Hunyo

Si Job suod kaayo kang Jehova. Dato kaayo siya, dako ang iyang pamilya, ug malipayon sila. (Job 1:1-5) Pero sa usa lang ka adlaw, halos tanan ang nawala kang Job. Una, nawad-an siya sa iyang kahayopan. (Job 1:13-17) Dayon namatay ang tanan niyang pinanggang mga anak. Imadyina ang grabeng kakurat ug kaguol nga gibati ni Job ug sa iyang asawa dihang nahibaloan nila nga namatay ang tanan nilang 10 ka anak. Mao diay nga gigisi ni Job ang iyang besti tungod sa kaguol ug nalup-og siya! (Job 1:18-20) Dayon gihatagan ni Satanas si Job ug ngutngot ug makauulaw kaayong sakit. (Job 2:6-8) Sa wala pa na mahitabo, si Job tinahod kaayo sa ilang komunidad. Ang mga tawo magpatambag pa gani niya. (Job 31:18) Karon ila na siyang gilikayan. Nagpalayo niya ang iyang mga igsoon, ang mga suod kaniya, ug bisan ang iyang mga sulugoon!—Job 19:13, 14, 16. w22.06 21 ¶5-6

Human sa bawtismo, kitang tanan kinahanglang magpadapat sa tambag ni apostol Pablo sa mga Kristohanon sa Efeso. Iyang gidasig sila nga mahimong “hamtong” nga mga Kristohanon. (Efe. 4:13) Sa ato pa, kinahanglang magpadayon sila sa pag-uswag. Gihigugma na nimo pag-ayo si Jehova. Pero puwede pang mapalalom ang imong gugma kaniya. Unsaon man? Gihisgotan ni apostol Pablo ang usa ka paagi diha sa Filipos 1:9. Si Pablo nag-ampo nga ang gugma sa mga taga-Filipos “modagaya pa.” Busa puwede pa natong mapalalom ang atong gugma. Mahimo nato na pinaagi sa pagbaton ug “tukmang kahibalo ug bug-os nga pagsabot.” Kon mas mailhan nato si Jehova, mas molalom ang atong gugma kaniya ug mas maapresyar nato ang iyang personalidad ug mga pamaagi. Mas modako ang atong tinguha nga mapalipay siya, ug dili gyod nato gusto nga mohimog bisan unsa nga makapaguol niya. Maningkamot ta nga masabtan kon unsay iyang kabubut-on ug kon unsaon nato na paghimo. w22.08 2-3 ¶3-4

Ang gisulat sa basahon sa Pinadayag dili para sa kadaghanan, kondili para nato nga mga alagad sa Diyos. Ingong katawhan sa Diyos, dili ta angayng matingala nga apil ta sa katumanan sa mga tagna niining makapainteres kaayo nga basahon. Gisulti sa tigulang na nga si apostol Juan kon kanus-a mahitabo kini nga mga tagna. Siya miingon: “Pinaagi sa balaang espiritu nakaabot ko sa adlaw sa Ginoo.” (Pin. 1:10) Dihang gisulat ni ni Juan niadtong mga 96 C.E., ang “adlaw sa Ginoo” layo pa kaayo. (Mat. 25:14, 19; Luc. 19:12) Base sa tagna sa Bibliya, kana nga adlaw nagsugod niadtong 1914, sa dihang si Jesus nahimong Hari sa langit. Sukad nianang tuiga, ang mga tagna sa Pinadayag nga konektado sa katawhan sa Diyos nagsugod pagkatuman. Oo, nagkinabuhi na ta karon sa “adlaw sa Ginoo”!—Pin. 1:3. w22.05 2 ¶2-3

Samtang buhi pa, ang pintas nga mananap ug ang bakak nga propeta gitambog ngadto sa linaw nga kalayo nga nagdilaab uban ang asupre. Busa samtang nagmando pa kining mga gobyerno nga kaaway sa Diyos, sila laglagon ug mawala hangtod sa hangtod. Unsay kahulogan niini para nato? Kay mga Kristohanon man ta, kinahanglang magmaunongon ta sa Diyos ug sa iyang Gingharian. (Juan 18:36) Kinahanglang magpabilin tang neyutral ug way dapigan sa mga isyu sa politika. Pero ang pagpabiling neyutral dili gyod sayon, kay presyuron ta sa mga gobyerno nga suportahan sila sa pulong ug sa buhat. Kadtong magpadaog sa presyur makadawat sa marka sa pintas nga mananap. (Pin. 13:16, 17) Pero si bisan kinsa nga naa niana nga marka dili uyonan ni Jehova ug dili makadawat ug kinabuhing walay kataposan. (Pin. 14:9, 10; 20:4) Importante kaayo nga ang matag usa nato magpabiling neyutral, bisag unsaon pa ta nilag presyur! w22.05 10-11 ¶12-13

Ang usa ka tumong nga puwede nimong kab-oton mao ang pagkat-on ug mapuslanong skill. Kon atong pauswagon ang atong mga skill, mas daghan tag mahimo sa pag-alagad kang Jehova. Hunahunaa ang daghang igsoon nga nagboluntaryo sa pagtukod sa mga pasilidad sa Bethel, Assembly Hall, ug Kingdom Hall. Daghan nila ang nakakat-on ug skill tungod sa pagtrabaho kauban sa hanas nga mga igsoon. Karon, ang mga brader ug sister nakakat-on ug mga skill nga gikinahanglan aron mamentinar ang mga Assembly Hall ug Kingdom Hall. Niining paagiha ug sa uban pa, si Jehova nga Diyos, ang “Hari nga walay kataposan,” ug si Kristo Jesus, ‘ang Hari sa mga hari,’ naggamit niining hanas nga mga igsoon sa pagpalampos ug daghang butang. (1 Tim. 1:17; 6:15) Gusto natong magkugi ug gamiton ang atong mga skill aron himayaon si Jehova, dili ang atong kaugalingon.—Juan 8:54. w22.04 24 ¶7; 25 ¶11

Si Solomon puwerteng datoa ug hayahay kaayog kinabuhi. (1 Hari 10:7, 14, 15) Pero si Jesus wala kaayoy mga butang ug walay kaugalingong balay. (Mat. 8:20) Pero silang duha balanseg panghunahuna sa materyal nga mga butang kay usa ra ang gigikanan sa ilang kaalam—si Jehova nga Diyos. Si Solomon miingon nga tungod sa kuwarta, mapalit nato ang atong mga gikinahanglan ug ang uban natong gusto. Pero bisag dato kaayo si Solomon, nasabtan niya nga naa pay mas importante kay sa kuwarta. Pananglitan, siya misulat: “Ang maayong ngalan [o, “maayong reputasyon,” footnote] mao ang pilion imbes ang daghang bahandi.” (Prov. 22:1) Naobserbahan pod ni Solomon nga ang mga tawo nga kuwarta ray gihunahuna dili tinuod nga malipayon bisan pa sa ilang nabatonan. (Eccl. 5:10, 12) Ug nagpasidaan siya nga dili nato ibutang ang tanan natong pagsalig sa kuwarta, kay ang kuwarta dali rang mawala bisan unsa pa ni ka daghan.—Prov. 23:4, 5. w22.05 21 ¶4-5

Kon mamalandong ta sa atong mga panalangin karon, molig-on ang atong relasyon kang Jehova. Ug kon pamalandongon nato ang mga panalangin nga ihatag ni Jehova sa umaabot, mahimong tinuod kaayo para nato ang paglaom nga makaalagad kaniya hangtod sa hangtod. Kining tanan makatabang nato nga mas magmalipayon sa pag-alagad kang Jehova karon. Si Jehova “motindog” para nato dihang iyang laglagon kining daotang kalibotan. Kay si Jehova “Diyos sa hustisya,” makasalig ta nga dili niya tugotan nga madugangan pag usa ka adlaw kay sa gikinahanglan ang paglungtad sa kalibotan ni Satanas. (Isa. 25:9) Sama kang Jehova, mapailobon tang naghulat nga moabot na ang adlaw sa kaluwasan. Sa pagkakaron, maningkamot ta nga padayong pabilhan ang pribilehiyo sa pag-ampo, magtuon ug magpadapat sa Pulong sa Diyos, ug mamalandong sa atong mga panalangin. Kon himoon nato nâ, tabangan ta ni Jehova sa paglahutay nga malipayon sa atong pagsimba kaniya. w22.11 13 ¶18-19

Wala hisgoti sa Bibliya ang pagbawtismo kang Timoteo, pero dili lisod imadyinon ang kalipay nga gibati sa iyang mama nga si Eunice nianang adlawa. (Prov. 23:25) Bisag dili sayon, natudloan ni Eunice si Timoteo nga higugmaon si Jehova ug ang Iyang Anak, si Jesu-Kristo. Ang ginikanan ni Timoteo dili parehas ug relihiyon. Ang iyang papa Grego, ug ang iyang mama ug lola mga Hudiyo. (Buh. 16:1) Tingali, tin-edyer pa si Timoteo dihang nahimong Kristohanon si Eunice ug Loida. Pero ang iyang papa wala mahimong Kristohanon. Unsa nga relihiyon ang pilion ni Timoteo? Karon, gimahal pod sa Kristohanong mga inahan ang ilang pamilya. Gusto gyod nilang tabangan ang ilang mga anak nga masuod kang Jehova. Ug gipabilhan pag-ayo sa atong Diyos ang ilang paningkamot. (Prov. 1:8, 9) Daghang inahan ang gitabangan ni Jehova sa pagtudlo sa ilang mga anak nga dawaton ang kamatuoran. w22.04 16 ¶1-3

Sa di madugay, ibutang ni Jehova sa kasingkasing sa mga lider sa gobyerno ang ‘pagbuhat sa iyang hunahuna.’ Unsa unyay resulta? Atakehon sa maong mga gobyerno, o “10 ka hari,” ang bakak nga mga relihiyon ug laglagon kini. (Pin. 17:1, 2, 12, 16) Giunsa nato pagkahibalo nga hapit nang laglagon ang Bantogang Babilonya? Aron matubag nâ, makatabang kon atong hinumdoman nga usa sa mga depensa sa karaang siyudad sa Babilonya mao ang mga tubig sa Suba sa Euprates. Sa basahon sa Pinadayag, ang minilyong tawo nga nagsuportar sa Bantogang Babilonya gipakasama sa “mga tubig.” (Pin. 17:15) Pero gipakita sab niini nga ang mga tubig ‘mohubas’—buot pasabot, ang tibuok kalibotang imperyo sa bakak nga relihiyon mawad-ag daghang tigsuportar. (Pin. 16:12) Kanang tagnaa natuman na karon, kay daghang tawo ang mibiya sa bakak nga relihiyon ug nangitag laing kakuhaan ug giya. w22.07 5-6 ¶14-15

Ang pagpasaylo nagpakitag apresasyon. Sa usa ka ilustrasyon, gipakasama ni Jesus si Jehova sa usa ka hari nga nagpapas sa dako kaayong utang nga dili kayang bayran sa iyang ulipon. Pero ang gikaluy-an nga ulipon wala magpakitag kaluoy sa ulipon nga nakautang niyag mas gamayng kantidad. (Mat. 18:23-35) Unsang leksiyon ang gitudlo ni Jesus kanato? Kon giapresyar gyod nato ang dakong kaluoy ni Jehova kanato, mapalihok ta sa pagpasaylo sa uban. (Sal. 103:9) Mao ni ang giingon sa Bantayanang Torre daghang tuig na ang milabay: “Bisag kapila pa nato pasayloon ang uban, di gyod nato matumbasan ang kadako sa pagpasaylo ug kaluoy sa Diyos kanato pinaagi sa Kristo.” Kadtong magpasaylo pasayloon. Si Jehova magpakitag kaluoy niadtong maluluy-on. (Mat. 5:7) Gipasiugda na ni Jesus dihang gitudloan niya ang iyang mga tinun-an kon unsaon pag-ampo.—Mat. 6:14, 15. w22.06 10 ¶8-9

Si Jesus mianhi sa yuta ingong tawo. Parehas gyod siyag personalidad sa iyang Amahan. (Juan 14:9) Busa pinaagi kaniya, atong nailhan ug gihigugma si Jehova nga Diyos. Nakabenepisyo sab ta sa mga gitudlo ni Jesus ug sa iyang paggiya ug pagdumala sa Kristohanong kongregasyon karon. Gitudloan ta niya kon unsaon pagkinabuhi nga makapalipay kang Jehova. Ug nakabenepisyo tang tanan sa kamatayon ni Jesus. Human mabanhaw si Jesus, iyang gitanyag ang bili sa iyang dugo ingong hingpit nga halad nga ‘naghinlo kanato gikan sa tanang sala.’ (1 Juan 1:7) Karon, siya usa na ka mahimayaon ug imortal nga Hari. Sa di madugay, dugmokon ni Jesus ang ulo sa halas. (Gen. 3:15) Malipay gyod pag-ayo ang matinumanong mga tawo dihang laglagon na si Satanas! Busa ayawg kaluya. Ang atong Diyos kasaligan. Dagaya niyang panalanginan “ang tanang nasod sa yuta.” w22.07 18 ¶13; 19 ¶19

Kinahanglan nga andam tang mo-adjust dihang mohimo tag tumong. Ngano? Kay naay mga kahimtang nga dili nato kontrolado. Hunahunaa ni: Si apostol Pablo mitabang sa pagpormag bag-ong kongregasyon sa siyudad sa Tesalonica. Pero napugos siya sa pagbiya tungod sa mga magsusupak. (Buh. 17:1-5, 10) Kon wala mobiya si Pablo, mabutang niya sa peligro ang mga igsoon. Pero wala siya moundang sa pagtabang nila. Hinuon, mi-adjust siya. Sa ulahi, iyang gipadala si Timoteo sa pag-atiman sa espirituwal nga panginahanglan sa bag-ong mga Kristohanon sa Tesalonica. (1 Tes. 3:1, 2) Seguradong nalipay ang mga taga-Tesalonica. Naa tay makat-onan sa eksperyensiya ni Pablo sa Tesalonica. Tingali naay pribilehiyo sa pag-alagad nga gusto natong makab-ot, pero wala nato ni madawat tungod sa mga kahimtang nga dili nato kontrolado. (Eccl. 9:11) Kon mao nay imong kahimtang, sulayi ang laing tumong nga kaya nimong kab-oton. w22.04 25-26 ¶14-15

Gihupay ta ni Jehova pinaagi sa paghatag natog paglaom sa umaabot. Tagda ang pipila ka punto gikan sa Bibliya nga makapahupay nato dihang mag-atubang tag mga pagsulay. Diha sa Kasulatan, gipasaligan ta ni Jehova nga walay bisan unsa—bisag grabeng mga pagsulay—ang ‘makabulag nato gikan sa iyang gugma.’ (Roma 8:38, 39) Gipasaligan sab ta niya nga siya “duol sa tanang nagatawag kaniya” pinaagi sa pag-ampo. (Sal. 145:18) Si Jehova miingon nga kon mosalig ta niya, makalahutay ta sa bisan unsang pagsulay ug magmalipayon gihapon ta bisag nag-antos. (1 Cor. 10:13; Sant. 1:2) Gipahinumdoman pod ta sa Pulong sa Diyos nga ang mga pagsulay temporaryo ug kadiyot lang kon itandi sa walay kataposang ganti nga iyang ihatag nato. (2 Cor. 4:16-18) Si Jehova nagsaad nga iyang wagtangon ang hinungdan sa tanan natong kalisdanan—si Satanas nga Yawa ug ang mga daotan sama niya. (Sal. 37:10) Naka-memorize ba kag pipila ka makapahupay nga mga teksto sa Bibliya nga makatabang nimo nga makalahutay sa mga pagsulay sa umaabot? w22.08 11 ¶11

Nabalaka ba ka kon makapadayon ka sa pagkinabuhi uyon sa matarong nga mga sukdanan ni Jehova kada adlaw? Si Jehova nagsaad nga ang atong pagkamatarong “mahisama sa mga balod sa dagat.” (Isa. 48:18) Imadyina nga nagbarog ka sa baybayon, nga nagtan-aw sa mga balod. Samtang tua ka didto, mabalaka ba ka nga moabot ang panahon nga wala nay mga balod? Dili! Nahibalo ug segurado ka nga magpadayon ni. Ang imong pagkamatarong mahisama sa mga balod sa dagat! Sa unsang paagi? Dihang kinahanglan kang mohimog desisyon, konsideraha una kon unsay panghunahuna ni Jehova, ug sunda kana. Bisag unsa pa ka lisod ang desisyon, ang imong mahigugmaong Amahan kanunayng mohatag nimog kusog ug motabang nimo aron padayon kang magkinabuhi kada adlaw sumala sa iyang matarong nga mga sukdanan.—Isa. 40:29-31. w22.08 30 ¶15-17

Sa kataposan sa 1,000 ka tuig, si Satanas buhian. Maningkamot siya nga mapahisalaag ang hingpit nga mga tawo. Panahon sa maong pagsulay, ang tanang hingpit nga tawo sa yuta dunay kahigayonan nga klarong ipakita ang ilang baroganan sa isyu bahin sa ngalan ug pagkasoberano sa Diyos. (Pin. 20:8-10) Ang ilang baroganan nianang panahona maoy basehan kon ang ilang ngalan permanente bang masulat sa basahon sa kinabuhi. Ang uban dili magmatinumanon sama kang Adan ug Eva, ug dili sila magpasakop sa pagmando ni Jehova. Unsay mahitabo nila? Ang Pinadayag 20:15 nag-ingon: “Si bisan kinsa nga wala masulat sa basahon sa kinabuhi gitambog ngadto sa linaw nga kalayo.” Oo, kadtong morebelde bug-os nga malaglag. Pero ang kadaghanan sa hingpit nga mga tawo magmatinumanon panahon niining kataposang pagsulay. w22.09 23-24 ¶15-16

Ang pipila ka Kristohanon sa unang siglo miingon nga kinahanglan gyong magpatuli ang kinabig nga mga Hentil, tingali aron dili sawayon sa mga Hudiyo. (Gal. 6:12) Wala gyod mouyon si apostol Pablo niana, pero imbes ipamugos ang iyang panghunahuna, mapainubsanon niyang gidala ang isyu ngadto sa mga apostoles ug mga ansiyano sa Jerusalem. (Buh. 15:2) Ingong resulta, iyang natabangan ang maong mga Kristohanon nga mamentinar ang kalipay ug kalinaw sa kongregasyon. (Buh. 15:30, 31) Kon motungha ang grabeng panaglalis, mamentinar nato ang kalinaw kon mangayo tag giya niadtong gitudlo ni Jehova sa pag-atiman sa kongregasyon. Sagad, ang giya nga gibase sa Bibliya makita diha sa atong mga publikasyon o sa mga guideline nga gitagana sa organisasyon. Kon magpokus ta sa pagsunod niini nga mga instruksiyon imbes ipamugos ang atong mga opinyon, makaamot ta sa kalinaw sa kongregasyon. w22.08 22 ¶8-9

Dunay mga panahon nga kinahanglan natong isulti sa atong suod nga higala ang atong gibati. Pero usahay dili nâ sayon. Wala tingali ta maanad nga mosulti sa atong gibati, ug mahugno ta kon mahibaloan nato nga gisulti ni sa atong higala ngadto sa uban. Pero mapasalamaton kaayo ta kon ang atong higala kasaligan ug dili manabi. Ang mga ansiyano nga kasaligan sa kompidensiyal nga mga butang maoy “tagoanan gikan sa hangin, usa ka salipdanan” para sa mga igsoon. (Isa. 32:2) Dili ta magduhaduha nga moduol nila kay nahibalo ta nga dili nila isulti sa uban ang atong gisulti kanila. Dili pod ta mamugos nga sultihan ta nilag kompidensiyal nga impormasyon. Maapresyar sab nato ang mga asawa sa mga ansiyano kay dili sila magsukitsukit sa ilang bana. Naay kaayohan nga dili sila sultihan ug personal nga impormasyon bahin sa mga igsoon. w22.09 11 ¶10-11

Makasalig ta nga luwason ni Jehova ang iyang maunongong mga alagad sa umaabot nga “dakong kasakitan.” (Mat. 24:21; Dan. 12:1) Iya ning himoon dihang ang alyansa sa kanasoran, nga nailhang Gog sa Magog, pintas nga mag-atake sa matinumanong mga alagad ni Jehova sa tibuok kalibotan. Bisan pag apil niana nga alyansa ang tanang 193 ka membro sa United Nations, wa gyod silay dag-anan sa Supremong Diyos ug sa iyang langitnong kasundalohan! Si Jehova nagsaad: “Ipataas gayod nako ang akong kaugalingon ug balaanon nako ang akong kaugalingon ug ipaila nako ang akong kaugalingon atubangan sa daghang kanasoran; ug sila makaila gayod nga ako si Jehova.” (Ezeq. 38:14-16, 23) Ang pag-atake ni Gog mosangko sa gubat sa Armagedon, dihang laglagon ni Jehova ang “mga hari sa tibuok gipuy-ang yuta.” (Pin. 16:14, 16; 19:19-21) Sa laing bahin, ang “mga matul-id lang ang magpuyo sa yuta, ug ang mga naghupot sa ilang integridad mao ang magpabilin niini.”—Prov. 2:21, footnote. w22.10 16-17 ¶16-17

Dili ta makabasag kasingkasing; si Jehova lang ang ‘nagasusi sa mga motibo.’ (Prov. 16:2) Iyang gimahal ang tanang tawo, bisag unsa pay ilang kagikan ug kultura. Ug gidasig ta ni Jehova nga ‘buksan pag-ayo ang atong kasingkasing.’ (2 Cor. 6:13) Busa angay natong higugmaon ang tanang igsoon imbes hukman sila. Nagpasabot sab ni nga di nato hukman kadtong dili alagad sa Diyos. Hukman ba nimo ang imong dili magtutuong paryente ug moingon, “Dili gyod nâ siya ma-Saksi”? Dili, kay wala tay katungod nga manghukom. Gani, ang paghimo ana nagpakita nga naghunahuna ta nga mas matarong ta kay kaniya. Si Jehova naghatag gihapon sa “tanang tawo” ug kahigayonan nga maghinulsol. (Buh. 17:30) Hinumdomi kanunay nga kadtong naghunahuna nga mas matarong sila kay sa uban giisip ni Jehova nga dili matarong. Hinaot ang atong gugma sa mga sukdanan ni Jehova sa pagkamatarong makapalipay nato ug makadasig sa uban, nga motabang nila nga mas masuod nato ug sa atong Diyos. w22.08 31 ¶20-22

Makadahom tag pagsupak sa atong pagsangyaw. Ang maong pagsupak tingali mas mograbe pa sa umaabot. (Dan. 11:44; 2 Tim. 3:12; Pin. 16:21) Pero makaseguro ta nga tabangan ta ni Jehova. Ngano? Si Jehova kanunayng nagtabang sa iyang mga alagad sa pagtuman sa ilang asaynment bisag unsa pa kini ka lisod. Konsideraha ang pananglitan ni propetang Ezequiel, kinsa nagsangyaw sa mga Hudiyo nga nabihag sa Babilonya. Unsang klaseha sa mga tawo ang kinahanglang sangyawan ni Ezequiel? Si Jehova miingon nga sila “masukihon,” “tig-ag kasingkasing,” ug “rebelyoso.” Sama sila ka peligroso sa mga sampinit ug tanga. Mao nay rason nga balikbalik nga giingnan ni Jehova si Ezequiel: “Ayawg kahadlok”! (Ezeq. 2:3-6) Natuman ni Ezequiel ang iyang ministeryo kay siya (1) gipadala ni Jehova, (2) gihatagag kusog sa espiritu sa Diyos, ug (3) gipalig-on sa mga pulong sa Diyos. w22.11 2 ¶1-2

Sa tanang gilalang ni Jehova dinhi sa yuta, ang mga tawo lang ang iyang gihatagan ug paglaom nga dili mamatay. Gilalang sab ta ni Jehova nga may tinguha nga dili mamatay. Ang Bibliya nag-ingon nga gibutang sa Diyos ‘ang walay kataposan diha sa kasingkasing’ sa mga tawo. (Eccl. 3:11) Usa nâ ka rason nga giisip natong kaaway ang kamatayon. (1 Cor. 15:26) Kon grabe tang masakit, wala ra ba tay himoon ug maghulat na lang nga mamatay? Dili. Sagad magpadoktor ta ug motomar ug tambal aron maayo ta. Gani, buhaton nato ang tanan nga puwedeng himoon aron dili ta mamatay. Ug kon mamatay ang atong minahal, bata man siya o tigulang, grabe ang atong kaguol ug dugay ning mawala. (Juan 11:32, 33) Siyempre, gihatagan ta sa atong mahigugmaong Maglalalang ug tinguha ug kapasidad nga magpabiling buhi kay katuyoan niya nga mabuhi ta sa walay kataposan. w22.12 3 ¶5; 4 ¶7

Daghan sa atong mga isigkamagsisimba ang tingali nasakit, nahadlok, o nag-inusara niining lisod nga mga panahon. Paningkamoting magpadayon ang imong komunikasyon sa mga igsoon. Kon may sakit nga mokaylap, kinahanglan tingali natong mag-physical distancing bisag mga igsoon ang atong kauban. Tungod ana, bation tingali nimo ang gibati ni apostol Juan. Gusto niyang makigkita sa iyang higala nga si Gayo. (3 Juan 13, 14) Pero nahibalo si Juan nga niadtong panahona, dili pa posible nga magkita sila. Busa gihimo ni Juan kon unsay puwede niyang himoon; iyang gisulatan si Gayo. Kon dili posible nga personal nimong bisitahon ang mga igsoon, puwede nimo silang kontakon sa ubang mga paagi. Kon makig-estorya ka sa mga igsoon, dili na kaayo ka mobatig kamingaw ug mahimo kang mas kalmado. Kon nabalaka ka pag-ayo, pakig-estorya sa mga ansiyano, ug dawata ang ilang pagdasig.—Isa. 32:1, 2. w22.12 17-18 ¶6-7

Gipakita sa Bibliya nga dihay panahon nga gikadenahan ang iyang mga tiil ug gibutangag puthaw nga kadena ang iyang liog. (Sal. 105:17, 18) Busa misamot ka lisod ang kahimtang ni Jose—gikan sa pagkahimong sinaligang ulipon ngadto sa pagkahimong ubos nga piniriso. Nakasulay na ba ka nga misamot hinuon ka lisod ang imong kahimtang bisag puwerte na nimong ampo? Puwede nang mahitabo. Dili ta panalipdan ni Jehova gikan sa tanang pagsulay niining kalibotan nga gimandoan ni Satanas. (1 Juan 5:19) Pero makaseguro ka ani: Nahibalo kaayo si Jehova sa imong kahimtang, ug gimahal ka niya. (Mat. 10:29-31; 1 Ped. 5:6, 7) Nagsaad pod siya: “Dili gyod ka nako biyaan, ug dili gyod ka nako talikdan.” (Heb. 13:5) Tabangan ka ni Jehova nga makalahutay bisag morag wala nay paglaom ang imong kahimtang. w23.01 16 ¶7-8

Ang Bibliya nagpasalig nga dili ta biyaan sa Diyos kon makahimo tag sayop. Ang mga Israelinhon balikbalik nga nakasala kang Jehova, pero dihang sinsero silang naghinulsol, gipasaylo sila sa Diyos. Ang mga Kristohanon pod sa unang siglo nahibalo nga gimahal kaayo sila sa Diyos. Ubos sa paggiya sa Diyos, gidasig ni apostol Pablo ang iyang mga isigkamagtutuo nga ‘pasayloon ug hupayon’ ang lalaki nga naghimog seryosong sala pero naghinulsol. (2 Cor. 2:6, 7; 1 Cor. 5:1-5) Makapalipay gyong mahibaloan nga wala isalikway ni Jehova ang iyang mga magsisimba tungod lang kay nakasala sila. Hinuon tungod sa iyang gugma, iya silang gitabangan, gitul-id, ug gidasig nga mobalik kaniya. Nagsaad siya nga kana poy iyang himoon sa tanang mahinulsolong makasasala karon. (Sant. 4:8-10) Ang Bibliya nagpakita sa kaalam, hustisya, ug gugma sa Diyos. Kini nga basahon nagpamatuod nga gusto ni Jehova nga mailhan nato siya. Gusto niya nga mahimo nato siyang higala. w23.02 7 ¶16-17

Naa tay maayong mga rason nga mainteres kon sa unsang paagi ang mga panghitabo karon nagtuman sa mga tagna sa Bibliya. Pananglitan, si Jesus naghisgot ug espesipikong mga panghitabo nga makatabang nato sa pagkahibalo nga hapit nang matapos ang sistema ni Satanas. (Mat. 24:3-14) Gidasig ta ni apostol Pedro nga hatagag pagtagad ang katumanan sa mga tagna aron magpabiling lig-on ang atong pagtuo. (2 Ped. 1:20, 21) Gusto niya nga mahimo tang balanse dihang magsusi sa mga tagna sa Bibliya. Gidasig ta niya nga ‘maghunahuna kanunay sa presensiya sa adlaw ni Jehova.’ (2 Ped. 3:11-13) Ngano? Dili tungod kay gusto natong mahibaloan kon unsang “adlawa ug orasa” moabot ang Armagedon, kondili aron magamit nato ang nahibiling panahon alang sa “balaang panggawi ug mga buhat nga nagpakitag debosyon sa Diyos.” (Mat. 24:36; Luc. 12:40) Gusto natong magpadayon sa paghimog maayo ug maseguro nga ang atong mga paningkamot sa pag-alagad kang Jehova nagpakita sa atong lawom nga gugma kaniya. Ug aron mahimo na, kinahanglang bantayan nato ang atong kaugalingon. w23.02 16 ¶4, 6

Naay angayng himoon ang “ubang mga karnero” aron makapuyo sa Paraiso. Kinahanglan natong ipakita kon unsa gyoy pagbati nato kang Jesus. Pananglitan, mapakita nato ang atong gugma kaniya pinaagi sa pagsuportar sa iyang dinihogang mga igsoon. Miingon si Jesus nga mao nay basehanan sa iyang paghukom kon kinsay mga karnero. (Mat. 25:31-40) Masuportahan nato sila sa buluhatong pagsangyaw ug paghimog tinun-an. (Mat. 28:18-20) Dili ta kinahanglang maghulat ug Paraiso una ta maningkamot nga mahimong matang sa tawo nga gusto ni Jehova nga papuy-on didto. Karon pa lang, maningkamot na ta nga magmatinud-anon sa atong sinultihan ug binuhatan ug magmabalanse sa atong pagkinabuhi. Ug magmaunongon ta kang Jehova, sa atong kapikas, ug sa mga igsoon. Kon maningkamot ta nga mosunod sa mga sukdanan sa Diyos samtang nagkinabuhi niining daotang kalibotan, mas sayon unya ang atong pagsunod niana sa Paraiso. Maayo pod nga mag-ugmad tag mga skill ug kinaiya nga nagpakita nga nangandam na ta sa pagpuyo didto. w22.12 11-12 ¶14-16

Gimahal nato si Jesus ingong atong Hari kay siya ang pinakakuwalipikado nga magmando nato. Si Jehova mismo ang nagbansay sa iyang Anak ug nagpili niya ingong Hari. (Isa. 50:4, 5) Hunahunaa sab ang gugma ug pagsakripisyo nga gipakita ni Jesus. (Juan 13:1) Kay si Jesus man ang imong Hari, angay lang nga imo siyang higugmaon. Siya miingon nga kadtong tinuod nga nahigugma niya—kadtong gitawag niya nga iyang mga higala—magpakita sa ilang gugma pinaagi sa pagsunod sa iyang mga sugo. (Juan 14:15; 15:14, 15) Pagkadakong pribilehiyo nga mahimong higala sa Anak ni Jehova! Nahibalo ka nga si Jesus mapainubsanon ug gisundog niya pag-ayo ang iyang Amahan. Nakat-onan nimo nga iyang gipakaon ang mga gigutom, gihupay ang mga naluya, ug giayo pa gani ang mga masakiton. (Mat. 14:14-21) Nakita nimo kon giunsa niya paggiya ang iyang kongregasyon karon. (Mat. 23:10) Ug nahibalo ka nga ingong Hari sa Gingharian sa Diyos, mas labaw pa niana ang iyang himoon sa umaabot. Unsaon nimo pagpakita nga gimahal nimo si Jesus? Pinaagi sa pagsundog sa iyang ehemplo. Ang usa sa imong mahimo aron masundog siya mao ang pagpahinungod sa imong kaugalingon kang Jehova ug pagpabawtismo. w23.03 4 ¶8, 10

Gawas pa sa kalangitan, gipuno pod ni Jehova ang yuta ug ang dagat sa daghan kaayong katingalahang butang nga iyang gihimo, ug kining tanan nagtudlo nato bahin kaniya. (Sal. 104:24, 25) Ug hunahunaa lang kon giunsa ta paghimo sa Diyos. Pananglitan, makaapresyar ta sa nindot nga mga butang sa atong palibot. Gipaposible pod niya nga ma-enjoy nato ni tungod sa atong lima ka sentido—makakita ta, makadungog, makahikap, makatilaw, ug makasimhot. Gipakita sa Bibliya ang laing importanteng rason kon nganong angay natong obserbahan ang kalalangan. Kini nagtudlo nato bahin sa mga hiyas ni Jehova. (Roma 1:20) Pananglitan, matikdi ang pagkadisenyo ni Jehova sa mga butang nga iyang gilalang. Dili ba nagpakita ni sa kaalam sa Diyos? Ug hunahunaa ang klaseklaseng pagkaon nga puwede natong matilawan. Pamatuod gyod ni nga gimahal kaayo niya ang mga tawo. Dihang makita nato ang mga hiyas ni Jehova sa mga butang nga iyang gihimo, mas mailhan nato siya ug mas masuod ta kaniya. w23.03 16 ¶4-5

Samtang magkagrabe ang kalibotan, masulayan ang atong pagsalig sa kamatuoran. Impluwensiyahan tingali ta sa mga tawo aron magduhaduha na ta kon tinuod ba ang Bibliya ug kon gigamit ba gyod ni Jehova ang matinumanon ug maalamong ulipon sa paggiya sa iyang katawhan karon. Pero kon kombinsido ta nga tinuod gyod ang Pulong ni Jehova, dili ta magpadala niana. Mahimo tang ‘determinado nga motuman sa mga regulasyon ni Jehova sa tanang panahon, hangtod sa kataposan.’ (Sal. 119:112) Dili ta “maulaw” nga sultihan ang uban bahin sa kamatuoran ug dasigon sila nga sundon kini. (Sal. 119:46) Ug makalahutay ta sa lisod kaayong mga situwasyon, sama sa paglutos, “uban ang pailob ug kalipay.” (Col. 1:11; Sal. 119:143, 157) Ang kamatuoran nakatabang nga mahimo tang kalmado, ug naghatag nig katuyoan ug direksiyon sa atong kinabuhi. Naghatag ni natog paglaom para sa mas maayong kaugmaon ubos sa pagmando sa Gingharian sa Diyos. w23.01 7 ¶16-17

Sa gabii una mamatay si Jesus, migahin siyag taas nga panahon sa pag-ampo para sa iyang mga tinun-an. Iyang gihangyo ang iyang Amahan nga ‘bantayan sila tungod sa usa nga daotan.’ (Juan 17:15) Gihigugma gyod sila ni Jesus! Hapit na siyang makasinatig grabeng pagsulay, pero gihunahuna gihapon niya ang kaayohan sa iyang mga apostoles. Ingong pagsundog kang Jesus, dili lang ang atong panginahanglan ang atong gihunahuna. Kanunay tang nag-ampo para sa mga igsoon. Pinaagi niana, gisunod nato ang sugo ni Jesus nga maghigugmaay, ug gipakita nato kang Jehova nga gihigugma gyod nato ang mga igsoon. Dili usik sa panahon ang pag-ampo para sa mga igsoon. Ang Pulong sa Diyos nag-ingon nga “ang pangamuyo sa tawong matarong dunay gamhanang epekto.” (Sant. 5:16) Ang mga igsoon nanginahanglan sa atong pag-ampo kay nag-atubang silag daghang pagsulay. w22.07 23-24 ¶13-15