Oktubre

Kitang tanan makaamot sa kalamposan sa atong mga tigom pinaagi sa pagkantag kusog ug paghatag ug maayong pagkaandam nga mga komento. Pero para sa ubang igsoon, lisod ang pagkanta ug pagkomento diha sa tigom. Mao ba nay imong gibati? Kon mao, konsideraha kon unsay gihimo sa uban aron mamenosan ang ilang kahadlok. Kon bahin sa awit, nakita sa uban nga makatabang ang pagkanta nga kinasingkasing. Gusto natong dayegon si Jehova. Mao na ang pinakaimportanteng rason kon nganong manganta ta. Busa dihang mangandam para sa tigom, apila ang mga kanta ug pamalandonga kon unsay koneksiyon ani sa hisgotan sa tigom. Dugang pa, maayo kon mas magpokus ka sa mensahe sa kanta imbes sa imong kinantahan. Ang pagkomento dili sayon para sa uban. Unsay makatabang? Sulayi ang pagkomento kanunay. Hinumdomi nga OK ra kon ang imong tubag mubo, simple, ug direkta sa punto. Malipay kaayo si Jehova kon determinado ta nga dayegon siya sa tigom. w22.04 7-8 ¶12-15

Ang pulong “magtatabang” nagtumong sa tawo nga nagdalidalig dagan aron tabangan ang usa ka tawo nga nangayog tabang. Imadyina si Jehova nga nagdalidalig dagan aron luwason ang tawo nga nagpakitabang. Seguradong mouyon ka nga nagpakita gyod ni kon unsa ka andam si Jehova nga mahimong atong Magtatabang. Kay andam si Jehova nga motabang nato, malahutay nato nga malipayon ang atong mga pagsulay. Unsa ang pipila ka paagi nga ginatabangan ta ni Jehova? Aron matubag nâ, konsiderahon nato ang basahon sa Isaias. Ngano? Kay daghan sa mga tagna nga gisulat ni Isaias mapadapat sa mga alagad sa Diyos karon. Dugang pa, dihang maghisgot si Isaias bahin kang Jehova, pirme siyang mogamit ug mga pulong nga daling masabtan. Tagda pananglitan ang Isaias kapitulo 30. Niini nga kapitulo, si Isaias migamit ug nindot nga mga pulong nga nagpakita kon giunsa ta pagtabang ni Jehova pinaagi sa (1) pagpaminaw pag-ayo ug pagtubag sa atong mga pag-ampo, (2) paggiya kanato, ug (3) paghatag natog mga panalangin karon ug sa umaabot. w22.11 8 ¶2-3

Sa mensahe ni Jesus sa mga kongregasyon sa Smirna ug Filadelfia, iyang giingnan ang mga Kristohanon didto nga dili mahadlok sa mga paglutos, kay gantihan ang ilang pagkamatinumanon. (Pin. 3:10) Angay natong dahomon nga lutoson ta, ug kinahanglang andam tang molahutay. (Mat. 24:9, 13; 2 Cor. 12:10) Ang Pinadayag nag-ingon nga ang katawhan sa Diyos lutoson sa atong panahon—ang “adlaw sa Ginoo.” (Pin. 1:10) Mabasa nato sa Pinadayag kapitulo 12 nga naay gubat nga nahitabo sa langit human dayon sa pagkatukod sa Gingharian sa Diyos. Si Miguel—nga mao si Jesu-Kristo dihang nakabalik na siya sa langit—ug ang iyang mga anghel nakiggubat kang Satanas ug sa iyang mga demonyo. (Pin. 12:7, 8) Ang maong mga kaaway sa Diyos napildi ug gitambog sa yuta, nga miresultag grabeng pag-antos sa mga tawo.—Pin. 12:9, 12. w22.05 5 ¶12-13

Ang mga desisyon ni Jehova kanunayng patas. Dili gyod siya magpaborpabor. Ang pagpasaylo ni Jehova dili ibase sa hitsura, kadato, kasikat, o sa mga abilidad sa usa ka tawo. (1 Sam. 16:7; Sant. 2:1-4) Walay makapresyur o makahiphip kang Jehova. Ang iyang paghimog desisyon dili maimpluwensiyahan sa kasuko o kaguol. (Ex. 34:7) Sa walay duhaduha, si Jehova ang pinakamaayong Maghuhukom kay nakasabot siya pag-ayo nato ug sa atong situwasyon. (Deut. 32:4) Ang mga magsusulat sa Hebreohanong Kasulatan nahibalo nga ang pagpasaylo ni Jehova lahi kaayo. Sa pipila ka teksto, migamit silag Hebreohanong pulong nga sumala pa sa usa ka reperensiya, “gigamit lang kon ang gitumong mao ang pagpasaylo sa Diyos sa mga makasasala, ug wala gyod gamita para sa mas ubos nga klase sa pagpasaylo nga ginahimo sa usa ka tawo sa iyang isigkatawo.” Si Jehova lang ang bug-os makapasaylo sa naghinulsol nga makasasala. w22.06 4 ¶10-11

Kon wala kay bana o kaha dili Saksi ang imong bana, unya nagpadako kag mga anak, makasalig ka nga ang imong maayong ehemplo makapalig-on ug makapadasig sa uban. Komosta man kon ang imong mga paningkamot morag way epekto sa imong anak? Hinumdomi nga ang pagbansay sa anak nagkinahanglag panahon. Dihang magtanom kag binhi, usahay maghunahuna ka kon motubo ba ni ug mamunga. Bisag wala ka kahibalo kon unsa unyay resulta, padayon nimo ning bisbisan aron mas dakog purohan nga motubo ni. (Mar. 4:26-29) Sa susama, ingong inahan, tingali maghunahuna ka usahay kon ang imong ginatudlo nakaabot ba gyod sa kasingkasing sa imong mga anak. Dili nimo kontrolado kon unsa unyay ilang desisyon. Pero kon padayon kang maningkamot sa pagbansay nila, mas dakog purohan nga motubo sila sa espirituwal. w22.04 19-20 ¶16-17

Dihang si Solomon matinumanon pang magsisimba ni Jehova, balanse siyag panghunahuna sa iyang kaugalingon. Dihang batan-on pa siya, mapainubsanon niyang giila ang iyang limitasyon ug nagpagiya siya kang Jehova. (1 Hari 3:7-9) Sa bag-o pang naghari si Solomon, nahibalo siya nga dili maayog resulta ang pagkagarboso. Makapaguol kay sa ulahi wala niya ipadapat ang iyang tambag. Nahimo siyang garboso ug iyang gisupak ang mga balaod sa Diyos. Pananglitan, ang usa sa mga balaod nag-ingon nga ang Israelinhong hari ‘dili mangasawag daghan aron ang iyang kasingkasing dili motipas.’ (Deut. 17:17) Pero wala tumana ni Solomon ang maong balaod kay naa siyay 700 ka asawa ug 300 ka puyopuyo! (1 Hari 11:1-3) Tingali kompiyansa ra kaayo si Solomon nga wala ra ni epekto niya. Sa ulahi, giani niya ang resulta sa pagsupak kang Jehova.—1 Hari 11:9-13. w22.05 23 ¶12

Ang mga tawo karon kinahanglang mohimog importanteng desisyon. Ila bang suportahan si Jehova nga Diyos ingong tinuod nga Magmamando sa uniberso, o ila bang dapigan ang iyang pintas nga kaaway, si Satanas nga Yawa? Dili puwede nga neyutral ang mga tawo bahin ani. Ang ilang desisyon maoy basehan kon mabuhi ba sila hangtod sa hangtod o dili. (Mat. 25:31-33, 46) Panahon sa “dakong kasakitan,” sila markahan para sa kaluwasan o para sa kalaglagan. (Pin. 7:14; 14:9-11; Ezeq. 9:4, 6) Kon midesisyon ka nga suportahan ang pagmando ni Jehova, maayo kaayo ang imong desisyon. Ug seguradong gusto nimong tabangan ang uban nga makahimog saktong desisyon. Kadtong maunongong magpasakop sa pagmando ni Jehova makadawat ug mga panalangin. Angay gyod natong tun-an kining importanteng mga kamatuoran, kay makapalig-on ni sa atong determinasyon nga padayong moalagad kang Jehova. Magamit pod nato ang atong makat-onan aron tabangan ang uban nga moalagad kang Jehova ug magmaunongon kaniya. w22.05 15 ¶1-2

Kinahanglang maminaw ta kang Jehova, dili sa atong mga kaaway. Naminaw pag-ayo si Job dihang nakigsulti kaniya si Jehova. Gitabangan sa Diyos si Job nga makaamgo, nga mora bag giingnan siya: ‘Nahibalo ko sa tanan nga nahitabo nimo. Naghunahuna ba ka nga dili ka nako kayang atimanon?’ Tungod ana, naapresyar pag-ayo ni Job ang pagkamaayo ni Jehova, ug siya mapainubsanong miingon: “Ang akong mga dalunggan nakadungog bahin kanimo, apan karon ang akong mga mata nakakita kanimo.” (Job 42:5) Dihang gisulti ni Job kining mga pulonga, tingali siya naglingkod pa gihapon sa abo ug nalukop gihapon ug mga hubag. Bisan pa niana, gipasaligan ni Jehova si Job nga Iya siyang gimahal ug giuyonan. (Job 42:7, 8) Karon pod, insultohon tingali ta sa mga tawo ug isipon nga walay pulos. Tingali ilang daoton ang atong reputasyon o ang atong organisasyon. Nakat-onan nato sa kinabuhi ni Job nga si Jehova may pagsalig nga magpabilin tang maunongon kaniya dihang mag-atubang ug mga pagsulay. w22.06 23-24 ¶15-16

Pero bisag maninggit sa kalipay ang naa sa langit dihang laglagon ang Bantogang Babilonya, naa pay makahatag ug mas dakong kalipay. (Pin. 19:1-3) Mao ni ang pinakaimportanteng hitabo nga gihisgotan sa Pinadayag—“ang kasal sa Kordero.” Ang 144,000 kompleto na sa langit sa dili pa magsugod ang gubat sa Armagedon. Pero dili pa nâ ang panahon sa kasal sa Kordero. (Pin. 21:1, 2) Ang kasal sa Kordero mahitabo human sa gubat sa Armagedon dihang malaglag na ang tanang kaaway sa Diyos. (Sal. 45:3, 4, 13-17) Unsay mahitabo sa kasal sa Kordero? Sama sa literal nga kasal nga maghiusa sa lalaki ug babaye, kining simbolikong kasal maghiusa sa Hari, si Jesu-Kristo, ug sa iyang “pangasaw-onon,” ang 144,000. Kining importanteng hitabo mao ang sinugdanan sa bag-ong gobyerno nga magmando sa yuta sulod sa 1,000 ka tuig.—Pin. 20:6. w22.05 17 ¶11-13

Gitagna ni Jesus nga sa panahon sa kataposan, magtudlo siyag “matinumanon ug maalamong ulipon” nga magtaganag espirituwal nga pagkaon. (Mat. 24:45) Ug mao nay nagakahitabo karon. Gigamit sa atong tigdumala ang gamayng grupo sa mga dinihogan aron tagan-an ug espirituwal nga “pagkaon sa hustong panahon” ang katawhan sa Diyos ug ang mga interesado. Wala isipa niini nga mga dinihogan ang ilang kaugalingon ingong mga agalon sa ilang mga igsoon sa pagtuo. (2 Cor. 1:24) Hinuon, ilang giila nga si Jesu-Kristo ang “pangulo ug komandante” sa iyang katawhan. (Isa. 55:4) Sukad sa 1919, ang matinumanong ulipon nagtaganag lainlaing publikasyon nga nakatabang sa mga interesado nga matilawan nila sa unang higayon ang espirituwal nga pagkaon. Niadtong 1921, gi-release sa ulipon ang librong The Harp of God aron tabangan ang mga interesado nga makakat-on sa pangunang mga pagtulon-an sa Bibliya. Paglabay sa panahon, daghan pang publikasyon ang gitagana. Unsa nga publikasyon ang nakatabang nimo nga mailhan ang atong langitnong Amahan ug higugmaon siya? w22.07 10 ¶9-10

Wala nay molabaw sa pagkamahinatagon ni Jehova. Bisag unsa pay imong ihatag kaniya, ang iyang ibalos mas labaw kanunay sa imong ihatag. (Mar. 10:29, 30) Iyang ihatag kanimo ang pinakaeksayting ug pinakamalipayong kinabuhi—bisan karon niining daotang kalibotan nga hapit nang taposon. Ug sinugdanan pa lang na. Makaalagad ka sa imong mahigugmaong Amahan hangtod sa hangtod. Ang inyong gugma sa usag usa padayong motubo. Gani padayon kang mabuhi samtang buhi siya, hangtod sa hangtod. Dihang magpahinungod ka ug magpabawtismo, naa kay mahatag sa imong Amahan nga espesyal kaayo para niya. Ang matag maayong butang ug matag malipayong hitabo sa imong kinabuhi naggikan kaniya. Pero bisag iya ang langit ug ang yuta, naa kay mahatag nga wala pa niya mabatoni—ang imong debosyon ug kinabubut-ong pag-alagad. Mao ni ang imong ikabalos niya. (Job 1:8; 41:11; Prov. 27:11) Kini ang pinakamaayong paagi nga magamit nimo ang imong kinabuhi! w23.03 6 ¶16-17

Kon batan-on ka, kusog kaayo ang seksuwal nga pagbati, ug tingali presyuron ka nga mohimog seksuwal nga imoralidad. Gusto ni Satanas nga madaog ka sa imong gibati. Unsay makatabang nimo nga magpabiling hinlo sa moral? (1 Tes. 4:3, 4) Sa imong mga pag-ampo, isulti kang Jehova kon unsa gyoy imong gibati, ug hangyoa siya nga palig-onon ka. (Mat. 6:13) Hinumdomi nga dili ka hukman ni Jehova. Hinuon, gusto niya nga tabangan ka. (Sal. 103:13, 14) Ayawg soloha ang imong mga problema. Isulti na sa imong ginikanan. Dili na sayon ug maulaw tingali ka, pero kinahanglan nimo nang himoon. Pinaagi sa pagbasa sa Bibliya ug pagpamalandong sa mga prinsipyo niini, makahimo kag mga desisyon nga makapalipay kang Jehova. Makita nimo nga wala ka magkinahanglag balaod sa matag situwasyon, kay nakasabot ka sa panghunahuna ni Jehova. w22.08 5 ¶10-12

Ang Kristohanong ulo sa pamilya nag-isip nga seryosong responsibilidad ang pag-atiman sa materyal nga panginahanglan sa iyang pamilya. Kon ulo ka sa pamilya, tingali nabalaka ka nga dili nimo mapakaon ang imong pamilya ug dili ka kabayad sa abang sa inyong balay. Basig nahadlok pod ka nga kon mawad-an kag trabaho, dili na ka makakitag laing trabaho. O basig naghunahuna ka nga magkalisod mo kon magpasimple mo sa inyong kinabuhi. Daghan nag napahunong si Satanas sa pag-alagad kang Jehova tungod sa maong mga kahadlok. Gusto ni Satanas nga patuohon ta nga si Jehova wala mahigugma nato ug dili siya motabang nato sa pagtagana para sa atong pamilya. Tungod ana, basig maghunahuna ta nga kinahanglan natong himoon ang tanan, bisan ang pagsupak sa mga prinsipyo sa Bibliya, aron lang dili mawad-ag trabaho. w22.06 15 ¶5-6

Nahibalo ta nga ang atong Diyos “maluluy-on ug mabination, dili daling masuko ug dagaya sa maunongong gugma ug kamatuoran.” (Ex. 34:6) Gihigugma ni Jehova ang hustisya. (Isa. 61:8) Masakitan siya dihang makita niya nga nag-antos ta, ug andam siya—ug naghinamhinam—nga taposon ang tanang pag-antos sa iyang gitakdang panahon. (Jer. 29:11) Naghinamhinam pod ta nga moabot nang panahona! Usa nâ ka rason nga gimahal nato pag-ayo si Jehova! Unsa pay laing rason nga gimahal nato ang kamatuoran? Ang kamatuoran makahatag natog kaayohan. Niay usa ka pananglitan. Apil sa kamatuoran sa Bibliya mao ang atong paglaom sa umaabot. Sama nga ang angkla makatabang aron ang barko dili mapadpad sa bagyo, ang atong paglaom nga gibase sa Bibliya makatabang aron makabarog ta sa mga pagsulay. Sa teksto karong adlawa, si Pablo naghisgot bahin sa langitnong paglaom nga gipaabot sa dinihogang mga Kristohanon. Pero ang iyang giingon mapadapat sab sa mga Kristohanon nga dunay paglaom nga mabuhi sa walay kataposan sa paraiso nga yuta. (Juan 3:16) Seguradong ang pagkahibalo nga naa tay paglaom nga mabuhi sa walay kataposan naghatag ug kahulogan sa atong kinabuhi. w22.08 14-15 ¶3-5

Gugma ang pundasyon sa pagsalig. Gihisgotan sa 1 Corinto kapitulo 13 ang lainlaing bahin sa gugma nga makatabang nato nga mosalig sa mga igsoon o mabalik ang atong pagsalig kanila. (1 Cor. 13:4-8) Pananglitan, ang bersikulo 4 nag-ingon nga ang gugma “taas ug pailob ug maayo.” Si Jehova mapailobon nato bisan dihang makasala ta niya. Busa angay tang magpailob sa mga igsoon kon naa silay masulti o mabuhat nga makapalagot o makapasakit nato. Ang bersikulo 5 nag-ingon: “[Ang gugma] dili masuk-anon. Kini dili maghupot ug listahan sa kadaot.” Dili ta gustong magsigeg hinumdom sa nahimo sa atong mga igsoon nga nakapasakit nato. Ang Ecclesiastes 7:9 nag-ingon nga dili ta angayng ‘masuko dayon.’ Paningkamoti nga masundog nimo ang panglantaw ni Jehova sa mga igsoon. Gimahal sila sa Diyos ug wala siya magsigeg bantay sa ilang mga sala. Ingon ana pod ang angay natong buhaton. (Sal. 130:3) Imbes magpokus sa ilang mga sayop, pagpokus sa ilang maayong mga hiyas.—Mat. 7:1-5. w22.09 3-4 ¶6-7

Gipakita sa basahon sa Daniel ang pagkasunodsunod sa makapalipayng mga hitabo panahon sa kataposan. Pananglitan, ang Daniel 12:1 nag-ingon nga si Miguel, nga mao si Jesu-Kristo, ‘nagtindog alang sa katawhan [sa Diyos].’ Kana nga bahin sa tagna nagsugod pagkatuman niadtong 1914 dihang si Jesus gitudlo ingong Hari sa langitnong Gingharian sa Diyos. Pero si Daniel giingnan sab nga si Jesus “motindog” “panahon sa kasakitan nga wala pa mahitabo sukad nga naa nay nasod nga natukod.” Kini nga “panahon sa kasakitan” mao ang “dakong kasakitan” nga gihisgotan sa Mateo 24:21. Si Jesus motindog, o molihok aron depensahan ang katawhan sa Diyos, sa kataposan niini nga panahon sa kasakitan, sa ato pa, sa Armagedon. Kini nga katawhan ang gitumong sa basahon sa Pinadayag ingong “dakong panon” nga “nakalabang sa dakong kasakitan.”—Pin. 7:9, 14. w22.09 21 ¶4-5

Ang mga ngalan nga naa sa basahon sa kinabuhi puwedeng papason. Mora bag sa pagkakaron, gisulat ni Jehova ang mga ngalan pinaagig lapis. (Pin. 3:5) Angay natong paneguroon nga ang atong ngalan magpabilin sa maong basahon hangtod nga permanente ning masulat, nga samag gisulat ni pinaagig bolpen. Ang usa ka grupo nga ang ngalan nasulat sa basahon sa kinabuhi mao kadtong gipili nga magmando uban ni Jesus sa langit. Sumala sa giingon ni apostol Pablo ngadto sa iyang mga “isigkamagbubuhat” sa Filipos, ang ngalan sa mga dinihogan, nga gidapit nga magmando uban ni Jesus, nasulat na sa basahon sa kinabuhi. (Filip. 4:3) Pero aron dili mapapas ang ilang ngalan niana nga basahon, kinahanglang magpabilin silang matinumanon. Dayon dihang madawat na nila ang ilang kataposang selyo, sa dili pa sila mamatay o kaha sa dili pa magsugod ang dakong kasakitan, ang ilang ngalan permanente nang masulat niini nga basahon.—Pin. 7:3. w22.09 14 ¶3; 15 ¶5-6

Nakasulay na ba ka nga gilutoan kag paborito nimong pagkaon? Kay nagdali ka o kaha daghan kaayo kag gihunahuna, imo ra ning gipaspasag kaon nga wala gani nimo ma-enjoy ang kada hungit. Pero pagkahuman, nakahunahuna ka nga maayo pag gihinayhinay nimo nig kaon aron mag-enjoy ka. Parehas pod ana ang pagbasag Bibliya. Nakasulay na ba ka nga nagdalidali kag basa maong wala nimo ma-enjoy ang mensahe niini? Ayaw pagdali, ug i-enjoy ang pagbasa sa Pulong sa Diyos; imadyina ang mga panghitabo ug ang mga tingog, ug pamalandonga ang imong nabasa. Kon kanay imong himoon, mas malipay ka. Gitudlo ni Jesus ang “matinumanon ug maalamong ulipon” sa pagtaganag espirituwal nga pagkaon sa hustong panahon, ug busog kaayo ta sa espirituwal. (Mat. 24:45) Ang tanang gitagana sa matinumanong ulipon gibase sa Pulong sa Diyos.—1 Tes. 2:13. w22.10 7-8 ¶6-8

Ang Bibliya nagpasidaan nga sa kataposang mga adlaw, daghan ang bugalbugalon o mabiaybiayon. (2 Ped. 3:3, 4) Nagpaulipon sila sa “kaugalingon nilang mga tinguha alang sa dili diyosnong mga butang.” (Jud. 7, 17, 18) Unsay atong himoon aron dili nato masundog ang mga bugalbugalon? Dili ta makig-uban niadtong kanunayng mangitag sayop ug reklamador. (Sal. 1:1) Nagpasabot ni nga dili ta maminaw o mobasag bisan unsa gikan sa mga apostata. Kon dili ta magbantay, dali ra tang mahimong reklamador ug hinawayon ug magduhaduha na ta kang Jehova ug sa mga instruksiyon nga atong madawat pinaagi sa iyang organisasyon. Aron malikayan nâ, puwede natong pangutan-on ang atong kaugalingon: ‘Kon naay bag-ong instruksiyon o eksplinasyon, pirme ba kong moreklamo? Pirme ba kong mangitag sayop niadtong nagapanguna?’ Kon tul-iron dayon nato ang atong kaugalingon, si Jehova malipay nato.—Prov. 3:34, 35. w22.10 20 ¶9-10

Ang espiritu sa Diyos nagpalig-on kang Ezequiel sa pagtuman sa iyang asaynment nga sangyawan ang mga tawo nga “gahig ulo ug tig-ag kasingkasing.” Si Jehova miingon kang Ezequiel: “Gihimo nako ang imong nawong nga sama gayod ka gahi sa ilang nawong ug ang imong agtang nga sama gayod ka gahi sa ilang agtang. Gihimo nako ang imong agtang nga samag diamante, nga gahi pa kay sa batong santik. Ayawg kahadlok kanila o kalisang sa ilang mga nawong.” (Ezeq. 3:8, 9) Sama bag giingnan ni Jehova si Ezequiel: ‘Ayawg kaluya tungod sa kagahig ulo sa mga tawo. Palig-onon ti ka.’ Human niana, gidala sa espiritu sa Diyos si Ezequiel ngadto sa teritoryo nga iyang sangyawan. “Ang kamot ni Jehova kusganong milihok diha kanako,” misulat si Ezequiel. Usa ka semana niyang gipamalandong ang mensahe ni Jehova nga iyang isangyaw. (Ezeq. 3:14, 15) Dayon gipaadto siya ni Jehova sa patag ug didto, ‘ang espiritu misulod kaniya.’ (Ezeq. 3:23, 24) Si Ezequiel andam na sa pagministeryo. w22.11 4-5 ¶8-9

Ang propetang si Habacuc nakaatubang ug daghang kalisdanan. Dihay higayon nga morag nagduhaduha na siya kon gimahal ba siya ni Jehova. Busa miampo siya kang Jehova ug gisulti ang tanan niyang gibati. Gitubag ni Jehova ang kinasingkasing nga pag-ampo sa iyang maunongong alagad. (Hab. 2:2, 3) Gipamalandong ni Habacuc kon giunsa pagluwas ni Jehova ang Iyang katawhan, busa nabalik ang iyang kalipay. Kombinsido na siya nga si Jehova nagmahal niya ug motabang niya nga malahutay ang bisan unsang pagsulay. (Hab. 3:17-19) Unsay atong makat-onan niini? Kon mag-atubang kag kalisdanan, ampo kang Jehova ug isulti kaniya ang imong gibati. Dayon pangayog tabang kaniya. Kon imo nang himoon, makasalig ka nga hatagan ka ni Jehova ug kusog aron makalahutay. Dihang makita nimo nga iya kang gitabangan, mas molig-on ang imong pagtuo. Kon ipadayon nimo ang imong espirituwal nga rutina, ang mga kalisdanan o pagduhaduha dili makapabulag nimo kang Jehova.—1 Tim. 6:6-8. w22.11 15 ¶6-7

Si Jesus ug ang duha ka kriminal nga tapad niya nag-antos ug hapit nang mamatay. (Luc. 23:32, 33) Ang duha ka kriminal nagbugalbugal kang Jesus. (Mat. 27:44; Mar. 15:32) Pero ang usa nila nausab ug miingon: “Jesus, hinumdomi ko inig-abot nimo sa imong Gingharian.” Ang tubag ni Jesus mabasa sa teksto karong adlawa. (Luc. 23:39-42) Ang giingon ni Jesus sa kriminal angayng magpalihok nato sa paghunahuna kon unsa unyay kinabuhi sa Paraiso. Bahin niini, makakuha tag ideya sa malinawong pagmando ni Haring Solomon. Ug makadahom ta nga si Jesus, nga mas labaw kang Solomon, ug ang iyang kaubang mga magmamando magtinabangay aron himoong Paraiso ang yuta. (Mat. 12:42) Siyempre, ang “ubang mga karnero” angayng mahibalo kon unsay kinahanglan nilang himoon aron makapuyo sa Paraiso sa walay kataposan.—Juan 10:16. w22.12 8 ¶1; 9 ¶4

Gipasaligan ta ni Isaias nga maminaw gyod si Jehova dihang mangamuyo ta Niya alang sa tabang, ug molihok dayon Siya para nato. Si Isaias miingon sab: “Iya kang tubagon dayon inigkadungog niya niini.” Kining makapahupay nga mga pulong nagpahinumdom nato nga ang atong Amahan andam gyong motabang niadtong moduol niya. Kon ato ning hinumdoman, makatabang ni nga makalahutay ta nga malipayon. Si Jehova maminaw pag-ayo sa pag-ampo sa kada usa nato. Nganong makaingon ta ana? Sa unang bahin sa Isaias kapitulo 30, migamit si Jehova ug plural nga pulong nga “kamo” sa pagtumong sa iyang katawhan ingong grupo. Pero sa bersikulo 19, singular na ang gigamit nga mga pulong kay ang gitumong dinhi mao ang matag indibiduwal. Si Isaias misulat: “Ikaw dili gayod mohilak”; “pakitaan gyod ka niyag pabor”; “iya kang tubagon.” Kay si Jehova mahigugmaong Amahan, iyang gipangga ang matag usa nato ug iyang paminawon ang pag-ampo sa kada usa nato.—Sal. 116:1; Isa. 57:15. w22.11 9 ¶5-6

Ang pagsangyaw ug pagtudlo bisan pa sa pagsupak makahatag natog kalipay ug kalinaw. Dihang ang mga apostoles sa unang siglo gipahunong sa mga awtoridad sa pagsangyaw, ang maong matinumanong mga alagad mipili sa pagsunod sa Diyos. Nagpadayon sila sa pagsangyaw ug kana nakapalipay nila. (Buh. 5:27-29, 41, 42) Siyempre, dihang ang atong buluhaton may restriksiyon, kinahanglan tang mag-amping samtang magsangyaw. Pero kon himoon nato ang atong maarangan, magmalinawon ta kay napalipay nato si Jehova ug nasangyaw nato ang mensahe nga makaluwas ug kinabuhi. Makasalig ta nga bisan sa lisod kaayong mga panahon, puwede tang magmalinawon. Nianang panahona, angay natong hinumdoman nga ang kalinaw nga atong gikinahanglan mao ang kalinaw nga si Jehova lang ang makahatag. Salig niya dihang dunay sakit nga mokaylap, kalamidad, o paglutos. Ayawg palayo sa iyang organisasyon. Pamalandonga ang imong nindot nga kaugmaon. Kon imo nang himoon, ‘ang Diyos sa kalinaw magauban kanimo.’—Filip. 4:9. w22.12 21 ¶17-18

Nagkinahanglan nag paningkamot sa atong bahin. Apil sa paningkamotan natong wad-on mao ang dili maayong mga kinaiya, sama sa pagdumot, kasuko, ug kapungot. (Efe. 4:31, 32) Nganong lisod tingali nang himoon? Tungod kay ang ubang negatibong kinaiya posibleng nakagamot na pag-ayo. Pananglitan, ang Bibliya nag-ingon nga ang uban “daling masuko” o “masuk-anon.” (Prov. 29:22) Bisag bawtismado na ang usa ka Kristohanon, kinahanglan tingali siyang padayong maningkamot nga kontrolahon ang iyang nakagamot pag-ayo nga mga kinaiya. (Roma 7:21-23) Kon naa kay kinaiya nga lisod wad-on, iampo na kang Jehova ug salig nga iya kang dunggon ug tabangan. (1 Juan 5:14, 15) Bisan tuod si Jehova dili mohimog milagro aron mawala ang imong dili maayong kinaiya, hatagan ka niyag kusog aron dili ka madaog niana. (1 Ped. 5:10) Siyempre, lihok uyon sa imong mga pag-ampo ug ayaw paghimog bisan unsa nga makapabalik sa imong daang personalidad. Ug kon mosantop sa imong hunahuna ang sayop nga mga tinguha, ayaw ni tugoti nga magpadayon.—Filip. 4:8; Col. 3:2. w23.01 10 ¶7, 9-10

Ang usa ka paagi nga mapakita nato ang atong gugma mao ang madasigong pagsangyaw sa maayong balita. Sangyawan nato ang tanan. Dili ta mamilig sangyawan bisag unsa pay ilang rasa, tribo, edukasyon, o kahimtang sa kinabuhi. Nianang paagiha, gisuportahan nato ang katuyoan ni Jehova nga “ang tanang matang sa tawo maluwas ug makakat-on sa tukmang kahibalo sa kamatuoran.” (1 Tim. 2:4) Mapamatud-an pod nato ang atong gugma sa Diyos ug sa Kristo pinaagi sa pagpakita sa atong gugma sa mga igsoon. Magpakita tag personal nga interes kanila ug tabangan sila dihang naa sila sa kalisdanan. Hupayon nato sila dihang mamatyan sila, duawon dihang masakit sila, ug himoon ang atong maarangan sa pagdasig nila dihang maluya sila. (2 Cor. 1:3-7; 1 Tes. 5:11, 14) Padayon nato silang iampo kay nahibalo ta nga “ang pangamuyo sa tawong matarong dunay gamhanang epekto.”—Sant. 5:16. w23.01 28-29 ¶7-8

Sama nga mapauswag sa usa ka construction worker ang iyang mga kahanas paglabay sa panahon, naa pod tay mahimo aron mas epektibo natong mapalig-on ang uban. Matabangan nato ang uban nga molig-on ug makalahutay sa mga pagsulay pinaagi sa paggamit sa ehemplo niadtong mga nakalahutay. (Heb. 11:32-35; 12:1) Makaamot ta sa kalinaw kon isulti nato ang maayong mga hiyas sa uban, kon dili nato ipamugos ang atong kaugalingong mga opinyon, ug kon maningkamot ta nga mabalik ang maayong relasyon dihang motungha ang dili pagsinabtanay. (Efe. 4:3) Ug padayon natong mapalig-on ang pagtuo sa mga igsoon pinaagi sa pagpahinumdom nila sa importanteng mga kamatuoran sa Bibliya, paghatag ug praktikal nga tabang, ug pagdasig niadtong naluya sa espirituwal. Kita sab mobatig kalipay ug katagbawan dihang makigbahin ta sa espirituwal nga pagpanukod—ang pagpalig-on sa pagtuo sa mga igsoon. Dili sama sa mga bilding nga sa kadugayan maguba ra, ang resulta sa atong buluhaton molungtad hangtod sa hangtod! w22.08 22 ¶6; 25 ¶17-18

Gihisgotan ni Jesus ang importanteng katakos nga gikinahanglan samtang magbasa sa Pulong sa Diyos—ang pagsabot. (Mat. 24:15) Unsa ang pagsabot? Kini ang katakos nga makita kon sa unsang paagi konektado o magkalahi ang mga ideya ug masabtan bisan ang mga ideya nga dili daling mamatikdan. Ug sumala sa gipasiugda ni Jesus, kinahanglan nato ang pagsabot aron makita kon unsang mga panghitabo ang nagtuman sa tagna sa Bibliya. Kinahanglan pod ni nato aron makabenepisyo ta pag-ayo sa tanan nga atong mabasa sa Bibliya. Si Jehova maghatag sa iyang mga alagad ug pagsabot. Busa hangyoa siya pinaagi sa pag-ampo nga tabangan ka sa pag-ugmad niini nga katakos. Pero kinahanglang molihok ka uyon sa imong pag-ampo. Unsay imong himoon? Hunahunaa pag-ayo ang imong gibasa ug ang koneksiyon niini sa imo nang nahibaloan. I-research ang kahulogan sa mga teksto sa Bibliya, ug hunahunaa kon unsaon nimo kini pagpadapat. (Heb. 5:14) Dihang magbasa ka nga may pagsabot, mas molalom ang imong kahibalo bahin sa Bibliya. w23.02 10 ¶7-8

Imadyina nga gihatagan ka sa imong higala ug karaan pero talagsaon kaayo nga painting—usa ka obra maestra. Medyo nausab na ang kolor ani, naa na ni mga mansa, ug nanghup-ak na. Bisan pa ana, minilyon gihapon ka dolyares ang kantidad sa painting. Seguradong imo gyod ning pabilhan ug ampingan. Sa susama, gihatagan ta ni Jehova ug bililhon kaayong regalo, ang regalo nga kinabuhi. Gani, gipakita ni Jehova kon unsa ka importante kaniya ang atong kinabuhi pinaagi sa paghatag sa iyang Anak aron malukat ta. (Juan 3:16) Si Jehova ang Tuboran sa kinabuhi. (Sal. 36:9) Nahibalo si apostol Pablo niana nga kamatuoran maong siya miingon: “Pinaagi kaniya kita dunay kinabuhi ug naglihok ug naglungtad.” (Buh. 17:25, 28) Busa makaingon gyod ta nga ang atong kinabuhi regalo gikan sa Diyos. Mahigugmaong gitagana ni Jehova ang atong gikinahanglan aron padayon tang mabuhi. (Buh. 14:15-17) Pero dili niya ipreserbar ang atong kinabuhi sa milagrosong paagi. Hinuon, gidahom niya nga himoon nato ang atong maarangan aron magpabiling himsog sa pisikal ug espirituwal.—2 Cor. 7:1. w23.02 20 ¶1-2

Mapasalamaton gyod ta kang Jehova nga Diyos tungod sa Bibliya. Niini nga basahon, gihatagan ta niyag maalamong tambag nga makatabang nato sa pag-atubang sa mga problema karon. Gihatagan pod ta niyag nindot nga paglaom sa umaabot. Labaw sa tanan, nahibaloan nato sa Bibliya ang lainlaing hiyas ni Jehova. Samtang atong pamalandongon ang iyang nindot nga mga hiyas, matandog gyod ang atong kasingkasing ug mapalihok ta nga makigsuod sa atong Diyos pinaagi sa pagpakighigala kaniya. (Sal. 25:14) Gusto ni Jehova nga mailhan siya sa mga tawo. Kaniadto, gipaila niya ang iyang kaugalingon pinaagi sa mga damgo, panan-awon, ug mga anghel. (Num. 12:6; Buh. 10:3, 4) Pero matun-an kaha nato ni nga mga damgo, panan-awon, o mensahe gikan sa mga anghel kon wala ni ipasulat? Kanay rason nga naggamit si Jehova ug mga tawo aron “isulat sa usa ka basahon” kon unsay gusto niya nga atong mahibaloan. Kay “ang dalan sa matuod nga Diyos hingpit,” makasalig ta nga ang maong paagi sa pagpakigkomunikar kanato mao ang pinakamaayo ug makatabang nato.—Sal. 18:30. w23.02 2 ¶1-2

Paghimog mapuslanong mga tumong. Pagpilig mga tumong nga makapalig-on sa imong pagtuo ug makatabang nimo nga mohamtong sa espirituwal. (Efe. 3:16) Pananglitan, puwede nimong pauswagon ang imong personal nga pagtuon ug pagbasa sa Bibliya. (Sal. 1:2, 3) O puwede nimong pauswagon ang kalidad sa imong mga pag-ampo ug himoon ning mas regular. Tingali kinahanglang mas mag-amping ka sa pagpilig kalingawan ug sa paggamit sa imong panahon. (Efe. 5:15, 16) Mahimo kang mas hamtong nga Kristohanon dihang motabang ka sa uban. Pananglitan, puwede nimong tabangan ang mga tigulang ug infirm sa inyong kongregasyon. Tingali puwede nimo silang tabangan sa pagpamalit o tudloan sila kon unsaon paggamit sa ilang gadyet. Makapakita pod kag gugma sa mga dili Saksi pinaagi sa pagsangyaw sa maayong balita sa Gingharian. (Mat. 9:36, 37) Kon posible, himoang tumong ang bug-os panahong pag-alagad. w22.08 6 ¶16-17