Enero

Nganong gigamit pag-ayo ni Jehova si Timoteo? Tungod sa iyang nindot kaayong Kristohanong mga hiyas. (Filip. 2:19-22) Base sa giingon ni apostol Pablo, makita nato nga si Timoteo mapainubsanon, maunongon, kugihan, ug kasaligan. Siya mapinanggaon kaayo sa mga igsoon. Tungod ana, pinangga ni Pablo si Timoteo ug wala siya magduhaduha sa paghatag niyag bug-at nga mga responsibilidad. Kita pod, mahalon ta ni Jehova ug mas magamit ta sa kongregasyon kon ugmaron nato ang mga hiyas nga gusto niya. (Sal. 25:9; 138:6) Busa pag-ampo aron makita nimo kon unsang bahina sa imong personalidad ang angay nimong pauswagon. Pagpokus sa usa ka espesipikong hiyas. Gusto ba nimong mas makapakitag empatiya? Gusto ba nimo nga mahimong mas buotan ug mapinasayloon? Maayo tingali nga pangutan-on nimo ang imong suod nga higala kon unsay puwede nimong pauswagon.—Prov. 27:6. w22.04 23 ¶4-5

Gusto ni Jehova nga malipay ta. Nahibalo ta ana kay ang kalipay apil sa bunga sa iyang balaang espiritu. (Gal. 5:22) Ang paghatag mas makapalipay kay sa pagdawat, maong malipay gyod ta kon magkugi ta pag-ayo sa ministeryo ug sa pagtabang sa mga igsoon sa lainlaing paagi. (Buh. 20:35) Sa teksto karong adlawa, gihisgotan ni apostol Pablo ang duha ka butang nga makatabang aron padayon tang magmalipayon. Una, angay natong ihatag kang Jehova ang atong pinakamaayo. Kon ginahatag nato kang Jehova ang atong pinakamaayo, angay tang malipay. (Mat. 22:36-38) Ikaduha, likayan nato nga ikompara ang atong kaugalingon sa uban. Bisag unsa pay atong mahimo tungod sa atong kahimtang sa panglawas, training, o abilidad, angay tang magpasalamat kang Jehova. Sa laing bahin, kon ang uban mas maayo sa ubang bahin sa ministeryo kay kanato, angay tang malipay kay gigamit nila ang ilang mga abilidad sa pagdayeg kang Jehova. w22.04 10 ¶1-2

Ang kataposan sa bakak nga relihiyon kalit nga moabot, nga makapakurat sa kalibotan. (Pin. 18:8-10) Ang kalaglagan sa Bantogang Babilonya makaapektar pag-ayo sa tibuok kalibotan ug posibleng moresultag grabeng mga kalisdanan. Pero ang katawhan sa Diyos naay labing menos duha ka rason nga magmalipayon. Kining dugay na kaayong kaaway ni Jehova nga Diyos mawala na hangtod sa hangtod, ug hapit na gyong moabot ang atong kaluwasan! Gitagna ni Daniel nga “ang tinuod nga kahibalo modagaya.” Ug mao gyod nay nahitabo. Nasabtan na nato ang mga tagna bahin sa atong panahon. (Dan. 12:4, 9, 10) Kay tukma kaayong natuman kini nga mga tagna, mas milalom ang atong pagsalig kang Jehova ug sa iyang Pulong. (Isa. 46:10; 55:11) Busa padayong palig-ona ang imong pagtuo pinaagi sa pagkugig tuon sa Kasulatan ug sa pagtabang sa uban nga mahimong higala ni Jehova. Iyang panalipdan kadtong bug-os nga nagasalig kaniya, ug iya silang hatagan ug “walay kataposang pakigdait.”—Isa. 26:3. w22.07 6-7 ¶16-17

Gipakita sa basahon sa Pinadayag nga ang langitnong Gingharian sa Diyos natukod na ug nga si Satanas gipapahawa na sa langit. (Pin. 12:1-9) Tungod ana, malinawon na ang langit, pero miresulta nig kalisdanan para nato. Ngano? Kay gipahungaw ni Satanas ang iyang kasuko niadtong matinumanong nag-alagad kang Jehova dinhi sa yuta. (Pin. 12:12, 15, 17) Unsay makatabang nga makapabilin tang matinumanon bisag giatake ta ni Satanas? (Pin. 13:10) Ang usa nga makatabang mao ang pagkahibalo kon unsay mahitabo sa umaabot. Pananglitan, sa Pinadayag, gihisgotan ni apostol Juan ang pipila sa mga panalangin nga hapit na natong matagamtam. Apil sa mga panalangin mao ang paglaglag sa mga kaaway sa Diyos. Ang pinakaunang bersikulo sa Pinadayag nag-ingon nga ang impormasyon nga atong mabasa gipresentar “pinaagig mga ilhanan,” o mga simbolo.—Pin. 1:1. w22.05 8 ¶1-3

Tungod sa lig-ong baroganan sa matinumanong mga alagad ni Jehova, masuko pag-ayo ang mga kaaway ni Jehova. Unya ang mga nasod mag-alyansa aron atakehon ang tanang alagad sa Diyos dinhi sa yuta. Sa Bibliya, gitawag nig pag-atake ni Gog sa Magog. (Ezeq. 38:14, 15) Unsay reaksiyon ni Jehova niining pintas nga pag-atake? Siya miingon: “Ang akong dakong kasuko mosilaob.” (Ezeq. 38:18, 21-23) Ang Pinadayag kapitulo 19 nagsulti sa sunod nga mahitabo. Ipadala ni Jehova ang Iyang Anak aron depensahan ang Iyang katawhan ug pildihon ang ilang mga kaaway. Kauban ni Jesus ang “mga panon sa langit”—ang matinumanong mga anghel ug ang 144,000. (Pin. 17:14; 19:11-15) Unsay resulta niini nga gubat? Ang tanang tawo ug organisasyon nga supak kang Jehova bug-os nga malaglag!—Pin. 19:19-21. w22.05 17 ¶9-10

Human makasala si Adan ug Eva, gihatagan dayon ni Jehova ug paglaom ang ilang mga kaliwat pinaagi sa usa ka importanteng tagna. Ang iyang giingon narekord sa Genesis 3:15: “Akong ibutang ang panag-away tali kanimo ug sa babaye ug tali sa imong kaliwat ug sa iyang kaliwat. Dugmokon niya ang imong ulo, ug samaran nimo siya sa tikod.” Ang tagna narekord sa unang basahon sa Bibliya, pero ang tanang ubang basahon sa Bibliya konektado niini nga tagna. Sama nga ang backbone sa libro nag-usa sa tanang panid niini, ang Genesis 3:15 nag-usa o nagkonektar sa mga impormasyon sa matag basahon sa Bibliya ngadto sa usa ka mensahe, nga ang Diyos magpadalag Manluluwas nga maglaglag sa Yawa ug sa tanan niyang daotang sakop. Panalangin gyod nâ para niadtong nahigugma kang Jehova! Ang pagtuon sa Bibliya makatabang nato nga masabtan ang katumanan sa tagna ug kon sa unsang paagi makabenepisyo ta niini. w22.07 14 ¶1-3

Hangyoa si Jehova nga hatagan kag kaalam sa pagtabang sa imong mga anak nga mahigugma niya. (Sant. 1:5) Siya ang makahatag ug pinakamaayong tambag. Naay daghang rason kon ngano. Hisgotan nato ang duha niana. Una, si Jehova ang pinakaeksperyensiyado nga ginikanan. (Sal. 36:9) Ikaduha, ang iyang tambag kanunayng maayog resulta. (Isa. 48:17) Pinaagi sa iyang Pulong ug sa iyang organisasyon, si Jehova nagtaganag daghan kaayong binase sa Bibliya nga espirituwal nga pagkaon nga makatabang nimo sa pagtudlo sa imong mga anak nga higugmaon si Jehova. (Mat. 24:45) Pananglitan, makakita kag praktikal nga tambag sa serye nga “Tabang Alang sa Pamilya,” nga sa una naa sa magasing Pagmata! pero karon naa na sa atong website. Naa poy daghang video interview ug drama diha sa jw.org nga makatabang nga mapadapat sa mga ginikanan ang tambag ni Jehova sa pagpadakog mga anak.—Prov. 2:4, 5. w22.05 27 ¶4-5

Wala nay molabaw kang Jehova kon bahin sa pagpasaylo. Una, andam siya kanunay nga mopasaylo. Ikaduha, nakaila kaayo siya nato. Nasayod siya sa tanang detalye bahin nato maong kabalo siya kon kinasingkasing tang naghinulsol. Ug ikatulo, ang pagpasaylo ni Jehova bug-os, nga mora bag iyang gipapas ang atong mga sala. Tungod ani, mabatonan nato ang hinlong konsensiya ug ang iyang pag-uyon. Siyempre, kay di pa ta hingpit, dili kalikayan nga makasala ta. Pero makapahupay kaayo ang giingon sa Pagtugkad sa Kasulatan, Tomo 2, panid 570: “Sanglit maluluy-ong gitagad ni Jehova ang unodnong kahuyangan sa iyang mga alagad, sila dili kinahanglan nga padayong mobatig pagbasol tungod sa ilang mga sayop gumikan sa napanunod nga pagkadili-hingpit. (Sal 103:8-14; 130:3) Kon sila tim-os nga nagalakaw diha sa mga dalan sa Diyos, sila mahimong magmalipayon. (Flp 4:4-6; 1Ju 3:19-22).” w22.06 7 ¶18-19

Ang kahadlok nga supakon sa gobyerno dili ra maoy gigamit ni Satanas. Ang uban mas mahadlok sa reaksiyon sa ilang pamilya kon ma-Saksi sila kay sa kulatahon sila. Gimahal nila pag-ayo ang ilang mga paryente, ug gusto nila nga sila makaila ug mahigugma pod kang Jehova. Maguol sila dihang madungog nila nga ang ilang mga paryente mosultig dili maayo bahin sa matuod nga Diyos ug sa iyang mga magsisimba. Hinuon, naay mga higayon nga ang mga paryente nga supak sa primero na-Saksi ra sa ulahi. Pero ibutang nato nga isalikway ta sa atong pamilya tungod sa atong bag-ong tinuohan. Unsa may atong reaksiyon? Mahupay ta sa makapadasig nga kamatuoran nga narekord sa Salmo 27:10. Dihang atong hinumdoman nga gimahal ta pag-ayo ni Jehova, dili ta mahadlok sa mahitabo bisag isalikway ta sa atong pamilya. Ug makasalig ta nga gantihan ta niya sa atong paglahutay. Wala gyoy makalabaw kang Jehova sa pagtagana sa atong pisikal, emosyonal, ug espirituwal nga panginahanglan! w22.06 16-17 ¶11-13

Panahon sa ministeryo ni Jesus, sayop siyang giakusahan nga palainom, hangol kaayog pagkaon, alagad sa Yawa, wala magtuman sa Igpapahulay, ug nagpasipala pa gani sa Diyos. (Mat. 11:19; 26:65; Luc. 11:15; Juan 9:16) Pero wala mobalos si Jesus ug sakit nga mga pulong. Parehas kang Jesus, dili gyod ta mobalos bisag sultihan tag sakit. (1 Ped. 2:22, 23) Siyempre, dili na sayon. (Sant. 3:2) Unsay makatabang? Kon sakit ug sinultihan ang tagbalay, paningkamoti nga dili magpokus sa iyang reaksiyon. Ang brader nga si Sam miingon, “Hunahunaon nako nga ang tagbalay kinahanglang makadungog sa kamatuoran ug posible siyang magbag-o.” Usahay masuko ang tagbalay kay wrong timing lang gyod ang atong pag-abot. Kon masuko ang atong kaestorya, puwedeng moampo ta sa mubo nga tabangan ta ni Jehova nga magpabiling kalmado ug dili makasultig sakit. w22.04 6 ¶8-9

Ang usa ka importanteng paagi nga matabangan ang mga anak nga masuod kang Jehova mao ang pagtuon sa Bibliya uban nila. (2 Tim. 3:14-17) Pero gipakita sa Bibliya ang laing paagi nga makakat-on ang mga bata bahin kang Jehova. Sa basahon sa Proverbio, gipahinumdoman sa amahan ang iyang anak nga dili kalimtan ang mga hiyas ni Jehova nga makita diha sa kalalangan. (Prov. 3:19-21) Mga ginikanan, ganahan gyod tingali mong maglingawlingaw sa gawas uban sa inyong mga anak. Gamita na nga panahon aron tabangan sila nga makita ang nindot nga mga hiyas ni Jehova diha sa “mga butang nga gihimo.” (Roma 1:20) Matikdi kon giunsa paggamit ni Jesus ang kalalangan sa pagtudlo. Dihay higayon nga giingnan niya ang iyang mga tinun-an nga obserbahan ang mga uwak ug mga lirio. (Luc. 12:24, 27-30) Gitudloan niya ang iyang mga tinun-an ug importanteng leksiyon bahin sa pagkamahinatagon ug pagkamaayo sa ilang langitnong Amahan: Hatagan ni Jehova ug pagkaon ug sinina ang iyang matinumanong mga alagad sama sa iyang gihimo sa mga uwak ug bulak. w23.03 20-21 ¶1-4

Pasalamatan nato si Jehova nga makaampo ta kaniya pinaagi sa iyang Anak. Si Jesus ang ginagamit ni Jehova sa paghatag sa atong mga hangyo. Paminawon ug tubagon ni Jehova ang mga pag-ampo nga gitanyag pinaagi sa ngalan ni Jesus ug pasayloon ta Niya sa atong mga sala pinasukad sa halad lukat ni Jesus. (Roma 5:1) Ang Kasulatan nag-ingon nga si Jesus ang atong “hataas nga saserdote, [nga naglingkod] sa tuong kamot sa trono sa Halangdong Diyos sa kalangitan.” (Heb. 8:1) Si Jesus ang atong “magtatabang ngadto sa Amahan.” (1 Juan 2:1) Mapasalamaton gyod ta kang Jehova kay gihatagan ta niyag Hataas nga Saserdote nga nakasabot sa atong mga kahuyangan ug ‘nagahangyo para kanato’! (Roma 8:34; Heb. 4:15) Kon wala ang halad ni Jesus, dili ta makaduol kang Jehova pinaagi sa pag-ampo. Busa angay gyod tang magpasalamat sa bililhong regalo ni Jehova kanato—ang iyang pinalanggang Anak! w22.07 23 ¶10-12

Ang tawong kasaligan maningkamot nga motuman sa iyang saad ug mosulti sa tinuod. (Sal. 15:4) Ang mga tawo makasalig niya. Gusto nato nga mao pod nay bation sa mga igsoon kanato. Dili nato mapugos ang uban nga mosalig nato. Kinahanglang pamatud-an nato nga kasaligan ta. Ang pagsalig samag kuwarta. Lisod ning mabatonan, pero dali ra ning mawala. Sa way duhaduha, gipakita gyod ni Jehova nga makasalig ta niya. “Ang tanan niyang ginabuhat kasaligan.” (Sal. 33:4) Ug nagdahom siya nga sundogon nato siya. (Efe. 5:1) Mapasalamaton ta nga gikabig ta ni Jehova sa iyang organisasyon, nga ang mga sakop mahigugmaon ug kasaligan! Kitang tanan naay responsibilidad nga ipakita nga kasaligan ta sa mga igsoon. Kon maningkamot ta sa pagpakitag gugma, pagkamapaubsanon, katakos sa pag-ila, pagkamatinud-anon, ug pagpugong sa kaugalingon, makatabang ta nga molig-on ang pagsalig sa mga igsoon sa usag usa. Hinaot sundogon nato ang atong Diyos, si Jehova, ug padayon natong ipakita nga kasaligan ta. w22.09 8 ¶1-2; 13 ¶17

Bisag bahin ta sa usa ka dakong espirituwal nga pamilya, may mga panahong mobati tang nag-inusara, ug tingali ma-depress ta ug maghunahuna nga iluom na lang ang maong mga pagbati. Dili gusto ni Jehova nga kanay atong bation. Konsideraha kon giunsa niya pagtabang ang propetang si Elias. Gidasig ni Jehova si Elias nga isulti ang iyang gibati. Kaduha siya nangutana kang Elias: “Nag-unsa ka dinhi?” (1 Hari 19:9, 13) Sa matag higayon nga gipahungaw ni Elias ang iyang gibati, naminaw si Jehova kaniya. Iya pong gipasaligan si Elias nga naa pay daghang Israelinhon nga nagsimba Kaniya. (1 Hari 19:11, 12, 18) Seguradong nahuwasan si Elias human niya ipahungaw kang Jehova ang iyang gibati ug human madungog ang Iyang tubag. Gihatagan pod ni Jehova si Elias ug pipila ka importanteng asaynment. Iyang gisugo siya sa pagdihog kang Hazael ingong hari sa Sirya, kang Jehu ingong hari sa Israel, ug kang Eliseo ingong propeta. (1 Hari 19:15, 16) Gitabangan ni Jehova si Elias sa pagpokus sa positibong mga butang pinaagi sa paghatag kaniya niini nga mga asaynment. Gitagan-an sab siya sa Diyos ug suod nga higala, si Eliseo. w22.08 8 ¶3; 9 ¶5

Nakasulay ba ang inyong kongregasyon nga magtukod o mag-renovate ug Kingdom Hall? Kon oo, seguradong nakahinumdom ka sa una nimong pagtambong. Mapasalamaton kaayo ka kang Jehova. Tingali nalipay kaayo ka ug hapit kang nakahilak maong naglisod kag kanta sa pangbukas nga awit. Ang atong maayong pagkatukod nga mga Kingdom Hall makahatag ug kadayeganan kang Jehova. Pero makahatag tag mas dakong kadayeganan kaniya dihang makigbahin ta sa usa pa ka klase sa pagpanukod. Kana nga buluhaton mas importante pa kay sa pagpanukod ug mga bilding. Apil niining klaseha sa pagpanukod ang pagpalig-on sa mga tawo nga naggamit sa maong mga dapit sa pagsimba. Gani, si apostol Pablo migamit ug pulong nga puwede pong magkahulogan ug “magtukod” aron ipasabot ang ideya nga maglig-onay, nga makita sa teksto karong adlawa. Si apostol Pablo nagpakitag maayo kaayong ehemplo sa pagpalig-on sa iyang mga isigkamagtutuo. Duna siyay empatiya kanila. Puwede nato siyang sundogon aron mapalig-on nato ang mga igsoon.—1 Cor. 11:1. w22.08 20 ¶1-2

Ang usa ka Kristohanon nga gustong mahimong matarong atubangan sa Diyos kinahanglang magmatinud-anon sa tanan niyang transaksiyon sa negosyo. Ang matarong nga tawo nahigugma sab sa hustisya, ug dili siya malipay nga makitang gidaogdaog ang uban. Ug konsiderahon sa matarong nga tawo kon unsay panglantaw ni Jehova sa mga desisyon nga iyang himoon ‘aron bug-os niya Siyang mapalipay.’ Sumala sa Bibliya, si Jehova ang Tinubdan sa pagkamatarong. Tungod ana, gitawag siyag “puy-anan sa pagkamatarong.” (Jer. 50:7) Kay si Jehova ang Maglalalang, siya lang ang may katungod nga magtakdag mga sukdanan kon unsay husto ug sayop. Ang iyang panglantaw sa kon unsay husto ug sayop mas labaw kay sa atoa. (Prov. 14:12; Isa. 55:8, 9) Pero kay gibuhat ta sumala sa larawan sa Diyos, kaya natong sundon ang iyang mga sukdanan sa pagkamatarong. (Gen. 1:27) Kay gimahal nato ang atong Amahan, gusto nato siyang sundogon kutob sa maarangan.—Efe. 5:1. w22.08 27 ¶5-6

Dihang mabalaka o maguol ta, tingali mangita tag mga paagi nga malimtan kadiyot ang atong mga problema. Normal lang nâ, pero kinahanglang mag-amping ta nga dili mohimog bisan unsa nga makapasuko kang Jehova. (Efe. 5:10-12, 15, 16) Sa sulat ni apostol Pablo sa mga taga-Filipos, iyang giawhag ang mga Kristohanon nga padayong palandongon ang mga butang nga “matarong, . . . putli, . . . hiligugmaon, [ug] maayo.” (Filip. 4:8) Bisag si Pablo wala espesipikong maghisgot ug kalingawan, ang iyang gisulat angayng magpahinumdom nato kon unsa nga kalingawan ang atong pilion. Sulayi ni: Ang pulong “butang” niini nga bersikulo pulihig pulong nga “kanta,” “salida,” “basahonon,” o “video game.” Makatabang ni nimo nga mahibaloan kon unsay dalawaton sa Diyos ug unsay dili. Gusto natong sundon ang taas nga mga sukdanan ni Jehova.—Sal. 119:1-3. w22.10 9 ¶11-12

Sa wala pa sila mamatay, ang ubang “mga dili matarong” daotan kaayog mga buhat. Busa kinahanglan silang tudloan kon unsaon pagkinabuhi sumala sa matarong nga mga sukdanan ni Jehova. Aron mahimo nâ, ipahigayon sa Gingharian sa Diyos ang kinadak-ang programa sa pagpanudlo sukad masukad. Kinsay motudlo sa mga dili matarong? Ang dakong panon ug ang gibanhaw nga mga matarong. Aron ang ngalan sa mga dili matarong masulat sa basahon sa kinabuhi, kinahanglang duna silay suod nga relasyon kang Jehova ug magpahinungod kaniya. Si Jesu-Kristo ug ang iyang kaubang mga maghuhukom interesado kaayo sa pag-uswag unya sa tanang dili matarong. (Pin. 20:4) Si bisan kinsa nga dili magpadapat sa ilang nakat-onan dili tugotang mabuhi—bisag 100 na ang ilang pangedaron. (Isa. 65:20) Si Jehova ug Jesus makabasag kasingkasing, ug ilang paneguroon nga walay makapahinabog bisan unsang kadaot sa bag-ong kalibotan.—Isa. 11:9; 60:18; 65:25. w22.09 17 ¶11-12

Niining tekstoha, ang “labaw nga mga awtoridad” nagtumong sa tawhanong mga magmamando. Ang mga Kristohanon kinahanglang mosunod niini nga mga awtoridad. Kini nga mga magmamando nagmentinar sa kahapsay, nagpatuman sa balaod, ug usahay nanalipod pa gani sa katawhan ni Jehova. (Pin. 12:16) Busa gisugo ta nga ihatag kanila ang buhis, pagtahod, ug dungog nga ilang gipangayo. (Roma 13:7) Pero ang maong mga gobyerno nakabaton lang ug awtoridad kay gitugotan sila ni Jehova. Klaro nang gipakita ni Jesus dihang gipangutana siya sa Romanong gobernador nga si Poncio Pilato. Dihang si Pilato miingon nga duna siyay awtoridad nga modesisyon kon buhian ba o patyon si Jesus, miingon si Jesus: “Wala gyod kay awtoridad ibabaw kanako gawas kon gihatag kini kanimo sa kahitas-an.” (Juan 19:11) Sama kang Pilato, limitado ra ang awtoridad sa tanang tawhanong magmamando ug politiko. w22.10 14 ¶6

Si Haring David gigiyahan sa pagsulat kon unsa unyay kinabuhi kon magmando na ang usa ka maalamon ug matinumanong hari. (Sal. 37:10, 11, 29) Pirme natong gamiton ang Salmo 37:11 dihang magsangyaw bahin sa umaabot nga Paraiso. Sakto nâ kay gigamit nâ ni Jesus sa iyang Wali sa Bukid, nga nagpakita nga duna ni katumanan sa umaabot. (Mat. 5:5) Pero ang giingon ni David nagpakita pod kon unsay kinabuhi dihang magmando si Haring Solomon. Panahon sa pagmando ni Solomon sa Israel, ang katawhan sa Diyos nagtagamtam ug kalinaw ug kadagaya sa yuta nga “abunda sa gatas ug dugos.” Ang Diyos miingon: “Kon padayon ninyong sundon ang akong mga lagda . . . , akong ipahinabo ang kalinaw sa yuta, ug manghigda mo nga walay gikahadlokan.” (Lev. 20:24; 26:3, 6) Kini nga mga saad natuman panahon sa pagmando ni Solomon. (1 Cron. 22:9; 29:26-28) Ang Salmo 37:10, 11, 29 natuman kaniadto, ug matuman pod ni sa umaabot. w22.12 10 ¶8

Ingong mga Kristohanon, angay tang mosunod sa mga instruksiyon. Ang Bibliya naghatag niining praktikal nga tambag: “Pinaagi sa maalamong giya makiggubat ka, ug pinaagi sa daghang magtatambag dunay kalamposan.” (Prov. 24:6, footnote) Konsideraha kon sa unsang paagi ang pagpadapat niini nga prinsipyo makatabang nato nga molampos sa atong pagsangyaw ug pagpanudlo. Imbes sundon ang kaugalingon natong paagi sa pagministeryo, gusto natong sundon ang mga sugyot nga atong madawat. Makadawat tag maalamong giya diha sa atong mga tigom pinaagi sa mga pakigpulong nga gibase sa Bibliya ug mga pasundayag nga gihatag sa eksperyensiyadong mga igsoon sa pagbansay nato. Ang organisasyon ni Jehova nagtagana pod ug mga publikasyon ug video nga makatabang sa mga tawo nga masabtan ang Bibliya. Mapasalamaton kaayo ta sa maayong tambag nga naa sa Pulong sa Diyos! Mag-unsa na lang kaha ta kon wala ni nga tambag? Hinaot determinado ta nga kanunayng ipadapat ang maalamong mga tambag ni Jehova.—Prov. 3:13-17. w22.10 23 ¶18-19

Sama nga molig-on ang atong lawas kon kaonon ug usapon natog maayo ang pagkaon, molig-on sab ang atong pagtuo kon atong tun-an ang Pulong sa Diyos ug pamalandongon kini. Gusto ni Jehova nga sabton nato pag-ayo ang iyang Pulong. Mahimo nato nâ pinaagi sa pag-ampo, pagbasa, ug pagpamalandong. Una, moampo ta aron maandam ang atong kasingkasing sa pagdawat sa mga instruksiyon sa Diyos. Dayon, basahon nato ang Bibliya. Sunod, mohunong ta aron pamalandongon, o hunahunaon pag-ayo, ang atong nabasa. Unsay mahimong resulta? Kon kanunay tang mamalandong, mas masilsil sa atong kasingkasing ang Pulong sa Diyos. Nganong importante ang pagbasa ug pagpamalandong sa Bibliya? Kay makahatag ni natog kaisog sa pagsangyaw sa mensahe sa Gingharian karon ug sa pagpahayag sa sakit nga mensahe sa paghukom sa umaabot. Kon mamalandong sab ta sa nindot nga mga hiyas ni Jehova, mas masuod pa gyod ta niya. w22.11 7 ¶16-17

Gipakita ni Jesus nga dili lang ang iyang mga sumusunod ang makaila sa tinuod nga mga Kristohanon, kondili apil pod ang mga dili magtutuo. Mailhan sila tungod sa ilang tinuod nga gugma sa usag usa. Ug talagsaon kaayo ang gugma sa mga igsoon sa kongregasyon. Siyempre, ang mga Saksi ni Jehova dili hingpit. (1 Juan 1:8) Mao nga kon mas mailhan nato ang mga igsoon sa kongregasyon, makita pod tingali nato ang ilang mga kahuyangan. (Roma 3:23) Makapaguol kay gitugotan sa uban nga mapandol sila sa kahuyangan sa mga igsoon. Giunsa ni Jesus pagpakitag gugma sa iyang mga apostoles? Ug unsaon nato pagsundog si Jesus? Ang mga Saksi angay pong mamalandong sa tubag nianang mga pangutanaha. Makatabang na nga mas mapakita nato ang gugma ilabina dihang makahimog sayop ang uban.—Efe. 5:2. w23.03 26-27 ¶2-4

Samtang nagkaduol ta sa kataposan niining sistema sa mga butang, makadahom tag mga kahimtang sulod sa kongregasyon nga puwedeng magsulay sa atong pagkamaunongon kang Jehova. Busa kinahanglang huptan nato ang maayong panghunahuna. Kon dili maayo ang pagtratar kanimo sa isigka-Kristohanon, ayaw paghambin ug kasuko. Kon gidisiplina ka, ayaw pagpokus sa kaulaw. Dawata ang tambag ug himoa ang gikinahanglang mga kausaban. Ug dihang maapektohan ka sa mga kausaban sa organisasyon ni Jehova, dawata ni nga kinasingkasing ug sunda ang direksiyon. Ipakita ang imong pagsalig kang Jehova ug sa iyang organisasyon bisan dihang masulayan ang imong pagkamaunongon. Pabiling kalmado, paningkamot nga magmalinawon ang imong hunahuna, ug sundoga ang panglantaw ni Jehova. Ampo kang Jehova alang sa tabang, ug ayaw gyod ilain ang imong kaugalingon sa kongregasyon. Kon imo nang himoon, makasalig ka nga bisag unsa pay mahitabo, si Satanas dili gyod makapabulag nimo kang Jehova o sa Iyang organisasyon.—Sant. 4:7. w22.11 24-25 ¶14-16

Ang mga ansiyano motabang sa mga igsoon nga makapangandam sa kalamidad. Paneguroon nila nga ang tanan sa kongregasyon nahibalo kon unsay angay nilang himoon aron luwas sila ug kon unsaon nila pagkontak ang mga ansiyano. Unsay puwede nimong himoon? Kon ang kalamidad nahitabo duol sa inyong lugar, pangutan-a ang mga ansiyano kon unsay imong ikatabang. Tingali puwede nimong papuy-on ang mga namakwet o ang mga construction volunteer. Puwede pod nimong hatdag pagkaon ug suplay ang mga igsoon nga nanginahanglan. Kon ang kalamidad nahitabo sa layolayo nga lugar, makatabang gihapon ka. Sa unsang paagi? Puwede nimong iampo ang mga igsoon. (2 Cor. 1:8-11) Makatabang pod ka sa paghatag ug hinabang pinaagi sa pag-donate para sa tibuok kalibotang buluhaton. (2 Cor. 8:2-5) Kon kaya nimong moadto aron motabang sa naapektohan nga lugar, sultihi ang mga ansiyano nga gusto kang moboluntaryo. Kon imbitahon ka sa pagboluntaryo, tingali makadawat kag dugang pagbansay aron magamit ka kon asa ug kon kanus-a ka mas gikinahanglan. w22.12 24 ¶8; 25 ¶11-12

Ang laing hubad niini nga teksto nag-ingon: “Ang tanang tintasyon nga naagian ninyo naagian usab sa kadaghanan.” Kini nga mga pulong gisulat ngadto sa Kristohanong mga lalaki ug babaye sa Corinto. Ang uban nila mga mananapaw, homoseksuwal, ug palahubog kaniadto. (1 Cor. 6:9-11) Sa imong hunahuna, human sa ilang bawtismo wala na ba gyod sila mobatig sayop nga mga tinguha? Mibati gihapon. Bisag dinihogang mga Kristohanon sila, dili gihapon sila hingpit. Seguradong naay mga panahon nga nakigbisog pod sila sa sayop nga mga tinguha. Makapadasig gyod na nato. Ngano? Kay gipakita ana nga bisag unsa pang sayop nga tinguha ang imong gipaningkamotang wad-on, naa nay milampos sa pagsukol niana. Oo, makapabilin kang ‘lig-on sa pagtuo, kay nahibalo ka nga ang imong mga igsoon sa tibuok kalibotan nakasinati sab sa samang mga pag-antos.’—1 Ped. 5:9. w23.01 12 ¶15

Gihangyo ni Jesus si Jehova nga bantayan ang iyang mga sumusunod. (Juan 17:11) Nganong makapalig-on ni nato? Kay si Jehova mas gamhanan kay sa atong mga kaaway. (1 Juan 4:4) Makita niya ang tanan. Kombinsido ta nga kon mosalig ta kang Jehova, tabangan ta niya nga magmalig-on ug dili mahadlok. Maulaw ba ka usahay nga magpaila ingong Saksi ni Jehova? Nagduhaduha ba ka nga mahimong magmamantala o magpabawtismo kay nabalaka ka kon unsay hunahunaon sa uban? Ayawg tugoti nga ang maong mga pagbati magpugong nimo sa paghimo kon unsay husto. Pag-ampo nga kinasingkasing kang Jehova. Hangyoa siya nga hatagan kag kaisog sa pagbuhat sa iyang kabubut-on. Dihang makita nimo kon giunsa pagtubag ni Jehova ang imong mga pag-ampo, mahimo kang mas lig-on ug mas maisogon.—Isa. 41:10, 13. w23.01 29 ¶12; 30 ¶14

Gigamit ni Jesus ang pangutana nga “Wala ba ninyo mabasa?” aron ipakita nga ang mga Pariseo sayop ug pagsabot sa Kasulatan. (Mat. 12:1-7) Nianang higayona, ang mga Pariseo miingon nga wala sunda sa mga tinun-an ni Jesus ang Igpapahulay. Sa pagtubag, si Jesus migamit ug duha ka pananglitan sa Kasulatan ug mikutlog bersikulo sa Oseas aron ipakita nga ang mga Pariseo wala makasabot kon nganong gihatag ang balaod sa Igpapahulay ug nga wala sila magpakitag kaluoy. Nganong wala sila maimpluwensiyahi sa ilang pagbasa sa Pulong sa Diyos? Kay mapahitas-on sila ug gusto lang nilang mangitag sayop sa uban. Tungod ani, wala nila masabti ang ilang gibasa. (Mat. 23:23; Juan 5:39, 40) Matikdi pod ang Mateo 19:4-6, diin giingnan ni Jesus ang mga Pariseo sa mao gihapong pangutana: “Wala ba ninyo mabasa?” Bisag nabasa na nila ang asoy sa paglalang, wala nila masabti kon unsay gitudlo niini bahin sa panglantaw sa Diyos sa kaminyoon. Makat-onan nato sa giingon ni Jesus nga importante ang hustong kinaiya dihang magbasa ta sa Bibliya. Dili sama sa mga Pariseo, kinahanglang sinsero ta ug andam mokat-on. w23.02 12 ¶12-13

Gihatagan ni Jehova ang nasod sa Israel ug mga balaod kon unsaon nga malikayan ang grabeng mga aksidente diha sa balay ug sa trabahoan. (Ex. 21:28, 29; Deut. 22:8) Kon ang usa aksidenteng makapatay, manubag gyod siya. (Deut. 19:4, 5) Ug sumala sa Balaod, silotan bisan kadtong aksidenteng nakapahinabog kadaot sa wala pa matawo nga bata. (Ex. 21:22, 23) Gipakita sa Bibliya nga gusto gyod ni Jehova nga magmahunahunaon ta sa safety. Mapakita nato ang atong apresasyon sa regalo sa Diyos nga kinabuhi kon mohimo tag mga paagi nga mahimong safe ang atong balay ug trabahoan. Ibutang nato ang hait nga mga butang, makahilong mga kemikal, o mga medisina sa lugar nga dili maabot sa mga bata. Ug kon dili na nato ni kinahanglan, ilabay nato ni sa safe nga paagi. Mag-amping ta dihang magpasigag kalayo, mag-init ug tubig, ug maggamit ug mga power tool, ug dili nato ni biyaan. Dili pod ta magdrayb kon nakainom ta, kulang ug tulog, o mitomar ug tambal nga makapaduka nato. Ug dili ta mag-cellphone samtang nagdrayb aron dili mawala ang atong pokus. w23.02 21-22 ¶7-9

Si Jehova mapailobon, buotan, ug masinabtanon nga Magtutudlo. Nagpokus siya sa potensiyal ug maayong mga hiyas sa iyang mga estudyante. (Sal. 130:3) Ug dili gyod siya magdahom ug labaw pa sa atong mahimo. Hinumdomi nga siyay naghimo sa imong utok, nga usa ka nindot kaayo nga regalo. (Sal. 139:14) Gusto sa atong Maglalalang nga padayon tang magkat-on hangtod sa hangtod—ug mag-enjoy niana. Busa karon pa lang, maayong ‘ugmaron nato ang pagpangandoy’ sa mga kamatuoran sa Bibliya. (1 Ped. 2:2) Paghimog mga tumong nga kaya nimong kab-oton, ug sunda ang imong eskedyul sa pagbasa ug pagtuon sa Bibliya. (Jos. 1:8) Sa tabang ni Jehova, ma-enjoy nimo ang pagbasa ug pagkat-on bahin niya. Dili igo ang kahibalo lang. Kinahanglang mapalihok ka niini nga mokat-og dugang bahin kang Jehova ug ugmaron ang mga hiyas sama sa gugma ug pagtuo kaniya. (1 Cor. 8:1-3) Samtang padayon kang magkat-on, padayong hangyoa si Jehova nga tabangan ka nga makabaton ug dugang pagtuo. (Luc. 17:5) Tubagon gyod niya ang maong mga pag-ampo. w23.03 10 ¶11, 13

Gusto ni Jesus nga ang iyang mga tinun-an naay buhaton samtang nagpaabot sa hinapos sa sistema sa mga butang. Busa gihatagan niya silag buluhaton. Iya silang gisugo nga isangyaw ang maayong balita “sa Jerusalem, sa tibuok Judea ug Samaria, ug hangtod sa kinalay-ang bahin sa yuta.” (Buh. 1:6-8) Dako gyod nga asaynment ang nadawat sa mga sumusunod ni Jesus! Kay naningkamot sila sa pagsangyaw, nagamit nila ang ilang panahon sa kinamaayohang paagi. Aron mabantayan nato ang atong kaugalingon, kinahanglan natong hunahunaon pag-ayo kon giunsa nato paggamit ang atong panahon. Ang “wala damhang panghitabo” puwedeng modangat natong tanan. (Eccl. 9:11) Posible nga kalit rang matapos ang atong kinabuhi. Magamit nato ang atong panahon sa kinamaayohang paagi kon himoon nato ang kabubut-on ni Jehova ug palig-onon ang atong relasyon kaniya. (Juan 14:21) Kinahanglan tang “magmalig-on, dili matarog, nga kanunayng puliki diha sa buluhaton sa Ginoo.” (1 Cor. 15:58) Dayon inig-abot sa kataposan—kataposan man sa atong kinabuhi o kataposan niining daotang sistema—wala tay mahayan.—Mat. 24:13; Roma 14:8. w23.02 18 ¶12-14