Marso

Gidasig ni apostol Pedro ang mga Kristohanon nga gamiton ang ilang mga gasa ug abilidad aron palig-onon ang mga igsoon. Si Pedro misulat: “Sumala sa nadawat nga gasa sa matag usa, gamita kini sa pag-alagad sa usag usa ingong maayong mga piniyalan sa dili hitupngang pagkamaayo sa Diyos.” (1 Ped. 4:10) Dili ta angayng magduhaduha nga gamiton sa pinakamaayong paagi ang atong mga gasa o abilidad tungod lang kay mahadlok ta nga masina o maluya ang uban. Pero mag-amping ta nga dili ni ipanghambog. (1 Cor. 4:6) Hinumdoman nato nga ang atong mga abilidad gasa gikan sa Diyos. Angay natong gamiton ang maong mga gasa aron palig-onon ang kongregasyon, dili aron magpasikat. (Filip. 2:3) Kon gamiton nato ang atong kusog ug mga abilidad sa paghimo sa kabubut-on sa Diyos, malipay gyod ta pag-ayo—dili tungod kay nalabwan nato ang uban kondili tungod kay gigamit nato ang atong mga gasa sa pagdayeg kang Jehova. w22.04 11-12 ¶7-9

Gihigugma ni Jesus ang Balaang Kasulatan, ug ang iyang pagbati niini gitagna sa Salmo 40:8: “Kalipay nako ang pagbuhat sa imong kabubut-on, Oh akong Diyos, ug ang imong balaod anaa sa akong kahiladman.” Tungod ana, malipayon siya ug malamposon sa pag-alagad kang Jehova. Sama kang Jesus, magmalipayon ug magmalamposon pod ta kon higugmaon nato ang Pulong sa Diyos. (Sal. 1:1-3) Base sa atong nakat-onan sa giingon ni Jesus ug sa iyang ehemplo, importante nga pauswagon nato ang atong pagbasa sa Bibliya. Mapauswag nato ang atong pagsabot sa Bibliya kon mag-ampo ta, dili magdalidalig basa, mangutana, ug magsulat ug mugbong nota. Hunahunaon pod natog maayo ang atong gibasa ug mag-research sa atong binase sa Bibliya nga mga publikasyon. Ug aron maimpluwensiyahan ta sa Pulong sa Diyos, importante ang hustong kinaiya samtang magbasa. Kon maningkamot ta sa paghimo niini, mas makabenepisyo ta sa atong pagbasa sa Bibliya ug mas masuod ta kang Jehova.—Sal. 119:17; Sant. 4:8. w23.02 13 ¶15-16

Pagpilig espesipikong tumong ug dayon paghimog praktikal nga mga lakang sa pagkab-ot sa imong tumong. Unsaon nimo ni paghimo? Ibutang ta nga gusto nimong pauswagon ang imong paagi sa pagtudlo. Puwede nimong tun-an ang brosyur nga Mahimong Hanas sa Pagbasa ug Pagpanudlo. Dihang hatagan kag bahin sa midweek nga tigom, puwede kang magpa-rehearse sa eksperyensiyadong brader ug pangutan-a siya kon unsay imong pauswagon. Andamag maayo ang imong asaynment. Pinaagi ana, makita sa uban nga kugihan ka ug kasaligan. (2 Cor. 8:22) Komosta man kon lisod ang skill nga gusto nimong tun-an? Ayawg surender! Nahimo kahang hawod nga mamumulong o magtutudlo si Timoteo? Walay giingon ang Bibliya. Pero segurado nga miuswag si Timoteo sa pagtuman sa iyang mga asaynment kay gisunod niya ang tambag ni Pablo.—2 Tim. 3:10. w22.04 24-25 ¶8-11

Kinsa ang pintas nga mananap nga naay pito ka ulo? Namatikdan nato nga kini nga mananap morag leopardo, pero ang mga tiil niini parehas nianang sa oso, ang baba niini parehas nianang sa leyon, ug naa ni 10 ka sungay. Kining tanan nga deskripsiyon makita pod diha sa upat ka mananap nga gihisgotan sa Daniel kapitulo 7. Pero sa Pinadayag, kini nga mga deskripsiyon makita diha sa usa lang ka mananap, dili sa upat ka lainlaing mananap. Kini nga pintas nga mananap wala magsimbolo sa usa lang ka gobyerno o gamhanan kaayong imperyo. Gihisgotan sa Pinadayag nga kini nagmando sa “matag tribo ug katawhan ug pinulongan ug nasod.” Busa masabtan nato nga dili ni usa lang ka gobyerno. (Pin. 13:7) Klaro nga kining pintas nga mananap nagsimbolo sa tanang gobyerno nga nagmando sa tawo sukad sa una hangtod karon. (Eccl. 8:9) Ang laing ilhanan mao nga sa Bibliya, ang numerong 10 sagad nagpasabot ug pagkakompleto. w22.05 9 ¶6

Kinsay makabenepisyo niining nindot kaayong mga panalangin? Ang una mao ang dakong panon nga maluwas sa Armagedon ug ang ilang mga anak nga matawo sa bag-ong kalibotan. Pero ang Pinadayag kapitulo 20 nagsaad pod nga ang mga patay banhawon. (Pin. 20:11-13) Ang namatay nga mga “matarong” apil ang mga “dili matarong”—kinsa wala makabaton ug kahigayonan nga makakat-on bahin kang Jehova—mabuhi pag-usab dinhi sa yuta. (Buh. 24:15; Juan 5:28, 29) Buot bang ipasabot nga sa Usa ka Libo ka Tuig nga Pagmando, ang tanan banhawon? Dili. Kadtong tinuyong naghimog daotan ug wala gyod magpahimulos sa kahigayonan nga moalagad kang Jehova sa wala pa sila mamatay, dili banhawon. Gipamatud-an nila nga dili sila angayang mabuhi sa Paraisong yuta.—Mat. 25:46; 2 Tes. 1:9; Pin. 17:8; 20:15. w22.05 18 ¶16-17

Pinaagi sa “matinumanon ug maalamong ulipon,” si Jesus nag-establisar ug talagsaong organisasyon dinhi sa yuta aron suportahan ang putling pagsimba. (Mat. 24:45) Unsay imong gibati sa maong organisasyon? Tingali parehas kang Pedro ang imong gibati, kinsa miingon kang Jesus sa mga pulong sa teksto karong adlawa. Unsa na kaha ta karon kon dili ta bahin sa organisasyon ni Jehova? Pinaagi sa organisasyon, giseguro sa Kristo nga kanunay tang mapakaon sa espirituwal. Gibansay pod ta niya aron mahimong epektibo sa atong ministeryo. Gitabangan sab ta niya nga masul-ob “ang bag-ong personalidad” aron mapalipay nato si Jehova. (Efe. 4:24) Si Jesus naghatag ug maalamong giya sa lisod nga mga panahon. Klaro kaayong makita ang mga kaayohan niana nga giya dihang nahitabo ang COVID-19 nga pandemic. Daghang tawo ang naglibog kon unsay buhaton, pero giseguro ni Jesus nga makadawat tag klarong giya aron maproteksiyonan ta. w22.07 12 ¶13-14

Gisugo ni Jehova ang mga Israelinhon sa karaang panahon nga regular nga tudloan ang ilang mga anak bahin niya. (Deut. 6:6, 7) Ang maong mga ginikanan daghag kahigayonan sa tibuok adlaw nga makig-estorya sa ilang mga anak ug tudloan sila nga higugmaon si Jehova. Pananglitan, ang Israelinhon nga batang lalaki daghang oras tingaling motabang sa iyang papa sa pagtanom o sa paghakot sa giani. Ang iyang igsoon nga babaye halos tibuok adlaw tingaling motabang sa ilang mama sa pagtahi, paghablon, ug sa ubang buluhaton sa balay. Samtang mag-uban sa trabaho ang ginikanan ug mga anak, daghang importanteng butang ang puwede nilang estoryahan. Pananglitan, puwede nilang estoryahan kon unsa ka maayo si Jehova ug kon giunsa niya pagtabang ang ilang pamilya. Sa daghang lugar, ang mga ginikanan ug mga anak wala kaayoy kahigayonan nga mag-uban. Ang mga ginikanan naa tingali sa trabaho ug ang mga anak naa sa eskuwelahan. Busa ang mga ginikanan kinahanglang mangitag higayon nga maestorya nila ang ilang mga anak.—Efe. 5:15, 16. w22.05 28 ¶10-11

Ang seryosong mga sala maoy grabeng paglapas sa balaod sa Diyos. Kon ang Kristohanon makahimo niana nga sala, kinahanglan siyang moampo kang Jehova nga Diyos ug moduol sa mga ansiyano sa kongregasyon. (Sal. 32:5; Sant. 5:14) Unsay responsibilidad sa mga ansiyano? Si Jehova lang ang naay katungod nga bug-os magpasaylo sa mga sala, ug iya ning himoon base sa halad lukat. Pero gihatagan ni Jehova ang mga ansiyano ug responsibilidad sa pagdesisyon base sa Kasulatan kon ang makasasala angay pa bang magpabilin sa kongregasyon. (1 Cor. 5:12) Apil sa ilang himoon mao ang pagtubag sa mosunod nga mga pangutana: Gituyo o giplano ba sa maong tawo ang sala? Gisulayan ba ni niyag tago? Balikbalik ba ni niyang gihimo sa taastaas nga panahon? Ug ang pinakaimportante, naa bay ebidensiya nga kinasingkasing siyang naghinulsol? Naa bay mga timailhan nga napasaylo na siya ni Jehova?—Buh. 3:19. w22.06 9 ¶4

Gidasig ni Jesus ang iyang mga sumusunod nga tinguhaon ang pagkamatarong. (Mat. 5:6) Kini nagpasabot nga kinahanglang gusto kaayo natong himoon kon unsay husto, maayo, ug hinlo sa panan-aw sa Diyos. Gihigugma ba nimo ang kamatuoran ug ang pagkamatarong? Segurado mi nga imo nang gihigugma. Gidumtan nimo ang bakak ug ang tanang butang nga sayop ug daotan. (Sal. 119:128, 163) Ang pagpamakak nagpakita sa personalidad ni Satanas, ang magmamando niining kalibotana. (Juan 8:44; 12:31) Usa sa mga tumong ni Satanas mao ang pagdaot sa balaang ngalan ni Jehova nga Diyos. Sukad sa rebelyon sa Eden, si Satanas nagpakaylap ug mga bakak bahin sa atong Diyos. Gipatuo niya ang mga tawo nga si Jehova hakog ug dili matinud-anon nga Magmamando kay naa kunoy maayong mga butang nga wala Niya ihatag sa mga tawo. (Gen. 3:1, 4, 5) Ang mga bakak ni Satanas bahin kang Jehova maoy samag hilo nga padayong nagdaot sa hunahuna ug kasingkasing sa mga tawo. Kon pilion sa mga tawo nga dili ‘higugmaon ang kamatuoran,’ puwede silang maimpluwensiyahan ni Satanas nga himoon ang tanang klase sa daotang mga buhat.—Roma 1:25-31. w23.03 2 ¶3

Samtang naningkamot ka nga mahunong ang usa ka dili maayong buhat, basig naa gihapoy mga panahon nga imo nang mahimo. O tingali mawad-an kag pailob o maguol kay morag dili nimo makab-ot ang imong tumong. Unsay makatabang nimo nga magpadayon? Ang importante kaayo nga hiyas—ang imong gugma kang Jehova. Ang imong gugma kang Jehova maoy nindot kaayo nga hiyas. Gani, kini ang imong pinakamaayong hiyas. (Prov. 3:3-6) Ang imong dakong gugma sa Diyos makatabang nga dili ka mosurender bisan pa sa mga problema. Ang Bibliya sagad maghisgot sa maunongong gugma ni Jehova sa iyang mga alagad. Kini nagpasabot nga dili siya mobiya sa iyang mga alagad o moundang sa paghigugma kanila. Gihimo ka sumala sa larawan sa Diyos. (Gen. 1:26) Unsaon nimo pagpakita ang maong gugma? Una, ipakita nga mapasalamaton ka. (1 Tes. 5:18) Kada adlaw, pangutan-a ang imong kaugalingon, ‘Giunsa pagpakita ni Jehova nga gimahal ko niya?’ Dayon sa imong mga pag-ampo, seguroa nga mapasalamatan nimo si Jehova ug hisgoti ang espesipikong mga butang nga iyang gihimo para nimo. Isipa ang mga buhat ni Jehova ingong personal nga gugma niya para nimo. w23.03 12 ¶17-19

Gipakitaan ni Jesus ug kaayo ug gugma ang 12 ka apostoles. Unsay atong makat-onan? Imbes magpokus sa sayop sa uban, importante nga bantayan nato ang atong reaksiyon. Dihang masuko ta sa usa ka igsoon, pangutan-on nato ang atong kaugalingon: ‘Nganong apektado man kaayo ko sa iyang gihimo? Nagpakita ba ni nga naa koy dili maayong kinaiya nga kinahanglan nakong usbon? Naa kaha siyay giatubang nga mga problema? Bisan pag naa koy rason nga maglagot, makapakita ba kog gugma ug palabyon na lang ang nahitabo?’ Kon padayon tang magpakitag gugma sa uban, atong gipamatud-an nga tinuod ta nga mga sumusunod ni Jesus. Ang gihimo ni Jesus nagtudlo pod nato nga sabton ang atong mga igsoon. (Prov. 20:5) Tinuod, si Jesus makabasag kasingkasing, kita dili. Pero puwede natong pailoban ang atong mga igsoon sa ilang mga sayop. (Efe. 4:1, 2; 1 Ped. 3:8) Mas sayon nang himoon kon mas mailhan nato sila. w23.03 30 ¶14-16

Pahimuslan ni Satanas ang mga medical emergency aron mokompromiso ta. Presyuron tingali ta sa mga doktor o sa dili Saksing mga membro sa pamilya nga magpaabonog dugo, nga supak sa balaod sa Diyos. O kaha basin naay mangombinsir nato nga sulayan ang laing paagi sa pagtambal nga supak sa mga prinsipyo sa Bibliya. Dili ta gustong mamatay, pero nahibalo ta nga si Jehova dili mohunong sa paghigugma nato kon mawad-an ta sa atong kinabuhi. (Roma 8:37-39) Dihang mamatay ang mga higala ni Jehova, iya gihapon silang hinumdoman. Naa sila sa iyang hunahuna, nga mora bag buhi gihapon sila. (Luc. 20:37) Nangandoy siya sa panahon nga banhawon na niya sila. (Job 14:15) Dako kaayog gibayad si Jehova aron ‘makabaton tag kinabuhing walay kataposan.’ (Juan 3:16) Nahibalo ta nga gimahal ug gipangga kaayo ta ni Jehova. Busa imbes talikdan nato si Jehova dihang masakit ta o baharan nga patyon, moduol hinuon ta niya para sa kahupayan, kaalam, ug kusog.—Sal. 41:3. w22.06 18 ¶16-17

Ang Bibliya nag-ingon: “Ang pagkahadlok kang Jehova mao ang sinugdan sa kaalam, ug ang kahibalo bahin sa Usa nga Labing Balaan mao ang pagsabot.” (Prov. 9:10) Busa dihang mohimo tag importanteng desisyon, kinahanglang ibase nato ni sa panghunahuna ni Jehova—sa “kahibalo bahin sa Usa nga Labing Balaan.” Mahimo nato nâ pinaagi sa pagtuon sa Bibliya ug sa atong mga publikasyon. Nianang paagiha, nagpakita tag tinuod nga kaalam. (Prov. 2:5-7) Si Jehova lang ang makahatag natog tinuod nga kaalam. (Roma 16:27) Nganong siya ang Tinubdan sa kaalam? Una, siya ang atong Maglalalang, ug walay kinutoban ang iyang kahibalo ug pagsabot bahin sa iyang kalalangan. (Sal. 104:24) Ikaduha, ang tanang ginahimo ni Jehova nagpakita nga maalamon siya. (Roma 11:33) Ikatulo, ang maalamong tambag ni Jehova makahatag gyod ug kaayohan niadtong mopadapat niini. (Prov. 2:10-12) Kon gusto natong makabaton ug tinuod nga kaalam, kinahanglang dawaton nato kining tulo ka importanteng kamatuoran ug magpagiya niini sa atong mga desisyon ug himoon. w22.10 19 ¶3-4

Si Satanas napildi sa gubat nga gitagna sa Pinadayag kapitulo 12, ug siya ug ang mga demonyo gitambog sa yuta. Nasuko kaayo si Satanas, ug iya ning gipahungaw ngadto sa mga tawo. Tungod niini, nahimong “alaot ang yuta.” (Pin. 12:9-12) Sa unsang paagi makabenepisyo ta niini nga mga tagna? Ang mga panghitabo sa kalibotan ug ang nakita natong kausaban sa kinaiya sa mga tawo motabang nato nga mahibaloan nga si Jesus nahimo nang Hari. Busa imbes sobrang mabalaka nga ang mga tawo hakog ug bayolente, atong hinumdoman nga ang ilang binuhatan nagtuman sa tagna sa Bibliya. Ang Gingharian nagmando na! (Sal. 37:1) Ug mosamot pa gyod ang kalisdanan sa kalibotan samtang nagkaduol ang Armagedon. (Mar. 13:8; 2 Tim. 3:13) Mapasalamaton kaayo ta sa atong mahigugmaong langitnong Amahan sa pagtabang nato nga masabtan kon nganong daghan kaayo ang problema sa kalibotan. w22.07 3-4 ¶7-8

Puwede natong hangyoon si Jehova nga tabangan ang atong mga igsoon nga makalahutay bisan pa sa sakit, kalamidad, gubat, paglutos, ug ubang kalisdanan. Makaampo pod ta para sa mga igsoon nga nagsakripisyo sa paghatag ug hinabang. Basig naa kay nailhan nga mga igsoon nga nag-atubang ug ingon ana nga kalisdanan. Puwede nimong isulti ang ilang ngalan diha sa imong pag-ampo. Dihang hangyoon nato si Jehova nga tabangan sila nga makalahutay, atong gipakita nga tinuod nato silang gihigugma. Ang mga nanguna sa kongregasyon mapasalamaton nga ato silang giapil sa atong pag-ampo kay makatabang ni nila. Ingon ana ang gibati ni apostol Pablo. Siya misulat: “Iampo sab ko, aron mahibalo ko kon unsay angayng isulti dihang mosulti ko, aron may kaisog ko sa pagsangyaw sa sagradong tinago sa maayong balita.” (Efe. 6:19) Karon sab, daghang kugihang brader ang nanguna kanato. Dihang iampo nato kang Jehova nga panalanginan ang ilang buluhaton, atong gipakita nga gihigugma nato sila. w22.07 23-24 ¶14-16

Ang sundalo magsul-ob ug helmet aron dili maunsa ang iyang ulo. Sa atong pagpakig-away kang Satanas, kinahanglan natong panalipdan ang atong hunahuna. Naggamit siyag lainlaing paagi aron tentalon ta ug impluwensiyahan ang atong panghunahuna. Sama nga ang helmet manalipod sa ulo sa sundalo, ang atong paglaom manalipod sab sa atong panghunahuna aron makapabilin tang matinumanon kang Jehova. Kon mohuyang ang atong paglaom ug magpokus na ta sa atong mga tinguha, posibleng mawala sa atong hunahuna ang saad nga kinabuhing walay kataposan. Konsideraha ang nahitabo kaniadto sa ubang Kristohanon sa Corinto. Nawad-an silag pagtuo sa importante kaayong saad sa Diyos—ang paglaom sa pagkabanhaw. (1 Cor. 15:12) Si Pablo nag-ingon nga kadtong wala magtuo sa pagkabanhaw nagpokus lang sa ilang presenteng kinabuhi. (1 Cor. 15:32) Daghan karon ang wala magtuo sa mga saad sa Diyos, ug tungod niana nagpokus lang sila sa ilang kinabuhi karon ug gipahimuslan nila ang bisan unsa nga makahatag nilag kalipay. Pero lahi ta kay may pagsalig ta sa mga saad sa Diyos. w22.10 25-26 ¶8-9

Gidasig ka ni Jehova nga moampo kaniya. Iyang nakita ang imong mga kalisdanan ug gipasaligan ka niya nga maminaw siya sa imong mga pag-ampo sa bisan unsang panahon. Malipay siya nga mamati sa pag-ampo sa iyang mga magsisimba. (Prov. 15:8) Unsay puwede nimong iampo dihang mobati kang nag-inusara? Ipahungaw kang Jehova ang imong gibati. (Sal. 62:8) Isulti kaniya ang imong mga gikabalak-an. Pangayog tabang kang Jehova kon unsay imong himoon ug hangyoa siya nga hatagan kag kaisog nga mosulti. Puwede kang mangayo niyag kaalam aron mapatin-aw nimo ang imong tinuohan sa matinahorong paagi. (Luc. 21:14, 15) Kon na-depress ka, hangyoa si Jehova nga tabangan ka nga makig-estorya sa usa ka hamtong nga igsoon bahin sa imong gibati. Puwede nimong hangyoon si Jehova nga tabangan ang maong igsoon nga maminaw ug mosabot nimo. Matikdi kon giunsa niya pagtubag ang imong mga pag-ampo, ug dawata ang tabang sa uban. Kon imo nang himoon, dili na kaayo ka mobati nga nag-inusara. w22.08 10 ¶6

Ang bag-ong kongregasyon sa Tesalonica nakaatubang ug grabeng paglutos. Ang pintas nga mga magsusupak nagdala sa “pipila sa mga igsoon ngadto sa mga magmamando sa siyudad.” (Buh. 17:6) Ma-imagine ba nimo ang kahadlok sa bag-ong nakabig nga mga Kristohanon? Posible nga makapaluya to nila sa pag-alagad kang Jehova, pero dili gusto ni apostol Pablo nga mahitabo na. Gipaneguro niya nga maatiman pag-ayo ang bag-ong kongregasyon. Gipahinumdoman ni Pablo ang mga taga-Tesalonica: “Gipadala namo si Timoteo, nga atong igsoon . . . , aron palig-onon ug hupayon mo maylabot sa inyong pagtuo, aron walay maluya kaninyo sa mga kasakitan.” (1 Tes. 3:2, 3) Nakita ni Timoteo kon giunsa pagpalig-on ni Pablo ang mga igsoon sa Listra. Kay nakita ni Timoteo ang tabang ni Jehova, mapasaligan niya ang bag-ong mga igsoon nga moarang-arang ra ang ilang kahimtang.—Buh. 14:8, 19-22; Heb. 12:2. w22.08 21 ¶4

Sa ulahing bahin sa ika-19ng siglo, naay grupo sa mga estudyante sa Bibliya nga gipangunahan ni Charles Taze Russell, ug gitun-an nila pag-ayo ang Kasulatan. Gusto nilang mahibaloan kon unsa gyoy kahulogan sa halad ni Jesus ug kon unsaon paghandom ang iyang kamatayon. Nakabenepisyo ta sa pagtuon nga ilang gihimo kaniadto. Ngano? Nasabtan nato ang kamatuoran bahin sa halad ni Jesus ug kon unsay napaposible tungod ani. (1 Juan 2:1, 2) Nakat-onan pod nato nga naay duha ka paglaom nga gitudlo ang Bibliya para sa mga tawo nga nakapalipay sa Diyos—imortal nga kinabuhi sa langit para sa pipila ug kinabuhing walay kataposan dinhi sa yuta para sa uban. Mas masuod ta kang Jehova samtang atong pamalandongon ang iyang dakong gugma kanato ug ang mga benepisyo nga atong madawat tungod sa halad ni Jesus. (1 Ped. 3:18) Busa sama sa gihimo sa matinumanong mga igsoon kaniadto, imbitahon pod nato ang uban nga saulogon ang Memoryal sumala sa paagi nga gitudlo ni Jesus. w23.01 21 ¶6-7

Gitudloan ni Jesus ang mga tawo bahin sa maayong mga butang nga himoon sa Gingharian sa Diyos. Mapasalamaton ta sa lukat kay tungod ani, naposible nga masuod ta kang Jehova ug Jesus. Kadtong magpakitag pagtuo kang Jesus duna poy paglaom nga mabuhi sa walay kataposan ug makita pag-usab ang ilang namatay nga mga minahal. (Juan 5:28, 29; Roma 6:23) Wa gyod tay gihimo nga makaingon ta nga angayan tang modawat niini nga mga panalangin, ug di gyod nato mabayran ang Diyos ug ang Kristo sa ilang gihimo para nato. (Roma 5:8, 20, 21) Pero puwede natong ipakita nga mapasalamaton kaayo ta. Sa unsang paagi? Pinaagi sa paggamit sa atong materyal nga mga butang sa pag-alagad kang Jehova. Pananglitan, puwede tang moboluntaryo sa pagtukod ug pagmentinar sa mga dapit sa pagsimba. w23.01 26 ¶3; 28 ¶5

Bilyonbilyong tawo sa tibuok kalibotan ang atimanon sa mga magmamando sa Gingharian sa Diyos. Sama kang Jesus, ang 144,000 mag-alagad ingong mga hari ug saserdote. (Pin. 5:10) Ubos sa Moisesnong Balaod, ang mga saserdote ang may pangunang responsibilidad nga tabangan ang katawhan nga magpabiling himsog sa pisikal ug espirituwal. Ang Balaod maoy ‘anino sa maayong mga butang nga moabot,’ busa makaingon ta nga ang kaubang mga magmamando ni Jesus dunay espesyal nga responsibilidad sa pag-atiman sa pisikal ug espirituwal nga panginahanglan sa katawhan sa Diyos. (Heb. 10:1) Wala ta mahibalo kon sa unsang paagi ang maong mga hari ug saserdote maghatag ug instruksiyon ug giya sa mga sakop sa Gingharian dinhi sa yuta. Makasalig ta nga sa Paraiso, kadtong magpuyo sa yuta makadawat sa giya nga ilang gikinahanglan.—Pin. 21:3, 4. w22.12 11 ¶11-13

Gusto nato nga kadtong motambong sa unang higayon makakat-on kon unsay gihimo ni Jehova ug Jesus para natong tanan. Usa na ka rason nga mangimbitar ta para sa Memoryal. (Juan 3:16) Nanghinaot ta nga ang ilang makita ug madungog sa Memoryal makadasig nila nga mokat-on ug dugang ug mahimong mga alagad ni Jehova. Ato pong imbitahon kadtong wala na mag-alagad kang Jehova. Ato nang himoon aron pahinumdoman sila nga gimahal gihapon sila sa Diyos. Daghan ang modawat sa atong imbitasyon ug lipay kaayo ta nga makita sila. Ang pagtambong sa Memoryal magpahinumdom nila kon unsa sila ka malipayon niadtong nag-alagad pa sila kang Jehova. (Sal. 103:1-4) Dawaton man sa mga tawo ang atong imbitasyon o dili, magkugi ta sa pagpangimbitar para sa Memoryal kay nahibalo ta nga interesado si Jehova sa matag indibiduwal.—Luc. 15:7; 1 Tim. 2:3, 4. w23.01 20 ¶1; 22-23 ¶9-11

Sa gabii una mamatay si Jesus, siya mihangyo sa iyang langitnong Amahan. Iyang gihangyo si Jehova nga bantayan ang iyang mga sumusunod. (Juan 17:15, 20) Si Jehova kanunayng nagbantay—nag-atiman ug nanalipod—sa iyang katawhan. Pero nahibalo si Jesus nga ang iyang mga sumusunod makaatubang ug grabeng pagsupak gikan kang Satanas. Nahibalo sab si Jesus nga gikinahanglan nila ang tabang ni Jehova aron masuklan ang mga pag-atake sa Yawa. Ang kalibotan ni Satanas mao ang hinungdan sa daghang kalisdanan sa tinuod nga mga Kristohanon karon. Kini nga mga kalisdanan puwedeng makapaluya nato ug magsulay pa gani sa atong pagkamaunongon kang Jehova. Pero atong makat-onan nga dili ta angayng mahadlok. Si Jehova nagbantay nato. Iyang nakita ang atong mga kalisdanan ug andam siyang motabang nato. Oo, si Jehova “nagtan-aw [o, nagbantay] niadtong mga nahadlok kaniya . . . sa pagluwas kanila.”—Sal. 33:18-20. w22.08 8 ¶1-2

Kada tuig, sa mga semana una ug human sa Memoryal, gipakita nato ang atong apresasyon sa gihimo ni Jesus pinaagi sa paggahin ug panahon sa pag-ampo ug pagpamalandong sa mga kaayohan nga madawat sa mga tawo tungod sa iyang kamatayon. Mangimbitar sab ta ug daghan kutob sa mahimo sa pagtambong niining espesyal nga okasyon. Ug dili gyod ta gusto nga naay makapugong nato sa pagtambong sa Memoryal. Panahon sa Memoryal, atong makat-onan kon nganong gikinahanglan sa mga tawo ang lukat ug kon sa unsang paagi ang kamatayon sa usa ka tawo magtabon sa sala sa daghan. Mapahinumdoman ta kon unsay gisimbolohan sa tinapay ug bino ug kon kinsay angayng mokaon ug moinom niini. (Luc. 22:19, 20) Ug mapamalandong pod nato ang nindot nga kaugmaon niadtong naglaom nga magpuyo sa yuta hangtod sa hangtod. (Isa. 35:5, 6; 65:17, 21-23) Angay gyod natong pabilhan kini nga mga kamatuoran. w23.01 20 ¶2; 21 ¶4

Pinaagi sa paghatag sa iyang Anak ingong lukat aron mapasaylo ang atong mga sala, gipaposible sa Diyos nga makabaton tag kinabuhing walay kataposan. (Mat. 20:28) Si apostol Pablo misulat: “Kay ang kamatayon pinaagi man sa usa ka tawo, ang pagkabanhaw sa mga patay pinaagi usab sa usa ka tawo. Kay ingon nga diha kang Adan ang tanan nangamatay, sa ingon usab diha sa Kristo ang tanan pagabuhion.” (1 Cor. 15:21, 22) Gitudloan ni Jesus ang iyang mga sumusunod nga iampo nga moabot ang Gingharian ug matuman ang kabubut-on sa Diyos dinhi sa yuta. (Mat. 6:9, 10) Apil sa katuyoan sa Diyos nga ang mga tawo mabuhi sa walay kataposan sa yuta. Aron matuman nâ, gitudlo ni Jehova ang iyang Anak ingong Hari sa Mesiyanikong Gingharian. Ginatigom sa Diyos ang 144,000 ka tawo gikan sa yuta aron makauban ni Jesus sa pagtuman sa Iyang kabubut-on.—Pin. 5:9, 10. w22.12 5 ¶11-12

Kon mamatyan tag minahal, mingawon kaayo ta niya. Sa primero, masakitan tingali ta, ilabina kon nag-antos siya sa wala pa siya mamatay. Pero paglabay sa panahon, mobati na tingali tag kalipay dihang maghunahuna ta sa mga butang nga iyang gitudlo o sa iyang gihimo o gisulti nga nakadasig o nakapalipay nato. Sa samang paagi, maguol ta dihang magbasa ta bahin sa pag-antos ug kamatayon ni Jesus. Sa mga semana una ug human sa Memoryal, maggahin gyod tag panahon sa pagpamalandong kon unsa ka importante ang iyang halad lukat. (1 Cor. 11:24, 25) Pero malipay gyod tang mamalandong sa tanang gisulti ug gihimo ni Jesus samtang dinhi siya sa yuta. Makapadasig pod ang paghunahuna kon unsa nay iyang ginahimo karon ug kon unsa pay iyang himoon sa umaabot. w23.01 26 ¶1-2

Naguol pag-ayo ang mga tinun-an dihang namatay si Jesus. Wala lang sila mawad-ig minahal nga higala, kondili mibati sab sila nga morag nawad-an silag paglaom. (Luc. 24:17-21) Pero dihang nabanhaw si Jesus ug mipakita kanila, migahin siyag panahon nga tabangan sila nga masabtan kon sa unsang paagi niya gituman ang tagna sa Bibliya. Gihatagan sab niya silag importanteng buluhaton. (Luc. 24:26, 27, 45-48) Dihang miadto na si Jesus sa langit, ang kaguol sa mga tinun-an napulihag dakong kalipay. Nalipay sila kay buhi ang ilang Agalon ug tabangan niya sila sa pagtuman sa ilang bag-ong buluhaton. Ang ilang kalipay nagpalihok kanila nga dili mohunong sa pagdayeg kang Jehova. (Luc. 24:52, 53; Buh. 5:42) Aron masundog ang mga tinun-an ni Jesus, kinahanglan natong unahon ang Gingharian sa Diyos diha sa atong kinabuhi. Bisan pag kinahanglan nato ang paglahutay aron padayong makaalagad kang Jehova, siya nagsaad nga dagaya ta niyang panalanginan kon himoon nato kana.—Prov. 10:22. w23.01 30-31 ¶15-16

Dili gyod nato gustong sundogon ang sayop ni Adan ug Eva. Malikayan nato nâ kon padayon tang magkat-on bahin kang Jehova, magpakitag apresasyon sa iyang mga hiyas, ug maningkamot nga masabtan ang iyang panghunahuna. Samtang himoon nato nâ, seguradong magkalalom ang atong gugma kang Jehova. Tagda pananglitan si Abraham. Gimahal gyod niya si Jehova. Bisan pag wala kaayo siya kasabot sa mga desisyon ni Jehova, wala mosupak si Abraham. Hinuon, naningkamot siya nga mas mailhan si Jehova. Pananglitan, dihang nahibaloan ni Abraham ang desisyon ni Jehova nga laglagon ang Sodoma ug Gomora, sa sinugdan nahadlok siya nga ang “Maghuhukom sa tibuok yuta” maglaglag sa matarong uban sa daotan. Para kang Abraham, dili to makataronganon maong mapainubsanon siyang misukna kang Jehova ug sunodsunod nga pangutana. Mapailobon siyang gitubag ni Jehova. Sa ulahi, nasabtan ni Abraham nga ginasusi ni Jehova ang kasingkasing sa matag tawo ug dili gyod Niya apilon ang inosente dihang silotan Niya ang nakasala.—Gen. 18:20-32. w22.08 28 ¶9-10

Niadtong 455 B.C.E., human matukod pag-usab ni Gobernador Nehemias ang mga paril sa Jerusalem, nangita siyag kasaligang mga lalaki nga moatiman sa siyudad. Apil sa gipili ni Nehemias ang pangulo sa Kuta nga si Hananias. Sumala sa Bibliya, si Hananias “mas kasaligan ug mahinadlokon sa matuod nga Diyos kay sa uban.” (Neh. 7:2) Tungod sa gugma kang Jehova ug kahadlok nga mapaguol siya, nagkugi si Hananias sa bisan unsang asaynment nga iyang nadawat. Kini nga mga hiyas makatabang sab nato nga mahimong kasaligan sa atong pag-alagad sa Diyos. Matikdi ang ehemplo ni Tiquico, nga kasaligang higala ni apostol Pablo. Gisaligan ni Pablo si Tiquico ug gitawag siya nga “matinumanong ministro.” (Efe. 6:21, 22) Gisaligan siya ni Pablo dili lang sa paghatod ug mga sulat sa Efeso ug Colosas, kondili sa pagdasig ug paghupay pod kanila. Si Tiquico nagpahinumdom nato sa matinumanon ug kasaligang mga brader nga nag-atiman sa atong espirituwal nga panginahanglan karon.—Col. 4:7-9. w22.09 9-10 ¶5-6

Nakaatubang si Jose ug grabeng mga pagsulay sulod sa mga 13 ka tuig. Puwede untang maghunahuna si Jose nga wala siya higugmaa ni Jehova ug nga gibiyaan siya ni Jehova sa panahon nga iya Siyang gikinahanglan. Pero wala maghambin ug kasuko si Jose. Iyang gihuptan ang maayong panghunahuna pinaagi sa pagpabiling kalmado. Dihang naa unta siyay kahigayonan nga mobalos sa iyang mga igsoon, wala to niya himoa. Hinuon, iya silang gipakitaag gugma ug gipasaylo. (Gen. 45:4, 5) Nahimo to ni Jose kay malinawon siyag hunahuna. Nagpokus siya sa katuyoan ni Jehova, dili sa iyang mga problema. (Gen. 50:19-21) Unsay atong makat-onan? Kon nakasinati kag dili maayong pagtratar, ayawg kasuko kang Jehova, ug ayaw hunahunaa nga gibiyaan ka niya. Hinuon pamalandonga kon giunsa ka niya pagtabang nga makalahutay sa pagsulay. Dugang pa, tabonig gugma ang kasaypanan sa uban. w22.11 21 ¶4

Ang mga panan-awon ni propetang Daniel tin-awng nagpakita nga si Jehova ang kinalabwan sa tanang awtoridad. Si Daniel nakakitag upat ka dagko kaayong mananap nga nagsimbolo sa kanhing mga gahom sa kalibotan—ang Babilonya, Medo-Persia, Gresya, ug Roma—ug sa gahom sa kalibotan nga nagmando karon, ang Anglo-Amerika. (Dan. 7:1-3, 17) Dayon nakita ni Daniel si Jehova nga Diyos nga naglingkod sa trono sa korte sa langit. (Dan. 7:9, 10) Gikuha sa Diyos ang tanang gahom ug awtoridad sa mga gobyerno ug iya kining gihatag ngadto sa uban nga mas angayan ug mas gamhanan. Kang kinsa? Sa usa nga “samag anak sa tawo,” si Jesu-Kristo, ug sa “balaang katawhan sa Supremong Diyos,” ang 144,000 nga magmando “hangtod sa kahangtoran.” (Dan. 7:13, 14, 18) Klaro nga si Jehova ang “Supremong Diyos.” Ang nakita ni Daniel sa panan-awon nahiuyon sa lain pa niyang gisulti. Siya miingon: ‘Ang Diyos sa langit magtangtang ug mga hari ug magbutang ug mga hari.’—Dan. 2:19-21. w22.10 14-15 ¶9-11