Pebrero

Dihang grabeng nasakit si Haring Ezequias, nagpakiluoy siya kang Jehova nga ayohon siya. Ingong tubag, giayo siya ni Jehova. (2 Hari 20:​1-6) Pero dihang si apostol Pablo mihangyo kang Jehova nga tangtangon ang iyang “tunok sa unod,” wala tangtanga ni Jehova ang iyang problema. (2 Cor. 12:​7-9) Si apostol Santiago ug Pedro nameligrong patyon ni Haring Herodes. Si Santiago gipatay, pero si Pedro milagrosong giluwas. (Buh. 12:​1-11) Makapangutana tingali ta, ‘Nganong giluwas ni Jehova si Pedro pero wala niya luwasa si Santiago?’ Walay giingon ang Bibliya. Pero makaseguro ta nga “walay inhustisya” kang Jehova. (Deut. 32:4) Usahay, ang tubag ni Jehova sa atong pag-ampo lahi tingali sa atong gidahom. Pero kay naa tay pagsalig nga kanunayng mahigugmaon ug makataronganon ang tubag ni Jehova sa atong mga pag-ampo, dili nato kuwestiyonon ang iyang paagi sa pagtubag kanato.—Job 33:13. w23.11 21 ¶6

Si Santiago gigiyahan sa Diyos sa pagsulat nga ang maalamong mga tawo “andam mosunod.” Hunahunaa kon unsay gipasabot niana. Kinahanglang andam kaayo tang mosunod niadtong gihatagan ni Jehova ug awtoridad. Siyempre, dili dahomon ni Jehova nga sundon nato kadtong mohatag natog sugo nga supak sa Iyang mga balaod. (Buh. 4:​18-20) Tingali mas sayon para nato nga sundon si Jehova kay sa tawo, ilabina kay kanunayng husto ang direksiyon nga ihatag ni Jehova. (Sal. 19:7) Pero dili ingon ana ang direksiyon gikan sa mga tawo kay dili sila hingpit. Bisan pa niana, gihatagan sa atong langitnong Amahan ug awtoridad ang mga ginikanan, mga opisyal sa gobyerno, ug mga ansiyano. (Prov. 6:20; 1 Tes. 5:12; 1 Ped. 2:​13, 14) Kon ato silang sundon, gisunod pod nato si Jehova. w23.10 6 ¶2-3

Ang usa ka paagi nga mapalig-on nato ang atong pagtuo mao ang pagpamalandong sa gahom ni Jehova. Tungod sa iyang gahom, kaya niyang tumanon ang tanan niyang gisaad. Siyempre, siya ang Labing Gamhanan nga Diyos. (Job 42:2; Mar. 10:27; Efe. 3:20) Iyang gipasaligan si Abraham ug Sara nga makabaton silag anak bisag tigulang na sila. (Gen. 17:​15-17) Gipasaligan pod niya si Abraham nga ang iyang mga kaliwat makapanag-iya sa yuta sa Canaan. Sulod sa daghang katuigan nga naulipon sa Ehipto ang mga kaliwat ni Abraham, ang mga Israelinhon, morag imposibleng matuman ang maong saad. Pero nahitabo gyod to. Giingnan pod niya si Maria, nga usa ka birhen, nga iyang ipanganak ang mismong anak sa Diyos. Pinaagi niini, matuman ang gisaad ni Jehova didto sa tanaman sa Eden libolibo ka tuig na ang milabay! (Gen. 3:15) Kon atong pamalandongon kon giunsa pagtuman ni Jehova ang iyang mga saad kaniadto, makita nato kon unsa siya ka gamhanan. Makapalig-on ni sa atong pagtuo nga tumanon gyod niya ang iyang saad nga bag-ong kalibotan.—Jos. 23:14; Isa. 55:​10, 11. w23.04 28 ¶10-12

Gitubag ni Jehova ang pag-ampo ni David nga luwason siya. (1 Sam. 19:​10, 18-20; 2 Sam. 5:​17-25) Makasalig pod ta ana. (Sal. 145:18) Ang tubag ni Jehova sa atong mga pag-ampo lahi tingali sa atong gidahom. Si Pablo mihangyo sa Diyos nga tangtangon ang iyang “tunok sa unod.” Tulo ka beses nga espesipikong giampo ni Pablo kining lisod nga problema. Gitubag ba ni Jehova ang iyang mga pag-ampo? Oo, pero dili sa paagi nga gidahom ni Pablo. Imbes wad-on ang problema, gihatagan siya ni Jehova ug kusog aron makapadayon siya sa pag-alagad nga matinumanon. (2 Cor. 12:​7-10) Sama kang Pablo, usahay ang tubag sa atong mga pag-ampo lahi sa atong gidahom. Pero makasalig ta nga nahibalo gyod si Jehova kon unsa ang pinakamaayong paagi sa pagtabang nato. Gani, siya “makahimo gayod ug labaw pa kay sa atong gipangayo o gihunahuna.” (Efe. 3:20) Tungod ana, lahi tingali ang tubag ni Jehova sa atong mga pag-ampo o kaha moabot na sa panahon nga wala nato damha. w23.05 8-9 ¶4-6

Maayong mamalandong ta kanunay sa saad sa Bibliya nga pagkabanhaw. Ngano? Kay wala ta mahibalo sa posibleng mahitabo. Basig masakit ta ug mameligro ang atong kinabuhi, o kaha kalit tang mamatyag minahal. (Eccl. 9:11; Sant. 4:​13, 14) Ang atong paglaom sa pagkabanhaw makatabang nga malahutay nato ang maong mga kalisdanan. (1 Tes. 4:13) Gipasaligan ta sa Bibliya nga ang atong langitnong Amahan nakaila pag-ayo nato ug gimahal ta niya pag-ayo. (Luc. 12:7) Hunahunaa kon unsa ka personal ang iyang pagkaila nato nga kaya niyang ibalik ang atong personalidad ug ang tanan natong memorya. Ug gimahal ta pag-ayo ni Jehova mao nga gihatagan ta niyag kahigayonan nga mabuhi hangtod sa hangtod. Banhawon pa gani ta niya kon gikinahanglan! Nganong makatuo ta sa saad nga pagkabanhaw? Kay kombinsido ta nga ang Diyos naay tinguha ug gahom sa pagtuman niini. w23.04 8-9 ¶2-4

Si Jose ug Maria nagtinabangay sa pagpalig-on sa ilang relasyon kang Jehova. Nasabtan nila ang kaimportante sa pagsimba kang Jehova ingong pamilya. (Luc. 2:​22-24; 4:16) Pagkanindot nga ehemplo para sa mga magtiayon karon! Kon naa moy mga anak, parehas ni Jose ug Maria, lisod tingali ang pagtambong sa mga tigom o pag-eskedyul ug panahon para sa pamilyahanong pagsimba. Tingali mas lisod pa gyod ang paggahin ug panahon sa pagtuon o pag-ampo ingong magtiayon. Pero hinumdomi nga dihang mag-uban mo sa pagsimba kang Jehova, mas masuod mo kaniya ug sa usag usa. Busa himoang prayoridad ang pagsimba kang Jehova. Kon naay problema ang inyong relasyon ingong magtiayon, dili tingali mo ganahang mag-uban sa pamilyahanong pagsimba. Kon mao, puwede mong magsugod sa mga topiko nga mubo ug makalingaw. Makapalig-on ni sa inyong relasyon ug makatabang nga ganahan na mong mag-uban sa paghimog espirituwal nga mga butang. w23.05 22 ¶7-8

Sa unsang paagi nakatabang kang Abdias ang iyang kahadlok sa Diyos? Kini nakatabang niya nga mahimong matinud-anon ug kasaligan; busa gitudlo siya nga magdumala sa panimalay sa hari. (Itandi ang Nehemias 7:2.) Ang iyang kahadlok sa Diyos nakahatag pod niyag talagsaong kaisog—hiyas nga iya gyong gikinahanglan. Nabuhi siya sa panahon nga nagmando ang daotang hari nga si Ahab. (1 Hari 16:30) Ang asawa pod ni Ahab nga si Jezebel nagsimba kang Baal ug nagdumot pag-ayo kang Jehova, maong gusto niyang wagtangon ang matuod nga pagsimba sa 10 ka tribo nga gingharian sa Israel. Gipamatay pa gani niya ang daghang propeta sa Diyos. (1 Hari 18:4) Dihang gipangita ni Jezebel ang mga propeta sa Diyos aron patyon, gidala ni Abdias ang 100 kanila ug gitagoan sila ‘nga tag-50 sa usa ka langob ug gitagan-an silag tinapay ug tubig.’ (1 Hari 18:​13, 14) Kon masakpan ang maisogon nga si Abdias, seguradong patyon siya. Siyempre, tawo ra si Abdias, ug dili niya gustong mamatay. Pero gihigugma niya pag-ayo si Jehova ug kadtong nag-alagad Kaniya. Gimahal niya sila labaw pa sa iyang kinabuhi. w23.06 16 ¶9-10

Padayong gigiyahan ni Jehova ang iyang katawhan karon sama sa iyang gihimo kaniadto. Iya nang ginahimo pinaagi sa iyang Pulong ug sa iyang Anak, ang ulo sa kongregasyon. Naa pod bay ebidensiya nga ang Diyos padayong naggamit ug mga tawo sa paggiya nato karon? Oo. Konsideraha pananglitan ang nahitabo human sa tuig 1870. Nasabtan ni Charles Taze Russell ug sa iyang mga kauban nga ang 1914 maoy importanteng tuig para sa Gingharian sa Diyos. (Dan. 4:​25, 26) Nakahimo sila niana nga konklusyon tungod sa ilang pagsusi sa mga tagna sa Bibliya. Gigiyahan ba ni Jehova ang ilang pag-research sa Bibliya? Oo, klaro kaayo. Pagka-1914, ang mga panghitabo sa kalibotan nagpamatuod nga nagsugod na pagmando ang Gingharian sa Diyos. Nahitabo ang Gubat sa Kalibotan I ug gisundan kinig mga kamatay, linog, ug kanihit sa pagkaon. (Luc. 21:​10, 11) Klaro nga gigamit ni Jehova ang maong sinsero nga mga Kristohanon sa pagtabang sa iyang katawhan. w24.02 22 ¶11

Ingong katawhan ni Jehova, nahibalo ta nga gimahal ta niya ug gusto niya nga magmalipayon ta. (Roma 8:​35-39) Kombinsido pod ta nga ang mga prinsipyo sa Bibliya kanunayng makahatag natog kaayohan kon atong ipadapat. (Isa. 48:​17, 18) Pero komosta kon makaatubang tag mga problema nga wala nato damha? Pananglitan, basin madismayar ta tungod sa usa ka membro sa pamilya. Tingali limitado na ang atong mahimo sa pag-alagad kang Jehova tungod sa grabeng sakit. Basig maapektohan kaayo ta sa kalamidad. O kaha lutoson ta tungod sa atong tinuohan. Kon mag-atubang tag ingon ana nga mga kahimtang, makahunahuna tingali ta: ‘Nganong nahitabo man ni nako? Naa ba koy nahimong sayop? Wala na ba ko uyoni ni Jehova?’ Mibati na pod ba ka ana? Kon mao, ayawg kaluya. Daghan sa maunongong alagad ni Jehova ang mibati pod ana.—Sal. 22:​1, 2; Hab. 1:​2, 3. w23.04 14 ¶1-2

Dihang mag-atubang ug tentasyon, isalikway dayon nato ang bisan unsang panghunahuna o buhat nga makadaot sa atong relasyon sa Diyos. Gusto ni Jehova nga kita ‘kinasingkasing nga magmasinugtanon.’ (Roma 6:17) Ang iyang giya kanunay nga para sa atong kaayohan, ug ang iyang mga balaod dili nato puwedeng usbon. (Isa. 48:​17, 18; 1 Cor. 6:​9, 10) Gigamit sa Yawa ang pisikal nga pag-atake ug ang presyur gikan sa uban aron mohuyang ang atong determinasyon. Tumong niya nga “matukob” ta, nga madaot ang atong relasyon kang Jehova. (1 Ped. 5:8) Ang mga Kristohanon sa unang siglo gihulga, gikulata, ug gipatay tungod sa ilang determinasyon nga magpabiling lig-on. (Buh. 5:​27, 28, 40; 7:​54-60) Karon, gigamit gihapon ni Satanas ang paglutos. Makita nato ni sa brutal nga pagtratar sa atong mga igsoon sa Russia ug sa ubang nasod ug sa mga pag-atake nga ginahimo sa mga magsusupak. Gawas pa sa direktang mga paglutos, si Satanas naggamit pod ug mga “lit-ag.”—Efe. 6:11. w23.07 15-16 ¶6-9

Samtang magkadaghan ang imong makat-onan sa Pulong sa Diyos, mas molalom ang imong gugma kang Jehova. Kana nga gugma magpalihok nimo nga ipadapat ang imong makat-onan. Makahimo kag mas maayong mga desisyon base sa mga prinsipyo sa Bibliya. Maugmad nimo ang mas maayong panghunahuna ug panggawi kay gusto nimong mapalipay ang Diyos. Sama sa bata nga nagsundog sa iyang mahigugmaong ginikanan, naningkamot ka nga masundog ang imong langitnong Amahan. (Efe. 5:​1, 2) Puwede natong pangutan-on ang atong kaugalingon: ‘Mas milalom ba ang akong gugma kang Jehova karon kay sa adtong bag-o kong nahimong Kristohanon? Sukad nga nabawtismohan ko, ang ako bang panghunahuna ug panggawi mas parehas na kang Jehova—ilabina sa pagpakitag gugma sa mga igsoon?’ Kon medyo mibugnaw na “ang gugma nga imong nabatonan sa sinugdan,” ayawg kaluya. Nahitabo pod na sa mga Kristohanon sa unang siglo. Wala mosurender si Jesus sa pagtabang nila, ug dili pod siya mosurender sa pagtabang nato. (Pin. 2:​4, 7) Nahibalo siya nga kaya natong painiton pag-usab ang gugma nga atong gibati dihang una natong nakat-onan ang kamatuoran. w23.07 8 ¶2-3

Si apostol Pedro nakahimog sunodsunod nga mga sayop. Una, nanghambog pag-ayo si Pedro nga magmatinumanon gyod siya bisan kon ang ubang apostoles mobiya kang Jesus. (Mar. 14:​27-29) Sunod, si Pedro wala magpadayon sa pagbantay. (Mar. 14:​32, 37-41) Dayon, pag-abot niadtong modakop kang Jesus, si Pedro mibiya niya. (Mar. 14:50) Sa ulahi, gilimod ni Pedro si Jesus sa tulo ka higayon ug nanumpa pa gani siya nga tinuod ang iyang giingon. (Mar. 14:​66-71) Unsay gibati ni Pedro dihang naamgohan niya nga bug-at kaayo ang iyang nahimong sala? Puwerte niyang guola ug grabe niyang hilak. (Mar. 14:72) Imbes nga sukmatan si Pedro sa iyang mga nahimo, giingnan siya ni Jesus nga makadawat unya siyag mas dagkong responsibilidad. (Juan 21:​15-17) Nahibalo si Pedro nga grabe ang iyang sala, pero wala siya misurender sa iyang kaugalingon. Ngano? Kay kombinsido siya nga ang iyang Agalon nga si Jesus wala pod misurender niya. Unsay leksiyon? Gusto ni Jehova nga mahimo tang kombinsido nga gimahal ta niya ug nga andam siyang mopasaylo.—Roma 8:​38, 39. w24.03 18-19 ¶13-15

Ang seksuwal nga imoralidad mahimong moresultag kaulawan, pagbati nga way pulos, wala damhang pagbuntis, ug pagkabungkag sa pamilya. Busa maalamon gyod nga likayan ang “balay” sa babayeng buangbuang. Gawas nga mamatay sila sa espirituwal, daghang imoral nga mga tawo ang nakakuhag mga sakit nga moresultag literal nga kamatayon. (Prov. 7:23) Ang bersikulo 18 sa Proverbio kapitulo 9 nag-ingon: “Ang iyang mga bisita naa sa kinailadman sa Lubnganan.” Pero nganong daghan man gihapon ang modawat sa iyang imbitasyon nga moresulta man nig kamatayon? (Prov. 9:​13-18) Ang usa ka komon nga lit-ag mao ang pornograpiya. Para sa uban, ang pagtan-awg pornograpiya dili ra makadaot. Pero ang tinuod, ang pornograpiya makadaot, makawalag pagtahod sa kaugalingon, ug makaadik. Ang imoral nga mga hulagway dili daling malimtan ug lisod wad-on sa hunahuna. Gawas pa ana, ang pornograpiya dili makapatay sa sayop nga mga tinguha; makapasamot hinuon ni. (Col. 3:5; Sant. 1:​14, 15) Oo, daghan niadtong nagtan-awg pornograpiya ang nakahimog imoral nga mga buhat. w23.06 23 ¶10-11

Bisan pag ang ubang nasod makig-away usahay sa Anglo-Amerikanong Gahom sa Kalibotan, dili nila kini mapulihan. Nahibalo ta ana kay “ang bato” nga nagrepresentar sa Gingharian sa Diyos magdugmok sa tiil, ang parte sa estatuwa nga nagrepresentar sa Anglo-Amerikanong alyansa. (Dan. 2:​34, 35, 44, 45) Kombinsido ba ka nga tinuod ang tagna ni Daniel bahin sa tiil nga puthaw ug kulonon? Kon oo, makaapektar ni sa imong paagi sa pagkinabuhi. Dili ka mangagpas ug materyal nga mga butang kay nahibalo ka nga hapit nang laglagon kining kalibotana. (Luc. 12:​16-21; 1 Juan 2:​15-17) Kon masabtan nimo ni nga tagna, makita pod nimo kon unsa ka importante ang buluhatong pagsangyaw ug pagpanudlo. (Mat. 6:33; 28:​18-20) Human sa pagtuon niini nga tagna, pangutan-a ang imong kaugalingon, ‘Ang ako bang mga desisyon nagpakita nga kombinsido ko nga hapit nang taposon sa Gingharian sa Diyos ang tanang gobyerno sa tawo?’ w23.08 11 ¶13-14

Mapainubsanong dawata nga tungod sa imong edad, panglawas, ug kahimtang, dili na tingali nimo mahimo ang tanan nga gusto nimong himoon. Sama kang Barzilai, mahimong andam sa pagbalibad sa mga pribilehiyo kon dili na kaya sa imong panglawas o edad. (2 Sam. 19:​35, 36) Sama kang Moises, dawata ang tabang sa uban ug idelegar ang uban nimong responsibilidad kon kinahanglan. (Ex. 18:​21, 22) Kon sama nila, mapainubsanon nimong ilhon ang imong mga limitasyon, malikayan nimo ang paghimog dili realistikong mga pagdahom nga makahurot sa imong kusog. Dili sab ta angayng mobati nga kitay hinungdan sa sayop nga desisyon sa uban. Dili kita ang modesisyon para sa uban; dili pod nato sila puwedeng panalipdan pirme sa mga resulta sa ilang sayop nga desisyon. Pananglitan, ang anak modesisyon tingali nga mohunong sa pag-alagad kang Jehova. Kana nga desisyon makapaguol pag-ayo sa mga ginikanan. Pero kon basolon sa mga ginikanan ang ilang kaugalingon tungod sa sayop nga desisyon sa ilang anak, mabug-atan gyod sila. Dili gusto ni Jehova nga magpas-an sila niana nga kabug-at. w23.08 29 ¶11-12

Si Samson dili hingpit parehas nato, maong dihay mga higayon nga nakahimo siyag sayop nga mga desisyon. Ang usa niana makapaguol kaayog resulta. Human sa taastaas nga panahon nga nag-alagad si Samson ingong maghuhukom, “nahigugma siya sa usa ka babaye sa Walog sa Sorek nga ginganlag Delila.” Kaniadto, minyoonon si Samson sa usa ka babayeng Filistehanon, pero kadto maoy ‘paagi ni Jehova,’ kinsa ‘nangitag higayon batok sa mga Filistehanon.’ Sa ulahi, si Samson miadto sa balay sa usa ka pampam sa Filistehanong siyudad sa Gaza. Niadtong higayona, gihatagan sa Diyos si Samson ug kusog sa pagtangtang ug pagpas-an sa mga pultahan sa ganghaan sa siyudad, maong mihuyang ang depensa sa siyudad. (Maghu. 14:​1-4; 16:​1-3) Pero lahi tingali ang kahimtang ni Delila kay posible nga Israelinhon siya. Si Delila midawat ug dakong kantidad sa kuwarta gikan sa mga Filistehanon baylo sa iyang pagluib kang Samson. w23.09 5 ¶12-13

Ang pagsabot makatabang nato nga mahimong lumo. Ang tawo nga may pagsabot magpugong sa iyang kaugalingon kon naay mokuwestiyon sa iyang mga gituohan. Ang ubang pangutana samag iceberg; gamay ra ang atong makita kay ang dakong bahin niini naa sa ilalom. Pananglitan, naa tingali nagpahiping motibo o naay gikabalak-an ang usa ka tawo maong nangutana siya. Busa sa dili pa motubag, maayong hinumdoman nga posibleng wala ta mahibalo sa rason kon nganong nangutana ang usa ka tawo. (Prov. 16:23) Konsideraha ang reaksiyon ni Gideon dihang gisukmatan siya sa mga lalaki sa Epraim. Nasuko sila kang Gideon kay wala dayon niya sila tawga aron makiggubat sa mga kaaway sa Israel. Pero ngano kahang nasuko sila pag-ayo? Natandog kaha ang ilang garbo? Wala ta mahibalo kon unsa gyoy rason, pero gitahod ni Gideon ang ilang gibati ug kalmado siyang mitubag. Unsay resulta? “Sila mikalma.”—Maghu. 8:​1-3. w23.09 16 ¶8-9

Suod kaayo ang relasyon ni Jehova ug Jesus ingong amahan ug anak; wala nay molabaw sa ilang kasuod. Seguradong nasakitan gyod si Jehova nga nagtan-aw sa iyang Anak nga gidaogdaog, gisalikway, ug gipaantos. Bisan kinsang ginikanan nga namatyag anak nahibalo gyod kon unsa ka sakit ang bation tungod niana. Dako tag pagtuo sa pagkabanhaw, pero dili na makapawala sa kasakit nga atong bation dihang mamatyan tag minahal. Kini nga pananglitan magtabang nato nga masabtan kon unsay gibati ni Jehova dihang nagtan-aw siya sa iyang pinanggang Anak nga nag-antos ug namatay niadtong Nisan 14, 33 C.E. (Mat. 3:17) Sugod karon hangtod sa Memoryal, puwede kaha nimong himoong project sa personal nga pagtuon o sa Pamilyahanong Pagsimba ang bahin sa lukat? Ug sa adlaw sa Memoryal, ayaw kalimti ang pagtan-aw sa espesyal nga programa sa Morning Worship. Dihang andamon nato ang atong kasingkasing para sa Memoryal, mas makatabang ta sa uban nga makabenepisyo pod niini.—Esd. 7:10. w24.01 11 ¶10-12

Ang usa ka paagi nga madawat nato ang kusog o gahom gikan kang Jehova mao ang pag-ampo kaniya. Tubagon niya ang atong mga pag-ampo pinaagi sa paghatag natog “gahom nga labaw sa kasarangan.” (2 Cor. 4:7) Mapalig-on pod ta kon atong basahon ug pamalandongon ang iyang Pulong. (Sal. 86:11) Ang mensahe ni Jehova kanato diha sa Bibliya “gamhanan.” (Heb. 4:12) Dihang mag-ampo ka kang Jehova ug basahon nimo ang iyang Pulong, madawat nimo ang kusog nga imong gikinahanglan aron makalahutay, magpabiling malipayon, o mahimo ang lisod nga asaynment. Matikdi kon sa unsang paagi gipalig-on ni Jehova si propetang Jonas. Nahadlok si Jonas nga moadto sa lugar nga gisugo ni Jehova nga adtoon niya, maong misakay siyag barko padulong sa laing lugar. Tungod ana, hapit siyang mamatay sa kusog nga bagyo ug hapit pod maangin ang mga kauban niya sa barko. Dihang giitsa siya sa dagat, naadto siya sa lugar nga wala pa niya maadtoi sukad—ang ngitngit nga tiyan sa dako kaayong isda. Unsay gihimo ni Jonas aron mapalig-on siya samtang nag-inusara didto sa tiyan sa dakong isda? Nag-ampo siya.—Jon. 2:​1, 2, 7. w23.10 13 ¶4-6

Bisag ang mga sulat ni apostol Pedro maoy para sa mga Kristohanon sa unang siglo, gipaapil kini ni Jehova diha sa iyang Pulong. Busa makakat-on ta karon sa mga sulat ni Pedro. (Roma 15:4) Gipalibotan tag mga tawo nga dili motuo sa mga tagna sa Bibliya. Bugalbugalan pod tingali ta sa mga magsusupak kay daghang tuig na tang nagsigeg ingon nga hapit na ang kataposan. Ang uban moingon pod nga dili gyod moabot ang kataposan. (2 Ped. 3:​3, 4) Kon makadungog tag ingon ana nga mga komento gikan sa atong mga masangyawan, katrabaho, o membro sa pamilya, ang atong pagtuo posibleng mohuyang. Gisulti ni Pedro kon unsay makatabang nato. Ang uban wala makasabot kon nganong wala pa taposa ni Jehova kining daotang sistema. Ang giingon ni Pedro makatabang nato nga mapailobong magpaabot ug magpahinumdom nato nga ang panglantaw ni Jehova sa panahon lahi kaayo kay sa mga tawo. (2 Ped. 3:​8, 9) Para kang Jehova, ang usa ka libo ka tuig sama rag usa ka adlaw. Si Jehova mapailobon ug dili niya gusto nga naay malaglag. Pero inig-abot sa iyang adlaw, kini nga sistema matapos. w23.09 26-27 ¶2-5

Nganong gisulatan ni apostol Pablo ang Hebreohanong mga Kristohanon sa Judea? Tingali tungod sa duha ka pangunang rason. Una, aron dasigon sila. Kadaghanan nila nagdako sa Hudiyong relihiyon. Pero dihang nahimo silang Kristohanon, tingali gibiaybiay sila sa ilang kanhing mga lider sa relihiyon. Ngano? Kay ang mga Kristohanon walay nindot kaayong templo alang sa pagsimba, walay literal nga halaran diin makahalad sila ngadto sa Diyos, ug walay mga saserdote nga mag-alagad para nila. Posibleng nakapaluya ni sa mga tinun-an sa Kristo ug nakapahuyang sa ilang pagtuo. (Heb. 3:​12, 14) Ang uban nila basin naghunahuna pa ganing mobalik sa Judaismo. Ikaduha, giingnan ni Pablo ang Hebreohanong mga Kristohanon nga wala sila maningkamot nga masabtan ang bag-o o lawom nga mga pagtulon-an, ang “gahing pagkaon” diha sa Pulong sa Diyos. (Heb. 5:​11-14) Klaro nga ang uban kanila nagsunod gihapon sa Moisesnong Balaod. w23.10 24-25 ¶3-4

Ang ubang babaye midesisyon nga dili magminyo. (Mat. 19:​10-12) Makaseguro sila nga wala mamenosi ang ilang bili para kang Jehova ug Jesus tungod lang kay dili sila minyo. Sa tibuok kalibotan, ang dili minyong mga sister maoy dakong panalangin sa kongregasyon. Tungod sa ilang gugma ug sinserong interes sa uban, nahimo silang espirituwal nga mga igsoon ug inahan ngadto sa daghan. (Mar. 10:​29, 30) Ang uban nag-alagad sa bug-os panahon. Ang Kristohanong mga babaye dako kaayog nahimo sa buluhatong pagsangyaw sa tibuok kalibotan. (Sal. 68:11) Puwede ba nimong planohon karon nga mosulod sa bug-os panahong pag-alagad? Puwede ka mahimong payunir, construction volunteer, o Bethelite. Iampo ang imong tumong. Pakig-estorya sa uban nga nakakab-ot niana nga tumong, ug sayra kon unsay kinahanglan nimong buhaton aron mahimong kuwalipikado. Dayon paghimog realistikong plano. Kon imong makab-ot ang imong tumong, mag-abli nig daghang nindot nga kahigayonan para nimo sa pag-alagad kang Jehova. w23.12 22 ¶16-17

Samtang nagkaduol ang dakong kasakitan, importante kaayo nga sundon nato ang sugo nga mosangyaw. Pero malisdan tingali ta nga magpokus sa atong ministeryo kon naglisod ta sa pinansiyal o gisupak ang atong buluhatong pagsangyaw. Unsay makatabang nato nga unahon ang Gingharian? Kanunay tang mosalig nga “si Jehova sa mga panon” nagauban kanato. Tabangan ta niya kon padayon natong unahon ang Gingharian kay sa atong kaugalingon. Busa dili gyod ta angayng mahadlok. (Hag. 2:4) Gusto ni Jehova nga magpokus ta sa buluhaton nga makaluwas ug kinabuhi—ang paghimog tinun-an. Gidasig ni Haggeo ang katawhan ni Jehova nga sugdan pag-usab ang ilang sagradong pag-alagad, nga sama bag ipahiluna nila pag-usab ang pundasyon sa templo. Kon ila nang himoon, nagsaad si Jehova nga iya silang “panalanginan.” (Hag. 2:​18, 19) Makasalig pod ta nga panalanginan ni Jehova ang atong mga paningkamot kon unahon nato ang buluhaton nga iyang gisugo kanato. w23.11 16 ¶8; 17 ¶11

Sa sulat ni apostol Pablo sa mga taga-Roma, siya miingon nga ang tanang tawo makasasala. Busa posible ba gyod nga mapalipay nato ang Diyos ug isipon ta nga matarong o walay ikasaway? Aron tabangan ang tanang sinserong Kristohanon sa pagtubag niana nga pangutana, gihisgotan ni Pablo ang ehemplo ni Abraham. Si Abraham nagpuyo sa yuta sa Canaan dihang gitawag siya ni Jehova ingong matarong nga tawo. Nganong gitawag man siya ni Jehova nga matarong? Tungod ba kay gisunod gyod ni Abraham ang Moisesnong Balaod? Dili. (Roma 4:13) Kana nga Balaod gihatag sa nasod sa Israel kapig 400 ka tuig human tawga sa Diyos si Abraham ingong matarong nga tawo. Busa unsa may basehanan sa Diyos sa pagtawag kang Abraham nga matarong? Gipakitaan ni Jehova si Abraham ug dili hitupngang pagkamaayo ug gitawag siyang matarong tungod sa iyang pagtuo.—Roma 4:​2-4 w23.12 3 ¶4-5

Niadto mismong gabhiona nga gisulti kini ni propetang Natan kang David, giingnan ni Jehova si Natan nga dili si David ang magtukod sa templo. (1 Cron. 17:​3, 4, 11, 12) Unsay reaksiyon ni David dihang nadawat niya kini nga mensahe? Nagpokus siya sa pagtigom ug kuwarta ug materyales nga gikinahanglan sa iyang anak nga si Solomon para sa proyekto. (1 Cron. 29:​1-5) Human dayon masultihi si David nga dili siya ang magtukod sa templo, si Jehova naghimog pakigsaad kaniya. Nagsaad si Jehova nga usa sa mga kaliwat ni David ang magmando hangtod sa hangtod. (2 Sam. 7:16) Sa bag-ong kalibotan, imadyina kon unsa ka malipayon si David dihang mahibaloan niya nga si Jesus, ang Hari panahon sa Usa ka Libo ka Tuig nga Pagmando, naggikan sa iyang pamilya! Ang ehemplo ni David nakatabang nato nga makita nga bisag dili nato mahimo ang tanan nga gusto natong himoon para kang Jehova, ang atong Diyos naa tingali giandam nga mga panalangin para nato nga wala nato damha. w23.04 16 ¶8-10

Naa tingali kay ganahan nga mga basahon sa Bibliya nga makahupay nimo dihang mahadlok ka. Pananglitan, madasig tingali ka sa mga basahon sa Job, Salmo, ug Proverbio ug apil na pod sa giingon ni Jesus sa Mateo kapitulo 6. Samtang mag-ampo ka kang Jehova ug magbasa sa iyang Pulong, bation nimo ang iyang paghupay. Makasalig ta nga dili gyod ta biyaan ni Jehova sa lisod nga mga panahon sa atong kinabuhi. Dili gyod ta mag-inusara. (Sal. 23:4) Si Jehova nagsaad nga iya tang bantayan, tabangan nga mahimong balanse, suportahan, ug hupayon. Bahin kang Jehova, ang Isaias 26:3 nag-ingon: “Panalipdan nimo kadtong mga bug-os nagasalig kanimo; hatagan nimo silag walay kataposang pakigdait, kay kanimo sila nagasalig.” Busa salig kang Jehova ug pahimusli ang tanan nga gigamit niya sa pagtabang kanimo. Kon imo nang himoon, makabaton kag kusog bisan sa lisod nga mga panahon. w24.01 25 ¶16-17

Ang mga pulong sa teksto niining adlawa nagakatuman karon. Nagakatuman pod kining makapahupay nga tagna: “Ang tanan nimong anak mahimong mga tinudloan ni Jehova, ug matagamtam sa imong mga anak ang dagayang pakigdait. Lig-on kang matukod diha sa pagkamatarong. . . . Wala kay kahadlokan ug walay kalisangan, kay kini dili moduol kanimo.” (Isa. 54:​13, 14) Bisan “ang diyos niini nga sistema sa mga butang,” si Satanas, dili makapugong sa buluhatong pagpanudlo nga ginahimo sa katawhan ni Jehova. (2 Cor. 4:4) Ang putling pagsimba napasig-uli na ug dili gyod ni mahugawan pag-usab. Magpabilin ni karon ug hangtod sa hangtod. Walay hinagiban nga gibuhat batok kanato ang magmalamposon! w24.02 4 ¶10

Ingong mga Kristohanon, seryoso para nato ang atong panaad nga alagaron si Jehova. Makaapektar ni sa mga desisyon nga atong himoon maylabot sa atong pamilya. Naningkamot ta nga atimanon ang atong mga responsibilidad sa pamilya, pero angay natong unahon ang pagtuman sa mga sugo ni Jehova imbes ang pagsunod sa gusto sa atong pamilya. (Mat. 10:​35, 36; 1 Tim. 5:8) Usahay, nagpasabot na nga mohimo tingali tag mga desisyon nga dili makapalipay sa atong pamilya pero makapalipay kang Jehova. Siya ang naghimo sa kahikayan sa pamilya, ug gusto niya nga magmalipayon ta. (Efe. 3:​14, 15) Aron tinuod tang magmalipayon, kinahanglang sundon nato si Jehova. Makasalig gyod ka nga gipabilhan pag-ayo ni Jehova ang mga sakripisyo nga imong gihimo sa pag-alagad kaniya samtang naningkamot ka nga atimanon ang imong pamilya ug pakitaan silag gugma ug pagtahod.—Roma 12:10. w24.02 17-18 ¶11, 13