Hulyo

Mahigugmaon gyod ang Diyos kay gipaposible niya nga makasulti ta. Pero kini nga regalo sa Diyos wala gamita sa saktong paagi. Si Satanas nga Yawa namakak kang Eva, ug tungod ana ang tawo nakasala ug nahimong dili perpekto. (Gen. 3:1-4) Wala pod gamita ni Adan ang iyang dila sa maayong paagi kay iyang gibasol si Eva—ug bisan si Jehova—sa iyang kaugalingong kasaypanan. (Gen. 3:12) Si Cain namakak kang Jehova human niya patya ang iyang igsoon nga si Abel. (Gen. 4:9) Karon, lisod kaayong mangitag salida nga walay sagol nga daotang sinultihan. Ang mga estudyante makadungog ug pamalikas sa eskuwelahan, ug kadtong nanarbaho makadungog pod ana sa ilang trabahoan. Kon dili ta magbantay, basig maanad na kaayo tang makadungog ug daotang sinultihan ug masundog na nato ni. Siyempre kay Kristohanon man ta, gusto natong mapalipay si Jehova, mao nga dili lang ta basta molikay sa daotang sinultihan. Gusto pod natong gamiton kining nindot nga regalo ni Jehova sa maayong paagi—ang pagdayeg sa atong Diyos. w22.04 4-5 ¶1-3

Si Jesus balanseg panghunahuna sa materyal nga mga butang. Ganahan siyang mokaon ug moinom. (Luc. 19:2, 6, 7) Kas-a, naghimo siyag maayo kaayong klase nga bino—ang una niyang milagro. (Juan 2:10, 11) Ug sa adlaw nga namatay siya, mahalon nga sinina ang iyang gisul-ob. (Juan 19:23, 24) Pero si Jesus wala magpokus sa materyal nga mga butang. Si Jesus miingon nga kon unahon nato pagpangita ang Gingharian, paneguroon ni Jehova nga mabatonan nato ang atong gikinahanglan. (Mat. 6:31-33) Daghan ang nakabenepisyo sa pagpadapat sa kaalam nga gikan sa Diyos kon bahin sa kuwarta. Konsideraha ang eksperyensiya ni Daniel, nga usa ka ulitawo. Siya miingon: “Tin-edyer pa lang ko, midesisyon na ko nga magpokus sa espirituwal nga mga buluhaton.” Kay simple ang kinabuhi ni Daniel, nagamit niya ang iyang panahon ug skill sa daghang proyekto sa organisasyon. Siya midugang: “Di gyod kabayran ug kuwarta ang mga panalangin ni Jehova.” w22.05 21-22 ¶6-7

Mapakita nato nga gimahal nato ang kamatuoran kon regular natong tun-an ang Bibliya ug ang atong mga publikasyon. Bisag unsa na ta ka dugay sa kamatuoran, daghan pa tag angayng kat-onan. Ang pagtuon nagkinahanglag paningkamot, pero dili gyod ka magmahay sa resulta. Ang uban nato dili ganahang magbasa ug magtuon. Pero gidasig ta ni Jehova nga ‘padayong mangita’ aron mas masabtan nato ang kamatuoran. (Prov. 2:4-6) Kon maningkamot ta, makabenepisyo gyod ta. Kon bahin sa personal nga pagbasa sa Bibliya, si Corey miingon nga magpokus siya sa usa ka teksto. Siya miingon: “Basahon nako ang tanang footnote ug cross-reference ug mag-research kog dugang. . . . Daghan kaayo kog nakat-onan niini nga paagi sa pagtuon!” Bisag unsa pang paagi ang atong gamiton, mapakita nato nga atong gimahal ang kamatuoran kon mogahin tag panahon ug maningkamot sa pagtuon niini.—Sal. 1:1-3. w22.08 17 ¶13; 18 ¶15-16

Dihang dinhi si Jesus sa yuta, gigamit niya ang kalalangan aron tudloan ang iyang mga tinun-an bahin sa iyang Amahan. Konsideraha ang usa sa mga leksiyon nga iyang gitudlo. Si Jehova nagpakitag gugma sa tanang tawo. Sa Wali sa Bukid, gipasiugda ni Jesus sa iyang mga tinun-an ang duha ka butang nga gibalewala ra sa daghang tawo: ang adlaw ug ulan. Pareho ning gikinahanglan aron padayon tang mabuhi. Kon buot hunahunaon, puwede ra nga dili ni ihatag ni Jehova sa mga wala mag-alagad niya. Pero mahigugmaon niyang gihatag ang adlaw ug ulan para sa tanan. (Mat. 5:43-45) Gihisgotan kini ni Jesus aron tudloan ang iyang mga tinun-an nga gusto ni Jehova nga pakitaan natog gugma ang tanang tawo. Dihang makita nato ang nindot nga pagsalop sa adlaw o ma-enjoy ang makarepreskong ulan, mapahinumdoman ta sa gugma ni Jehova sa tanang tawo. Ang iyang ehemplo magpalihok nato nga ipakita ang maong gugma pinaagi sa pagsangyaw sa tanan. w23.03 17 ¶9-10

Nganong natingala pag-ayo si apostol Juan? Nakakita siyag babaye nga nagsakay sa hayag-pula nga pintas nga mananap. Gihisgotan siya ingong “bantogang pampam” ug gitawag nga “Bantogang Babilonya.” Naghimo siyag “seksuwal nga imoralidad” sa “mga hari sa yuta.” (Pin. 17:1-5) Unsa ang “Bantogang Babilonya”? Kini nga babaye wala magsimbolo sa politikal nga organisasyon kay ang Pinadayag nag-ingon nga naghimo siyag imoralidad sa mga lider sa politika sa kalibotan. (Pin. 18:9) Gani, naningkamot siya sa pagkontrol niini nga mga magmamando, sa ato pa, siya nagsakay nila sa simbolikong paagi. Wala pod siya magsimbolo sa hakog nga sistema sa negosyo sa kalibotan ni Satanas, kay ang maong sistema sa negosyo gihisgotan sa Pinadayag ingong “mga negosyante sa yuta.” (Pin. 18:11, 15, 16) Ang karaang Babilonya maoy sentro sa bakak nga pagsimba. Busa ang Bantogang Babilonya nagsimbolo sa tanang klase sa bakak nga pagsimba. Sa pagkatinuod, nagsimbolo siya sa tibuok kalibotang imperyo sa bakak nga relihiyon.—Pin. 17:5, 18. w22.05 11 ¶14-16

Natural lang nga usahay ang inahan maghunahuna kon ang iyang anak moalagad ba kang Jehova. Nahibalo man god ang mga ginikanan kon giunsa pagpresyur sa kalibotan ni Satanas ang ilang mga anak. Dugang pa, daghang inahan ang nalisdan sa pagpadako sa ilang mga anak kay wala silay bana o kaha ang ilang bana dili alagad ni Jehova. Pero dili lang ang mga ginikanan kansang kapikas dili Saksi ang nalisdan sa pagpadako sa ilang mga anak. Bisag parehas nga Saksi ang ginikanan, dili gihapon sayon ang pagtabang sa mga anak nga mahimong alagad ni Jehova. Bisan asa ka niining duha ka kahimtang, ayaw kaayo kabalaka. Tabangan ka ni Jehova. Puwede kang mangayog ideya sa eksperyensiyadong mga ginikanan kon unsaon paggamit ang mga tool nga mabatonan alang sa pamilyahanong pagsimba. (Prov. 11:14) Tabangan pod ka ni Jehova sa pagpakig-estorya sa imong mga anak. Hangyoa siya nga tabangan kang mahibaloan kon unsay naa sa ilang hunahuna ug kasingkasing.—Prov. 20:5. w22.04 17 ¶4, 7; 18 ¶9

Molalom ang atong gugma kang Jehova dihang mas mailhan nato ang iyang Anak, nga hingpit nga nagsundog sa personalidad sa iyang Amahan. (Heb. 1:3) Ang kinamaayohang paagi nga mailhan nato si Jesus mao ang pagtuon sa upat ka Ebanghelyo. Kon wa pa nimo mabatasan ang pagbasag Bibliya kada adlaw, puwede nimo ning sugdan karon pinaagi sa pagbasa sa mga asoy bahin kang Jesus. Samtang magbasa ka, matikdi pag-ayo ang iyang mga hiyas. Sayon siyang duolon; iyang gikugos ang mga bata. (Mar. 10:13-16) Buotan siya, maong dili magkinto ang iyang mga tinun-an. Dili sila mahadlok nga mosulti kaniya sa ilang gihunahuna. (Mat. 16:22) Kini nga mga hiyas gisundog ni Jesus sa iyang langitnong Amahan. Si Jehova dali pod kaayong duolon. Makaampo ta niya. Puwede natong isulti kaniya ang tanan. Makasalig ta nga dili ta niya hukman. Iya tang gimahal, ug naghunahuna siya sa atong kaayohan.—1 Ped. 5:7. w22.08 3 ¶4-5

Ingong atong Maglalalang, si Jehova nahibalo sa tanan bahin nato. Hunahunaa ra! Nahibalo siya sa tanang detalye sa kada tawo dinhi sa yuta. (Sal. 139:15-17) Busa nasayod siya sa tanang pagkadili-hingpit nga nakuha nato sa atong ginikanan. Nahibalo pod siya sa tanang nahitabo sa atong kinabuhi nga maoy nakaimpluwensiya kon unsa tang klaseha sa tawo. Kay si Jehova nakaila pag-ayo sa mga tawo, unsa may iyang himoon? Iya gyod tang pakitaan ug kaluoy. (Sal. 78:39; 103:13, 14) Gipamatud-an ni Jehova nga gusto gyod niyang mopasaylo. Nakasabot siya nga tungod sa gihimo sa unang tawo nga si Adan, kitang tanan nailalom sa tunglo sa sala ug kamatayon. (Roma 5:12) Wala gyod tay mahimo aron makalingkawas ta ug ang uban gikan niini nga tunglo. (Sal. 49:7-9) Pero gikaluy-an ta sa atong mahigugmaong Diyos ug naa siyay gihimo aron makalingkawas ta. Sumala sa Juan 3:16, gipadala ni Jehova ang iyang bugtong Anak aron mamatay para nato.—Mat. 20:28; Roma 5:19. w22.06 3 ¶5-6

Kadtong magpasaylo pasayloon. Klaro ning gipakita ni Jehova sa iyang sugo kang Job, nga iyang alagad. Kining matinumanon nga tawo nasakitan pag-ayo sa giingon sa tulo ka lalaki nga si Elipaz, Bildad, ug Zopar. Gisugo ni Jehova si Job nga iampo sila. Dihang gihimo na ni Job, gipanalanginan siya ni Jehova. (Job 42:8-10) Ang paghambin ug kasuko makadaot. Ang kasuko bug-at pas-anon, maong gusto ni Jehova nga ato ning buhian aron mogaan ang atong pamati. (Efe. 4:31, 32) Gidasig ta niya nga ‘isalikway ang kasuko ug biyaan ang kapungot.’ (Sal. 37:8) Makahatag ug kaayohan ang pagsunod ani nga tambag. Kon dili nato wad-on ang kasuko, makadaot ni nato sa pisikal ug mental. (Prov. 14:30) Ang paghambin ug kasuko samag pag-inom ug hilo; kitay madaot, dili ang tawo nga nakapasakit nato. Pero kon pasayloon nato ang uban, naghimo tag maayo para sa atong kaugalingon. Naa tay kalinaw sa hunahuna ug kasingkasing, ug makapadayon ta sa pag-alagad kang Jehova. w22.06 10 ¶9-10

Ang atong paglaom samag helmet nga manalipod sa atong hunahuna ug motabang nato nga dili magpatuyang sa atong kinabuhi, nga makadaot sa atong relasyon kang Jehova. (1 Cor. 15:33, 34) Ang atong helmet sa paglaom manalipod sab nato batok sa panghunahuna nga dili gyod nato mapalipay si Jehova. Hinumdomi nga ingon ana pod ang panghunahuna sa dili tinuod nga maghuhupay ni Job nga si Elipaz. Siya miingon kang Job: “Kinsa bay tawo nga putli?” Ug bahin sa Diyos, siya miingon: “Wala gani siyay pagsalig sa iyang mga balaan, ug bisan ang kalangitan dili hinlo sa iyang mga mata.” (Job 15:14, 15) Pagkadakong bakak! Hinumdomi nga panghunahuna kana ni Satanas. Nahibalo siya nga kon mao nay pirme nimong hunahunaon, mohanap ang imong paglaom. Busa ayaw tuohi ang maong mga bakak. Ayaw gyod pagduhaduha nga gusto ni Jehova nga mabuhi ka hangtod sa hangtod ug nga tabangan ka niya nga makab-ot nâ.—1 Tim. 2:3, 4. w22.10 25-26 ¶8-10

Gusto ni Satanas nga patuohon si Job nga nag-antos siya kay nasuko si Jehova kaniya. Pananglitan, gipahuros ni Satanas ang kusog nga hangin aron mahagsa ang balay diin nangaon ang tanang 10 ka anak ni Job. (Job 1:18, 19) Nagpakanaog sab siyag kalayo gikan sa langit ug gisunog ang mga karnero ni Job ug ang mga sulugoon nga nag-atiman niini. (Job 1:16) Kay ang hangin ug kalayo naggikan sa langit, nagtuo si Job nga si Jehova nga Diyos ang hinungdan niini. Tungod ana, naghunahuna si Job nga basig napasuko niya si Jehova. Bisan pa niana, wala gyod tungloha ni Job ang iyang langitnong Amahan. Miingon si Job nga sulod sa taas na nga panahon, daghan siyag nadawat nga maayo gikan kang Jehova. Naghunahuna siya nga kon iyang gidawat ang maayo, kinahanglan nga andam sab siyang modawat sa dili maayo. Busa siya miingon: “Padayong dayegon ang ngalan ni Jehova.”—Job 1:20, 21. w22.06 21 ¶7

Si Jesus mihatag ug susamang pasidaan sa iyang mga tinun-an diha sa Juan 17:14. Nakita gyod nato ang katumanan niana nga tagna ilabina sa milabayng 100 ka tuig. Sa unsang paagi nâ natuman? Human si Jesus mahimong Hari niadtong 1914, si Satanas gitambog sa yuta, nga naghulat sa iyang kalaglagan. (Pin. 12:9, 12) Pero wala lang siya basta maghulat nga walay ginahimo. Si Satanas desperado ug naglungotlungot sa kasuko, ug iya ning gipahungaw sa katawhan sa Diyos. (Pin. 12:13, 17) Tungod ana, migrabe ang pagdumot sa kalibotan ngadto sa katawhan sa Diyos. Pero dili ta angayng mahadlok kang Satanas ug sa iyang mga sakop. Hinuon masaligon ta sama kang apostol Pablo, kinsa misulat: “Kon ang Diyos dapig nato, kinsay makadaog batok kanato?” (Roma 8:31) Bug-os tang makasalig kang Jehova. w22.07 18 ¶14-15

Wala mabalaka si Jesus nga kulang unya ang mga magsasangyaw sa hinapos sa sistema sa mga butang. Nahibalo siya nga matuman ang giingon sa salmista: “Ang imong katawhan kinabubut-ong magtanyag sa ilang kaugalingon sa adlaw nga tigomon nimo ang imong kasundalohan.” (Sal. 110:3) Kon nakigbahin ka sa buluhatong pagsangyaw, imong gisuportaran si Jesus ug ang matinumanong ulipon ug apil ka sa katumanan sa maong tagna. Ang buluhaton nagpadayon, pero naay mga babag. Usa ka babag sa atong pagsangyaw mao ang pagsupak. Tungod sa ginasulti sa mga apostata, mga lider sa relihiyon, ug mga politiko, daghan ang dunay sayop nga ideya bahin sa atong buluhaton. Kon ang atong mga paryente, kaila, ug mga katrabaho motuo sa maong sayop nga impormasyon, basig presyuron ta nila nga mohunong sa pag-alagad kang Jehova ug sa pagsangyaw. Sa ubang nasod, ang atong mga igsoon gihulga, giatake, giaresto, ug gipriso pa gani. w22.07 8 ¶1; 9 ¶5-6

Gidahom ni Jehova nga maggahin tag panahon para sa regular nga pagtuon sa Bibliya ug sa pagpamalandong sa atong gibasa. Dihang ipadapat nato ang atong nakat-onan, mas molig-on ang atong pagtuo ug mas masuod ta sa atong langitnong Amahan. Tungod niana, mas determinado tang molahutay sa mga pagsulay. Hatagan sab ni Jehova ug balaang espiritu kadtong nagasalig sa iyang Pulong. Ug ang maong espiritu makahatag natog “gahom nga labaw sa kasarangan” aron malahutay ang bisan unsang pagsulay. (2 Cor. 4:7-10) Sa tabang ni Jehova, ang “matinumanon ug maalamong ulipon” naghimog daghang artikulo, video, ug musika nga makatabang aron molig-on ang atong pagtuo ug makapabilin tang suod kang Jehova. (Mat. 24:45) Gibansay ni Jehova ang iyang katawhan sa pagpakitag gugma ug sa paghupay sa usag usa sa lisod nga mga panahon. (2 Cor. 1:3, 4; 1 Tes. 4:9) Ang mga igsoon andam nga motabang aron magpabilin tang maunongon bisan sa mga kalisdanan. w22.08 12 ¶12-14

Kon isulti nato ang maayong mga hiyas sa atong mga igsoon, makatabang ni nga mas magkasuod ug maghigugmaay ang mga igsoon, nga makapalig-on sa kongregasyon. Usahay, bisan ang hamtong nga mga Kristohanon dili magkauyon o maglalis pa gani. Nahitabo na kang apostol Pablo ug sa iyang suod nga higala nga si Bernabe. Wala sila magkauyon kon paubanon ba nila si Marcos sa sunod nilang misyonaryong panaw. “Naglalis sila pag-ayo” maong wala na sila mag-uban. (Buh. 15:37-39) Pero gipaningkamotan ni Pablo, Bernabe, ug Marcos nga mabalik ang ilang maayong relasyon. Sa ulahi, si Pablo misultig maayong mga butang bahin kang Bernabe ug Marcos. (1 Cor. 9:6; Col. 4:10) Kon naay mga igsoon nga wala nato ikasinabot, kinahanglang maningkamot ta nga husayon ang problema ug dayon magpokus sa ilang maayong mga hiyas. Nianang paagiha, mamentinar nato ang kalinaw ug panaghiusa. w22.08 23 ¶10-11

Samtang naningkamot ta sa pagkinabuhi uyon sa matarong nga mga sukdanan ni Jehova, angay natong likayan nga hukman ang uban ug maghunahuna nga mas matarong ta kay kanila. Angay natong hinumdoman nga si Jehova ang “Maghuhukom sa tibuok yuta.” (Gen. 18:25) Wala ta hatagi ni Jehova ug katungod sa paghukom. Konsideraha ang pananglitan sa matarong nga si Jose. Wala niya hukmi ang uban, bisan kadtong mihimo niyag daotan. Gibuhatan siyag dili maayo sa iya mismong mga igsoon, gibaligya siya ingong ulipon, ug gipatuo nila ang ilang amahan nga patay na siya. Pipila ka tuig sa ulahi, si Jose ug ang iyang pamilya nagkita pag-usab. Niadtong panahona, si Jose usa na ka gamhanang magmamando, ug puwede untang hukman niya ang iyang mga igsoon ug manimalos kanila. Nahadlok ang mga igsoon ni Jose nga basig baslan niya sila bisan pag nagbasol sila sa ilang gihimo. Pero gipasaligan sila ni Jose: “Ayaw mog kahadlok. Diyos ba ko nga maghukom ninyo?” (Gen. 37:18-20, 27, 28, 31-35; 50:15-21) Mapainubsanong giila ni Jose nga si Jehova lang ang may katungod sa paghukom. w22.08 30 ¶18-19

Nahibalo ba ka nga puwede kang gamiton ni Jehova aron tubagon ang kinasingkasing nga pag-ampo sa uban? Puwede ka niyang gamiton ansiyano man ka, ministeryal nga alagad, payunir, o magmamantala. Gamiton pod ka niya bata man ka o tigulang, brader man ka o sister. Dihang ang alagad ni Jehova mangayo niyag tabang, sagad gamiton sa atong Diyos ang mga ansiyano ug ubang matinumanong mga alagad sa ‘paghupay pag-ayo’ sa igsoon. (Col. 4:11) Pribilehiyo gyod nga makaalagad kang Jehova ug sa mga igsoon nianang paagiha! Makatabang ta dihang dunay sakit nga mokaylap, kalamidad, o paglutos. Gusto tingali natong tabangan ang uban, pero lisod nâ kon ang ato mismong pamilya nanginahanglag tabang. Bisan pa niana, maningkamot tang tabangan ang mga igsoon, ug malipay si Jehova kon himoon nato ang atong maarangan para nila.—Prov. 19:17. w22.12 22 ¶1-2

Gugma ang pundasyon sa pagsalig. Si Jesus miingon nga ang duha ka kinalabwang sugo mao ang paghigugma kang Jehova ug paghigugma sa atong isigkatawo. (Mat. 22:37-39) Kay gihigugma nato si Jehova, gusto natong sundogon ang iyang hingpit nga ehemplo sa pagkakasaligan. Pananglitan, tungod sa atong gugma sa mga igsoon, dili nato isulti sa uban ang impormasyon bahin sa ilang pribadong kinabuhi. Dili gyod nato gusto nga madaot, maulawan, o masakitan sila. Ang pagkamapaubsanon makatabang pod nato nga mahimong kasaligan. Ang mapainubsanong Kristohanon dili magpabilib nga siyay unang nakasulti sa uban bahin sa usa ka impormasyon. (Filip. 2:3) Dili niya ipakita nga morag naa siyay nahibaloan nga dili niya angayng isulti. Kon mapainubsanon ta, dili ta magpakaylap sa atong mga opinyon bahin sa mga butang nga wala hisgoti sa Bibliya o sa atong mga publikasyon. w22.09 12 ¶12-13

Giingnan sa usa ka anghel si Daniel nga ang mga tagna sa basahon ni Daniel mas masabtan sa katawhan sa Diyos, pero “wala gayoy daotan nga makasabot.” (Dan. 12:10) Panahon na karon nga pamatud-an nato nga dili ta apil sa mga daotan. (Mal. 3:16-18) Ginatigom ni Jehova kadtong giisip niya nga “espesyal nga katigayonan,” o kadtong mga bililhon kaniya. Seguradong gusto nato nga apil ta nila. Nagkinabuhi gyod ta sa eksayting nga panahon. Pero daghan pang nindot nga mga butang ang hapit nang mahitabo. Hapit na natong makita nga malaglag ang tanang daotan. Dayon makita nato ang katumanan sa saad ni Jehova kang Daniel: “Motindog ka aron modawat sa imong bahin sa kataposan sa mga adlaw.” (Dan. 12:13) Nangandoy ba ka sa panahon nga si Daniel ug ang imong mga minahal “motindog” pag-usab? Kon mao, buhata ang tanan nimong maarangan karon nga magmatinumanon, ug makaseguro ka nga dili papason ni Jehova ang imong ngalan sa iyang basahon sa kinabuhi. w22.09 24 ¶17; 25 ¶19-20

Kining mga pulonga seguradong nakapalig-on kang Ezequiel. Ngano? Walay duhaduha nga nahinumdoman niya nga ingon ini ang giingon ni Jehova kang Moises ug Isaias dihang Iyang gipili sila ingong Iyang mga propeta. (Ex. 3:10; Isa. 6:8) Nahibalo sab si Ezequiel kon giunsa pagtabang ni Jehova ang maong mga propeta nga molampos sa ilang lisod nga asaynment. Busa dihang kaduha giingnan ni Jehova si Ezequiel: “Ipadala ka nako,” nakapalig-on to sa pagsalig sa propeta nga tabangan siya ni Jehova. Dugang pa, kadaghan misulat si Ezequiel: “Nakadawat kog mensahe gikan kang Jehova.” (Ezeq. 3:16) Balikbalik sab siyang misulat: “Nakadawat ko pag-usab ug mensahe gikan kang Jehova.” (Ezeq. 6:1) Seguradong kombinsido si Ezequiel nga gipadala siya ni Jehova. Ug kay si Ezequiel anak sa usa ka saserdote, posibleng gitudloan siya sa iyang amahan nga kanunayng gipasaligan ni Jehova ang Iyang mga propeta nga Iya silang tabangan. Pananglitan, gipasaligan ni Jehova si Isaac, Jacob, ug Jeremias nga Siya nagauban kanila.—Gen. 26:24; 28:15; Jer. 1:8. w22.11 2 ¶3

Bisan pag nakasala si Adan ug Eva, nga miresultag kamatayon sa ilang mga anak, wala usba ni Jehova ang iyang katuyoan. (Isa. 55:11) Katuyoan gihapon niya nga ang matinumanong mga tawo mabuhi hangtod sa hangtod. Konsideraha ang gisulti ug gihimo ni Jehova aron matuman ang iyang katuyoan. Si Jehova nagsaad nga iyang banhawon ang mga patay ug hatagan silag kahigayonan nga mabuhi hangtod sa hangtod. (Buh. 24:15; Tito 1:1, 2) Ang matinumanong si Job segurado nga si Jehova nangandoy sa pagbanhaw sa mga patay. (Job 14:14, 15) Si propetang Daniel nahibalo nga ang mga tawo may paglaom nga banhawon ug hatagag kahigayonan nga mabuhi hangtod sa hangtod. (Sal. 37:29; Dan. 12:2, 13) Ang mga Hudiyo sa panahon ni Jesus nahibalo sab nga hatagan ni Jehova ang iyang matinumanong mga alagad ug “kinabuhing walay kataposan.” (Luc. 10:25; 18:18) Si Jesus kadaghan naghisgot niini nga saad, ug siya mismo gibanhaw sa iyang Amahan.—Mat. 19:29; 22:31, 32; Luc. 18:30; Juan 11:25. w22.12 4-5 ¶8-9

Gidapit ta ni Jehova nga makigsuod kaniya. (Sant. 4:8) Gusto niya nga mahimo nato siyang atong Diyos, Amahan, ug Higala. Iyang ginatubag ang atong mga pag-ampo ug ginatabangan ta panahon sa kalisdanan. Ug iyang gigamit ang iyang organisasyon aron tudloan ug panalipdan ta. Masuod ta kang Jehova pinaagi sa pag-ampo ug sa pagbasa ug pagpamalandong sa iyang Pulong. Kon himoon nato nâ, molalom ang atong gugma ug apresasyon kaniya. Madasig ta nga magmasinugtanon kang Jehova ug ihatag ang pagdayeg nga angay gyod kaniya. (Pin. 4:11) Kon mas mailhan nato si Jehova, mas mosalig ta niya ug sa organisasyon nga iyang gigamit sa pagtabang nato. Pero ang Yawa naningkamot nga anam-anam nga mawala ang atong pagsalig kang Jehova ug sa iyang organisasyon. Bisan pa niana, masuklan nato ang iyang mga paagi. Kon lig-on ang atong pagtuo ug pagsalig kang Jehova, dili nato biyaan ang atong Diyos ug ang iyang organisasyon.—Sal. 31:13, 14. w22.11 14 ¶1-3

Daghang tinuod nga mga Kristohanon ang nagpameligro sa ilang kagawasan ug bisan sa ilang kinabuhi kay gihigugma nila si Jehova ingong ilang Soberanong Magmamando. Gihuptan nila ang ilang integridad, ug parehas silag determinasyon sa tulo ka Hebreohanon nga giluwas gikan sa nagdilaab nga hudno tungod sa ilang pagpabiling matinumanon sa Supremong Diyos. Ang salmistang si David misulat kon nganong importante ang paghupot ug integridad sa Diyos: “Si Jehova magpakanaog ug paghukom sa katawhan. Hukmi ako, Oh Jehova, sumala sa akong pagkamatarong ug sumala sa akong integridad.” (Sal. 7:8) Si David misulat pod: “Hinaot nga ang integridad ug pagkamatarong magpanalipod kanako.” (Sal. 25:21) Ang kinamaayohang paagi sa pagkinabuhi mao ang pagpabiling matinumanon ug maunongon kang Jehova! Nianang paagiha, bation nato ang gibati sa salmista: “Malipayon kadtong naghupot ug integridad . . . , nga naglakaw sa balaod ni Jehova.”—Sal. 119:1, footnote. w22.10 17 ¶18-19

Daghan nag nakaestorya si Job sa tibuok niyang kinabuhi. Pero seguradong dili niya malimtan ang ilang panag-estoryahay ni Jehova nga Diyos. Aron molig-on ang pagsalig ni Job nga maalamon gyod si Jehova ug nga kaya gyod Niyang atimanon ang Iyang mga alagad, gipasiugda ni Jehova ang pipila ka talagsaong bahin sa kalalangan. Pananglitan, napahinumdoman si Job nga kon gitagan-an sa Diyos ang mga hayop, kaya pod Niyang atimanon si Job. (Job 38:39-41; 39:1, 5, 13-16) Pinaagi sa pagpamalandong sa kalalangan, daghag nakat-onan si Job bahin sa mga hiyas sa iyang Diyos. Daghan pod tag makat-onan bahin sa atong Diyos kon maniid ta sa mga butang nga iyang gilalang. Pero usahay lisod nang buhaton. Kon nagpuyo ta sa siyudad, gamay ra tingali ang atong makita sa iyang kalalangan kada adlaw. Ug bisan pag nagpuyo ta sa probinsiya diin daghan pag lainlaing hayop ug kahoy, basin wala kaayo tay panahon nga obserbahan kana. Pero maayo nga mogahin tag panahon ug maningkamot nga obserbahan ang kalalangan. w23.03 15 ¶1-2

Si Jesus miingon nga mahitabo ang “dagkong linog” ug ubang kalamidad sa dili pa moabot ang kataposan. (Luc. 21:11) Miingon pod siya nga ‘mograbe ang kalapasan,’ sama sa krimen, kapintasan, ug terorismo. (Mat. 24:12) Wala gyod moingon si Jesus nga kon makasinati tag kalamidad, tungod nâ kay gipasagdan ta ni Jehova. Gani, daghang matinumanong mga alagad ni Jehova ang nakaeksperyensiya niana. (Isa. 57:1; 2 Cor. 11:25) Tingali dili ta milagrosong panalipdan ni Jehova sa tanang kalamidad, pero hatagan ta niya sa atong gikinahanglan aron magpabilin tang kalmado ug malinawon. Mas sayon ni kon nakapangandam ta daan. Pero ang pagpangandam ba nagpasabot nga kulang tag pagtuo kang Jehova? Wala. Gani, ang pagpangandam nagpakita nga naa tay pagsalig nga iya tang atimanon. Sa unsang paagi? Ang Pulong sa Diyos nagtambag nato nga mangandam sa mga kalamidad. w22.12 18 ¶9-10

Samtang napriso si Jose, gipadamgo ni Jehova ang hari sa Ehipto. Naay duha ka damgo ang Paraon nga nakapatugaw gyod niya. Pagkahibalo sa hari nga makahubad si Jose ug mga damgo, iya siyang gipatawag. Sa tabang ni Jehova, nahubad ni Jose ang mga damgo ug mibilib ang Paraon sa praktikal nga tambag nga iyang gihatag. Nakita sa Paraon nga si Jehova nag-uban kang Jose, maong iyang gitudlo si Jose ingong tigdumala sa pagkaon sa tibuok Ehipto. (Gen. 41:38, 41-44) Sa ulahi, naay nahitabong grabeng gutom dili lang sa Ehipto kondili sa Canaan pod, diin nagpuyo ang pamilya ni Jose. Busa niining panahona, naa nay mahimo si Jose aron maluwas ang iyang pamilya ug maprotektahan ang linya sa kaliwat nga padulong sa Mesiyas. Klaro kaayo nga si Jehova ang nagpalampos sa tanang gibuhat ni Jose. Bisag daotan kaayo ang gihimo sa mga igsoon ni Jose, gibali ni Jehova ang kahimtang aron matuman ang Iyang kabubut-on. w23.01 17 ¶11-12

Ang tawo nga nagbantay sa iyang kaugalingon alerto sa bisan unsa nga makadaot sa iyang relasyon kang Jehova, ug maningkamot siya nga likayan na. Nianang paagiha, makapabilin siya sa gugma sa Diyos. (Prov. 22:3; Jud. 20, 21) Gitambagan ni apostol Pablo ang mga Kristohanon nga bantayan ang ilang kaugalingon. Pananglitan, iyang giingnan ang mga Kristohanon sa Efeso: “Pagbantay pag-ayo nga ang inyong paggawi dili sama sa dili maalamon kondili sa maalamong mga tawo.” (Efe. 5:15, 16) Kanunayng naningkamot si Satanas nga daoton ang atong relasyon kang Jehova. Kanay rason nga ang Bibliya nagtambag nato nga ‘padayong sabton kon unsa ang kabubut-on ni Jehova’ aron maprotektahan nato ang atong kaugalingon sa bisan unsang taktika ni Satanas. (Efe. 5:17) Aron makahimog maalamong desisyon, kinahanglan natong masabtan “ang kabubut-on ni Jehova.” Mahimo nato na pinaagi sa regular nga pagtuon ug pagpamalandong sa Pulong sa Diyos. Kon masabtan nato ang kabubut-on ni Jehova ug maugmad ang “panghunahuna sa Kristo,” makahimo tag maalamong mga desisyon bisan dihang walay espesipikong mga balaod nga mogiya nato.—1 Cor. 2:14-16. w23.02 16-17 ¶7-9

Pirme ba kang manglimpiyo sa balay? Tingali sa wala pa nimo ni puy-i, imo gyod ning gilimpiyohag maayo. Pero unsay mahitabo kon di na nimo ni hinloan? Siyempre, mobaga ang abog ug magtipun-og ang hugaw. Aron pirmeng hapsay ang imong balay, kinahanglang pirme pod kang manghinlo. Ingon ana pod ang kinahanglang himoon kon bahin sa atong panghunahuna ug personalidad. Siyempre sa wala pa ta mabawtismohi, naningkamot ta sa paghimog mga kausaban aron ‘mahinloan nato ang atong kaugalingon sa tanang kahugawan sa unod ug espiritu.’ (2 Cor. 7:1) Pero karon, kinahanglan natong sundon ang tambag ni apostol Pablo nga ‘padayong magbag-o.’ (Efe. 4:23) Ang impluwensiya niining kalibotana dali rang makapahugaw nato atubangan ni Jehova. Aron dili na mahitabo ug pirme tang hinlo sa iyang atubangan, kinahanglang pirme natong susihon ang atong panghunahuna, personalidad, ug mga tinguha. w23.01 8 ¶1-2

Imadyina nga naminaw ka samtang nanudlo si Jesus. Pirme siyang mokutlo sa Balaang Kasulatan. Dihang gibawtismohan siya ug gidihogan sa balaang espiritu, klaro nga nahinumdoman niya ang iyang kinabuhi didto sa langit sa wala pa siya mahimong tawo. Sa narekord nga unang mga pulong ni Jesus human sa iyang bawtismo ug ang kataposan niyang gisulti una siya mamatay, siya nagkutlo sa Kasulatan. (Deut. 8:3; Sal. 31:5; Luc. 4:4; 23:46) Ug sulod sa tulo ug tunga ka tuig sukad siya nabawtismohan hangtod nga namatay siya, si Jesus kanunay nga nagbasa, nagkutlo, ug nagpatin-aw sa Kasulatan diha sa publiko. (Mat. 5:17, 18, 21, 22, 27, 28; Luc. 4:16-20) Katuigan sa wala pa sugdi ni Jesus ang iyang ministeryo, pirme siyang magbasa ug maminaw sa Pulong sa Diyos. Sa balay, seguradong madunggan niya si Maria ug Jose nga mikutlo gikan sa Kasulatan. (Deut. 6:6, 7) Dugang pa, si Jesus miadto sa sinagoga kada Igpapahulay uban sa iyang pamilya. (Luc. 4:16) Didto, naminaw siya pag-ayo samtang gibasa ang Kasulatan. w23.02 8 ¶1-2

Daghan kaayog rason nga higugmaon si Jehova. Pananglitan, nahibaloan nimo nga siya “ang tuboran sa kinabuhi” ug siya ang naghatag sa “matag maayong gasa ug matag hingpit nga regalo.” (Sal. 36:9; Sant. 1:17) Ang matag maayong butang nga imong napahimuslan naggikan sa atong mahinatagon ug mahigugmaong Diyos. Ang lukat maoy espesyal kaayo nga regalo ni Jehova kanato. Nganong makaingon ta ana? Hunahunaa kon unsa ka suod si Jehova ug ang iyang Anak. Si Jesus miingon: “Gihigugma ko sa Amahan” ug “gihigugma nako ang Amahan.” (Juan 10:17; 14:31) Suod kaayo sila kay magkauban sila sulod na sa bilyonbilyong katuigan. (Prov. 8:22, 23, 30) Imadyina kon unsa ka sakit para sa Diyos nga tugotan ang iyang Anak nga mag-antos ug mamatay. Gimahal kaayo ni Jehova ang mga tawo—apil ka—mao nga gihatag niya ang iyang pinalanggang Anak ingong halad lukat aron ikaw ug ang uban mabuhi hangtod sa hangtod. (Juan 3:16; Gal. 2:20) Kini ang pinakadakong rason nga gihigugma nato ang Diyos. w23.03 4-5 ¶11-13

Likayan gyod nato ang ginatudlo sa mga apostata. Gibadlong ni Jesus ang ubang Kristohanon sa Pergamo kay naa silay ginahimo nga nakapabahinbahin sa mga igsoon. (Pin. 2:14-16) Iyang gikomendahan ang mga taga-Tiatira kay ilang gilikayan ang “lawom nga mga butang ni Satanas,” ug iyang gidasig sila nga ‘panguptan pag-ayo’ ang kamatuoran. (Pin. 2:24-26) Ang mga Kristohanon didto nga luya sa espirituwal ug misunod na sa bakak nga mga pagtulon-an kinahanglang maghinulsol. Komosta pod sa atong bahin? Kinahanglan natong likayan ang bisan unsang pagtulon-an nga supak sa panghunahuna ni Jehova. Ang mga apostata “diyosnon tan-awon pero dili diyosnon ug binuhatan.” (2 Tim. 3:5) Mas daling mailhan ug malikayan ang bakak nga mga pagtulon-an kon kugihan tang magtuon sa Pulong sa Diyos. (2 Tim. 3:14-17; Jud. 3, 4) Kinahanglan natong seguroon nga ang atong pagsimba dalawaton kang Jehova. Kon naa tay ginahimo nga tungod ana dili dawaton ni Jehova ang atong pagsimba, kinahanglang mohimo dayon tag kausaban aron iya tang uyonan.—Pin. 2:5, 16; 3:3, 16. w22.05 4 ¶9; 5 ¶11