Abril

Pangutan-a ang imong kaugalingon: ‘Unsay akong reaksiyon kon tambagan ko? Dawaton ba dayon nako ang akong sayop, o mangrason ko? Basolon ba nako ang uban?’ Samtang magbasa ka bahin sa matinumanong mga lalaki ug babaye diha sa Bibliya, konsideraha kon giunsa nila pag-atubang ang maong mga kahimtang. Sa matag karakter nga imong mabasa, pangutan-a ang imong kaugalingon: ‘Unsaon nako pagsundog kining maunongong alagad ni Jehova?’ Makabenepisyo pod ta kon mokat-on ta sa atong mga igsoon—batan-on man o tigulang. Pananglitan, naa ba kay mahunahunaan nga igsoon sa inyong kongregasyon nga matinumanong nag-alagad bisan pa sa mga kalisdanan—tingali gipresyur siya sa uban, gisupak sa iyang pamilya, o naa siyay sakit? Unsay maayo niyang hiyas nga gusto nimong sundogon? Kon pamalandongon nimo ang iyang maayong ehemplo, posibleng makakat-on kag mga paagi kon unsaon nimo paglahutay ang imong mga kalisdanan. Mapasalamaton gyod ta ug malipay sa maayong ehemplo niini nga mga igsoon.—Heb. 13:7. w22.04 13 ¶13-14

Dihang naa tay problema, malipay gyod ta kon paminawan ug hupayon ta sa mapinanggaong ansiyano. Dihang magkinahanglan tag tabang sa pag-Bible study, malipay ta dihang ubanan ta sa eksperyensiyadong payunir ug mohatag siyag sugyot. Kini nga mga igsoon malipayng motabang nato. Mobati pod ta ana nga kalipay kon motabang ta sa mga igsoon. Kon gusto nimong mas makatabang niining paagiha o sa uban pang paagi, unsaon nimo pagkab-ot ang imong tumong? Kon maghimo kag tumong, ayaw nang dili espesipiko. Pananglitan, tingali maghunahuna ka, ‘Gusto nakong mohimog dugang sa kongregasyon.’ Kon ingon ana ang imong tumong, lisod mahibaloan kon unsaon nimo na pagkab-ot o kon imo na ba nang nakab-ot. Busa maayo kon klaro ug espesipiko ang imong tumong. Puwede pa gani nimong isulat kon unsay imong tumong ug kon unsaon nimo ni pagkab-ot. w22.04 25 ¶12-13

Ginatigom karon ni Jehova ang “dakong panon” sa mga tawo ug ginabansay sila ingong mga sakop sa iyang Gingharian. (Pin. 7:9, 10) Bisan pag kadaghanang tawo karon nabahinbahin tungod sa pagdumot ug gubat, kadtong apil sa dakong panon naningkamot nga mawala sa ilang kasingkasing ang tanang klase sa pagdumot. Ang ilang pagkinabuhi nagpakita nga ila nang nasalsal ang ilang mga espada ug gihimo kining mga punta sa daro. (Miq. 4:3) Imbes mag-apil-apil sa mga gubat nga maoy hinungdan sa daghang kamatayon, ginatabangan nila ang mga tawo nga makaplagan ang “tinuod nga kinabuhi” pinaagi sa pagtudlo kanila bahin sa matuod nga Diyos ug sa iyang katuyoan. (1 Tim. 6:19) Tingali supakon sila sa ilang pamilya o maglisod sila sa pinansiyal tungod kay gisuportahan nila ang Gingharian sa Diyos, pero gipaneguro ni Jehova nga mabatonan nila ang ilang panginahanglan. (Mat. 6:25, 30-33; Luc. 18:29, 30) Kining tanan nagpamatuod nga tinuod ang Gingharian sa Diyos, ug padayon niining tumanon ang katuyoan ni Jehova. w22.12 5 ¶13

Sa kataposan sa 1,000 ka tuig, ang tanang tawo sa yuta mahimo nang perpekto. Wala na ang tanang epekto sa sala nga atong napanunod kang Adan. (Roma 5:12) Wala na ang tunglo sa sala ni Adan. Niana nga diwa, ang mga tawo sa yuta “mabuhi,” kay sila mahimong perpekto sa kataposan sa 1,000 ka tuig. (Pin. 20:5) Nahibalo ta nga si Jesus wala gyod mokompromiso bisan pa sa mga paningkamot ni Satanas. Nagpabilin siyang matinumanon. Pero ang tanan bang perpektong tawo magmatinumanon kang Jehova kon hatagan si Satanas ug kahigayonan nga sulayan sila? Ang matag usa makatubag nianang pangutanaha dihang buhian si Satanas gikan sa kahiladman sa kataposan sa 1,000 ka tuig. (Pin. 20:7) Kadtong magmatinumanon sa kataposang pagsulay mabuhi sa walay kataposan ug makabaton ug tinuod nga kagawasan. (Roma 8:21) Kadtong morebelde laglagon.—Pin. 20:8-10. w22.05 19 ¶18-19

Kana nga tagna natuman dihang gigamit ni Satanas ang mga Hudiyo ug mga Romano aron patyon ang Anak sa Diyos. (Luc. 23:13, 20-24) Ang usa ka tawo temporaryong dili makalakaw kon masamdan ang iyang tikod. Parehas ana ang nahitabo dihang namatay si Jesus. Temporaryo siyang walay nahimo dihang naa siya sa lubnganan sa mga tulo ka adlaw. (Mat. 16:21) Aron matuman ang tagna sa Genesis 3:15, si Jesus kinahanglang dili magpabilin sa lubnganan. Ngano? Kay sumala sa tagna, dugmokon sa kaliwat sa babaye ang ulo sa halas. Sa ato pa, kinahanglang maayo ang samad ni Jesus sa tikod. Ug mao nay nahitabo! Sa ikatulong adlaw human mamatay si Jesus, siya gibanhaw ingong imortal nga espiritung linalang. Sa gitakdang panahon sa Diyos, dugmokon, o laglagon, ni Jesus si Satanas. (Heb. 2:14) Ang Kristo ug kadtong kauban niya nga magmando maglaglag sa tanang kaaway sa Diyos—ang kaliwat sa halas.—Pin. 17:14; 20:4, 10. w22.07 16 ¶11-12

Mga ginikanan, tabangi ang inyong mga anak sa pagpilig maayong mga higala. Giklaro sa Pulong sa Diyos nga ang atong mga higala naay maayo o dili maayong epekto kanato. Kaila ba mo sa mga higala sa inyong mga anak? Unsay inyong mahimo aron ang inyong mga anak masuod sa mga tawo nga nahigugma kang Jehova? (1 Cor. 15:33) Matabangan ninyo ang inyong mga anak nga makakitag maayong mga higala pinaagi sa pag-imbitar sa mga igsoon nga dasig sa espirituwal. (Sal. 119:63) Si Tony, nga usa ka amahan, miingon: “Pirme gyod ming mangimbitar ug mga brader ug sister nga lainlaig pangedaron. Magdungan mig pangaon ug moapil sila sa among family worship. Maayo ni nga paagi nga mailhan kadtong nahigugma ug malipayong nag-alagad kang Jehova. . . . Ang ilang mga eksperyensiya, kadasig, ug pagsakripisyo dako kaayog epekto sa among mga anak, ug nakatabang ni nga masuod sila kang Jehova.” w22.05 29-30 ¶14-15

Dihang ang mga ansiyano makig-estorya sa nakasala, tumong nila nga ang ilang desisyon dinhi sa yuta parehas sa nadesisyonan na sa langit. Unsay kaayohan ani sa kongregasyon? Maprotektahan ang kongregasyon kay ang mga nakasala nga wala maghinulsol dili tugotan nga magpabilin sa kongregasyon ug makahimog kadaot sa pinanggang mga alagad ni Jehova. (1 Cor. 5:6, 7, 11-13; Tito 3:10, 11) Makatabang pod ni aron ang nakasala maghinulsol ug mapasaylo ni Jehova. (Luc. 5:32) Ang mga ansiyano mag-ampo para niya ug maghangyo kang Jehova nga tabangan siya nga mabalik ang iyang espirituwalidad. (Sant. 5:15) Ibutang ta nga ang nakasala dili mahinulsolon dihang giestorya siya sa mga ansiyano. Kon mao, i-disfellow siya. Pero kon sa ulahi ang nakasala makaamgo ug kinasingkasing nga maghinulsol ug magbag-o, pasayloon siya ni Jehova. (Luc. 15:17-24) Pasayloon siya bisan pag seryoso kaayo ang iyang nahimong mga sala.—2 Cron. 33:9, 12, 13; 1 Tim. 1:15. w22.06 9 ¶5-6

Sa tabang ni Jehova, ang mga Kristohanon sa tibuok kalibotan wala magpadaog sa lisod nga mga kahimtang ug milampos sa pagsukol sa Yawa. (1 Ped. 5:9) Mahimo pod na nimo. Sa dili madugay, sugoon ni Jehova si Jesus ug ang iyang kaubang mga magmamando “aron gub-on ang mga buhat sa Yawa.” (1 Juan 3:8) Ang mga alagad sa Diyos dinhi sa yuta ‘wala nay kahadlokan ug walay kalisangan.’ (Isa. 54:14; Miq. 4:4) Pero sa pagkakaron, kinahanglan tang maningkamot nga madaog ang atong mga kahadlok. Kinahanglang padayon natong palig-onon ang atong pagsalig nga si Jehova nahigugma ug nanalipod sa iyang mga alagad. Mahimo nato na kon atong pamalandongon ug isulti sa uban kon giunsa pagpanalipod ni Jehova ang iyang mga alagad kaniadto. Ug hinumdoman nato kon giunsa ta niya pagtabang dihang nag-atubang tag lisod nga mga situwasyon. Sa tabang ni Jehova, madaog nato ang atong mga kahadlok!—Sal. 34:4. w22.06 19 ¶19-20

Ang gahom sa kalibotan nga gisimbolohan sa ‘mga tiil nga may parte nga puthaw ug may parte nga kulonon’ nagmando na. Mitungha ni niadtong Gubat sa Kalibotan I dihang nagkaalyado ang Britain ug United States ug naporma ang Anglo-Amerikanong alyansa. Ug base sa estatuwa sa damgo ni Nabucodonosor, kini nga gahom sa kalibotan lahi sa milabayng mga gingharian. Dili sama sa nag-unang mga gahom sa kalibotan nga gihisgotan sa panan-awon, ang Anglo-Amerikanong alyansa gisimbolohan, dili sa puro nga metal sama sa bulawan o plata, kondili sa nagsagol nga puthaw ug kulonon. Ang kulonon nagsimbolo sa “kaliwat sa katawhan,” o ordinaryong mga tawo. (Dan. 2:43, footnote) Makita nato karon nga ang mga tawo nakaimpluwensiya sa mga eleksiyon, mga kampanya sa tawhanong katungod, pagprotesta, ug mga unyon sa mga trabahante. Ingong resulta, kini nga gahom sa kalibotan nalisdan sa pagpatuman sa mga polisiya niini. w22.07 4-5 ¶9-10

Nagduhaduha ba ka nga magpabawtismo? Makatabang tingali kon pangutan-on nimo ang imong kaugalingon, ‘Unsay akong gihulat?’ (Buh. 8:36) Matikdi nga gikompara ni Jesus ang pagbuhat sa kabubut-on sa iyang Amahan sa pagkaon. Ngano? Kay ang pagkaon makahatag natog kaayohan. Nahibalo si Jesus nga ang tanang ipabuhat ni Jehova kanato maoy para sa atong kaayohan. Dili gusto ni Jehova nga mohimo tag bisan unsa nga makadaot nato. Apil ba sa kabubut-on ni Jehova nga magpabawtismo ka? Oo. (Buh. 2:38) Busa makasalig ka nga makahatag nimog kaayohan ang pagtuman sa sugo nga magpabawtismo. Kon dili ka magduhaduha nga kaonon ang lami kaayo nga pagkaon, nganong magduhaduha man ka nga magpabawtismo? Nganong ang uban wala pa magpabawtismo? Daghan tingali ang moingon, “Dili pa ko andam.” Ang tinuod, ang pagpahinungod sa imong kaugalingon kang Jehova ug pagpabawtismo mao ang pinakaimportanteng desisyon nga imong mahimo. Busa nagkinahanglag panahon, pagpamalandong, ug paningkamot aron maandam ka. w23.03 7 ¶18-20

Dihang gidihogan si Jesus, nahimo siyang pangunang bahin sa kaliwat sa babaye. Human sa kamatayon ug pagkabanhaw ni Jesus, “gikoronahan [siya sa Diyos ug] himaya ug dungog” ug gihatagan siya sa “tanang awtoridad sa langit ug sa yuta,” apil ang awtoridad nga “gub-on ang mga buhat sa Yawa.” (Heb. 2:7; Mat. 28:18; 1 Juan 3:8) Pero naa pay uban nga mahimong bahin sa kaliwat sa babaye. Gipaila sila ni apostol Pablo dihang iyang giingnan ang mga Hudiyo ug Hentil nga dinihogang mga Kristohanon: “Kon kamo iya sa Kristo, kamo kaliwat gyod ni Abraham, mga manununod maylabot sa saad.” (Gal. 3:28, 29) Dihang dihogan ni Jehova ang usa ka Kristohanon pinaagig balaang espiritu, ang maong tawo mahimong bahin sa kaliwat sa babaye. Busa ang kaliwat mao si Jesu-Kristo ug ang 144,000 nga kauban niyang magmamando. (Pin. 14:1) Silang tanan nagsundog sa panghunahuna ug binuhatan sa ilang Amahan, si Jehova nga Diyos. w22.07 16 ¶8-9

Nagdahom ta nga makaatubang tag mga pagsulay niining kataposang mga adlaw. (2 Tim. 3:1) Niana nga mga panahon, mahimong maluya ta o malumsan sa kabalaka, ilabina kon nagsunodsunod o nagdungan ang mga pagsulay. Pero hinumdomi nga si Jehova nahibalo sa atong kahimtang, ug iya tang tabangan nga malahutay ang bisan unsang pagsulay. Hunahunaa kon giunsa pagtabang ni Jehova ang matinumanong si Job. Nakasinati siyag sunodsunod nga grabeng mga pagsulay. Sa usa lang ka adlaw, nabalitaan ni Job nga ang tanan niyang kahayopan gikawat ug gipatay. Namatay pod ang iyang mga sulugoon, ug ang nakapait pa, apil pod ang iyang pinalanggang mga anak. (Job 1:13-19) Human adto, samtang nagbangotan pa si Job, gihampak siya ug ngutngot kaayong mga hubag. (Job 2:7) Nakita ni Jehova ang mga kalisdanan ni Job. Kay gimahal ni Jehova si Job, Iya siyang gitabangan aron makalahutay sa mga pagsulay. w22.08 11 ¶8-10

Ang disiplina sakit. Maghunahuna tingali ta nga dili ni makataronganon o sobra ra ni ka bug-at. Tungod ana, dili na nato makita nga ang disiplina maoy paagi ni Jehova sa pagpakitag gugma kanato. (Heb. 12:5, 11) Busa dawata ang disiplina ug himoa ang gikinahanglang mga kausaban. Dihay mga higayon nga gibadlong ni Jesus si Pedro atubangan sa ubang apostoles. (Mar. 8:33; Luc. 22:31-34) Naulaw gyod tingali adto si Pedro! Pero nagmaunongon siya kang Jesus. Iyang gidawat ang disiplina ug nakakat-on siya sa iyang mga sayop. Gipanalanginan ni Jehova ang pagkamaunongon ni Pedro ug gihatagan siyag bug-at nga mga responsibilidad sa kongregasyon. (Juan 21:15-17; Buh. 10:24-33; 1 Ped. 1:1) Makabenepisyo ta ug ang uban kon dili ta magpokus sa kaulaw nga atong gibati tungod sa disiplina. Hinuon, dawaton nato ni ug himoon ang gikinahanglang mga kausaban. Pinaagi niini, mas magamit ta ni Jehova ug mas makatabang ta sa mga igsoon. w22.11 21-22 ¶6-7

Nahibalo si Abraham nga dili gyod mohimo si Jehova ug bisan unsa nga dili matarong o dili mahigugmaon. Sumala ni apostol Pablo, nahibalo si Abraham nga si Jehova makahimo sa pagbanhaw sa iyang pinalanggang anak nga si Isaac. (Heb. 11:17-19) Kon buot hunahunaon, si Jehova nagsaad nga si Isaac mahimong amahan sa usa ka nasod, ug adtong panahona, wala pay anak si Isaac. Gimahal ni Abraham si Jehova, busa misalig siya nga kanunayng himoon sa iyang Amahan kon unsay matarong. Tungod sa iyang pagtuo, mituman siya bisag lisod tong himoon. (Gen. 22:1-12) Unsaon nato pagsundog si Abraham? Sama niya, kinahanglang padayon tang magkat-on bahin kang Jehova. Samtang himoon nato nâ, mas masuod ta kaniya ug mas molalom ang atong gugma kaniya. (Sal. 73:28) Mabansay sab ang atong konsensiya nga molihok uyon sa panghunahuna sa Diyos. (Heb. 5:14) Ingong resulta, dili ta magpadala kon dunay motental nato sa paghimog dili maayo. Dili gyod nato gusto nga mohimog bisan unsa nga makapasakit sa atong Amahan ug makadaot sa atong relasyon kaniya. w22.08 28-29 ¶11-12

Pagbalik ni apostol Pablo ug Bernabe sa Listra, Iconio, ug Antioquia, “nagtudlo silag mga ansiyano alang kanila sa matag kongregasyon.” (Buh. 14:21-23) Seguradong ang maong mga ansiyano nakahatag ug paghupay sa mga kongregasyon. Ingon ana pod ang mga ansiyano karon. Mga ansiyano, kinahanglang abtik mo sa pagtabang niadtong nanginahanglag “maayong pulong” sa pagdasig. Gipahinumdoman ni Pablo ang mga Kristohanon nga naay “bagang panganod sa mga saksi” nga nakalahutay sa mga kalisdanan tungod kay gihatagan sila ni Jehova ug kusog. (Heb. 12:1) Nahibalo si Pablo nga ang estorya sa kinabuhi niadtong mga nakalahutay sa tanang klase sa kalisdanan makapalig-on sa mga Kristohanon ug makatabang nila nga magpokus sa “siyudad sa buhing Diyos.” (Heb. 12:22) Tinuod pod nâ karon. Dili ba napalig-on ta dihang gibasa nato kon giunsa pagtabang ni Jehova si Gideon, Barak, David, Samuel, ug uban pa?—Heb. 11:32-35. w22.08 21-22 ¶5-6

Base sa unsang “binuhatan” nga ang mga banhawon pagahukman? Sa ila bang binuhatan sa wala pa sila mamatay? Dili! Hinumdomi nga dihang namatay sila, gipasaylo na ang ilang kanhi nga mga sala. Busa ang “ilang binuhatan” wala magtumong sa binuhatan sa wala pa sila mamatay. Nagtumong ni sa ilang binuhatan sa dihang gibansay sila sa bag-ong kalibotan. Bisan ang matinumanong mga tawo sama kang Noe, Samuel, David, ug Daniel kinahanglang makakat-on bahin kang Jesu-Kristo ug magpakitag pagtuo sa iyang halad. Labaw na nga kinahanglan ning himoon sa mga dili matarong! Unsay mahitabo niadtong mosalikway niining nindot kaayo nga kahigayonan? Ang Pinadayag 20:15 nag-ingon: “Si bisan kinsa nga wala masulat sa basahon sa kinabuhi gitambog ngadto sa linaw nga kalayo.” Oo, sila bug-os nga laglagon. Busa importante gyod nga paneguroon nato nga ang atong ngalan masulat sa basahon sa kinabuhi ug nga kini magpabilin didto! w22.09 19 ¶17-19

Kadaghanan sa atong mga desisyon bahin sa panglawas ug sa paagi sa pagtambal gibase sa atong konsensiya nga nabansay sa Bibliya. (1 Tim. 3:9) Dihang maghimog desisyon ug makig-estorya sa uban bahin ana, maayong ipadapat nato ang prinsipyo sa Filipos 4:5: “Ipakita sa tanan ang inyong pagkamakataronganon.” Kon makataronganon ta, dili ta sobrang mabalaka sa atong panglawas. Gimahal ug gitahod nato ang mga igsoon bisan pag ang ilang mga desisyon lahi sa atoa. (Roma 14:10-12) Mapakita nato nga mapasalamaton ta kang Jehova, ang Tuboran sa kinabuhi, pinaagi sa pag-amping sa atong kinabuhi ug paghatag kaniya sa atong kinamaayohan. (Pin. 4:11) Siyempre, makaatubang tag mga sakit ug kalamidad karon. Pero dili kini ang kinabuhi nga gusto sa atong Maglalalang para nato. Sa dili madugay, hatagan ta niyag kinabuhing walay kataposan nga walay kasakit ug kamatayon. (Pin. 21:4) Sa pagkakaron, pagkanindot gyong mabuhi ug mag-alagad sa atong mahigugmaong langitnong Amahan, si Jehova! w23.02 25 ¶17-18

Tin-awng gipakita ni Jehova nga mas labaw siya kay sa “labaw nga mga awtoridad.” (Roma 13:1) Niay tulo ka pananglitan. Giulipon sa Paraon sa Ehipto ang katawhan ni Jehova ug kadaghan siyang wala mosugot nga hatagan silag kagawasan. Pero giluwas sila sa Diyos ug gipatay ang Paraon didto sa Pulang Dagat. (Ex. 14:26-28; Sal. 136:15) Si Haring Belsazar sa Babilonya nagkombira ug “gibayaw ang [iyang] kaugalingon batok sa Ginoo sa langit” ug “gidayeg [niya] ang mga diyos nga hinimo sa plata ug bulawan” imbes si Jehova. (Dan. 5:22, 23) Pero gipakaulawan sa Diyos ang maong garbosong tawo. “Nianang gabhiona mismo,” si Belsazar gipatay ug ang iyang gingharian gihatag ngadto sa mga Medianhon ug Persianhon. (Dan. 5:30, 31) Gipapatay ni Herodes Agripa I, nga hari sa Palestina, si apostol Santiago ug dayon gipapriso si apostol Pedro kay gusto pod niyang ipapatay siya. Pero gibabagan ni Jehova si Herodes. “Gihampak siya sa anghel ni Jehova,” ug siya namatay.—Buh. 12:1-5, 21-23. w22.10 15 ¶12

Dihang mabasa nato kon giunsa pag-atiman ni Jehova ang iyang maunongong mga alagad sa una, mas molig-on ang atong paglaom. Ang tanan diha sa Pulong sa Diyos “gisulat aron tudloan ta, aron nga pinaagi sa atong paglahutay ug pinaagi sa paghupay gikan sa Balaang Kasulatan kita makabatog paglaom.” (Roma 15:4) Pamalandonga kon giunsa pagtuman ni Jehova ang iyang mga saad. Pananglitan, hunahunaa ang gihimo sa Diyos para kang Abraham ug Sara. Tigulang na kaayo sila aron manganak. Pero ang Diyos nagsaad kanila nga manganak sila. (Gen. 18:10) Unsay reaksiyon ni Abraham sa maong saad? Ang Bibliya nag-ingon: “Siya . . . mituo nga mahimo siyang amahan sa daghang kanasoran.” (Roma 4:18) Bisan pag sa panglantaw sa tawo imposible tong mahitabo, masaligon si Abraham nga tumanon ni Jehova ang Iyang saad. Ug wa gyod mapakyas ang iyang pagdahom. (Roma 4:19-21) Ang ingon ini nga mga estorya sa Bibliya nagpasalig nato nga tumanon gyod ni Jehova ang iyang mga saad. w22.10 27 ¶13-14

Natuman ni dihang napagawas ang mga Hudiyo sa pagkabihag. Gipamatud-an ni Jehova nga siya ang ilang Dakong Instruktor, ug iyang gigiyahan ang iyang katawhan sa pagpasig-uli sa putling pagsimba. Malipayon kaayo ta nga si Jehova ang atong Dakong Instruktor. Gipakasama ta ni Isaias sa mga estudyante nga gitudloan ni Jehova, dihang siya miingon: “Makita nimo ang imong Dakong Instruktor pinaagi sa imo mismong mga mata.” Niini nga ilustrasyon, ang Instruktor nagtindog atubangan sa iyang mga estudyante. Pribilehiyo kaayo nato nga matudloan sa Diyos. Sa unsang paagi ta niya gitudloan? Pinaagi sa iyang organisasyon. Mapasalamaton kaayo ta sa tin-awng giya nga atong nadawat gikan sa organisasyon ni Jehova! Ang instruksiyon nga gihatag diha sa mga tigom, publikasyon, JW Broadcasting^®, ug uban pa makatabang nato sa paglahutay nga malipayon bisan sa lisod nga mga kahimtang. w22.11 10 ¶8-9

Kon kanus-a moabot ang kataposan sa Hudiyong sistema sa mga butang ug ang “hinapos sa sistema sa mga butang,” nga nagtumong sa atong panahon karon, si Jesus miingon: “Bahin nianang adlawa o orasa walay nahibalo, bisan ang mga anghel sa langit o ang Anak, apan ang Amahan lang.” Dayon iyang gipasidan-an ang tanan niyang tinun-an nga ‘magpadayon sa pagtukaw’ ug ‘magpadayon sa pagbantay.’ (Mar. 13:32-37) Ang Hudiyong mga Kristohanon sa unang siglo kinahanglang magpadayon sa pagbantay kay nagdepende niana ang ilang kinabuhi. Gisultihan ni Jesus ang iyang mga sumusunod: “Inigkakita ninyo nga ang Jerusalem gilibotan sa nagkampong kasundalohan, mahibalo kamo nga hapit na kining laglagon.” Nianang panahona, kinahanglan silang mosunod sa pasidaan ni Jesus ug “moikyas ngadto sa kabukiran.” (Luc. 21:20, 21) Kadtong namati sa iyang pasidaan naluwas dihang gilaglag sa mga Romano ang Jerusalem. Karon, nagkinabuhi na ta sa panahon nga hapit nang laglagon kining daotang sistema sa mga butang. Busa kinahanglan pod natong huptan ang maayong panghunahuna ug magpadayon sa pagbantay. w23.02 14 ¶1-2; 16 ¶3

Gitudloan ni Jehova ang iyang mga alagad nga magmatinud-anon ug himoon kon unsay matarong. Tungod ana, naa silay dignidad ug kalinaw sa hunahuna. (Prov. 13:5, 6) Mao pod ba nay gihimo ni Jehova para nimo sa dihang nagtuon kag Bibliya? Imong nakat-onan nga ang mga paagi ni Jehova mao ang makahatag ug kaayohan sa tanang tawo, ug ikaw mismo nakaeksperyensiya niana. (Sal. 77:13) Busa gusto nimong modapig sa kon unsay matarong sa panglantaw sa Diyos. (Mat. 6:33) Gusto nimong depensahan ang kamatuoran ug pamatud-an nga bakak ang giingon ni Satanas bahin sa atong Diyos nga si Jehova. Unsaon nimo na paghimo? Mapakita nimo sa imong pagkinabuhi nga dapig ka sa kamatuoran ug sa pagkamatarong, nga samag miingon ka: “Di gyod nako tuohan ang mga bakak ni Satanas, ug dapig ko sa kamatuoran. Si Jehova ang akong gipili nga Magmamando, ug buhaton nako kon unsay husto para niya.” Unsaon nimo na paghimo? Pag-ampo kang Jehova ug ipahinungod ang imong kaugalingon kaniya, ug dayon pagpabawtismo. Kon nahigugma ka sa kon unsay tinuod ug matarong, mapalihok gyod ka nga magpabawtismo. w23.03 2-3 ¶4-5

Naay klase sa kalinaw nga wala mahibaloi sa mga tawo sa kalibotan. Kini ang “kalinaw nga gikan sa Diyos,” nga mabatonan lang niadtong naay suod nga relasyon sa langitnong Amahan. Kon naa tay kalinaw nga gikan sa Diyos, dili kaayo ta mabalaka. (Filip. 4:6, 7) Naa tay suod nga relasyon niadtong nahigugma kaniya. Ug suod pod ta sa “Diyos sa kalinaw.” (1 Tes. 5:23) Kon mailhan nato ang atong Amahan ug mosalig ug motuman ta niya, ang kalinaw nga gikan sa Diyos makapakalma nato dihang naa ta sa lisod nga kahimtang. Posible ba gyod nga mabatonan nato ang kalinaw nga gikan sa Diyos bisan pa sa kalisdanan sama sa kalamidad, kagubot, paglutos, o pagkaylap sa sakit? Kini nga mga kalisdanan makapahadlok nato. Makapalipay nga gisunod sa mga igsoon ang tambag ni Jesus nga gihisgotan sa teksto karong adlawa. Sa tabang ni Jehova, nagmalinawon sila samtang nagsagubang ug grabeng mga pagsulay. w22.12 16 ¶1-2

Dili nato kontrolado ang tanang kahimtang. Busa ang atong mga pribilehiyo dili nato himoong basehanan kon importante ba ta kang Jehova o dili, ug dili pod nato itandi ang atong mga pribilehiyo sa pribilehiyo sa uban. (Gal. 6:4) Importante nga mangita tag paagi nga mas magamit ta ni Jehova. Aron andam kang modawat sa bisan unsang pribilehiyo, pasimpleha ang imong kinabuhi ug likayi ang wala kinahanglanang pagpangutang. Paghimog ginagmayng tumong nga makatabang nimo nga makab-ot ang dagkong tumong. Pananglitan, aron makab-ot nimo ang tumong nga mahimong regular payunir, puwede ba kang mag-continuous auxiliary pioneer? Aron makab-ot nimo ang imong tumong nga mahimong ministeryal nga alagad, puwede ba nimong dugangan ang imong panahon sa ministeryo? Pinaagi ani, mabansay ka ug mahimong andam sa pagdawat ug dugang mga pribilehiyo. Himoa ang imong pinakamaayo sa bisan unsang asaynment nga imong madawat. w22.04 26 ¶16-17

Si Jehova makatabang nato nga masagubang ang atong mga problema ug magmalipayon sa pag-alagad. Dihang moampo ta kang Jehova bahin sa atong gikabalak-an, ang una tingali niyang himoon mao ang paghatag natog kusog sa pag-atubang sa atong mga problema. Ug kon ang atong problema dili dayon mawala, kinahanglan tingali tang balikbalik nga mohangyo kang Jehova nga hatagan tag kusog nga makalahutay. Mao nay gusto niya nga atong buhaton. Gani mao nay gipakita sa mga pulong ni Isaias: ‘Ayaw gyod papahulaya si Jehova.’ (Isa. 62:7) Unsay gipasabot ana? Kinahanglang dili ta mohunong sa pag-ampo kang Jehova, nga mora bag dili nato siya papahulayon. Ang giingon ni Isaias nagpahinumdom nato sa mga ilustrasyon ni Jesus bahin sa pag-ampo, diha sa Lucas 11:8-10, 13. Gidasig ta ni Jesus nga ‘magpadayon sa pagpangayo’ sa balaang espiritu. Makahangyo sab ta kang Jehova nga giyahan ta sa paghimog hustong mga desisyon. w22.11 8 ¶1; 9 ¶6-7

Ikaw ug ang imong pamilya makapangandam na karon para sa paglutos. Dili kinahanglang imadyinon nimo ang tanang daotang butang nga posibleng mahitabo. Hinuon, palig-ona ang imong relasyon kang Jehova ug tabangi ang imong mga anak nga mosalig pod kaniya. Kon usahay mabalaka ka, ibubo ang imong kasingkasing sa Diyos. (Sal. 62:7, 8) Hisgoti uban sa imong pamilya ang tanang rason kon nganong makasalig mo kaniya. Sama nianang naay kalamidad, ang imong pagpangandam ug pagsalig kang Jehova makatabang aron ang imong mga anak magmalinawon ug dili mahadlok. Ang kalinaw nga gikan sa Diyos makapabati natong luwas. (Filip. 4:6, 7) Pinaagi niini, gitabangan ta ni Jehova nga mahimong kalmado bisan pag dunay sakit nga mokaylap o makaatubang tag kalamidad o paglutos. Iyang gigamit ang kugihang mga ansiyano aron atimanon ta. Ug kitang tanan gihatagan niyag kahigayonan nga makatabang sa uban. Ang kalinaw nga atong nasinatian karon mag-andam nato sa pag-atubang sa mas lisod nga mga pagsulay sa umaabot, apil na sa “dakong kasakitan.”—Mat. 24:21. w22.12 27 ¶17-18

Maningkamot ta nga dili na makonsensiya sa seryosong mga sala nga nahimo nato kaniadto. Siyempre, dili gyod nato himoong pasangil ang halad lukat aron “tinuyo tang magpakasala.” (Heb. 10:26-31) Pero makasalig ta nga kon tinuod tang naghinulsol, nangayog tabang kang Jehova ug sa mga ansiyano, ug nagbag-o, bug-os na ta niyang napasaylo. (Isa. 55:7; Buh. 3:19) Ang halad lukat makahimo gyod sa pagtabon sa tanan natong sala ug magpaposible sa kinabuhi sa Paraiso. Dili gyod laay ang kinabuhi didto. Mailaila nato ang klaseklaseng mga tawo ug daghan tag makapalipayng buluhaton didto. Ang nakanindot pa gyod kay kada adlaw, mas mailhan nato ang atong langitnong Amahan ug ma-enjoy ta sa tanan niyang tagana. Di gyod ta mahutdag makat-onan bahin niya, ug daghan tag makat-onan bahin sa iyang kalalangan. w22.12 13 ¶17, 19

Imposible nga si Eva ang “babaye.” Sumala sa tagna, “dugmokon” sa kaliwat sa babaye ang ulo sa halas. Ang halas mao ang daotang anghel nga si Satanas, ug walay dili hingpit nga tawo ang makadugmok niya. Busa sa unsang paagi laglagon si Satanas? Ang babaye nga gihisgotan sa Genesis 3:15 gipaila sa kataposang basahon sa Bibliya. (Pin. 12:1, 2, 5, 10) Dili siya ordinaryong babaye! Ang bulan naa sa ilalom sa iyang mga tiil, ug sa iyang ulo naay korona nga 12 ka bituon. Ug talagsaon kaayo ang iyang gipanganak—ang Gingharian sa Diyos. Ang Gingharian tua sa langit, busa ang babaye kinahanglang tua sab sa langit. Siya nagsimbolo sa langitnong bahin sa organisasyon ni Jehova—ang iyang matinumanong mga anghel. (Gal. 4:26) Gitabangan pod ta sa Pulong sa Diyos nga mailhan ang pangunang bahin sa kaliwat sa babaye. Siya kaliwat ni Abraham.—Gen. 22:15-18. w22.07 15-16 ¶6-8

Ang regalo ni Jehova, ang Bibliya, puno sa iyang kaalam. Ang tambag sa Bibliya maayog epekto sa mga tawo. Kini makabag-o sa kinabuhi. Dihang gisulat ang unang mga basahon sa Bibliya, giingnan ni Moises ang katawhan sa Diyos, ang mga Israelinhon: “Dili kini kay walay pulos nga pulong para kaninyo kay nagdepende niini ang inyong kinabuhi.” (Deut. 32:47) Kadtong mosunod sa Bibliya makabatog malamposon ug malipayong kinabuhi. (Sal. 1:2, 3) Bisag dugay nang gisulat ang Pulong sa Diyos, makabag-o gihapon ni sa kinabuhi sa mga tawo. Ang maalamong mga prinsipyo sa Bibliya kanunayng praktikal ug nakatabang sa mga tawo nga nabuhi sa lainlaing panahon. Samtang atong basahon ang Bibliya ug pamalandongon ang atong nakat-onan, gamiton sa Awtor niini ang iyang gamhanang balaang espiritu aron tabangan ta nga makita kon unsaon pagpadapat ang mga tambag sa Bibliya. (Sal. 119:27; Mal. 3:16; Heb. 4:12) Oo, ang buhi nga Awtor sa Bibliya gusto kaayong motabang nimo. Dili ba maayo kaayo na nga rason nga basahon ang Bibliya kada adlaw? w23.02 3 ¶5-6

Ang Pinadayag kapitulo 13 nag-ingon nga ang ikapitong ulo, ang Anglo-Amerikanong Gahom sa Kalibotan, mao ang pintas nga mananap nga naay ‘duha ka sungay sama nianang sa nating karnero, apan misugod ug sulti samag dragon.’ Kini nga mananap ‘naghimog dagkong ilhanan, nga nagpakanaog pa ganig kalayo sa yuta gikan sa langit sa atubangan sa katawhan.’ (Pin. 13:11-15) Ang Pinadayag kapitulo 16 ug 19 nag-ingon nga kini nga pintas nga mananap mao ang “bakak nga propeta.” (Pin. 16:13; 19:20) Si Daniel naay susamang giingon—nga ang Anglo-Amerikanong Gahom sa Kalibotan “magpahinabog grabeng kalaglagan.” (Dan. 8:19, 23, 24, footnote) Mao gyod nay nahitabo sa Gubat sa Kalibotan II. Ang duha ka atomic bomb nga maoy hinungdan nga natapos ang maong gubat sa Pacific gihimo sa mga scientist sa Britain ug United States. Busa ang Anglo-Amerikanong Gahom sa Kalibotan samag ‘nagpakanaog ug kalayo sa yuta gikan sa langit.’ w22.05 10 ¶9