Abril

Ang mga alagad ni Jehova sa panahon sa Bibliya nakaatubang ug mga kalisdanan nga wala nila damha. Konsideraha si Jacob. Gisugo siya sa iyang amahan nga mokuhag asawa gikan sa mga anak nga babaye ni Laban, kinsa nagsimba pod sa Diyos. Gipasaligan siya sa iyang amahan nga panalanginan siya pag-ayo ni Jehova. (Gen. 28:​1-4) Busa mituman si Jacob. Mibiya siya sa Canaan ug mibiyahe sa lugar ni Laban, nga naay duha ka anak nga babaye—si Lea ug Raquel. Nahigugma si Jacob kang Raquel, ang mas manghod nga anak ni Laban, ug misugot siya nga magtrabahog pito ka tuig kang Laban aron maminyoan si Raquel. (Gen. 29:18) Pero dili kana ang nahitabo. Gilimbongan ni Laban si Jacob maong naminyoan niya ang mas magulang nga si Lea. Misugot si Laban nga minyoan ni Jacob si Raquel human sa usa ka semana, pero kinahanglan na pod siyang motrabahog pito pa ka tuig. (Gen. 29:​26, 27) Gitikasan pod ni Laban si Jacob sa iyang suhol. Tanantanan, 20 ka tuig nga gilimbongan ni Laban si Jacob!—Gen. 31:​41, 42. w23.04 15 ¶5

Kang kinsa ta makaduol kon nagkinahanglan tag paghupay ug giya? Nahibalo ta sa tubag ana. Makaduol ta kang Jehova nga Diyos pinaagi sa pag-ampo, ug kanay gusto ni Jehova nga atong himoon. Gusto niya nga kita ‘mag-ampo kanunay.’ (1 Tes. 5:17) Makaduol ta niya pinaagi sa pag-ampo ug makapangayog giya sa tanang bahin sa atong kinabuhi. (Prov. 3:​5, 6) Kay mahinatagon siya nga Diyos, wala ta niya limitahe kon kapila lang ta makaampo niya. Nahibalo si Jesus nga importante kaayo kang Jehova ang atong mga pag-ampo. Sulod sa taas nga panahon una siya mianhi sa yuta, nakita niya kon giunsa pagtubag sa iyang Amahan ang pag-ampo sa matinumanong mga lalaki ug babaye. Pananglitan, si Jesus naa sa kiliran sa iyang Amahan dihang gitubag Niya ang sinserong mga pag-ampo ni Ana, David, Elias, ug sa uban pa. (1 Sam. 1:​10, 11, 20; 1 Hari 19:​4-6; Sal. 32:5) Kanay rason nga gitudloan ni Jesus ang iyang mga tinun-an nga mag-ampo pirme ug mosalig nga dunggon sila sa Diyos!—Mat. 7:​7-11. w23.05 2 ¶1, 3

Ang hataas nga saserdoteng si Jehoiada may kahadlok kang Jehova. Iya ning gipakita dihang ang anak ni Jezebel nga si Atalia naghimo sa iyang kaugalingon nga rayna sa Juda. Pintas kaayo si Atalia ug tungod sa iyang kahakog sa gahom, iyang gipamatay ang tanang kaliwat sa hari—ang iya mismong mga apo! (2 Cron. 22:​10, 11) Pero naay usa nga wala mapatay—si Jehoas—kay giluwas siya sa asawa ni Jehoiada nga si Jehosabet. Gitagoan niini nga magtiayon ang bata ug giatiman siya. Tungod sa gihimo ni Jehoiada ug ni Jehosabet, wala maputol ang linya sa mga hari sa banay ni David. Si Jehoiada nagmaunongon kang Jehova ug wala mahadlok kang Atalia. Dihang siyete anyos na si Jehoas, gipamatud-an pag-usab ni Jehoiada nga maunongon siya kang Jehova. Naghimo siyag plano. Kon molampos kini, si Jehoas mahimong hari, ang tinuod nga manununod sa trono ni David. Pero kon mapakyas ang plano, seguradong patyon si Jehoiada. Gipanalanginan ni Jehova ang plano ug milampos kini. w23.06 17 ¶12-13

Puwedeng isipon ni Haring Nabucodonosor ang mensahe ingong pagrebelde ug puwede niyang ipapatay si Daniel. Pero nagmaisogon gihapon si Daniel ug iyang gisulti ang kahulogan sa damgo. Unsa kahay nakatabang kang Daniel nga magmaisogon sa tibuok niyang kinabuhi? Samtang bata pa, seguradong nakakat-on si Daniel sa ehemplo sa iyang inahan ug amahan. (Deut. 6:​6-9) Dili lang ang Napulo ka Sugo ang nahibaloan ni Daniel; nahibalo sab siya sa ubang detalye sa Balaod, sama sa kon unsay puwede ug dili puwedeng kaonon sa usa ka Israelinhon. (Lev. 11:​4-8; Dan. 1:​8, 11-13) Nahibalo sab si Daniel sa kasaysayan sa katawhan sa Diyos ug kon unsay nahitabo kanila dihang wala nila sunda ang mga sukdanan ni Jehova. (Dan. 9:​10, 11) Ug tungod sa mga eksperyensiya ni Daniel, segurado siya nga si Jehova ug ang Iyang gamhanang mga anghel motabang niya.—Dan. 2:​19-24; 10:​12, 18, 19. w23.08 3 ¶5-6

Sa tibuok kinabuhi ni Rebeca, iyang gipakita nga maalamon siya kay naa siyay inisyatibo ug kaisog sa paghimog desisyon. (Gen. 24:58; 27:​5-17) Pero matinahoron siya ug mapinasakopon. (Gen. 24:​17, 18, 65) Kon mapainubsanon nimong suportahan ang mga kahikayan ni Jehova, sama sa gihimo ni Rebeca, mahimo kang maayong impluwensiya sa imong pamilya ug sa kongregasyon. Ang pagkamakasaranganon gikinahanglan aron mahimong hamtong nga Kristohanon. Si Ester makasaranganon ug matinumanon nga alagad sa Diyos. Tungod ana, wala siya mangahas sa paghimog mga desisyon o mahimong mapahitas-on. Gisunod niya ang tambag sa iyang ig-agaw nga si Mardokeo. (Est. 2:​10, 20, 22) Mahimo pod kang makasaranganon kon mangayo kag maayong tambag sa uban ug sundon kana. (Tito 2:​3-5) Gipakita pod ni Ester ang pagkamakasaranganon sa laing paagi. Siya “nindot ug lawas ug guwapa”; pero wala siya magtinguha nga mapokus kaniya ang atensiyon.—Est. 2:​7, 15. w23.12 19-20 ¶6-8

Dili gusto ni Jehova nga mobati tag sobrang pagkakonsensiya. Kon gitug-an na nato ang atong sala, naghinulsol na, ug naningkamot nga dili na maotro ang atong sala, makasalig ta nga gipasaylo na ta ni Jehova. (Buh. 3:19) Kon ato na ning gihimo, dili gusto ni Jehova nga padayon tang makonsensiya. Nahibalo siya nga makadaot gyod nato ang sobrang pagkakonsensiya. (Sal. 31:10) Kon malumsan ta sa kaguol, basin moundang na ta sa lumba sa kinabuhi. (2 Cor. 2:7) Kon mibati kag sobrang pagkakonsensiya, hinumdomi nga ang Diyos “tinuod gayod nga nagapasaylo.” (Sal. 130:4) Dihang pasayloon niya kadtong sinserong naghinulsol, siya nagsaad: “Dili na nako hinumdoman ang ilang sala.” (Jer. 31:34) Nagpasabot ni nga dili na ka paninglan ni Jehova sa mga sala nga iya nang napasaylo. Ayawg kasuko sa imong kaugalingon kon nalimitahan ang imong mahimo sa pag-alagad karon tungod sa imong mga sala kaniadto. Si Jehova wala na maghunahuna sa imong mga sala, maong ayaw na pod na hunahunaa. w23.08 30-31 ¶14-15

Panahon sa COVID-19 nga pandemic, ang mga Saksi ni Jehova nga naminaw sa giya gikan sa atong organisasyon nakalikay sa sobrang kabalaka nga naeksperyensiyahan niadtong naminaw sa malimbongong mga impormasyon. (Mat. 24:45) Kinahanglang magpokus ta kanunay sa “mas importanteng mga butang.” (Filip. 1:​9, 10) Ang mga butang nga makabalda nato makakuhag dakong panahon ug kusog nga para unta sa mas importanteng kalihokan. Ang normal nga mga butang nga atong ginahimo sama sa pagkaon, pag-inom, paglingawlingaw, ug pagtrabaho mahimong makabalda nato kon dinhi na nakapokus ang atong kinabuhi. (Luc. 21:​34, 35) Gawas pa ana, adlaw-adlaw tang gipaulanan ug mga balita bahin sa mga protesta ug mga isyu sa politika. Mag-amping gyod ta nga dili magpabalda niini nga mga isyu, kay basig sa atong hunahuna ug kasingkasing naa na tay gidapigan. Si Satanas naggamit ug lainlaing paagi aron mohuyang ang atong determinasyon nga himoon kon unsay husto. w23.07 16-17 ¶12-13

Para sa katawhan ni Jehova, ang Memoryal sa kamatayon sa Kristo ang pinakaimportanteng adlaw kada tuig. Mao ra ni ang okasyon nga espesipikong gisugo ni Jesus nga saulogon sa iyang mga sumusunod. (Luc. 22:​19, 20) Magpahinumdom ni kon unsaon nato pagpakita ang atong apresasyon sa halad ni Jesus. (2 Cor. 5:​14, 15) Kahigayonan pod ni nga “magdinasigay” ta sa mga igsoon. (Roma 1:12) Ug daghang interesado ang nadasig nga magtuon sa Bibliya tungod sa ilang nakita ug nadungog. Hunahunaa sab kon sa unsang paagi ang Memoryal makapahiusa nato sa atong mga igsoon sa tibuok kalibotan. Mao diay nga espesyal kaayo para nato ang Memoryal! w24.01 8 ¶1-3

Kon kanunay natong pamalandongon ang gibayad ni Jehova ug Jesus, mas masabtan nato kon unsa ka dako ang ilang gugma para sa matag usa kanato. (Gal. 2:20) Ang lukat maoy regalo nga gipasukad sa gugma. Gipamatud-an ni Jehova nga gimahal ta niya pinaagi sa paghatag sa kon unsay pinakabililhon kaniya—si Jesus. Gitugotan ni Jehova nga mag-antos ang iyang Anak ug mamatay para nato. Si Jehova wala lang basta mahigugma nato. Gisulti pod niya kon unsa ta niya ka mahal. (Jer. 31:3) Gikabig ta ni Jehova kay gimahal ta niya. (Itandi ang Deuteronomio 7:​7, 8.) Walay makabulag kanato sa iyang gugma. (Roma 8:​38, 39) Unsay imong gibati tungod sa iyang gipakita nga gugma? w24.01 28 ¶10-11

Gipabilhan gyod sa dinihogang mga Kristohanon ang ilang langitnong paglaom. Usa nila, si Brader Frederick Franz, misulti sa iyang gibati bahin niini: “Ang atong paglaom maoy usa ka segurado nga butang, ug kini bug-os nga matuman diha sa matag usa sa . . . 144,000 ka membro sa gamayng panon sa . . . sukod nga dili gayod nato mahanduraw.” Si Brader Franz miingon niadtong 1991: “Wala ta mawad-ig pagpabili niana nga paglaom. . . . Labi pa nato kining gipabilhan bisan dugay kitang naghulat alang niana. Kini maoy usa ka butang nga takos nga pagahulaton . . . Labi pa nakong gipabilhan ang atong paglaom sukad masukad.” Naglaom man ta nga mabuhi sa walay kataposan sa langit o sa yuta, naa tay nindot nga paglaom nga makahatag natog kalipay. Ug ang atong makapalipayng paglaom mahimo pang mas tinuod para nato. w23.12 9 ¶6; 10 ¶8

Sa gawas sa entrada sa karaang tabernakulo, dihay halaran nga tumbaga diin ginatanyag ang halad nga mga hayop para kang Jehova. (Ex. 27:​1, 2; 40:29) Pero ang maong mga halad dili bug-os makapasaylo sa sala sa katawhan. (Heb. 10:​1-3) Ang balikbalik nga paghalad ug mga hayop diha sa tabernakulo nagpaila nga gikinahanglan gyod sa katawhan ang usa ka halad nga bug-os magpasaylo sa ilang sala. Nahibalo si Jesus nga gipadala siya ni Jehova sa yuta aron itanyag ang iyang kinabuhi ingong halad lukat para sa katawhan. (Mat. 20:28) Busa sa iyang bawtismo, gipresentar ni Jesus ang iyang kaugalingon aron himoon ang kabubut-on ni Jehova. (Juan 6:38; Gal. 1:4) Gitanyag ni Jesus ang iyang kinabuhi “kausa alang sa tanang panahon” aron bug-os o permanenteng mapasaylo ang sala sa tanan nga nagpakitag pagtuo sa Kristo.—Heb. 10:​5-7, 10. w23.10 26-27 ¶10-11

Kon kita ra, dili gyod nato malukat ang atong kaugalingon gikan sa sala ug kamatayon. (Sal. 49:​7, 8) Busa gihikay ni Jehova nga ihatag sa iyang pinanggang Anak nga si Jesus ang iyang kinabuhi para nato. Dako gyod to nga sakripisyo para kang Jehova ug Jesus. Kon pamalandongon nato pirme ang kadako sa ilang gisakripisyo, mas maapresyar nato ang lukat. Dihang nakasala si Adan, giwala niya ang kahigayonan para niya ug sa iyang mga anak nga mabuhi sa walay kataposan. Aron mabalik ang giwala ni Adan, gihalad ni Jesus ang iyang hingpit nga kinabuhi. Sa tibuok kinabuhi ni Jesus sa yuta, “siya walay nahimong sala ug walay panglimbong sa iyang baba.” (1 Ped. 2:22) Dihang namatay si Jesus, ang iyang hingpit nga kinabuhi maoy katumbas gyod sa kinabuhi nga giwala ni Adan.—1 Cor. 15:45; 1 Tim. 2:6. w24.01 10 ¶5-6

Human mabanhaw si Jesus, misulod siya sa Labing Balaan sa espirituwal nga templo. Dinhi, klaro natong makita ang pagkalabaw sa kahikayan ni Jehova sa putling pagsimba nga gibase sa halad lukat ug pagkasaserdote ni Jesu-Kristo. Ang hataas nga saserdote sa Israel misulod sa Labing Balaan nga lawak nga hinimo sa tawo dala ang dugo sa gihalad nga mga hayop, pero si Jesus misulod “sa langit mismo,” ang labing balaan nga dapit sa tanan, aron moatubang kang Jehova. Didto, iyang gipresentar ang bili sa iyang hingpit nga tawhanong kinabuhi alang kanato, “aron wad-on ang sala pinaagi sa paghalad sa iyang kaugalingon.” (Heb. 9:​24-26) Kitang tanan makasimba kang Jehova sa iyang espirituwal nga templo, sa langit man o sa yuta ang atong paglaom. w23.10 28 ¶13-14

Hunahunaa ang papel ni Jesus didto sa langit ingong nagamandong Hari ug maluluy-on nga Hataas nga Saserdote. Pinaagi kaniya, makaduol ta sa “trono sa dili hitupngang pagkamaayo” sa Diyos diha sa pag-ampo ug makahangyo sa iyang kaluoy ug tabang sa panahon nga ato ning gikinahanglan. (Heb. 4:​14, 15) Hinaot nga dili nato tugotan nga molabay ang adlaw nga dili ta makapamalandong sa nahimo ug padayong ginahimo ni Jehova ug ni Jesus para nato. Ang ilang gugma kanato angayng magtandog pag-ayo sa atong kasingkasing ug magpalihok nato nga magmadasigon sa atong pag-alagad kang Jehova. (2 Cor. 5:​14, 15) Ang usa sa pinakamaayong paagi nga mapakita nato ang atong apresasyon mao ang pagpaningkamot nga tabangan ang uban nga mahimong Saksi ni Jehova ug tinun-an ni Jesus. (Mat. 28:​19, 20) Mao nay gihimo ni apostol Pablo. Nahibalo siya nga kabubut-on ni Jehova nga “ang tanang matang sa tawo maluwas ug makakat-on sa tukmang kahibalo sa kamatuoran.”—1 Tim. 2:​3, 4. w23.10 22-23 ¶13-14

Daghan nato ang mogamit niining makapahupay nga teksto dihang magsangyaw bahin sa kinabuhi sa Paraiso. Sa unsang paagi nato mapasaligan ang uban—ug ang atong kaugalingon—nga mahitabo gyod ang mga panalangin nga gihisgotan sa Pinadayag 21:​3, 4? Si Jehova wala lang basta maghatag ug makapalipay nga saad. Naghatag pod siya ug makapakombinsir nga mga rason kon nganong makasalig ta niana. Sa sunod nga mga bersikulo, makita nato ang mga rason kon nganong makasalig ta sa saad ni Jehova nga Paraiso. Atong mabasa: “Ang Usa nga naglingkod sa trono miingon: ‘Tan-awa! Ginabag-o nako ang tanang butang.’ Siya usab miingon: ‘Isulat kini, kay kining mga pulonga kasaligan ug matuod.’ Ug siya miingon kanako: ‘Nahitabo na kini! Ako ang Alfa ug ang Omega, ang sinugdanan ug ang kataposan.’”—Pin. 21:​5, 6a. w23.11 3 ¶3-5

Mapakita sa batan-ong lalaki nga naugmad niya ang katakos sa panghunahuna pinaagi sa paghimog maayong mga desisyon bahin sa sininaan ug pamostura. Daghan sa nag-design ug nag-advertise ug bag-ong style sa mga sinina wala magtahod kang Jehova o imoral ug pagkinabuhi. Busa ang mga sinina nga ilang gi-design fit kaayo o makapahimo sa lalaki nga morag babaye tan-awon. Dihang mopili kon unsay sul-obon, ang batan-ong lalaki nga gustong mohamtong maningkamot nga magpagiya sa mga prinsipyo sa Bibliya ug sa maayong mga ehemplo diha sa kongregasyon. Puwede niyang pangutan-on ang iyang kaugalingon: ‘Ang ako bang sininaan ug pamostura nagpakita nga naa koy katakos sa panghunahuna ug pagtahod sa uban? Makita ba sa uban pinaagi sa akong sininaan nga alagad ko sa Diyos?’ (1 Cor. 10:​31-33) Ang batan-ong lalaki nga naay katakos sa panghunahuna makabaton sa pag-uyon sa mga igsoon ug sa iyang langitnong Amahan. w23.12 26 ¶7

Kaniadto, ang “hari sa habagatan” mihimog direktang mga pag-atake sa katawhan ni Jehova. (Dan. 11:40) Pananglitan, panahon sa Gubat sa Kalibotan I ug II, daghang igsoon ang gipriso tungod sa ilang neyutral nga baroganan ug ang ubang anak sa mga Saksi gitangtang sa eskuwelahan tungod sa mao gihapong rason. Pero sa milabayng katuigan, ang katawhan ni Jehova nga nagpuyo ubos sa pagmando niana nga hari nakaeksperyensiyag dili direktang mga pagsulay sa ilang pagkamaunongon sa Gingharian sa Diyos. Pananglitan, panahon sa mga kampanya sa eleksiyon, ang usa ka Kristohanon basin matental sa pagsuportar sa usa ka partido o kandidato. Dili tingali siya mobotar, pero sa iyang hunahuna ug kasingkasing, naa na siyay gidapigan. Importante gyod nga magpabilin tang neyutral sa politika dili lang sa atong binuhatan kondili sa ato pong hunahuna ug pagbati!—Juan 15:​18, 19. w23.08 12 ¶17

Samtang naa ta sa lumba sa kinabuhi, kinahanglang ‘modagan ta sa paagi nga makuha nato ang ganti.’ (1 Cor. 9:24) Miingon si Jesus nga posible tang “mabug-atan sa pagpalabig kaon, sa pagpalabig inom, ug sa mga kabalaka sa kinabuhi.” (Luc. 21:34) Kini ug ang ubang teksto makatabang nimo nga makita kon unsang mga kausaban ang kinahanglan tingali nimong himoon samtang nagdagan ka sa lumba sa kinabuhi. Segurado ta nga modaog ta sa lumba sa kinabuhi kay hatagan ta ni Jehova sa kusog nga atong gikinahanglan. (Isa. 40:​29-31) Busa ayaw paghinayhinay! Sundoga si apostol Pablo, kinsa naningkamot pag-ayo aron madawat ang ganti nga giandam para niya. (Filip. 3:​13, 14) Walay laing makadagan niini nga lumba para nimo, pero sa tabang ni Jehova, molampos ka. Tabangan ka ni Jehova nga pas-anon ang imong mga palas-anon ug tangtangon ang wala kinahanglanang mga kabug-at. Kay kauban nimo si Jehova, makalahutay ka sa pagdagan sa lumba ug modaog! w23.08 31 ¶16-17

Niadtong 12 anyos si Jesus, nabiyaan siya sa iyang mga ginikanan sa Jerusalem. (Luc. 2:​46-52) Kon buot hunahunaon, responsibilidad ni Jose ug Maria nga seguroon nga ang tanan nilang anak apil sa grupo nga gabiyahe pauli human sa pista. Dihang nakit-an na gyod ni Jose ug Maria si Jesus, gibasol siya ni Maria sa problema nga iyang gihatag nila! Puwede ra untang mangatarongan si Jesus nga wala siyay gihimong sayop, pero wala na niya buhata. Hinuon, mitubag siya sa simple ug matinahorong paagi. Pero si Jose ug Maria ‘wala makasabot sa iyang gisulti.’ Bisan pa niana, si Jesus “padayong nagpasakop kanila.” Mga batan-on, maglisod ba mog sunod sa inyong ginikanan dihang masayop sila o dihang wala mo nila masabti? Unsay makatabang ninyo? Hunahunaa kon unsay bation ni Jehova. Ang Bibliya nag-ingon nga kon sundon ninyo ang inyong ginikanan, “makapalipay kini sa Ginoo.” (Col. 3:20) Nahibalo si Jehova dihang ang inyong ginikanan wala kaayo makasabot ninyo o dihang mohimo silag mga balaod nga morag dili rasonable. Pero kon sundon gihapon ninyo sila, mapalipay ninyo si Jehova. w23.10 7 ¶5-6

Tingali ang imong schoolmate moingon nga angayng usbon sa mga Saksi ni Jehova ang ilang panghunahuna bahin sa homoseksuwalidad. Kinahanglan tingali nato siyang pasaligan nga gitahod nato ang katungod sa matag usa sa paghimog kaugalingong desisyon. (1 Ped. 2:17) Dayon, puwede natong ipasiugda ang mga kaayohan sa pagsunod sa moral nga mga sukdanan sa Bibliya. Kon naa tay maestorya nga mobarog gyod sa iyang opinyon, dili ta angayng maghunahuna dayon nga kabalo ta sa iyang gituohan. Pananglitan, komosta kon ang imong schoolmate moingon nga binuang ang pagtuo ug Diyos? Maghunahuna ba dayon ka nga nagtuo gyod siyag ebolusyon ug nga daghan siyag nahibaloan bahin ana nga topiko? Ang tinuod, basin wala gyod kaayo na niya ma-research. Pananglitan, puwede nimong ipakita o ihatag ang link sa mga materyal sa jw.org bahin sa creation o paglalang. Basin sa ulahi, ganahan na siyang makig-estorya bahin sa usa ka artikulo o video nga naa didto. Oo, kon magpakita kag pagtahod, basin mapalihok siya nga konsiderahog balik ang iyang opinyon. w23.09 17 ¶12-13

Makasalig ta nga gamiton ug panalanginan pod ta ni Jehova bisan pag nakahimo tag mga sayop, basta himoon nato ang atong maarangan sa pagtul-id sa atong mga sayop ug padayong mosalig kaniya. (Prov. 28:13) Si Samson dili hingpit, pero padayon siyang naningkamot sa pag-alagad kang Jehova, bisan pag nakahimo siyag sayop nga desisyon maylabot kang Delila. Ug wala mosurender si Jehova kaniya. Gigamit siya pag-usab sa Diyos sa talagsaong paagi. Giisip gihapon siya ni Jehova ingong tawo nga may lig-ong pagtuo, ug apil siya sa matinumanong mga tawo nga gihisgotan sa Hebreohanon kapitulo 11. Makapalipay gyod ang pagkahibalo nga nag-alagad ta sa usa ka mahigugmaong langitnong Amahan nga gusto kaayong mopalig-on nato, ilabina dihang luya ta! Busa sama kang Samson, mohangyo ta kang Jehova: “Palihog hinumdomi ko, ug palihog himoa kong kusgan.”—Maghu. 16:28. w23.09 7 ¶18-19

Samtang padayon tang maghunahuna sa adlaw ni Jehova, mapalihok ta sa pagsangyaw sa maayong balita ngadto sa uban. Pero naa tingali mga panahon nga magduhaduha ta sa pagsangyaw. Ngano? Kay posibleng madaog ta sa atong kahadlok sa tawo. Kanay nahitabo kang Pedro. Sa gabii nga gihusay si Jesus, si Pedro wala magpaila nga tinun-an siya ni Jesus ug balikbalik siyang miingon nga wala siya makaila niya. (Mat. 26:​69-75) Pero nadaog ni Pedro ang iyang kahadlok, maong sa ulahi siya misulti nga may kombiksiyon: “Ayaw kahadloki ang ilang gikahadlokan ug ayawg kabalaka.” (1 Ped. 3:14) Ang giingon ni Pedro nagpasalig nato nga kaya natong madaog ang kahadlok sa tawo. Unsay makatabang nato nga madaog ang atong kahadlok sa tawo? Si Pedro miingon: “Balaana ang Kristo ingong Ginoo diha sa inyong kasingkasing.” (1 Ped. 3:15) Apil niini ang pagpamalandong sa posisyon ug gahom sa atong Ginoo ug Hari, si Kristo Jesus. w23.09 27-28 ¶6-8

Kinahanglang padayon natong likayan ang “way pulos nga mga buhat nga iya sa kangitngit.” (Efe. 5:11) Gipakita sa mga eksperyensiya nga kon ang tawo magsigeg tan-aw, paminaw, o hisgot bahin sa hugaw, imoral nga mga butang, mas dakog posibilidad nga makahimo siyag daotan. (Gen. 3:6; Sant. 1:​14, 15) Ang kalibotan ni Satanas naningkamot sa paglimbong nato aron patuohon ta nga ang mga butang nga giisip ni Jehova nga imoral ug hugaw dili ra sayop. (2 Ped. 2:19) Sukad pa sa una, ginalibog na sa Yawa ang hunahuna sa mga tawo aron malisdan sila sa pag-ila kon unsay husto ug sayop. (Isa. 5:20; 2 Cor. 4:4) Kanay hinungdan nga daghang salida, programa sa TV, ug website ang nagpasiugda sa mga ideya nga supak sa matarong nga mga sukdanan ni Jehova. Naningkamot si Satanas nga limbongan ta aron atong hunahunaon nga ang hugaw nga mga buhat dili ra makadaot.—Efe. 5:6. w24.03 22 ¶8-10

Ang tabernakulo maoy samag tolda nga tinukod nga ginadala sa mga Israelinhon niadtong nagbalhinbalhin pa silag lugar. Halos 500 ka tuig nila ning gigamit hangtod natukod ang templo sa Jerusalem. (Ex. 25:​8, 9; Num. 9:22) Ang tabernakulo mao ang sentro sa pagsimba sa mga Israelinhon, diin makatanyag silag mga halad. (Ex. 29:​43-46) Pero ang tabernakulo nagrepresentar pod sa mas labaw pa nga kahikayan sa pagsimba. Kini “anino sa mga butang nga langitnon,” ug kini nagrepresentar sa dakong espirituwal nga templo ni Jehova. Si apostol Pablo miingon nga “kini nga tolda [o, tabernakulo] naghulagway sa mga butang niining panahona.” (Heb. 9:9) Busa dihang gisulatan niya ang mga Hebreohanon, ang espirituwal nga templo naglungtad na. Nagsugod ni niadtong 29 C.E. Nianang tuiga, si Jesus nabawtismohan ug nagsugod pag-alagad ingong “labaw nga hataas nga saserdote” diha sa espirituwal nga templo ni Jehova.—Heb. 4:14; Buh. 10:​37, 38. w23.10 25-26 ¶6-7

Aron makapabiling lig-on sa espirituwal, ang mga Kristohanon kinahanglang kamao pod mobawog o mopailin-ilin. Unsaon nato na paghimo? Ipakita nato nga makataronganon ta pinaagi sa pag-adjust kon mausab ang atong kahimtang ug pinaagi sa pagtahod sa opinyon ug desisyon sa uban. Ingong mga alagad ni Jehova, gusto natong magmakataronganon. Gusto pod natong mahimong mapainubsanon ug maluluy-on. Si Jehova gitawag nga “ang Bato” kay siya lig-on, dili matarog. (Deut. 32:4) Pero makataronganon pod siya. Ang atong Diyos padayong mipahiuyon sa nagakausab nga kahimtang sa kalibotan aron matuman ang iyang katuyoan. Gilalang ni Jehova ang mga tawo sumala sa iyang larawan, busa kaya pod natong mo-adjust kon mausab ang atong kahimtang. Naghatag siyag klarong mga prinsipyo sa Bibliya aron tabangan ta sa paghimog maalamong mga desisyon bisag unsa pang kahimtang ang atong maatubang. Ang ehemplo ni Jehova ug ang mga prinsipyo nga iyang gihatag nato nagpamatuod nga bisag siya “ang Bato,” makataronganon pod siya. w23.07 20 ¶1-3

Sa Bibliya, gipakasama ni Jehova ang iyang kaugalingon sa mapinanggaong inahan. (Isa. 66:​12, 13) Imadyina ang usa ka inahan nga mahigugmaong nag-atiman ug nagseguro nga mahatag niya ang gikinahanglan sa iyang gamayng anak. Dihang masakitan ta, makasalig pod ta sa gugma ni Jehova. Dili ta niya biyaan dihang masayop ta. (Sal. 103:8) Ang nasod sa Israel balikbalik nga nakasala kang Jehova. Pero dihang naghinulsol sila, iya silang gipasaligan sa iyang maunongong gugma. Pananglitan, giingnan niya sila: “Nahimo kang bililhon sa akong mga mata, ikaw gipasidunggan, ug gimahal ka nako.” (Isa. 43:​4, 5) Ingon ana pod ang gugma sa Diyos kanato. Bisan pag makahimo tag seryosong sala, kon maghinulsol ta ug mobalik kang Jehova, makita nato nga gimahal gihapon ta niya. Siya nagsaad nga “siya madagayaong magpasaylo.” (Isa. 55:7) Ingong resulta, maeksperyensiyahan nato ang giingon sa Bibliya nga “mga panahon sa kahayahay [nga] gikan mismo kang Jehova.”—Buh. 3:19. w24.01 27 ¶4-5

Si Jehova makatabang nato dihang naa ta sa lisod nga situwasyon. Pananglitan, dihang mananghid ta sa atong amo nga mag-day off aron makatambong ug kombensiyon o mohangyo nga i-adjust ang atong eskedyul sa trabaho aron makatambong ta sa tanang tigom, naghimo tag kahigayonan nga makita ang kamot ni Jehova sa atong kinabuhi. Basin masorpresa ta sa maayong mga resulta. Tungod niana, mas molig-on ang atong pagsalig kang Jehova. Si Esdras mapainubsanong miduol kang Jehova alang sa tabang. Sa matag higayon nga nabalaka o nabug-atan si Esdras sa iyang mga responsibilidad, siya mapainubsanong miampo kang Jehova. (Esd. 8:​21-23; 9:​3-5) Kay misalig si Esdras kang Jehova, ang uban napalihok nga suportahan siya ug sundogon ang iyang pagtuo. (Esd. 10:​1-4) Dihang mabalaka ta pag-ayo bahin sa atong materyal nga panginahanglan o sa safety sa atong pamilya, angay tang mosalig kang Jehova ug moduol kaniya sa pag-ampo. w23.11 17-18 ¶15-17

Wala moingon si Jehova nga kon gusto natong isipong matarong, kinahanglan natong himoon ang tanang gihimo ni Abraham. Ang tinuod, naay daghang paagi nga mapakita nato ang atong pagtuo diha sa atong binuhatan. Puwede natong ipabati sa mga bag-ohan nga bahin sila sa kongregasyon, tabangan ang mga igsoon nga nanginahanglan, ug pakitaag kaayo ang mga membro sa atong pamilya. Kini nga mga buhat giuyonan ug panalanginan sa Diyos. (Roma 15:7; 1 Tim. 5:​4, 8; 1 Juan 3:18) Ug ang pinakaimportanteng paagi nga mapakita nato ang atong pagtuo mao ang madasigong pagsangyaw sa maayong balita. (1 Tim. 4:16) Mapakita natong tanan diha sa atong binuhatan nga naa tay pagtuo nga matuman ang mga saad ni Jehova ug nga ang iyang mga paagi mao ang pinakamaayo. Kon ato nang himoon, makasalig gyod ta nga isipon ta sa Diyos ingong matarong ug ingong iyang mga higala. w23.12 2 ¶3; 6 ¶15

Dihang hapit nang mamatay si Haring David, iyang giingnan si Solomon sa mga pulong sa teksto karong adlawa. (1 Hari 2:​1, 3) Kini nga tambag importanteng sundon sa tanang brader. Aron mahimo kini, kinahanglan nilang makat-onan ang pagsunod sa mga balaod sa Diyos ug ang pagpadapat sa mga prinsipyo sa Bibliya sa tanang bahin sa ilang kinabuhi. (Luc. 2:52) Nganong importante kaayo nga mahimong hamtong nga Kristohanon ang mga batan-ong brader? Ang usa ka Kristohanong lalaki daghag importanteng responsibilidad diha sa pamilya ug sa kongregasyon. Mga batan-ong brader, seguradong nahunahunaan na ninyo ang mga responsibilidad nga puwede ninyong mabatonan sa umaabot. Tingali tumong ninyo nga mahimong payunir, ministeryal nga alagad, ug sa ulahi mahimong ansiyano. Tingali gusto pod ninyong magminyo ug makabaton ug anak. (Efe. 6:4; 1 Tim. 3:1) Aron makab-ot ni nga mga tumong, kinahanglan mong mahimong hamtong nga Kristohanon. w23.12 24 ¶1-2

Ang Kristohanong mga ansiyano gihatagag responsibilidad sa pag-atiman sa bililhong katawhan ni Jehova. Gipabilhan niining kugihang mga lalaki ang ilang pribilehiyo nga mag-alagad sa mga igsoon, ug naningkamot sila sa ‘pagbantay gayod kanila.’ (Jer. 23:4; 1 Ped. 5:2) Mapasalamaton kaayo ta nga naay mga ansiyano sa atong kongregasyon! Ang mga ansiyano makakat-on sa ehemplo ni Maghuhukom Gideon. (Heb. 6:12) Iyang gipanalipdan ug giatiman ang katawhan sa Diyos. (Maghu. 2:16; 1 Cron. 17:6) Sama kang Gideon, ang mga ansiyano gitudlo sa pag-atiman sa katawhan sa Diyos niining lisod kaayo nga panahon. (Buh. 20:28; 2 Tim. 3:1) Makakat-on ta sa iyang pagkamakasaranganon, pagpaubos, ug pagsunod sa mga instruksiyon. Makakat-on sab ta sa iyang pagkamalahutayon samtang gihimo niya ang iyang mga asaynment. Ansiyano man ta o dili, makakat-on ta nga mas apresyahon ang atong mga ansiyano. Atong suportahan kining espirituwal nga mga lalaki nga nagkugi para nato.—Heb. 13:17. w23.06 2 ¶1, 3