Nobyembre

Ang mga Kristohanon dili gyod angayng mamalikas. Pero naay sakit nga sinultihan nga dili daling mamatikdan, ug angay pod tang magbantay ana. Pananglitan, angay tang mag-amping nga dili makasultig negatibo bahin sa mga tawo nga lahig kultura, tribo, o nasyonalidad. Likayan pod nato nga mobungat ug mga pulong nga mainsulto ug masakitan ang uban. Paningkamoti nga makapadasig ang imong sinultihan. Maayo gyod kon abtik kang mohatag ug komendasyon imbes manaway o moreklamo. Ang mga Israelinhon daghag rason nga magpasalamat, pero pirme silang moreklamo. Kini nga kinaiya makatakod. Tingali mahinumdom ka nga tungod sa dili maayong report sa 10 ka espiya, “ang tanang Israelinhon nagbagulbol batok kang Moises.” (Num. 13:31–14:4) Pero kon mohatag tag komendasyon, malipay ang uban. Busa pangitag kahigayonan nga makahatag kag kinasingkasing nga komendasyon. w22.04 8 ¶16-17

Sukad pa sa kapanahonan sa Bibliya, si Jehova daghan nag natabangan nga mga bata ug batan-on nga masuod niya. Kaya pod niyang tabangan ang imong mga anak nga mohamtong sa espirituwal kon gusto nila. (1 Cor. 3:6, 7) Bisag morag motipas ang imong mga anak, padayon silang higugmaon ug bantayan ni Jehova. (Sal. 11:4) Dihang magpakita silag bisan gamayng ilhanan nga gusto nilang moalagad kang Jehova, naa siya aron motabang nila. (Buh. 13:48; 2 Cron. 16:9) Tabangan tingali ka niya nga isulti ang hustong mga pulong sa hustong panahon—dihang kinahanglan ning madungog sa imong mga anak. (Prov. 15:23) O tingali palihokon niya ang buotang brader o sister sa kongregasyon aron hatagan silag espesyal nga atensiyon. Bisan dihang dagko na ang imong mga anak, ipahinumdom tingali ni Jehova kanila ang imong gitudlo sa bata pa sila. (Juan 14:26) Kon padayon nimong bansayon ang imong mga anak sa pulong ug buhat, gihatagan nimo si Jehova ug daghang rason nga panalanginan ka. w22.04 21 ¶18

Kay si Satanas dili na man makaadto sa langit, iyang gipahungaw ang iyang kasuko sa nahibilin nga mga dinihogan, nga maoy representante sa Gingharian sa Diyos dinhi sa yuta ug “may buluhaton sa pagpamatuod bahin kang Jesus.” (2 Cor. 5:20; Efe. 6:19, 20) Niadtong 1918, walo sa mga brader nga nagapanguna sa organisasyon gihukmang sad-an tungod sa bakak nga mga akusasyon, ug ang kada usa nila gisentensiyahan ug dugay nga pagkapriso. Ang buluhaton niini nga mga dinihogan morag “gipatay.” (Pin. 11:3, 7-11) Pero pagka-Marso 1919, gibuhian sila, ug sa ulahi ang kaso batok nila giatras. Mibalik dayon sila sa ilang buluhaton—ang buluhaton sa Gingharian. Pero wala nâ makapahunong kang Satanas sa pag-atake sa katawhan sa Diyos. Sukad niadto, si Satanas nagpatunghag samag “suba” nga paglutos sa tanang alagad sa Diyos. (Pin. 12:15) Oo, ‘nagkinahanglag paglahutay ug pagtuo’ ang matag usa nato.—Pin. 13:10. w22.05 5-6 ¶14-16

Sa panan-awon, nakita ni apostol Juan ang duha ka grupo nga nagsuportar sa pagmando ni Jehova ug mapanalanginan ug kinabuhing walay kataposan. Ang unang grupo naay gidaghanong 144,000. Sila gikuha gikan sa yuta aron maporma ang usa ka gobyerno, o Gingharian, uban ni Jesus sa langit. Uban niya, ilang mandoan ang yuta. (Pin. 5:9, 10; 14:3, 4) Sa panan-awon, nakita sila ni Juan nga nagbarog uban ni Jesus sa langitnong Bukid sa Zion. (Pin. 14:1) Sukad sa panahon sa mga apostoles, linibo na ang gipili nga mahimong bahin sa 144,000. (Luc. 12:32; Roma 8:17) Pero si Juan giingnan nga pipila lang, o mga nahibilin lang, nianang grupoha ang buhi dinhi sa yuta panahon sa kataposang mga adlaw. (Pin. 12:17) Dayon, panahon sa dakong kasakitan, kini nga mga nahibilin dad-on ngadto sa langit aron moduyog sa ubang membro sa 144,000 kinsa namatay nga matinumanon. Sila mahimong kaubang magmamando ni Jesus sa Gingharian sa Diyos.—Mat. 24:31; Pin. 5:9, 10. w22.05 16 ¶4-5

Gitudloan ni Jesus ang iyang mga sumusunod nga kinahanglang sakto ang ilang panghunahuna sa ilang kaugalingon. Gipasaligan sila ni Jesus: “Nahibalo [ang Diyos] sa gidaghanon sa buhok sa inyong ulo.” (Mat. 10:30) Makahupay gyod kaayo nâ, ilabina kon usahay negatibo tag panghunahuna sa atong kaugalingon. Oo, ang atong langitnong Amahan interesado kaayo nato—sa ato pa, importante ta niya. Busa ayaw gyod paghunahuna nga dili ka angayang mosimba kang Jehova ug mabuhi sa Paraiso. Ayawg hunahunaa nga nasayop si Jehova sa pagpili nimo. Mga 15 ka tuig na ang milabay, ang Bantayanang Torre naghisgot nga angay natong ugmaron kini nga balanseng panghunahuna bahin sa kaugalingon: “Siyempre, dili nato gustong lantawon ang atong kaugalingon nga taas kaayo nga kita mahimo na hinuong garboso; ni gusto natong lantawon ang atong kaugalingon nga ubos kaayo nga bation natong kita walay pulos. Hinunoa, ang atong tumong mao ang pagbaton ug kasarangang panglantaw sa atong kaugalingon, nga nahibalo sa atong maayong mga hiyas ug sa atong mga limitasyon.” w22.05 24-25 ¶14-16

Sa unsang paagi ang kada usa nato makaamot niini nga panaghiusa? Pinaagi sa pagkahimong makigdaiton. (Mat. 5:9; Roma 12:18) Matag higayon nga maningkamot ta nga mamentinar ang atong maayong relasyon sa uban diha sa kongregasyon, makadugang ta sa kanindot sa espirituwal nga paraiso. Atong hinumdoman nga si Jehova ang nagkabig sa matag usa nga nagpuyo sa espirituwal nga paraiso. (Juan 6:44) Imadyina kon unsa ka malipayon si Jehova dihang iyang makita nga naningkamot ta nga mapalig-on ang kalinaw ug panaghiusa sa iyang mga alagad nga giisip niyang bililhon! (Isa. 26:3; Hag. 2:7) Sa unsang paagi bug-os tang makabenepisyo sa mga panalangin nga atong nadawat ingong mga alagad sa Diyos? Pamalandongon nato ang atong natun-an sa Pulong sa Diyos. Pinaagi sa pagtuon ug pagpamalandong, maugmad nato ang maayong mga hiyas nga makatabang nato sa pagpakitag inigsoong gugma diha sa kongregasyon.—Roma 12:10. w22.11 12-13 ¶16-18

Dihang dawaton nato nga gipasaylo na ta ni Jehova, mobati tag “kahayahay,” apil na ang kalinaw sa hunahuna ug hinlong konsensiya. Bation lang nato ni kon si ‘Jehova mismo’ ang mopasaylo nato. (Buh. 3:19) Dihang pasayloon ta ni Jehova, makigsuod siya nato pag-usab nga mora bag wala ta makasala. Dihang mapasaylo na ta ni Jehova, dili na niya hinumdoman ang atong sala o silotan ta tungod ana. (Isa. 43:25) Ibutang ni Jehova ang atong mga sala nga “sama ka layo sa sidlakan gikan sa kasadpan.” (Sal. 103:12) Dihang atong pamalandongon kon unsa ka dako ang pagpasaylo ni Jehova, ang atong kasingkasing mapuno gyod ug pasalamat ug pagtahod kaniya. (Sal. 130:4) Ang pagpasaylo ni Jehova dili niya ibase sa kon unsa ka dako o ka gamay ang atong sala. Gamiton ni Jehova ang iyang kahibalo ingong atong Maglalalang, Tighatag ug Balaod, ug Maghuhukom dihang modesisyon kon mopasaylo ba siya o dili. w22.06 5 ¶12-14

Si Jehova naghatag ug nindot nga paglaom sa tanan nga nahigugma kaniya. Sa dili madugay, wad-on niya ang sakit, kagul-anan, ug kamatayon. (Pin. 21:3, 4) Iyang tabangan “ang mga maaghop” kinsa naglaom kaniya nga himoong paraiso ang yuta. (Sal. 37:9-11) Ug ipaposible niya nga ang matag usa nato makabaton ug suod kaayong relasyon kaniya nga mas labaw pa kay sa atong napahimuslan karon. Pagkanindot niana nga paglaom! Pero nganong makasalig ta nga matuman ang mga saad sa Diyos? Kay si Jehova kanunayng motuman sa iyang mga saad. Busa makalaom gyod ta kang Jehova. (Sal. 27:14) Mapakita nato ni pinaagi sa mapailobon ug malipayong paghulat nga tumanon sa atong Diyos ang iyang mga saad. (Isa. 55:10, 11) Hinaot magpabilin tang maunongon kang Jehova kay segurado ta nga iyang gantihan kadtong “sinserong nangita kaniya.” w22.06 20 ¶1; 25 ¶18

Makaseguro ta nga ingong Ulo sa pamilya, sundon gyod ni Jehova ang prinsipyo nga iyang gipasulat diha sa 1 Timoteo 5:8. Kon kombinsido ta nga gihigugma ta ni Jehova ug ang atong pamilya, dili ta magduhaduha nga matagan-an ta sa atong panginahanglan. (Mat. 6:31-33) Gusto ni Jehova nga tagan-an ta. Siya mahigugmaon ug mahinatagon kaayo. Dihang gilalang niya ang yuta, dili lang ang atong pangunang panginahanglan ang iyang gihatag. Tungod sa iyang gugma, gipuno niya ang yuta sa mga butang nga makapalipay nato. (Gen. 2:9) Bisan pag usahay, igoigo lang ang atong nabatonan, maayong hunahunaon nga natagan-an ang atong panginahanglan. Wa gyod mosipyat si Jehova sa pagtagana nato. (Mat. 6:11) Angay natong hinumdoman nga bisan unsay atong isakripisyo karon, wala ra na sa kumingking sa ihatag kanato sa atong mahigugmaong Diyos, karon ug sa umaabot.—Isa. 65:21, 22. w22.06 15 ¶7-8

Dili lang ang mga interesado ang nanginahanglan ug gahing espirituwal nga pagkaon, kondili kitang tanan. Si apostol Pablo misulat nga ang pagpadapat sa atong nakat-onan sa Bibliya makatabang nato sa ‘pag-ila sa maayo ug sa daotan.’ Niining lisod nga panahon nga ubos na kaayo ang moralidad sa mga tawo, usahay lisod kaayo ang pagsunod sa mga sukdanan ni Jehova. Pero gipaneguro ni Jesus nga molig-on ta pinaagig lamiang espirituwal nga pagkaon. Kini nga pagkaon naggikan sa Pulong sa Diyos, ang Bibliya. Sama kang Jesus, gihatagan nato ang ngalan sa Diyos ug pasidungog nga angay gyod niini. (Juan 17:6, 26) Pananglitan, sukad sa 1931, ato nang gitawag ang atong kaugalingon ingong mga Saksi ni Jehova. Pinaagi niana, gipakita nato kon unsa ka importante kanato ang ngalan sa Diyos ug gusto nato nga mailhan ta sa iyang ngalan. (Isa. 43:10-12) Gibalik pod sa Bag-ong Kalibotang Hubad sa Balaang Kasulatan ang ngalan sa Diyos sa kon asa kini angayng makita sa Bibliya. w22.07 11 ¶11-12

Apil sab sa kamatuoran sa Bibliya ang maayong balita bahin sa Gingharian sa Diyos. Ang kamatuoran bahin sa Gingharian gipakasama ni Jesus sa natago nga bahandi. Sa Mateo 13:44, si Jesus miingon: “Ang Gingharian sa langit nahisamag bahandi nga gilubong sa uma nga nakalotan sa usa ka tawo ug gitabonag balik; ug tungod sa iyang kalipay, siya milakaw ug gibaligya ang tanan niyang kabtangan ug gipalit ang uma.” Matikdi nga ang tawo wala mangita sa bahandi. Pero dihang iya ning nakaplagan, mihimo siyag dagkong sakripisyo aron iya ning mabatonan. Gani, gibaligya niya ang tanan niyang kabtangan. Ngano? Kay nahibalo siya kon unsa ka bililhon ang maong bahandi. Nahibalo ta nga walay bisan unsang butang nga gitanyag niining kalibotana ang makalabaw sa atong kalipay sa pag-alagad kang Jehova karon ug sa paglaom nga mabuhi sa walay kataposan ubos sa pagmando sa Gingharian. Ang pribilehiyo nga mahimong suod nga higala ni Jehova mas labaw pa kay sa bisan unsa nga atong isakripisyo. Mabatonan nato ang kinadak-ang kalipay kon ‘bug-os nato siyang mapalipay.’—Col. 1:10. w22.08 15 ¶8-9; 17 ¶12

Giunsa pagkahibalo ni Jose nga giisip sa iyang Diyos nga “dakong pagkadaotan” ang pagpanapaw? Ang Moisesnong Balaod nga dunay klarong sugo, “Ayawg panapaw,” gisulat mga 200 pa ka tuig sa ulahi. (Ex. 20:14) Bisan pa ana, nakaila pag-ayo si Jose kang Jehova maong nahibalo siya nga gidumtan ni Jehova ang pagpanapaw. Pananglitan, seguradong nahibalo si Jose nga gusto ni Jehova nga ang kaminyoon maoy panaghiusa tali lang sa usa ka lalaki ug usa ka babaye. Ug seguradong nakadungog si Jose sa duha ka higayon nga giprotektahan ni Jehova ang iyang lola sa tuhod nga si Sara aron dili siya mahilabtan sa uban. (Gen. 2:24; 12:14-20; 20:2-7) Dihang gipamalandong ni Jose ang maong mga panghitabo, seguradong nasabtan niya kon unsay husto ug sayop sa panan-aw sa Diyos. Kay gimahal ni Jose ang iyang Diyos nga si Jehova, determinado siyang mosunod kon unsay matarong sa panglantaw ni Jehova. w22.08 26 ¶1-2

Kini nga tagna wala magtumong sa simbolikong pagkabanhaw, ang espirituwal nga pagpasig-uli sa mga alagad sa Diyos panahon sa kataposang mga adlaw, nga maoy atong pagsabot kaniadto. Hinuon, kini nagtumong sa pagkabanhaw sa mga patay nga mahitabo sa umaabot nga bag-ong kalibotan. Nganong makaingon ta ana? Ang pulong nga “abog” gigamit sab sa Job 17:16 sa pagtumong sa “Lubnganan.” Gipakita niini nga ang Daniel 12:2 nagtumong sa literal nga pagkabanhaw nga mahitabo human sa kataposang mga adlaw ug human sa gubat sa Armagedon. Pero unsay gipasabot sa giingon sa Daniel 12:2 nga ang uban banhawon ngadto sa “kinabuhing walay kataposan”? Nagpasabot ni nga kadtong mga gibanhaw ug nakaila, o padayong moila, ug mosunod kang Jehova ug Jesus panahon sa 1,000 ka tuig makadawat ug kinabuhing walay kataposan.—Juan 17:3. w22.09 21 ¶6-7

Wala nâ magpasabot nga gidahom ni Jehova nga basta na lang ta mosalig sa uban, kondili gusto niya nga mosalig ta nila kay kasaligan sila. Ang pagsalig parehas sa pagtahod. Kinahanglan tang maningkamot nga ipakita nga angayan ta niana, ug nagkinahanglan nag panahon. Unsaon nimo pag-ugmad ang imong pagsalig sa mga igsoon? Ilha sila pag-ayo. Pakig-estorya nila diha sa tigom. Pakig-uban nila sa ministeryo. Pailobi sila, ug hatagi silag kahigayonan nga ipakita nga kasaligan sila. Sa primero, tingali pilion ra nimo ang personal nga mga butang nga imong isulti sa igsoon nga bag-o pa nimong nahigala. Samtang magkasuod mo, tingali mas komportable na kang mosulti niya sa uban pang personal nga mga butang. (Luc. 16:10) Pero unsay puwede nimong himoon kon nadaot sa igsoon ang imong pagsalig niya? Ayaw dayon paghunahuna nga taposon ang inyong panaghigalaay. Hinuon, palabya usa ang panahon. Ayawg tugoti nga ang gihimo sa uban makawala sa imong pagsalig sa mga igsoon. w22.09 4 ¶7-8

Ang ansiyano nga si Miqueas mibati nga dili maayo ang pagtratar kaniya sa pipila ka brader nga may mga pribilehiyo. Pero gihuptan niya ang maayong panghunahuna ug naningkamot siya nga makontrol ang iyang gibati. Nagsige siyag ampo kang Jehova nga hatagan siyag balaang espiritu ug kusog aron makalahutay. Nag-research sab siya sa atong mga publikasyon. Unsay atong makat-onan? Kon dili maayo ang pagtratar kanimo sa usa ka igsoon, pabiling kalmado ug kontrolaha ang imong negatibong pagbati. Wala ka mahibalo kon ngano tingaling nasulti o nabuhat to niya. Busa ampo kang Jehova ug hangyoa siya nga tabangan ka nga masabtan ang panglantaw sa igsoon. Ayaw paghunahuna nga intensiyon sa igsoon nga pasakitan ka ug paningkamoti nga mapasaylo nimo siya. (Prov. 19:11) Hinumdomi nga nahibalo si Jehova sa imong kahimtang ug hatagan ka niyag kusog aron makalahutay.—Eccl. 5:8. w22.11 21 ¶5

Pagpilig mga higala nga nahigugma kang Jehova. Ang pagpilig maayong mga higala makatabang nimo nga mahimong hamtong nga Kristohanon. (Prov. 13:20) Si Julien, nga usa ka ansiyano, miingon: “Sa batan-on pa ko, nasuod ko sa mga igsoon nga nakauban nako sa pagsangyaw. Dasig kaayo sila, ug nakatabang sila nako nga mag-enjoy sa ministeryo. . . . Nakita pod nako nga wala kaayo koy maayong mga higala sa una kay nakigsuod ko niadto lang mga kaedad nako.” Unsay imong himoon kon naay indibiduwal sa kongregasyon nga dili maayog impluwensiya nimo? Nahibalo si Pablo nga ang uban diha sa kongregasyon sa unang siglo dili maayog espirituwalidad, maong iyang gipasidan-an si Timoteo nga dili makigsuod nila. (2 Tim. 2:20-22) Bililhon kaayo ang atong relasyon kang Jehova. Naningkamot ta pag-ayo nga masuod kaniya, maong dili gyod ta makigsuod niadtong makadaot sa atong relasyon sa atong langitnong Amahan. w22.08 5-6 ¶13-15

Dili ta parehas niadtong nagsalikway sa tambag sa Diyos kay atong gihigugma ang iyang tambag apil ang iyang mga sukdanan sa moralidad. Mapalig-on nato ang maong gugma pinaagi sa pagtandi sa mga resulta sa pagsunod ug dili pagsunod kang Jehova. Matikdi ang lainlaing problema nga giatubang sa mga tawo kay gisalikway nila ang maalamong tambag ni Jehova. Dayon pamalandonga kon unsa ka maayo ang imong kinabuhi kay gisunod nimo ang Diyos. (Sal. 32:8, 10) Gitanyag ni Jehova ang iyang kaalam ngadto sa tanan, pero wala siya mamugos nga dawaton kini. Hinuon, iyang gisulti kon unsay mahitabo niadtong dili maminaw sa iyang kaalam. (Prov. 1:29-32) Mag-antos sila sa resulta sa ilang desisyon. Sa ngadtongadto, ang ilang pagkinabuhi moresultag pag-antos, kalisdanan, ug sa ulahi kalaglagan. Pero kadtong maminaw sa maalamong tambag ni Jehova ug magpadapat niini makasalig niini nga saad: “Ang maminaw nako magpuyo nga may kasegurohan ug dili mahadlok nga may moabot nga katalagman.”—Prov. 1:33. w22.10 21 ¶11-13

Ang pagkahadlok kang Jehova nagpasabot nga tahoron nato siya pag-ayo ug dili nato himoon ang bisan unsa nga makapasuko niya. (Prov. 16:6) Busa padayon tang maningkamot nga mosunod sa mga sukdanan sa Diyos bahin sa husto ug sayop, nga iyang gipasulat diha sa Bibliya. (2 Cor. 7:1) Magmalipayon ta kon himoon nato ang mga butang nga gihigugma ni Jehova ug isalikway ang mga butang nga iyang gidumtan. (Sal. 37:27; 97:10; Roma 12:9) Ang usa ka tawo tingali nahibalo nga si Jehova may awtoridad sa pagtakda kon unsay husto ug sayop. Pero kinahanglang andam pod siyang mosunod sa mga sukdanan sa Diyos. (Roma 12:2) Mapakita nato pinaagi sa atong binuhatan nga tinuod tang nagtuo nga ang pagsunod sa mga sukdanan ni Jehova makahatag gyod natog kaayohan. (Prov. 12:28) Mao nay gibati ni David, kay siya miingon bahin kang Jehova: “Gipaila nimo kanako ang dalan sa kinabuhi. Anaa sa imong atubangan ang tumang kalipay; dunay kalipay sa imong tuong kamot hangtod sa hangtod.”—Sal. 16:11. w22.10 8 ¶9-10

Si Jesus nagpabiling mapainubsanon ug balanseg panghunahuna sa kaugalingon. Sa wala pa siya moanhi sa yuta, dili bastabasta ang iyang nahimo sa pag-alagad kang Jehova. Pinaagi kang Jesus, “gihimo ang tanang ubang butang sa langit ug sa yuta.” (Col. 1:16) Dihang gibawtismohan siya, posibleng nahinumdoman niya ang tanan niyang nahimo dihang kauban niya ang iyang Amahan. (Mat. 3:16; Juan 17:5) Pero wala nâ makapahimo niyang garboso. Wala gyod niya ipabati sa uban nga mas labaw siya kay kanila. Giingnan niya ang iyang mga tinun-an nga mianhi siya sa yuta “dili aron alagaran, kondili aron sa pag-alagad ug sa paghatag sa iyang kinabuhi ingong lukat baylo sa daghan.” (Mat. 20:28) Mapainubsanon pod siyang miingon nga dili siya makabuhat ug bisan unsa sa iyang kaugalingong pagbuot. Mapainubsanon gyod kaayo si Jesus! Maayo kaayo siyang ehemplo para nato. w22.05 24 ¶13

Dihang modesisyon kon magpasaylo ba Siya, konsiderahon ni Jehova kon ang nakasala nahibalo ba nga sayop ang iyang ginahimo. Giklaro kini ni Jesus sa Lucas 12:47, 48. Ang tawo nga nagplano sa paghimog daotan—ug nahibalo pag-ayo nga ang iyang ginabuhat makapasuko kang Jehova—nakahimog grabeng sala. Delikado ang iyang kahimtang kay basig dili siya pasayloon. (Mar. 3:29; Juan 9:41) Naa bay paglaom nga pasayloon siya? Oo! Konsiderahon sab ni Jehova kon ang nakasala kinasingkasing bang naghinulsol. Ang paghinulsol nagpasabot nga “bag-ohon ang panghunahuna, pagbati, o intensiyon.” Nagpasabot pod ni nga ang usa nagbasol ug naguol pag-ayo kay nakahimo siyag dili maayo o kaha wala niya mahimo ang maayong mga butang nga angay unta niyang himoon. Ang tawo nga naghinulsol naguol pag-ayo, dili lang tungod kay nakahimo siyag kasaypanan, kondili kay gitugotan pod niya nga mohuyang ang iyang espirituwalidad nga maoy hinungdan nga nakahimo siyag daotan. w22.06 5-6 ¶15-17

Ang atong mga kaaway nagpakaylap ug sayop ug bakak nga mga impormasyon bahin sa mga brader nga nagapanguna sa organisasyon ni Jehova. (Sal. 31:13) Ang ubang brader giaresto ug gikasohan ingong kriminal. Ingon sab niana ang nasinatian sa mga Kristohanon sa unang siglo dihang si apostol Pablo sayop nga giakusahan ug gidakop. Ang ubang Kristohanon sa unang siglo mibiya kang apostol Pablo dihang napriso siya sa Roma. (2 Tim. 1:8, 15; 2:8, 9) Hunahunaa ang gibati ni Pablo. Nakaatubang siyag daghang kalisdanan ug gipameligro pa gani niya ang iyang kinabuhi para nila. (Buh. 20:18-21; 2 Cor. 1:8) Hinaot dili nato sundogon kadtong mibiya kang Pablo! Busa dili ta matingala nga gipuntirya gyod ni Satanas ang mga brader nga nagapanguna. Gusto niya nga dili na sila magmatinumanon ug gusto sab niya nga mahadlok ta. (1 Ped. 5:8) Padayon natong suportahan ang mga igsoon ug mounong ta nila.—2 Tim. 1:16-18. w22.11 16-17 ¶8-11

Dakog posibilidad nga Hudiyo ang mahinulsolong kriminal nga gilansang tapad ni Jesus. Ang mga Hudiyo nagsimbag usa ka Diyos, pero ang mga tawo sa kanasoran nagtuo sa daghang diyos. (Ex. 20:2, 3; 1 Cor. 8:5, 6) Kon ang maong kriminal dili Hudiyo, ang pangutana unta sa teksto karong adlawa maoy, “Wala ba gyod ka mahadlok sa mga diyos?” Dugang pa, si Jesus gipadala dili ngadto sa mga tawo sa kanasoran, kondili sa “nawalang mga karnero sa nasod sa Israel.” (Mat. 15:24) Gipadayag sa Diyos ngadto sa mga Israelinhon nga iyang banhawon ang mga patay. Lagmit nahibalo niini ang mahinulsolon nga kriminal, ug ang iyang giingon nagpakita nga nagtuo siya nga banhawon ni Jehova si Jesus aron magmando sa Gingharian sa Diyos. Lagmit ang maong tawo naglaom nga banhawon sab siya sa Diyos. Kay Hudiyo, ang mahinulsolon nga kriminal seguradong nahibalo bahin kang Adan ug Eva. Busa sa dihang naghisgot si Jesus ug Paraiso diha sa Lucas 23:43, posibleng ang nahunahunaan sa kriminal maoy nindot nga tanaman dinhi sa yuta.—Gen. 2:15. w22.12 8-9 ¶2-3

Molampos lang ta sa buluhatong pagsangyaw pinaagi sa tabang sa espiritu sa Diyos. Ngano? Kay si Satanas nakiggubat nato aron pahunongon ta sa atong buluhaton. (Pin. 12:17) Sa panglantaw sa tawo, wa gyod tay dag-anan kang Satanas. Pero pinaagi sa atong pagsangyaw, ato siyang ginapildi! (Pin. 12:9-11) Sa unsang paagi? Dihang mosangyaw ta, atong gipakita nga wala ta mahadlok niya. Kada sangyaw nato, gipildi nato si Satanas. Busa nagpakita ni nga gihatagan tag kusog sa balaang espiritu ug giuyonan ta ni Jehova. (Mat. 5:10-12; 1 Ped. 4:14) Ang espiritu sa Diyos makahatag natog kusog sa pag-atubang sa bisan unsang kalisdanan sa ministeryo. (2 Cor. 4:7-9) Busa unsay atong himoon aron padayon natong madawat ang espiritu sa Diyos? Kinahanglang dili ta mohunong sa pag-ampo kay makasalig ta nga tubagon ni Jehova ang atong mga pag-ampo. w22.11 5 ¶10-11

Mapakita nato ang atong gugma sa mga igsoon pinaagi sa pagpaningkamot nga makigdait kanila. Maningkamot ta nga sundogon ang ehemplo ni Jehova sa pagpasaylo. Kon gitugotan ni Jehova nga mamatay ang iyang Anak para sa atong mga sala, dili ba angay pod nga andam tang magpasaylo sa mga igsoon dihang makasala sila nato? Dili nato gustong sundogon ang daotang ulipon diha sa usa sa mga ilustrasyon ni Jesus. Bisan pag gipapas na sa iyang agalon ang iyang dakong utang, wala pasayloa sa maong ulipon ang iyang isigkaulipon nga wala makabayad sa gamayng utang niini. (Mat. 18:23-35) Kon ikaw ug ang usa ka igsoon wala magkasinabot, puwede kaha nga mouna kag duol niya aron makigdait sa dili pa motambong sa Memoryal? (Mat. 5:23, 24) Kon imo nang himoon, imong gipamatud-an ang imong dakong gugma kang Jehova ug Jesus. w23.01 29 ¶8-9

Aron mahibaloan kon unsay panginahanglan sa mga igsoon, pangutan-a sila, pero sa paagi nga dili sila maulawan. (Prov. 20:5) Igo pa ba ang ilang pagkaon, tambal, ug ubang suplay? Nameligro ba sila nga mawad-ag trabaho o puy-anan? Nanginahanglan ba silag tabang sa pag-aplay para sa ayuda sa gobyerno? Gusto ni Jehova nga kitang tanan modasig ug motabang sa uban. (Gal. 6:10) Bisag gamay ra nga tabang ang atong mahatag sa igsoon nga nasakit, dako nig epekto kaniya. Ang usa ka bata puwedeng magpadalag card o drowing aron dasigon ang usa ka brader. Ang usa ka batan-on puwedeng mamalit o mohimo sa uban pang gikinahanglan sa usa ka sister. Ang uban tingali maglutog pagkaon para sa usa ka igsoon nga nasakit. Ang ubang igsoon nagpadalag card aron pasalamatan ang mga ansiyano, nga sagad mas busy pa gyod dihang dunay sakit nga mokaylap. Maayo gyod nga himoon nato ang atong maarangan aron ‘padayon tang magdinasigay ug maglig-onay’!—1 Tes. 5:11. w22.12 22 ¶2; 23 ¶5, 6

Ang mga Saduseo pamilyar kaayo sa unang lima ka basahon sa Hebreohanong Kasulatan. Pero gibalewala nila ang importanteng mga kamatuoran nga naa nianang inspiradong mga basahon. Pananglitan, matikdi kon giunsa pagtubag ni Jesus ang mga Saduseo nga nangutana niya bahin sa pagkabanhaw. Iya silang giingnan: “Wala ba mo makabasa sa basahon ni Moises, sa asoy bahin sa tunokong tanom, dihang ang Diyos nag-ingon kaniya: ‘Ako ang Diyos ni Abraham, ang Diyos ni Isaac, ug ang Diyos ni Jacob’?” (Mar. 12:18, 26) Bisag kadaghan nang nabasa sa mga Saduseo ang giingon sa Diyos kang Moises, ang pangutana ni Jesus nagpakita nga gibalewala nila ang usa ka importanteng kamatuoran sa Pulong sa Diyos—ang pagtulon-an bahin sa pagkabanhaw. (Luc. 20:38) Unsay atong makat-onan? Dihang magbasa, gusto natong matikdan ang tanang ikatudlo kanato sa usa ka bersikulo o asoy sa Bibliya. Gusto natong masabtan dili lang ang pangunang mga pagtulon-an, kondili apil pod ang lawom nga mga kamatuoran ug prinsipyo nga natago diha sa mga teksto. w23.02 11 ¶9-10

Ang tanang saksi nga gitumong sa teksto karong adlawa nakaagig grabeng mga pagsulay, pero nagmatinumanon gihapon sila kang Jehova sa tibuok nilang kinabuhi. (Heb. 11:36-40) Nasayang ba ang ilang paglahutay ug paningkamot? Wala gyod! Bisag wala nila makita ang katumanan sa tanang saad sa Diyos sa buhi pa sila, padayon silang milaom kang Jehova. Ug kay segurado sila nga si Jehova nalipay kanila, masaligon sila nga ilang makita ang katumanan sa maong mga saad. (Heb. 11:4, 5) Ang ilang ehemplo makapalig-on sa atong determinasyon nga padayong molaom kang Jehova. Karon, nagpuyo ta sa kalibotan nga nagkagrabe ang pagkadaotan. (2 Tim. 3:13) Padayon gihapong ginasulayan ni Satanas ang katawhan sa Diyos. Pero bisan unsang kalisdanan ang atong maatubang, hinaot padayon tang maningkamot pag-ayo sa pag-alagad kang Jehova, kay nahibalo ta nga “kita naglaom sa buhi nga Diyos.”—1 Tim. 4:10. w22.06 25 ¶17-18

Ang usa ka rason kon nganong angay tang maningkamot nga magpabiling himsog mao nga gusto natong ihatag kang Jehova ang atong kinamaayohan. (Mar. 12:30) Busa likayan nato ang bisan unsa nga makadaot sa atong panglawas. (Roma 12:1) Siyempre, dili kalikayan nga masakit ta usahay. Pero maningkamot gihapon ta nga magpabiling himsog kay gusto natong ipakita sa atong langitnong Amahan nga gipabilhan nato ang regalo nga kinabuhi. Kon masakiton ta ug tigulang na, daghan na tingali tag dili mahimo. Tungod ana, basig madismayar ta ug maguol. Pero dili gyod ta mosurender ug pasagdan na lang ang atong panglawas. Ngano? Kay bisag tigulang na kaayo ta o masakiton, makadayeg gihapon ta kang Jehova sama kang Haring David. Makapahupay gyong mahibaloan nga gipabilhan gihapon ta sa Diyos bisag ingon ana na ang atong kahimtang. (Mat. 10:29-31) Bisan pag mamatay ta, gusto gyod ni Jehova nga banhawon ta. (Job 14:14, 15) Busa samtang buhi ta, ampingan nato ang atong panglawas ug kinabuhi. w23.02 21 ¶3-5

Ang mga ngalan ba sa dakong panon sa ubang mga karnero magpabilin sa basahon sa kinabuhi human sila maluwas sa Armagedon? Oo. (Pin. 7:14) Si Jesus miingon nga kini sila nga samag karnero “makadawat ug kinabuhing walay kataposan.” (Mat. 25:46) Pero kadtong maluwas sa Armagedon dili dihadiha makadawat ug kinabuhing walay kataposan. Panahon sa Usa ka Libo ka Tuig nga Pagmando, si Jesus “magbantay kanila ug magtultol kanila ngadto sa mga tubod sa mga tubig sa kinabuhi.” Kon mosunod sila sa paggiya sa Kristo ug sa ulahi mahukmang matinumanon kang Jehova, ang ilang ngalan permanente nang masulat sa basahon sa kinabuhi. (Pin. 7:16, 17) Pero ang samag mga kanding malaglag sa Armagedon. Si Jesus miingon nga sila “mamatay hangtod sa hangtod.” (Mat. 25:46) Ubos sa paggiya sa Diyos, si apostol Pablo miingon nga “kini sila sentensiyahan ug kalaglagan nga hangtod sa hangtod ug mahanaw.”—2 Tes. 1:9; 2 Ped. 2:9. w22.09 16 ¶7-8

Ang kalalangan ni Jehova makatabang sa mga pamilya nga magrelaks ug maglingawlingaw, maong mas magkasuod sila. Si Jehova naghimog daghang nindot nga lugar, ug makalingawlingaw ta didto. Daghang pamilya ang ganahang manuroy sa mga park, probinsiya, bukid, o dagat. Sa bag-ong kalibotan sa Diyos, ma-enjoy na pag-ayo sa mga ginikanan ug mga anak ang kalalangan ni Jehova. Nianang panahona, dili na ta mahadlok sa mga hayop ug dili na pod sila mahadlok nato. (Isa. 11:6-9) Ma-enjoy nato hangtod sa hangtod ang mga butang nga gihimo ni Jehova. (Sal. 22:26) Pero mga ginikanan, karon pa lang, tabangi ang inyong mga anak nga mag-enjoy sa kalalangan. Kon inyo ning gamiton sa pagtudlo sa inyong mga anak bahin kang Jehova, seguradong mouyon sila sa giingon ni Haring David: “Oh Jehova . . . walay mga buhat nga sama sa imong mga buhat.”—Sal. 86:8. w23.03 25 ¶16-17