Septiyembre

Kon maayo tag sinultihan, mapakita nato sa uban nga nagsimba ta kang Jehova. Matabangan nato sila nga klarong makita ang kalainan “tali sa nag-alagad sa Diyos ug sa wala mag-alagad kaniya.” (Mal. 3:18) Mao nay nahitabo sa sister nga si Kimberly. Siya ug ang usa niya ka classmate sa high school nagkauban sa usa ka project. Namatikdan sa iyang classmate nga lahi siya sa uban. Si Kimberly buotag sinultihan, dili manglibak, ug dili mamalikas. Ang iyang classmate nainteres, ug sa ulahi nagpa-Bible study. Malipay gyod si Jehova dihang ang mga tawo mainteres sa kamatuoran tungod sa atong sinultihan! Gusto nato nga ang atong sinultihan makapasidungog kang Jehova ug makapasuod nato sa mga igsoon. w22.04 5-6 ¶5-7

Gipahigawas ni Jesus si Maria Magdalena gikan sa impluwensiya sa pito ka demonyo! Ang iyang apresasyon nagpalihok niya nga mahimong sumusunod ni Jesus ug suportahan ang ministeryo ni Jesus. (Luc. 8:1-3) Bisag mapasalamaton kaayo si Maria sa gihimo ni Jesus para niya, wala tingali niya masabti nga dili pa to ang kinadak-ang butang nga himoon ni Jesus. Ihatag ni Jesus ang iyang kinabuhi “aron ang tanan nga magpakitag pagtuo kaniya” makabaton ug kinabuhing walay kataposan. (Juan 3:16) Pero gipakita ni Maria ang iyang apresasyon kang Jesus pinaagi sa iyang pagkamaunongon. Samtang nag-antos si Jesus sa estaka sa pagsakit, si Maria nagtindog sa duol aron ipakita ang iyang gugma kang Jesus ug hupayon ang uban nga naa pod didto. (Juan 19:25) Pagkamatay ni Jesus, si Maria ug ang duha pa ka babaye nagdalag humot nga mga yerba aron ihaplas sa lawas ni Jesus una siya ilubong. (Mar. 16:1, 2) Nakita ug naestorya ni Maria ang nabanhawng si Jesus—pribilehiyo nga wala madawat sa kadaghanang tinun-an.—Juan 20:11-18. w23.01 27 ¶4

Dili ta angayng magsalig sa atong nahimo sa una. Bisag mas daghan na tag limitasyon karon, kinahanglang busy gihapon ta “sa buluhaton sa Ginoo,” nga pabiling nagmata hangtod sa kataposan. (1 Cor. 15:58; Mat. 24:13; Mar. 13:33) Kinahanglan nga dasig ta sa pag-alagad ug kinasingkasing ang atong pagsimba. Ang mensahe ni Jesus sa mga taga-Laodicea nagpakita ug lahi na pod nga problema. “Dagaang” ang ilang pagsimba. Tungod sa ilang kawalay kadasig, giingnan sila ni Jesus nga ‘alaot ug makaluluoy’ ang ilang kahimtang. Kinahanglan nga magmadasigon sila pag-ayo para kang Jehova ug sa pagsimba kaniya. (Pin. 3:16, 17, 19) Unsay atong makat-onan ani? Kon medyo nakuhaan na ang atong kadasig, kinahanglan nga maningkamot ta nga palawmon ang atong apresasyon sa espirituwal nga mga tagana ni Jehova ug sa iyang organisasyon. (Pin. 3:18) Dili gyod nato tugotan nga mahimong prayoridad nato nga mohayahay ang atong kinabuhi ug mahimong ikaduha na lang ang espirituwal nga mga buluhaton. w22.05 3-4 ¶7-8

Sa libolibo na ka tuig, si Jehova padayong nagsulat ug espesyal nga basahon. Kini nga basahon dunay mga ngalan, ug ang unang nasulat dinhi mao ang ngalan sa unang matinumanong saksi, si Abel. (Luc. 11:50, 51) Sukad adto, si Jehova padayong nagdugang ug mga ngalan sa maong basahon, ug karon minilyon na nga ngalan ang nasulat dinhi. Sa Bibliya, ang maong basahon gitawag ug “basahon sa handomanan,” “basahon sa kinabuhi,” ug “linukot nga basahon sa kinabuhi.” (Mal. 3:16; Pin. 3:5; 17:8) Nasulat niining espesyal nga basahon ang mga ngalan sa tanang nagsimba kang Jehova uban ang kahadlok, o dakong pagtahod, ug nahigugma sa iyang ngalan. Duna silay kahigayonan nga makadawat ug kinabuhing walay kataposan. Karon, posible pod nga masulat ang atong ngalan niana nga basahon kon naa tay suod nga relasyon kang Jehova pinasukad sa halad lukat sa iyang Anak, si Jesu-Kristo. (Juan 3:16, 36) Gusto natong tanan nga masulat ang atong ngalan niana nga basahon—sa langit man o sa yuta ang atong paglaom. w22.09 14 ¶1-2

Ang basahon sa Pinadayag naghisgot ug “dakong dragon nga ang kolor samag kalayo.” (Pin. 12:3) Kini nga dragon nakig-away kang Jesus ug sa iyang mga anghel. (Pin. 12:7-9) Giatake niini ang katawhan sa Diyos, ug mao ni ang naghatag ug gahom sa pintas nga mga mananap, o mga gobyerno. (Pin. 12:17; 13:4) Kinsa ni nga dragon? Mao kini “ang orihinal nga halas, ang gitawag ug Yawa ug Satanas.” (Pin. 12:9; 20:2) Siyay nagkontrol sa tanang kaaway ni Jehova. Unsay mahitabo sa dragon? Ang Pinadayag 20:1-3 nag-ingon nga naay anghel nga magtambog kang Satanas sa kahiladman, nga nagsimbolo sa samag prisohan nga kahimtang. Nianang panahona, si Satanas “dili na . . . makapahisalaag pa sa kanasoran hangtod nga matapos ang 1,000 ka tuig.” Human ana, si Satanas ug ang iyang mga demonyo itambog sa “linaw nga kalayo ug asupre.” Nagpasabot nâ nga bug-os silang laglagon. Hunahunaa ang kalibotan nga wala na si Satanas ug ang iyang mga demonyo. Pagkanindot! w22.05 14 ¶19-20

Si Jesus kugihan. Sa batabata pa siya, nagtrabaho siya ingong panday. (Mar. 6:3) Seguradong naapresyar sa iyang mga ginikanan ang iyang tabang samtang naningkamot sila nga matagan-an ang panginahanglan sa ilang dakong pamilya. Ug ingong panday, seguradong daghan ang gustong magpatrabaho niya kay perpekto god siya! Na-enjoy gyod tingali ni Jesus ang iyang trabaho. Pero bisag nagkugi siya sa iyang trabaho, naggahin siyag panahon para sa espirituwal nga mga buluhaton. (Juan 7:15) Sa ulahi, dihang full-time na siya sa pagsangyaw, iyang gitambagan ang mga tawo: “Hagoi ninyo, dili ang pagkaon nga madaot, kondili ang pagkaon nga dili madaot nga motultol sa kinabuhing walay kataposan.” (Juan 6:27) Ug sa iyang Wali sa Bukid, siya miingon: “Pagtigom mog mga bahandi sa langit.” (Mat. 6:20) Ang kaalam gikan sa Diyos motabang nga mahimo tang balanse sa atong trabaho. Ingong mga Kristohanon, gitudloan ta nga “maghago . . . , nga magtrabaho sa matarong nga paagi.” w22.05 22 ¶9-10

Si Eunice nagpakitag maayong ehemplo kang Timoteo. Nakita gyod ni Timoteo sa binuhatan sa iyang mama nga gihigugma niya pag-ayo si Jehova ug nga ang pag-alagad kang Jehova nakapalipay sa iyang mama. Karon pod, nakabig nga “walay pulong” sa daghang inahan ang ilang pamilya. (1 Ped. 3:1, 2) Mahimo pod na nimo. Unsaon man? Himoang prayoridad ang imong relasyon kang Jehova. (Deut. 6:5, 6) Parehas sa kadaghanang inahan, daghan kag gisakripisyo. Gisakripisyo nimo ang imong panahon, kuwarta, pahulay, ug uban pa aron maatiman ang imong mga anak. Pero ayaw gyod tugoti nga tungod ani, masakripisyo ang imong relasyon kang Jehova. Paggahin ug panahon aron regular kang makaampo, makahimog personal nga pagtuon sa Bibliya, ug makatambong sa tigom. Pinaagi ani, molig-on ka sa espirituwal ug makahatag kag maayong ehemplo sa imong pamilya ug sa uban. w22.04 16 ¶1; 19 ¶12-13

Malipay gyod ta nga dili kita ang naay responsibilidad nga mohukom sa mga tawo! Ingong Kinalabwang Maghuhukom, si Jehova ang mohimo niining importanteng responsibilidad. (Roma 14:10-12) Makasalig gyod ta nga ang iyang paghukom kanunayng uyon sa iyang hingpit nga sukdanan sa husto ug sayop. (Gen. 18:25) Dili gyod siya mohimog bisan unsa nga dili matarong! Nangandoy gyod ta sa panahon nga wad-on na ni Jehova ang tanang dili maayong epekto sa sala ug pagkadili-hingpit sa tawo. Mawala na unya ang tanang pisikal nga kadaot nga atong naagoman ug ang mga kasakit nga atong naeksperyensiyahan. (Sal. 72:12-14; Pin. 21:3, 4) Dili na gyod ni hinumdoman. Samtang nagpaabot ta nianang nindot kaayo nga panahon, mapasalamaton kaayo ta nga gitabangan ta ni Jehova nga sundogon siya pinaagi sa atong pagpasaylo sa uban. w22.06 13 ¶18-19

Ang maayong maghuhukom kinahanglang nakasabot pag-ayo sa balaod. Kinahanglang nahibalo siya pag-ayo kon unsay husto ug sayop. Unsa pay gikinahanglan aron ang usa mahimong maayong maghuhukom? Kinahanglang nahibalo siya sa tanang impormasyon sa usa ka kaso sa dili pa modesisyon. Busa klaro gyod nga si Jehova ang pinakamaayong Maghuhukom. Dili parehas sa mga maghuhukom nga tawo, si Jehova nahibalo pag-ayo sa tanang impormasyon bahin sa bisan unsang kaso. (Gen. 18:20, 21; Sal. 90:8) Dili pod siya parehas sa tawo nga limitado rag makita o madungog. Nahibalo siya pag-ayo kon unsang mga kinaiya ang atong nakuha sa atong ginikanan, kon giunsa ta pagpadako, kon asa ta nagpuyo, ug kon unsay atong kahimtang sa mental ug emosyonal. Ug nahibalo pod siya kon unsay epekto ani sa atong mga ginahimo. Si Jehova makabasa ug kasingkasing. Kabalo kaayo siya kon unsay motibo, intensiyon, ug gusto sa matag tawo. Walay matago kang Jehova. (Heb. 4:13) Busa dihang pasayloon ni Jehova ang usa ka tawo, tungod na kay nahibalo siya sa tanang impormasyon. w22.06 4 ¶8-9

Dili nato angayng balewalaon ang mga paagi nga gigamit ni Satanas kang Job, kay mao pod ni ang iyang gigamit kanato karon. Nangangkon si Satanas nga wala gyod ta mahigugma kang Jehova nga Diyos ug nga ato Siyang biyaan kon mao nay makaluwas sa atong kinabuhi. Miingon pod si Satanas nga wala ta higugmaa sa Diyos ug nga balewala ra Niya ang atong mga paningkamot nga mapalipay Siya. Kay napasidan-an na, kita nga naglaom kang Jehova dili mailad ni Satanas. Angay natong isipon ang mga pagsulay ingong kahigayonan nga mas mailhan ang atong kaugalingon. Ang mga pagsulay nga naatubang ni Job nakatabang niya nga makita ang iyang mga kahuyangan ug matul-id kini. Pananglitan, iyang nakat-onan nga kinahanglan siyang mahimong mas mapaubsanon. (Job 42:3) Daghan pod tag makat-onan bahin sa atong kaugalingon dihang mag-atubang tag mga pagsulay. Kon mailhan na nato ang atong mga kahuyangan, makahimo na tag mga paagi nga matul-id kini. w22.06 23 ¶13-14

Gipasaligan ta ni Jehova nga iya tang tabangan. Pananglitan, sa wala pa moingon si Jehova: “Kamo ang akong mga saksi,” siya miingon: “Kon motabok ka sa katubigan, ako mag-uban kanimo, ug kon motabok ka sa kasubaan, dili ka malapawan niini. Kon molatas ka sa kalayo, dili ka masunog o mapaso sa siga niini.” (Isa. 43:2) Sa atong pagministeryo, usahay makaatubang tag samag baha nga mga kalisdanan ug samag kalayo nga mga pagsulay. Pero sa tabang ni Jehova, padayon tang nagsangyaw. (Isa. 41:13) Daghan karon ang dili maminaw sa atong mensahe. Pero hinumdomi nga wala nâ magpasabot nga wala ta molampos sa atong pagsangyaw. Mahupayan ta ug mapalig-on kay nahibalo ta nga si Jehova malipay kon padayon natong isangyaw ang iyang mensahe. Si apostol Pablo miingon: “Ang matag tawo makadawat sa iyang ganti sumala sa iyang binuhatan.”—1 Cor. 3:8; 4:1, 2. w22.11 4 ¶5-6

Karon, nakita nato nga nagakatuman ang mga tagna sa Bibliya. Ang mga tawo “gikan sa tanang pinulongan sa mga nasod” nakakat-on sa pagsulti sa “putling pinulongan” sa kamatuoran sa Bibliya. (Zac. 8:23; Sof. 3:9) Kapin nag 8,000,000 ka tawo diha sa 240 ka kayutaan ang nahimong bahin sa organisasyon ni Jehova ug, kada tuig, linibo ang mabawtismohan! Pero ang pag-uswag sa gidaghanon dili mao ang mas importante, kondili ang Kristohanong mga hiyas, “ang bag-ong personalidad,” nga naugmad niining bag-ong mga tinun-an. (Col. 3:8-10) Daghan ang mihunong sa pagkahimong imoral, bayolente, mapihigon, ug nasyonalistiko. Ang tagna sa Isaias 2:4 nagakatuman na; wala na sila magkat-on sa pagpakiggubat. Samtang naningkamot ta nga isul-ob ang bag-ong personalidad, ginatabangan nato ang mga tawo nga madani sa organisasyon sa Diyos ug gipamatud-an nato nga nagsunod ta sa atong tigdumala, si Kristo Jesus. (Juan 13:35) Dili ni kay naatol ra. Naposible ni kay ginatabangan ta ni Jesus. w22.07 9 ¶7-8

Dihang mag-ampo ta kang Jehova, kinahanglang magpakita tag dakong pagtahod. Hunahunaa ang makapahinganghang mga panan-awon nga nakita ni Isaias, Ezequiel, Daniel, ug Juan. Gipakita niini kon unsa ka halangdon si Jehova ingong Hari. Nakita ni Isaias “nga si Jehova naglingkod sa habog ug tinuboy nga trono.” (Isa. 6:1-3) Nakita ni Ezequiel si Jehova nga naglingkod sa Iyang langitnong karo, nga gipalibotag “kahayag nga sama nianang sa balangaw.” (Ezeq. 1:26-28) Nakita ni Daniel ang “Karaan sa mga Adlaw” nga nagsul-ob ug puti, ug ang Iyang trono naay mga siga sa kalayo. (Dan. 7:9, 10) Ug nakita ni Juan si Jehova nga naglingkod sa trono nga gilibotag balangaw nga samag esmeralda tan-awon. (Pin. 4:2-4) Kon pamalandongon nato ang dili hitupngang himaya ni Jehova, mapahinumdoman ta kon unsa ka nindot ang atong pribilehiyo nga makaampo kaniya ug kon unsa ka importante ang paghimo niana nga may pagtahod. w22.07 20 ¶3

Mga batan-on, si Satanas maningkamot nga dili ka mouswag sa espirituwal. Ang usa niya ka paagi mao ang pagtanom ug mga pagduhaduha bahin sa imong mga nakat-onan sa Bibliya. Pananglitan, sultihan tingali ka sa ubang tawo ug mga ideya nga nagpasipala sa Diyos, sama sa teoriya sa ebolusyon. Niadtong bata pa ka, tingali wala ka maghunahuna niini. Pero karon, basig ginatudloan ka bahin niini diha sa eskuwelahan. Tingali ang ginaingon sa imong mga titser bahin sa ebolusyon morag katuohan. Pero posible nga wala nila susiha ang ebidensiya nga naay Maglalalang. Hinumdomi ang prinsipyo sa Proverbio 18:17: “Ang mounag presentar sa iyang kaso morag husto, hangtod moabot ang pikas partido ug kuwestiyonon siya.” Imbes tuohan dayon ang mga gitudlo sa eskuwelahan, tun-i pag-ayo kon unsay giingon sa Pulong sa Diyos, ang Bibliya, ug sa atong mga publikasyon. w22.08 2 ¶2; 4 ¶8

Gusto natong masabtan ang kahulogan sa atong mabasa sa Pulong sa Diyos. Kay kon dili, basin dili kaayo ta makabenepisyo sa atong pagbasa. Pananglitan, konsideraha ang giingon ni Jesus sa “tawong batid sa Balaod.” (Luc. 10:25-29) Dihang ang tawo nangutana kang Jesus kon unsay kinahanglan niyang buhaton aron makabaton ug kinabuhing walay kataposan, gitabangan siya ni Jesus nga makita ang tubag diha sa Pulong sa Diyos. Iya siyang gipangutana: “Unsay nahisulat sa Balaod? Unsay nasabtan nimo sa imong gibasa?” Nakahatag ang tawo ug saktong tubag pinaagi sa pagkutlog mga bersikulo bahin sa paghigugma sa Diyos ug paghigugma sa isigkatawo. (Lev. 19:18; Deut. 6:5) Pero matikdi ang sunod nga giingon sa tawo: “Kinsa may akong higugmaon?” Gipakita sa tawo nga wala gyod niya masabti ang kahulogan sa iyang gibasa. Tungod ana, wala siya mahibalo kon unsaon niya pagpadapat ang maong mga bersikulo. Kinahanglan nato ang tabang ni Jehova aron masabtan ang Bibliya. Busa pangayoa ang iyang balaang espiritu aron makapokus ka sa imong pagbasa, dayon pangayog tabang niya aron mapadapat nimo ang imong nabasa. w23.02 9 ¶4-5

“Sa unsang paagi ka nakakat-on sa kamatuoran?” Seguradong kadaghan na kang gipangutana ana. Usa na sa kasagarang mga pangutana sa mga igsoon dihang mag-ilaila. Ganahan tang mahibalo kon sa unsang paagi nailhan sa mga igsoon si Jehova ug kon nganong ila siyang gimahal. Ug ganahan pod tang moestorya nila kon unsa ka importante nato ang kamatuoran. (Roma 1:11) Tungod ani nga panag-estoryahay, mapahinumdoman ta kon unsa ka bililhon ang kamatuoran. Mahimo pod tang mas determinado nga ‘padayong maglakaw sa kamatuoran’—sa ato pa, padayon tang magkinabuhi sa paagi nga makapalipay kang Jehova ug moresulta sa iyang panalangin ug pag-uyon. Daghag rason kon nganong gimahal nato ang kamatuoran. Ang kinalabwang rason mao ang atong gugma kang Jehova nga Diyos, ang Tinubdan sa kamatuoran. Pinaagi sa iyang Pulong, ang Bibliya, nailhan nato siya dili lang ingong gamhanang Magbubuhat sa langit ug yuta, kondili ingong atong langitnong Amahan nga nagmahal pag-ayo kanato.—1 Ped. 5:7. w22.08 14 ¶1, 3

Gidasig ni apostol Pablo ang mga igsoon nga magpakitag gugma pinaagig “maayong mga buhat.” (Heb. 10:24) Iyang gitabangan sila, dili lang pinaagi sa iyang gisulti, kondili sa iya pong gibuhat. Pananglitan, dihang ang mga igsoon sa Judea nakasinatig kagutom, apil si Pablo sa nagdalag hinabang para nila. (Buh. 11:27-30) Gani, bisag busy si Pablo sa pagsangyaw ug pagpanudlo, kanunay siyang nangitag paagi aron tabangan kadtong nanginahanglag tabang. Pinaagi niana, iyang gipalig-on ang pagsalig sa mga igsoon nga dili sila pasagdan ni Jehova. Karon, mapalig-on sab nato ang pagtuo sa mga igsoon kon gamiton nato ang atong panahon, kusog, ug kahanas sa pagboluntaryo sa pagpanghatag ug hinabang. Mahimo sab nato nâ pinaagi sa regular nga paghatag ug donasyon para sa tibuok kalibotang buluhaton. Niini ug sa uban pang paagi, matabangan nato ang mga igsoon nga mosalig nga dili gyod sila pasagdan ni Jehova. w22.08 24 ¶14

Ang Bibliya daghag tagna nga natuman. Ang uban niini natuman gatosan ka tuig human kini masulat. Gipamatud-an sa kasaysayan nga natuman kini nga mga tagna. Dili ni ikatingala kay ang tanang tagna sa Bibliya naggikan kang Jehova. Hunahunaa ang mga tagna bahin sa pagkapukan sa karaang siyudad sa Babilonya. Sa ikawalong siglo B.C.E., si propetang Isaias gigiyahan sa Diyos sa pagtagna nga ang gamhanang siyudad sa Babilonya sakopon. Gisulti pa gani niya ang ngalan sa mosulong, si Ciro, ug kon unsaon ni Ciro pagsakop ang siyudad. (Isa. 44:27–45:2) Gitagna pod ni Isaias nga ang Babilonya sa ngadtongadto malaglag ug di na puy-an. (Isa. 13:19, 20) Ang Babilonya napildi sa Medo-Persia niadtong 539 B.C.E., ug ang kanhing gamhanang siyudad gun-ob na kaayo karon ug wala na puy-i. w23.01 4 ¶10

Gipili ta ni Jehova nga mahimong bahin sa iyang tibuok kalibotang pamilya sa mga magsisimba. Dako kaayo nâ nga pribilehiyo nga moresultag daghang kaayohan! (Mar. 10:29, 30) Sa tibuok kalibotan, naa tay mga igsoon nga nahigugma kang Jehova sama nato ug naningkamot nga mosunod sa iyang mga sukdanan. Lainlain tag pinulongan, kultura, ug sininaan, pero mibati tang suod nila bisag bag-o pa lang nato silang nailaila. Ganahan kaayo ta nga makauban sila sa pagdayeg ug pagsimba sa atong mahigugmaong langitnong Amahan, ug kinahanglan tang magpabiling nahiusa kanila. (Sal. 133:1) Usahay, tabangan ta nila sa atong mga problema. (Roma 15:1; Gal. 6:2) Dasigon pod ta nila nga magpabiling aktibo sa pag-alagad kang Jehova ug magpabiling lig-on sa espirituwal. (Heb. 10:23-25) Hunahunaa ang atong bation kon wala ang kongregasyon, nga nagsilbing proteksiyon aron masuklan nato ang atong mga kaaway—si Satanas nga Yawa ug ang iyang daotang kalibotan. w22.09 2-3 ¶3-4

Masulayan ang atong pagpugong sa kaugalingon dihang mogamit tag social media. Kon dili ta mag-amping, basin dili tinuyo nga makapasa tag kompidensiyal nga impormasyon sa daghang tawo. Ug sa dihang mapasa na nato ni, wala na tay kontrol kon unsaon ni paggamit sa uban ug kon unsa ka dako nga kadaot ang moresulta. Ang pagpugong sa kaugalingon motabang sab nato nga dili magpadala sa mga magsusupak dihang bitkon ta nila nga mosultig impormasyon nga makapameligro sa mga igsoon, pananglitan dihang sukitsukiton ta sa mga polis. Lagmit mahitabo ni sa lugar diin gidili o dunay restriksiyon ang atong buluhaton. Niini ug sa uban pang kahimtang, atong mapadapat ang prinsipyo nga ‘busalan nato ang atong baba.’ (Sal. 39:1) Kinahanglang mahimo tang kasaligan sa tanan, sa ato mang pamilya, mga higala, mga igsoon, o kang bisan kinsa. Ug aron mahimo tang kasaligan, nagkinahanglan tag pagpugong sa kaugalingon. w22.09 13 ¶16

Aron tinuod nga magmalipayon, kinahanglan tang mokaon ug espirituwal nga pagkaon. Ug gikinahanglan nato nâ. Mao nay rason nga si Jesus miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.” (Mat. 4:4) Busa dili nato angayng palabyon ang adlaw nga dili mokaon ug espirituwal nga pagkaon gikan sa Pulong sa Diyos, ang Bibliya. Kay gihigugma ta ni Jehova, iyang gipakita kanato diha sa Bibliya kon unsay atong buhaton aron magmalipayon ta. Mahibaloan nato kon unsay iyang katuyoan para nato. Mahibaloan pod nato kon unsay atong buhaton aron masuod ta niya ug mapasaylo ang atong mga sala. Ug makat-onan nato ang nindot nga paglaom sa umaabot nga iyang gisaad. (Jer. 29:11) Ang mga kamatuoran nga atong makat-onan sa Bibliya makapalipay gyod nato! Kon maguol ka tungod sa imong mga problema, dugangi ang imong panahon sa pagbasa sa Pulong ni Jehova ug pagpamalandong niini. w22.10 7 ¶4-6

Ang Bibliya nagdasig nato nga dili magpabiling walay kasinatian. Kon ipadapat nato ang mga prinsipyo sa Bibliya, makabaton tag kasinatian. Anam-anam natong makita kon sa unsang paagi ang maong mga prinsipyo makatabang nato nga malikayan ang mga problema ug makahimog maalamong mga desisyon. Busa maayong susihon kon miuswag ba ta niining bahina. Kon taudtaod na tang nag-Bible study ug nagtambongan sa mga tigom, puwede natong pangutan-on ang kaugalingon kon nganong wala pa ta magpahinungod kang Jehova ug magpabawtismo. Kon bawtismado na ta, miuswag ba ta sa atong pagsangyaw ug pagtudlo sa maayong balita? Ang ato bang mga desisyon nagpakita nga nagpagiya ta sa mga prinsipyo sa Bibliya? Nagpakita ba tag Kristohanong mga hiyas sa atong pagpakiglabot sa uban? Kon nakita nato nga naa tay angayng pauswagon, kinahanglang pamalandongon nato ang mga pahinumdom ni Jehova, nga “nagahimong maalamon sa walay kasinatian.”—Sal. 19:7. w22.10 20 ¶8

Nakita ni Ezequiel kon unsa ka gamhanan ang espiritu sa Diyos. Sa panan-awon, nakita niya nga ang balaang espiritu naglihok diha sa gamhanang espiritung mga linalang. Mao pod ni ang nagpalihok sa dagko kaayong ligid sa langitnong karo. (Ezeq. 1:21) Unsay reaksiyon ni Ezequiel sa iyang nakita? Siya misulat: “Dihang nakita nako kini, ako mihapa.” Nahingangha kaayo si Ezequiel maong siya mihapa. (Ezeq. 1:28) Dihang mamalandong si Ezequiel sa makapahinganghang panan-awon nga iyang nakita, seguradong napalig-on gyod ang iyang pagsalig nga sa tabang sa espiritu sa Diyos, matuman niya ang iyang ministeryo. Gisugo ni Jehova si Ezequiel: “Anak sa tawo, tindog kay makigsulti ko nimo.” Kana nga sugo ug ang espiritu sa Diyos naghatag kang Ezequiel ug kusog aron makatindog. (Ezeq. 2:1, 2) Sa tibuok ministeryo ni Ezequiel, ang “kamot” sa Diyos, nga mao ang balaang espiritu, naggiya kaniya.—Ezeq. 3:22; 8:1; 33:22; 37:1; 40:1. w22.11 4 ¶7-8

Dinhi, gihulagway ni propetang Isaias si Jehova ingong instruktor nga naa sa luyo sa iyang mga estudyante, nga naggiya ug nagtudlo nila sa dalan nga angay nilang lakwan. Karon, madungog nato ang tingog sa Diyos diha sa atong luyo. Sa unsang paagi? Ang mga pulong sa Diyos nasulat sa Bibliya dugay na kanhi, nga layo na kaayo sa atong panahon. Busa dihang mobasa ta sa Bibliya, sama rag naminaw ta sa tingog sa Diyos gikan sa atong luyo. (Isa. 51:4) Sa unsang paagi ta bug-os makabenepisyo sa giya nga gitagana ni Jehova? Matikdi ang giingon ni Isaias. Una, “kini ang dalan.” Ikaduha, “lakaw mo niini.” Dili igo nga mahibalo lang ta sa “dalan.” Kinahanglan sab nga ‘molakaw ta niini.’ Pinaagi sa Pulong ni Jehova nga gipatin-aw sa iyang organisasyon, makat-onan nato kon unsay gusto ni Jehova nga atong buhaton. Mahibaloan sab nato kon unsaon pagpadapat ang atong nakat-onan. Aron makalahutay ta nga malipayon sa atong pag-alagad kang Jehova, kinahanglang himoon nato kining duha ka butang. Pinaagi lang niini nga madawat nato ang panalangin ni Jehova. w22.11 10-11 ¶10-11

Wala madugay human mamatay ang kadaghanang apostoles ni Jesus, naay dili tinuod nga mga Kristohanon nga nahimong bahin sa kongregasyon. (Mat. 13:24-27, 37-39) Nagsulti silag “tinuis nga mga butang aron ipahilayo ang mga tinun-an ug danihon ngadto kanila.” (Buh. 20:30) Ang usa sa “tinuis nga mga butang” nga anam-anam nga gitudlo sa dili tinuod nga mga Kristohanon mao nga wala ihalad ni Jesus ang iyang lawas “kausa alang sa tanang panahon aron mopas-an sa mga sala sa daghan,” sama sa giingon sa Bibliya. Nagtudlo sila nga kinahanglang balikbalik niyang ihalad ang iyang kaugalingon. (Heb. 9:27, 28) Daghan karon ang nagtuo niining bakak nga pagtulon-an. Pirme silang magsimba—usahay kada adlaw—aron mangalawat panahon sa Eukaristiya. Ang ubang relihiyon talagsa ra kaayong maghandom sa kamatayon ni Jesus, ug kadaghanan sa membro nila wala kaayo makasabot sa kahulogan sa halad ni Jesus. w23.01 21 ¶5

Sa Usa ka Libo ka Tuig nga Pagmando ni Jesus, iyang banhawon ang mga patay ug tabangan ang masinugtanong mga tawo nga mahimong hingpit. Kadtong hukman ni Jehova ingong matarong “manag-iya sa yuta, ug sila magpuyo niini hangtod sa hangtod.” (Sal. 37:10, 11, 29) Ug makapalipay kay “ang kataposang kaaway, ang kamatayon, pagawagtangon.” (1 Cor. 15:26) Ang atong paglaom nga mabuhi sa walay kataposan naay lig-ong basehanan; gibase ni sa Pulong sa Diyos. Ang maong paglaom makatabang nato nga magmaunongon niining lisod nga panahon sa kataposang mga adlaw. Pero aron mapalipay si Jehova, kinahanglan nga ang atong motibo dili lang kay gusto natong mabuhi. Ang pangunang rason nga magmaunongon ta kang Jehova ug kang Jesus mao ang atong dakong gugma kanila. (2 Cor. 5:14, 15) Kana nga gugma magpalihok nato nga sundogon sila ug isangyaw ang atong paglaom. (Roma 10:13-15) Dihang mosakripisyo ta ug magmahinatagon, malipay si Jehova kanato ug mahimo ta niyang higala hangtod sa hangtod. w22.12 7 ¶15-16

Kon lutoson ta, posibleng dili na nato mahimo ang mga butang nga makahatag natog kalinaw. Basig mabalaka ta ug mahadlok kon unsa unyay mahitabo. Normal lang nga mobati ta ana. Pero angay tang magbantay. Miingon si Jesus nga ang paglutos puwedeng mahimong hinungdan nga ang iyang mga sumusunod mapandol o maluya sa pag-alagad. (Juan 16:1, 2) Bisag giingnan ta ni Jesus nga makadahom tag paglutos, gipasaligan pod ta niya nga makapabilin tang matinumanon. (Juan 15:20; 16:33) Dihang ang atong buluhaton idili o may restriksiyon, makadawat tingali tag instruksiyon gikan sa sangang buhatan ug mga ansiyano. Kini nga instruksiyon gihatag aron panalipdan ta, maseguro nga padayon tang makadawat ug espirituwal nga pagkaon, ug tabangan ta nga makapadayon sa pagsangyaw kutob sa mahimo. Paningkamoti nga masunod ang instruksiyon nga imong nadawat. (Sant. 3:17) Ug ayaw gyod paghatag ug impormasyon bahin sa atong mga igsoon ngadto sa mga walay katungod nga mahibalo niini.—Eccl. 3:7. w22.12 20 ¶14-16

Karon, si Jesus padayong naggiya sa iyang mga tinun-an sa ilang pagsangyaw bahin sa Gingharian sa Diyos sa tibuok kalibotan. Gihimo ni Jesus ang angay niyang himoon. Pinaagi sa organisasyon ni Jehova, gibansay ta ni Jesus kon unsaon pagsangyaw ug gihatag niya ang tanan natong gikinahanglan aron mas daghan ang makadungog sa maayong balita. (Mat. 28:18-20) Sa ato pong bahin, kinahanglan tang magkugi sa pagsangyaw ug pagpanudlo ug magpadayon sa pagbantay samtang nagpaabot nga taposon ni Jehova kining sistemaha sa mga butang. Kon ipadapat nato ang tambag sa Hebreohanon 6:11, 12, mahuptan nato ang atong paglaom “hangtod sa kataposan.” Naa nay gitakda si Jehova nga adlaw ug oras kon kanus-a niya taposon kining sistema ni Satanas. Nianang adlawa, tumanon gyod ni Jehova ang tanang tagna nga iyang gipasulat sa Bibliya. Usahay, maghunahuna tingali ta nga morag nalangan ang pagtapos niining sistemaha. Pero ang adlaw ni Jehova “dili maulahi!” (Hab. 2:3) Busa hinaot nga determinado ta nga “padayong magbantay [samtang] naghulat kang Jehova,” ug ‘mapailobong magpaabot sa Diyos, ang atong manluluwas.’—Miq. 7:7. w23.02 19 ¶15-16

Gusto gyod sa mountain climber nga maabot niya ang tumoy sa bukid. Pero daghan siyag maagian diin puwede siyang mohunong ug motan-aw sa nindot nga view. Sa samang paagi, paggahin kanunay ug panahon nga mohunong ug maghunahuna, sa ato pa, mamalandong kon giunsa ka pagtabang ni Jehova nga magmalamposon bisag nag-atubang kag kalisdanan. Kada adlaw, pangutan-a ang imong kaugalingon: ‘Sa unsang paagi gipanalanginan ko ni Jehova karong adlawa? Bisag naa gihapon koy pagsulay, giunsa ko pagtabang ni Jehova nga makalahutay?’ Paghunahuna ug bisan usa ka panalangin gikan kang Jehova nga nakatabang nimo nga magmalamposon. Tinuod, mag-ampo tingali ka nga matapos na ang imong pagsulay. (Filip. 4:6) Pero kinahanglang makita pod nato ang mga panalangin samtang nag-atubang tag pagsulay, kay si Jehova nagsaad nga iya tang palig-onon ug tabangan nga makalahutay. Busa ayaw gyod wad-a ang imong apresasyon sa tabang ni Jehova. Nianang paagiha makita nimo kon giunsa ka pagtabang ni Jehova nga magmalamposon bisan panahon sa mga pagsulay.—Gen. 41:51, 52. w23.01 19 ¶17-18

Pangutan-a ang kaugalingon: ‘Ang ako bang paagi sa pagkinabuhi nagpakita nga nakasabot gyod ko nga hapit nang laglagon kining sistemaha sa mga butang? Ang ako bang mga desisyon bahin sa pag-eskuwela ug panarbaho nagpakita nga ang pag-alagad kang Jehova mao gyod ang pinakaimportante sa akong kinabuhi? Nagtuo ba gyod ko nga si Jehova magtagana para nako ug sa akong pamilya?’ Hunahunaa kon unsa ka malipayon si Jehova dihang makita niya nga naningkamot ta nga ipahiuyon ang atong kinabuhi sa iyang kabubut-on. (Mat. 6:25-27, 33; Filip. 4:12, 13) Kinahanglan nga pirme natong susihon ang atong panghunahuna, dayon mohimog mga kausaban. Giingnan ni Pablo ang mga taga-Corinto: “Padayong sulayi kon naa ba mo sa pagtuo; padayong pamatud-i kon unsa mo sa inyong kaugalingon.” (2 Cor. 13:5) Busa kinahanglan nga padayon natong bag-ohon ang atong panghunahuna pinaagi sa pagbasa sa Pulong sa Diyos, pagsundog sa iyang panghunahuna, ug dayon paghimo sa gikinahanglang mga kausaban aron mapalipay si Jehova.—1 Cor. 2:14-16. w23.01 9-10 ¶5-6