Enero

“Pagkakita” ni Jesus sa naguol nga inahan, siya “naluoy” kaniya. (Luc. 7:13) Pero wala lang mobatig kaluoy si Jesus sa inahan; iyang gipakita ang iyang kaluoy. Nakig-estorya si Jesus kaniya ug giingnan siya sa makapahupayng tingog: “Ayaw nag hilak.” Dayon naa siyay gihimo aron tabangan ang inahan. Gibanhaw ni Jesus ang iyang anak ug “gihatag siya . . . sa iyang inahan.” (Luc. 7:​14, 15) Unsay atong makat-onan sa pagbanhaw ni Jesus sa anak sa biyuda? Makat-onan nato nga kinahanglan tang magpakitag kaluoy o empatiya sa mga namatyan. Masundog nato ang kaluoy ni Jesus sa mga namatyan kon abtik tang maniid. Makapakita tag empatiya pinaagi sa pagsulti ug paghimog mga butang nga makatabang ug makahupay nila. (Prov. 17:17; 2 Cor. 1:​3, 4; 1 Ped. 3:8) Bisan ang simpleng mga pulong ug buhat makadasig ug makahupay kaayo nila. w23.04 5-6 ¶13-15

Bisag nahibalo si Jesus nga namatay na ang iyang higala nga si Lazaro, nagpabilin siyag duha pa ka adlaw sa tabok sa Jordan ayha siya mibiyahe paingon sa Betania. Maong pag-abot ni Jesus sa Betania, upat ka adlaw nang patay si Lazaro. Pero naay planong buhaton si Jesus nga makahatag ug kaayohan sa iyang mga higala ug makahimaya sa Diyos. (Juan 11:​6, 11, 17) Naa tay makat-onan niini nga hitabo bahin sa pagkahimong maayong higala. Hunahunaa ni: Dihang si Maria ug Marta nagpadalag mensahe kang Jesus, wala sila mohangyo nga moadto si Jesus sa Betania. Igo lang silang miingon nga nasakit ang iyang suod nga higala. (Juan 11:3) Dihang namatay si Lazaro, puwede ra unta siyang banhawon ni Jesus bisan sa layo. Pero midesisyon si Jesus nga moadto sa Betania aron makauban ang iyang mga higala nga si Maria ug Marta. Naa ba kay higala nga andam motabang nimo bisag wala ka mohangyo? Nahibalo ka nga makasalig ka sa iyang tabang “panahon sa kalisdanan.” (Prov. 17:17) Sama kang Jesus, hinaot nga ingon ana pod ta nga klase sa higala! w23.04 10 ¶10-11

Dihang naa ta sa lisod kaayo nga situwasyon, bation tingali nato nga morag dili na moabot ang bag-ong kalibotan nga gisaad ni Jehova. Nagpasabot ba na nga huyang tag pagtuo? Dili ra pod. Niay ilustrasyon. Kon grabe kaayo ka init ang summer, maghunahuna tingali ta nga morag dili na matapos ang ting-init. Pero matapos gyod ni, ug moabot ang bugnawng panahon. Sa samang paagi, dihang naa ta sa grabeng kalisdanan, bation tingali nato nga morag dili na moabot ang bag-ong kalibotan. Pero kon lig-on ang atong pagtuo, nahibalo ta nga matuman gyod ang mga saad sa Diyos. (Sal. 94:​3, 14, 15; Heb. 6:​17-19) Kon ingon ana ka lig-on ang atong pagsalig, magpabiling una sa atong kinabuhi ang pagsimba kang Jehova. Nagkinahanglan pod tag lig-ong pagtuo aron makapadayon sa atong pagsangyaw. Daghan ang naghunahuna nga ang “maayong balita” bahin sa bag-ong kalibotan nga gisaad sa Diyos imposibleng mahitabo. (Mat. 24:14; Ezeq. 33:32) Dili gyod nato tugotan nga maimpluwensiyahan ta sa ilang panghunahuna. Aron dili na mahitabo, kinahanglang padayon natong palig-onon ang atong pagtuo. w23.04 27 ¶6-7; 30 ¶14

Naa bay higayon nga nakapangutana ka kon gitubag ba ni Jehova ang imong mga pag-ampo? Kon oo, dili lang ikaw ang nakapangutana ana. Daghang igsoon ang mibati niana, ilabina dihang naa sila sa lisod nga kahimtang. Kon kita ang nag-antos, malisdan pod tingali ta nga makita kon giunsa pagtubag ni Jehova ang atong mga pag-ampo. Nganong makasalig ta nga tubagon ni Jehova ang pag-ampo sa iyang mga alagad? Gipasaligan ta sa Bibliya nga gimahal kaayo ta ni Jehova ug importante ta kaniya. (Hag. 2:7; 1 Juan 4:10) Kanay rason nga gusto ni Jehova nga mangayo tag tabang niya pinaagi sa pag-ampo. (1 Ped. 5:​6, 7) Gusto ta niyang tabangan nga magpabiling suod kaniya ug molampos sa pag-atubang sa atong mga problema. Sa Bibliya, pirme natong mabasa nga gitubag ni Jehova ang pag-ampo sa iyang mga alagad. Naa ba kay mahunahunaang pananglitan? w23.05 8 ¶1-4

Si Maria naay personal nga relasyon kang Jehova; ang iyang pagtuo wala magdepende kang Jose. Pamilyar kaayo siya sa Kasulatan. Naggahin sab siyag panahon sa pagpamalandong. (Luc. 2:​19, 51) Segurado nga tungod sa lig-ong espirituwalidad ni Maria, nahimo siyang maayo kaayong asawa. Karon, daghang asawa ang naningkamot nga masundog si Maria. Pananglitan, ang sister nga si Emiko miingon: “Sa dalaga pa ko, naa koy kaugalingong espirituwal nga rutina. Pero pagminyo nako, ang akong bana mao nay moampo para namo ug manguna sa pamilyahanong pagsimba, ug namatikdan nako nga ang akong pagtuo nakadepende na niya. Nakita nako nga kinahanglan kong maningkamot nga palig-onon ang akong relasyon kang Jehova. Busa karon, naggahin kog panahon nga ako rang usa aron mag-ampo, magbasag Bibliya, ug mamalandong sa Pulong sa Diyos.” (Gal. 6:5) Mga asawa, kon padayon ninyong palig-onon ang inyong relasyon kang Jehova, mas dayegon ug higugmaon mo sa inyong bana.—Prov. 31:30. w23.05 22 ¶6

Wala ta matawo nga naay kahadlok kang Jehova; kinahanglan nato ning ugmaron. Ang usa ka paagi nga ato nang mahimo mao ang pagpaniid sa kalalangan. Dihang makita nato sa “mga butang nga gihimo” ang kaalam, gahom, ug dakong gugma sa Diyos kanato, mas molalom ang atong pagtahod ug gugma kaniya. (Roma 1:20) Ang laing paagi nga maugmad nato ang kahadlok sa Diyos mao ang regular nga pag-ampo. Kon kanunay tang mag-ampo, mas mahimong tinuod si Jehova kanato. Sa matag higayon nga mangayo ta niyag kusog aron malahutay ang mga pagsulay, mapahinumdoman ta kon unsa siya ka gamhanan. Dihang pasalamatan nato siya tungod sa pagpadala niya sa iyang Anak, mapahinumdoman ta sa gugma ni Jehova kanato. Ug dihang mohangyo ta kang Jehova nga tabangan ta sa atong problema, mapahinumdoman ta kon unsa siya ka maalamon. Ang maong mga pag-ampo makapalalom sa atong pagtahod kang Jehova. Ug makapalig-on sab ni sa atong determinasyon nga likayan ang bisan unsa nga makadaot sa atong relasyon kaniya. w23.06 15 ¶6-7

Kanunayng klaro ang mga balaod nga gihatag ni Jehova sa iyang katawhan. Pananglitan, ang Nagamandong Lawas sa unang siglo naghisgot ug tulo ka paagi nga ang mga Kristohanon angayng magpakitag kalig-on: (1) pagsalikway sa idolatriya ug pagsimba lamang kang Jehova, (2) pagtahod sa pagkabalaan sa dugo, ug (3) pagsunod sa taas nga sukdanan sa Bibliya bahin sa moralidad. (Buh. 15:​28, 29) Sa unsang paagi ang mga Kristohanon karon makapabiling lig-on niining tulo ka bahin? Pinaagi sa pagsimba kang Jehova ug pagsunod sa iyang mga sugo. Iyang gisugo ang mga Israelinhon nga ihatag kaniya ang eksklusibong debosyon. (Deut. 5:​6-10) Ug dihang si Jesus gitental sa Yawa, klaro niyang gipakita nga si Jehova lang ang angay natong simbahon. (Mat. 4:​8-10) Busa dili ta mosimbag mga imahen. Dili pod ta mag-idolog mga tawo—lider man sila sa relihiyon, politiko, sikat nga mga atleta, artista, o singer—nga mora bag diyos sila. Si Jehova lang ang atong simbahon, ang ‘naglalang sa tanang butang.’—Pin. 4:11. w23.07 14-15 ¶3-4

Ang kalibotan ni Satanas nagpatuyang sa seksuwal nga imoralidad ug pornograpiya. (Efe. 4:19) Maong kinahanglang ugmaron nato ang kahadlok sa Diyos ug mopalayo sa daotan. Ang Proverbio kapitulo 9 naghisgot bahin sa kaalam ug kabuangan, nga gisimbolohan sa duha ka babaye. Kining duha ka babaye parehong nangimbitar niadtong walay kasinatian—kadtong “dili maayog panghunahuna.” Ang kada usa nila samag miingon, ‘Anhi mo sa balay ug mangaon ta.’ (Prov. 9:​1, 4-6) Pero lahi kaayo ang resulta sa matag imbitasyon. Matikdi ang imbitasyon sa “babayeng buangbuang.” (Prov. 9:​13-18) Siya walay kaulaw nga nanawag niadtong dili maayog panghunahuna, ‘Anhi mo ug kaon’ diri. Unsay resulta? “Ang iyang balay punog mga patay.” Gipasidan-an ta bahin sa “makasasala” ug “imoral nga babaye.” Kita giingnan: “Ang pag-adto sa iyang balay samag pagpaingon sa kamatayon.” (Prov. 2:​11-19) Gipasidan-an pod ta sa Proverbio 5:​3-10 bahin sa laing “makasasala nga babaye” nga ang “mga tiil nanaog ngadto sa kamatayon.” w23.06 22 ¶6-7

Ang mga ansiyano kinahanglang magpakitag maayong ehemplo sa pagkamakataronganon. (1 Tim. 3:​2, 3) Pananglitan, ang usa ka ansiyano dili angayng magdahom nga ang iyang mga opinyon pirmeng dawaton tungod lang kay mas magulang siya sa ubang ansiyano. Nahibalo siya nga ang espiritu ni Jehova puwedeng magpalihok kang bisan kinsang ansiyano sa pagsultig punto nga makatabang nila sa paghimog maalamong desisyon. Ug kon walay prinsipyo sa Bibliya nga malapas, ang makataronganong mga ansiyano andam mosuportar sa desisyon sa kadaghanang ansiyano bisan pag lahi unta ang ilang gusto nga desisyon. Daghag kaayohan ang pagkahimong makataronganon. Mas masuod ta sa mga igsoon, ug ang kongregasyon naay kalinaw. Malipay ta kay bisag lainlain tag personalidad ug kultura, nagkahiusa ta sa pagsimba kang Jehova. Labaw sa tanan, malipay kaayo ta kay nahibalo ta nga gisundog nato ang atong makataronganong Diyos, si Jehova. w23.07 25 ¶16-17

Si Daniel nagtuon sa mga tagna uban ang hustong motibo, aron mahibalo sa kamatuoran. Mapainubsanon pod siya, ug giila niya nga ang hatagan lang ni Jehova ug pagsabot mao kadtong nakaila Niya ug nagsunod sa Iyang taas nga mga sukdanan. (Dan. 2:​27, 28) Gipakita ni Daniel nga mapainubsanon siya pinaagi sa pagpangayog tabang kang Jehova. (Dan. 2:18) Nag-research pod si Daniel. Gitun-an niya ang mga basahon sa Bibliya nga mabatonan sa iyang panahon. (Jer. 25:​11, 12; Dan. 9:2) Unsaon nimo pagsundog si Daniel? Susiha ang imong mga motibo. Nagtuon ba ka sa mga tagna sa Bibliya kay gusto gyod nimong mahibalo sa kamatuoran? Kon oo, tabangan ka ni Jehova. (Juan 4:​23, 24; 14:​16, 17) Ang uban nagtuon kay gusto nilang makakitag ebidensiya nga ang Bibliya dili gikan sa Diyos. Gusto nilang pamatud-an nga dili ra daotan nga naghimo silag kaugalingon nilang sukdanan sa husto ug sayop ug nagkinabuhi sumala sa ilang gusto. Pero sa atong bahin, kinahanglang husto ang atong motibo. w23.08 9 ¶7-8

Mabug-atan ta sa dili realistikong mga pagdahom kon atong ikompara ang atong kaugalingon sa uban. (Gal. 6:4) Kon ato nang himoon, basin masina ta ug makigkompetensiya. (Gal. 5:26) Basin pugson nato ang atong kaugalingon nga himoon kon unsay nahimo sa uban bisag dili nato kaya ug dili itugot sa atong kahimtang. Ug kon “ang gidahom nga malangan makapasakit sa kasingkasing,” labaw na gyod ang mga pagdahom nga imposible natong makab-ot! (Prov. 13:12) Kana makahurot sa atong kusog ug makapahinay sa atong pagdagan sa lumba sa kinabuhi. Ayaw pagdahom ug sobra sa imong kaugalingon kay sa gidahom ni Jehova kanimo. Wala siya mangayog labaw pa sa kaya nimong ihatag. (2 Cor. 8:12) Makasalig ka nga dili ikompara ni Jehova ang imong nahimo sa nahimo sa uban. (Mat. 25:​20-23) Gipabilhan niya ang imong tibuok kalag nga pag-alagad, ang imong pagkamatinumanon, ug ang imong paglahutay. w23.08 29 ¶10-11

Gitubag ni Jehova ang pagpangayog tabang ni Samson pinaagi sa milagrosong pagpatunghag tubod sa tubig. Dihang si Samson miinom niini, “mibalik ang iyang kusog ug naulian siya.” (Maghu. 15:19) Dayag nga kining bag-ong tubod sa tubig naa pa gihapon dihang gisulat ni propetang Samuel ang basahon sa Maghuhukom daghang tuig sa ulahi. Dihang makita sa mga Israelinhon kining tubod sa tubig, seguradong mahinumdom sila nga si Jehova motabang gyod sa iyang matinumanong mga alagad sa lisod nga mga kahimtang. Kita pod kinahanglang mangayog tabang kang Jehova bisag unsa pay atong talento, abilidad, o nalampos sa pag-alagad. Kinahanglang mapainubsanon natong dawaton nga molampos lang ta kon mosalig ta kang Jehova. Sama nga nalagsik si Samson dihang miinom siya sa tubig nga gitagana ni Jehova, mapalig-on pod ta sa espirituwal dihang pahimuslan nato ang tanang gitagana ni Jehova kanato.—Mat. 11:28. w23.09 4 ¶8-10

Unsay atong himoon kon makaatubang tag makapalagot nga situwasyon, pananglitan, dihang pasipalahan sa uban ang ngalan sa atong Diyos o yagayagaan ang Bibliya? Angay natong hangyoon si Jehova nga hatagan tag balaang espiritu ug kaalam aron makatubag ta sa malumong paagi. Pero komosta kon medyo dili maayo ang atong paagi sa pagtubag? Puwede tang mag-ampo pag-usab bahin niini ug hunahunaon kon unsa pay atong mahimo sa sunod nga higayon. Makaseguro ta nga hatagan ta ni Jehova ug balaang espiritu aron makontrol nato ang atong gibating kasuko ug mapakita ang kalumo. Naay mga teksto sa Bibliya nga makatabang nato sa pagkontrol sa atong sinultihan dihang makaatubang tag lisod nga mga situwasyon. Ang espiritu sa Diyos motabang nato nga mahinumdoman ang maong mga teksto. (Juan 14:26) Pananglitan, ang mga prinsipyo nga naa sa basahon sa Proverbio makatabang nato sa pagpakitag kalumo. (Prov. 15:18) Gipakita sab sa maong basahon ang mga kaayohan kon magpugong ta sa atong kaugalingon sa makapalagot nga mga situwasyon.—Prov. 10:19; 17:27; 21:23; 25:15. w23.09 15 ¶6-7

Si apostol Pedro nahibalo nga hapit na siyang mamatay. Sulod sa daghang tuig nga matinumanon siyang nag-alagad, nakauban niya si Jesus sa ministeryo, gisugdan niya ang pagsangyaw ngadto sa mga dili Hudiyo, ug nag-alagad siya ingong membro sa nagamandong lawas. Pero dili ra diha kutob ang iyang pag-alagad. Niadtong mga 62-64 C.E., gigiyahan siya ni Jehova sa paghimog duha ka sulat—ang mga basahon sa Bibliya nga 1 ug 2 Pedro. (2 Ped. 1:​13-15) Gihimo ni Pedro ang iyang mga sulat sa dihang ang mga Kristohanon sa unang siglo ‘nag-antos tungod sa lainlaing pagsulay.’ (1 Ped. 1:6) Ang daotang mga tawo misulay sa pagpasulod ug bakak nga mga pagtulon-an ug hugawng panggawi diha sa Kristohanong kongregasyon. (2 Ped. 2:​1, 2, 14) Sa dili madugay, maeksperyensiyahan sa mga Kristohanon nga nagpuyo sa Jerusalem “ang kataposan sa tanang butang”—laglagon sa kasundalohan sa Roma ang maong siyudad ug ang Hudiyong sistema sa mga butang. (1 Ped. 4:7) Seguradong ang mga sulat ni Pedro nakatabang sa mga Kristohanon nga mahibalo kon unsay himoon aron makalahutay sa presenteng mga kalisdanan ug makapangandam sa umaabot nga mga pagsulay. w23.09 26 ¶1-2

Sama kang Jesus, sagad makakat-on tang mosunod kon naa ta sa lisod nga mga situwasyon. Pananglitan, sa pagsugod sa COVID-19 nga pandemic, nakadawat tag direksiyon nga hunongon ang pagtigom diha sa mga Kingdom Hall ug ang pagsangyaw sa balay ug balay. Nalisdan ba ka sa pagsunod? Bisan pa niana, ang imong pagsunod nakapanalipod nimo, nakatabang nga magkahiusa ang kongregasyon, ug nakapalipay kang Jehova. Kitang tanan karon mas andam na unyang mosunod sa bisan unsang instruksiyon nga atong madawat panahon sa dakong kasakitan. Ang pagsunod niana makaluwas gyod sa atong kinabuhi! (Job 36:11) Ang pangunang rason nga sundon nato si Jehova maoy tungod sa atong gugma kaniya ug kay gusto nato siyang mapalipay. (1 Juan 5:3) Dili gyod nato mabayran si Jehova sa tanang butang nga iyang gihimo para nato. (Sal. 116:12) Pero makahimo ta sa pagsunod kaniya ug niadtong naay awtoridad kanato. Kon mosunod ta, atong gipakita nga maalamon ta. Ug ang mga maalamon makapalipay sa kasingkasing ni Jehova.—Prov. 27:11. w23.10 11 ¶18-19

Kon naay anghel nga makig-estorya nimo, maminaw ba ka sa iyang isulti? Sa atong panahon karon, naay ginasulti ang usa ka anghel “ngadto sa matag nasod ug tribo ug pinulongan ug katawhan.” Unsay iyang ginaingon? “Kahadloki ang Diyos ug ihatag kaniya ang himaya . . . Simbaha ang Usa nga naghimo sa langit ug sa yuta.” (Pin. 14:​6, 7) Si Jehova ang bugtong matuod nga Diyos nga angayng simbahon sa tanan. Mapasalamaton gyod ta nga gihatagan ta niyag bililhong kahigayonan nga simbahon siya sa iyang dakong espirituwal nga templo! Unsa gyod ang espirituwal nga templo, ug asa nato makita ang mga detalye nga nagpatin-aw niini? Ang espirituwal nga templo dili literal nga bilding. Kini ang kahikayan ni Jehova sa pagtanyag ug dalawatong pagsimba base sa halad lukat ni Jesus. Gipatin-aw ni apostol Pablo kini nga kahikayan diha sa iyang sulat sa Hebreohanong mga Kristohanon sa Judea niadtong unang siglo. w23.10 24 ¶1-2

Niadtong 522 B.C.E., ang mga kaaway sa mga Hudiyo milampos sa pagpahunong sa pagtukod pag-usab sa templo ni Jehova. Pero gipasaligan ni Zacarias ang mga Hudiyo nga gamiton ni Jehova ang Iyang gamhanang espiritu sa pagtangtang sa bisan unsang babag. Pagka-520 B.C.E., gitugotan na ni Haring Dario nga ipadayon ang pagtukod sa templo ug naghatag pa gani siyag kuwarta para niini. Gisugo pod niya ang mga gobernador nga suportahan ang mga Hudiyo. (Esd. 6:​1, 6-10) Gisaaran ni Jehova ang iyang katawhan nga iya silang suportahan kon unahon nila ang pagtukod pag-usab sa templo. (Hag. 1:​8, 13, 14; Zac. 1:​3, 16) Kay nadasig sa mga propeta, gipadayon sa mga Hudiyo ang pagtukod sa templo niadtong 520 B.C.E., ug wala ray lima ka tuig, nahuman nila kini. Kay giuna sa mga Hudiyo ang pagbuhat sa kabubut-on sa Diyos bisan pa sa mga kalisdanan, nadawat nila ang tabang ni Jehova. Ingong resulta, sila malipayong nagsimba kang Jehova.—Esd. 6:​14-16, 22. w23.11 15 ¶6-7

Bisag daghang tawo ang nakadungog na bahin kang Abraham, daghan pod ang gamay rag nahibaloan bahin niya. Pero ikaw, daghan kag nahibaloan bahin kang Abraham. Pananglitan, nahibalo ka nga si Abraham gitawag nga “amahan sa tanang may pagtuo.” (Roma 4:11) Pero makapangutana tingali ka, ‘Posible ba nga masundog nako ang lig-ong pagtuo ni Abraham?’ Posible. Ang usa ka paagi nga maugmad nato ang pagtuo ni Abraham mao ang pagtuon sa iyang ehemplo. Agig pagsunod sa sugo sa Diyos, si Abraham mibalhin sa layo nga lugar, mipuyo sa mga tolda sa daghang tuig, ug andam pa gani niyang ihalad ang iyang pinalanggang anak nga si Isaac. Kini nagpakita sa iyang lig-ong pagtuo. Tungod sa pagtuo ug binuhatan ni Abraham, nabatonan niya ang pag-uyon sa Diyos ug nahimo siyang iyang higala. (Sant. 2:​22, 23) Gusto ni Jehova nga mabatonan pod nato—mabatonan nimo—ang maong mga panalangin. Tungod ana, gigiyahan niya si Pablo ug Santiago sa paghisgot sa ehemplo ni Abraham. w23.12 2 ¶1-2

Mga sister, ugmara ang maayong paagi sa pagpakigkomunikar. Importante ni para sa mga Kristohanon. Bahin niini, ang tinun-ang si Santiago naghatag ug praktikal nga tambag para nato, nga mabasa sa teksto karong adlawa. Dihang maminaw ka pag-ayo samtang nagsulti ang uban, makapakita kag “empatiya” kanila. (1 Ped. 3:​8, footnote) Kon dili ka segurado nga imong nasabtan ang gisulti o gibati sa imong kaestorya, puwede nimo siyang pangutan-on ug haom nga mga pangutana. Dayon paghunahuna kadiyot ayha ka mosulti. (Prov. 15:​28, footnote) Pangutan-a ang kaugalingon: ‘Ang ako bang isulti tinuod ug makapadasig? Kini ba nagpakitag pagtahod ug pagkabuotan?’ Pagkat-on gikan sa hamtong nga mga sister nga maayong mokomunikar. (Prov. 31:26) Obserbahi ang ilang paagi sa pagsulti. Kon maugmad nimo ang maayong paagi sa pagpakigkomunikar, mas mabatonan nimo ang maayong relasyon sa uban. w23.12 21 ¶12

Karon, gamiton tingali ni Jehova ang atong pamilya, mga higala, o ang mga ansiyano aron tabangan ta. Pero mas ganahan tingali tang magpalain kon nabug-atan ta sa atong emosyon. Gusto tang mag-inusara, ug normal lang na. Unsay atong mahimo aron madawat ang tabang ni Jehova? Sukli ang tendensiya nga magpalain. Kon magpalain ta, sagad mapokus na lang ta sa atong kaugalingon ug sa mga problema nga atong giatubang. Kini makaapektar sa mga desisyon nga atong himoon. Siyempre, naay mga panahon nga kinahanglan tang mag-inusara, ilabina kon nag-atubang tag makapaguol kaayo nga mga panghitabo. Pero kon ilain nato ang atong kaugalingon sa taastaas nga panahon, posible nga masalikway na hinuon nato ang mga tawo nga gigamit ni Jehova sa pagtabang kanato. Busa dawata ang tabang sa imong pamilya, mga higala, ug sa mga ansiyano. Hinumdomi kanunay nga sila ang gigamit ni Jehova sa pagtabang kanimo.—Prov. 17:17; Isa. 32:​1, 2. w24.01 24 ¶12-13

Ang mga Nazareo nanaad nga dili magpaputol sa ilang buhok. Kana maoy usa ka paagi nga mapakita nila ang ilang bug-os nga pagpasakop kang Jehova. Pero makapaguol kay sa karaang Israel, dihay mga panahon nga ang mga Nazareo wala gipabilhan o gisuportahan. Seguradong nagkinahanglan gyod ug kaisog ang usa ka Nazareo aron matuman niya ang iyang panaad ug mahimong lahi sa uban. (Amos 2:12) Sa susama, kay midesisyon ta nga sundon ang kabubut-on ni Jehova, lahi pod ta sa mga tawo sa atong palibot. Sa trabahoan o eskuwelahan, nagkinahanglag kaisog ang pagpaila nga mga Saksi ni Jehova ta. Ug samtang nagkagrabe ang kinaiya ug binuhatan sa mga tawo sa kalibotan, mas malisdan tingali ta sa pagkinabuhi uyon sa mga prinsipyo sa Bibliya ug sa pagsangyaw sa maayong balita ngadto sa uban. (2 Tim. 1:8; 3:13) Pero hinumdomi kanunay nga atong ‘mapalipay ang kasingkasing’ ni Jehova kon mobarog tang lig-on bisag malahi ta sa uban nga wala mag-alagad kaniya.—Prov. 27:11; Mal. 3:18. w24.02 16 ¶7; 17 ¶9

Tagda pananglitan ang mga Kristohanon sa Roma, nga lainlaig kagikan ug kahimtang sa kinabuhi. Gawas pa sa mga Hudiyo nga nagdako nga nagsunod sa Moisesnong Balaod, naa poy mga dili Hudiyo nga lahi kaayog kultura. Ang ubang Kristohanon tingali mga ulipon samtang ang uban dili—ang pipila basin nanag-iya pa ganig ulipon. Bisag managlahi ang maong mga Kristohanon, unsay ilang gihimo aron molig-on ang ilang gugma sa usag usa? Gidasig sila ni apostol Pablo nga ‘abiabihon ang usag usa.’ Unsay iyang gipasabot? Ang pulong nga gihubad ug “abiabiha” nagpasabot nga dawaton ang usa nga kinasingkasing diha sa balay o dawaton siya ingong higala. Pananglitan, giingnan ni Pablo si Filemon nga ‘abiabihon pag-ayo,’ o dawaton, ang milayas nga ulipon nga si Onesimo. (Filem. 17) Giabiabi pod ni Priscila ug Aquila si Apolos, kinsa kulang pag kahibalo bahin sa Kristiyanidad; “ila siyang giuban” aron matudloan siyag dugang. (Buh. 18:26) Bisag managlahi ang maong mga Kristohanon, wala nila tugoti nga mabahinbahin sila. Hinuon, ilang gidawat ug giabiabi ang usag usa. w23.07 6 ¶13

Ang pangunang rason nga magpahinungod ka kang Jehova mao ang imong gugma kaniya. Ang imong gugma wala lang gibase sa emosyon. Gibase ni sa “tukmang kahibalo” ug “espirituwal nga pagsabot”—ang mga butang nga imong nakat-onan bahin kang Jehova nga nakapalalom sa imong gugma kaniya. (Col. 1:9) Ang imong pagtuon sa Kasulatan nagkombinsir nimo nga (1) si Jehova tinuod, (2) gigiyahan niya ang pagsulat sa Bibliya, ug (3) gigamit niya ang iyang organisasyon sa pagtuman sa iyang kabubut-on. Kadtong nagpahinungod sa ilang kaugalingon kang Jehova kinahanglang nahibalo sa pangunang mga pagtulon-an nga naa sa Pulong sa Diyos ug nagkinabuhi subay sa mga sukdanan niini. Ilang ginasulti sa uban ang ilang nakat-onan sumala sa makaya sa ilang kahimtang. (Mat. 28:​19, 20) Milalom ang ilang gugma kang Jehova ug gusto gyod nilang ihatag kaniya ang ilang eksklusibong debosyon. Ingon ana pod ba ang imong gibati? w24.03 4-5 ¶6-8

Si Abigail minyo kang Nabal, kinsa sumala pa sa Bibliya maot ug batasan ug dili maayog panggawi. (1 Sam. 25:3) Naglisod gyod tingali si Abigail nga makig-uban nianang tawhana. Naa bay kahigayonan si Abigail nga makalingkawas sa iyang kaminyoon? Oo. Mitungha ni nga kahigayonan dihang ang umaabot nga hari sa Israel, si David, misulong aron patyon ang bana ni Abigail kinsa nanginsulto niya ug sa iyang mga tawo. (1 Sam. 25:​9-13) Puwede untang moikyas na lang si Abigail ug pasagdan si David sa iyang plano. Pero wala na niya himoa. Iya hinuong gipugngan ug gihangyo si David nga dili patyon si Nabal. (1 Sam. 25:​23-27) Ngano kaha? Gimahal ni Abigail si Jehova ug gitahod niya ang mga sukdanan ni Jehova sa kaminyoon. Posibleng nahibalo siya kon unsay gisulti sa Diyos kang Adan ug Eva dihang Iya silang gikasal. Nasayod siya nga giisip ni Jehova ang kaminyoon ingong sagradong kahikayan. Gusto niyang lipayon ang Diyos, ug tungod ana gihimo niya ang tanan aron maluwas ang iyang panimalay, apil na ang iyang bana. Milihok dayon siya aron pugngan si David sa pagpatay kang Nabal. w24.03 16 ¶9-10

Naa bay pipila diha sa inyong kongregasyon nga naningkamot nga magpasimple sa ilang kinabuhi aron mas daghan silag mahimo sa pag-alagad kang Jehova? Naa ba kay nailhang mga batan-on nga naningkamot nga mahimong lahi sa uban diha sa eskuwelahan, bisan pag lisod nang himoon? Komosta kadtong naningkamot nga magpabiling matinumanon bisag gisupak sa ilang pamilya? Pahimuslan nato ang tanang kahigayonan nga dasigon ang maong minahal nga mga igsoon ug sultihan sila nga naapresyar nato ang ilang kaisog ug mga sakripisyo. (Filem. 4, 5, 7) May pagsalig si Jehova nga gusto gyod nato siyang mapalipay ug nga andam tang mohimog mga sakripisyo aron matuman nato ang atong panaad sa pagpahinungod. Gipasidunggan ta niya pinaagi sa paghatag natog kahigayonan nga ipakita ang atong gugma kaniya sa personal nga paagi. (Prov. 23:​15, 16) Busa hinaot nga magmadeterminado ta nga padayong alagaron si Jehova ug kinabubut-ong ihatag kaniya ang atong kinamaayohan. w24.02 18 ¶14; 19 ¶16

Imadyina ang nahitabo sa hinapos sa 29 C.E. dihang gisugdan ni Jesus ang iyang ministeryo. Si Jesus ug ang iyang inahan nga si Maria gidapit sa usa ka kombira sa kasal sa Cana. Klaro nga mitabang si Maria sa pag-atiman sa mga bisita. Pero sa kombira sa kasal, naay mitunghang problema—nahurot ang bino. Si Maria miduol dayon sa iyang anak ug miingon: “Wala na silay bino.” (Juan 2:​1-3) Unsay gibuhat ni Jesus? Ang tubig gihimo niyang “maayong bino.” (Juan 2:​9, 10) Daghan pag milagro nga gihimo si Jesus panahon sa iyang ministeryo. Gigamit niya ang iyang gahom aron tabangan ang libolibo ka tawo. Pananglitan, sa duha niya ka milagro, gipakaon niya ang 5,000 ka lalaki ug sa ulahi 4,000 ka lalaki. Pero kon apilon ug ihap ang mga babaye ug mga bata nga presente adtong panahona, moabot tingali ug kapig 27,000 ka tawo ang iyang gipakaon. (Mat. 14:​15-21; 15:​32-38) Nianang panahona, daghan pong masakiton ang giayo ni Jesus.—Mat. 14:14; 15:​30, 31. w23.04 2 ¶1-2

Human sa makapaguol kaayo nga panghitabo, naa tingali mga adlaw nga mobati tang luya kaayo sa pisikal ug emosyonal. Sama kang Elias, mobati tingali ta nga morag lisod kaayong mobangon ug gusto na lang tang matulog. (1 Hari 19:​5-7) Nagkinahanglan tingali tag tabang aron makapabiling aktibo sa pag-alagad kang Jehova. Sa maong mga kahimtang, si Jehova nagpasalig nga iya tang tabangan, sama sa atong mabasa sa teksto karong adlawa. Naeksperyensiyahan ni David kini nga tabang. Dihang nag-atubang siyag mga pagsulay ug mga kaaway, miingon siya kang Jehova: “Ang imong tuong kamot nagpaluyo kanako.” (Sal. 18:35) Sagad, palihokon ni Jehova ang uban aron tabangan ta. Pananglitan, dihang naluya si David, ang iyang higala nga si Jonatan miduaw niya aron palig-onon ug dasigon siya. (1 Sam. 23:​16, 17) Sa susama, gipili ni Jehova si Eliseo aron hatagag praktikal nga tabang si Elias.—1 Hari 19:​16, 21; 2 Hari 2:2. w24.01 23-24 ¶10-12

Si Jehova mahinatagon kaayo ug abundang motagana. Kini nga mga hiyas gipakita sa “matuod nga kaalam,” nga sa Hebreohanong pinulongan gihulagway ingong babaye sa Proverbio kapitulo 9. Ang bersikulo 2 naghisgot nga naandam na sa babaye ang iyang karne, nahuman na niyag sagol ang iyang bino, ug naandam na niya ang lamesa sa iyang balay. (Prov. 9:2) Dayon ang bersikulo 4 ug 5 nag-ingon: “Giingnan niya [sa matuod nga kaalam] kadtong dili maayog panghunahuna: ‘Dali, kaon mo sa akong tinapay.’” Nganong angay tang moadto sa balay sa matuod nga kaalam ug mokaon sa iyang giandam? Gusto ni Jehova nga ang iyang mga anak magmaalamon ug luwas. Dili niya gusto nga mag-antos ta ayha ta makakat-og leksiyon—pinaagig pait nga mga eksperyensiya ug mga pagmahay. Kanay rason nga “naa siyay tinigom nga praktikal nga kaalam para sa mga matul-id.” (Prov. 2:7) Kon naa tay kahadlok kang Jehova, gusto nato siyang lipayon. Maminaw ta sa iyang tambag ug malipay nga motuman niini.—Sant. 1:25. w23.06 23 ¶14-15

Bisan pag limitado na lang ang atong mahimo sa pag-alagad sa Diyos, makasalig ta nga gipabilhan ni Jehova ang atong sinserong mga paningkamot nga lipayon siya. Nganong nahibalo ta ana? Sa panahon ni Zacarias, gisugo ni Jehova ang iyang propeta nga maghimog korona gikan sa bulawan ug plata nga gipadala sa mga Hudiyo nga nagpabilin sa Babilonya. (Zac. 6:11) Kining “halangdong korona” magsilbing “pahinumdom” sa ilang pagkamahinatagon. (Zac. 6:​14, mga footnote) Makasalig ta nga dili gyod kalimtan ni Jehova ang atong sinserong mga paningkamot nga alagaran siya sa lisod nga mga panahon. Niining kataposang mga adlaw, seguradong padayon tang makaatubang ug mga problema, ug tingali mas mograbe pa ang mga kahimtang sa umaabot. (2 Tim. 3:​1, 13) Pero dili ta angayng mabalaka pag-ayo. Hinumdomi ang giingon ni Jehova sa iyang katawhan sa panahon ni Haggeo: “Ako nagauban kaninyo . . . Ayaw mog kahadlok.” (Hag. 2:​4, 5) Makasalig pod ta nga si Jehova magauban kanato basta himoon nato ang atong kinamaayohan sa pagbuhat sa iyang kabubut-on. w23.11 19 ¶20-21

Puwede ra untang dili ipasulat diha sa Bibliya ang mga sayop ni apostol Pedro. Pero gipasulat ni sa Diyos aron makakat-on ta. (2 Tim. 3:​16, 17) Ang pagkat-on bahin kang Pedro, kinsa may mga kahuyangan ug pagbati nga sama nato, makatabang aron atong masabtan nga si Jehova wala magdahom ug kahingpitan kanato. Gusto niya nga molahutay ta—nga padayong maningkamot sa pag-alagad—bisan pa sa atong mga kahuyangan. Nganong kinahanglan tang molahutay? Dihang mobati ta nga nadaog na nato ang usa ka kahuyangan, tingali masipyat gihapon ta. Pero padayon gihapon tang maningkamot nga mouswag. Kitang tanan makasulti o makahimog mga butang nga atong mahayan sa ulahi; pero kon dili ta mosurender, tabangan ta ni Jehova nga padayong mouswag. (1 Ped. 5:10) Ang kaluoy nga gipakita ni Jesus kang Pedro, bisan pa sa iyang mga sayop, makadasig nato nga padayong mag-alagad kang Jehova. w23.09 20 ¶2-3

Tinuod, kayang ayohon ni Jesus si Lazaro, sama sa giingon ni Marta sa teksto karong adlawa. Pero labaw pa niana ang gustong himoon ni Jesus. Siya misaad: “Mabanhaw ang imong igsoon.” Miingon pod siya: “Ako ang pagkabanhaw ug ang kinabuhi.” (Juan 11:​23, 25) Oo, gihatagan siya sa Diyos ug gahom sa pagbanhaw sa mga patay. Una pa niana, gibanhaw niya ang usa ka dalagita wala madugay human kini mamatay. Gibanhaw pod niya ang usa ka batan-ong lalaki, posibleng sa adlaw nga namatay kini. (Luc. 7:​11-15; 8:​49-55) Pero kaya kaha niyang banhawon ang tawo nga upat ka adlaw nang patay ug ang lawas nagsugod nag kadugta? Si Maria, ang laing igsoon ni Lazaro, misugat kang Jesus. Iyang gibalik ang giingon ni Marta: “Ginoo, kon dinhi pa ka, dili unta mamatay ang akong igsoon.” (Juan 11:32) Dihang nakita ug nadungog ni Jesus ang paghilak ni Maria ug sa iyang mga kauban, naguol siya pag-ayo. Naluoy kaayo siya sa iyang mga higala maong mihilak siya. Nakasabot siya kon unsa ka sakit nga mamatyag minahal. Seguradong gusto kaayo niyang wad-on ang hinungdan sa ilang paghilak! w23.04 10-11 ¶12-13