Disyembre

Andam na ba gyod magpabawtismo ang opisyal sa palasyo sa Etiopia? Konsideraha ni: Ang Etiopianhon “miadto sa Jerusalem aron mosimba.” (Buh. 8:27) Sa ato pa, nakabig na siya sa mga Hudiyo; Judaismo na ang iyang relihiyon. Seguradong nakakat-on siya bahin kang Jehova gikan sa sagradong mga basahon sa Hebreohanong Kasulatan. Pero gusto pa niyang mahibalog dugang. Gani, dihang nakita siya ni Felipe sa dalan, siya nagbasa sa linukot nga basahon ni propetang Isaias. (Buh. 8:28) Gusto niya nga mahibalog dugang. Bisag layo, mibiyahe siya gikan sa Etiopia paingon sa templo sa Jerusalem aron mosimba kang Jehova. Gitudloan ni Felipe ang Etiopianhon ug pipila ka bag-o ug importanteng kamatuoran, sama sa kon kinsa ang Mesiyas. (Buh. 8:34, 35) Milalom ang iyang gugma kang Jehova ug sa Iyang Anak. Tungod ana, midesisyon siya nga magpabawtismo ingong sumusunod ni Jesu-Kristo—desisyon nga makapausab sa iyang kinabuhi. Nakita ni Felipe nga andam na ang opisyal, maong iya siyang gibawtismohan. w23.03 8-9 ¶3-6

Dili nato mapalipay si Jehova kon mamakak ta. (Prov. 6:16, 17) Bisag daghan karon ang naghunahuna nga normal rang mamakak, atong gisunod ang panghunahuna ni Jehova. (Sal. 15:1, 2) Siyempre dili ta mamakak, pero likayan pod nato ang tinuyong paghatag ug kulang nga impormasyon nga maoy hinungdan nga masayop ang uban sa ilang konklusyon. Angay sab natong likayan ang pagpanabi. (Prov. 25:23; 2 Tes. 3:11) Kon mamatikdan nimo nga tabi na ang inyong giestoryahan, paningkamoti nga lahion ang inyong estorya. Kay gilibotan tag mga tawo nga dili maayog sinultihan, kinahanglang paningkamotan nato nga ang atong sinultihan makapalipay kang Jehova. Panalanginan ta niya kon mosulti ta sa paagi nga madayeg siya diha sa ministeryo, sa tigom, ug sa atong pagpakig-estorya sa uban. Dihang laglagon na kining daotang kalibotan, mas sayon na nga pasidunggan si Jehova pinaagi sa atong sinultihan.—Jud. 15. w22.04 9 ¶18-20

Kon pamalandongon nato kon unsa ka dako ang gugma ni Jehova ug Jesus kanato, mapalihok ta nga higugmaon pod sila. (1 Juan 4:10) Mas higugmaon pa gyod nato sila dihang atong masabtan nga si Jesus namatay para sa matag usa kanato. Nasabtan kini ni apostol Pablo ug iyang gipahayag ang iyang apresasyon diha sa iyang sulat ngadto sa mga taga-Galacia. Siya miingon: ‘Ang Anak sa Diyos nahigugma nako ug nagtugyan sa iyang kaugalingon alang kanako.’ (Gal. 2:20) Tungod sa lukat, naa nay basehanan si Jehova sa pagkabig nimo aron mahimo ka niyang higala. (Juan 6:44) Di ba makapatandog sa kasingkasing nga naay nakitang maayo si Jehova nimo ug dako kaayo siyag gisakripisyo aron mahimo ka niyang higala? Seguradong mas nakapalalom ni sa imong gugma kang Jehova ug Jesus. Busa maayong pangutan-on nato ang atong kaugalingon, ‘Unsaon nako pagpakita ang maong gugma?’ Ang atong gugma sa Diyos ug sa Kristo magpalihok nato nga ipakita ang atong gugma sa uban.—2 Cor. 5:14, 15; 6:1, 2. w23.01 28 ¶6-7

Ang Bibliya dako gyod ug tabang sa pagtuman sa katuyoan ni Jehova nga ang iyang mga magsisimba “magkahiusa sa pag-alagad kaniya.” Gipasulat ni Jehova ang daghang bahin sa Bibliya sa paagi nga masabtan lang sa mapainubsanong mga tawo. (Luc. 10:21) Daghan ang gabasag Bibliya. Pero kadto lang mapainubsanon ang tinuod nga nakasabot ug nagpadapat sa giingon niini. (2 Cor. 3:15, 16) Ang Bibliya nagpakita sa kaalam ni Jehova. Gigamit ni Jehova ang Bibliya dili lang aron tudloan ta ingong grupo kondili aron tudloan ug hupayon pod ta ingong indibiduwal. Dihang basahon nato ang Pulong ni Jehova, bation gyod nato nga interesado siya sa matag usa nato. (Isa. 30:21) Kadaghan ba kang nakabasag teksto nga morag para gyod nimo? Pero ang Bibliya nakatandog pod sa minilyong tawo. Nganong naa ni praktikal nga impormasyon nga mohaom sa imong kahimtang? Tungod kay maalamon kaayo ang Awtor sa Bibliya.—2 Tim. 3:16, 17. w23.02 4-5 ¶8-10

Kay tinuod tang mga Kristohanon, gihigugma nato pag-ayo si Jehova. Gusto natong ihatag kaniya ang atong pinakamaayo. Pero aron mahimo nato na, kinahanglang naa tay espirituwal nga mga tumong, sama sa pag-ugmad ug Kristohanong mga hiyas, pagkat-on ug mapuslanong mga skill, ug pagpangitag paagi nga makatabang sa uban. Nganong angay tang maghunahuna nga mouswag sa espirituwal? Ang kinalabwang rason mao nga gusto natong mapalipay ang atong mahigugmaong Amahan sa langit. Malipay si Jehova kon makita niya nga gigamit gyod nato ang atong mga talento ug abilidad sa pag-alagad kaniya. Dugang pa, gusto natong mouswag sa espirituwal aron mas matabangan nato ang mga igsoon. (1 Tes. 4:9, 10) Bisan unsa na ta ka dugay sa kamatuoran, kitang tanan puwede pang mouswag sa espirituwal. w22.04 22 ¶1-2

Ang politikal nga mga awtoridad niining kalibotana hapit nang moatake sa Bantogang Babilonya, ang tibuok kalibotang imperyo sa bakak nga relihiyon. Kini nga pag-atake mao ang sinugdanan sa dakong kasakitan. Moresulta ba ni nga daghan ang modesisyon sa pagsimba kang Jehova? Dili. Ang Pinadayag kapitulo 6 nagpakita nga nianang panahona, ang mga tawo nga wala mag-alagad kang Jehova modangop sa politikal ug komersiyal nga mga sistema niining kalibotana, nga gipakasamag mga bukid. Kay dili sila modapig sa Gingharian sa Diyos, isipon sila ni Jehova nga mga kaaway. (Luc. 11:23; Pin. 6:15-17) Pero nianang lisod kaayo nga panahon sa kasakitan, makita gyod nga lahi ang matinumanong mga alagad ni Jehova. Sama karon, sila lang unya sa tibuok yuta ang mag-alagad kang Jehova nga Diyos ug dili mosuportar sa “pintas nga mananap.”—Pin. 13:14-17. w22.05 16-17 ¶8-9

Dili lang “maayong balita sa Gingharian” ang angayng isangyaw sa katawhan sa Diyos. (Mat. 24:14) Kinahanglan pod silang mosuportar sa buluhaton sa mga anghel nga gihisgotan sa Pinadayag kapitulo 8 hangtod 10. Kini nga mga anghel nagpahayag ug sunodsunod nga grabeng kalisdanan para niadtong dili magpasakop sa Gingharian sa Diyos. Busa, ang mga Saksi ni Jehova nagsangyaw pod ug mensahe sa paghukom, nga morag “ulan nga yelo ug kalayo,” nga nagpakita kon unsay paghukom sa Diyos sa lainlaing bahin sa daotang kalibotan ni Satanas. (Pin. 8:7, 13) Ang mga tawo kinahanglang mahibalo nga duol na ang kataposan aron makahimo dayon silag mga kausaban sa ilang kinabuhi ug maluwas sa adlaw sa kasuko ni Jehova. (Sof. 2:2, 3) Pero kini nga mensahe dili makapalipay sa daghang tawo. Maong nagkinahanglan ug kaisog ang pagsangyaw bahin ani. Panahon sa dakong kasakitan, mas prangka pa gyod ang mensahe bahin sa kataposang paghukom.—Pin. 16:21. w22.05 7 ¶18-19

Konsideraha ang usa ka Kristohanong magtiayon nga hapit nang mahimong ginikanan. Tingali, daghang tuig na silang nakadungog ug mga pakigpulong bahin sa pagpadakog mga anak. Pero karon, ang maong mga prinsipyo mas dako nag kahulogan para nila. Naa na silay kaugalingong anak nga atimanon. Seryoso ni pero nindot kaayo nga responsibilidad! Tinuod gyod nga dihang mausab ang atong kahimtang, mahimong mas makahuloganon ang mga prinsipyo sa Bibliya nga ato nang nahibaloan. Mao ni usa ka rason kon nganong basahon sa mga magsisimba ni Jehova ang Kasulatan ug, parehas sa gisugo nga himoon sa mga hari sa Israel, ila ning pamalandongon sa “tibuok” nilang kinabuhi. (Deut. 17:19) Mga ginikanan, nabatonan ninyo ang usa sa nindot kaayong mga pribilehiyo sa mga Kristohanon—ang pagtudlo sa inyong mga anak bahin kang Jehova. Pero dili lang basta tudloan ninyo sila bahin sa atong Diyos. Gusto pod ninyong tabangan sila nga higugmaon siya pag-ayo. w22.05 26 ¶2-3

Dili igo nga basta maguol lang ta sa mga sala nga atong nahimo. Kinahanglan sab nga naa tay himoon. Konsiderahon ni Jehova kon ang usa nakombertir ba dihang modesisyon siya sa pagpasaylo. Ang pagkakombertir nagpasabot ug “pagliko.” Sa ato pa, biyaan sa usa ang daotang dalan ug subayon niya ang dalan ni Jehova. (Isa. 55:7) Kinahanglang bag-ohon niya ang iyang panghunahuna aron magiyahan siya sa panghunahuna ni Jehova. (Roma 12:2; Efe. 4:23) Kinahanglan nga determinado siya nga biyaan ang iyang daotang panghunahuna ug binuhatan. (Col. 3:7-9) Siyempre, ang atong pagtuo sa halad sa Kristo mao ang pangunang basehanan aron mapasaylo ta ni Jehova ug mahinloan ta sa atong mga sala. Pasayloon ta ni Jehova pinasukad ana nga halad dihang makita niya nga naningkamot gyod ta nga bag-ohon ang atong binuhatan.—1 Juan 1:7. w22.06 6 ¶16-17

Sukad pa sa una, ang mga tawo naghimog kadaot sa uban. (Eccl. 8:9) Pananglitan, ang mga tawo mag-abuso sa ilang awtoridad, ang mga kriminal mohimog daotan, ang mga bully sa eskuwelahan manginsulto ug manghadlok sa ilang mga classmate, ug ang ubang tawo magmaltratar sa ilang pamilya. Mao diay nga mahadlok ang mga tawo sa ubang tawo! Sa unsang paagi gipahimuslan ni Satanas ang atong kahadlok sa tawo? Gamiton ni Satanas ang atong kahadlok sa tawo aron mapugos ta nga mokompromiso ug moundang sa pagsangyaw. Giimpluwensiyahan ni Satanas ang mga gobyerno aron idili ang atong buluhaton ug lutoson ta. (Luc. 21:12) Sa kalibotan ni Satanas, daghang tawo ang nagpakaylap ug dili tinuod ug makadaot nga impormasyon bahin sa mga Saksi ni Jehova. Tungod niini, yagayagaan ta o dagmalan pa gani. (Mat. 10:36) Angay ba tang matingala sa mga paagi ni Satanas? Dili. Iya na nang gihimo sa unang siglo!—Buh. 5:27, 28, 40. w22.06 16 ¶10-11

Kinsa ning “daghan” nga dad-on ngadto sa pagkamatarong? Sila ang mga binanhaw ug ang mga maluwas sa Armagedon, apil ang mga anak nga matawo sa bag-ong kalibotan. Sa kataposan sa 1,000 ka tuig, ang tanan dinhi sa yuta hingpit na. Angay natong hinumdoman nga ang pagkahingpit wala magpasabot nga ang usa ka tawo awtomatik na nga makadawat ug kinabuhing walay kataposan. Hinumdomi nga si Adan ug Eva hingpit, pero kinahanglan una nilang ipakita nga masinugtanon sila kang Jehova nga Diyos aron makadawat silag kinabuhing walay kataposan. Pero makapaguol kay ilang gisupak si Jehova. (Roma 5:12) Kay ang tanan hingpit na sa kataposan sa 1,000 ka tuig, ang tanan bang hingpit nga mga tawo bug-os nga mosuportar sa pagmando ni Jehova hangtod sa hangtod? O ang uban mosundog ba kang Adan ug Eva nga bisag hingpit wala magmatinumanon? Kini nga mga pangutana kinahanglang matubag. w22.09 22-23 ¶12-14

Dihang tan-awon nimo ang kahimtang sa kalibotan, lisod ba para nimo ang pagtuo nga moarang-arang ni? Ang mga membro sa pamilya wala na kaayoy gugma sa usag usa. Daghang tawo ang nahimong mas bayolente ug hakog. Daghan pod ang dili na kaayo mosalig sa awtoridad. Pero kining mga butanga makahatag nimog pagsalig nga moarang-arang unya ang kahimtang. Ngano? Kay ang ginahimo sa mga tawo karon mao gyod ang gitagna sa Bibliya bahin sa “kataposang mga adlaw.” (2 Tim. 3:1-5) Si bisan kinsang sinserong tawo mouyon gyod nga nagakatuman kining tagnaa, ug ang katumanan niini nagpamatuod nga si Kristo Jesus nagsugod na pagmando ingong Hari sa Gingharian sa Diyos. Pero usa lang ni sa daghang tagna bahin sa Gingharian. Atong makita nga sama sa mga piraso sa jigsaw puzzle, kini nga mga tagna magkatakdo ug naghatag natog klarong ideya kon asa na ta sa dagan sa panahon nga gitakda ni Jehova. w22.07 2 ¶1-2

Panahon sa COVID-19 nga pandemic, nakadawat tag klarong instruksiyon kon unsaon paghimo ang atong mga tigom ug pagsangyaw. Gihimo dayon nato ang atong mga tigom, asembliya, ug kombensiyon pinaagig videoconference. Ang atong pagsangyaw ginahimo halos pinaagi nag sulat ug telepono. Gipanalanginan ni Jehova ang atong mga paningkamot. Daghang sangang buhatan ang nagreport nga mas midaghan ang mga magmamantala. Gani, daghan ang naay makapadasig nga mga eksperyensiya niadtong panahona. Ang uban naghunahuna tingali nga estrikto ra kaayo ang organisasyon kon bahin sa mga safety protocol panahon sa pandemic. Pero balikbalik natong nakita nga sakto gyod ang mga instruksiyon nga atong nadawat. Kon pamalandongon nato ang mahigugmaong paggiya ni Jesus sa iyang katawhan, makasalig ta nga bisag unsay mahitabo, dili gyod ta pasagdan ni Jehova ug sa iyang pinalanggang Anak.—Heb. 13:5, 6. w22.07 13 ¶15-16

Gawas nga dayegon nato si Jehova sa atong mga pag-ampo, gusto pod nato siyang pasalamatan tungod sa maayong mga butang nga iyang ginahatag kanato. Pananglitan, pasalamatan nato siya tungod sa nindot nga kolor sa mga bulak, sa daghang klase sa lamiang pagkaon, ug sa makapalipayng panaghigalaay. Daghan pag gihatag ang atong mahigugmaong Amahan aron malipay ta. (Sal. 104:12-15, 24) Ug ilabinang mapasalamaton ta kang Jehova tungod sa dagayang espirituwal nga pagkaon nga iyang gitagana ug sa atong nindot nga paglaom sa umaabot. Usahay, dali ra tang malimot nga magpasalamat kang Jehova sa tanan niyang ginahimo para nato. Unsay makatabang nimo nga mahinumdom? Puwede nimong ilista kon unsay imong mga gihangyo kang Jehova, ug matag karon ug unya, tan-awa kon giunsa nâ niya pagtubag. Dayon pasalamati siya sa iyang tabang.—Col. 3:15. w22.07 22 ¶8-9

Dili igo nga basta nagtuon lang ta sa kamatuoran. Aron makabenepisyo pag-ayo, kinahanglan tang magkinabuhi uyon sa kamatuoran, sa ato pa, kinahanglan natong ipadapat ang atong nakat-onan. Nianang paagiha lang nga ang kamatuoran makahatag natog tinuod nga kalipay. (Sant. 1:25) Unsaon nato pagseguro nga nagkinabuhi ta uyon sa kamatuoran? Usa ka brader miingon nga maayong susihon nato ang atong kaugalingon kon unsa nay atong pag-uswag ug kon unsa pay angay natong pauswagon. Si apostol Pablo miingon: “Bisan unsang pag-uswag ang atong nahimo, ipadayon nato kini.” (Filip. 3:16) Hunahunaa ang mga kaayohan sa atong pagpaningkamot nga ‘padayong maglakaw sa kamatuoran’! Nabatonan nato ang mas maayong kinabuhi, ug napalipay pa gyod nato si Jehova ug ang mga igsoon. (Prov. 27:11; 3 Juan 4) Mao ni ang kinalabwang mga rason kon nganong gimahal nato ang kamatuoran ug nagkinabuhi ta uyon niini! w22.08 18-19 ¶16-18

Sa unsang paagi mapakita sa mga ansiyano nga ilang gihigugma si Jehova ug Jesus? Usa ka importanteng paagi mao ang pag-atiman sa mga karnero ni Jesus. (1 Ped. 5:1, 2) Klaro nang gisulti ni Jesus kang apostol Pedro. Human ilimod ni Pedro si Jesus sa tulo ka higayon, seguradong gusto gyod niya nga pamatud-an ang iyang gugma kang Jesus. Human sa pagkabanhaw ni Jesus, iyang gipangutana si Pedro: “Simon nga anak ni Juan, gihigugma ba ko nimo?” Makaseguro ta nga gusto gyong himoon ni Pedro ang tanan aron pamatud-an ang iyang gugma sa iyang Agalon. Giingnan ni Jesus si Pedro: “Bantayi ang akong gagmayng mga karnero.” (Juan 21:15-17) Ug mao gyod nay gihimo ni Pedro. Mahigugmaon niyang giatiman ang mga karnero sa Ginoo, nga nagpamatuod sa iyang gugma kang Jesus. Mga ansiyano, unsaon ninyo pagpakita nga importante kaninyo ang giingon ni Jesus kang Pedro? Mapakita ninyo kon unsa ka dako ang inyong gugma kang Jehova ug Jesus pinaagi sa regular nga pag-shepherding sa mga igsoon ug sa paghimog espesyal nga paningkamot aron tabangan ang mga dili aktibo nga mobalik kang Jehova.—Ezeq. 34:11, 12. w23.01 29 ¶10-11

Samtang naningkamot ka nga suklan ang imong kahuyangan, ayaw gyod paghunahuna nga walay makasabot nimo kay delikado na. Kon maghunahuna ka ana, magtuo na hinuon ka nga wala na kay mahimo sa imong situwasyon ug nga di gyod nimo masuklan ang sayop nga mga tinguha. Dili na tinuod kay ang Bibliya nag-ingon: “Uban sa tentasyon siya magtaganag kalingkawasan aron makalahutay mo niini.” Busa bisag kusog ang atong sayop nga tinguha, makapabilin tang matinumanon. Sa tabang ni Jehova, mapugngan nato ang atong kaugalingon sa paghimo sa atong tinguha. Hinumdomi ni: Kay dili ka hingpit, dili nimo malikayan nga motungha usahay ang sayop nga mga tinguha. Pero kon mahitabo na, sukli dayon na, sama sa gihimo ni Jose dihang miikyas dayon siya palayo sa asawa ni Potipar. (Gen. 39:12) Ayawg paundayoni ang imong sayop nga mga tinguha! w23.01 12-13 ¶16-17

Ang hustisya maoy usa ka hiyas ni Jehova. (Deut. 32:4) Ang hustisya konektado kaayo sa pagkadili-mapihigon, ug si Jehova patas kanunay. (Buh. 10:34, 35) Ang iyang pagkadili-mapihigon makita diha sa mga pinulongan nga iyang gigamit sa pagpasulat sa Bibliya. Nagsaad si Jehova nga sa panahon sa kataposan, “ang tinuod nga kahibalo” nga naa sa Bibliya “modagaya.” Daghan ang makasabot niini. (Dan. 12:4) Ang usa ka rason nga ang maong kahibalo midagaya maoy tungod sa paghubad, pag-publish, ug pag-apod-apod sa Bibliya ug sa binase sa Bibliya nga mga publikasyon. Ang katawhan ni Jehova naghubad sa tibuok Bibliya o sa bahin niini sa kapig 240 ka pinulongan, ug wala ni bayad. Tungod ana, ang mga tawo gikan sa tanang nasod nakakat-on sa “maayong balita sa Gingharian” samtang wala pa ang kataposan. (Mat. 24:14) Kay si Jehova Diyos sa hustisya, gihatagan niyag kahigayonan ang daghang tawo nga makaila niya pinaagi sa pagbasa sa iyang Pulong. Iya nang gihimo kay gimahal kaayo niya ang tanang tawo. w23.02 5 ¶11-12

Gihigugma ba nimo ang pagkamatarong? Siyempre! Pero dili ta hingpit, ug kon dili ta mag-amping, posibleng maimpluwensiyahan ta sa panglantaw sa kalibotan bahin sa pagkamatarong. (Isa. 5:20) Para sa uban, kon maghisgot ug tawong matarong, ilang mahunahunaan ang tawo nga mapahitas-on, hinawayon, o nagtuo nga mas matarong siya kay sa uban. Pero dili ganahan ang Diyos ug ingon ana nga mga kinaiya. Sa dinhi pa si Jesus sa yuta, wala siya malipay sa mga lider sa relihiyon nga nagbuotbuot ug ilang kaugalingong mga sukdanan sa pagkamatarong. (Eccl. 7:16; Luc. 16:15) Ang tinuod nga matarong nga tawo dili gyod maghunahuna nga mas matarong siya kay sa uban. Ang pagkamatarong nindot kaayong hiyas. Sa simpleng pagkasulti, nagpasabot nig pagbuhat kon unsay matarong sa panan-aw ni Jehova nga Diyos. Sa Bibliya, ang mga pulong para sa “pagkamatarong” nagpasabot sa pagkinabuhi uyon sa kinalabwang sukdanan—ang mga sukdanan ni Jehova. w22.08 27 ¶3-5

Si Jesus misalig sa iyang mga tinun-an bisan pa sa ilang kasaypanan. (Juan 15:16) Dihang mihangyo si Santiago ug Juan kang Jesus ug espesyal nga posisyon sa Gingharian, wala niya kuwestiyona ang ilang motibo sa pag-alagad kang Jehova ug wala pod niya sila tangtanga ingong apostoles. (Mar. 10:35-40) Sa ulahi, si Jesus gibiyaan sa tanan niyang tinun-an sa gabii nga siya gidakop. (Mat. 26:56) Pero wala gyod mawala ang pagsalig ni Jesus kanila. Nahibalo siya sa ilang mga kahuyangan, pero “padayon niyang gihigugma sila hangtod sa kataposan.” (Juan 13:1) Human mabanhaw si Jesus, gihatagan pa gani niya ang iyang 11 ka matinumanong apostoles ug bug-at nga responsibilidad, nga mao ang pagpanguna sa paghimog tinun-an ug ang pag-atiman sa iyang bililhong mga karnero. (Mat. 28:19, 20; Juan 21:15-17) Wala masayop ang iyang pagsalig niining dili hingpit nga mga tawo. Silang tanan nag-alagad nga matinumanon hangtod sa kamatayon. Maayo gyong ehemplo si Jesus sa pagsalig sa dili hingpit nga mga tawo. w22.09 6 ¶12

Kon kombinsido ta nga gihigugma ta ni Jehova ug siya dapig nato, atong madaog ang mga paningkamot ni Satanas sa paghadlok kanato. Pananglitan, ang magsusulat sa Salmo 118 nakaatubang ug lisod kaayong mga kahimtang. Daghan ang nakig-away niya, ug ang uban nila tag-as ug posisyon (bersikulo 9, 10). Dihay mga panahon nga na-stress kaayo siya (bersikulo 13). Nakadawat pod siyag bug-at nga disiplina gikan kang Jehova (bersikulo 18). Bisan pa ana, ang salmista miawit: “Dili ko mahadlok.” Nahibalo siya nga bisag gidisiplina siya ni Jehova, gihigugma siya sa iyang langitnong Amahan. Kombinsido ang salmista nga bisan unsa pay iyang maatubang, ang iyang mahigugmaong Diyos motabang gyod niya. (Sal. 118:29) Kinahanglang kombinsido ta nga gihigugma ta ni Jehova. Makatabang na nato nga madaog ang tulo ka komon nga kahadlok, (1) kahadlok nga dili ta makatagana sa atong pamilya, (2) kahadlok sa tawo, ug (3) kahadlok nga mamatay. w22.06 14-15 ¶3-4

Kinahanglang paneguroon nato nga kanunay natong unahon sa atong kinabuhi ang pagsimba kang Jehova. Si Jehova ang atong Maglalalang, maong angay gyod siyang simbahon. (Pin. 4:11; 14:6, 7) Busa kinahanglan natong himoong prayoridad ang pagsimba kaniya sa paagi nga iyang gusto, “sa espiritu ug kamatuoran.” (Juan 4:23, 24) Gusto nato nga ang atong pagsimba gigiyahan sa balaang espiritu sa Diyos aron nahiuyon ni sa mga kamatuoran diha sa iyang Pulong. Kinahanglang unahon nato ang atong pagsimba bisag nagpuyo ta sa lugar diin gidili o may restriksiyon ang atong buluhaton. Sa pagkakaron, kapig 100 sa atong mga igsoon ang gipriso tungod lang kay mga Saksi ni Jehova sila. Bisan pa ana, malipayon gihapon sila ug naningkamot nga mag-ampo, magtuon, ug mosulti sa uban bahin sa atong Diyos ug sa iyang Gingharian. Dihang pakaulawan o lutoson ta, malipayon gihapon ta kay si Jehova nag-uban nato ug iya tang gantihan.—1 Ped. 4:14. w22.10 9 ¶13

Sa tibuok basahon sa Proverbio, si Jehova naghatag ug praktikal nga tambag nga makahatag gyod natog kaayohan kon atong ipadapat. Konsideraha ang duha ka pananglitan. Una, magmakontento. Ang Proverbio 23:4, 5 nagtambag: “Ayaw pagpalabig hago sa pagbatog bahandi. . . . Kay seguradong matuboan kinig pako sama sa agila ug molupad paingon sa langit.” Pero daghang dato ug pobre ang nangagpas nga makabaton ug daghang kuwarta. Tungod niini, sagad mohimo silag mga butang nga makadaot sa ilang reputasyon, sa ilang relasyon sa uban, ug bisan gani sa ilang panglawas. (Prov. 28:20; 1 Tim. 6:9, 10) Ikaduha, hunahunaa daan ang imong isulti. Kon dili ta mag-amping sa atong sinultihan, mahimong mapasakitan nato ang uban. Ang Proverbio 12:18 nag-ingon: “Ang mga pulong nga wala hunahunaa samag dunggab sa espada, apan ang dila sa maalamon makaayo.” Mamentinar nato ang maayong relasyon kon dili nato ipanabi ang sayop sa uban.—Prov. 20:19. w22.10 21 ¶14; 22 ¶16-17

Kinahanglang sabton pag-ayo ni Ezequiel ang mensahe nga iyang ipahayag. Kinahanglang kombinsido siya sa maong mensahe aron madasig siya nga isulti kini. Dayon naay makapainteres nga nahitabo. Pagkaon ni Ezequiel sa linukot nga basahon, nakaingon siya nga “sama kini ka tam-is sa dugos.” (Ezeq. 3:3) Ngano? Para kang Ezequiel, ang pagrepresentar kang Jehova maoy tam-is, o nindot kaayo, nga pribilehiyo. (Sal. 19:8-11) Mapasalamaton siya nga gipili siya ni Jehova ingong iyang propeta. Sa ulahi, si Jehova miingon kang Ezequiel: “Seryosoha ug pamatia ang tanang pulong nga akong isulti kanimo.” (Ezeq. 3:10) Ang sugo ni Jehova nagpasabot nga kinahanglang hinumdoman ni Ezequiel ang mga nasulat sa maong basahon ug pamalandongon kana. Dihang gihimo to ni Ezequiel, napalig-on siya. Nakatabang pod to nga mahimong mas puwersado ang mensahe nga iyang ipahayag. (Ezeq. 3:11) Kay naa na sa iyang kasingkasing ug baba ang mensahe sa Diyos, andam na si Ezequiel nga sugdan ug tumanon ang iyang asaynment. w22.11 6 ¶12-14

Kon ang mga kausaban sa organisasyon magsulay sa imong pagkamaunongon, unsay angay nimong himoon? Bug-os nga suportahi ang mga kausaban sa organisasyon. Panahon sa pagpanaw sa mga Israelinhon sa kamingawan, ang mga Kohatnon maoy modayong sa kaban sa pakigsaad ug makita sila sa tanang tawo. (Num. 3:29, 31; 10:33; Jos. 3:2-4) Dako kaayo to nga pribilehiyo! Pero nausab ang kahimtang dihang ang mga Israelinhon nagpuyo na sa Yutang Saad. Ang Kaban dili na kinahanglang ibalhinbalhin. Busa ang mga Kohatnon giasayn sa ubang mga buluhaton. (1 Cron. 6:31-33; 26:1, 24) Wala tay mabasa nga ang mga Kohatnon nangreklamo o nangayog mas prominenteng trabaho kay espesyal ang ilang asaynment kaniadto. Unsay atong makat-onan? Bug-os suportahi ang mga kausaban sa organisasyon ni Jehova, apil ang mga kausaban nga nakaapektar sa imong asaynment. Magmalipayon sa bisan unsang asaynment nga ihatag kanimo. Hinumdomi nga dili ni basehanan kon unsa ka ka bililhon kang Jehova. Mas gipabilhan ni Jehova ang imong pagkamasinugtanon kay sa bisan unsang asaynment. w22.11 23 ¶10-11

Gipangita ni Onesiforo si apostol Pablo, ug dihang nakita niya siya, mihimo siyag mga paagi aron tabangan siya, bisag nagpasabot to nga kinahanglan niyang ipameligro ang iyang kinabuhi. Unsay atong makat-onan? Dili ta angayng magpadaog sa atong kahadlok sa tawo nga tungod ana, dili na ta motabang sa atong mga igsoon nga gilutos. Hinuon, ato silang depensahan ug tabangan. (Prov. 17:17) Gikinahanglan nila ang atong gugma ug suporta. Hunahunaa kon giunsa pagtabang sa atong mga igsoon sa Russia ang ilang mga isigkamagtutuo nga napriso. Dihang dunay dad-on sa korte, daghang igsoon ang moadto sab aron suportahan sila. Unsay atong makat-onan? Dihang ang mga brader nga nagapanguna akusahan, arestohon, o lutoson, ayawg kahadlok. Iampo sila, tabangi ang ilang pamilya, ug pangitag ubang praktikal nga paagi aron suportahan sila.—Buh. 12:5; 2 Cor. 1: 10, 11. w22.11 17 ¶11-12

Apil sa buluhaton sa mga ansiyano ang paghatag ug espirituwal ug emosyonal nga tabang. (1 Ped. 5:2) Panahon sa kalamidad, kinahanglang seguroon sa mga ansiyano nga ang kada igsoon luwas ug naay pagkaon, sinina, ug kapuy-an. Pero bisag pila ka bulan na ang molabay, ang mga igsoon magkinahanglan tingali gihapon ug espirituwal ug emosyonal nga tabang. (Juan 21:15) “Nagkinahanglag panahon una mabalik sa normal ang ilang kinabuhi,” miingon si Harold, nga membro sa usa ka Komite sa Sangang Buhatan ug nakaestoryag daghang igsoon nga nakasinatig mga kalamidad. “Tingali OK na unta sila, pero mahinumdoman na pod nila ang ilang namatay nga minahal, ang butang nga naay sentimental value, o ang ilang eksperyensiya nga hapit silang mamatay. Tungod ani, tingali maguol na pod kaayo sila. Wala nâ magpasabot nga kulang silag pagtuo kay normal lang gyod nâ nga reaksiyon.” Ang mga ansiyano nagpadapat gyod sa tambag nga ‘mohilak uban sa mga naghilak.’—Roma 12:15. w22.12 22 ¶1; 24-25 ¶10-11

Aron tabangan ta nga molampos sa atong paningkamot nga himoon kon unsay husto, si Jehova naghatag nato sa iyang balaang espiritu. Dihang magtuon ta sa Pulong sa Diyos, nagpaimpluwensiya ta sa iyang espiritu. Madawat pod nato ang balaang espiritu dihang motambong ta sa mga tigom. Makauban nato ang mga igsoon nga naningkamot pod sa paghimo kon unsay husto, ug makapadasig na. (Heb. 10:24, 25; 13:7) Ug dihang kinasingkasing tang moampo kang Jehova ug mangayo niyag tabang aron madaog nato ang atong mga kahuyangan, hatagan ta niya sa iyang balaang espiritu aron madasig ta nga padayong maningkamot. Ang atong espirituwal nga mga rutina dili tingali makapawala sa atong sayop nga mga tinguha, pero tabangan ta niini nga dili himoon ang maong mga tinguha. Kon naa na tay maayong rutina sa espirituwal nga mga kalihokan, kinahanglang mentinahon nato ang maong rutina ug padayong ugmaron ang hustong mga tinguha. w23.01 11 ¶13-14

Ang Bibliya dili libro bahin sa panglawas o manual kon unsay kaonon. Pero gipakita ani kon unsay hunahuna ni Jehova niining mga bahina. Pananglitan, gidasig ta niya nga ‘likayan ang mga butang nga makadaot’ sa atong lawas. (Eccl. 11:10) Ang pagkahangol sa pagkaon ug paghuboghubog makapameligro sa kinabuhi ug gisaway sa Bibliya. (Prov. 23:20) Gidahom ni Jehova nga magpugong ta sa kaugalingon kon unsay kaonon ug imnon ug kon unsa ni ka daghan. (1 Cor. 9:25) Makahimo tag mga desisyon nga magpakita sa atong apresasyon sa regalo sa Diyos nga kinabuhi pinaagi sa paggamit sa atong katakos sa panghunahuna. (Sal. 119:99, 100; Prov. 2:11) Pananglitan, pilion natog maayo kon unsay atong kaonon. Kon nahibalo ta nga dili maayog epekto sa atong lawas ang usa ka pagkaon, siyempre likayan gyod nato na. Mapakita pod nato nga maayo tag panghunahuna kon paneguroon nato nga sakto tag tulog, regular tang mag-exercise, ug pirmeng hinlo ang atong lawas ug balay. w23.02 21 ¶6-7

Unsaon nimo pagpangitag espirituwal nga bahandi samtang magbasa ka sa Bibliya? Konsideraha ang giingon sa 2 Timoteo 3:16,17. Matikdi nga “ang tibuok Balaang Kasulatan . . . mapuslanon” sa (1) pagtudlo, (2) pagbadlong, (3) pagtul-id, ug (4) pagdisiplina. Makita nimo kining upat ka kaayohan bisan sa mga basahon sa Bibliya nga dili nimo pirmeng gamiton. Samtang magbasa, hunahunaa kon unsay gitudlo niini bahin kang Jehova, sa iyang katuyoan, o sa mga prinsipyo diha sa Bibliya. Konsideraha kon sa unsang paagi ni makatabang sa pagbadlong. Matikdi ang mga bersikulo nga makatabang nimo nga makita ug masalikway ang sayop nga mga panghunahuna o kinaiya ug makatabang nimo nga magmatinumanon. Hunahunaa kon sa unsang paagi ang teksto makatabang nimo sa pagtul-id sa sayop nga ideya nga tingali nadunggan nimo sa ministeryo. Ug matikdi kon unsang pagdisiplina ang gihatag sa teksto nga makatabang nimo sa pagsundog sa panghunahuna ni Jehova. Kon imong hinumdoman kining upat ka kaayohan, makakita kag espirituwal nga bahandi nga makatabang nimo nga mas makabenepisyo sa pagbasa sa Bibliya. w23.02 11 ¶11

Sumala sa laing tagna sa basahon sa Daniel, si Jesus magsugod ug mando sa iyang Gingharian human sa yugto nga gitawag ug pito ka panahon. Posible bang mahibaloan kon kanus-a nahimong Hari si Jesus? (Dan. 7:14) Ang “pito ka panahon” nagtumong sa yugto nga may gidugayong 2,520 ka tuig. Kana nga yugto nagsugod niadtong 607 B.C.E. dihang gitangtang sa mga Babilonyanhon ang kataposang hari nga naglingkod sa trono ni Jehova sa Jerusalem. Natapos ni niadtong 1914 C.E. dihang gientrono ni Jehova si Jesus—“ang usa nga may legal nga katungod”—ingong Hari sa Gingharian sa Diyos. (Ezeq. 21:25-27) Sa unsang paagi makabenepisyo ta niini nga tagna? Kon masabtan nato ang tagna bahin sa “pito ka panahon,” magpasalig ni nato nga tumanon ni Jehova ang iyang mga saad sumala sa iyang gitakdang panahon. Nagtakda siyag panahon kon kanus-a matukod ang iyang Gingharian, busa iya pong paneguroon nga ang uban pa niyang mga tagna matuman sumala sa iyang gitakdang panahon. Oo, ang adlaw ni Jehova “dili maulahi!”—Hab. 2:3. w22.07 3 ¶3-5