, dili ta malimbongan sa “pilosopiya ug sayop nga mga pangatarongan” nga gitudlo niadtong supak sa Pulong sa Diyos.​—Col. 2:8. w21.08 14 ¶1-3

Si Abel, Noe, Abraham, ug Job nagpakita sa ilang pagtahod ug gugma kang Jehova pinaagi sa ilang pagkamasinugtanon, pagtuo, ug mga halad. Klaro nga gihimo nila ang ilang pinakamaayo sa pagpasidungog kang Jehova, ug gidawat niya ang ilang pagsimba. Sa ulahi, gihatag ni Jehova sa mga Israelinhon ang Balaod pinaagi kang Moises. Ang Balaod naghisgot ug mga instruksiyon kon unsay gusto ni Jehova nga paagi sa pagsimba kaniya. Human sa kamatayon ug pagkabanhaw ni Jesus, si Jehova wala na magsugo nga sundon ang Balaod ni Moises. (Roma 10:4) Sundon na sa mga Kristohanon ang bag-ong balaod, ang “balaod sa Kristo.” (Gal. 6:2) Masunod nila ni nga “balaod,” dili pinaagi sa pagsunod sa daghan kaayong sugo, kondili pinaagi sa pagsundog sa ehemplo ni Jesus ug pagpadapat sa iyang mga gitudlo. Karon, ang mga Kristohanon naghimo pod sa tanan nilang maarangan nga magmasinugtanon sa Kristo aron malipay si Jehova ug ‘mobati silag kahayahay.’​—Mat. 11:29. w22.03 20-21 ¶4-5

Si Jehova maminaw sa iyang mga anak. Gidungog niya ang daghang pag-ampo sa iyang Anak sa dinhi pa siya sa yuta. Gidungog niya ang pag-ampo ni Jesus bahin sa importanteng mga desisyon, sama niadtong gipili ni Jesus ang iyang 12 ka apostoles. (Luc. 6:12, 13) Sa dihang nabalaka kaayo si Jesus, gidungog sab ni Jehova ang iyang pag-ampo. Ug sa hapit nang budhian si Jesus, siya kinasingkasing nga nag-ampo sa iyang Amahan bahin sa lisod nga pagsulay nga iyang maagoman. Gidungog ni Jehova ang pag-ampo ni Jesus, ug nagpadala pa gani Siyag anghel aron palig-onon ang Iyang minahal nga Anak. (Luc. 22:41-44) Karon, si Jehova maminaw gihapon sa pag-ampo sa iyang mga alagad, ug tubagon niya sila sa hustong panahon ug sa kinamaayohang paagi. (Sal. 116:1, 2) Tagda kon sa unsang paagi naeksperyensiyahan kini sa usa ka sister sa India. Nag-antos siyag grabeng problema sa emosyon, ug kinasingkasing niya kining giampo kang Jehova. Siya misulat: “Ang Mayo 2019 nga programa sa JW Broadcasting^® bahin sa kon sa unsang paagi maatubang ang kabalaka mao gyoy akong gikinahanglan. Tubag to sa akong mga pag-ampo.” w21.09 21-22 ¶6-7

Maimadyin ba nimo kon unsa ka lisod para sa maong mga Kristohanon sa unang siglo nga biyaan ang halos tanan nilang nabatonan ug magsugod ug bag-ong kinabuhi? Nagkinahanglan silag pagtuo nga itagana ni Jehova ang ilang pangunang mga panginahanglan. Pero dihay nakatabang nila. Lima ka tuig una likosi sa mga Romano ang Jerusalem, gihatagan ni apostol Pablo ang mga Hebreohanon ug maayong tambag: “Ayaw ninyog higugmaa ang kuwarta, hinuon magmakontento mo kon unsay naa ninyo. Kay siya nag-ingon: ‘Dili gyod ka nako biyaan, ug dili gyod ka nako talikdan.’ Busa dili ta mahadlok, hinuon moingon ta: ‘Si Jehova ang akong magtatabang; dili ko mahadlok. Unsay mabuhat sa tawo kanako?’” (Heb. 13:5, 6) Walay duhaduha nga kadtong nagpadapat sa tambag ni Pablo sa wala pa mosulong ang mga Romano mas daling naka-adjust sa simpleng kinabuhi sa ilang bag-ong puy-anan. Segurado sila nga itagana ni Jehova ang ilang pangunang mga panginahanglan. w22.01 4 ¶7, 9

Dihang maghunahuna tag maluluy-on nga tawo, maimadyin tingali nato ang usa nga buotan, mabination, ug mahinatagon. Mosantop pod tingali sa atong hunahuna ang ilustrasyon ni Jesus bahin sa buotang Samarianhon. Kanang tawhana nga taga-laing nasod “nagpakitag kaluoy” sa usa ka Hudiyo nga gitulis. Ang Samarianhon “naluoy” sa gikulata nga Hudiyo ug mahigugmaong nag-atiman kaniya. (Luc. 10:29-37) Kini nga ilustrasyon nagpasiugda sa nindot nga hiyas sa atong Diyos​—ang kaluoy. Kana nga hiyas maoy usa ka ekspresyon sa gugma sa Diyos, ug iya nang gipakita kanato kada adlaw sa daghang paagi. Duna pay laing paagi sa pagpakitag kaluoy. Ang tawong maluluy-on modesisyon tingali nga dili mopahamtang ug silot kon dunay basehanan sa paghimo niana. Sa ingon niana nga paagi, si Jehova nagpakita gyod ug kaluoy kanato. “Wala siya magpahamtang kanatog silot sumala sa atong kasal-anan,” matod pa sa salmista. (Sal. 103:10) Pero usahay, si Jehova mohatag tingalig bug-at nga disiplina sa nakasala. w21.10 8 ¶1-2

Si Jehova nagpakitag maunongong gugma niadto lang dunay suod nga relasyon kaniya​—ang iyang mga alagad. Makita nato ni sa giingon ni Haring David ug ni propetang Daniel. Pananglitan, si David miingon: “Padayong ipakita ang imong maunongong gugma ngadto sa mga nakaila kanimo.” “Ang maunongong gugma ni Jehova maoy hangtod sa hangtod alang niadtong mga nahadlok kaniya.” Ug si Daniel miingon: “Oh Jehova, ang matuod nga Diyos, [kinsa] nagapakitag maunongong gugma niadtong nahigugma kaniya ug nagatuman sa iyang mga sugo.” (Sal. 36:10; 103:17; Dan. 9:4) Base niini nga mga teksto, si Jehova nagpakitag maunongong gugma sa iyang mga alagad kay sila nakaila kaniya, nahadlok kaniya, nahigugma kaniya, ug nagatuman sa iyang mga sugo. Si Jehova nagpakitag maunongong gugma ngadto lang sa iyang katawhan, sa iyang tinuod nga mga magsisimba. Sa wala pa ta mag-alagad kang Jehova, nakabenepisyo ta sa gugma nga gipakita sa Diyos sa tanang tawo. (Sal. 104:14) Pero karon nga nagsimba na ta kaniya, nakabenepisyo sab ta sa iyang maunongong gugma. w21.11 3-4 ¶8-9

Bisag unsa pay mahitabo, determinado tang motuman sa giingon ni Jesus sa ibabaw. Karon, daghan ang ganahang maminaw sa popular nga mga lider sa relihiyon. Nakadayeg kaayo sila sa maong mga lider nga halos simbahon na nila kini. Daghan ang mangadto sa ilang mga simbahan, mopalit sa ilang mga libro, ug mohatag ug dagkong donasyon sa ilang mga kawsa o sa mga organisasyon nga ilang gisuportahan. Ang pipila motuo sa tanan nilang isulti. Malipay kaayo silang makita ang maong mga lider, nga mora bag si Jesus mismo ang ilang nakita! Pero ang tinuod nga mga magsisimba ni Jehova walay tawhanong mga lider. Bisag gitahod nato kadtong mga nagapanguna, atong gisunod ang klarong gitudlo ni Jesus: “Kamong tanan managsoon.” (Mat. 23:8-10) Dili ta moidolog mga tawo, lider man sila sa relihiyon o sa politika. Ug dili ta mosuportar sa ilang mga kawsa. Hinunoa, kita nagpabiling neyutral ug bulag sa kalibotan. Busa niining tanan, lahi kaayo ta sa daghang relihiyon nga nag-angkong Kristohanon.​—Juan 18:36. w21.10 20 ¶6-7

Kon ang usa ka Kristohanon gustong mahimong balaan, kinahanglang seguroon niya nga walay bisan unsa o si bisan kinsa nga mahimong mas importante kay sa iyang relasyon sa Diyos. Ug kay mga Saksi ni Jehova ta, determinado ta nga likayan ang bisan unsang buhat nga makapasipala sa iyang balaang ngalan. (Lev. 19:12; Isa. 57:15) Gipakita sa mga Israelinhon nga giila nila si Jehova ingong ilang Diyos pinaagi sa pagsunod sa daghan niyang balaod. Ang Levitico 18:4 nag-ingon: “Kinahanglan ninyong tumanon ang akong mga balaod ug mga lagda. Ako si Jehova nga inyong Diyos.” Ang kapitulo 19 naghisgot sa pipila niana nga “mga lagda” para sa Israel. Pananglitan, ang bersikulo 5-8, 21, 22 naghisgot bahin sa halad nga mga hayop. Ang maong mga halad kinahanglang himoon sa paagi nga dili ‘magpasipala sa butang nga balaan kang Jehova.’ Ang pagbasa sa maong mga bersikulo angayng magpalihok nato sa paglipay kang Jehova ug sa pagtanyag kaniyag dalawatong mga halad sa pagdayeg, ingon sa giawhag sa Hebreohanon 13:15. w21.12 5-6 ¶14-15

Ang batabatang mga magtiayon karon makabenepisyo sa eksperyensiya niadtong nakakat-on sa pagsalig kang Jehova. Ang pipila ka magtiayon tingali daghang tuig nang nag-alagad sa bug-os panahon. Puwede mong mangayog tambag nila kon gibati ninyo nga kinahanglan ninyong susihon ang inyong mga tumong. Usa ni ka paagi sa pagpakita nga nagsalig mo kang Jehova. (Prov. 22:17, 19) Hinumdomi nga ang kaminyoon regalo gikan kang Jehova. (Mat. 19:5, 6) Gusto niya nga ang mga magtiayon malipay niana nga regalo. Mga batabatang magtiayon, susiha kon unsay inyong ginahimo sa inyong kinabuhi. Gihimo ba ninyo ang inyong maarangan aron ipakita kang Jehova nga giapresyar gyod ninyo ang regalo nga iyang gihatag kaninyo? Pakig-estorya mo kang Jehova diha sa pag-ampo. Pangitag mga prinsipyo diha sa iyang Pulong nga mapadapat sa inyong kahimtang. Dayon sunda ninyo ang tambag nga gihatag ni Jehova. Makaseguro mo nga makabaton mog malipayon ug makapatagbawng kinabuhi kon himoon ninyong prayoridad sa inyong kaminyoon ang pag-alagad kang Jehova! w21.11 18-19 ¶16, 18

Si Santiago may hustong panglantaw sa kaugalingon. Wala siya maghunahuna nga mas importante o mas labaw siya sa ubang Kristohanon kay igsoon siya ni Jesus o kay duna siyay mga pribilehiyo sa pag-alagad. Gitawag niya ang iyang mga isigkamagtutuo ingong ‘iyang hinigugmang mga igsoon.’ (Sant. 1:16, 19; 2:5) Wala niya ipakita sa uban nga daw hingpit siya. Ang leksiyon: Hinumdomi nga kitang tanan makasala. Dili ta angayng maghunahuna nga mas labaw ta sa atong mga ginatudloan. Ngano? Kon ipakita nato sa atong study nga mora bag dili ta masayop, basin maghunahuna siya nga dili niya kayang sundon ang mga sugo sa Diyos. Pero kon matinud-anon natong angkonon nga diha poy mga higayon nga nalisdan ta sa pagsunod sa mga prinsipyo sa Bibliya ug isulti nato kaniya kon giunsa ta pagtabang ni Jehova nga makahimog mga kausaban, matabangan nato ang atong study nga makita nga makaalagad pod siya kang Jehova. w22.01 11-12 ¶13-14

Kon maningkamot ta nga mosundog sa panghunahuna ni Jesus, masundog pod nato ang iyang binuhatan ug mapakita nato ang iyang personalidad. (Heb. 1:3) Basig maghunahuna ta: ‘Perpekto si Jesus. Dili gyod nako siya masundog!’ Kon kanay imong gibati, hinumdomi ni: Una, gidisenyo ka nga maparehas kang Jehova ug Jesus. Busa kaya nimo silang sundogon, bisag dili pa sa bug-os. (Gen. 1:26) Ikaduha, ang balaang espiritu sa Diyos mao ang pinakagamhanang puwersa sa uniberso. Makatabang ni nimo nga mahimo ang mga butang nga dili gyod nimo makaya nga ikaw-ikaw ra. Ikatulo, si Jehova wala magdahom nga perpekto nimong mapakita karon ang bunga sa espiritu. Gani, kadtong naay paglaom nga mabuhi sa yuta hangtod sa hangtod hatagan sa atong mahigugmaong Amahan ug 1,000 ka tuig aron mahimong perpekto. (Pin. 20:1-3) Ang gihangyo lang ni Jehova karon mao nga himoon nato ang atong makaya ug mosalig sa iyang tabang. w22.03 9 ¶5-6

Ang pag-ampo dili lang maoy paagi nga mapalig-on ang atong relasyon kang Jehova. Ang pagtuon sa Pulong sa Diyos ug pagtambong sa mga tigom makatabang sab nato nga mas masuod sa Diyos. Duna ba kay mahimo aron mapahimuslan pag-ayo ang panahon nga imong gigahin sa pagtuon ug sa pagtambong sa mga tigom? Pangutan-a ang kaugalingon, ‘Unsay sagad makabalda nako panahon sa tigom o dihang magtuon ko?’ Ang mga tawag ba, email, o text message diha sa imong cellphone o sa ubang gadyet? Kon mamatikdan nimo nga naglatagaw ang imong hunahuna panahon sa tigom o sa imong pagtuon, hangyoa si Jehova nga tabangan ka nga magpokus. Kon duna kay gikabalak-an, dili tingali sayon nga kalimtan kana ug magpokus sa espirituwal nga mga butang, pero importante kaayo nga buhaton nimo kana. Hangyoa si Jehova nga hatagan kag kalinaw nga magbantay dili lang sa imong kasingkasing kondili sa imo pong “hunahuna.”—Filip. 4:6, 7. w22.01 29 ¶12-14

Si Haring Uzzias wala maminaw ug tambag. Misulod siya sa dapit sa templo ni Jehova nga mga saserdote lang ang puwedeng mosulod, ug misulay siya sa pagsunog ug insenso. Giingnan siya sa mga saserdote ni Jehova: “Dili nimo buluhaton, Uzzias, ang pagsunog ug insenso kang Jehova! Mga saserdote lang ang angayng magsunog ug insenso.” Unsay reaksiyon ni Uzzias? Kon mapainubsanon pa unta niyang gidawat ang tambag ug mibiya dayon sa templo, basig gipasaylo siya ni Jehova. Pero “si Uzzias . . . nasuko.” Nganong wala niya dawata ang tambag? Tingali naghunahuna siya nga puwede niyang himoon ang bisan unsa kay hari siya. Pero wala maangayi ni Jehova ang iyang gihimo. Kay mapangahason si Uzzias, gisilotan siyag sanla ug “wala [siya] maayo hangtod nga siya namatay.” (2 Cron. 26:16-21) Ang nahitabo kang Uzzias nagtudlo nato nga bisag kinsa pa ta, kon dili ta modawat ug tambag nga binase sa Bibliya, mawad-an ta sa pag-uyon ni Jehova. w22.02 9 ¶7

Ang tawo nga kontrolado sa “daang personalidad” sagad maghunahuna ug molihok sumala sa iyang makasasala nga tendensiya. (Col. 3:9) Tingali kaugalingon ray iyang gihunahuna, dali siyang masuko, dili mapasalamaton, ug garboso. Tingali ganahan siyang motan-aw ug pornograpiya, o kaha imoral o bayolenteng mga salida. Segurado nga naa siyay maayong mga hiyas, ug tingali makonsensiya siya sa iyang ginasulti o ginahimo nga dili maayo. Pero dili kaayo lig-on ang iyang tinguha nga bag-ohon ang iyang panghunahuna ug binuhatan. (Gal. 5:19-21; 2 Tim. 3:2-5) Dili ta perpekto, mao nga dili nato bug-os matangtang ang tanang dili maayong panghunahuna ug tinguha. Usahay makahimo o makasulti tag mga butang nga atong mahayan sa ulahi. (Jer. 17:9; Sant. 3:2) Pero dihang mahukas na nato ang daang personalidad, dili na ta kontrolado sa makasasalang mga kinaiya ug binuhatan. Lahi na ta nga klase sa tawo.​—Isa. 55:7. w22.03 3 ¶4-5

Mga ansiyano, tan-awa ang maayong mga hiyas sa mga igsoon. Ang kada usa dili perpekto, pero naa silay nindot nga mga hiyas. Tinuod, kinahanglang tambagan usahay sa mga ansiyano ang usa ka igsoon. Pero sama kang apostol Pablo, ang mga ansiyano maningkamot nga dili magpokus sa iyang makapalagot nga sinultihan ug binuhatan. Hinuon, angay silang magpokus sa iyang gugma kang Jehova, sa iyang paglahutay sa pag-alagad, ug sa iyang potensiyal sa paghimog maayo. Kon ang mga ansiyano magpokus sa maayong mga hiyas sa uban, matabangan nila ang mga igsoon nga mobating gimahal sa kongregasyon. Hinumdomi nga si Jehova wala magdahom nga dili na mo masayop. Ang iya lang gihangyo mao nga magmatinumanon mo. (1 Cor. 4:2) Makaseguro mo nga gipabilhan pod sa Diyos ang inyong ginahimo sa pag-alagad kaniya. Dili gyod kalimtan ni Jehova “ang inyong buhat ug ang gugma nga inyong gipakita para sa iyang ngalan pinaagi sa pag-alagad ug sa padayon ninyong pag-alagad sa mga balaan.”​—Heb. 6:10. w22.03 31 ¶19, 21