Agosto

Unsa kahay rason nga isulat ni Jehova sa iyang “basahon sa handomanan” ang ngalan sa mga tawo kansang sinultihan nagpakita nga sila nahadlok niya ug namalandong sa iyang ngalan? Ang atong sinultihan nagpaila kon unsay naa sa atong kasingkasing. Si Jesus miingon: “Gikan sa kadagaya sa kasingkasing ang baba mosulti.” (Mat. 12:34) Gusto ni Jehova nga kadtong nahigugma niya malipayong magpuyo sa bag-ong kalibotan hangtod sa hangtod. Ang atong sinultihan dakog epekto kon dawaton ba ni Jehova ang atong pagsimba. (Sant. 1:26) Ang ubang tawo nga wala mahigugma sa Diyos mosulti nga pinasingka o sakit, o kaha manghambog. (2 Tim. 3:1-5) Di nato gustong mosundog nila. Naningkamot ta nga malipay si Jehova sa atong sinultihan. Pero malipay kaha si Jehova kon buotan ta manulti sa tigom o sa ministeryo, pero sakit ta manulti sa atong pamilya kon naa ta sa balay?—1 Ped. 3:7. w22.04 5 ¶4-5

Gibutang sa Diyos ang iyang hunahuna sa kasingkasing sa 10 ka sungay ug sa pintas nga mananap aron laglagon ang Bantogang Babilonya. Oo, palihokon ni Jehova ang mga nasod nga gamiton ang hayag-pula nga pintas nga mananap, ang United Nations, aron atakehon ang tibuok kalibotang imperyo sa bakak nga relihiyon ug laglagon kini sa bug-os. (Pin. 18:21-24) Unsay kahulogan niini para nato? Kinahanglang seguroon nato kanunay nga ang atong “pagsimba . . . hinlo ug wala mahugawi diha sa panglantaw sa atong Diyos.” (Sant. 1:27) Dili gyod ta magpaimpluwensiya sa bakak nga mga pagtulon-an, paganong mga selebrasyon, ubos nga moral nga sukdanan, ug espiritistikong mga buhat sa Bantogang Babilonya! Ug padayon natong pasidan-an ang mga tawo nga ‘mogula kaniya’ aron dili sila makaambit sa iyang mga sala atubangan sa Diyos.—Pin. 18:4. w22.05 11 ¶17; 14 ¶18

Mga ginikanan, pangitag lainlaing paagi aron matudloan ang inyong mga anak bahin kang Jehova ug sa daghang maayong butang nga iyang gihimo para ninyo. (Deut. 6:6, 7) Importante ni ilabina kon dili mo maka-study nga regular diha sa balay kay dili Saksi ang inyong kapikas. Ang sister nga si Christine miingon: “Panagsa ra kaayo ming magkaestorya bahin sa espirituwal nga mga butang, maong kon magkaestorya mi, ako gyod ning pahimuslan.” Pagsulti pod ug positibo bahin sa mga igsoon ug sa organisasyon ni Jehova. Ayawg sawaya ang mga ansiyano. Ang imong isulti bahin kanila dakog epekto kon moduol ba sa mga ansiyano ang imong mga anak dihang magkinahanglan silag tabang. Paningkamot nga magmalinawon ang inyong pamilya. Sultihi pirme ang imong bana ug mga anak nga gimahal nimo sila. Dihang maghisgot ka bahin sa imong bana, ipakita nga buotan ug matinahoron ka niya, ug bansaya ang imong mga anak nga himoon pod na. Pinaagi ana, magmalinawon ang inyong pamilya ug mas sayon para sa imong mga anak nga makakat-on bahin kang Jehova.—Sant. 3:18. w22.04 18 ¶10-11

Sa mensahe ni Jesus sa kongregasyon sa Efeso, masabtan nato nga milahutay sila ug padayong nag-alagad kang Jehova bisan pa sa lainlaing kalisdanan. Pero mibugnaw ang ilang gugma. Kinahanglan nilang ibalik ang kainit sa ilang gugma, kay kon dili, ang ilang pagsimba dili dalawaton. Karon pod, kinahanglan nga dili lang ta basta molahutay. Kinahanglang sakto ang atong mga rason sa paglahutay. Ang atong Diyos interesado dili lang sa kon unsay atong ginahimo, kondili kon nganong ato pod ning ginahimo. Importante kang Jehova ang atong motibo, kay gusto niya nga mosimba ta niya kay gihigugma ug giapresyar nato siya pag-ayo. (Prov. 16:2; Mar. 12:29, 30) Kinahanglan nga padayon tang magmata sa espirituwal. Ang mga Kristohanon sa kongregasyon sa Sardis naay laing problema. Aktibo sila sa pag-alagad kang Jehova sa una, pero karon dili na. Giingnan sila ni Jesus nga “momata.” (Pin. 3:1-3) Siyempre, dili kalimtan ni Jehova ang atong mga gihimo para niya.—Heb. 6:10. w22.05 3 ¶6-7

Ang kalipay nga atong bation tungod sa atong trabaho gitawag ni Solomon nga “gasa sa Diyos.” (Eccl. 5:18, 19) Nahibalo si Solomon nga tinuod gyod nâ kay ganahan siyang motrabaho. Nagtukod siyag mga balay, nagtanom ug mga ubasan, ug naghimog garden ug mga linaw sa tubig. Nagtukod pod siyag mga siyudad. (1 Hari 9:19; Eccl. 2:4-6) Nagkugi siya sa iyang trabaho, ug nakahatag to niyag kalipay. Pero naa pa siyay laing gihimo aron tinuod siyang magmalipayon. Nagkugi pod siya sa espirituwal nga mga buluhaton. Pananglitan, siyay nagdumala sa pagtukod sa nindot kaayong templo para sa pagsimba kang Jehova—nga gidangtag pito ka tuig! (1 Hari 6:38; 9:1) Human sa tanan niyang nahimo, nakita ni Solomon nga ang pinakaimportante mao ang espirituwal nga mga buluhaton. Siya misulat: “Human masulti ang tanan, kini ang konklusyon: Kahadloki ang matuod nga Diyos ug tumana ang iyang mga sugo.”—Eccl. 12:13. w22.05 22 ¶8

Ang Bibliya daghag pananglitan sa mga tawo nga gipasaylo ni Jehova. Kinsay imong mahunahunaan? Tingali si Haring Manases. Daotan siya nga tawo ug grabe kaayo ang nahimo niyang mga sala kang Jehova. Nanguna siya sa bakak nga pagsimba. Gipatay niya ang kaugalingon niyang mga anak kay gihalad niya sila sa paganong mga diyos. Nagbutang pa gani siyag diyosdiyos diha sa sagradong templo ni Jehova. Ang Bibliya nag-ingon: “Siya nagbuhat ug grabeng pagkadaotan sa atubangan ni Jehova sa pagpasuko kaniya.” (2 Cron. 33:2-7) Pero dihang kinasingkasing nga naghinulsol si Manases, gipasaylo siya ni Jehova. (2 Cron. 33:12, 13) Tingali makahunahuna pod ka kang Haring David, nga nakahimog bug-at nga mga sala batok kang Jehova, apil na ang pagpanapaw ug pagpatay. Pero dihang si David miangkon sa iyang mga sala ug kinasingkasing nga naghinulsol, gipasaylo pod siya ni Jehova. (2 Sam. 12:9, 10, 13, 14) Oo, makaseguro ta nga gusto gyod ni Jehova nga mopasaylo. w22.06 3 ¶7

Gusto nato nga pirmeng lig-on ang atong paglaom. Pero dili nâ kanunayng sayon. Basin mawad-an tag pailob samtang naghulat nga tumanon sa Diyos ang iyang mga saad. Pero si Jehova walay sinugdanan ug walay kataposan, mao nga ang iyang panglantaw sa panahon lahi sa atoa. (2 Ped. 3:8, 9) Iyang tumanon ang iyang katuyoan sa kinamaayohang paagi, pero tingali dili sa panahon nga atong gidahom. Unsay makatabang aron magpabiling lig-on ang atong paglaom samtang mapailobon tang naghulat nga tumanon sa Diyos ang iyang mga saad? (Sant. 5:7) Pabiling suod pirme kang Jehova kay siya ang motuman sa atong gilaoman. Gipakita sa Bibliya nga aron naa tay paglaom, kinahanglan tang motuo nga si Jehova tinuod ug nga siya maoy “tigganti sa mga sinserong nangita kaniya.” (Heb. 11:1, 6) Kon motuo ta nga tinuod gyod si Jehova, mas molig-on ang atong pagsalig nga tumanon niya ang tanan niyang saad. Aron molig-on ang atong paglaom, kinahanglan tang moampo kang Jehova ug magbasa sa iyang Pulong. Bisag dili nato makita si Jehova, puwede tang masuod niya. Puwede tang makig-estorya niya pinaagi sa pag-ampo ug makasalig ta nga maminaw siya.—Jer. 29:11, 12. w22.10 26-27 ¶11-13

Imadyina ang nahitabo. Si Job naglingkod sa abo, ug way hunong ang iyang kasakit. (Job 2:8) Wala siya lung-i sa iyang mga kauban; padayon nilang gidaot ang iyang pagkatawo ug reputasyon. Bug-at kaayo ang iyang gipas-ang mga problema, ug daw giduslak ang iyang kasingkasing sa kaguol tungod sa kamatayon sa iyang mga anak. Sa primero, naghilom lang si Job. (Job 2:13) Kon ang mga kauban ni Job nagtuo nga ang iyang paghilom nagpasabot nga iya nang biyaan si Jehova, nasayop sila. Si Job—nga posibleng mihangad ug mitan-aw sa iyang mga kauban—miingon: “Hangtod nga ako mamatay, dili gyod nako wad-on ang akong integridad!” (Job 27:5) Unsay nakatabang kang Job nga magpabiling lig-on bisan pa sa tanan niyang pag-antos? Tinuod, guol kaayo siya, pero wala gyod siya mawad-ig paglaom nga tabangan siya sa iyang mahigugmaong Diyos. Nahibalo siya nga bisag mamatay siya, banhawon siya ni Jehova.—Job 14:13-15. w22.06 22 ¶9

Gihatagan ta ug nindot kaayo nga pribilehiyo—makaampo ta sa Magbubuhat sa langit ug sa yuta. Hunahunaa ra: Puwede natong isulti ang tanan kang Jehova bisag kanus-a ug bisag unsa pay atong pinulongan. Makaampo ta bisag naa ta sa ospital o sa prisohan, ug makasalig ta nga paminawon ta sa atong mahigugmaong Amahan. Dili gyod nato balewalaon kini nga pribilehiyo. Gipabilhan ni Haring David ang pribilehiyo sa pag-ampo. Siya miawit kang Jehova: “Hinaot ang akong pag-ampo mahisamag insenso nga giandam sa imong atubangan.” (Sal. 141:1, 2) Sa panahon ni David, andamon pag-ayo ang sagradong insenso nga gamiton sa mga saserdote para sa matuod nga pagsimba. (Ex. 30:34, 35) Ang paghisgot ni David sa insenso nagpakita nga gusto niyang hunahunaon pag-ayo kon unsay iyang iampo sa iyang langitnong Amahan. Mao pod nay gusto natong himoon. Gusto nato nga malipay si Jehova sa atong pag-ampo. w22.07 20 ¶1-2; 21 ¶4

Si Jehova ang manimalos. Wala ta hatagi ni Jehova ug katungod nga manimalos niadtong nakasala nato. (Roma 12:20, 21) Kay limitado ug dili perpekto ang atong hunahuna, dili ta makahukom sa sakto nga paagi, dili sama sa Diyos. (Heb. 4:13) Ug usahay, maglabaw ang atong emosyon maong dili ta makahimog saktong desisyon. Gigiyahan ni Jehova si Santiago sa pagsulat: “Ang kasuko sa tawo dili moresultag pagkamatarong nga iya sa Diyos.” (Sant. 1:20) Makaseguro ta nga himoon ni Jehova kon unsay husto ug seguroon niya nga mahatag ang hustisya. Ang pagpasaylo nagpakita sa atong pagsalig sa hustisya ni Jehova. Kon atong itugyan kang Jehova ang tanan, gipakita nato ang atong pagsalig nga wad-on niya ang tanang kadaot nga resulta sa nahimong sala. Sa iyang gisaad nga bag-ong kalibotan, ang sakit nga mga kaagi “dili na hinumdoman, ug dili na kini motungha sa kasingkasing” hangtod sa hangtod.—Isa. 65:17. w22.06 10-11 ¶11-12

Kay atong naeksperyensiyahan ang maong pagsupak, pamatuod nâ nga giuyonan ta ni Jehova. (Mat. 5:11, 12) Ang Yawa maoy hinungdan niini nga pagsupak. Pero wâ siyay bawot kang Jesus! Sa paggiya ni Jesus, ang maayong balita nakaabot sa tanang kanasoran. Konsideraha ang ebidensiya. Ang laing babag sa atong pagsangyaw mao ang nagkalainlaing pinulongan. Pero sa panan-awon nga gihatag kang apostol Juan, gitagna ni Jesus nga sa atong panahon, ang nagkalainlaing pinulongan dili na babag sa pagsangyaw sa maayong balita. (Pin. 14:6, 7) Sa unsang paagi nâ natuman? Atong gihatagag kahigayonan ang daghang tawo kutob sa mahimo nga modawat sa mensahe sa Gingharian. Karon ang mga tawo sa tibuok kalibotan makabasa ug mga publikasyon nga binase sa Bibliya diha sa atong jw.org nga website, kay ang impormasyon niini gihubad sa kapig 1,000 ka pinulongan! Ang librong Mabuhi Ka Hangtod sa Hangtod! nga maoy pangunang gigamit nato sa pag-Bible study, giaprobahan nga hubaron sa kapig 700 ka pinulongan! w22.07 9 ¶6-7

Si Jesus maluluy-on sa mga tawo. Si apostol Mateo miingon: “Pagkakita niya sa mga tawo, siya naluoy kanila kay sila pinanitan ug nagkatibulaag samag mga karnero nga walay magbalantay.” (Mat. 9:36) Ug unsa poy pagbati ni Jehova? Si Jesus miingon: “Dili gayod buot sa akong Amahan nga anaa sa langit nga malaglag bisan usa lang niining ubos nga mga tawo.” (Mat. 18:14) Makapalipay kaayo na! Samtang mas mailhan nato si Jesus, magkalalom pod ang atong gugma kang Jehova. Makakat-on pod ka nga mahimong mas mahigugmaon ug hamtong nga Kristohanon dihang makig-uban ka sa hamtong nga mga igsoon sa inyong kongregasyon ug mailhan nimo sila. Matikdi kon unsa sila ka malipayon. Wala sila magmahay sa ilang desisyon nga moalagad kang Jehova. Pangutan-a sila sa ilang mga eksperyensiya sa pag-alagad kang Jehova. Pangayog tambag nila dihang kinahanglan kang mohimog importanteng desisyon. Hinumdomi nga “naay kalamposan kon daghan ang magtatambag.” w22.08 3 ¶6-7

Kitang tanan makaatubang ug mga pagsulay. Pero wala ta mag-inusara kay si Jehova samag usa ka mahigugmaong amahan nga kanunayng nagbantay nato. Siya nagauban kanato, ug andam siyang maminaw sa atong mga hangyo ug motabang nato. (Isa. 43:2) Kombinsido ta nga makaya nato ang mga kalisdanan kay siya dagayang nagtagana sa tanan natong gikinahanglan aron makalahutay ta. Gitugotan ta niya nga makaampo, ug gitagana niya ang Bibliya, dagayang espirituwal nga pagkaon, ug mahigugmaong mga igsoon aron tabangan ta panahon sa kalisdanan. Mapasalamaton kaayo ta nga duna tay langitnong Amahan nga nagbantay, o nag-atiman nato! ‘Ang atong kasingkasing nagsadya kaniya.’ (Sal. 33:21) Mapakita nato nga atong giapresyar ang gugma ug pag-atiman ni Jehova kon pahimuslan nato ang tanan niyang tagana aron tabangan ta. Kinahanglan pod tang maningkamot nga dili mopalayo sa Diyos. Sa ato pa, padayon natong himoon ang atong maarangan sa pagsunod kang Jehova ug sa pagbuhat kon unsay matarong. Kon ato nang himoon, iya tang atimanon hangtod sa hangtod! w22.08 13 ¶15-16

Daghan karon ang wala mahibalo kon kang kinsa sila makasalig. Dili sila segurado kon ang mga tawo nga ilang gitahod, sama sa mga politiko, siyentista, ug mga negosyante, naghunahuna ba gyod sa ilang kaayohan. Nadismayar pod sila sa mga lider sa relihiyon nga nag-angkong Kristohanon, maong wala silay salig sa basahon nga gisunod kuno niini nga mga lider—ang Bibliya. Ingong mga alagad ni Jehova, kombinsido ta nga siya “ang Diyos sa kamatuoran” ug gusto gyod niya kon unsay pinakamaayo para nato. (Sal. 31:5; Isa. 48:17) Nahibalo ta nga kasaligan ang atong mabasa diha sa Bibliya. Mouyon ta sa gisulat sa usa ka eskolar sa Bibliya: “Wala gyoy giingon ang Diyos nga dili tinuod o dili matuman. Ang katawhan sa Diyos makasalig sa iyang giingon kay may pagsalig sila sa Diyos nga nagsulti niini.” w23.01 2 ¶1-2

Mapalig-on nato ang mga igsoon kon palig-onon nato ang ilang pagtuo kang Jehova. Ang uban kanila gibiaybiay sa mga dili magtutuo. Ang uban naay grabeng sakit o naglisod pagwala sa kasakit nga ilang gibati tungod sa gihimo sa uban. Ang uban pod dugay nang nagpaabot sa kataposan niini nga sistema sa mga butang. Kini nga mga kahimtang mahimong magsulay sa pagtuo sa mga Kristohanon karon. Ang mga Kristohanon sa unang siglo nakaatubang pod ug susamang mga kalisdanan. Gigamit ni apostol Pablo ang Kasulatan aron palig-onon ang pagtuo sa mga igsoon. Pananglitan, ang Hudiyong mga Kristohanon wala tingali mahibalo kon unsaon pagtubag ang ilang dili magtutuong mga membro sa pamilya nga nag-ingon nga ang Judaismo mas labaw sa Kristiyanidad. Seguradong ang sulat ni Pablo ngadto sa mga Hebreohanon nakapalig-on pag-ayo sa maong mga Kristohanon. (Heb. 1:5, 6; 2:2, 3; 9:24, 25) Puwede nilang gamiton ang iyang makapakombinsir nga mga pangatarongan aron matubag ang mga magsusupak. w22.08 23-24 ¶12-14

Ang mga tawo sa kalibotan ni Satanas naglibog kon kang kinsa sila mosalig. Nadismayar sila sa ginahimo sa mga negosyante, politiko, ug lider sa relihiyon. Daghan pod ang way salig sa ilang mga higala, silingan, ug bisan sa ilang pamilya. Dili na ta matingala niini kay ang Bibliya nagtagna: “Sa kataposang mga adlaw . . . , ang mga tawo unya . . . dili maunongon, . . . tigbutangbutang, . . . traydor.” Sa ato pa, sundogon sa mga tawo ang kinaiya sa diyos niini nga sistema sa mga butang, kinsa dili kasaligan. (2 Tim. 3:1-4; 2 Cor. 4:4) Pero ingong mga Kristohanon, bug-os tang makasalig kang Jehova. Kombinsido ta nga gimahal ta niya ug ‘dili gyod niya biyaan’ ang iyang mga higala. (Sal. 9:10) Makasalig sab ta kang Kristo Jesus kay iyang gihatag ang iyang kinabuhi alang kanato. (1 Ped. 3:18) Ug ato mismong naeksperyensiyahan nga kasaligan gyod ang giya sa Bibliya.—2 Tim. 3:16, 17. w22.09 2 ¶1-2

Ang tinuod nga kalipay dili lang kay nindot nga pagbati nga molabay ra. Puwede ning bation sa usa ka tawo sa tibuok niyang kinabuhi. Nganong makaingon ta ana? Si Jesus miingon sa iyang Wali sa Bukid: “Malipayon kadtong mahunahunaon sa ilang espirituwal nga panginahanglan.” (Mat. 5:3) Nahibalo si Jesus nga ang mga tawo gilalang nga may “espirituwal nga panginahanglan.” Buot ipasabot, naa silay tinguha nga mailhan ang ilang Maglalalang, si Jehova nga Diyos, ug simbahon Siya. Ug kay si Jehova “malipayong Diyos,” kadtong nagsimba niya magmalipayon pod. (1 Tim. 1:11) Kinahanglan bang maayo kaayo ang atong kahimtang aron magmalipayon? Dili. Sa wali ni Jesus, miingon siya nga bisan “kadtong nagbangotan” puwedeng magmalipayon. Mao pod nay giingon ni Jesus bahin niadtong “gilutos tungod sa pagkamatarong.” (Mat. 5:4, 10, 11) Gitudloan ta ni Jesus nga bation nato ang kalipay, dili tungod sa maayo kaayong kahimtang, kondili sa pagtagbaw sa atong espirituwal nga panginahanglan ug pagpakigsuod sa Diyos.—Sant. 4:8. w22.10 6 ¶1-3

Ang katakos sa pag-ila makatabang sa usa ka Kristohanon nga mahibaloan kon kanus-a ang “panahon sa paghilom ug panahon sa pagsulti.” (Eccl. 3:7) Sumala sa panultihon sa ubang kultura, “ang pagsulti samag plata, pero ang paghilom bulawanon.” Sa ato pa, dunay mga panahon nga mas maayong magpakahilom kay sa mosulti. Konsideraha ang usa ka pananglitan. Naay eksperyensiyadong ansiyano nga sagad hangyoon nga tabangan ang ubang kongregasyon nga masulbad ang lisod nga mga problema. Matikdi ang giingon sa iyang kaubang ansiyano, “Kanunay siyang nag-amping nga dili gyod niya masulti ang kompidensiyal nga impormasyon bahin sa ubang kongregasyon.” Kay ang maong ansiyano naay katakos sa pag-ila, gitahod siya sa iyang kaubang mga ansiyano sa kongregasyon. Segurado sila nga dili niya isulti sa uban ang kompidensiyal nga impormasyon bahin sa ilang kongregasyon. Ang pagkamatinud-anon makatabang sab aron mahimo tang kasaligan. Mosalig ta sa matinud-anong tawo kay mosulti gyod siyag tinuod.—Efe. 4:25; Heb. 13:18. w22.09 12 ¶14-15

Daghan ang dili gustong maminaw sa tinuod nga kaalam nga “nagasinggit diha sa dalan.” (Prov. 1:20) Sumala sa Bibliya, dunay tulo ka grupo sa mga tawo nga nagsalikway sa kaalam: ang mga “walay kasinatian,” “bugalbugalon,” ug “buangbuang.” (Prov. 1:22-25) Ang mga “walay kasinatian” mao kadtong mga inosente ug daling motuo o mailad. (Prov. 14:15, footnote.) Konsideraha pananglitan ang minilyon nga nalimbongan sa mga lider sa relihiyon o politika. Ang uban dili makatuo nga nailad sila sa maong mga lider. Pero kadtong gihisgotan sa Proverbio 1:22 mipili nga magpabiling walay kasinatian kay mao nay ilang gusto. (Jer. 5:31) Dili sila ganahang mahibalo sa giingon sa Bibliya o mosunod sa mga balaod niini. Dili gyod nato gustong sundogon kadtong tinuyo nga nagpabiling ignorante!—Prov. 1:32; 27:12. w22.10 19 ¶5-7

Ang organisasyon sa Diyos naghatag ug instruksiyon aron maprotektahan ta. Kanunay tang gipahinumdoman nga ihatag nato sa mga ansiyano ang atong kinabag-ohang contact information aron dali tang makontak panahon sa emerhensiya. Tingali makadawat sab tag instruksiyon bahin sa pagpabilin sa balay, pagbakwet, ug pagkuhag mga hinabang o kon kanus-a ug kon unsaon pagtabang ang uban. Kon dili nato ni sundon, atong mapameligro ang atong kinabuhi ug ang kinabuhi sa mga ansiyano kinsa nagabantay kanato. (Heb. 13:17) Daghang igsoon nga namakwet tungod sa kalamidad o kagubot ang naningkamot nga magpasibo sa ilang bag-ong kahimtang ug mihimo dayon sa mga buluhaton sa Gingharian. Sama sa unang mga Kristohanon nga nagkatibulaag tungod sa paglutos, padayon silang “nagpahayag sa maayong balita bahin sa pulong.” (Buh. 8:4) Ang pagsangyaw nakatabang nila nga magpokus sa Gingharian imbes sa ilang lisod nga kahimtang. Tungod ana, wala mawala ang ilang kalipay ug kalinaw. w22.12 19 ¶12-13

Gimahal ni Jehova ang matag usa nato. Sa wala pa ipadala ni Jesus ang iyang mga apostoles aron mosangyaw, gipasaligan niya sila nga dili sila angayng mahadlok sa pagsupak. (Mat. 10:29-31) Gigamit niya ingong pananglitan ang usa sa komon kaayong langgam sa Israel: ang goryon. Kini nga mga langgam ubos kaayog bili sa panahon ni Jesus. Pero iyang giingnan ang iyang mga tinun-an: “Walay usa kanila ang mahulog sa yuta nga dili mahibaloan sa inyong Amahan.” Dayon siya midugang: “Mas labaw mog bili kay sa daghang goryon.” Busa gipasaligan ni Jesus ang iyang mga tinun-an nga gimahal ni Jehova ang matag usa nila, maong dili sila angayng mahadlok sa paglutos. Ang mga tinun-an seguradong mahinumdom sa giingon ni Jesus dihang makakita silag mga goryon samtang manangyaw sa mga lungsod ug baryo. Dihang makakita kag gamayng langgam, hinumdomi nga gimahal ka ni Jehova kay “mas labaw [kag] bili kay sa daghang goryon.” Sa iyang tabang, makaya nimo ang bisan unsang pagsupak. w23.03 18 ¶12

Usahay makaatubang tag mga kalisdanan, sama nianang supakon ta sa atong pamilya o mawad-an tag trabaho. Kon dugay na tang nag-atubang ug kalisdanan, tingali maluya ta ug mawad-ag paglaom. Pahimuslan ni Satanas ang maong mga kahimtang aron magduhaduha ta kon gimahal ba ta ni Jehova. Gusto sa Yawa nga maghunahuna ta nga si Jehova o ang Iyang organisasyon maoy hinungdan sa atong pag-antos. Ingon ana ang nahitabo sa ubang Israelinhon sa Ehipto. Sa primero, nagtuo sila nga gipadala ni Jehova si Moises ug Aaron aron luwason sila gikan sa pagkaulipon. (Ex. 4:29-31) Pero sa ulahi, dihang mas gipalisod sa Paraon ang ilang kahimtang, ilang gibasol si Moises ug Aaron. (Ex. 5:19, 20) Ilang gibasol ang maunongong mga alagad sa Diyos. Makapaguol gyod to! Kon dugay na kang nag-atubang ug kalisdanan, isulti kang Jehova ang tanan nimong gibati pinaagig pag-ampo, ug pangayog tabang kaniya. w22.11 15 ¶5-6

Si Jehova ang Maghahatag ug Kinabuhi ug duna siyay gahom nga banhawon ang mga tawo. Iyang gihatagag gahom si propetang Elias aron banhawon ang anak sa babayeng balo sa Zarepta. (1 Hari 17:21-23) Sa ulahi, sa tabang sa Diyos, gibanhaw ni propetang Eliseo ang anak sa Sunaminhong babaye. (2 Hari 4:18-20, 34-37) Kini ug ang uban pang pagkabanhaw nagpamatuod nga si Jehova may gahom sa pagbanhaw sa mga tawo. Sa dinhi pa si Jesus sa yuta, iyang gipamatud-an nga gihatagan siya sa iyang Amahan niana nga gahom. (Juan 11:23-25, 43, 44) Karon, si Jesus tua na sa langit ug gihatag na kaniya “ang tanang awtoridad sa langit ug sa yuta.” Busa matuman gyod niya ang saad nga “ang tanang anaa sa handomanang mga lubnganan” banhawon ug hatagag kahigayonan nga mabuhi hangtod sa hangtod.—Mat. 28:18; Juan 5:26-29. w22.12 5 ¶10

Ang pagsalikway sa mga tawo kang Ezequiel maoy pagsalikway kang Jehova mismo. Ang giingon sa teksto karong adlawa nagpasalig kang Ezequiel nga bisan pag ang mga tawo dili maminaw niya, molampos gihapon siya sa iyang asaynment ingong propeta. Gipasaligan sab ni Jehova si Ezequiel nga dihang matuman na ang mensahe sa paghukom nga iyang ipahayag, ang mga tawo “mahibalo gayod nga may propeta sa ilang taliwala.” (Ezeq. 2:5; 33:33) Seguradong nakapahupay ug nakapalig-on to kang Ezequiel nga tumanon ang iyang asaynment. Kita pod mapalig-on kay nahibalo ta nga gipadala ta ni Jehova. Gipasidunggan ta niya pinaagi sa pagtawag nato nga iyang “mga saksi.” (Isa. 43:10) Dako gyod kaayo nâ nga pribilehiyo! Giingnan ni Jehova si Ezequiel: “Ayawg kahadlok.” Sa samang paagi, giingnan pod ta ni Jehova: “Ayawg kalisang.” (Ezeq. 2:6) Nganong dili ta angayng mahadlok sa atong mga magsusupak? Kay sama kang Ezequiel, kita gipadala ug ginatabangan ni Jehova.—Isa. 44:8. w22.11 3-4 ¶4-5

Karon mapasalamaton kaayo ta sa atong kasaligang mga ansiyano ug ministeryal nga mga alagad. Kini nga matinumanong mga brader nag-atiman gyod nato, ug mapasalamaton ta kang Jehova kay naa sila! Pero unsaon nato pagpakita nga kasaligan ta? Gimahal nato ang mga igsoon, ug interesado ta sa ilang kahimtang. Pero kinahanglan tang magmabalanse ug tahoron ang ilang pribasiya. Ang pipila diha sa unang siglong Kristohanong kongregasyon mga ‘tabian ug hilabtanon sa kalihokan sa ubang tawo, nga manulti sa mga butang nga dili nila angayng isulti.’ (1 Tim. 5:13) Seguradong dili nato gustong maparehas nila. Pero ibutang ta nga dihay misulti natog personal nga impormasyon ug giingnan ta nga dili ni isulti sa uban. Pananglitan, gisultihan ta sa usa ka sister bahin sa iyang problema sa panglawas o pagsulay nga iyang giatubang, ug mihangyo siya nga isekreto lang ni. Angay natong sundon ang iyang hangyo. w22.09 10 ¶7-8

Ang Gregong ekspresyon nga gihubad ug “pagbag-o sa inyong hunahuna” puwedeng hubaron nga “pag-renovate sa inyong hunahuna.” Busa dili igo nga dekorasyonan lang nato ang atong kinabuhi ug pipila ka maayong buhat. Kinahanglan nga susihon nato ang atong pagkatawo ug mohimog mga kausaban aron masunod nato ang mga sukdanan ni Jehova kutob sa mahimo. Kinahanglan nga padayon nato ning himoon, dili kay kas-a lang. Kon hingpit na ta, pirme na natong mapalipay si Jehova sa tanan natong himoon. Pero sa pagkakaron, kinahanglan pa tang padayong maningkamot nga mapalipay si Jehova. Matikdi nga sa Roma 12:2, si Pablo miingon nga kinahanglan natong bag-ohon ang atong hunahuna aron masabtan nato ang kabubut-on sa Diyos. Imbes pasagdan lang ang kalibotan nga mag-impluwensiya nato, kinahanglan nga susihon una nato ang atong kaugalingon aron makita kon ang panghunahuna ba gyod sa Diyos—dili sa kalibotan—ang nag-impluwensiya sa atong mga tumong ug desisyon. w23.01 8-9 ¶3-4

Kontrolahon ba ni Jehova ang tanang mahitabo nato? Maniobrahon ba niya ang tanang panghitabo sa atong kinabuhi maong makaingon ta nga naay maayong rason nga nahitabo ang tanang daotang mga butang? Dili. Wala mag-ingon ang Bibliya ana. (Eccl. 8:9; 9:11) Pero nahibalo ta ani: Dihang makaatubang tag pagsulay, nahibalo si Jehova ana ug dunggon niya ang atong pagpangayog tabang kaniya. (Sal. 34:15; Isa. 59:1) Labaw pa ana, si Jehova makatabang nato nga molampos sa paglahutay sa mga kalisdanan. Sa unsang paagi? Ang usa ka paagi nga si Jehova nagtabang nato mao ang iyang paghupay ug pagdasig, sagad sa panahon nga kinahanglan nato ni. (2 Cor. 1:3, 4) Mahinumdom ba ka sa dihang gihupay ug gidasig ka ni Jehova sa panahon nga kinahanglan kaayo ni nimo? Sagad, makita lang nato kon giunsa ta pagtabang ni Jehova nga makalahutay dihang human na ang pagsulay. w23.01 17-18 ¶13-15

Kini nga pintas nga mananap halos parehas ug hitsura sa pintas nga mananap nga naay pito ka ulo, gawas lang sa kolor niini nga hayag-pula. Gitawag ni nga “larawan sa pintas nga mananap” ug gihisgotan ingong “ikawalong hari.” (Pin. 13:14, 15; 17:3, 8) Kini nga “hari” gihisgotan nga mitungha, dayon nawala, ug unya mitungha pag-usab. Haom gyod ni nga deskripsiyon sa United Nations, nga nagsuportar sa interes sa tibuok kalibotang politikal nga sistema! Sa primero, gitawag ni nga League of Nations, dayon nawala ni niadtong Gubat sa Kalibotan II, unya mitungha ni pag-usab ingong United Nations. Pinaagig propaganda, giimpluwensiyahan sa pintas nga mga mananap, o mga gobyerno, ang mga tawo nga supakon si Jehova ug ang iyang katawhan. Sa simbolikong paagi, ilang gitigom ang “mga hari sa tibuok gipuy-ang yuta” ngadto sa gubat sa Armagedon, ang “dakong adlaw sa Diyos nga Labing Gamhanan.”—Pin. 16:13, 14, 16. w22.05 10 ¶10-11

Dihang si Jesus nakakat-on sa pagbasa sa Balaang mga Sinulat, siya napamilyar pag-ayo sa Kasulatan, nakakat-on nga higugmaon kini, ug nagpaimpluwensiya niini. Pananglitan, hinumdomi ang nahitabo sa templo dihang 12 anyos pa lang si Jesus. Ang mga magtutudlo nga hawod kaayo sa Moisesnong Balaod “nahingangha sa iyang mga tubag ug pagsabot.” (Luc. 2:46, 47, 52) Mapamilyar pod ta sa Pulong sa Diyos ug makakat-on sa paghigugma niini kon regular nato ning basahon. Makakat-on ta sa giingon ni Jesus niadtong pamilyar sa Balaod, sama sa mga eskriba, Pariseo, ug Saduseo. Ang maong mga lider sa relihiyon pirmeng magbasa sa Kasulatan, pero wala sila makabenepisyo sa ilang gibasa. Gipakita ni Jesus ang tulo ka rason kon nganong wala sila makabenepisyo sa Kasulatan. Ang iyang giingon kanila motabang nato sa (1) pagsabot sa atong ginabasa, (2) pagpangitag espirituwal nga mga bahandi, ug (3) pagpaimpluwensiya sa Pulong sa Diyos. w23.02 8-9 ¶2-3

Ang pipila sa mga kapeligrohan nga angay natong likayan mao ang pagbirigbirig o flirting, pagpalabig inom, pagpalabig kaon, pagsultig sakit ngadto sa uban, ug ang pagtan-awg pintas nga mga kalingawan, pornograpiya, ug ubang butang nga sama niana. (Sal. 101:3) Ang Yawa kanunayng nangitag kahigayonan nga daoton ang atong relasyon kang Jehova. (1 Ped. 5:8) Kon dili ta magbantay, posibleng matamnan ni Satanas ang atong hunahuna ug kasingkasing ug mga binhi sa kasina, pagkadili-matinud-anon, kahakog, kasuko, pagkamapahitas-on, ug pagdumot. (Gal. 5:19-21) Kon dili ta molihok dayon aron ibton kini, padayon ning motubo nga samag makahilong tanom ug moresultag kadaot. (Sant. 1:14, 15) Ang usa ka kapeligrohan nga dili daling mamatikdan mao ang pagpakig-uban niadtong dili maayog impluwensiya. Angay natong hinumdoman nga ang atong mga kauban dakog impluwensiya nato. (1 Cor. 15:33) Kon bantayan nato ang atong kaugalingon, likayan nato ang wala kinahanglanang pagpakig-uban niadtong wala magsunod sa mga sukdanan ni Jehova. (Luc. 21:34; 2 Cor. 6:15) Makita nato ang mga kapeligrohan ug malikayan kana. w23.02 16 ¶7; 17 ¶10-11

Mas milalom ang imong gugma kang Jehova dihang mas nailhan nimo siya. Seguradong gusto nimo nga mas masuod kaniya karon ug hangtod sa hangtod. Ug mahimo na nimo. Gidasig ka niya nga lipayon ang iyang kasingkasing. (Prov. 23:15, 16) Mapalipay nimo siya dili lang pinaagi sa pulong kondili sa imo pong mga buhat. Ang imong paagi sa pagkinabuhi magpakita kon unsa nimo ka mahal si Jehova. Kana ang pinakamaayong tumong nga imong mahimo sa imong kinabuhi. Unsaon nimo pagpakita nga gimahal nimo si Jehova? Una, mohimo kag espesyal nga pag-ampo nga imo nang ipahinungod ang imong kaugalingon sa bugtong matuod nga Diyos. (Sal. 40:8) Dayon, mahibaloan sa tanan nga nagpahinungod na ka kon magpabawtismo ka. Kana maoy malipayon ug importante kaayong hitabo sa imong kinabuhi. Magsugod na ka sa imong bag-ong kinabuhi, dili para sa imong kaugalingon, kondili para kang Jehova. (Roma 14:8; 1 Ped. 4:1, 2) Tingali bation nimo nga morag dako kaayo na nga desisyon, ug tinuod na. Pero moresulta nag malipayon kaayong kinabuhi. w23.03 5-6 ¶14-15