Marso

Ang bag-ong kalibotan wala pa moabot. Pero matikdi ang mga butang nga naa karon—ang mga bituon, kahoy, hayop, ug mga tawo. Seguradong walay bisan usa karon ang moingon nga dili tinuod kining mga butanga, bisan pag wala kini maglungtad kaniadto. Nakita nato ni karon kay gihimo ni Jehova kining tanan. (Gen. 1:​1, 26, 27) Gusto sab sa atong Diyos nga magpatunghag bag-ong kalibotan. Iya gyod nang tumanon. Sa bag-ong kalibotan, hingpit na ang panglawas sa mga tawo ug malipayon silang mabuhi hangtod sa hangtod. Sama nga naglungtad karon ang uniberso, makasalig ta nga sa gitakdang panahon sa Diyos, moabot pod ang bag-ong kalibotan. (Isa. 65:17; Pin. 21:​3, 4) Sa pagkakaron, pahimuslan nato ang kahigayonan nga mapalig-on ang atong pagtuo. Pabilhi ang lukat. Pamalandonga ang gahom ni Jehova. Paggahig dakong panahon sa espirituwal nga kalihokan. Kon imo nang himoon, maparehas ka sa mga alagad ni Jehova kinsa “nakadawat sa mga saad tungod sa ilang pagtuo ug mapailobong paghulat.”—Heb. 6:​11, 12. w23.04 31 ¶18-19

Si Jesus mihangad sa langit ug miampo, nga nadungog sa mga tawo. Gusto niya nga si Jehova ang madayeg sa sunod nga mahitabo. Dayon siya misinggit: “Lazaro, gula ngari!” (Juan 11:43) Ug si Lazaro migula sa lubnganan! Gibanhaw ni Jesus si Lazaro, nga para sa uban imposible kaayong mahitabo. Kini nga hitabo makapalig-on sa atong pagtuo sa pagkabanhaw. Ngano? Hinumdomi ang saad ni Jesus kang Marta: “Mabanhaw ang imong igsoon.” (Juan 11:23) Sama sa iyang Amahan, gustong tumanon ni Jesus ang maong saad, ug kaya na niyang himoon. Ang iyang paghilak nagpakita nga gusto gyod niyang wad-on ang kamatayon ug ang kaguol nga resulta niini. Ug dihang migawas si Lazaro sa lubnganan, gipamatud-an ni Jesus nga naa siyay gahom sa pagbanhawg mga patay. Hunahunaa pod ang gipahinumdom ni Jesus kang Marta sa teksto karong adlawa. Naa gyod tay lig-ong mga rason nga mosalig nga matuman ang saad sa Diyos nga pagkabanhaw. w23.04 11-12 ¶15-16

Kinahanglan tingali natong usbon kon unsay atong ginaampo dihang mas masabtan nato ang kabubut-on ni Jehova. Angay natong hinumdoman nga naay katuyoan si Jehova, ug iya nang tumanon sa iyang gitakdang panahon. Apil niana nga katuyoan ang bug-os nga pagwagtang sa tanang problema nga maoy hinungdan sa daghang pag-antos karon, sama sa kalamidad, sakit, ug kamatayon. Tumanon ni Jehova ang iyang katuyoan pinaagi sa iyang Gingharian. (Dan. 2:44; Pin. 21:​3, 4) Pero sa pagkakaron, gitugotan ni Jehova si Satanas nga mandoan ang kalibotan. (Juan 12:31; Pin. 12:9) Kon sulbaron ni Jehova ang problema sa mga tawo karon, morag iyang gitabangan si Satanas nga molampos sa pagmando. Busa kinahanglan tang magpaabot nga tumanon ni Jehova ang iyang mga saad, pero wala na magpasabot nga pasagdan na lang ta niya. Si Jehova motabang nato. w23.05 8 ¶4; 9-10 ¶7-8

Unsaon nato pagtabang ang uban nga makabenepisyo sa Memoryal? Siyempre, ang unang paagi mao ang pag-imbitar kanila. Gawas pa niadtong maestorya nato sa ministeryo, puwede natong ilista ang mga tawo nga gusto natong imbitahon. Apil ani atong mga paryente, kauban sa trabaho, schoolmate, ug uban pa. Kon makulangan tag inimprenta nga imbitasyon, puwede tang mag-share ug link sa electronic version. Basin pa diayg daghan ang modesisyon nga motambong! (Eccl. 11:6) Hinumdomi nga kadtong atong imbitahon naa tingali mga pangutana—ilabina kon wala pa sila makatambong sa atong mga tigom. Busa maayong hunahunaon nato daan kon unsay posible nilang ipangutana aron makapangandam ta sa pagtubag niana. Human sa Memoryal, ang bag-ong mga interesado naa pa tingali mga pangutana. Gusto natong himoon ang tanan natong maarangan—sa dili pa, panahon, ug human sa Memoryal—sa pagtabang niadtong “nakiling sa pagdawat sa kamatuoran” aron makabenepisyo sila niini nga okasyon.—Buh. 13:48. w24.01 12 ¶13, 15; 13 ¶16

Mabasa sa Bibliya ang walo ka pagkabanhaw nga nahitabo dinhi sa yuta. Puwede nimong tun-an pag-ayo ang kada usa niana. Ug samtang magtuon ka, pangitag mga leksiyon nga imong makat-onan. Hunahunaa kon sa unsang paagi ang matag usa niana nga mga pananglitan nagpakita nga gusto kaayo sa Diyos nga banhawon ang mga patay ug nga naa gyod siyay gahom sa pagbuhat niana. Labaw sa tanan, pamalandonga ang pinakaimportanteng pagkabanhaw—ang pagkabanhaw ni Jesus. Hinumdomi nga ang iyang pagkabanhaw nakita sa gatosan ka tawo ug naghatag ug lig-ong basehanan sa atong pagtuo. (1 Cor. 15:​3-6, 20-22) Mapasalamaton kaayo ta sa saad ni Jehova nga pagkabanhaw! Makasalig ta nga matuman gyod ni nga saad, kay gusto kaayo ning buhaton ni Jehova ug naa gyod siyay gahom nga himoon kini. Hinaot nga magmadeterminado ta nga padayong palig-onon ang atong pagtuo niining bililhon nga paglaom. Kon ato nang buhaton, mas masuod pa gyod ta sa atong Diyos kinsa nagsaad sa matag usa kanato, ‘Mabanhaw ang imong mga minahal!’—Juan 11:23. w23.04 8 ¶2; 12 ¶17; 13 ¶20

Ang pagkamakasaranganon konektado kaayo sa pagkamapainubsanon. Makasaranganon ta kon naa tay hustong panglantaw sa atong kaugalingon ug sa atong mga limitasyon. Mapainubsanon ta kon isipon nato ang uban nga labaw kay kanato. (Filip. 2:3) Sagad, ang makasaranganon nga tawo mapainubsanon pod. Si Gideon makasaranganon ug mapainubsanon nga tawo. Dihang giingnan sa anghel ni Jehova si Gideon nga siyay gipili sa pagluwas sa Israel gikan sa gamhanang kasundalohan sa Midian, siya mapainubsanong mitubag: “Ang akong banay maoy kinagamyan sa Manases, ug ako ang kinaubsan sa panimalay sa akong amahan.” (Maghu. 6:15) Gibati niya nga dili siya kuwalipikado sa maong asaynment, pero nahibalo si Jehova nga iya nang mahimo. Sa tabang ni Jehova, milampos si Gideon sa iyang asaynment. Ang mga ansiyano naningkamot pag-ayo nga magmakasaranganon ug magmapainubsanon sa tanang butang. (Buh. 20:​18, 19) Dili sila maghunahuna nga kaya nilang himoon tanan ug dili sila manghambog sa ilang mga nalampos. Dili pod nila basolon pag-ayo ang ilang kaugalingon tungod sa ilang mga sayop o kakulangan. w23.06 3 ¶4-5

Ang pagdugmok sa ulo ni Satanas, matuman kapig 1,000 ka tuig pa sa umaabot. (Pin. 20:​7-10) Sa dili pa na mahitabo, gitagna sa Bibliya kining kulbahinam nga mga hitabo. Una, ang mga nasod mopahayag ug “kalinaw ug kasegurohan!” (1 Tes. 5:​2, 3) Dayon, “kalit” nga magsugod ang dakong kasakitan dihang atakehon sa kanasoran ang tanang bakak nga relihiyon. (Pin. 17:16) Human niana, si Jesus magpahayag ug paghukom sa katawhan, nga maglain sa mga karnero gikan sa mga kanding. (Mat. 25:​31-33, 46) Pero si Satanas dili pod moundang sa iyang mga paningkamot. Sa iyang pagdumot, iyang palihokon ang nag-alyansa nga mga nasod, nga gitawag sa Bibliya ug Gog sa yuta sa Magog, aron atakehon ang katawhan ni Jehova. (Ezeq. 38:​2, 10, 11) Nianang mga panahona, ang nahibiling mga dinihogan dad-on sa langit aron moduyog sa Kristo ug sa iyang langitnong kasundalohan. Sila makig-away sa gubat sa Armagedon, ang kataposang bahin sa dakong kasakitan. (Mat. 24:31; Pin. 16:​14, 16) Dayon, magsugod na ang Usa ka Libo ka Tuig nga Pagmando sa Kristo dinhi sa yuta.—Pin. 20:6. w23.10 20-21 ¶9-10

Karon, daghang alagad ni Jehova ang nagpuyo sa mga lugar diin gidili ang atong buluhaton. Gitahod nila ang sekular nga mga awtoridad, pero sama kang Abdias, kining minahal nga mga igsoon wala gyod mohunong sa paghatag kang Jehova sa ilang eksklusibong debosyon. (Mat. 22:21) Nagpakita silag kahadlok sa Diyos pinaagi sa pagsunod kaniya imbes sa mga tawo. (Buh. 5:29) Ila kining gipakita pinaagi sa padayong pagsangyaw sa maayong balita ug sa pagtigom nga tinagotago. (Mat. 10:​16, 28) Ilang giseguro nga ang mga igsoon makadawat ug espirituwal nga pagkaon nga ilang gikinahanglan. Kanay gihimo ni Henri, nga nagpuyo sa usa ka lugar sa Africa diin gidili ang atong buluhaton kaniadto. Niadtong panahona, miboluntaryo si Henri nga mohatod ug mga publikasyon ngadto sa mga igsoon. Siya misulat: “Maulawon ko. [Si Jehova] . . . nakahatag nakog kaisog.” Makapakita pod ba kag kaisog sama ni Henri? Oo, kon imong ugmaron ang hustong kahadlok sa Diyos. w23.06 16 ¶9, 11

Dihang mirebelde si Adan ug Eva, morag napugngan ni Satanas ang katuyoan sa Diyos nga pun-on ang yuta ug hingpit, masinugtanong katawhan. Tingali nagtuo si Satanas nga si Jehova gamay ra kaayog kapiliang solusyon sa pagtuman sa Iyang katuyoan. Ang usa niana mao nga patyon si Adan ug Eva ug dayon maghimog laing hingpit nga magtiayon aron matuman ang Iyang katuyoan para sa tawo. Pero kon himoon na sa Diyos, akusahan Siya sa Yawa ingong bakakon. Ngano? Kay sumala sa narekord sa Genesis 1:​28, giingnan ni Jehova si Adan ug Eva nga ang yuta mapuno sa ilang mga kaliwat. O tingali naghunahuna si Satanas nga tugotan ni Jehova si Adan ug Eva nga magpatunghag dili hingpit nga kaliwat kinsa imposible na nga mahimong hingpit. (Eccl. 7:20; Roma 3:23) Kon mao, seguradong akusahan sa Yawa si Jehova nga wala makatuman sa Iyang saad. Ngano? Tungod kay kini nga solusyon dili makatuman sa katuyoan sa Diyos—nga ang Paraisong yuta mapuno sa hingpit, masinugtanong mga kaliwat ni Adan ug Eva. w23.11 6 ¶15-16

Si Jehova naghatag natog klarong direksiyon pinaagi sa iyang Pulong ug organisasyon. Wala tay rason nga dugangan ang mga instruksiyon nga iyang gihatag. (Prov. 3:​5-7) Busa dili gyod ta molapas sa kon unsay nasulat sa Bibliya o mohatag sa mga igsoon ug kaugalingong mga balaod bahin sa personal nga mga butang. Gigamit ni Satanas ang malimbongong mga impormasyon ug ang “kalibotanong mga ideya” aron mailad ug magkabahinbahin ang mga tawo. (Col. 2:8) Sa unang siglo, apil niini ang mga pilosopiya nga gibase sa panghunahuna sa tawo, dili Kasulatanhong mga pagtulon-an sa mga Hudiyo, ug ang pagtulon-an nga ang mga Kristohanon angayng mosunod sa Moisesnong Balaod. Kini maoy mga panglimbong kay gipalayo niini ang atensiyon sa mga tawo gikan sa tinuod nga Tinubdan sa kaalam, si Jehova. Karon, gigamit ni Satanas ang media ug ang social network aron magpakaylap ug way basehanang mga estorya ug dili tinuod nga mga balita nga gi-promote sa mga politiko. w23.07 16 ¶11-12

Maayo kaayo ang solusyon nga gipili ni Jehova sa pagsulbad sa pagrebelde ni Satanas ug sa unang mga tawo, ug seguradong wala gyod to damha ni Satanas. Gipamatud-an ni Jehova nga dili siya bakakon; iyang gipakita nga tinuod ang iyang gisulti kay gitugotan niya si Adan ug Eva nga makabaton ug mga anak. Gipamatud-an pod ni Jehova nga wala siya mapakyas; hinuon siya nagmadaogon. Iyang giseguro nga matuman ang iyang katuyoan pinaagi sa pagtaganag “kaliwat” nga magluwas sa masinugtanong mga kaliwat ni Adan ug Eva. (Gen. 3:15; 22:18) Seguradong nakurat si Satanas sa kahikayan nga gihimo ni Jehova bahin sa lukat! Ngano? Tungod kay ang lukat gibase sa dili hakog nga gugma. (Mat. 20:28; Juan 3:16) Si Satanas wala niana nga hiyas kay siya hakog. Busa unsay mahitabo tungod sa kahikayan sa lukat? Human sa Usa ka Libo ka Tuig nga Pagmando sa Kristo, ang hingpit, masinugtanong mga kaliwat ni Adan ug Eva magpuyo sa paraisong yuta—nga maoy orihinal nga katuyoan ni Jehova. w23.11 6 ¶17

Gisunod nato ang balaod ni Jehova bahin sa pagkabalaan sa kinabuhi ug dugo. Ngano? Kay si Jehova nag-ingon nga ang dugo nagrepresentar sa kinabuhi, usa ka bililhong regalo gikan niya. (Lev. 17:14) Dihang gitugotan na ni Jehova ang mga tawo nga kaonon ang unod sa mga hayop, naghatag siyag sugo nga dili apilog kaon ang dugo. (Gen. 9:4) Naa gihapon ni nga sugo dihang gihatag niya ang Moisesnong Balaod sa Israel. (Lev. 17:10) Ug iyang gigiyahan ang Nagamandong Lawas sa unang siglo sa paghatag ug direksiyon nga ang tanang Kristohanon kinahanglang ‘padayong maglikay sa dugo.’ (Buh. 15:​28, 29) Sundon gyod nato ni nga balaod dihang mohimo tag mga desisyon bahin sa pagpatambal. Gisunod pod nato pag-ayo ang taas nga sukdanan ni Jehova sa moralidad. Si apostol Pablo klarong nagtambag nga ‘patyon’ nato ang mga parte sa atong lawas maylabot sa sayop nga mga tinguha—sa ato pa, himoon nato ang tanang gikinahanglan aron mawagtang kini. Dili ta motan-aw o mohimog bisan unsa nga moresultag seksuwal nga imoralidad.—Col. 3:5; Job 31:1. w23.07 15 ¶5-6

Sobra ra ba ang gugma ug pagsalig ni Samson maong wala siya kabantay sa motibo ni Delila? Wala ta mahibalo. Pero balikbalik siyang gipresyur ni Delila nga isulti kon nganong kusgan kaayo siya. Ug sa ulahi, mitug-an si Samson. Makapaguol kay ang sayop nga desisyon ni Samson miresulta sa temporaryong pagkawala sa iyang kusog ug sa pag-uyon ni Jehova. (Maghu. 16:​16-20) Nag-antos si Samson sa pait nga resulta sa iyang pagsalig kang Delila imbes kang Jehova. Nadakpan si Samson sa mga Filistehanon ug gibutaan siya. Gipriso siya sa Gaza, ug gihimo siyang makaluluoy nga tiggaling ug lugas. Dayon, gidala siya sa mga Filistehanon sa usa sa ilang mga selebrasyon ug gipakaulawan siya. Nagtanyag silag daghang halad sa ilang bakak nga diyos nga si Dagon, nga maoy ilang gituohan nga nagtabang nila nga madakpan si Samson. Gikuha nila si Samson sa prisohan aron naa silay “kalingawan”—aron yagayagaan siya.—Maghu. 16:​21-25. w23.09 5-6 ¶13-14

Tingali naa tay katrabaho o schoolmate nga mangutana bahin sa atong Kristohanong baroganan sa pipila ka moral nga mga isyu. Maningkamot ta nga depensahan ang atong pagtuo, ug sa samang higayon tahoron ang ilang opinyon. (1 Ped. 3:15) Imbes maghunahuna nga nangutana ang usa ka tawo aron hagiton ka, maayong isipon ang pangutana ingong paagi aron mahibaloan kon unsay importante para niya. Bisag unsa pay rason nga nangutana ang usa ka tawo, maayong motubag ta sa lumo ug buotan nga paagi. Ang atong tubag posibleng magpalihok niya nga susihon pag-usab ang iyang opinyon. Pananglitan, kon pangutan-on ta sa atong katrabaho kon nganong wala ta naga-celebrate ug birthday, konsideraha ni: Naghunahuna kaha siya nga dili ta puwedeng maglipaylipay? Mawala tingali ang iyang mga kabalaka kon sultihan nato siya nga naapresyar nato pag-ayo ang iyang interes sa mga kauban sa trabaho. Posibleng moresulta ni sa maayong panag-estoryahay kon unsay gipakita sa Bibliya bahin sa birthday. w23.09 16-17 ¶10-11

Pribilehiyo gyod nato nga gamiton ang nahibiling panahon aron sangyawan ang mga tawo sa tanang kanasoran. Gidasig ta ni apostol Pedro nga ‘maghunahuna kanunay’ sa adlaw ni Jehova. (2 Ped. 3:​11, 12) Unsaon nato na paghimo? Pinaagi sa pagpamalandong—kada adlaw, kon posible—sa mga panalangin nga atong madawat sa bag-ong kalibotan. Imadyina nga naghanggab kag hinlo kaayo nga hangin, nagkaon ug makapahimsog kaayo nga pagkaon, nag-abiabi sa imong mga minahal nga nabanhaw, ug nagtudlo sa mga tawo nga nabuhi linibo ka tuig kanhi bahin sa katumanan sa mga tagna sa Bibliya. Ang pagpamalandong niana makatabang nimo nga padayong magpaabot ug dili magduhaduha nga hapit na gyod ang kataposan. Kay ‘nahibalo na ta’ kon unsay mahitabo sa umaabot, dili ta ‘mapahisalaag’ sa bakak nga mga pagtulon-an. w23.09 27 ¶5-6

Ang mga batan-on gipalibotan sa ubang batan-on nga “dili masinugtanon sa ginikanan.” (2 Tim. 3:​1, 2) Nganong daghan nila ang dili masinugtanon? Gibati sa uban nga salingkapaw ang ilang ginikanan, kay naa silay gustong ipahimo sa ilang mga anak nga sila mismo wala gahimo. Para sa uban, ang tambag sa ilang ginikanan kinaraan na, dili praktikal, o sobra ka estrikto. Kon batan-on ka, kana pod bay imong gibati? Daghan ang naglisod ug sunod sa sugo ni Jehova nga makita sa teksto karong adlawa. Unsay makatabang nimo sa paghimo niana? Makakat-on ka gikan sa pinakamaayong ehemplo sa pagkamasinugtanon—si Jesus. (1 Ped. 2:​21-24) Hingpit siya nga tawo, pero ang iyang mga ginikanan dili. Bisan pa niana, gipasidunggan ni Jesus ang iyang mga ginikanan bisag nakahimo silag mga sayop ug usahay wala sila makasabot niya.—Ex. 20:12. w23.10 7 ¶4-5

Gipatin-aw ni apostol Pablo nga ang mga halad nga gisugo sa Balaod dili bug-os makatabon sa sala. Tungod ana, ang Balaod “giwala.” Dayon, gitudloan sila ni Pablo sa mas lawom nga mga kamatuoran. Iya silang gipahinumdoman sa “mas maayong paglaom” nga gibase sa halad ni Jesus, nga mao gyoy makatabang nila sa ‘pagduol sa Diyos.’ (Heb. 7:19) Gipatin-aw ni Pablo ngadto sa Hebreohanong mga Kristohanon kon nganong ang ilang pagsimba mas labaw kay sa pagsimba nga ilang gihimo kaniadto. Ang paagi sa pagsimba sa Hudiyong relihiyon maoy “anino [lang] sa mga butang nga moabot, apan ang katinuoran iya sa Kristo.” (Col. 2:17) Ang anino maghatag natog ideya sa porma sa usa ka butang, pero dili kini ang aktuwal nga butang. Sa susama, ang paagi sa pagsimba sa mga Hudiyo kaniadto maoy anino lang sa umaabot nga kahikayan sa pagsimba. Kinahanglan natong masabtan ang kahikayan nga gihimo ni Jehova sa pagpasaylo sa atong mga sala aron makahatag ta kaniyag dalawatong pagsimba. w23.10 25 ¶4-5

Ang Daniel kapitulo 11 naghisgot ug duha ka hari, o politikal nga gahom, nga nag-ilogay kon kinsa ang magdominar sa kalibotan. Pinaagi sa pagtandi niini nga tagna sa ubang tagna sa Bibliya, masabtan nato nga ang “hari sa amihanan” mao ang Russia ug ang mga kaalyado niini, ug ang “hari sa habagatan” mao ang Anglo-Amerikanong Gahom sa Kalibotan. Ang katawhan sa Diyos nga nailalom sa pagmando sa “hari sa amihanan” gilutos niini nga hari. Ang ubang Saksi gikulata ug gipriso tungod sa ilang pagtuo. Pero imbes mahadlok sa ginahimo sa “hari sa amihanan,” nakapalig-on hinuon ni sa ilang pagtuo. Ngano? Kay ang atong mga igsoon nahibalo nga ang paglutos sa katawhan sa Diyos maoy katumanan sa mga tagna ni Daniel. (Dan. 11:41) Ang pagkahibalo niana makatabang nato nga mahuptang lig-on ang atong paglaom ug makapabiling matinumanon. w23.08 11 ¶15-16

Kay gimahal ta ni Jehova, makamatikod dayon siya sa atong gibati ug gusto kaayo ta niyang protektahan. Masakitan siya dihang masakitan ta. Tungod ana, puwede tang moampo niya: “Panalipdi ko sama sa tawotawo sa imong mata.” (Sal. 17:8) Ang mata sensitibo, ug importante ni nga bahin sa lawas. Busa sa dihang gipakasama ta ni Jehova sa tawotawo sa iyang mata, samag miingon siya, ‘Dihang pasakitan mo sa uban, ilang gipasakitan kon unsay bililhon para nako.’ Gusto ni Jehova nga kombinsido ta nga gimahal niya ang matag usa nato. Pero nahibalo siya nga tungod sa atong mga naeksperyensiyahan, maghunahuna tingali ta kon higugmaon ba gyod ta niya. O basin nag-atubang tag mga situwasyon karon nga nagsulay sa atong pagsalig sa gugma ni Jehova. Aron molig-on ang atong pagsalig sa gugma ni Jehova, atong tun-an kon giunsa pagpakita ni Jehova ang iyang gugma kang Jesus, sa mga dinihogan, ug kanatong tanan. w24.01 27 ¶6-7

Nakita ni Esdras kon giunsa pagtabang ni Jehova ang Iyang katawhan sa peligroso kaayong mga kahimtang. Daghang tuig una pa niana, sa 484 B.C.E., si Esdras posibleng nagpuyo sa Babilonya dihang nagsugo si Haring Ahasuero nga puohon ang tanang Hudiyo sa Imperyo sa Persia. (Est. 3:​7, 13-15) Nameligro gyod ang kinabuhi ni Esdras! Tungod niini nga sugo, ang mga Hudiyo “sa matag probinsiya” nagpuasa, nagminatay, ug seguradong nag-ampo kang Jehova alang sa tabang. (Est. 4:3) Imadyina ang gibati ni Esdras ug sa kauban niyang mga Hudiyo dihang kalit nga nausab ang kahimtang, kay kadto hinuong mga nagplano nga puohon ang mga Hudiyo maoy gipamatay! (Est. 9:​1, 2) Ang naeksperyensiyahan ni Esdras niadtong panahona posibleng nag-andam niya sa umaabot nga mga pagsulay ug nagpalig-on sa iyang pagsalig sa gahom ni Jehova sa pagpanalipod sa Iyang katawhan. w23.11 17 ¶12-13

Ang “binuhatan” nga gihisgotan ni apostol Pablo mao ang “pagtuman sa balaod,” ang balaod ni Moises, nga gihatag didto sa Bukid sa Sinai. (Roma 3:​21, 28) Ang ubang Hudiyong mga Kristohanon sa adlaw ni Pablo nalisdan sa pagdawat nga dili na nila kinahanglang tumanon ang Moisesnong Balaod. Busa gigamit ni Pablo ang ehemplo ni Abraham aron ipakita nga ang usa ka tawo makabaton ug matarong nga baroganan atubangan sa Diyos dili tungod sa “pagtuman sa balaod,” kondili tungod sa pagtuo. Makapadasig ni kay nagpasalig ni nga posible natong mabatonan ang maayong baroganan atubangan sa Diyos. Nagpasabot ni nga makaugmad tag pagtuo sa Diyos ug sa Kristo, nga moresultag pag-uyon sa Diyos. Sa laing bahin, ang “binuhatan” nga gihisgotan sa Santiago kapitulo 2 lahi sa “binuhatan” nga gihisgotan ni Pablo, nga mao ang “pagtuman sa balaod.” Ang gipasabot ni Santiago mao ang binuhatan sa mga Kristohanon sa ilang adlaw-adlawng pagkinabuhi. (Sant. 2:24) Ang maong binuhatan magpakita kon ang usa ka Kristohanon naa ba gyoy tinuod nga pagtuo sa Diyos o wala. w23.12 3 ¶8; 4-5 ¶10-11

Mga sister, kon naghunahuna mong magminyo, kinahanglang pilion ninyog maayo ang inyong mabana. Hinumdomi nga mailalom mo sa pagkaulo sa lalaki nga inyong minyoan. (Roma 7:2; Efe. 5:33) Busa pangutan-a ang kaugalingon: ‘Hamtong ba siya nga Kristohanon? Ginauna ba niya si Jehova sa iyang kinabuhi? Maalamon ba ang iyang mga desisyon? Moangkon ba siya kon masayop siya? Naa ba siyay pagtahod sa mga babaye? Kaya ba ko niyang suportahan sa espirituwal, materyal, ug emosyonal?’ Siyempre, kon gusto ninyong makakitag maayong bana, kinahanglan nga mangandam pod mo nga mahimong maayong asawa. Ang maayong asawa maoy “katimbang” o magtatabang ug “kauban” sa iyang bana. (Gen. 2:18) Ug kay nahigugma siya kang Jehova, maningkamot siya nga makita sa uban ang maayong mga hiyas sa iyang bana. (Prov. 31:​11, 12; 1 Tim. 3:11) Maandam mo para niini kon palalomon ninyo ang inyong gugma kang Jehova ug maningkamot mo nga mahimong katimbang sa uban diha sa balay ug sa kongregasyon. w23.12 22-23 ¶18-19

Si Jehova nagsaad nga hatagan ta niyag kaalam aron makahimo tag maayong mga desisyon. Nagkinahanglan tag kaalam sa Diyos ilabina dihang mohimo tag mga desisyon nga makaapektar sa atong tibuok kinabuhi. Hatagan pod ta niyag kusog aron makalahutay. Sama sa gihimo ni Jehova kang apostol Pablo, hatagan ta niyag kusog aron malahutay nato ang mga pagsulay. (Filip. 4:13) Ang usa ka paagi nga iyang gigamit mao ang mga igsoon. Sa gabii una ihalad ni Jesus ang iyang kinabuhi, kinasingkasing siyang nag-ampo. Gihangyo niya si Jehova nga dili unta Niya itugot nga mahukman siya ingong tigpasipala, nga way pagtahod sa Diyos. Pero dili kana ang gihimo ni Jehova. Hinuon, gitabangan Niya si Jesus pinaagi sa pagpadalag anghel aron palig-onon siya. (Luc. 22:​42, 43) Puwede pod tang tabangan ni Jehova pinaagi sa makapadasig nga tawag sa mga igsoon o dihang ila tang bisitahon. Ang matag usa nato puwedeng mangitag mga kahigayonan nga makahatag ug “maayong pulong” sa pagdasig sa mga igsoon.—Prov. 12:25. w23.05 10-11 ¶9-11

Ang mga dili aktibo nga mitambong sa Memoryal basin nahadlok nga dili sila abiabihon sa kongregasyon. Maong mag-amping ta sa atong mga ipangutana ug isulti kanila aron dili sila maulawan o masakitan. Atong hinumdoman nga mga igsoon nato sila. Malipay ta nga makauban nato sila pag-usab sa pagsimba kang Jehova. (Sal. 119:176; Buh. 20:35) Dili gyod ikatingala kon nganong gisugo ta ni Jesus nga saulogon ang Memoryal sa iyang kamatayon kada tuig. Dihang motambong ta sa Memoryal, makabenepisyo ta ug ang uban sa daghang paagi. (Isa. 48:​17, 18) Mas molawom ang atong gugma kang Jehova ug Jesus. Mapakita nato kon unsa ka dako ang atong apresasyon sa ilang gihimo para nato. Mas masuod ta sa mga igsoon. Ug matabangan nato ang uban nga mahibalo kon unsaon nga madawat pod nila ang mga panalangin nga gipaposible sa lukat. Busa himoon nato ang tanan natong maarangan aron maandam ta sa Memoryal niining tuiga—ang pinakaimportanteng adlaw sa tuig! w24.01 14 ¶18-19

Giunsa ta paggiya ni Jehova? Ang pangunang paagi nga gigamit ni Jehova mao ang iyang Pulong, ang Bibliya. Pero naggamit pod siyag mga tawo sa paggiya nato. Pananglitan, gigamit niya ang “matinumanon ug maalamong ulipon” sa pagtaganag espirituwal nga pagkaon nga makatabang nato sa paghimog maalamong mga desisyon. (Mat. 24:45) Naggamit pod siyag ubang kuwalipikadong brader sa paggiya nato. Pananglitan, ang mga tigdumala sa sirkito ug mga ansiyano sa kongregasyon naghatag natog mga pagdasig ug direksiyon nga makatabang nato sa lisod nga mga panahon. Mapasalamaton gyod ta nga naa tay kasaligang giya niining lisod kaayo nga panahon sa kataposan! Makatabang ni nato nga mamentinar ang atong maayong relasyon kang Jehova ug magpabilin sa dalan sa kinabuhi. Bisan pa ana, malisdan tingali ta usahay nga sundon ang giya ni Jehova, ilabina kon gihatag ni pinaagi sa dili hingpit nga mga brader. Nianang mga panahona, ilabinang gikinahanglan nga mosalig ta nga si Jehova ang naggiya sa iyang katawhan ug nga ang pagsunod sa iyang giya moresultag mga panalangin. w24.02 20 ¶2-3

Mapalalom nato ang atong gugma sa Diyos pinaagi sa makugihong pagtuon sa iyang Pulong. Samtang magbasa ka sa Bibliya, paningkamot nga masabtan kon unsay gitudlo niini bahin kang Jehova. Pangutan-a ang kaugalingon: ‘Giunsa pagpakita niini nga asoy nga gihigugma ko ni Jehova? Base sa akong gibasa, nganong angay nakong higugmaon si Jehova?’ Ang laing paagi nga molalom ang atong gugma kang Jehova mao ang regular nga pag-ampo ug pagsulti kaniya kon unsa gyoy atong gibati. (Sal. 25: 4, 5) Sa baylo, tubagon ni Jehova ang atong mga pag-ampo. (1 Juan 3:​21, 22) Angay pod natong palalomon ang atong gugma sa uban. Pipila ka tuig human mahimong Kristohanon si apostol Pablo, nailaila niya ang batan-ong si Timoteo. Gihigugma ni Timoteo si Jehova, ug gimahal niya ang mga tawo. Giingnan ni Pablo ang mga taga-Filipos: “Wala koy laing ikapadala nga parehas [ni Timoteo ug] tinamdan kinsa tinuod nga mag-atiman ninyo.” (Filip. 2:20) Klaro nga nakadayeg si Pablo sa gugma ni Timoteo sa mga igsoon. Segurado nga ang mga kongregasyon nga gialagaran ni Timoteo naghinamhinam sa iyang pagbisita.—1 Cor. 4:17. w23.07 9-10 ¶7-10

Sa wala pa mosulod ang mga Israelinhon sa Yutang Saad, si Moises namatay. Mihunong ba si Jehova sa pagtabang sa iyang katawhan human mamatay ang matinumanong si Moises? Wala. Dihang nagmatinumanon sila, gitagan-an sila ni Jehova. Sa wala pa mamatay si Moises, giingnan siya ni Jehova nga iasayn si Josue sa pagpanguna sa katawhan. Daghang tuig nang gibansay ni Moises si Josue. (Ex. 33:11; Deut. 34:9) Dugang pa, daghang kuwalipikadong lalaki ang nanguna—mga pangulo sa kada 1,000, 100, 50, ug bisan 10. (Deut. 1:15) Ang katawhan sa Diyos naatiman gyod pag-ayo. Susama niana ang pananglitan ni Elias. Siya ang nanguna sa pagtabang sa mga Israelinhon sa pagsimba kang Jehova sa daghang katuigan. Pero sa ulahi, giasayn siya ni Jehova nga mag-alagad sa Juda. (2 Hari 2:1; 2 Cron. 21:12) Napasagdan ba ang matinumanong katawhan sa 10 ka tribo nga gingharian sa Israel? Wala. Daghang tuig nang gibansay ni Elias si Eliseo. Padayong gituman ni Jehova ang iyang katuyoan, ug giatiman niya ang iyang matinumanong mga magsisimba. w24.02 5 ¶12

Ang mga Kristohanon sa Efeso nagkinabuhi uyon sa Pulong ni Jehova, nga samag kahayag nga naggiya kanila. (Sal. 119:105) Gibiyaan na nila ang mga binuhatan nga konektado sa bakak nga relihiyon ug ang ilang imoral nga paggawi. Ila nang ‘gisundog ang Diyos’ ug gihimo ang ilang kinamaayohan sa pagsimba ug paglipay kang Jehova. (Efe. 5:1) Sa susama, sa wala pa ta makakat-on sa kamatuoran, naa pod ta sa espirituwal ug moral nga kangitngit. Ang uban nato nagsaulog ug mga selebrasyon nga konektado sa bakak nga relihiyon ug ang uban imoral ug pagkinabuhi. Pero dihang nakakat-on ta sa mga sukdanan ni Jehova sa husto ug sayop, mihimo tag mga kausaban. Nagkinabuhi na ta subay sa iyang matarong nga mga sukdanan. Ug ingong resulta, nakabaton tag daghang kaayohan. (Isa. 48:17) Pero karon, nag-atubang tag daghang pagsulay. Kinahanglan tang magpalayo gikan sa kangitngit nga ato nang gibiyaan ug ‘padayong magkinabuhi ingong mga anak sa kahayag.’ w24.03 21 ¶6-7

Mobati tingali ka nga dili pa ka andam magpahinungod ug magpabawtismo. Tingali kinahanglan pa kang mohimog mga kausaban aron masunod ang mga sukdanan ni Jehova, o basig kinahanglan pa nimog panahon sa pagpalig-on sa imong pagtuo. (Col. 2:​6, 7) Ang matag Bible study lainlaig pag-uswag, ug dili tanang batan-on ang andam nang magpahinungod ug magpabawtismo sa parehong edad. Susiha ang imong espirituwal nga pag-uswag base sa kon unsay kaya nimong himoon, ug dili sa pagtandi sa imong kaugalingon sa uban. (Gal. 6:​4, 5) Bisag makita nimo nga dili pa ka andam magpahinungod sa imong kaugalingon kang Jehova, himoa gihapon nang tumong. Pag-ampo nga panalanginan ni Jehova ang imong mga paningkamot nga himoon ang gikinahanglang mga kausaban. (Filip. 2:13) Makaseguro ka nga paminawon niya ang imong pag-ampo ug iya kang tabangan.—1 Juan 5:14. w24.03 5 ¶9-10

Dihay higayon nga nasakitan ug nahiubos pag-ayo si Sara, ug iyang gipahungaw ang iyang gibati kang Abraham. Iya pa ganing gibasol ang iyang bana. Nahibalo si Abraham nga si Sara kanunayng nagpasakop niya ug nagsuportar sa iyang mga desisyon. Siya naminaw sa iyang asawa ug naningkamot nga masulbad ang problema. (Gen. 16:​5, 6) Unsay atong makat-onan? Mga bana, naa moy awtoridad sa paghimog mga desisyon para sa inyong pamilya. (1 Cor. 11:3) Pero makapakita mog gugma sa inyong asawa kon inyo silang paminawon ug konsiderahon ninyo ang ilang opinyon sa dili pa modesisyon, ilabina kon ang desisyon makaapektar nila. (1 Cor. 13:​4, 5) Dihay laing higayon nga midesisyon si Abraham nga abiabihon ang mga bisita nga kalit rang miabot. Iyang gihangyo si Sara nga biyaan una ang iyang trabaho ug maghimog daghang tinapay. (Gen. 18:6) Si Sara milihok dayon ug gisuportahan ang desisyon ni Abraham. Mga asawa, masundog ninyo si Sara pinaagi sa pagsuportar sa mga desisyon sa inyong bana. Kon inyo nang himoon, molig-on ang inyong kaminyoon.—1 Ped. 3:​5, 6. w23.05 24-25 ¶16-17

Human matudlo si Gideon ingong maghuhukom, nasulayan ang iyang pagkamasinundanon ug kaisog. Nakadawat siyag delikado nga asaynment—iyang tumpagon ang halaran nga gigamit sa iyang amahan sa pagsimba kang Baal. (Maghu. 6:​25, 26) Sa laing higayon, human matigom ni Gideon ang kasundalohan, kaduha siya gisugo nga menosan ang gidaghanon niini. (Maghu. 7:​2-7) Dayon, gisugo siya nga atakehon ang kampo sa mga kaaway sa mga tungang gabii. (Maghu. 7:​9-11) Ang mga ansiyano kinahanglang “andam mosunod.” Mapakita ni sa ansiyano kon sundon dayon niya ang giingon sa Kasulatan ug ang direksiyon gikan sa organisasyon sa Diyos. Nianang paagiha, makapakita siyag maayong ehemplo sa uban. Pero usahay, malisdan tingali siya sa pagsunod. Pananglitan, basin dili dayon siya maka-adjust sa bag-ong mga direksiyon. Sa ubang mga kahimtang, maghunahuna tingali siya kon praktikal o maalamon ba gyod ang maong direksiyon. O kaha makadawat siyag asaynment nga posibleng moresulta sa pagkapriso. Niana nga mga situwasyon, unsaon pagsundog sa mga ansiyano ang pagkamasinundanon ni Gideon? Paminawa pag-ayo ang direksiyon ug sunda kini. w23.06 4-5 ¶9-11