Pebrero

Unsay gipasabot sa atong teksto karong adlawa? Sama sa gipatin-aw ni Jesus, kini maoy gugma nga andam mosakripisyo—gugma nga magpalihok sa usa ka Kristohanon nga ihatag bisan ang iyang kinabuhi para sa iyang isigkamagtutuo kon gikinahanglan. Ang Pulong sa Diyos nagtudlo nga importante kaayo ang gugma. Daghan ang ganahan niini nga mga teksto: “Ang Diyos gugma.” (1 Juan 4:8) “Higugmaa ang imong isigkatawo sama sa imong kaugalingon.” (Mat. 22:39) “Ang gugma magtabon sa daghang sala.” (1 Ped. 4:8) “Ang gugma dili gyod molubad.” (1 Cor. 13:8) Gipakita niini nga mga teksto ug sa uban pa nga importante kaayong ugmaron ug ipakita kining nindot nga hiyas. Ang tinuod nga gugma naggikan kang Jehova. Kadto lang nakabaton sa iyang espiritu ug panalangin ang makapakitag tinuod nga gugma sa usag usa. (1 Juan 4:7) Kanay rason nga miingon si Jesus nga ang tinuod nga gugma mao ang ilhanan sa iyang tinuod nga mga sumusunod. Sama sa gitagna ni Jesus, nailhan sa daghang tawo ang iyang tinuod nga mga sumusunod tungod sa gugma nga ilang gipakita sa usag usa. w23.03 27-28 ¶5-8

Gusto ba nimo nga mahimong mas mapinasayloon? Puwede tingali nimo ning sugdan pinaagi sa pagbasa ug pagpamalandong sa mga pananglitan sa Bibliya bahin niadtong nagpasaylo ug wala magpasaylo. Konsideraha ang ehemplo ni Jesus. Kinasingkasing niyang gipasaylo ang uban. (Luc. 7:47) Nagpokus pod siya dili sa ilang kasaypanan, kondili sa ilang kayang himoon. Lahi kaayo si Jesus sa mga Pariseo sa iyang panahon, kinsa “nag-isip sa uban ingong walay pulos.” (Luc. 18:9) Human nimo mapamalandong ang maong mga pananglitan, pangutan-a ang imong kaugalingon: ‘Unsang mga kinaiya ang akong nakita sa uban? Pero sa unsa ko nagpokus?’ Kon naglisod kag pasaylo sa usa ka tawo, testingig sulat ang tanan niyang maayong kinaiya. Dayon pangutan-a ang imong kaugalingon: ‘Unsay pag-isip ni Jesus kaniya? Pasayloon kaha siya ni Jesus?’ Kana nga paagi sa pagtuon makatabang nga mausab ang atong panghunahuna. Tingali sa primero, malisdan ta sa pagpasaylo niadtong nakapasakit nato. Pero kon padayon tang maningkamot, mahimong mas sayon na ang pagpasaylo. w22.04 23 ¶6

Sa basahon sa Pinadayag, ang mga kaaway sa Diyos gihulagway sa simbolikong paagi. Pananglitan, naa tay mabasa nga pipila ka pintas nga mananap. Ang usa ana mao ang “pintas nga mananap nga migimaw sa dagat.” Kini naay “10 ka sungay ug pito ka ulo.” (Pin. 13:1) Dayon, naay “laing pintas nga mananap nga migimaw sa yuta.” Kini nga mananap nagsulti nga samag dragon ug ‘nagpakanaog ug kalayo gikan sa langit.’ (Pin. 13:11-13) Dayon naa tay mabasa nga laing mananap, ang “hayag-pula nga pintas nga mananap,” nga naay nagsakayng pampam. Kining tulo ka pintas nga mananap nagsimbolo sa dugay nang mga kaaway ni Jehova nga Diyos ug sa iyang Gingharian. Busa importante nga ato silang mailhan. (Pin. 17:1, 3) Kinahanglan natong masabtan kon unsa ni nga mga simbolo. Ato ning masabtan kon ang Bibliya ang atong pahatagon ug eksplinasyon. Daghang simbolo diha sa Pinadayag ang gipatin-aw na sa ubang basahon sa Bibliya. w22.05 8-9 ¶3-4

Naay mga alagad ni Jehova nga limitado na lag mahimo sa pag-alagad kay nagkaedaran na sila o nasakit, mao nga naluya sila. Kon usahay maluya ka tungod sa imong limitasyon, pangutan-a ang imong kaugalingon, ‘Unsa may gipangayo ni Jehova kanako?’ Gusto ni Jehova nga himoon nimo ang imong pinakamaayo—kon unsay imong kaya sa imong presenteng kahimtang. Hunahunaa ni: Ang 80 anyos nga sister naluya kay dili na niya mahimo ang iyang nahimo sa ministeryo niadtong 40 anyos pa siya. Naghunahuna siya nga bisag ginahimo niya ang iyang pinakamaayo, wala malipay si Jehova. Pero tinuod ba na? Hunahunaa ra. Kon gihimo sa sister ang iyang pinakamaayo niadtong 40 pa siya, ug gihimo gihapon niya ang iyang pinakamaayo sa 80 na siya, wala siya moundang sa paghimo sa iyang pinakamaayo. Kon ginahimo nato ang atong pinakamaayo, mora pod tag ginaingnan ni Jehova: “Dalayegon ang imong gihimo!” (Itandi ang Mateo 25:20-23.) Malipay ta kon magpokus ta sa kon unsay kaya natong himoon, dili sa kon unsay dili nato kaya. w22.04 10 ¶2; 11 ¶4-6

Ang Pinadayag kapitulo 21 naghisgot nga ang 144,000 samag nindot kaayong siyudad nga gitawag ug “Bag-ong Jerusalem.” Kini nga siyudad naay 12 ka bato nga pundasyon, ug nasulat niana ang “12 ka ngalan sa 12 ka apostoles sa Kordero.” (Pin. 21:10-14; Efe. 2:20) Kining simbolikong siyudad lahi kaayo sa ubang mga siyudad. Kini naay dako nga dalan nga purong bulawan, 12 ka ganghaan nga perlas, ug paril ug pundasyon nga gidekorasyonan ug bililhong mga bato—ug ang mga sukod niini balanse kaayo. (Pin. 21:15-21) Pero morag naay kulang! Matikdi ang sunod nga giingon ni Juan: “Wala koy nakitang templo diha niini, kay ang Labing Gamhanang Diyos nga si Jehova mao ang templo niini, mao man usab ang Kordero. Ug ang siyudad wala magkinahanglan sa adlaw o sa bulan nga modan-ag niini, kay gidan-agan kini sa himaya sa Diyos, ug ang lampara niini mao ang Kordero.” (Pin. 21:22, 23) Si Jehova makauban na unya niadtong apil sa Bag-ong Jerusalem.—Heb. 7:27; Pin. 22:3, 4. w22.05 17 ¶14-15

Bisag si Jehova ang atong Maglalalang, Tighatag ug Balaod, ug Maghuhukom, siya pod ang atong mahigugmaon nga Amahan sa langit. (Sal. 100:3; Isa. 33:22) Dihang makasala ta niya ug sinserong maghinulsol, naa siyay awtoridad nga pasayloon ta, ug gusto gyod nâ niyang himoon. (Sal. 86:5) Pinaagi kang propetang Isaias, si Jehova naghatag niining mahigugmaong pasalig: “Bisan tuod ang inyong mga sala hayag-pula, kini papution sama sa niyebe.” (Isa. 1:18) Kay dili ta perpekto, kitang tanan makasulti ug makabuhat ug mga butang nga makapasakit sa uban. (Sant. 3:2) Pero wala na magpasabot nga dili na ta puwedeng masuod nila. Masuod gihapon ta nila kon kamao tang mopasaylo. (Prov. 17:9; 19:11; Mat. 18:21, 22) Kon masakitan ta sa ginagmayng butang nga nahimo sa uban, gusto ni Jehova nga pasayloon nato sila. Ug angay gyod nato nang himoon kay si Jehova ‘madagayaong nagpasaylo’ nato.—Isa. 55:7. w22.06 8 ¶1-2

Dili gyod nato angayng ikompara ang atong kaugalingon sa uban, pero makabenepisyo ta kon mokat-on ta sa ehemplo sa ubang alagad ni Jehova. Pananglitan, atong konsiderahon ang ehemplo ni Jesus. Dili ta parehas niya nga perpekto, pero makakat-on ta sa iyang nindot nga mga hiyas ug buhat. (1 Ped. 2:21) Kon maningkamot ta nga sundogon siya kutob sa atong maarangan, mahimo tang mas maayong alagad ni Jehova. Sa Bibliya, makabasa ta bahin sa daghang matinumanong lalaki ug babaye nga angayang sundogon bisag dili sila perpekto. Konsideraha si Haring David, kinsa gitawag ni Jehova nga “tawo nga gikahimut-an sa akong kasingkasing.” (Buh. 13:22) Pero si David nakahimog grabeng mga sala. Pero maayo gihapon siyang ehemplo para nato. Ngano? Kay wala siya mangrason. Hinuon, iyang gidawat ang bug-at nga tambag ug kinasingkasing siyang nagbasol sa iyang gihimo. Ingong resulta, gipasaylo siya ni Jehova.—Sal. 51:3, 4, 10-12. w22.04 13 ¶11-12

Giila sa Bibliya nga ang kamatayon maoy kaaway. (1 Cor. 15:25, 26) Dihang maghunahuna tag kamatayon, tingali mabalaka ta, ilabina kon kita o ang atong mga minahal naay grabeng sakit. Nganong mahadlok tang mamatay? Kay dihang gilalang ta ni Jehova, gibutang niya sa atong kasingkasing ang tinguha nga mabuhi sa walay kataposan. (Eccl. 3:11) Ang kahadlok nga mamatay makatabang nga ampingan nato ang atong kinabuhi. Magpalihok ni nato nga mokaon ug sustansiyadong pagkaon, mag-exercise, magpadoktor, motomar ug tambal, ug maglikay nga ipameligro ang atong kinabuhi sa walay kapuslanan. Si Satanas nahibalo nga importante nato ang atong kinabuhi. Miingon siya nga ibaylo nato ang tanan—bisan ang atong relasyon kang Jehova—aron lang di ta mawad-an sa atong kinabuhi. (Job 2:5) Sayop gyod si Satanas! Pero kay siya man ang “may gahom sa pagpahinabog kamatayon,” iyang pahimuslan ang atong kahadlok nga mamatay aron biyaan nato si Jehova.—Heb. 2:14, 15. w22.06 18 ¶15-16

Kon idili ang atong buluhaton, basig pipila ra ka igsoon ang atong makauban. Maong kinahanglan gyod nga mentinahon nato ang maayong relasyon. Si Satanas ang imong kaaway, dili ang mga igsoon. Palabya ang ilang kasaypanan, ug kon naa may dili pagsinabtanay, paningkamoti nga magkauliay dayon mo. (Prov. 19:11) Pangitag paagi nga makatabang ka sa uban. (Tito 3:14) Ang gihimo sa usa ka grupo sa pagsangyaw aron tabangan ang usa ka sister nga nanginahanglan maayog epekto sa tibuok grupo. Nagkasuod sila, samag pamilya. (Sal. 133:1) Daghan kaayong igsoon ang nag-alagad kang Jehova bisan pa sa mga restriksiyon sa gobyerno. Ang uban nila gipriso tungod sa ilang pagtuo. Makaampo ta para nila ug sa ilang mga pamilya. Puwede pod natong iampo kadtong nagpameligro sa ilang kagawasan aron dasigon ug itagana ang panginahanglan sa naprisong mga igsoon ug depensahan sila sa korte. (Col. 4:3, 18) Hinumdomi nga ang imong mga pag-ampo dakog ikatabang nilang tanan.—2 Tes. 3:1, 2; 1 Tim. 2:1, 2. w22.12 26 ¶15-16

Kasagaran, sundogon sa mga anak ang ilang ginikanan. Siyempre, walay perpektong ginikanan. (Roma 3:23) Bisan pa ana, ang mga ginikanan angayng maningkamot nga magpakitag maayong ehemplo sa ilang mga anak. Usa ka amahan miingon: “Mora silag mga foam, kay ma-absorb nila ang tanan.” Miingon pod siya: “Sultihan mi nila kon ang among ginahimo lahi sa among ginatudlo.” Busa kon gusto nato nga higugmaon sa atong mga anak si Jehova, kinahanglan nilang makita nga gihigugma nato Siya pag-ayo. Daghag paagi nga matudloan sa mga ginikanan ang ilang mga anak sa paghigugma kang Jehova. Ang 17 anyos nga brader nga si Andrew miingon: “Pirme ming tudloan sa among ginikanan nga importante kaayo nga mag-ampo. Kada gabii, mag-ampo mi ni Papa bisag nahuman na kog ampo. . . . Karon dili na ko malisdan nga moampo kay kabalo ko nga Amahan nako si Jehova ug palangga ko niya.” Mga ginikanan, hinumdomi nga ang inyong gugma kang Jehova makatabang sa inyong mga anak nga higugmaon pod siya. w22.05 28 ¶7-8

Aron maandam alang sa bawtismo, ang usa sa mga una natong himoon mao ang sinserong paghinulsol sa atong mga sala. (Buh. 2:37, 38) Kon tinuod ang atong paghinulsol, tinud-anay pod ang atong pagbag-o. Gihunong na ba nimo ang mga binuhatan nga dili makapalipay kang Jehova, sama sa imoral nga pagkinabuhi, pagpanigarilyo, o bastos o sakit nga sinultihan? (1 Cor. 6:9, 10; 2 Cor. 7:1; Efe. 4:29) Padayong paningkamoti nga mohimog mga kausaban. Pakig-estorya sa nag-Bible study nimo, o pangayog tabang ug giya sa mga ansiyano sa kongregasyon. Kon batan-on pa ka ug nagpuyo uban sa imong ginikanan, hangyoa sila nga tabangan kang mahunong ang daotang batasan o bisyo nga makapugong nimo sa pagpabawtismo. Importante pod nga naa kay maayong espirituwal nga rutina. Apil niana ang pagtambong ug pagpakigbahin sa mga tigom. (Heb. 10:24, 25) Ug kon kuwalipikado na kang mouban sa ministeryo, paningkamoti nga regular kang makasangyaw. w23.03 10-11 ¶14-16

Apil sa mga karakter sa Genesis 3:14, 15 ang “halas” ug ang “kaliwat” sa halas. Dili masabtan sa literal nga halas ang giingon ni Jehova sa tanaman sa Eden. Busa ang gihukman ni Jehova seguradong usa ka intelihenteng linalang. Kinsa siya? Klaro ning gipaila sa Pinadayag 12:9. Kini nag-ingon nga “ang orihinal nga halas” mao si Satanas nga Yawa. Dihang ang Bibliya mogamit sa terminong kaliwat, usahay kini nagtumong niadtong nagsundog pag-ayo sa hunahuna o binuhatan sa ilang simbolikong amahan. Busa ang kaliwat sa halas mao ang daotang mga anghel ug mga tawo nga, sama kang Satanas, misupak kang Jehova nga Diyos ug sa Iyang katawhan. Apil nila ang mga anghel nga mibiya sa langit sa panahon ni Noe ug ang daotang mga tawo nga ang panggawi sama sa Yawa nga ilang amahan.—Gen. 6:1, 2; Juan 8:44; 1 Juan 5:19; Jud. 6. w22.07 14-15 ¶4-5

Gimahal pag-ayo ni apostol Pablo ang mga igsoon. Siya mismo nakasinatig mga kalisdanan, busa nakapakita siyag kaluoy ug empatiya sa mga igsoon dihang nag-atubang silag mga pagsulay. Dihay panahon nga si Pablo wala nay kuwarta, maong kinahanglan siyang manarbaho aron matagan-an ang iyang panginahanglan ug nianang sa iyang mga kauban. (Buh. 20:34) Tighimo siyag tolda. Pag-abot niya sa Corinto, nagtrabaho siya uban ni Aquila ug Priscila nga tighimo sab ug tolda. Pero sa “matag igpapahulay,” sangyawan niya ang mga Hudiyo ug Grego. Dayon, pag-abot ni Silas ug Timoteo, “si Pablo okupado kaayo sa pulong.” (Buh. 18:2-5) Wala gyod malimot si Pablo sa pangunang katuyoan sa iyang kinabuhi, ang pag-alagad kang Jehova. Tungod sa iyang pagkugi, nakadasig siya sa mga igsoon. Iyang gipahinumdoman sila nga dili tugotan ang mga kalisdanan ug ang responsibilidad sa pagtagana sa pamilya nga mahimong hinungdan nga mapasagdan ang “mas importanteng mga butang”—ang tanang bahin sa pagsimba kang Jehova. w22.08 20 ¶3

Karon, kabubut-on sa Diyos nga ang maayong balita sa Gingharian isangyaw sa tibuok yuta. (1 Tim. 2:3, 4) Buluhaton kini ni Jehova, ug importante kaayo ni mao nga iya ning gipadumala sa iyang pinalanggang Anak. Kay si Jesus man ang naggiya nato, makasalig ta nga ang buluhatong pagsangyaw molampos sumala sa gusto ni Jehova ug matapos sa dili pa moabot ang kataposan. (Mat. 24:14) Nganong makaseguro man ta ana? Sa hapit nang mobalik si Jesus sa langit, nakigkita siya sa pipila niya ka matinumanong mga sumusunod sa usa ka bukid sa Galilea. Siya miingon kanila: “Ang tanang awtoridad sa langit ug sa yuta gihatag na kanako.” Matikdi pag-ayo ang sunod niyang giingon: “Busa adtoa ninyo ang mga tawo sa tanang kanasoran ug tudloi sila aron mahimong akong mga tinun-an.” (Mat. 28:18, 19) Busa apil sa awtoridad nga gihatag kang Jesus mao ang pagdumala sa buluhatong pagsangyaw. Ug kana nga buluhaton magpadayon hangtod karon ubos sa pagdumala ni Jesus. w22.07 8 ¶1, 3; 9 ¶4

Ang mga matarong, nga naghimog maayo sa wala pa sila mamatay, ‘banhawon ngadto sa kinabuhi’ kay ang ilang ngalan nasulat na man sa basahon sa kinabuhi. Nagpasabot ni nga ang pagkabanhaw niadtong “nagbuhat ug maayo” nga gihisgotan sa Juan 5:29 parehas ra sa pagkabanhaw sa “mga matarong” nga gihisgotan sa Buhat 24:15. Kini nga eksplinasyon nahiuyon sa giingon sa Roma 6:7: “Siya nga namatay gipagawas na gikan sa iyang sala.” Busa dihang mamatay ang mga matarong, ang ilang mga sala napapas na, pero dili ang ilang rekord sa pagkamatinumanon. (Heb. 6:10) Siyempre, ang mga matarong nga banhawon kinahanglang magpabiling matinumanon aron ang ilang ngalan dili mapapas sa basahon sa kinabuhi. w22.09 18 ¶13, 15

Si propetang Daniel maayo kaayong ehemplo sa pagkahimong kasaligan. Bisag gibihag siya sa mga Babilonyanhon, nabatonan dayon niya ang reputasyon ingong tawong kasaligan. Misalig pa gyod niya ang mga tawo dihang iyang gihubad ang mga damgo ni Haring Nabucodonosor sa Babilonya pinaagi sa tabang ni Jehova. (Dan. 4:20-22, 25) Daghang tuig sa ulahi, gipakita pag-usab ni Daniel nga kasaligan siya dihang tukma niyang gihubad ang kahibulongang mensahe diha sa bungbong sa palasyo sa Babilonya. (Dan. 5:5, 25-29) Sa ulahi, si Dario nga Medianhon ug ang iyang mga opisyales nakamatikod sab nga si Daniel ‘labaw kaayog kaalam ug kahibalo.’ Ilang giila nga si Daniel “kasaligan ug wala magpasagad o maghimog daotan.” (Dan. 6:3, 4) Maayong pangutan-on nato ang atong kaugalingon: ‘Nailhan ba ko nga kasaligan?’ Kon kasaligan ta, makahatag tag kadayeganan kang Jehova. w22.09 8-9 ¶2-4

Makaayo nato ang pagsunod sa mga sukdanan ni Jehova sa husto ug sayop. Ngano? Imadyina kon unsay mahitabo kon ang kada bangko lainlaig standard sa pagtino sa bili sa kuwarta o ang kada construction company naay kaugalingong standard sa mga sukod. Puwerte gyong gubota! Ug kon ang mga doktor ug nars dili mosunod sa espesipikong standard sa pag-atiman ug pagtambal sa pasyente, posibleng moresulta nig kamatayon. Busa ang kasaligang mga standard o sukdanan makapanalipod gyod nato. Ingon ana pod ang mga sukdanan sa Diyos sa husto ug sayop; makapanalipod ni nato. Panalanginan ni Jehova kadtong naningkamot nga mosunod sa iyang mga sukdanan. Siya nagsaad: “Ang mga matarong manag-iya sa yuta, ug sila magpuyo niini hangtod sa hangtod.” (Sal. 37:29) Ma-imagine ba nimo ang panaghiusa, kalinaw, ug kalipay dihang ang tanan mosunod sa mga sukdanan ni Jehova? Mao nay kinabuhi nga gusto ni Jehova para nimo. Busa angay gyod natong higugmaon ang pagkamatarong! w22.08 27-28 ¶6-8

Dihang mag-atubang tag mga kalisdanan, mahimong masulayan ang atong pagkamaunongon kang Jehova ug sa iyang organisasyon. Unsay atong himoon aron dili ta madaog sa mga kalisdanan? Kinahanglan natong huptan ang maayong panghunahuna ug magpabiling nagtukaw, nga mobarog nga lig-on sa pagtuo. Mahuptan nato ang maayong panghunahuna kon magpabilin tang kalmado, malinawon tag hunahuna, ug maningkamot ta nga sundogon ang panglantaw ni Jehova. Kon himoon nato nâ, ang atong panghunahuna dili madaog sa atong emosyon. Tingali dili maayo ang pagtratar kanato sa usa ka igsoon nga may pribilehiyo. Lagmit dili intensiyon sa igsoon nga pasakitan ka. (Roma 3:23; Sant. 3:2) Pero nasakitan ka sa iyang gihimo. Basin ganig makaingon ka, ‘Kon organisasyon gyod ni sa Diyos, nganong naa may igsoon nga ingon ana?’ Mao nay gusto ni Satanas nga hunahunaon nato. (2 Cor. 2:11) Ang maong panghunahuna puwedeng mahimong hinungdan nga mobulag ta kang Jehova ug sa iyang organisasyon. Busa angay tang mag-amping nga dili maghambin ug kasuko. w22.11 20 ¶1; 21 ¶3-4

Gihatagan ta ni Jehova ug nindot kaayong paglaom nga mabuhi hangtod sa hangtod. Ang uban naay paglaom nga mabuhi sa langit hangtod sa hangtod ingong imortal nga espiritung linalang. (1 Cor. 15:50, 53) Pero ang kadaghanan naay paglaom nga mabuhi sa yuta hangtod sa hangtod, nga malipayon ug naay hingpit nga panglawas. (Pin. 21:3, 4) Naghinamhinam man ta nga mabuhi hangtod sa hangtod sa langit o sa yuta, importante kaayo nato ang atong paglaom. Segurado tang matuman ang atong gilaoman kay naggikan ni kang Jehova. (Roma 15:13) Nahibalo ta kon unsay iyang gisaad, ug nahibalo ta nga tumanon gyod niya ang iyang mga saad. (Num. 23:19) Kombinsido ta nga gusto gyod ni Jehova nga tumanon ang tanan niyang gisaad, ug kaya gyod nâ niyang himoon. Gihigugma ta sa atong langitnong Amahan, ug gusto niya nga mosalig ta niya. Kon molaom gyod ta sa mga saad ni Jehova, malahutay nato ang mga pagsulay ug magmalipayon ta ug dili mahadlok bisag unsa pay mahitabo. w22.10 24 ¶1-3

Kay ang katawhan dili maminaw, si Isaias mitagna nga itugot ni Jehova nga mag-antos sila. (Isa. 30:5, 17; Jer. 25:8-11) Ug mao gyod nay nahitabo dihang gibihag sila ngadto sa Babilonya. Pero apil sa gibihag ang matinumanong mga Hudiyo, ug giingnan sila ni Isaias nga moabot ang panahon nga pakitaan sila ni Jehova ug pabor. (Isa. 30:18, 19) Ug nahitabo gyod nâ kay gipagawas sila ni Jehova gikan sa pagkabihag. Pero ang giingon ni Isaias nga “Si Jehova mapailobong naghulat nga pakitaan mog pabor” nagpakita nga molabay pa ang taastaas nga panahon una mapagawas ang matinumanong mga binihag. Gani, 70 ka tuig na silang nabihag sa Babilonya ayha pa gitugtan ang pipila kanila nga mobalik sa Jerusalem. (Isa. 10:21; Jer. 29:10) Dihang nakabalik na sila sa ilang yutang natawhan, ang ilang luha sa kagul-anan napulihag luha sa kalipay. w22.11 9 ¶4

Karon, naeksperyensiyahan sa atong mga igsoon sa pipila ka nasod ang naagian sa mga apostoles sa unang siglo dihang gilutos sila tungod sa ilang pagsangyaw bahin kang Jesus. Balikbalik silang gibaoran sa mga maghuhukom sa taas nga korte sa mga Hudiyo nga “mohunong na sa pagsulti pinasukad sa ngalan ni Jesus.” (Buh. 4:18-20; 5:27, 28, 40) Pero nahibalo sila nga gisugo sila sa mas labaw nga awtoridad “sa pagwali ngadto sa katawhan ug sa paghatag ug bug-os nga pamatuod” bahin sa Kristo. (Buh. 10:42) Busa ang ilang representante nga si Pedro ug Juan maisogong miingon nga ilang sundon ang Diyos imbes ang maong mga maghuhukom ug nga dili sila mohunong sa pagsulti bahin kang Jesus. (Buh. 5:29) Human bunali ang mga apostoles tungod sa paghupot sa ilang integridad, sila migawas sa taas nga korte sa mga Hudiyo ‘nga nagsadya kay giisip sila nga takos pakaulawan tungod sa ngalan ni Jesus,’ ug sila mipadayon sa pagsangyaw!—Buh. 5:41, 42. w22.10 12-13 ¶2-4

Siyempre, dihang nagsugod tag tuon bahin kang Jehova, ang una natong nakat-onan mao ang pangunang mga pagtulon-an. Sa sulat ni apostol Pablo sa mga Hebreohanon, iyang gitawag kini nga mga pagtulon-an ingong “simpleng mga butang.” Wala niya pakamenosa ang mga butang nga “una natong nakat-onan.” Gani gipakasama niya kinig gatas nga makapahimsog sa bata. (Heb. 5:12; 6:1) Pero gidasig pod niya ang tanang Kristohanon nga dili lang makontento sa pangunang mga pagtulon-an, kondili mokat-on pod sa lawom nga mga kamatuoran sa Pulong sa Diyos. Naugmad na ba nimo ang tinguha nga makakat-on sa lawom nga mga pagtulon-an sa Bibliya? Gusto ba nimo nga padayong mouswag, nga padayong makakat-on bahin kang Jehova ug sa iyang mga katuyoan? Pero daghan nato ang nalisdan sa pagtuon. Kana pod bay imong gibati? Sa eskuwelahan, nakakat-on ba kag maayo sa pagbasa ug pagtuon? Nag-enjoy ba ka sa imong pagtuon ug gibati ba nimo nga daghan kag nakat-onan? O naghunahuna ba hinuon ka nga dili ka daling makakat-on sa mga libro? Kon mao, dili lang ikaw ang mibati niana. Pero makatabang nimo si Jehova. Siya ang pinakamaayong Magtutudlo. w23.03 9-10 ¶8-10

Kon mapainubsanon ta, tugotan nato ang Pulong sa Diyos nga mogamot sa atong kasingkasing. Ang mga leksiyon sa Bibliya bahin sa kaluoy ug gugma makaimpluwensiya lang nato kon likayan nato ang pagpanaway o ang pagkamapahitas-on. Ang atong pagtratar sa uban magpakita kon gitugotan ba nato ang Pulong sa Diyos sa pag-impluwensiya nato. Ang Pulong sa Diyos wala makaabot sa kasingkasing sa mga Pariseo maong ilang ‘gihukman nga daotan ang mga dili sad-an.’ (Mat. 12:7) Sa susama, ang atong panglantaw ug pagtratar sa uban magpakita kon nagpaimpluwensiya ba gyod ta sa Pulong sa Diyos. Pananglitan, makita ba dayon nato ang maayo sa uban, o manaway dayon ta sa ilang mga sayop? Maluluy-on ba ta ug andam mopasaylo, o masuk-anon ta ug dali rang magdumot? Ang tubag niini magpakita kon ang atong gibasa nag-impluwensiya ba gyod sa atong panghunahuna, pagbati, ug binuhatan.—1 Tim. 4:12, 15; Heb. 4:12. w23.02 12 ¶13-14

Konsideraha ang nahitabo kang Jose nga taga-Arimatea. Tinahod siya sa mga Hudiyo ug membro siya sa Sanhedrin, ang korte suprema sa mga Hudiyo. Pero panahon sa ministeryo ni Jesus, si Jose wala magmaisogon. Si Juan miingon nga “tinun-an siya ni Jesus apan gitago niya kini kay siya nahadlok sa mga Hudiyo.” (Juan 19:38) Bisan pag interesado si Jose sa mensahe sa Gingharian, wala niya ipakita sa uban nga nagtuo siya kang Jesus. Tingali nahadlok siya nga dili na siya tahoron sa komunidad. Pero ang Bibliya nag-ingon nga human mamatay si Jesus, si Jose “maisogong miatubang kang Pilato ug gipangayo ang lawas ni Jesus.” (Mar. 15:42, 43) Wala na itago ni Jose nga siya tinun-an ni Jesus. Mibati ba pod kag kahadlok sama kang Jose? w23.01 30 ¶13-14

Ang rayna sa Sheba nakabalita bahin sa kalinaw ug kadagaya sa nasod sa Israel ubos sa pagmando ni Solomon. Bisag layo, miadto siya sa Jerusalem aron makita kon unsa ni ka tinuod. (1 Hari 10:1) Human makita ang gingharian ni Solomon, iyang gisulti ang mabasa sa teksto karong adlawa. Ang kahimtang ubos sa pagmando ni Solomon naghatag natog ideya kon unsay himoon ni Jehova para sa katawhan ubos sa pagmando sa Iyang Anak, si Jesus. Si Jesus labaw kaayo kang Solomon. Si Solomon dili hingpit ug nakahimog grabeng mga sayop nga nakahatag ug kalisdanan sa katawhan sa Diyos. Pero si Jesus hingpit nga Magmamando ug dili masayop. (Luc. 1:32; Heb. 4:14, 15) Gipamatud-an sa Kristo nga dili gyod siya mohimog sala o bisan unsa nga makadaot sa iyang maunongong mga sakop. Dako gyod nga pribilehiyo nga siya ang atong Hari. w22.12 10-11 ¶9-10

Unsay atong buhaton kon naay makatakod nga sakit nga mikaylap sa atong lugar? Angay natong sundon ang emergency nga mga direksiyon nga ipatuman sa gobyerno sama sa pagpanghunaw, social distancing, pagsul-ob ug mask, ug pag-quarantine. Kon ato ning himoon, atong gipakita nga gipabilhan nato pag-ayo ang regalo sa Diyos nga kinabuhi. Panahon sa mga emergency, makadungog tingali tag dili tinuod nga mga impormasyon gikan sa atong mga higala, silingan, ug sa balita. Imbes motuo sa “tanan [natong] madunggan,” didto ta maminaw sa pinakakasaligan nga impormasyon gikan sa gobyerno ug sa mga doktor. (Prov. 14:15) Ang Nagamandong Lawas ug ang mga sangang buhatan naningkamot nga makakuhag tukmang impormasyon sa dili pa sila mohatag ug direksiyon bahin sa mga tigom ug sa buluhatong pagsangyaw. Kon sundon nato ni nga mga direksiyon, maprotektahan nato ang atong kaugalingon ug ang uban. Makatabang pod ni nga mahimong mas maayo ang reputasyon sa mga Saksi ni Jehova sa atong lugar.—1 Ped. 2:12. w23.02 23 ¶11-12

Dihang ang mga Israelinhon misulod sa Yutang Saad, nagpuyo sila sa dakodako nga lugar. Ang mga Israelinhon nga nagpuyo sa usa ka lugar dakog purohan nga mawad-ag interes sa ilang mga isigka-Israelinhon nga nagpuyo sa ubang mga bahin sa nasod. Pero nagsugo si Jehova nga ang mga Israelinhon magtigom sa lainlaing okasyon aron maminaw samtang basahon ug ipatin-aw ang iyang Pulong. (Deut. 31:10-12; Neh. 8:2, 8, 18) Imadyina kon unsa kahay gibati sa usa ka matinumanong Israelinhon dihang miabot siya sa Jerusalem ug nakita niya ang milyonmilyong isigkamagsisimba gikan sa lainlaing bahin sa nasod! Busa gitabangan ni Jehova ang iyang katawhan nga magpabiling nahiusa. Sa ulahi, dihang naporma ang Kristohanong kongregasyon, ang mga sakop niini lainlaig pinulongan ug kahimtang sa kinabuhi. Pero nagkahiusa sila sa pagsimba sa tinuod nga Diyos. Kadtong nahimong mga magtutuo nakasabot sa Pulong sa Diyos tungod sa tabang sa ilang isigkamagsisimba ug sa pagtigom uban kanila.—Buh. 2:42; 8:30, 31. w23.02 3 ¶7

Si Jehova nagsaad nga kadtong mosunod niya makadawat ug “kinabuhing walay kataposan.” (Roma 6:23) Kon pamalandongon nato ang saad ni Jehova, mas molalom ang atong gugma kaniya. Hunahunaa ni: Gimahal gyod ta pag-ayo sa atong langitnong Amahan mao nga dili gyod ta mabulag kaniya. Ang saad sa Diyos nga kinabuhing walay kataposan motabang nato nga makalahutay sa mga pagsulay. Bisan pag patyon ta sa atong mga kaaway, dili ta mokompromiso. Ngano? Kay nahibalo ta nga kon mamatay ta nga matinumanon kang Jehova, iya tang banhawon nga may paglaom nga dili na mamatay pag-usab. (Juan 5:28, 29; 1 Cor. 15:55-58; Heb. 2:15) Nahibalo ta nga kaya ni Jehova nga masustenir ang atong kinabuhi hangtod sa hangtod kay siya ang Tuboran sa kinabuhi ug wala siyay kataposan. (Sal. 36:9) Ang Bibliya nagpamatuod nga si Jehova naglungtad na sukad pa sa una ug dili mamatay.—Sal. 90:2; 102:12, 24, 27. w22.12 2 ¶1-3

Ingong katawhan ni Jehova, dili na ta matingala kon makaatubang tag mga pagsulay. Nahibalo ta ana, kay ang Bibliya nag-ingon nga “kita kinahanglang mosulod sa Gingharian sa Diyos pinaagi sa daghang kasakitan.” (Buh. 14:22) Nahibalo pod ta nga ang uban natong problema bug-os lang masulbad sa bag-ong kalibotan sa Diyos, diin “ang kamatayon mawala na, ug wala na unyay pagbangotan, pagtiyabaw, ug kasakit.” (Pin. 21:4) Dili pugngan ni Jehova ang mga pagsulay nga mahitabo nato. Pero tabangan ta niya nga makalahutay. Matikdi ang giingon ni apostol Pablo sa mga Kristohanon sa Roma. Gisulti una niya ang mga pagsulay nga naagian niya ug sa mga igsoon. Dayon siya misulat: “Sa tabang Niya nga nahigugma kanato, kita bug-os nga nagmadaogon.” (Roma 8:36, 37) Nagpasabot na nga tabangan ka ni Jehova nga magmalamposon bisag nagpadayon pa ang imong pagsulay. w23.01 14 ¶1-2