Hunyo

Gipanalanginan ni Jehova ang mga Kristohanon sa unang siglo kay nag-adjust sila sa ilang kahimtang. Pirme silang makasinatig paglutos, usahay sa panahon nga wala nila damha. Konsideraha ang nahitabo kang Bernabe ug apostol Pablo samtang nagsangyaw sila sa Listra. Sa primero, giabiabi silag maayo niadtong mga naminaw nila. Pero sa ulahi, ang mga magsusupak “nangombinsir sa katawhan.” Tungod ana, ang pipila niadtong nag-abiabi nila miapil na hinuon sa pagbato kang Pablo hangtod nga nagtuo sila nga patay na siya. (Buh. 14:19) Pero si Bernabe ug Pablo nagpadayon ug sangyaw sa laing lugar. Unsay resulta? Natabangan nila ang “ubay-ubayng tawo nga mahimong tinun-an,” ug ang ilang mga pulong ug ehemplo nakadasig sa mga igsoon. (Buh. 14:​21, 22) Daghan ang nakabenepisyo kay si Bernabe ug Pablo wala mohunong sa pagsangyaw bisan pa sa paglutos. Kon padayon natong himoon ang buluhaton nga gisugo ni Jehova, panalanginan ta niya. w23.04 16-17 ¶13-14

Sa tibuok kinabuhi ni Haring David, daghan siyag naatubang nga mga kaaway, ug kanunay siyang nangayog tabang kang Jehova pinaagi sa pag-ampo. Si David kombinsido nga gipaminawan ug gitubag ni Jehova ang iyang mga pag-ampo. Makasalig pod ka ana. Ang Bibliya nagpasalig nato nga hatagan ta ni Jehova ug kaalam ug kusog aron makalahutay. Tingali gamiton niya ang mga igsoon o bisan kadtong wala mag-alagad niya aron tabangan ta. Bisag dili kanunayng tubagon ni Jehova ang atong mga pag-ampo sa paagi nga atong gidahom, makasalig ta nga iya gyod nang tubagon. Ihatag niya kon unsa gyoy atong gikinahanglan sa hustong panahon. Busa padayon sa pag-ampo kaniya uban ang pagtuo, ug salig nga atimanon ka ni Jehova karon ug nga iyang “tagbawon ang tinguha sa tanang buhing linalang” sa bag-ong kalibotan.—Sal. 145:16. w23.05 8 ¶4; 13 ¶17-18

Maayo nga hunahunaon nimo ang mga kaayohan sa pagkab-ot sa imong tumong. Kon tumong nimo nga mapauswag ang imong pagbasa sa Bibliya o pag-ampo, hunahunaa kon sa unsang paagi ni makapalig-on sa imong relasyon kang Jehova. (Sal. 145:​18, 19) Kon ang imong tumong mao ang pag-ugmad ug Kristohanong hiyas, hunahunaa kon sa unsang paagi makatabang ni nga masuod ka sa uban. (Col. 3:14) Puwede nimong isulat ang tanang rason kon nganong gusto nimong makab-ot ang imong tumong. Tan-awa na nga listahan matag karon ug unya. Pakig-uban pod sa mga igsoon nga makadasig nimo. (Prov. 13:20) Pero ang tinuod, naa gyoy mga adlaw nga morag wala kaayo tay gana. Nagpasabot ba na nga wala na tay mahimo sa pagkab-ot sa atong tumong? Wala. Puwede tang maningkamot nga makab-ot ang atong tumong bisan sa mga panahon nga wala tay gana. Nagkinahanglan nig disiplina sa kaugalingon, pero makalaom ta nga maayo nig mga resulta. w23.05 27-28 ¶5-8

Kay nahibalo ta nga manubag ta sa atong mga desisyon, mapalihok ta nga itug-an ang atong mga sala, tul-iron ang atong mga sayop, ug dili na kini otrohon. Kon ato nang himoon, makapadayon ta sa lumba sa kinabuhi. Kon nakahimo kag sayop nga desisyon ug wala na kay mahimo sa nahitabo, dawata ang imong presenteng kahimtang. Ayawg sayanga ang imong emosyon ug kusog sa pagpangatarongan kon nganong imo tong gihimo o kaha basolon ang imong kaugalingon o ang uban. Hinuon, dawata ang imong mga sayop ug himoa ang imong maarangan sa imong presenteng kahimtang. Kon nakonsensiya ka sa sayop nga imong nahimo, mapainubsanong mag-ampo kang Jehova, angkona ang imong sayop, ug hangyoa siya nga pasayloon ka. (Sal. 25:11; 51:​3, 4) Pangayog pasaylo sa mga nahimoan nimog sayop, ug kon gikinahanglan, pangayog tabang sa mga ansiyano. (Sant. 5:​14, 15) Pagkat-on sa imong mga sayop, ug paningkamot nga dili na kana himoon pag-usab. Kon imo nang buhaton, makaseguro ka nga pakitaan ka ni Jehova ug kaluoy ug tabangan ka niya.—Sal. 103:​8-13. w23.08 28-29 ¶8-9

Si Haring Jehoas nakabenepisyo sa maayong impluwensiya ni Jehoiada. Mao nga sa batan-on pa ang hari, gusto niyang pahimut-an si Jehova. Pero human mamatay si Jehoiada, si Jehoas naminaw sa apostatang mga prinsipe. (2 Cron. 24:​4, 17, 18) Bisag nasakitan pag-ayo si Jehova, “siya padayong nagpadala kanilag mga propeta aron mobalik sila . . . apan wala sila maminaw.” Wala gani sila maminaw sa anak ni Jehoiada nga si Zacarias, kinsa dili lang propeta ni Jehova ug saserdote, kondili ig-agaw pod ni Jehoas. Gani, gipapatay ni Haring Jehoas si Zacarias. (2 Cron. 22:11; 24:​19-22) Gipasagdan ni Jehoas nga mawala ang iyang kahadlok kang Jehova. Si Jehova miingon: “Kadtong nagtamay kanako pagatamayon.” (1 Sam. 2:30) Sa ulahi, ang “dakong panon sa kasundalohan” ni Jehoas gipildi sa gamay lang nga kasundalohan sa Sirya ug siya “grabeng nasamdan.” (2 Cron. 24:​24, 25) Si Jehoas gipatay sa iyang mga sulugoon tungod sa iyang pagpatay kang Zacarias. w23.06 18-19 ¶16-17

Si apostol Pablo nagpabilin ug pipila ka panahon sa Efeso, nga nagsangyaw ug nanudlo sa maayong balita. (Buh. 19:​1, 8-10; 20:​20, 21) Gimahal niya pag-ayo ang mga igsoon ug gusto niyang tabangan sila nga magpabiling matinumanon kang Jehova. Ang mga taga-Efeso nga gisulatan ni Pablo naulipon kaniadto sa bakak nga relihiyosong mga pagtulon-an ug mga patuotuo. Sila nailhan sa ilang grabeng imoralidad ug walay kaulaw nga paggawi. Ang bastos nga sinultihan komon kaayo sa ilang mga teatro ug bisan sa ilang relihiyosong mga selebrasyon. (Efe. 5:3) Daghan kanila ang “dili na makaila kon unsay maayo ug daotan,” nga sa literal nagkahulogang “dili na mobatig kasakit.” (Efe. 4:​17-19) Sa wala pa sila makakat-on kon unsa gyoy husto o sayop, ang ilang konsensiya nakubalan na. Tungod niana, si Pablo miingon nga ang “ilang kaisipan naa sa kangitngit ug sila nahimulag sa kinabuhi nga naggikan sa Diyos.” Pero ang uban sa mga taga-Efeso wala magpabilin sa kangitngit. w24.03 20 ¶2, 4; 21 ¶5-6

Dili lalim ang asaynment ni Gideon ingong maghuhukom kay hago kaayo to sa pisikal. Dihang ang mga Midianhon nangikyas panahon sa gabii nga gubat, gigukod sila ni Gideon gikan sa Walog sa Jezreel paingon sa Suba sa Jordan. (Maghu. 7:22) Mihunong ba si Gideon sa Jordan? Wala! Bisag gikapoy siya ug ang iyang 300 ka sundalo, mitabok sila sa suba ug mipadayon sa paggukod. Sa ulahi, ilang naapsan ang mga Midianhon ug gipildi kini. (Maghu. 8:​4-12) Si Gideon misalig nga hatagan siya ni Jehova ug kusog, ug mao gyod nay gihimo ni Jehova. (Maghu. 6:​14, 34) Kas-a, gigukod ni Gideon ug sa iyang mga sundalo ang duha ka Midianhong hari nga tingali nagsakay ug mga kamelyo samtang sila nagdagan lang. (Maghu. 8:​12, 21) Pero sa tabang sa Diyos, naapsan sa mga Israelinhon ang mga kaaway ug nakadaog sila sa gubat. Ang mga ansiyano makasalig pod sa tabang ni Jehova, kinsa “dili kapoyon o maluya.” Hatagan niya silag kusog nga ilang gikinahanglan.—Isa. 40:​28, 29. w23.06 6-7 ¶14, 16

Makabaton tag lig-ong kasingkasing bisag unsa pang pagsulay ang atong maatubang. Busa salig kang Jehova. Matikdi kon sa unsang paagi milampos si Barak kay misalig siya sa direksiyon ni Jehova. Bisag walay taming o bangkaw sa tibuok Israel, gisugo siya ni Jehova nga makig-away batok sa armadong kasundalohan sa Canaan nga gipangunahan ni Sisera. (Maghu. 5:8) Giingnan ni propetang Debora si Barak nga moadto sa patag aron makig-away kang Sisera ug sa iyang 900 ka magkakaro. Bisag nahibalo si Barak nga makabentaha ang mga kaaway nga nagkaro diha sa patag, misunod gihapon siya. Samtang ang mga sundalo milugsong sa Bukid sa Tabor, si Jehova nagpahinabog kusog kaayong ulan. Ang mga karo ni Sisera nalubong sa lapok, ug gihatag ni Jehova kang Barak ang kadaogan. (Maghu. 4:​1-7, 10, 13-16) Sa samang paagi, ihatag ni Jehova kanato ang kadaogan kon mosalig ta niya ug sa direksiyon nga iyang gitagana pinaagi sa iyang organisasyon. w23.07 19 ¶17-18

Importante kaayo ang pailob aron ta maluwas. Sama sa matinumanong mga alagad kaniadto, kinahanglang mapailobon tang maghulat nga tumanon sa Diyos ang iyang mga saad. (Heb. 6:​11, 12) Ang atong situwasyon gipakasama sa Bibliya sa usa ka mag-uuma. (Sant. 5:​7, 8) Ang usa ka mag-uuma magkugi sa pagtanom ug pagbisbis sa iyang mga tinanom, pero wala siya mahibalo kon kanus-a gyod ni motubo. Busa mapailobon siyang maghulat ug mosalig nga makaani ra siya. Kita pod nagkugi sa espirituwal nga mga kalihokan, bisag “wala [ta] mahibalo kon unsang adlawa moabot ang [atong] Ginoo.” (Mat. 24:42) Mapailobon tang maghulat, nga kombinsido nga sa iyang gitakdang panahon, tumanon ni Jehova ang tanan niyang saad. Kon mawad-an tag pailob, basin kapoyan tang maghulat ug anam-anam nga mobiya sa kamatuoran. Posible pod nga mosugod na ta sa pagpangagpas sa mga butang nga tingali makahatag natog temporaryong kalipay. Pero kon mapailobon ta, makalahutay ta hangtod sa kataposan ug maluwas.—Miq. 7:7. w23.08 22 ¶7

Pinaagi sa pagtandi sa tagna sa Daniel 2:​41-43 sa ubang tagna sa basahon sa Daniel ug Pinadayag, makaingon ta nga ang tiil nagrepresentar sa Anglo-Amerikanong alyansa, ang pinakagamhanang mga gobyerno sa kalibotan karon. Bahin niini nga gahom sa kalibotan, si Daniel miingon nga “ang gingharian lig-on sa usa ka bahin ug huyang sa laing bahin.” Nganong huyang kini sa laing bahin? Kay gipahuyang sa ordinaryong mga tawo, nga gisimbolohan sa humok nga kulonon, ang awtoridad sa Anglo-Amerika sa pagpatuman sa mga polisiya niini. Sa deskripsiyon ni Daniel bahin sa estatuwa, makakat-on tag pipila ka importanteng kamatuoran. Una, gipakita sa Anglo-Amerikanong Gahom sa Kalibotan kon unsa kini ka gamhanan. Pananglitan, dako kinig nahimo aron modaog sa Gubat sa Kalibotan I ug II. Pero kini nga gahom sa kalibotan mihuyang ug padayon pang mohuyang tungod sa pagkontrahay sa mga sakop niini. Ikaduha, kini nga alyansa mao ang kataposang gahom sa kalibotan dihang laglagon sa Gingharian sa Diyos ang tanang gobyerno sa tawo. w23.08 10-11 ¶12-13

Naay mga panahon nga naluya si David tungod sa tanang problema ug pagsulay nga iyang giatubang. (Sal. 18:​4, 5) Pero tungod sa gugma ug pag-atiman ni Jehova, nalagsik siya. Gidala ni Jehova ang iyang naluya nga higala sa “lunhaw nga mga sibsibanan” ug “mga pahulayanan nga abundag tubig.” Tungod ana, nabalik ang kusog ni David ug padayon siyang nakaalagad kang Jehova nga malipayon. (Sal. 18:​28-32; 23:2) Karon, nakaatubang pod tag mga pagsulay ug kalisdanan. Pero “tungod sa maunongong gugma ni Jehova,” kita nakalahutay. (Lam. 3:22; Col. 1:11) Kadaghan nameligro ang kinabuhi ni David, ug daghan siyag gamhanang kaaway. Pero mibati siyang luwas tungod sa gugma ni Jehova. Nahibalo si David nga kauban niya kanunay si Jehova sa matag situwasyon, ug nakapalig-on na niya. Gani, siya miawit: “Giluwas ko [ni Jehova] gikan sa tanan nakong gikahadlokan.” (Sal. 34:4) Bisag naay mga panahon nga nahadlok pag-ayo si David, iya ning nadaog kay nahibalo siya nga gimahal siya ni Jehova. w24.01 30 ¶15-17

Pagkat-on sa sayop nga mga desisyon ni Jehoas. Pagkamatay sa hataas nga saserdote nga si Jehoiada, si Jehoas mipilig dili maayong mga higala. (2 Cron. 24:​17, 18) Naminaw siya sa tambag sa mga prinsipe sa Juda nga wala mahigugma kang Jehova. Tingali mouyon ka nga angay gyod unta silang likayan ni Jehoas tungod sa ilang dili maayong impluwensiya. Pero naminaw hinuon si Jehoas nila. Gani dihang gibadlong siya sa iyang ig-agaw nga si Zacarias, gipapatay hinuon niya si Zacarias. (2 Cron. 24:​20, 21; Mat. 23:35) Pagkadaotan sa iyang gihimo! Sa primero maayo siya nga tawo, pero makapaguol kay nahimo siyang apostata ug mipatay pa gyod. Sa ulahi, gipatay siya sa iya mismong mga sulugoon. (2 Cron. 24:​22-25) Lahi gyod unta ang resulta sa iyang kinabuhi kon padayon siyang naminaw kang Jehova ug niadtong nahigugma Kaniya! w23.09 9 ¶6

Nahibalo si Jesus nga kaya ni apostol Pedro nga magpabiling matinumanon. Busa giingnan ni Jesus si Pedro nga ‘dili na mahadlok.’ Ang pagsalig nga gipakita ni Jesus kang Pedro nakapausab gyod sa iyang kinabuhi. Gibiyaan ni Pedro ug sa iyang igsoong si Andres ang ilang negosyo nga pagpangisda ug nahimong bug-os panahong mga sumusunod sa Mesiyas, desisyon nga miresultag daghang panalangin. (Mar. 1:​16-18) Si Pedro daghag nindot kaayo nga mga eksperyensiya tungod sa iyang pagkahimong sumusunod sa Kristo. Nakita niya nga giayo ni Jesus ang mga masakiton, gipalayas ang mga demonyo, ug gibanhaw pa gani ang mga patay. (Mat. 8:​14-17; Mar. 5:​37, 41, 42) Nakita pod ni Pedro ang makapahinganghang panan-awon sa umaabot nga papel ni Jesus ingong Hari sa Gingharian sa Diyos—hitabo nga wala gyod niya malimti sa tibuok niyang kinabuhi. (Mar. 9:​1-8; 2 Ped. 1:​16-18) Dili gyod unta makita ni Pedro kining tanan kon wala pa siya mahimong sumusunod ni Jesus. Seguradong nalipay kaayo siya nga wala niya tugoti ang bisan unsang negatibong pagbati nga makapugong niya sa pagdawat niini nga mga panalangin! w23.09 21 ¶4-5

Sa iyang unang sulat, gigamit ni apostol Pedro ang ekspresyong “init nga gugma.” Kana nga gugma magtabon, dili lang sa pipila ka sala, kondili sa “daghang sala.” (1 Ped. 4:8) Tingali nahinumdoman ni Pedro ang leksiyon bahin sa pagpasaylo nga gitudlo ni Jesus kaniya pipila ka tuig na ang milabay. Niadtong panahona, nagtuo tingali si Pedro nga mapinasayloon na kaayo siya kay andam siyang mopasaylo sa iyang igsoon “hangtod sa 7 ka beses.” Pero si Jesus nagtudlo kaniya—ug kanato—nga magpasaylo “hangtod sa 77 ka beses,” sa ato pa, walay limitasyon. (Mat. 18:21) Kon nalisdan ka sa pagpadapat niini nga tambag, ayawg kaluya! Ang tanang dili hingpit nga alagad ni Jehova maglisod usahay sa pagpasaylo. Ang importante nga maningkamot ka karon nga pasayloon ang imong igsoon ug makigdait kaniya. w23.09 29 ¶12

Sa tiyan sa isda, si Jonas segurado nga paminawon ni Jehova ang iyang mapainubsanon ug mahinulsolong pag-ampo ug nga tabangan siya ni Jehova. Sa ulahi, si Jonas nakabalik sa mala nga yuta, ug andam na siyang modawat ug motuman sa iyang sunod nga asaynment. (Jon. 2:10–3:4) Dihang mag-atubang kag pagsulay, grabe ba kaayo ang imong kabalaka maong maglisod kag sulti sa imong gibati dihang mag-ampo? O gibati ba nimo nga kapoy na kaayo ka para magtuon? Hinumdomi nga nakasabot pag-ayo si Jehova sa imong kahimtang. Busa, bisag simple lang ang imong pag-ampo, makaseguro ka nga ihatag niya kon unsa gyoy imong gikinahanglan. (Efe. 3:20) Kon malisdan ka sa pagbasa ug pagtuon tungod sa pisikal o emosyonal nga kasakit nga imong gibati, sulayig paminaw ang mga audio recording sa Bibliya o sa binase sa Bibliya nga mga publikasyon. Basin makatabang pod nimo ang pagpaminaw sa usa sa atong mga kanta o ang pagtan-awg video sa jw.org. Pinaagi sa pag-ampo kang Jehova ug sa pagpangitag tubag gikan sa iyang espirituwal nga mga tagana, gidapit nimo siya nga palig-onon ka. w23.10 13 ¶6; 14 ¶9

Ang tabernakulo ug ang mga templo nga gitukod sa ulahi didto sa Jerusalem parehog disenyo sa sulod. Naa ni duha ka lawak—ang “Balaang Dapit” ug ang “Labing Balaan”—ug naay binordahan nga kortina nga nagsilbing dibisyon niini. (Heb. 9:​2-5; Ex. 26:​31-33) Sa sulod sa Balaan, naay tangkawan nga bulawan, halaran sa pagsunog ug insenso, ug lamesa nga naay halad nga tinapay. Ang “dinihogang mga saserdote” lang ang gitugotan nga mosulod sa Balaan aron himoon ang ilang sagradong buluhaton. (Num. 3:​3, 7, 10) Naa sa Labing Balaan ang bulawang kaban sa pakigsaad nga nagrepresentar sa presensiya ni Jehova. (Ex. 25:​21, 22) Ang hataas nga saserdote lang ang gitugotan nga mosulod sa Labing Balaan agi sa kortina. (Lev. 16:​2, 17) Iya nang himoon sa Adlaw sa Pagtabon sa Sala. Nianang adlawa, mosulod siya dala ang dugo sa mga hayop alang sa pagtabon sa iyang mga sala ug nianang sa tibuok nasod. Sa ulahi, giklaro ni Jehova kon unsa gyoy girepresentahan niini nga mga bahin sa tabernakulo.—Heb. 9:​6, 7. w23.10 27 ¶12

Sa Pulong sa Diyos, balikbalik natong mabasa ang sugo nga higugmaon ang usag usa. (Juan 15:12; Roma 13:8; 1 Tes. 4:9; 1 Ped. 1:22; 1 Juan 4:11) Pero ang gugma maoy pagbati sa sulod nato, ug walay tawo nga makakita sa sulod sa atong kasingkasing. Busa sa unsang paagi mapakita nato ang atong gugma sa usag usa? Pinaagi sa atong sinultihan ug binuhatan. Naay lainlaing paagi nga mapakita nato nga gimahal nato ang mga igsoon. Niay pipila ka pananglitan: “Sulti mog tinuod sa usag usa.” (Zac. 8:16) “Pagdinaitay kamo sa usag usa.” (Mar. 9:50) “Manguna sa pagpasidungog sa usag usa.” (Roma 12:10) “Dawata ang usag usa.” (Roma 15:7) “Padayon . . . nga magpinasayloay.” (Col. 3:13) “Padayon mong magtinabangay sa inyong bug-at nga mga palas-anon.” (Gal. 6:2) “Padayon sa paghupay sa usag usa.” (1 Tes. 4:18) “Padayon mong . . . maglig-onay.” (1 Tes. 5:11) “Pag-ampo alang sa usag usa.”—Sant. 5:16. w23.11 9 ¶7-8

Kada adlaw, mohimo tag mga desisyon nga nagkinahanglag lig-ong pagtuo. Pananglitan, mohimo tag mga desisyon bahin sa pagpilig mga kauban, kalingawan, edukasyon, kaminyoon, mga anak, ug trabaho. Maayong pangutan-on nato ang atong kaugalingon: ‘Ang ako bang mga desisyon nagpakita nga nagtuo gyod ko nga temporaryo ra ning sistemaha ug hapit na ning pulihan sa bag-ong kalibotan sa Diyos? O ang ako bang mga desisyon naimpluwensiyahan sa mga tawo nga nagtuo nga ang kamatayon mao ang kataposan sa tanan?’ (Mat. 6:​19, 20; Luc. 12:​16-21) Makahimo tag maayo kaayong mga desisyon kon palig-onon nato ang atong pagtuo nga hapit nang moabot ang bag-ong kalibotan. Makaatubang pod tag mga kalisdanan nga nagkinahanglag lig-ong pagtuo. Tingali makaatubang tag mga paglutos, grabeng sakit, o ubang butang nga makapaluya nato. Sa primero, lig-on pa tingali tag determinasyon nga molahutay. Pero kon magdugay ang mga pagsulay—nga maoy sagad mahitabo—magkinahanglan gyod tag lig-ong pagtuo aron makalahutay ug padayong makaalagad kang Jehova nga malipayon.—1 Ped. 1:​6, 7. w23.04 27 ¶4-5

Gidahom ni Jehova nga molihok ta uyon sa atong mga pag-ampo. Pananglitan, ang usa ka brader mohangyo tingali kang Jehova nga tabangan siya nga maka-day off sa iyang trabaho aron makatambong sa rehiyonal nga kombensiyon. Unsaon kaha pagtubag ni Jehova ang iyang pag-ampo? Puwede niyang hatagag kaisog ang brader sa pagduol sa iyang amo. Pero ang brader kinahanglan pong molihok pinaagi sa paghangyo sa iyang amo. Basin kinahanglan pa gani siyang balikbalik nga mohangyo. O kaha makigbaylo siyag eskedyul sa iyang kauban sa trabaho o mobakasyon nga walay suweldo. Gidahom ni Jehova nga balikbalik natong iampo ang atong mga gikabalak-an. Gipasiugda ni Jesus nga ang uban natong hangyo dili dayon ihatag ni Jehova. (Luc. 11:9) Busa ayawg surender! Padayon sa pag-ampo nga kinasingkasing. (Luc. 18:​1-7) Kon ato nang himoon, atong gipakita kang Jehova nga seryoso gyod ta sa atong gihangyo. Ato pong gipakita ang atong pagtuo nga kaya gyod ta niyang tabangan. w23.11 22 ¶10-11

Si Jehova nagsaad sa iyang higala nga si Abraham nga ang tanang nasod sa yuta mapanalanginan pinaagi sa iyang kaliwat. (Gen. 15:5; 22:18) Kay si Abraham naay lig-ong pagtuo sa Diyos, kombinsido siya nga matuman ang saad sa Diyos. Bisan pa ana, dihang si Abraham 100 na ang edad ug ang iyang asawa 90, ang maong matinumanong magtiayon wala pa gihapoy anak. (Gen. 21:​1-7) Pero ang Bibliya nag-ingon: “[Si Abraham] milaom ug mituo nga mahimo siyang amahan sa daghang kanasoran. . . . Mituo siya sa gisulti kaniya.” (Roma 4:18) Kabalo ta nga natuman gyod ang gilaoman ni Abraham. Natawo ang anak nga dugay na niyang gipangandoy, si Isaac. Nganong kombinsido si Abraham nga tumanon ni Jehova ang iyang gisaad? Kay si Abraham naay suod nga relasyon kang Jehova, “kombinsido gayod siya nga matuman [ang] gisaad” sa Diyos. (Roma 4:21) Nabatonan ni Abraham ang pag-uyon ni Jehova ug gitawag siya nga matarong tungod sa iyang pagtuo.—Sant. 2:23. w23.12 8 ¶1-2

Ang kasaligan nga batan-ong lalaki magkugi sa pag-atiman sa iyang mga responsibilidad. Konsideraha ang hingpit nga ehemplo ni Jesus. Siya dili gyod iresponsable. Iyang gituman ang mga asaynment nga gihatag ni Jehova, bisan dihang lisod kining himoon. Gimahal niya ang mga tawo—ilabina ang iyang mga tinun-an—ug kinabubut-on niyang gihatag ang iyang kinabuhi para nila. (Juan 13:1) Masundog nimo si Jesus kon maningkamot ka nga himoon ang bisan unsang asaynment nga gihatag kanimo. Kon dili ka segurado kon unsaon ni paghimo, magmapainubsanon ug pangayog tabang sa hamtong nga mga brader. Ayawg kakontento nga basta mahimo lang nimo ang imong asaynment; ihatag ang imong pinakamaayo. (Roma 12:11) Humana ang imong asaynment ug himoa ni “para kang Jehova, ug dili para sa mga tawo.” (Col. 3:23) Siyempre, dili ka hingpit, busa magmapainubsanon ug angkona ang mga sayop nga imong mahimo.—Prov. 11:2. w23.12 26 ¶8

Malipay kaayo ta dihang mabawtismohan ta ug mahimong bahin sa pamilya ni Jehova. Kadtong nakabaton nianang talagsaong pribilehiyo mouyon gyod sa giingon ni salmistang David kang Jehova: “Malipayon ang tawo nga imong pilion ug paduolon aron mopuyo sa imong mga hawanan.” (Sal. 65:4) Dili kay si bisan kinsa lang ang papuy-on ni Jehova sa iyang hawanan. Makigsuod lang siya niadtong naningkamot nga makabaton ug suod nga relasyon kaniya. (Sant. 4:8) Dihang magpahinungod ka kang Jehova ug magpabawtismo, makaseguro ka nga iyang “ibubo [kanimo] ang panalangin hangtod nga wala nay makulang.” (Mal. 3:10; Jer. 17:8) Ang bawtismo sinugdanan pa lang. Maningkamot ka nga tumanon ang imong panaad sa pagpahinungod, bisag makaatubang kag mga tentasyon o pagsulay. (Eccl. 5:​4, 5) Ingong tinun-an ni Jesus, sundon nimo pag-ayo ang iyang ehemplo ug mga sugo kutob sa imong maarangan.—Mat. 28:​19, 20; 1 Ped. 2:21. w24.03 8 ¶1-3

Komosta kon dili mo malingaw nga makig-uban sa inyong kapikas? Unsay inyong mahimo? Konsideraha ang usa ka daob. Dili ni kalit nga modilaab. Kinahanglan nga anam-anam ning sugnoran. Sa primero, gagmay ra ang imong isugnod ug sa ngadtongadto dagko na. Sa samang paagi, sulayi nga mag-uban mo kada adlaw bisag kadiyot lang. Seguroa nga ang inyong himoon parehas mong ganahan. (Sant. 3:18) Kon magsugod mo sa ginagmayng butang, tingali anam-anam nga motubog balik ang inyong gugma. Importante kaayo ang pagtahod diha sa kaminyoon. Sama nig oxygen nga makapasiga pag-ayo sa daob. Kon walay oxygen, dali rang mapalong ang kalayo. Kon wala poy pagtahod, dali rang mobugnaw ang gugma sa magtiayon. Sa laing bahin, kon ang bana ug asawa maningkamot nga magpakitag pagtahod sa usag usa, padayong modako ang ilang gugma. Pero hinumdomi nga bisag para nimo nagpakita kag pagtahod, ang pangutana, gibati ba sa imong kapikas nga imo siyang gitahod? w23.05 22 ¶9; 23 ¶14; 24 ¶15

Sa Bibliya, ang matinumanong mga alagad sa Diyos naghisgot sa mga panahon nga sila nahadlok ug nangurog tungod sa ilang mga kaaway o sa ubang presyur nga ilang giatubang. (Sal. 18:4; 55:​1, 5) Sa susama, posibleng makaeksperyensiya pod tag pagsupak diha sa eskuwelahan, trabahoan, o gikan sa atong pamilya o sa gobyerno. Basin mameligro pa gani ang atong kinabuhi tungod sa sakit. Nianang mga panahona, mobati tingali ta nga mora tag gamayng bata nga walay mahimo. Unsaon ta pagtabang ni Jehova sa ingon niini nga mga kahimtang? Siya maghupay kanato. Busa kada adlaw, paggahin ug panahon uban kang Jehova pinaagi sa pag-ampo kaniya ug pagbasa sa iyang Pulong. (Sal. 77:​1, 12-14) Kon imo nang himoon, si Jehova dayon ang una nimong duolon dihang ma-stress ka. Isulti ang imong mga gikahadlokan ug gikabalak-an sa imong langitnong Amahan. Tugoti siya sa pagpakig-estorya ug sa paghupay kanimo pinaagi sa Kasulatan.—Sal. 119:28. w24.01 24-25 ¶14-16

Importante kaayo nga naa kay tinguha nga kab-oton ang imong espirituwal nga mga tumong. Kon naa kay tinguha, maningkamot gyod ka sa pagkab-ot niana. Ug kon kusog ang imong tinguha, mas dakog purohan nga molampos ka. Busa unsay imong mahimo aron mas modako ang imong tinguha nga kab-oton ang imong tumong? Iampo kana. Pinaagi sa iyang espiritu, tabangan ka ni Jehova nga modako ang imong tinguha nga kab-oton ang imong tumong. Usahay, mohimo tag tumong kay kabalo ta nga mao nay angay ug maayong buhaton. Pero basig wala kaayo tay tinguha nga kab-oton na. Pamalandonga kon unsay gihimo ni Jehova para nimo. (Sal. 143:5) Gipamalandong ni apostol Pablo ang dili hitupngang pagkamaayo nga gipakita ni Jehova kaniya, ug kana nagpalihok niya nga magkugi sa pag-alagad kang Jehova. (1 Cor. 15:​9, 10; 1 Tim. 1:​12-14) Kon pirme pod nimong pamalandongon ang gihimo ni Jehova para nimo, mas modako ang imong tinguha nga kab-oton ang imong tumong.—Sal. 116:12. w23.05 27 ¶3-5

Mapalipay nato ang atong langitnong Amahan dihang dayegon nato ang iyang ngalan. (Sal. 119:108) Pero nagpasabot ba ni nga ang Labing Gamhanang Diyos parehas sa dili hingpit nga mga tawo nga nagkinahanglag pagdayeg aron madugangan ang ilang kompiyansa sa kaugalingon? Wala. Dihang dayegon nato ang atong langitnong Amahan, makatabang ta sa pagpamatuod nga bakak ang akusasyon ni Satanas bahin sa matag usa kanato. Nangangkon si Satanas nga walay tawo nga maunongong modepensa sa ngalan sa Diyos. Miingon siya nga walay tawo nga magmatinumanon sa Diyos kon makaatubang ug pagsulay, ug nga kitang tanan motalikod sa Diyos kon makita nato nga mao nay makahatag natog bentaha. (Job 1:​9-11; 2:4) Pero gipamatud-an sa matinumanong si Job nga bakakon si Satanas. Kana pod bay imong buhaton? Ang matag usa nato naay pribilehiyo nga maunongong depensahan ang ngalan sa atong Amahan ug lipayon siya pinaagi sa matinumanong pag-alagad kaniya. (Prov. 27:11) Dako gyod na nga pribilehiyo! w24.02 8-9 ¶3-5

Human sa panahon ni Moises ug Josue, migamit si Jehova ug mga maghuhukom aron giyahan ang iyang katawhan. Dayon, panahon sa mga hari, migamit si Jehova ug mga propeta sa paggiya sa iyang katawhan. Ang matinumanong mga hari misunod sa tambag sa mga propeta. Pananglitan, mapainubsanong gidawat ni Haring David ang pagtul-id ni propetang Natan. (2 Sam. 12:​7, 13; 1 Cron. 17:​3, 4) Si Haring Jehosapat misunod sa giya nga gihatag ni propetang Jahaziel ug gidasig niya ang katawhan sa Juda nga ‘tuohan ang mga propeta’ sa Diyos. (2 Cron. 20:​14, 15) Panahon sa lisod kaayong kahimtang, si Haring Ezequias miduol kang propetang Isaias. (Isa. 37:​1-6) Dihang ang mga hari misunod sa paggiya ni Jehova, sila gipanalanginan ug ang nasod napanalipdan. (2 Cron. 20:​29, 30; 32:22) Klaro kaayo nga gigamit ni Jehova ang iyang mga propeta sa paggiya sa iyang katawhan. w24.02 21 ¶8

Gusto ni Satanas nga makig-uban ta sa mga tawo nga wala mahigugma kang Jehova aron malisdan ta sa pagsunod sa Iyang mga sukdanan. Karon puwede tang makig-uban sa mga tawo dili lang sa personal kondili bisan diha sa social media. Kinahanglan natong suklan ang panghunahuna sa kalibotan nga dalawaton ra ang imoral nga binuhatan. Nahibalo ta kon unsay husto. (Efe. 4:​19, 20) Maayong pangutan-on nato ang atong kaugalingon: ‘Naningkamot ba ko nga likayan ang tanang wala kinahanglana nga pagpakig-uban sa mga katrabaho, klasmet, ug uban pa nga wala magtahod sa matarong nga mga sukdanan ni Jehova? Gisunod ba gyod nako ang mga sukdanan ni Jehova bisag moingon ang uban nga sirado ra kaayo kog hunahuna?’ Sumala sa gipakita sa 2 Timoteo 2:​20-22, kinahanglan pod tang mag-amping sa pagpilig suod nga mga higala diha sa kongregasyon. Atong hinumdoman nga naa tingali uban nga dili makatabang nato nga magpabiling matinumanon sa pag-alagad kang Jehova. w24.03 22-23 ¶11-12

Nakasulay na ba kag imagine bahin kang Jehova? Bisag dili nato makita si Jehova, gi-describe siya sa Bibliya sa lainlaing paagi. Si Jehova gitawag nga “adlaw ug taming” ug “nagalaglag nga kalayo.” (Sal. 84:11; Heb. 12:29) Ang iyang presensiya samag batong sapiro, naggilakgilak nga metal, ug hayag nga rainbow. (Ezeq. 1:​26-28) Kay dili nato makita si Jehova, lisod tingaling tuohan nga gimahal ta niya. Para sa uban, morag imposible silang higugmaon ni Jehova tungod sa ilang naeksperyensiyahan. Nasabtan ni Jehova ang maong mga pagbati ug kon unsay epekto niini kanato. Aron makatuo ta nga gimahal ta niya, gipaila niya ang iyang nindot nga personalidad diha sa iyang Pulong. Ang usa ka pulong nga haom kaayong nag-describe kang Jehova maoy gugma. Ang Bibliya nag-ingon nga “ang Diyos gugma.” (1 Juan 4:8) Ang tanan niyang gihimo maoy tungod sa iyang gugma. Dako kaayo ang gugma sa Diyos kay iya ning gipakita bisan niadtong wala mahigugma niya.—Mat. 5:​44, 45. w24.01 26 ¶1-3

Gitudlo ni Jehova si Moises sa pagpanguna sa mga Israelinhon pagawas sa Ehipto, ug ingong klarong ebidensiya naghatag Siyag haligi nga panganod sa adlaw ug haligi nga kalayo sa gabii. (Ex. 13:21) Gisundan ni Moises ang haligi, nga maoy nagtultol niya ug sa mga Israelinhon sa Pulang Dagat. Nalisang ang katawhan dihang nakita nila nga hapit na silang maapsan sa naggukod nga kasundalohan sa Ehipto ug abi nilag natanggong na sila sa dagat. Wala sila mahibalo nga gituyo ni Jehova nga dad-on ang iyang katawhan didto pinaagi kang Moises. (Ex. 14:2) Dayon giluwas sila sa Diyos sa makapahingangha kaayong paagi. (Ex. 14:​26-28) Sa misunod nga 40 ka tuig, si Moises padayong misalig sa haligi nga panganod sa paggiya sa katawhan sa Diyos latas sa kamingawan. (Ex. 33:​7, 9, 10) Gikan sa haligi, si Jehova nakig-estorya kang Moises, dayon gisulti ni Moises ang mga direksiyon ni Jehova ngadto sa katawhan. Ang mga Israelinhon daghan gyog nakitang ebidensiya nga gigamit ni Jehova si Moises sa paggiya kanila. w24.02 21 ¶4-5