Mayo

Human makita ni Juan kini nga grupo sa langit, nakakita siyag “dakong panon.” Dili sama sa 144,000, ang dakong panon walay espesipikong gidaghanon. Unsay atong nahibaloan bahin nila? Si Juan giingnan: “Kini sila ang nakalabang sa dakong kasakitan, ug ilang gilabhan ang ilang tag-as nga besti ug gipaputi kini sa dugo sa Kordero.” (Pin. 7:14) Dihang ang “dakong panon” maluwas na sa dakong kasakitan, sila magpuyo sa yuta ug mag-enjoy sa nindot kaayong mga panalangin. (Sal. 37:9-11, 27-29; Prov. 2:21, 22; Pin. 7:16, 17) Gipili man ta nga moadto sa langit o magpabilin dinhi sa yuta, makita ba nato ang atong kaugalingon nga apil nianang gihisgotan sa Pinadayag kapitulo 7? Angay lang. Makapalipay kaayo nâ nga panahon para sa duha ka grupo sa mga alagad sa Diyos! Dili gyod ta magmahay sa atong desisyon nga suportahan ang pagmando ni Jehova. w22.05 16 ¶6-7

Kon kinahanglan kang mohimog importanteng desisyon, seguradong moampo ka para sa kaalam—ug sakto nâ. (Sant. 1:5) Si Haring Solomon misulat: “Ang kaalam ang labing importanteng butang.” (Prov. 4:7) Siyempre, dili ordinaryo lang nga kaalam ang gipasabot ni Solomon, kondili ang kaalam nga gikan kang Jehova nga Diyos. Pero ang kaalam ba nga gikan sa Diyos makatabang nato sa atong mga problema karon? Oo. Ang usa ka paagi nga mahimo tang tinuod nga maalamon mao ang pagtuon ug pagpadapat sa gitudlo sa duha ka tawo nga maalamon kaayo. Una, tagda pananglitan si Solomon. Ang Bibliya nag-ingon nga “ang Diyos naghatag kang Solomon ug dako kaayong kaalam ug katakos sa pag-ila.” (1 Hari 4:29) Ikaduha, tagda pananglitan si Jesus, ang pinakamaalamong tawo nga nabuhi sukad. (Mat. 12:42) Bahin kang Jesus, mao ni ang gitagna: “Maanaa kaniya ang espiritu ni Jehova, ang espiritu sa kaalam ug sa pagsabot.”—Isa. 11:2. w22.05 20 ¶1-2

Bisag tigulang na ta, puwede gihapon tang mangab-ot ug espirituwal nga mga tumong. Konsideraha ang 75 anyos nga sister nga si Beverley. Naa siyay grabeng sakit maong maglisod siyag lakaw. Pero gusto niyang mas masuportahan ang kampanya sa Memoryal, maong naghimo siyag espesipikong mga tumong. Dihang nakab-ot ni Beverley ang iyang mga tumong, nalipay kaayo siya. Tungod sa iyang maayong ehemplo, nadasig ang uban nga maningkamot pod sa ilang ministeryo. Gipabilhan ni Jehova ang ginahimo sa atong tigulang nga mga igsoon, bisag limitado na silag mahimo tungod sa ilang kahimtang. (Sal. 71:17, 18) Paghimog mga tumong nga kaya nimong kab-oton. Ugmara ang mga hiyas nga makapasuod nimo kang Jehova. Pagkat-og mga skill aron mas magamit ka sa atong Diyos ug sa iyang organisasyon. Pangitag mga paagi nga mas makatabang ka sa mga igsoon. Sa tabang ni Jehova, “ang imong pag-uswag klarong makita sa tanan,” parehas kang Timoteo.—1 Tim. 4:15. w22.04 27 ¶18-19

Komosta man kon human sa tanan nimong gihimo, sultihan ka sa imong anak nga dili siya gustong moalagad kang Jehova? Ayaw paghunahuna nga napakyas ka ingong ginikanan. Kitang tanan—apil ang imong anak—gihatagan ni Jehova ug kagawasan sa pagpili, sa ato pa makapili ta kon moalagad ba ta sa Diyos o dili. Ayawg wad-a ang imong paglaom nga mobalik ra unya siya. Hinumdomi ang ilustrasyon bahin sa milayas nga anak. (Luc. 15:11-19, 22-24) Ang maong batan-on wala na mosubay sa hustong dalan, pero sa ulahi mibalik siya. Mga ginikanan, gihatagan mog nindot kaayong pribilehiyo—ang pagpatunghag bag-ong henerasyon sa mga magsisimba ni Jehova. (Sal. 78:4-6) Dili nâ sayon nga asaynment, maong kinasingkasing mo namong gikomendahan sa inyong paningkamot sa pagtabang kanila nga higugmaon si Jehova ug sa pagmatuto kanila pinaagi sa iyang disiplina ug tambag. Makaseguro mo nga malipay ang atong mahigugmaong Amahan sa langit.—Efe. 6:4. w22.05 30-31 ¶16-18

Aron makaamot ta sa kalinaw ug panaghiusa sa kongregasyon, ang matag usa nato kinahanglang mohimo sa iyang pinakamaayo. Konsideraha ang mga Kristohanon sa unang siglo. Lainlain silag gasa ug asaynment. (1 Cor. 12:4, 7-11) Pero wala nila tugoti nga tungod ani magkompetensiyahay sila ug magkabahinbahin. Hinuon, gidasig ni Pablo ang matag usa nga himoon kon unsay gikinahanglan aron ‘mapalig-on ang lawas sa Kristo.’ Iyang gisulatan ang mga taga-Efeso: “Kon ang matag parte sa lawas molihok sa hustong paagi, makatabang kini sa pagtubo sa lawas, mao nga kini molig-on diha sa gugma.” (Efe. 4:1-3, 11, 12) Kadtong nagpadapat ana nakaamot sa kalinaw ug panaghiusa—nga makita pod nato sa mga kongregasyon karon. Paningkamoti nga dili nimo ikompara ang imong kaugalingon sa uban. Hinuon, pagkat-on gikan kang Jesus ug paningkamoti nga masundog ang iyang mga hiyas. Makasalig ka nga si Jehova ‘matarong, ug dili niya kalimtan ang imong buhat.’ (Heb. 6:10) Nalipay siya sa imong kinasingkasing nga pag-alagad kaniya. w22.04 14 ¶15-16

Makapahupay gyod nga dili kita ang kinahanglang modesisyon kon pasayloon ba ni Jehova ang nakasala. Pero naa tay kinahanglang himoon nga desisyon. Unsa man? Naay mga panahon nga ang igsoon nakasala nato, ug grabe ang iyang gihimo, pero nangayo siyag pasaylo. Naa poy mga panahon nga ang nakasala wala mangayog pasaylo. Bisan pa ana, puwede gihapon nato siyang pasayloon. Unsay gipasabot ani? Puwede tang modesisyon nga dili na maghambin ug kasuko. Ang tinuod, nagkinahanglan nig panahon ug paningkamot, ilabina kon nasakitan kaayo ta. Ang Septiyembre 15, 1994 nga Bantayanang Torre nag-ingon: “Kon pasayloon mo ang usa ka makasasala, kini wala magpasabot nga ikaw nagapalabay sa sala. Alang sa Kristohanon, ang pagpasaylo nagapasabot nga masaligong nagatugyan sa butang diha sa mga kamot ni Jehova. Siya mao ang matarong nga Maghuhukom sa tibuok uniberso, ug siya mopahamtang sa hustisya sa hustong panahon.” w22.06 9 ¶6-7

Si Jehova nagsaad nga sa atong panahon, iyang tigomon ang mga tawo gikan sa tanang kanasoran, tribo, ug pinulongan, ug hiusahon sila sa putling pagsimba. Karon, kining espesyal nga grupo sa katawhan gitawag nga “dakong panon.” (Pin. 7:9, 10) Bisan pag kini nga grupo naglakip sa mga lalaki, babaye, ug mga bata nga lainlaig kultura, sila malinawon ug nagkahiusa ingong managsoon. (Sal. 133:1; Juan 10:16) Pirme silang andam nga isangyaw ang ilang paglaom sa mas maayong kalibotan kang bisan kinsa nga maminaw. (Mat. 28:19, 20; Pin. 14:6, 7; 22:17) Kon apil ka sa dakong panon, seguradong gipabilhan gyod nimo ang nindot kaayong paglaom sa umaabot. Gusto sa Yawa nga mawad-an ka sa imong paglaom. Tumong niya nga patuohon ka nga dili motuman si Jehova sa iyang mga saad. Kon molampos si Satanas sa paghimo niana, maluya ta ug basin ganig mohunong sa pag-alagad kang Jehova. w22.06 20-21 ¶2-3

Ang atong lig-ong paglaom motabang nato nga magpabiling kalmado bisan pa sa mga problema kay kombinsido ta nga moarang-arang ra ang kahimtang. Hinumdomi nga gipasidan-an ta ni Jesus nga lutoson ta. (Juan 15:20) Busa ang pagpamalandong sa ganti nga gisaad ni Jehova makatabang nato nga makapadayon sa pag-alagad kaniya. Konsideraha kon sa unsang paagi ang paglaom nakatabang kang Jesus nga magpabiling matinumanon bisan pag nahibalo siya nga hapit na siyang makaagom ug sakit nga kamatayon. Niadtong Pentekostes 33 C.E., gikutlo ni apostol Pedro ang tagna sa basahon sa Salmo nga naghisgot kon unsa ka kalmado ug ka masaligon si Jesus: “Magpuyo ko nga may paglaom; kay dili ko nimo biyaan sa Lubnganan ug dili nimo itugot nga madunot ang unod sa maunongon kanimo. . . . Pun-on ko nimog tumang kalipay diha sa imong atubangan.” (Buh. 2:25-28; Sal. 16:8-11) Lig-on ang paglaom ni Jesus nga banhawon siya sa Diyos ug bation unya niya ang kalipay nga makauban pag-usab ang iyang Amahan sa langit.—Heb. 12:2, 3. w22.10 25 ¶4-5

Kas-a, giingnan ni Santiago ug Juan ang ilang inahan nga hangyoon si Jesus nga hatagan silag taas nga posisyon sa Gingharian. (Mat. 20:20, 21) Busa gipakita ni Santiago ug Juan nga mapahitas-on sila ug gusto nilang molabaw sa uban. (Prov. 16:18) Dili lang si Santiago ug Juan ang nagpakitag dili maayong kinaiya niadtong higayona. Matikdi ang reaksiyon sa ubang apostoles: “Pagkahibalo niini sa 10 ka apostoles, sila naglagot sa magsoon.” (Mat. 20:24) Maimadyin nato nga grabe gyod ang panaglalis ni Santiago, Juan, ug sa ubang apostoles. Unsay reaksiyon ni Jesus sa nahitabo? Wala siya masuko. Wala siya moingon nga mangita siyag mas maayong mga apostoles, mga lalaki nga mas mapainubsanon ug kanunayng magpakitag gugma sa usag usa. Hinuon, si Jesus mapailobong nakig-estorya nila kay nahibalo siya nga maayo silag kasingkasing. (Mat. 20:25-28) Padayon niya silang gipakitaag gugma. w23.03 28-29 ¶10-13

Daghan na kag nahimo. Kugi kang nagtuon sa Bibliya, tingali sulod sa pipila ka tuig. Tungod sa imong pagtuon, nakombinsir ka nga ang Bibliya mao ang Pulong sa Diyos. Pero labaw sa tanan, nailhan nimo ug gihigugma ang Awtor sa Bibliya. Milalom ang imong gugma kang Jehova, mao nga gipahinungod nimo ang imong kinabuhi kaniya ug nagpabawtismo. Maayo kaayo ang imong desisyon! Seguradong kadaghan nang nasulayan ang imong pagtuo sa wala pa ka magpabawtismo. Pero samtang mouswag ka sa espirituwal, makaatubang na pod kag laing mga pagsulay. Si Satanas maningkamot nga mobugnaw ang imong gugma kang Jehova ug mohunong ka sa pag-alagad Kaniya. (Efe. 4:14) Ayaw gyod tugoti nga mahitabo na. Unsay makatabang nimo nga magmaunongon kang Jehova ug matuman ang imong panaad nga moalagad kaniya? Kinahanglang “magpadayon [ka] sa pag-uswag” aron mahimong hamtong nga Kristohanon.—Heb. 6:1. w22.08 2 ¶1-2

Responsibilidad sa matag membro sa pamilya nga dili isulti ang kompidensiyal nga impormasyon bahin sa ilang pamilya. Pananglitan, ang asawa naa tingali batasan nga mahimuot ang iyang bana, pero maulawan ang asawa kon mahibaloan ni sa uban. Ipanulti ba ni sa bana ngadto sa uban? Siyempre dili! Iyang gihigugma ang iyang asawa, ug dili gyod siya mohimog bisan unsa nga makapasakit niya. (Efe. 5:33) Ang mga tin-edyer gusto pod nga tahoron, ug angay nang hinumdoman sa mga ginikanan. Dili angayng ipanulti sa mga ginikanan ang sayop sa ilang mga anak aron dili mapakaulawan ang mga anak. (Col. 3:21) Ang mga anak pod kinahanglang mag-amping nga dili isulti sa uban ang mga impormasyon nga makahatag ug kaulawan sa ubang membro sa ilang pamilya. Kon ang matag membro sa pamilya mag-amping nga dili isulti sa uban ang kompidensiyal nga impormasyon bahin sa ilang pamilya, mas magkasuod sila. w22.09 10 ¶9

Si Jehova nakigsulti kang Job ug gipahinumdoman siya sa Iyang walay kinutobang kaalam ug sa Iyang gugma ug pag-atiman sa Iyang mga linalang. Iyang gihisgotan ang daghang makapahingangha nga mga mananap. (Job 38:1, 2; 39:9, 13, 19, 27; 40:15; 41:1, 2) Gigamit sab ni Jehova ang matinumanong batan-on nga si Elihu aron lig-onon ug hupayon si Job. Gipasaligan siya ni Elihu nga gantihan gyod ni Jehova ang pagkamalahutayon sa Iyang mga magsisimba. Pero gipalihok sab ni Jehova si Elihu nga tambagan si Job. Gitabangan ni Elihu si Job nga dili sobrang maghunahuna sa iyang kaugalingon. Iyang gipahinumdoman si Job kon unsa siya ka gamay kon itandi kang Jehova, ang Maglalalang sa uniberso. Gihatagan pod ni Jehova si Job ug asaynment; gipaampo siya alang sa iyang tulo ka higala nga nakasala. (Job 42:8-10) Sa unsang paagi tabangan ta karon ni Jehova dihang mag-atubang tag lisod nga mga pagsulay? Dili direktang makig-estorya si Jehova kanato sama sa Iyang gihimo kang Job, pero makig-estorya Siya nato pinaagi sa Iyang Pulong, ang Bibliya.—Roma 15:4. w22.08 11 ¶10-11

Ang kongregasyon sa Roma may Hudiyo ug Hentil nga mga Kristohanon. Dihang giwala ang Moisesnong Balaod, dili na kinahanglang sundon ang mga balaod nga nagdili sa pipila ka pagkaon. (Mar. 7:19) Sukad adto, ang pipila ka Hudiyong Kristohanon mokaon na sa maong mga pagkaon. Pero ang ubang Hudiyong Kristohanon mahasol gihapon sa pagkaon niini. Tungod sa maong isyu, nagkabahinbahin ang mga igsoon. Busa gipasiugda ni apostol Pablo ang kaimportante sa pagmentinar sa kalinaw. Pinaagi ana, gitabangan ni Pablo ang mga Kristohanon nga makita kon unsa ka grabe ang epekto sa maong mga panaglalis ngadto sa mga igsoon ug sa kongregasyon. (Roma 14:19, 20) Andam pod siyang mohimog mga kausaban aron dili mapandol ang uban. (1 Cor. 9:19-22) Sama kang Pablo, atong mapalig-on ang uban ug mamentinar ang kalinaw kon dili nato ipamugos ang atong gusto. w22.08 22 ¶7

Kon naghimo tag espesipikong tumong sa pag-alagad kang Jehova, padayon tang maningkamot sa pagkab-ot niini. Ingon ana sab ang atong buhaton aron mahimo nato kon unsay matarong. Ug si Jehova nagpasalig nga mapailobon siyang motabang nato aron anam-anam tang mouswag. (Sal. 84:5, 7) Mahigugmaon tang gipahinumdoman ni Jehova nga dili bug-at ang paghimo kon unsay matarong. (1 Juan 5:3) Usa ni ka proteksiyon nga atong gikinahanglan matag adlaw. Hinumdomi ang espirituwal nga armadura nga gihisgotan ni apostol Pablo. (Efe. 6:14-18) Unsa nga bahin sa armadura ang nanalipod sa kasingkasing sa sundalo? Ang “pagkamatarong ingong panagang sa dughan,” nga nagtumong sa matarong nga mga sukdanan ni Jehova. Sama nga ang panagang sa dughan manalipod sa literal nga kasingkasing, ang matarong nga mga sukdanan ni Jehova manalipod sab sa imong simbolikong kasingkasing, ang imong pangsulod nga pagkatawo. Busa importante nga apil sa imong armadura ang pagkamatarong ingong panagang sa dughan!—Prov. 4:23. w22.08 29 ¶13-14

Ang Pulong sa Diyos naghatag ug maayong giya sa matinumanong mga lalaki ug babaye sulod na sa linibo ka katuigan. Sa unsang paagi naposible na? Giseguro ni Jehova nga makopya ang balaang sinulat. Bisag dili hingpit ang mga tigkopya, nag-amping sila pag-ayo. Bahin sa Hebreohanong Kasulatan, ang usa ka eskolar misulat: “Makaingon ta nga wala gyoy laing karaang basahon nga tukma kaayong pagkakopya.” Busa makaseguro ta nga ang atong mabasa sa atong Bibliya karon mao gyod ang panghunahuna sa Awtor niini, si Jehova. Ang “matag maayong gasa ug matag hingpit nga regalo” naggikan kang Jehova. (Sant. 1:17) Ang Bibliya mao ang usa sa pinakamaayong regalo nga gihatag ni Jehova kanato. Ang regalo dakog ikasulti bahin sa naghatag niini—nga nakaila gyod siya nato ug nahibalo siya sa atong panginahanglan. Tinuod pod na bahin kang Jehova, ang naghatag sa Bibliya. Dihang atong susihon kini nga regalo, daghan tag makat-onan bahin niya. Makat-onan nato nga nakaila gyod siya nato ug nahibalo siya sa atong panginahanglan. w23.02 2-3 ¶3-4

Pagkanindot nga panahon dihang magsugod na ang pagpamanhaw dinhi sa yuta panahon sa Usa ka Libo ka Tuig nga Pagmando sa Kristo! Ang tanang namatyan nangandoy nga makita pag-usab ang ilang minahal. Mao pod nay gibati ni Jehova. (Job 14:15) Imadyina kon unsa ka malipayon ang tanan dinhi sa yuta dihang mabanhaw na ang ilang mga minahal. Ang “mga matarong” kansang ngalan nasulat sa basahon sa kinabuhi ‘banhawon ngadto sa kinabuhi.’ (Buh. 24:15; Juan 5:29) Tingali daghan sa atong mga minahal ang apil niadtong mga unang banhawon dinhi sa yuta. Ug ang “mga dili matarong,” sama niadtong walay kahigayonan nga mailhan si Jehova o mag-alagad nga matinumanon kaniya sa wala pa sila mamatay, ‘mabanhaw ngadto sa paghukom.’ Ang tanang banhawon kinahanglang tudloan. (Isa. 26:9; 61:11) Busa kinahanglang himoon ang kinadak-ang programa sa pagpanudlo sukad masukad.—Isa. 11:10. w22.09 20 ¶1-2

Gipakita ni Jehova nga mas labaw siya sa nag-alyansang mga magmamando. Siya nakig-away alang sa Israel ug gitabangan sila sa pag-ilog sa dakong bahin sa Yutang Saad. (Jos. 11:4-6, 20; 12:1, 7, 24) Kadaghan gipamatud-an ni Jehova nga siya ang Supremong Diyos! Dihang si Haring Nabucodonosor sa Babilonya nanghambog sa iyang ‘kaugalingong kusog, gahom, himaya, ug kahalangdon’ imbes mapainubsanon niyang ilhon nga si Jehova ang angayng dayegon, gipahinabo sa Diyos nga mabuang siya. Human maulii si Nabucodonosor, ‘iyang gidayeg ang Labing Hataas’ ug giila nga ang “pagmando [ni Jehova] maoy pagmando nga walay kataposan.” Siya midugang: “Walay makapugong niya.” (Dan. 4:30, 33-35) Ang salmista miingon: “Malipayon ang nasod kansang Diyos mao si Jehova, ang katawhan nga iyang gipili ingong iyang katigayonan.” (Sal. 33:12) Maayo gyod nâ nga rason nga huptan nato ang atong integridad! w22.10 15-16 ¶13-15

Ang daghang tagna sa Bibliya nga natuman nagpalig-on sa atong pagsalig nga matuman pod ang mga saad sa Diyos para sa umaabot. Mouyon ta sa salmista kinsa miampo kang Jehova: “Nangandoy ko sa imong pagluwas, kay ang imong pulong ang akong paglaom.” (Sal. 119:81) Pinaagi sa Bibliya, si Jehova naghatag natog “maayong kaugmaon ug paglaom.” (Jer. 29:11) Ang atong paglaom sa umaabot wala magdepende sa mga paningkamot sa tawo, kondili sa mga saad ni Jehova. Hinaot padayon natong palig-onon ang atong pagsalig sa Pulong sa Diyos pinaagi sa pagkugi sa pagtuon sa mga tagna sa Bibliya. Ang dugang pamatuod nga makasalig ta sa Bibliya mao ang mga tambag niini nga nakahatag ug kaayohan sa mga tawo dihang ila ning gipadapat. (Sal. 119:66, 138) Pananglitan, ang mga magtiayon nga hapit na untang magbulag malipayon na karon. Ang mga anak malipayon pod kay ang ilang Kristohanong mga ginikanan nagpangga nila.—Efe. 5:22-29. w23.01 5 ¶12-13

Hunahunaa kon sa unsang paagi ka personal nga nakabenepisyo sa katumanan sa mga saad nga naa sa Pulong sa Diyos. Pananglitan, si Jesus nagsaad nga ang iyang Amahan magtagana sa imong mga panginahanglan. (Mat. 6:32, 33) Gipasaligan pod ka ni Jesus nga si Jehova mohatag nimog balaang espiritu dihang imo ning pangayoon. (Luc. 11:13) Gituman ni Jehova ang maong mga saad. Tingali naa pa kay mahunahunaan nga ubang saad nga iyang gituman para nimo. Pananglitan, siya nagsaad nga iya kang pasayloon, hupayon, ug tagan-an sa imong espirituwal nga panginahanglan. (Mat. 6:14; 24:45; 2 Cor. 1:3) Dihang pamalandongon nimo ang tanang gihimo sa Diyos para nimo, mas molig-on ang imong paglaom nga tumanon niya ang iyang mga saad para nimo sa umaabot. Segurado ta nga tumanon ni Jehova ang iyang mga saad. Sama sa giingon sa salmista, “malipayon [ang tawo] kansang paglaom anaa kang Jehova nga iyang Diyos, . . . ang Usa nga kanunayng matinumanon.”—Sal. 146:5, 6. w22.10 27 ¶15; 28 ¶17

Ang tagna ba bahin sa pagpasig-uli sa putling pagsimba natuman karon? Oo! Sa unsang paagi? Sukad niadtong 1919 C.E., minilyon ang napahigawas sa pagkabihag sa Bantogang Babilonya, ang tibuok kalibotang imperyo sa bakak nga relihiyon. Naa na sila karon sa dapit nga mas maayo pa kay sa Yutang Saad sa Israel. Nagpuyo na sila karon sa espirituwal nga paraiso. (Isa. 51:3; 66:8) Sukad niadtong 1919 C.E., ang mga dinihogan nagpuyo sa espirituwal nga paraiso. Sa ngadtongadto, kadtong may yutan-ong paglaom, ang “ubang mga karnero,” nagpuyo na pod niining espirituwal nga paraiso ug nagtagamtam sa abundang panalangin ni Jehova. (Juan 10:16; Isa. 25:6; 65:13) Ang espirituwal nga paraiso nga ilang gipuy-an naa sa tibuok kalibotan. Karon, bisan asa ta nagpuyo, mahimo tang bahin sa espirituwal nga paraiso kon suportahan nato ang matuod nga pagsimba. w22.11 11-12 ¶12-15

Naglisod ba kag sabot sa ideya nga si Jehova naglungtad sukad pa sa una ug “hangtod sa hangtod”? (Isa. 40:28) Daghan pod ang naglisod ug sabot ana. Bahin sa Diyos, si Elihu miingon: “Ang gidaghanon sa iyang mga tuig dili matukib.” (Job 36:26; footnote) Pero kon wala ta kasabot sa usa ka butang, wala nâ magpasabot nga dili nâ tinuod. Pananglitan, bisag dili nato bug-os masabtan ang pag-obra sa kahayag, nagpasabot ba ni nga dili tinuod ang kahayag? Wala! Sa samang paagi, kita pod dili gyod bug-os makasabot sa ideya nga si Jehova naglungtad sukad pa sa una ug hangtod sa hangtod. Pero wala nâ magpasabot nga ang maong ideya dili tinuod. Ang kamatuoran bahin sa Maglalalang wala mag-agad sa atong masabtan o dili masabtan. (Roma 11:33-36) Ug siya naglungtad na sa wala pa ang uniberso, apil ang adlaw ug mga bituon. Oo, siya naglungtad na sa wala pa niya ‘ibuklad ang kalangitan.’—Jer. 51:15. w22.12 2-3 ¶3-4

Usahay, hangyoon ta nga moampo para sa uban. Pananglitan, ang sister nga nagdumalag pagtuon sa Bibliya mohangyo sa iyang kaubang sister nga maoy moampo. Ang mikuyog nga sister wala tingali kaayo makaila sa Bible study, mao nga basig mas gusto niyang moampo inighuman sa pagtuon aron mas mapahaom niya ang iyang pag-ampo sa panginahanglan sa Bible study. Ang usa ka brader hangyoon tingali nga moampo panahon sa tigom alang sa pagsangyaw o sa tigom sa kongregasyon. Angayng hinumdoman sa moampo nga brader kon unsay katuyoan sa maong tigom. Ang pag-ampo dili angayng gamiton aron manambag sa kongregasyon o mohimog mga pahibalo. Sa kadaghanang tigom sa kongregasyon, lima ka minuto ra ang gigahin para sa awit ug pag-ampo, mao nga ang brader nga moampo kinahanglang dili mogamit ug “daghang pulong” ilabina sa sugod sa tigom.—Mat. 6:7. w22.07 24 ¶17-18

Gitagna ni Jesus nga sa kataposang mga adlaw, duna unyay mga kamatay, o pagkaylap sa sakit, “sa lainlaing dapit.” (Luc. 21:11) Sa unsang paagi makahatag ug kalinaw ang pagkahibalo niana? Dili na ta matingala dihang mokaylap ang mga sakit. Nahibalo ta nga nagakahitabo ni sumala sa giingon ni Jesus. Busa sundon nato ang iyang tambag para niadtong nagkinabuhi panahon sa kataposan: “Ayaw mog kahadlok.” Kon kaylap ang sakit, mausab tingali ang imong rutina, pero paningkamoting magpadayon ang imong personal nga pagtuon o pagtambong sa mga tigom. Ang mga eksperyensiya diha sa atong mga publikasyon ug video magpahinumdom nimo nga ang mga igsoon nagpabiling matinumanon bisan pa sa samang mga kalisdanan. w22.12 17 ¶4, 6

Paborito kaayo ni Jacob ang iyang anak nga si Jose. (Gen. 37:3, 4) Tungod ana, ang mas magulang nga mga anak ni Jacob nasina sa ilang igsoon. Dihang naay kahigayonan, ilang gibaligya si Jose ngadto sa mga negosyante nga taga-Midian. Gidala sa mga negosyante si Jose ngadto sa Ehipto, nga gatosan ka kilometro ang gilay-on. Pag-abot didto, gibaligya na pod siya kang Potipar, ang pangulo sa mga bantay sa Paraon. Kalit kaayong nausab ang kinabuhi ni Jose, gikan sa pagkahimong paboritong anak sa iyang amahan ngadto sa pagkahimong ubos nga ulipon sa usa ka Ehiptohanon! (Gen. 39:1) Usahay makaagi tag mga kalisdanan nga “sagad sa mga tawo”—sa ato pa, mga pagsulay nga maeksperyensiyahan sa tanan. (1 Cor. 10:13) O mag-antos tingali ta tungod lang kay mga tinun-an ta ni Jesus. Usahay biaybiayon tingali ta, supakon, o lutoson pa gani tungod sa atong pagtuo. (2 Tim. 3:12) Bisan unsa pang pagsulay ang imong maeksperyensiyahan, tabangan ka ni Jehova nga magmalamposon. w23.01 14-15 ¶3-4

Usahay, mobati tingali ta nga kinahanglan natong estoryahon ang igsoon nga nakapasakit nato. Pero maayong pangutan-on una nato ang kaugalingon: ‘Nahibalo ba ko sa tanang detalye?’ (Prov. 18:13) ‘Posible kaha nga wala niya tuyoa ang iyang gihimo?’ (Eccl. 7:20) ‘Naa pod ba koy nahimong ingon ana nga sayop?’ (Eccl. 7:21, 22) ‘Kon ako siyang estoryahon, dili kaha mosamot lang ang problema?’ Kon atong hunahunaon ni nga mga pangutana, posibleng makaamgo ta nga kaya rang tabonan ug gugma ang sayop sa atong igsoon. Mapamatud-an sa matag usa nato nga tinuod tang mga sumusunod ni Jesus kon magpakita tag tinuod nga gugma sa atong mga igsoon bisan pa sa ilang mga kahuyangan. Kon ato nang himoon, matabangan nato ang uban nga mailhan ang tinuod nga relihiyon ug moduyog nato sa pagsimba kang Jehova. Hinaot nga determinado ta nga padayong ipakita ang gugma nga magpaila sa tinuod nga mga Kristohanon. w23.03 31 ¶18-19

Ang Bibliya nagpakita sa kinalabwang hiyas sa Awtor niini—ang gugma. Kay gimahal ta ni Jehova, wala ta niya paulanig impormasyon nga dili kinahanglan. (Juan 21:25) Makita pod ang gugma ni Jehova sa iyang paagi sa pagpakigkomunikar nato kay iya tang gipakitaag dignidad. Diha sa Bibliya, wala siya maghatag ug daghan kaayong balaod, nga mora bag but-an niya ang tanang bahin sa atong kinabuhi. Hinuon, migamit siyag tinuod nga mga estorya, makapainteres nga mga tagna, ug praktikal nga tambag aron tabangan ta nga masabtan kon unsay angay ug dili nato angayng himoon. Niining mga paagiha, ang Pulong sa Diyos nagdasig nato nga higugmaon ug sundon siya nga kinasingkasing. Gipakita sa Bibliya nga si Jehova interesado kaayo nato. Sa unsang paagi? Ang iyang Pulong daghag estorya bahin sa mga karakter sa Bibliya nga mibatig lainlaing emosyon. Makasabot gyod ta nila kay sila “may pagbati nga sama kanato.” (Sant. 5:17) Labaw sa tanan, dihang pamalandongon nato kon giunsa pagtratar ni Jehova ang mga tawo nga sama nato, mas masabtan nato nga siya “mabination kaayo ug maluluy-on.”—Sant. 5:11. w23.02 6 ¶13-15

Ang unang bersikulo sa kataposang basahon sa Bibliya nag-ingon: “Usa kini ka pinadayag pinaagi ni Jesu-Kristo, nga gihatag sa Diyos kaniya, aron ipakita sa iyang mga ulipon ang mga butang nga kinahanglang mahitabo sa dili madugay.” (Pin. 1:1) Busa interesado kaayo ta sa mga panghitabo karon ug sa posibleng koneksiyon niini sa mga tagna sa Bibliya. Ug tingali ganahan kaayo tang makig-estorya sa uban bahin niini nga mga hitabo. Dihang maghisgot ug tagna sa Bibliya, likayan nato ang paghatag ug kaugalingong interpretasyon. Ngano? Kay dili nato gustong makasultig bisan unsa nga makapabahinbahin sa kongregasyon. Pananglitan, makabalita tingali ta bahin sa mga lider sa mga nasod nga nagsabotsabot kon unsaon nila pagsulbad ang gubat aron naa nay kalinaw ug kasegurohan. Imbes maghatag ug kaugalingong opinyon nga ang ilang gihimo nagtuman sa tagna sa 1 Tesalonica 5:3, kinahanglang mahibalo ta sa kinabag-ohang impormasyon nga gi-publish sa organisasyon ni Jehova. Kon dinhi nato ibase ang atong pagpakig-estorya, makatabang ta nga magkahiusa ang kongregasyon sa “samang panghunahuna.”—1 Cor. 1:10; 4:6. w23.02 16 ¶4-5

Nganong imong gihigugma si Jesu-Kristo? Si Jesus nahigugma sa kamatuoran, pagkamapainubsanon, ug pagkamatarong. Kon gihigugma nimo ang kamatuoran ug pagkamatarong, natural lang nga gihigugma pod nimo si Jesu-Kristo. Hunahunaa kon sa unsang paagi si Jesus maisogong midepensa sa kon unsay tinuod ug husto. (Juan 18:37) Pero giunsa pagpakita ni Jesus nga importante ang pagkamapainubsanon? Gipakita ni Jesus nga importante ang pagkamapainubsanon pinaagi sa iyang ehemplo. Pananglitan, gusto niya nga ang iyang Amahan ang madayeg, dili siya. (Mar. 10:17, 18; Juan 5:19) Unsay imong gibati sa pagkamapainubsanon ni Jesus? Seguradong napalihok ka nga higugmaon ang Anak sa Diyos ug sundogon siya. Nganong mapainubsanon si Jesus? Kay iyang gimahal ug gisundog ang iyang mapainubsanong Amahan. (Sal. 18:35; Heb. 1:3) Dili ba naapresyar nimo si Jesus kay iyang gisundog pag-ayo ang mga hiyas ni Jehova? w23.03 3-4 ¶6-7

Ang Bibliya naghisgot ug duha ka grupo sa mga tawo nga banhawon nga may paglaom nga mabuhi hangtod sa hangtod sa yuta—ang “mga matarong” ug “mga dili matarong.” Ang “mga matarong” mao kadtong matinumanong nag-alagad kang Jehova niadtong buhi sila. Pero kadtong “mga dili matarong” wala mag-alagad kaniya. Kay ang duha ka grupo banhawon man, makaingon ba ta nga ang ilang ngalan nasulat sa basahon sa kinabuhi? Niadtong buhi pa ang “mga matarong,” ang ilang ngalan nasulat na sa basahon sa kinabuhi. Napapas ba ang ilang ngalan niana nga basahon pagkamatay nila? Wala, kay “buhi” gihapon sila sa panumdoman ni Jehova. Si Jehova ‘Diyos sa mga buhi, ug dili sa mga patay, kay para niya silang tanan buhi.’ (Luc. 20:38) Nagpasabot ni nga dihang ang mga matarong banhawon dinhi sa yuta, ang ilang ngalan naa sa basahon sa kinabuhi, pero samag “lapis” pa ang gigamit sa pagsulat niini.—Luc. 14:14. w22.09 16 ¶9-10

Gusto ni Jehova nga ang unang tawo mag-enjoy sa mga butang nga Iyang gilalang. Dihang gihimo sa Diyos si Adan, Iya siyang gipapuyo sa nindot kaayo nga paraiso ug gisugo siya nga atimanon ug padak-on kana. (Gen. 2:8, 9) Imadyina ang kalipay ni Adan dihang nakita niya nga nanubo ang mga liso ug namulak ang mga tanom. Pagkanindot sa pribilehiyo ni Adan nga atimanon ang tanaman sa Eden! Gisugo pod ni Jehova si Adan nga nganlan ang lainlaing hayop. (Gen. 2:19, 20) Puwede untang si Jehova ang maghatag ug ngalan sa kada hayop, pero gisalig niya kang Adan kini nga buluhaton. Segurado nga sa wala pa nganli ni Adan ang mga hayop, iya unang giobserbahan pag-ayo ang ilang hitsura ug kinaiya. Nag-enjoy gyod tingali si Adan sa iyang trabaho. Seguradong mas misamot ang iyang apresasyon sa kaalam sa iyang Amahan ug sa kamaayo Niya modisenyo. w23.03 15 ¶3

Ang Anglo-Amerika, nga gisimbolohan sa mga tiil sa dako kaayong estatuwa, mao ang kataposang gahom sa kalibotan nga gitagna sa Bibliya. (Dan. 2:31-33) Wala nay laing gobyerno sa tawo nga motungha human niini. Kini ug ang tanang ubang gobyerno laglagon sa Gingharian sa Diyos panahon sa Armagedon. (Pin. 16:13, 14, 16; 19:19, 20) Sa unsang paagi makabenepisyo ta niini nga tagna? Ang tagna ni Daniel naghatag ug dugang ebidensiya nga nagkinabuhi na ta panahon sa kataposan. Kapig 2,500 ka tuig kanhi, gitagna ni Daniel nga human sa Babilonya, motungha ang upat ka gahom sa kalibotan nga dakog epekto sa katawhan sa Diyos. Gipakita pod sa tagna nga ang kataposan niini nga mga gahom sa kalibotan mao ang Anglo-Amerika. Naghatag ni natog kahupayan ug paglaom nga sa dili madugay, laglagon sa Gingharian sa Diyos ang tanang gobyerno sa tawo ug kini na ang magmando sa yuta. w22.07 4 ¶9; 5 ¶11-12