Mayo

Ang mga Kristohanon sa unang siglo naapektohan dihang may nahitabong grabeng gutom “sa tibuok yuta.” Ang mga ulo sa pamilya seguradong nabalaka kon unsaon nila pagtagana para sa ilang pamilya. Ug komosta ang mga batan-on nga nagplanong magpalapad sa ilang ministeryo? Nakahunahuna kaha sila nga dili na lang una idayon ang ilang plano? Bisag unsa pay ilang kahimtang, ang mga Kristohanon nag-adjust sa ilang situwasyon. Padayon silang nagkugi sa pagsangyaw, ug malipayon nilang gitabangan ang ilang mga igsoon sa Judea. (Buh. 11:​29, 30) Para niadtong nakadawat ug mga hinabang, nakita nila nga wala gyod sila pasagdi ni Jehova. (Mat. 6:​31-33) Seguradong nasuod sila sa mga igsoon nga mitabang nila. Ug kadtong mihatag ug mga hinabang o miboluntaryo sa paghatod niini mibati pod ug kalipay tungod sa ilang paghatag.—Buh. 20:35. w23.04 16 ¶12-13

Aron matubag ang pag-ampo sa iyang mga alagad, usahay palihokon ni Jehova ang mga dili magtutuo sa pagtabang kanila. Pananglitan, gipalihok niya si Haring Artajerjes nga tugotan si Nehemias nga mobalik sa Jerusalem aron motabang sa pagtukod pag-usab sa siyudad. (Neh. 2:​3-6) Karon sab, puwedeng palihokon ni Jehova bisan ang mga dili magtutuo aron tabangan ta. Sagad, simple lang ang paagi ni Jehova sa pagtubag sa atong mga pag-ampo. Pero ang mga tubag nga atong madawat mao gyod ang atong gikinahanglan aron makapabiling maunongon sa atong langitnong Amahan. Busa matikdi pag-ayo ang mga tubag ni Jehova sa imong mga pag-ampo. Paggahin ug panahon nga mamalandong kon giunsa kana pagtubag ni Jehova. (Sal. 66:​19, 20) Kinahanglang magpakita tag pagtuo, dili lang pinaagi sa pag-ampo kang Jehova, kondili pinaagi pod sa pagdawat sa iyang tubag, bisag unsa pa na.—Heb. 11:6. w23.05 12 ¶13, 15-16

Dihang nagpahinungod ta kang Jehova, nanaad ta nga simbahon siya ug himoon ang iyang kabubut-on. Kinahanglang tumanon nato na nga panaad. Ang pagkinabuhi sumala sa atong panaad dili makapabug-at. Nahibalo ta ana kay gilalang ta ni Jehova aron buhaton ang iyang kabubut-on. (Pin. 4:11) Gilalang ta niya nga may espirituwal nga panginahanglan ug sumala sa iyang larawan. Tungod ana, puwede tang masuod niya ug malipay sa pagbuhat sa iyang kabubut-on. Dugang pa, dihang himoon nato ang kabubut-on sa Diyos ug sundon ang iyang Anak, kita “mobatig kahayahay.” (Mat. 11:​28-30) Busa padayong palig-ona ang imong gugma kang Jehova pinaagi sa pagpamalandong sa tanang maayong butang nga iyang gihimo para nimo ug sa mga panalangin nga iyang ihatag kanimo. Samtang magkalalom ang imong gugma sa Diyos, mas sayon na para nimo nga sundon siya. (1 Juan 5:3) Milampos si Jesus sa paghimo sa kabubut-on sa Diyos kay nangayo siyag tabang kang Jehova ug padayong nagpokus sa iyang ganti. (Heb. 5:7; 12:2) Sama kang Jesus, pag-ampo kang Jehova alang sa kusog ug padayong hunahunaa ang paglaom nga kinabuhing walay kataposan. w23.08 27-28 ¶4-5

Kitang tanan ganahan ug mga tawong mapailobon. Ngano? Makadayeg ta niadtong kayang maghulat nga dili maglagot. Maapresyar nato dihang ang uban magpailob nato kon masipyat ta. Ug mapasalamaton ta nga ang nag-Bible study nato nagpailob dihang naglisod ta sa pagsabot, pagdawat, o pagpadapat sa gitudlo sa Bibliya. Labaw sa tanan, mapasalamaton kaayo ta nga si Jehova nga Diyos nagpailob nato! Malipay ta dihang ang uban magpailob nato, pero usahay kita mismo malisdan sa pagpakitag pailob. Pananglitan, malisdan tingali ta nga magpabiling kalmado dihang ma-traffic ta, ilabina kon late na ta. O basin masuko ta pag-ayo kon naay gihimo ang uban nga makapalagot nato. Ug usahay, malisdan tingali ta nga padayong magpaabot sa gisaad ni Jehova nga bag-ong kalibotan. Pero niining tanan nga kahimtang, kinahanglan tang mahimong mas mapailobon. w23.08 20 ¶1-2

Giingnan ni Jehova si Gideon nga menosan ug kapig 99 porsiyento ang gidaghanon sa iyang mga sundalo. Tingali naghunahuna si Gideon: ‘Kinahanglan ba gyod ning himoon? Modaog kaha mi kon gamay na lang mi?’ Pero misunod gihapon si Gideon. Karon, masundog sa mga ansiyano si Gideon kon sundon nila ang mga kausaban nga ipahimo sa organisasyon. (Heb. 13:17) Gisunod ni Gideon si Jehova bisag nahadlok siya ug delikado ang iyang asaynment. (Maghu. 9:17) Human siya pasaligi ni Jehova, kombinsido si Gideon nga tabangan gyod siya sa Diyos sa pagpanalipod sa Iyang katawhan. Ang mga ansiyano nga nagpuyo sa mga lugar nga gidili ang atong buluhaton nagsundog kang Gideon. Maisogon silang nanguna sa mga tigom ug sa ministeryo bisag posible silang dakpon, sukitsukiton, mawad-ag trabaho, o kulatahon. Panahon sa dakong kasakitan, ang mga ansiyano nagkinahanglag kaisog sa pagsunod sa mga instruksiyon nga ilang madawat, bisan pag peligroso ang pagsunod niana. w23.06 5-6 ¶12-13

Gipasulat ni Jehova ang maayong mga buhat sa hataas nga saserdoteng si Jehoiada aron makakat-on ta. (Roma 15:4) Ug dihang namatay si Jehoiada, gihatagan siyag talagsaong kadungganan kay gilubong siya “sa Siyudad ni David uban sa mga hari, kay siya nagbuhat ug maayo sa Israel maylabot sa matuod nga Diyos ug sa Iyang balay.” (2 Cron. 24:​15, 16) Ang asoy bahin kang Jehoiada makatabang natong tanan nga maugmad ang kahadlok sa Diyos. Masundog sa mga ansiyano si Jehoiada kon magpabilin silang alerto ug maunongon nilang protektahan ang kongregasyon. (Buh. 20:28) Ang mga edaran makakat-on kang Jehoiada nga kon sila may kahadlok kang Jehova ug magpabiling maunongon, puwede silang gamiton ni Jehova sa pagtuman sa Iyang katuyoan. Ang mga batan-on makakat-on kon giunsa pagtratar ni Jehova si Jehoiada. Masundog nila si Jehova pinaagi sa pagpakitag dignidad ug pagtahod sa mga edaran, ilabina kadtong dugay nang nag-alagad nga matinumanon kang Jehova. (Prov. 16:31) Maunongon natong suportahan kadtong ‘nanguna kanato’ pinaagi sa pagsunod kanila.—Heb. 13:17. w23.06 17 ¶14-15

Sa tigom, maayong konsiderahon kon kapila ta mopataas sa atong kamot. Kon magsige tag pataas, basin mapresyur ang tigdumala nga tawgon ta pirme bisag wala pa makakomento ang uban. Tungod ani, basin mawad-an nag gana ang uban nga moisa sa ilang kamot. (Eccl. 3:7) Kon daghan ang mopataas sa ilang kamot panahon sa pagtuon, panagsa ra tingali tang makakomento. Usahay, basig dili pa gani ta matawag sa tigdumala. Maguol tingali ta, pero dili ta angayng mahiubos kon dili ta matawag. (Eccl. 7:9) Kon panagsa ra kang matawag sa tigdumala, paminaw pag-ayo sa komento sa uban aron mapasalamatan nimo sila human sa tigom. Bisag wala ka makakomento, madasig gihapon nimo ang mga igsoon pinaagi sa imong komendasyon. w23.04 23-24 ¶14-16

Tun-i ang Pulong sa Diyos ug pamalandonga kini. Sama nga ang kahoy makabarog nga lig-on kon nakagamot ni pag-ayo, makapabilin tang lig-on kon ang atong pagtuo nakagamot pag-ayo sa Pulong sa Diyos. Samtang magkadako ang kahoy, ang mga gamot niini magkalalom ug mokatap. Dihang magtuon ta ug mamalandong, mas molig-on ang atong pagtuo ug mahimo tang mas kombinsido nga ang mga pamaagi sa Diyos mao ang pinakamaayo. (Col. 2:​6, 7) Pamalandonga kon sa unsang paagi ang instruksiyon, paggiya, ug proteksiyon ni Jehova nakatabang sa iyang mga alagad kaniadto. Pananglitan, si Ezequiel naniid pag-ayo samtang detalyadong gisukod sa anghel ang templo diha sa panan-awon. Ang panan-awon nakapalig-on kang Ezequiel, ug naghatag ni natog praktikal nga mga leksiyon kon sa unsang paagi masunod nato ang sukdanan ni Jehova sa putling pagsimba. (Ezeq. 40:​1-4; 43:​10-12) Makabenepisyo pod ta kon mogahin tag panahon sa pagtuon ug pagpamalandong sa lawom nga mga butang sa Pulong sa Diyos. Makabaton tag lig-ong kasingkasing, nga bug-os nagasalig kang Jehova.—Sal. 112:7. w23.07 18 ¶15-16

Sa Bibliya, daghag maayong mga ehemplo nga puwedeng sundogon sa mga batan-ong brader. Ang maong mga lalaki nga gihisgotan sa Bibliya nahigugma sa Diyos ug nag-atiman ug lainlaing responsibilidad para sa katawhan sa Diyos. Makakita pod kag hamtong nga mga brader diha sa imong pamilya ug sa kongregasyon nga maayong mga ehemplo. (Heb. 13:7) Ug ang imong hingpit nga ehemplo mao si Jesu-Kristo. (1 Ped. 2:21) Samtang konsiderahon nimo pag-ayo kini nga mga ehemplo, matikdi ang ilang nindot nga mga hiyas. (Heb. 12:​1, 2) Dayon pamalandonga kon unsaon nimo sila pagsundog. Ang usa nga naay katakos sa panghunahuna mamalandong pag-ayo ayha mohimog desisyon. Busa paningkamot nga padayon kanang maugmad. Una, tun-i ang mga prinsipyo sa Bibliya ug hunahunaa kon nganong makahatag kinig kaayohan. Dayon gamita ang maong mga prinsipyo sa paghimog mga desisyon nga makapalipay kang Jehova. (Sal. 119:9) Makatabang nig dako aron mahimo kang hamtong nga Kristohanon.—Prov. 2:​11, 12; Heb. 5:14. w23.12 24-25 ¶4-5

Matudloan sa mga ginikanan ang ilang mga anak nga motubag sa lumo nga paagi dihang naay mokuwestiyon sa ilang tinuohan. (Sant. 3:13) Ang ubang ginikanan naghimog mga practice session panahon sa ilang pamilyahanong pagsimba. Ilang konsiderahon ang mga topiko nga puwedeng motungha sa eskuwelahan, hisgotan ug ipakita kon unsaon ni pagtubag, ug tudloan ang ilang mga anak nga motubag sa kalmado ug matinahorong paagi. Ang mga practice session makatabang sa mga Kristohanon sa paghatag ug makapakombinsir nga mga pangatarongan. Makatabang pod ni aron sila mismo mahimong kombinsido nga sakto ang ilang gituohan. Ang serye nga “Mga Batan-on Nangutana” ug ang mga worksheet para sa mga tin-edyer available sa jw.org. Gidisenyo ni aron tabangan ang mga batan-on nga mahimong mas kombinsido sa ilang gituohan ug makaandam ug mga tubag sa kaugalingon nilang mga pulong. Kon tun-an nato ni nga serye ingong pamilya, kitang tanan makakat-on sa pagdepensa sa atong pagtuo sa lumo ug matinahorong paagi. w23.09 16 ¶10; 18 ¶15-16

Naa na ba kay gihimong espirituwal nga tumong pero naglisod ka sa pagkab-ot niana? Kon mao, wala ka mag-inusara. Pananglitan, gustong pauswagon ni Philip ang kalidad sa iyang pag-ampo ug kon kapila siya moampo, pero naglisod siyag gahin ug panahon para niana. Tumong ni Erika nga mosayog abot sa mga tigom para sa pagsangyaw, pero pirme gihapon siyang ma-late. Kon naa kay tumong nga wala pa nimo makab-ot, wala na magpasabot nga pakyas ka. Bisan ang simpleng tumong sagad nagkinahanglag panahon ug paningkamot aron makab-ot. Kay gusto gihapon nimong makab-ot ang imong tumong, nagpakita na nga gipabilhan nimo ang imong relasyon kang Jehova ug gusto nimong ihatag ang imong pinakamaayo kaniya. Giapresyar ni Jehova ang imong mga paningkamot. Siyempre, wala siya magdahom ug labaw pa sa kaya nimong ihatag. (Sal. 103:14; Miq. 6:8) Busa ang imong tumong kinahanglang realistiko, kanang itugot sa imong kahimtang. w23.05 26 ¶1-2

Ang maisogong mga tawo mobati tingalig kahadlok, pero dili nila ni tugotan nga mopugong nila sa paghimo kon unsay husto. Si Daniel nagpakitag talagsaong kaisog bisan sa batan-on pa. Gitun-an ni Daniel ang mga sinulat sa mga propeta sa Diyos, apil ang mga tagna ni Jeremias. Sa iyang pagtuon, nasabtan ni Daniel sa ulahi nga hapit nang matapos ang dugay nga pagkabihag sa mga Hudiyo sa Babilonya. (Dan. 9:2) Kay nakita ni Daniel ang katumanan sa mga tagna sa Bibliya, seguradong mas milig-on ang iyang pagsalig kang Jehova, ug kadtong naay lig-ong pagsalig sa Diyos makapakitag talagsaong kaisog. (Itandi ang Roma 8:​32, 37-39.) Labaw sa tanan, si Daniel kanunay nga nag-ampo sa iyang langitnong Amahan. (Dan. 6:10) Iyang gitug-an kang Jehova ang iyang mga sala ug gisulti ang iyang mga pagbati. Ug nangayo si Daniel ug tabang kaniya. (Dan. 9:​4, 5, 19) Sama nato, wala siya matawo nga naa nay kaisog daan. Iyang naugmad ang maong hiyas pinaagi sa pagtuon, pag-ampo, ug pagsalig kang Jehova. w23.08 3 ¶4; 4 ¶7

Kon sundon nato ang labaw nga mga awtoridad, makabenepisyo ta ug ang uban. Sa unsang paagi? Ang usa niana, malikayan nato ang silot nga resulta sa pagsupak sa balaod. (Roma 13:​1, 4) Kon mosunod ta sa balaod, makaapektar ni sa panglantaw sa mga awtoridad bahin sa mga Saksi ni Jehova. Pananglitan, didto sa Nigeria daghang tuig na ang milabay, gisulod sa mga sundalo ang usa ka Kingdom Hall panahon sa tigom. Gipangita nila ang mga nagprotesta nga dili gustong mobayad ug buhis. Pero giingnan sa usa ka opisyal ang mga sundalo nga mobiya, kay matod niya: “Ang mga Saksi ni Jehova dili supak sa pagbayad ug buhis.” Sa matag higayon nga mosunod ka sa balaod, gitabangan nimo nga makabaton ug maayong reputasyon ang katawhan ni Jehova—reputasyon nga posibleng makapanalipod sa mga igsoon sa umaabot. w23.10 9 ¶13

Daghang alagad ni Jehova ang dugay nang nagpaabot nga matapos kining daotang kalibotan. Sa panglantaw sa tawo, morag nalangan ang katumanan sa saad sa Diyos. Nahibalo si Jehova sa gibati sa iyang mga alagad. Gani, iyang gipasaligan si propetang Habacuc: “Ang panan-awon nagpaabot sa gitakdang panahon niini, ug kini nagdali paingon sa kataposan niini, ug kini dili mamakak. Bisan pa kon malangan kini, padayon sa pagpaabot niini! Kay kini matuman gayod. Kini dili maulahi!” (Hab. 2:3) Para lang ba kang Habacuc ang pasalig sa Diyos, o para pod ni nato karon? Ubos sa paggiya sa Diyos, gigamit ni apostol Pablo kining mga pulonga ngadto sa mga Kristohanon, kinsa nagpaabot sa bag-ong kalibotan. (Heb. 10:37) Oo, makasalig ta nga bisan pag morag nalangan ang gisaad nga kaluwasan, “kini matuman gayod. Kini dili maulahi!” w23.04 30 ¶16

Makapaguol kay gisalikway sa mga Israelinhon si Moises bisag klaro kaayo ang ebidensiya nga gigamit siya ni Jehova ingong Iyang representante. (Num. 14:​10, 11) Gani, daghang higayon nga ila nang gihimo. Tungod ana, ang maong henerasyon sa mga Israelinhon wala pasudla sa Yutang Saad. (Num. 14:30) Pero naay mga Israelinhon nga misunod sa paggiya ni Jehova. Pananglitan, si Jehova miingon: “Si Caleb . . . padayong nagsunod kanako nga kinasingkasing.” (Num. 14:24) Gigantihan sa Diyos si Caleb ug gitugotan pa gani siyang mopili kon unsang lugara sa Canaan ang iyang ganahan. (Jos. 14:​12-14) Ang misunod nga henerasyon sa mga Israelinhon maoy maayo pod nga ehemplo sa pagsunod sa giya ni Jehova. Dihang si Josue mipuli kang Moises ingong tinudlong lider sa mga Israelinhon, ilang “gitahod siya pag-ayo sa tibuok niyang kinabuhi.” (Jos. 4:14) Ingong resulta, gipanalanginan sila ni Jehova pinaagi sa pagdala kanila sa yuta nga iyang gisaad kanila.—Jos. 21:​43, 44. w24.02 21 ¶6-7

Sama nga ang doktor makakuhag ideya sa kondisyon sa atong kasingkasing pinaagi sa pag-check sa atong pulso, makakuha pod tag ideya kon unsa ka lig-on ang atong gugma sa Diyos pinaagi sa pagsusi sa atong gugma sa uban. Kon namatikdan nato nga mihuyang ang atong gugma sa mga igsoon, posibleng ilhanan ni nga mihuyang pod ang atong gugma sa Diyos. Pero kon kanunay tang magpakitag gugma sa mga igsoon, ilhanan ni nga lig-on ang atong gugma sa Diyos. Angay tang mabalaka kon nagkahuyang ang atong gugma sa mga igsoon. Ngano? Kay nagpasabot ni nga nameligro ang atong espirituwalidad. Si apostol Juan klarong nagpasidaan: “Kon wala siya mahigugma sa iyang igsoon nga iyang nakita, unsaon man niya paghigugma sa Diyos nga wala niya makita?” (1 Juan 4:20) Unsay atong makat-onan niini? Si Jehova malipay lang kanato kon atong “higugmaon ang usag usa.”—1 Juan 4:​7-9, 11. w23.11 8 ¶3; 9 ¶5-6

Sa bata pa si Haring Jehoas, mihimo siyag maayong desisyon. Kay wala siyay amahan, iyang gisunod ang direksiyon sa matinumanong hataas nga saserdoteng si Jehoiada. Gitudloan sa saserdote si Jehoas nga samag iyang kaugalingong anak. Busa si Jehoas maalamong midesisyon nga manguna sa putling pagsimba ug alagaran si Jehova. Giseguro pa gani ni Jehoas nga ma-repair ang templo ni Jehova. (2 Cron. 24:​1, 2, 4, 13, 14) Kon gitudloan ka nga higugmaon si Jehova ug sundon ang iyang mga sukdanan, samag gihatagan kag bililhong regalo. (Prov. 2:​1, 10-12) Ang imong mga ginikanan makabansay nimo sa daghang paagi. Dihang ipadapat nimo ang mga tambag sa Bibliya, mapalipay nimo ang imong ginikanan. Labaw sa tanan, mapalipay nimo ang Diyos ug mas molig-on ang imong relasyon kaniya. (Prov. 22:6; 23:​15, 24) Dili ba maayo kaayo na nga rason nga sundogon ang ehemplo ni Jehoas sa bata pa siya? w23.09 8-9 ¶3-5

Nagsaad si Jehova nga paminawon niya ang atong mga pag-ampo. Gihigugma sa atong Diyos ang iyang matinumanong mga alagad, busa dili gyod niya balewalaon ang ilang mga pag-ampo. (Sal. 10:17; 37:28) Pero wala ni magpasabot nga ihatag niya ang tanan natong hangyo. Kinahanglan tingali tang maghulat nga moabot ang bag-ong kalibotan ayha nato madawat ang ubang butang nga atong gihangyo. Konsiderahon ni Jehova ang iyang katuyoan dihang maminaw siya sa atong mga pag-ampo. (Isa. 55:​8, 9) Apil sa iyang katuyoan nga pun-on ang yuta ug malipayong mga tawo nga nagkahiusa ug nagpasakop sa iyang pagmando. Pero si Satanas miingon nga mas maayo kon ang mga tawo maoy magmando sa ilang kaugalingon. (Gen. 3:​1-5) Aron mapamatud-an nga bakakon ang Yawa, gitugotan ni Jehova ang mga tawo sa pagmando sa ilang kaugalingon. Pero ang pagmando sa tawo miresultag daghan kaayong problema karon. (Eccl. 8:9) Nasabtan nato nga sa pagkakaron, dili wad-on ni Jehova ang tanan natong problema. w23.11 21 ¶4-5

Si Jehova nagsaad nga pinaagi kang Abraham, ang daghang kanasoran panalanginan. Pero bisag 100 na ang edad ni Abraham ug 90 na si Sara, ang gisaad nga anak wala pa gihapon motungha. Sa panglantaw sa tawo, morag imposible na para kang Abraham ug Sara nga magkaanak. Nasulayan gyod ang pagtuo ni Abraham. Pero “siya milaom ug mituo nga mahimo siyang amahan sa daghang kanasoran.” (Roma 4:​18, 19) Ug sa ngadtongadto, natuman gyod ang gilaoman ni Abraham. Natawo si Isaac, ang anak nga dugay na nilang gihulat. (Roma 4:​20-22) Puwede natong mabatonan ang pag-uyon sa Diyos ug isipon niya ingong matarong ug ingong iyang mga higala, sama kang Abraham. Gani, gihisgotan kana ni Pablo dihang siya misulat: “Ang mga pulong nga ‘tungod niana siya giisip’ gisulat dili lang para [kang Abraham], kondili para sab kanato nga isipon sa Diyos nga matarong, kay kita nagtuo Kaniya kinsa nagbanhaw kang Jesus.” (Roma 4:​23, 24) Sama kang Abraham, kinahanglan nga naa tay pagtuo, mohimo tag maayo, ug huptan natong lig-on ang atong paglaom. w23.12 7 ¶16-17

Kon nag-atubang kag pagsulay nga nakapahadlok nimo, hinumdomi nga nakita ni Jehova ang pagsulay ug ang imong gibati tungod niana. Pananglitan, nakita ni Jehova dili lang ang pagdaogdaog nga nasinatian sa mga Israelinhon sa Ehipto kondili apil na pod ang “ilang mga kasakit.” (Ex. 3:7) Dihang mag-atubang kag makapahadlok nga pagsulay, dili tingali nimo makita kon sa unsang paagi ka ginatabangan ni Jehova. Busa hangyoa siya nga tabangan kang makita kana. (2 Hari 6:​15-17) Dayon hunahunaa: Naa bay pakigpulong o komento diha sa tigom nga nakapalig-on nimo? Naa bay publikasyon, video, o original song nga nakadasig nimo? Naa bay nag-share nimog makapahupay nga punto o teksto? Usahay, malimot tingali ta kon unsa ka dako ang gugma sa mga igsoon kanato ug kon sa unsang paagi ta napalig-on sa espirituwal nga pagkaon nga atong nadawat. Pero kini maoy talagsaon kaayong mga regalo gikan kang Jehova. (Isa. 65:13; Mar. 10:​29, 30) Pamatuod ni nga gimahal ta niya. (Isa. 49:​14-16) Pamatuod pod ni nga makasalig gyod ta niya. w24.01 4-5 ¶9-10

Sa hapit nang mobalik si Jesus sa langit, gipahinumdoman niya ang iyang mga tinun-an sa ilang buluhaton nga magpamatuod bahin kaniya “sa Jerusalem, sa tibuok Judea ug Samaria, ug hangtod sa kinalay-ang bahin sa yuta.” (Buh. 1:8; Luc. 24:​46-48) Wala madugay, gidakop sa Hudiyong mga lider si apostol Pedro ug Juan ug gidala sila sa Sanhedrin. Ilang gibaoran kining matinumanong mga apostoles nga mohunong sa pagsangyaw ug gibaharan pa gani sila. (Buh. 4:​18, 21) Si Pedro ug Juan miingon: “Kamo nay mohukom kon husto ba sa panan-aw sa Diyos nga mamati kaninyo imbes sa Diyos. Apan alang kanamo, dili mi makahunong sa pagsulti bahin sa mga butang nga among nakita ug nadungog.” (Buh. 4:​19, 20) Dihang gibuhian si Pedro ug Juan, ang mga tinun-an miampo kang Jehova nga tabangan sila sa paghimo sa iyang kabubut-on. Gitubag ni Jehova ang ilang kinasingkasing nga pag-ampo.—Buh. 4:31. w23.05 5 ¶11-12

Sa tibuok uniberso, si Jehova ug ang iyang Anak ang pinakadugay nga nag-uban. Sulod sa binilyong katuigan didto sa langit, nasuod sila pag-ayo ug naugmad nila ang lawom nga gugma sa usag usa. Sa teksto karong adlawa, klarong gisulti ni Jehova ang iyang gugma kang Jesus. Puwede ra man untang moingon si Jehova, ‘Kini mao ang akong Anak nga akong giuyonan.’ Pero gusto niyang mahibalo ta kon unsa niya ka mahal si Jesus, maong iya siyang gitawag nga “akong Anak, ang akong gihigugma.” Proud si Jehova kang Jesus, ilabina kay andam ihatag ni Jesus ang iyang kinabuhi. (Efe. 1:7) Ug wala gyod magduhaduha si Jesus nga gimahal siya sa iyang Amahan. Gibati gyod niya ang gugma ni Jehova kay balikbalik siyang miingon nga gihigugma siya sa iyang Amahan.—Juan 3:35; 10:17; 17:24. w24.01 28 ¶8

Imadyina ni: Ang tawo nga imong gimahal naay gisulti nga daotan bahin nimo. Nahibalo ka nga dili ni tinuod, pero ang uban mituo ani. Ug makapaguol kay ila ning gisulti sa uban, ug daghan pod ang mituo. Unsa kahay imong bation? Seguradong masakitan ka sa ilang mga gisulti nga dili tinuod. Kini nga ilustrasyon makatabang nato nga masabtan kon unsay gibati ni Jehova dihang gidaot ang iyang reputasyon. Ang usa sa iyang mga anak sa langit misultig bakak bahin niya ngadto sa unang babaye, si Eva. Mituo si Eva niana, maong mirebelde ang atong unang mga ginikanan kang Jehova. Ingong resulta, ang tanang tawo makasala ug mamatay. (Gen. 3:​1-6; Roma 5:12) Ang tanang problema nga atong nakita sa kalibotan karon—ang kamatayon, gubat, ug pag-antos—maoy resulta sa mga bakak nga gipakaylap ni Satanas. Nasakitan ba si Jehova niana nga pagpangdaot sa iyang ngalan ug sa mga resulta niini? Siyempre. Pero si Jehova wala mahimong madumtanon. Gani, nagpabilin siyang “malipayong Diyos.”—1 Tim. 1:11. w24.02 8 ¶1-2

Unsaon nimo pagsundog ang ehemplo ni Jose? Puwede kang modesisyon karon kon unsay imong himoon dihang motungha ang tentasyon. Pagkat-on nga isalikway dayon ang mga butang nga gidumtan ni Jehova, ug likayi bisan gani ang paghunahuna niana. (Sal. 97:10; 119:165) Kon imo nang himoon, makabarog kang lig-on dihang naay tentasyon. Tingali kombinsido ka nga nakaplagan na nimo ang kamatuoran ug gusto nimong alagaron si Jehova sa tibuok nimong kasingkasing. Pero basig mibati gihapon ka nga dili pa ka andam magpahinungod ug magpabawtismo. Kon mao, makatabang nimo ang pagsundog sa ehemplo ni Haring David. Puwede nimong hangyoon si Jehova: “Susiha ko, Oh Diyos, ug sayra ang akong kasingkasing. Susiha ko, ug sayra ang akong mga kabalaka. Tan-awa kon duna ba koy daotang kiling, ug tultoli ko sa dalan sa walay kataposan.” (Sal. 139:​23, 24) Panalanginan ni Jehova kadtong “sinserong nangita kaniya.” Kon maningkamot ka nga kab-oton ang imong tumong nga magpahinungod ug magpabawtismo, makita ni Jehova nga sinsero kang nangita kaniya.—Heb. 11:6. w24.03 6 ¶13-15

Ang hataas nga saserdote maoy morepresentar sa katawhan atubangan sa Diyos. Ang unang hataas nga saserdote sa Israel, si Aaron, gipili ni Jehova dihang gipahinungod ang tabernakulo. Pero sumala sa gipatin-aw ni apostol Pablo, “daghan ang nagpulipuli ingong mga saserdote kay nangamatay man sila ug dili na makaalagad.” (Heb. 7:​23-26) Ug kay dili hingpit ang hataas nga mga saserdote, kinahanglan silang magtanyag ug mga halad para sa ilang mga sala. Mao ni ang dakong kalainan sa hataas nga mga saserdote sa Israel ug sa labaw nga Hataas nga Saserdote, si Jesu-Kristo. Ingong atong Hataas nga Saserdote, si Jesu-Kristo “usa ka alagad . . . sa tinuod nga tolda nga si Jehova ang nagpatindog, dili tawo.” (Heb. 8:​1, 2) Gipatin-aw ni Pablo nga “kay buhi man [si Jesus] hangtod sa hangtod, walay manununod sa iyang pagkasaserdote.” Si Pablo midugang nga si Jesus “wala mahugawi, bulag sa mga makasasala.” Dili pod siya sama sa hataas nga mga saserdote sa Israel kay “siya dili kinahanglang magtanyag ug mga halad kada adlaw” para sa iyang mga sala. w23.10 26 ¶8-9

“Ang unang langit” nagtumong sa tawhanong mga gobyerno nga giimpluwensiyahan ni Satanas ug sa iyang mga demonyo. (Mat. 4:​8, 9; 1 Juan 5:19) Sa Bibliya, ang “yuta” gigamit pod sa pagtumong sa mga tawo. (Gen. 11:1; Sal. 96:1) Busa, “ang unang yuta” nagtumong sa daotang katawhan karon. Dili lang kay basta i-remodel o ayohon ni Jehova ang presenteng “langit” ug “yuta”; iya kining tangtangon ug pulihan. Iyang pulihan ang presenteng langit ug yuta ug “bag-ong langit ug bag-ong yuta”—sa ato pa, bag-ong gobyerno ug bag-ong katilingban sa katawhan. Himoon ni Jehova nga samag bag-o ang yuta ug ang mga tawo pinaagi sa pagpasig-uli kanila sa pagkahingpit. Sama sa gitagna ni Isaias, ang tibuok yuta mahimong samag garden nga park—usa ka tibuok kalibotang Eden. Ang matag usa pod nato mabag-o, o mapasig-uli. Ang mga bakol, buta ug amang ayohon, ug bisan ang mga patay banhawon.—Isa. 25:8; 35:​1-7. w23.11 4 ¶9-10

Ang “dakong kasakitan” kalit nga moabot. (Mat. 24:21) Pero ang dakong kasakitan lahi sa ubang mga kalamidad, kay abante tang nahibalo nga moabot ni. Mga 2,000 ka tuig sa miagi, gipasidan-an ni Jesus ang iyang mga sumusunod nga mangandam para nianang adlawa. Kon nakapangandam ta, mas dali para nato nga molahutay nianang lisod nga panahon ug makatabang pod ta sa uban nga molahutay. (Luc. 21:36) Kinahanglan nato ang paglahutay aron masunod si Jehova ug mosalig nga panalipdan ta niya. Unsay atong himoon kon ang atong mga igsoon mawad-an sa pipila o sa tanan nilang materyal nga mga butang? (Hab. 3:​17, 18) Kinahanglang mobati tag kaluoy nila aron mapalihok ta nga tabangan sila. Unsay atong reaksiyon kon, tungod sa pag-atake sa nag-alyansang kanasoran, kinahanglan tang mopuyo uban sa mga igsoon sa pipila ka panahon? (Ezeq. 38:​10-12) Kinahanglang lig-on ang atong gugma para nila aron makalahutay ta nianang lisod nga panahon. w23.07 2 ¶2-3

Ang mga magtiayon makakat-on sa ehemplo ni Aquila ug Priscila, magtiayon nga naapresyar sa daghang Kristohanon sa unang siglo. (Roma 16:​3, 4) Sila nagtrabaho, nagsangyaw, ug mitabang sa uban nga magkauban. (Buh. 18:​2, 3, 24-26) Gani, dihang ang Bibliya maghisgot bahin kang Aquila ug Priscila, ang ilang mga ngalan kanunay nga mag-uban. Unsaon sila pagsundog sa mga magtiayon? Hunahunaa ang daghang butang nga kinahanglan ninyong himoon. Puwede ba mong mag-uban sa paghimo niini nga mga buluhaton imbes nga mag-iyahay? Pananglitan, si Aquila ug Priscila nag-uban sa pagsangyaw. Naa ba moy regular nga eskedyul sa pagsangyaw nga magkauban? Si Aquila ug Priscila nag-uban pod sa pagtrabaho. Dili tingali mo parehas ug trabaho sa imong kapikas, pero puwede ba ninyong himoon ang mga buluhaton sa balay nga magkauban? (Eccl. 4:9) Kon magtinabangay mo sa usa ka buluhaton, mas bation ninyo nga partner mo ug naa moy higayon nga magkaestoryahanay. w23.05 22-23 ¶10-12

Kitang tanan mobatig kahadlok usahay. Pananglitan, dihang gipangita ni Haring Saul si David aron patyon, si David miikyas ngadto sa Gat nga siyudad sa mga Filistehanon. Nahibaloan sa hari sa Gat, si Akis, nga si David ang banggiitang sundalo nga nakapatay ug “tinagpulo ka libo” ka Filistehanon. ‘Nahadlok pag-ayo’ si David. (1 Sam. 21:​10-12) Nabalaka siya kon unsaon siya ni Akis. Unsay gihimo ni David? Sa Salmo 56, gisulti ni David ang iyang gibati dihang didto siya sa Gat. Makita nato niini nga salmo ang kahadlok ni David, pero gipakita pod niini kon giunsa niya pag-atubang ang iyang kahadlok. Dihang siya nahadlok, si David misalig kang Jehova. (Sal. 56:​1-3, 11) Wala gyod siya masayop sa iyang pagsalig kang Jehova. Sa tabang ni Jehova, nakahunahuna si David ug talagsaon ug epektibong estratehiya: Nagpakaaron-ingnon siyang buang! Tungod ana, gisamokan si Akis kang David ug gipapahawa siya, maong nakaikyas siya.—1 Sam. 21:13–22:1. w24.01 2 ¶1-3

Kinsa ang gitumong sa teksto karong adlawa? Ang nabanhaw nga mga dinihogan! Busa dihang ang kataposan sa mga dinihogan nga nahibilin dinhi sa yuta mosaka na sa langit sa hapit nang matapos ang dakong kasakitan, ang usa sa ilang pinakaunang asaynment mao ang pagpakig-away. Dihang naa na sila sa langit, mag-alagad sila uban sa Kristo ug sa iyang balaang mga anghel ug moapil sa kataposang gubat batok sa mga kaaway sa Diyos. Hunahunaa ni: Karon, ang ubang dinihogan dinhi sa yuta tigulang na ug luya na kaayo. Pero dihang banhawon na sila ngadto sa langit, sila mahimong gamhanan ug imortal nga espiritung mga linalang, nga makig-away uban sa ilang Manggugubat nga Hari, si Jesu-Kristo. Human sa gubat sa Armagedon, motabang sila sa paggiya sa katawhan ngadto sa kahingpitan. Seguradong mas dako unya silag mahimo didto sa langit para sa ilang minahal nga mga igsoon dinhi sa yuta kay sa ilang mahimo ingong dili hingpit nga mga tawo! w24.02 6-7 ¶15-16

Ang uban magduhaduha gihapon nga magpahinungod ug magpabawtismo bisag andam na sila. Tingali naghunahuna sila, ‘Unsaon na lang kon makahimo kog seryosong sala ug mapalagpot?’ Kon kanay imong gikahadlokan, makasalig ka nga ihatag ni Jehova ang tanan nimong gikinahanglan aron makahimo ka sa ‘pagkinabuhi nga takos sa ngalan ni Jehova [ug] bug-os nimo siyang mapalipay.’ (Col. 1:10) Hatagan pod ka niyag kusog sa paghimo kon unsay husto. Daghan na siyag natabangan sa paghimo niana. (1 Cor. 10:13) Usa ni sa hinungdan kon nganong gamay ra ang mapalagpot gikan sa Kristohanong kongregasyon. Gitabangan ni Jehova ang iyang katawhan nga magpabiling matinumanon. Ang tanang dili hingpit nga tawo makaatubang gyod ug mga tentasyon. (Sant. 1:14) Pero naa ra nimo kon magpadala ka sa tentasyon—imo nang desisyon. Ang tinuod, ikaw ang naay kontrol kon unsay imong himoon sa imong kinabuhi. Ang uban moingon nga dili nato makontrol ang atong pagbati ug mga aksiyon, pero dili na tinuod kay kaya natong kontrolon ang atong mga tinguha. w24.03 5 ¶11-12