Hulyo

Ang tanang gisulti ug gihimo ni Jesus, apil ang iyang mga milagro, nagpakita kon unsa gyoy panghunahuna ug pagbati sa iyang Amahan. (Juan 14:9) Unsay atong makat-onan sa mga milagro ni Jesus? Gimahal ta pag-ayo ni Jesus ug sa iyang Amahan. Sa dinhi pa si Jesus sa yuta, iyang gipakita nga gimahal gyod niya ang mga tawo pinaagi sa paggamit sa iyang gahom aron tabangan ang mga nag-antos. Pananglitan, dihay duha ka buta nga nagsigeg singgit aron mangayo niyag tabang. (Mat. 20:​30-34) Matikdi nga si Jesus “naluoy” nila ug dayon giayo sila. Ang Gregong pulong nga gihubad dinhi ug “naluoy” nagpasabot ug grabeng kaluoy nga bation sa usa ka tawo sulod mismo sa iyang lawas. Kana nga kaluoy, nga usa ka ekspresyon sa gugma, mao pod ang nagpalihok kang Jesus nga pakan-on ang mga gigutom ug ayohon ang usa ka sanlahon. (Mat. 15:32; Mar. 1:41) Makaseguro ta nga si Jehova, ang Diyos nga may “dakong kaluoy,” ug ang iyang Anak nagmahal pag-ayo nato ug nasakitan sila sa atong pag-antos. (Luc. 1:78; 1 Ped. 5:7) Naghinamhinam gyod sila nga taposon ang tanang pag-antos sa mga tawo! w23.04 3 ¶4-5

Mohimo tag praktikal nga mga paagi aron malikayan ang pagbasa ug pagpaminaw sa sayop nga mga ideya nga komon sa kalibotan ni Satanas. Hinuon, pun-on nato ang atong hunahuna ug hinlong mga butang pinaagi sa pagbasa ug pagtuon sa Bibliya. Ang pagtambong sa tigom ug pagsangyaw manalipod sab sa atong hunahuna. Ug si Jehova nagsaad nga dili niya tugotan nga tentalon ta nga labaw sa atong maantos. (1 Cor. 10:​12, 13) Kitang tanan kinahanglan gyong maningkamot sa pag-ampo nga makapabiling matinumanon kang Jehova niining kataposang mga adlaw. Gusto ni Jehova nga atong ‘ibubo ang atong kasingkasing kaniya’ dihang mag-ampo. (Sal. 62:8) Dayega si Jehova ug pasalamati siya sa tanan niyang gihimo. Hangyoa siya nga hatagan kag kaisog sa pagsangyaw. Pangayog tabang niya nga makaya nimo ang imong mga problema ug masuklan ang bisan unsang tentasyon nga imong giatubang. Ayaw tugoti ang bisan unsa o si bisan kinsa nga makapugong nimo sa pag-ampo kanunay kang Jehova. w23.05 7 ¶17-18

Nganong motambong ta sa mga tigom? Una, aron madayeg si Jehova. (Sal. 26:12; 111:1) Motambong pod ta sa mga tigom aron madasig nato ang usag usa niining lisod nga mga panahon. (1 Tes. 5:11) Dihang moisa ta sa atong kamot ug mokomento, mahimo nato ning duha ka butang. Pero naa tingali makapugong nato sa paghatag ug komento. Basin kulbaan tang mokomento, o kaha gusto kaayo tang mokomento pero panagsa ra tang matawag. Unsay makatabang nato? Si apostol Pablo miingon nga angay tang magpokus ‘sa pagdasig sa usag usa.’ Dihang hinumdoman nato nga madasig ang mga nanambong bisan sa atong simpleng komento nga nagpakita sa atong pagtuo, madugangan ang atong kompiyansa nga mokomento. Ug kon dili ta pirmeng matawag, malipay gihapon ta nga ang uban nakakomento.—1 Ped. 3:8. w23.04 20 ¶1-3

Dunay pahibalo gikan sa hari! Ang mga Hudiyo, nga nabihag sa Babilonya sulod sa mga 70 ka tuig, puwede nang mobalik sa ilang yutang natawhan, ang Israel. (Esd. 1:​2-4) Si Jehova gyod ang nagpaposible niini kay sagad, dili buhian sa Babilonya ang ilang mga binihag. (Isa. 14:​4, 17) Pero ang Babilonya napukan na, ug ang bag-ong hari miingon nga ang mga Hudiyo puwede nang mobiya. Ang matag Hudiyo, ilabina ang mga ulo sa pamilya, kinahanglang mohimog desisyon: mobiya ba sila sa Babilonya o magpabilin. Seguradong dili to sayon nga desisyon. Daghan tingali ang tigulang na kaayo ug maglisod nag biyahe. Ug kay kadaghanan sa mga Hudiyo natawo man sa Babilonya, kini na ang ilang giisip nga puy-anan. Para nila, ang Israel yuta lang sa ilang katigulangan. Posible pod nga ang ubang Hudiyo nadato na sa Babilonya, maong maglisod tingali silag biya sa ilang komportableng mga balay o sa ilang mga negosyo aron lang mopuyo sa lugar nga dili pamilyar nila. w23.05 14 ¶1-2

Ang Pulong sa Diyos nagdasig nato nga padayong ugmaron ang paglahutay, kaluoy, ug gugma. Ang Lucas 21:19 nag-ingon: “Pinaagi sa inyong paglahutay, maluwas ang inyong kinabuhi.” Ang 1 Pedro 3:8 nag-ingon: ‘Kamong tanan kinahanglang magpakitag kaluoy.’ Ug ang 1 Tesalonica 4:​9, 10 nag-ingon: “Gitudloan na mo sa Diyos nga maghigugmaay. . . . Apan giawhag mo namo, mga igsoon, nga padayon kining himoon nga mas bug-os pa.” Kini nga mga teksto gisulat para sa mga Kristohanon kaniadto, kinsa nagpakita nag paglahutay, kaluoy, ug gugma. Pero kinahanglang padayon nilang ugmaron kini nga mga hiyas. Angay pod nato nang himoon. Aron matabangan ka, konsideraha kon giunsa pagpakita sa mga Kristohanon sa unang siglo kini nga mga hiyas. Dayon susiha kon unsaon nimo sila pagsundog aron maandam ka para sa dakong kasakitan. Dayon inig-abot sa dakong kasakitan, nahibalo na ka kon unsaon paglahutay ug mas determinado ka nga padayong molahutay. w23.07 3 ¶4, 8

Dinihogan man ta o apil sa “ubang mga karnero,” kinahanglang magpabilin ta sa “Dalan sa Pagkabalaan.” Pinaagi niini, makapadayon ta sa pag-alagad kang Jehova ug madawat nato ang mga panalangin sa Gingharian sa umaabot. (Juan 10:16) Sukad sa 1919 C.E., minilyong lalaki, babaye, ug bata ang mibiya sa Bantogang Babilonya, ang imperyo sa bakak nga relihiyon, ug misugod pagsubay nianang simboliko nga dalan. Dihang mibiya ang mga Hudiyo kaniadto sa Babilonya, giseguro ni Jehova nga walay makababag nila. (Isa. 57:14) Komosta sa modernong panahon? Gatosan ka tuig una pa ang 1919, gigamit ni Jehova ang mga tawo nga may kahadlok niya sa paghawan sa dalan pagawas sa Bantogang Babilonya. (Itandi ang Isaias 40:3.) Ilang giandam ang espirituwal nga dalan, ang “Dalan sa Pagkabalaan,” aron nga sa ulahi ang mga tawo nga maayog kasingkasing makabiya sa Bantogang Babilonya ug makasulod sa espirituwal nga paraiso, diin napasig-uli na ang putling pagsimba kang Jehova. w23.05 15-16 ¶8-9

Gusto ni Jehova nga moalagad ta niya nga malipayon ug kinabubut-on. (2 Cor. 9:7) Busa angay ba tang maningkamot nga kab-oton ang atong espirituwal nga tumong kon wala tay gana? Konsideraha ang pananglitan ni apostol Pablo. Siya miingon: “Gidisiplina pag-ayo nako ang akong lawas ug gihimo kining samag ulipon.” (1 Cor. 9:​25-27, footnote) Gipugos ni Pablo ang iyang kaugalingon nga himoon kon unsay husto, bisan sa mga panahon nga dili tingali kini ang gusto niyang buhaton. Nalipay ba si Jehova sa pag-alagad ni Pablo? Oo! Ug gipanalanginan ni Jehova ang iyang mga paningkamot. (2 Tim. 4:​7, 8) Sa susama, malipay si Jehova kon makita niya nga naningkamot ta nga makab-ot ang atong tumong bisan sa mga panahon nga wala tay gana. Malipay siya kay bisag usahay dili tingali ta ganahan nga himoon kana nga kalihokan, nahibalo siya nga ato nang gihimo tungod sa atong gugma kaniya. Sama nga gipanalanginan ni Jehova si Pablo, panalanginan pod ta Niya tungod sa atong mga paningkamot. (Sal. 126:5) Ug dihang maeksperyensiyahan nato ang panalangin ni Jehova, basig ganahan na ta nga kab-oton ang atong tumong. w23.05 29 ¶9-10

Gipakasama ni apostol Pablo kadtong dili maluwas sa adlaw ni Jehova sa mga tawo nga nangatulog. Wala sila mahibalo sa nagakahitabo sa ilang palibot o kon unsang orasa na. Busa dili sila makamatikod sa importanteng mga hitabo o makahimog aksiyon bahin niana. Kadaghanan sa mga tawo karon tulog sa espirituwal. (Roma 11:8) Gibalewala nila ang ebidensiya nga nagkinabuhi na ta sa “kataposang mga adlaw” ug hapit nang moabot ang dakong kasakitan. (2 Ped. 3:​3, 4) Pero nahibalo ta nga ang tambag nga magpabiling nagmata importante kaayo samtang mas nagkaduol ang adlaw ni Jehova. (1 Tes. 5:6) Busa angay tang magpabiling kalmado ug balanseg panghunahuna. Ngano? Aron dili ta madala sa mga isyu nga gidebatehan sa mga tawo karon o sa politika. Samtang magkaduol ang adlaw ni Jehova, mosamot pod ang presyur nga papilion ta kon asa ta modapig. Pero dili ta angayng mabalaka kon unsay atong himoon. Tabangan ta sa balaang espiritu sa Diyos nga makabaton ug kalmado ug balanseng panghunahuna aron makahimo tag maayong mga desisyon.—Luc. 12:​11, 12. w23.06 10 ¶6-7

Unsay imong mahunahunaan dihang makadungog ka sa ngalang Samson? Makahunahuna tingali kag tawong kusgan kaayo. Tinuod na. Pero si Samson nakahimog sayop nga desisyon, nga pait kaayog mga resulta. Bisan pa niana, nagpokus si Jehova sa katibuk-ang rekord sa pagkamatinumanon ni Samson, ug Iya ning gipasulat sa Bibliya para sa atong kaayohan. Gigamit ni Jehova si Samson sa paghimog makapahinganghang mga butang aron tabangan ang Iyang piniling katawhan, ang Israel. Gatosan ka tuig human mamatay si Samson, gigiyahan ni Jehova si apostol Pablo nga iapil paglista ang ngalan ni Samson sa mga lalaki nga nagpakitag talagsaong pagtuo. (Heb. 11:​32-34) Madasig gyod ta sa ehemplo ni Samson. Misalig siya kang Jehova, bisan sa lisod nga mga kahimtang. Makakat-on tag praktikal nga mga leksiyon gikan sa iyang ehemplo. w23.09 2 ¶1-2

Mapalig-on nato ang atong determinasyon nga molahutay kon kanunay ug kinasingkasing natong isulti kang Jehova ang atong mga gikabalak-an. (1 Tes. 5:17) Tingali wala kay giatubang nga grabeng pagsulay karon. Pero mangayo ba gihapon kag giya ni Jehova dihang mahiubos ka, maglibog, o wala mahibalo kon unsay buhaton? Kon regular kang mangayog tabang sa Diyos sa imong ginagmay nga mga problema karon, dili na ka magduhaduha nga mangayo niyag tabang dihang makaatubang kag dagkong mga problema sa umaabot. Pinaagi ana, mahimo kang mas kombinsido nga nahibalo gyod siya kon kanus-a ug kon unsaon ka niya pagtabang. (Sal. 27:​1, 3) Mas dakog purohan nga makalahutay ta sa umaabot nga dakong kasakitan kon molahutay ta sa mga pagsulay karon. (Roma 5:3) Nganong makaingon ta ana? Daghang igsoon ang miingon nga dihang nakalahutay sila sa usa ka pagsulay, kana nakatabang nila nga malahutay ang sunod nga pagsulay. Ang ilang paglahutay nakapalig-on sa ilang pagtuo nga si Jehova andam ug gusto kaayong motabang. Dayon, kana nga pagtuo nakatabang nila nga malahutay ang sunod nga pagsulay.—Sant. 1:​2-4. w23.07 3 ¶7-8

Ang pagkamapainubsanon ug pagkamaluluy-on ni Jehova nagpalihok niya nga mahimong makataronganon. Pananglitan, nakita ang pagkamapainubsanon ni Jehova dihang hapit na niyang laglagon ang daotang mga tawo sa Sodoma. Pinaagi sa iyang mga anghel, gisugo ni Jehova ang matarong nga si Lot nga moikyas ngadto sa kabukiran. Nahadlok si Lot nga moadto didto. Busa mihangyo si Lot nga tugotan siya ug ang iyang pamilya nga moadto sa Zoar, usa ka gamayng lungsod nga apil unta sa laglagon ni Jehova. Puwede untang sultihan ni Jehova si Lot nga kinahanglang mosunod gyod siya sa Iyang instruksiyon. Pero dili kanay gihimo ni Jehova. Hinuon, misugot siya sa hangyo ni Lot, bisag nagpasabot to nga dili niya apilog laglag ang Zoar. (Gen. 19:​18-22) Gatosan ka tuig sa ulahi, si Jehova nagpakitag kaluoy sa mga taga-Nineve. Iyang gipadala si propetang Jonas aron magpasidaan nga hapit nang laglagon ang siyudad ug ang daotang mga tawo nga nagpuyo niini. Pero dihang naghinulsol ang mga taga-Nineve, naluoy si Jehova nila ug wala niya laglaga ang siyudad.—Jon. 3:​1, 10; 4:​10, 11. w23.07 21 ¶5

Unsay atong makat-onan kang Jehoas? Sama siyag kahoy nga mabaw ra ang pagkagamot sa yuta ug nagdepende lang sa tukod. Dihang nawala ang tukod—si Jehoiada—ug mihuros ang hangin sa apostasya, si Jehoas natumba. Kini klarong nagpakita nga ang atong kahadlok sa Diyos dili angayng nakadepende lang sa maayong impluwensiya sa atong isigka-Kristohanon, apil na sa atong pamilya. Aron magpabilin tang lig-on sa espirituwal, kinahanglang palig-onon nato ang atong gugma ug kahadlok sa Diyos pinaagi sa regular nga pagtuon, pagpamalandong, ug pag-ampo. (Jer. 17:​7, 8; Col. 2:​6, 7) Si Jehova wala mangayo ug labaw pa sa atong maarangan. Mabasa sa Ecclesiastes 12:13 kon unsay iyang gipangayo kanato: “Kahadloki ang matuod nga Diyos ug tumana ang iyang mga sugo, kay kini ang tibuok nga obligasyon sa tawo.” Kon naa tay kahadlok sa Diyos, makalahutay ta sa mga pagsulay sa umaabot ug makapabiling lig-on. Wala gyoy bisan unsa nga makabungkag sa atong relasyon kang Jehova. w23.06 19 ¶17-19

Ang garantiya sa Diyos nagsugod niining mga pulonga: “Ang Usa nga naglingkod sa trono miingon.” (Pin. 21:5a) Espesyal ning mga pulonga kay kini ang usa sa tulo lang ka higayon sa basahon sa Pinadayag nga si Jehova nagsulti diha sa panan-awon. Busa kini nga garantiya wala ihatag pinaagi sa usa ka gamhanang anghel ug bisan sa gibanhawng si Jesus; kini gikan mismo kang Jehova! Kini nagpakita nga kasaligan gyod ang sunod niyang gisulti. Ngano? Kay si Jehova “dili gyod mamakak.” (Tito 1:2) Busa makasalig gyod ta sa giingon sa Pinadayag 21:​5, 6. Konsideraha ang pulong “Tan-awa!” Ang Gregong pulong nga gihubad ug “tan-awa!” balikbalik nga gigamit sa basahon sa Pinadayag. Unsay sunod nga gisulti sa Diyos? Siya miingon: “Ginabag-o nako ang tanang butang.” Tinuod, sa umaabot pa himoon ni Jehova kini nga mga kausaban, pero kay segurado man siya nga matuman ang iyang saad, iya kining gisulti nga sama bag nagakahitabo na kini.—Isa. 46:10. w23.11 3-4 ¶7-8

Si apostol Pedro nalisdan sa pagdaog sa iyang mga kahuyangan. Konsideraha ang pipila ka pananglitan. Dihang gisulti ni Jesus kon sa unsang paagi siya mag-antos ug mamatay ingong katumanan sa tagna sa Bibliya, gibadlong siya ni Pedro. (Mar. 8:​31-33) Balikbalik pod nga naglalis si Pedro ug ang ubang apostoles kon kinsay labaw nila. (Mar. 9:​33, 34) Ug sa gabii una mamatay si Jesus, gitigbas ni Pedro ang dalunggan sa usa ka ulipon. (Juan 18:10) Niana pong gabhiona, nagpadaog si Pedro sa kahadlok ug katulo niya gilimod ang iyang higala nga si Jesus. (Mar. 14:​66-72) Tungod ana, si Pedro mihilak pag-ayo. Si Jesus wala mawad-ig paglaom sa iyang naluya nga apostol. Human mabanhaw si Jesus, gihatagan niyag kahigayonan si Pedro nga ipakita ang iyang gugma kaniya. Gidapit ni Jesus si Pedro nga mapainubsanong mag-alagad ingong magbalantay sa iyang mga karnero. (Juan 21:​15-17) Gidawat kana ni Pedro. Busa didto siya sa Jerusalem sa adlaw sa Pentekostes, ug apil siya sa mga unang gidihogan sa balaang espiritu. w23.09 22 ¶6-7

Gidasig ni apostol Pedro ang iyang mga isigkaansiyano: “Bantayi ang panon sa Diyos.” (1 Ped. 5:​1-4) Kon ansiyano ka, nahibalo mi nga gimahal nimo ang mga igsoon ug gusto nimong atimanon sila. Pero usahay, bation tingali nimo nga tungod sa imong ka-busy o kakapoy, dili na nimo matuman ang maong responsibilidad. Unsay imong mahimo? Isulti kang Jehova ang imong mga kabalaka. Si Pedro misulat: “Kon ang usa moalagad, kinahanglang mosalig siya sa kusog nga ginahatag sa Diyos.” (1 Ped. 4:11) Ang imong mga igsoon nag-atubang tingalig mga problema nga dili bug-os masulbad samtang nia pa ta niining sistemaha. Pero hinumdomi nga ang “pangulong magbalantay,” si Jesu-Kristo, makatabang nila nga labaw pa sa imong mahimo. Iya nang mahimo karon ug sa bag-ong kalibotan. Ang gusto lang sa Diyos mao nga higugmaon sa mga ansiyano ang mga igsoon, atimanon ug bantayan sila, ug mahimong “mga ehemplo sa panon.” w23.09 29-30 ¶13-14

Angay natong likayan ang tawhanong panghunahuna. Kon ang atong panghunahuna sa usa ka butang gibase sa panglantaw sa tawo, posibleng balewalaon na nato si Jehova ug ang iyang mga sukdanan. (1 Cor. 3:19) “Ang kaalam niining kalibotana” sagad nagdasig sa mga tawo nga sundon ang ilang sayop nga mga tinguha. Nasundog sa pipila ka Kristohanon sa Pergamo ug Tiatira ang panghunahuna sa mga tawo sa ilang palibot nga imoral ug nagsimbag mga idolo. Gihatagan ni Jesus ug bug-at nga tambag kining duha ka kongregasyon kay ilang gikonsentir ang seksuwal nga imoralidad. (Pin. 2:​14, 20) Karon, ang mga tawo sa atong palibot nagpresyur pod nato nga dawaton ang ilang sayop nga mga panghunahuna. Ang mga membro sa atong pamilya ug ang atong mga kaila maningkamot tingali nga tandogon ang atong emosyon ug tentalon ta nga mokompromiso. Pananglitan, moingon tingali sila nga dili ra sayop kon sundon nimo ang imong gusto ug nga kinaraan na ang sukdanan sa Bibliya bahin sa moralidad. Usahay, maghunahuna tingali ta nga kulang ang direksiyon nga gihatag ni Jehova. Basig matental pa gani ta nga ‘mosaylo sa mga butang nga nasulat.’—1 Cor. 4:6. w23.07 16 ¶10-11

Si Maria, nga inahan ni Jesus, nagkinahanglag kalig-on. Dili pa siya minyo, pero magmabdos siya. Wala pa siyay eksperyensiya sa pagpadakog anak, pero atimanon niya ang bata nga mahimong Mesiyas. Ug kay wala pa siya makaagig seksuwal nga relasyon, unsaon man niya pagsulti kining tanan ngadto sa iyang pamanhonon nga si Jose? (Luc. 1:​26-33) Sa unsang paagi napalig-on si Maria? Nangayo siyag tabang sa uban. Pananglitan, gihangyo niya si Gabriel nga hatagan siyag dugang impormasyon bahin sa iyang asaynment. (Luc. 1:34) Wala madugay human niana, miadto siya “sa kabukiran, sa usa ka siyudad sa Juda,” aron bisitahon ang iyang paryente nga si Elisabet. Gikomendahan siya ni Elisabet, ug gigiyahan pod ni Jehova si Elisabet sa pagsultig makapadasig nga tagna bahin sa wala pa matawo nga anak ni Maria. (Luc. 1:​39-45) Miingon si Maria nga si Jehova “naghimog gamhanang mga buhat pinaagi sa iyang gahom.” (Luc. 1:​46-51) Pinaagi kang Gabriel ug Elisabet, gipalig-on ni Jehova si Maria. w23.10 14-15 ¶10-12

Naay limitadong gidaghanon sa mga tinun-an ni Jesus nga gidihogan sa balaang espiritu, ug naa silay espesyal nga relasyon uban kang Jehova. Kining 144,000 mag-alagad ingong mga saserdote sa langit uban ni Jesus. (Pin. 14:1) Ang Balaan sa tabernakulo nagrepresentar sa ilang kahimtang sa yuta ingong dinihogan sa espiritu nga mga anak sa Diyos. (Roma 8:​15-17) Ang Labing Balaan sa tabernakulo nagrepresentar sa langit, diin nagpuyo si Jehova. Ang “kortina” nga nagsilbing dibisyon sa Balaan ug Labing Balaan nagrepresentar sa tawhanong lawas ni Jesus. Kini nagsilbing ali sa iyang pagsulod sa langit ingong labaw nga Hataas nga Saserdote sa espirituwal nga templo. Pinaagi sa paghatag sa iyang tawhanong kinabuhi ingong halad para sa katawhan, gibuksan ni Jesus ang dalan ngadto sa langitnong kinabuhi alang sa tanang dinihogang Kristohanon. Kinahanglan pod nilang biyaan ang ilang tawhanong lawas aron madawat nila ang langitnong ganti.—Heb. 10:​19, 20; 1 Cor. 15:50. w23.10 28 ¶13

Si Gideon kalmadong mitubag sa mga lalaki sa Epraim nga mikuwestiyon niya. (Maghu. 8:​1-3) Wala siya masuko. Nagpaubos siya pinaagi sa pagpaminaw sa ilang mga reklamo ug buotang nakig-estorya nila, maong mikalma ang situwasyon. Masundog sa maalamong mga ansiyano si Gideon kon maminaw sila pag-ayo ug kalmadong motubag kon naay mokuwestiyon o mosaway nila. (Sant. 3:13) Nianang paagiha, makaamot sila sa kalinaw sa kongregasyon. Dihang gidayeg si Gideon kay nakadaog sila sa Midian, iyang gipokus ang atensiyon ngadto kang Jehova. (Maghu. 8:​22, 23) Unsaon kaha pagsundog sa mga ansiyano si Gideon? Angay nilang dayegon si Jehova sa ilang mga nalampos. (1 Cor. 4:​6, 7) Pananglitan, kon ang usa ka ansiyano komendahan sa iyang paagi sa pagpanudlo, iyang ipokus ang atensiyon ngadto sa tinubdan sa maong instruksiyon, ang Pulong sa Diyos, o sa pagbansay nga iyang nadawat gikan sa organisasyon ni Jehova. Usahay, maayong pamalandongon sa mga ansiyano ang ilang paagi sa pagpanudlo, kay basin sa ilaha na nakapokus ang atensiyon sa uban. w23.06 4 ¶7-8

Kon wala nato madawat ang atong giampo, puwede natong pangutan-on ang atong kaugalingon, ‘Husto ba ang akong giampo?’ Sagad maghunahuna ta nga nahibalo ta kon unsay pinakamaayo para nato. Pero ang atong mga gihangyo basig dili makahatag natog kaayohan sa ulahi. Kon nag-ampo ta bahin sa usa ka problema, basig naay mas maayong solusyon niana kay sa atong gihangyo. Ug ang ubang butang nga atong gipangayo basig dili uyon sa kabubut-on ni Jehova. (1 Juan 5:14) Pananglitan, konsideraha ang pag-ampo sa mga ginikanan kinsa mihangyo kang Jehova nga seguroon nga ang ilang anak dili mobiya sa kamatuoran. Morag maayo na nga hangyo. Pero dili pugson ni Jehova si bisan kinsa sa pag-alagad kaniya. Gusto niya nga kitang tanan, apil ang atong mga anak, mopili sa pagsimba kaniya. (Deut. 10:​12, 13; 30:​19, 20) Busa mas maayong hangyoon sa mga ginikanan si Jehova nga tabangan sila nga matandog ang kasingkasing sa ilang anak aron mapalihok siya nga higugmaon si Jehova ug makigsuod Kaniya.—Prov. 22:6; Efe. 6:4. w23.11 21 ¶5; 23 ¶12

Nganong ang paghupay sa uban maoy importanteng paagi sa pagpakita sa atong gugma? Sumala sa usa ka reperensiya, ang pulong nga gigamit ni Pablo para sa “paghupay” nagpasabot ug “pagtindog tapad sa usa ka tawo nga nakasinatig grabeng pagsulay aron dasigon siya.” Busa kon hupayon nato ang usa ka igsoon nga naa sa lisod nga kahimtang, ato siyang gitabangan nga makabarog ug makapadayon sa dalan sa kinabuhi. Sa matag higayon nga hupayon nato ang usa ka igsoon, atong gipakita nga ato siyang gimahal. (2 Cor. 7:​6, 7, 13) Konektado kaayo ang kaluoy ug ang paghupay. Sa unsang paagi? Ang maluluy-ong tawo mapalihok sa paghupay sa uban ug maningkamot nga mamenosan ang ilang pag-antos. Busa sa primero, mobati tag kaluoy. Dayon mohatag tag paghupay. Matikdi kon giunsa pagpakita ni Pablo nga ang kaluoy ni Jehova sa mga tawo nagpalihok Niya sa paghupay kanila. Si Pablo miingon nga si Jehova “ang Amahan nga malumo ug maluluy-on ug ang Diyos sa tanang paghupay.”—2 Cor. 1:3. w23.11 9-10 ¶8-10

Ang tanang sumusunod sa Kristo makadahom gyod ug kasakitan. Konsideraha ang naeksperyensiyahan ni apostol Pablo. Siya miingon sa mga taga-Tesalonica: “Dihang kauban mi ninyo, giingnan mo namo daan nga makasinati tag kasakitan, ug nahitabo kana.” (1 Tes. 3:4) Ug sa mga taga-Corinto, siya misulat: “Gusto namong mahibalo mo, mga igsoon, sa kasakitan nga among naagoman . . . Mibati mi nga wala nay kasegurohan ang among kinabuhi.” (2 Cor. 1:8; 11:​23-27) Ang mga Kristohanon sab karon makadahom ug kasakitan. (2 Tim. 3:12) Tungod sa imong pagtuo kang Jesus ug sa imong pagsunod kaniya, ang imong pamilya ug mga higala dili tingali maayog pagtratar kanimo. Nagkaproblema ba ka sa trabaho tungod sa imong paningkamot nga magmatinud-anon sa tanang butang? (Heb. 13:18) Nakasinati ba kag pagsupak sa gobyerno kay imong gisangyaw sa uban ang imong paglaom? Bisag unsa pang kasakitan ang ato tingaling maatubang, si Pablo miingon nga angay tang maglipay. w23.12 10-11 ¶9-10

Daghag naatubang nga problema si Jacob. Ang duha niya ka anak, si Simeon ug Levi, naghatag ug kaulawan sa pamilya ug sa ngalan ni Jehova. Gawas pa ana, namatay ang pinalanggang asawa ni Jacob nga si Raquel samtang nanganak kang Benjamin. Ug tungod sa grabeng gutom, napugos si Jacob nga mobalhin sa Ehipto dihang tigulang na siya. (Gen. 35:​16-19; 37:28; 45:​9-11, 28) Bisan pa sa tanang problema nga giatubang ni Jacob, wala gyod siya mawad-ig pagtuo kang Jehova ug sa Iyang mga saad. Busa gipakita ni Jehova kang Jacob nga giuyonan Niya siya. Pananglitan, gipanalanginan siya ni Jehova ug daghang materyal nga butang. Ug hunahunaa kon unsa ka mapasalamaton si Jacob kang Jehova dihang nakita niya pag-usab si Jose—ang iyang anak nga abi niyag dugay nang namatay! Ang suod nga relasyon ni Jacob kang Jehova nakatabang aron malahutay niya ang mga kalisdanan. (Gen. 30:43; 32:​9, 10; 46:​28-30) Kon pirme tang suod kang Jehova, malahutay pod nato ang wala damhang mga kalisdanan. w23.04 15 ¶6-7

Ang Salmo 23 maoy usa ka awit ni David nga nagpakita sa iyang pagsalig sa gugma ug pag-atiman ni Jehova. Mabasa nato dinhi ang ilang suod kaayo nga relasyon. Gani, gitawag niya si Jehova nga iyang Magbalantay. Mibati si David nga luwas kay nagpagiya siya kang Jehova, ug bug-os gyod siyang nagsalig Kaniya. Nahibalo si David nga pakitaan siyag gugma ni Jehova sa tanang adlaw sa iyang kinabuhi. Nganong segurado kaayo si David ana? Gibati ni David nga giatiman siya pag-ayo ni Jehova kay kanunay siyang gitagan-an sa tanan niyang panginahanglan. Nahibalo sab si David nga siya higala ug giuyonan ni Jehova. Maong segurado siya nga bisag unsa pay mahitabo sa umaabot, si Jehova padayong mag-atiman sa tanan niyang panginahanglan. Kay dako kaayog pagsalig si David sa gugma ni Jehova, nakatabang ni niya nga dili sobrang mabalaka. Gani, siya mibatig dakong kalipay ug katagbawan.—Sal. 16:11. w24.01 29 ¶12-13

Sukad sa Gubat sa Kalibotan II, ang katawhan ni Jehova sa daghang nasod nakapahimulos sa panahon sa kalinaw ug kagawasan samtang ilang ginahimo ang buluhatong pagsangyaw. Gani, daghan na ang nakaila kang Jehova ug ang maayong balita gisangyaw na sa tibuok kalibotan. Karon, ang mga membro sa Nagamandong Lawas padayong nagpagiya sa Kristo. Naningkamot sila nga ang mga direksiyon nga ilang ihatag sa mga igsoon uyon sa panglantaw ni Jehova ug Jesus. Ug ila kining ipaabot sa mga kongregasyon pinaagi sa mga tigdumala sa sirkito ug mga ansiyano. Ang dinihogang mga ansiyano naa sa “tuong kamot” sa Kristo. (Pin. 2:1) Siyempre, kini nga mga ansiyano dili hingpit ug usahay masayop. May mga higayon nga nasayop si Moises ug Josue, ug mao pod ang mga apostoles. (Num. 20:12; Jos. 9:​14, 15; Roma 3:23) Pero klaro nga ang Kristo naggiya sa matinumanong ulipon ug sa gitudlo nga mga ansiyano, ug padayon na niyang himoon. Busa daghan gyod tag rason nga mosalig sa paggiya nga iyang gitagana pinaagi niadtong mga gitudlo nga manguna kanato. w24.02 23-24 ¶13-14

Karon, mapalipay nato si Jehova pinaagi sa pagsulti sa uban nga proud ug mapasalamaton kaayo ta niya ug nga gimahal nato siya pag-ayo. Dihang naa ta sa ministeryo, hinumdoman nato nga ang atong pangunang tumong mao ang pagkabig sa mga tawo ngadto kang Jehova ug pagtabang kanila nga mahalon pod ang atong mahigugmaong Amahan sama sa atong pagmahal kaniya. (Sant. 4:8) Malipay kaayo ta nga ipakita ngadto sa mga tawo kon unsay giingon sa Bibliya bahin kang Jehova—sa iyang gugma, hustisya, kaalam, gahom, ug ubang nindot nga mga hiyas. Madayeg ug mapalipay pod nato si Jehova pinaagi sa pagpaningkamot nga masundog siya. Kon ato nang himoon, makita sa uban nga lahi ta sa mga tawo niining daotang kalibotan, ug mainteres tingali sila kon unsa ang rason. (Mat. 5:​14-16) Sa atong adlaw-adlawng kalihokan, basin naa tay kahigayonan nga mapatin-aw kanila kon nganong lahi ta. Ingong resulta, ang sinserong mga tawo mapalihok nga makigsuod sa atong Diyos. Dihang dayegon nato si Jehova niining mga paagiha, mapalipay nato ang iyang kasingkasing.—1 Tim. 2:​3, 4. w24.02 10 ¶7

Aron mahimong hamtong nga Kristohanon, kinahanglan kang magkat-on ug praktikal nga mga skill. Makatabang ni nimo nga mahimo ang imong mga responsibilidad sa kongregasyon, makakitag trabaho nga makasuportar nimo o sa imong pamilya, ug makabaton ug maayong relasyon sa uban. Pananglitan, pagkat-on nga mahimong maayo sa pagbasa ug pagsulat. Ang Bibliya nag-ingon nga ang malipayon ug malamposon nga tawo mogahin ug panahon kada adlaw sa pagbasa sa Pulong sa Diyos ug pagpamalandong niana. (Sal. 1:​1-3) Pinaagi sa pagbasa sa Bibliya kada adlaw, mahibaloan niya ang panghunahuna ni Jehova, nga makatabang niya nga makabatog hustong panghunahuna ug mapadapat ang iyang nakat-onan. (Prov. 1:​3, 4) Ang atong mga igsoon nanginahanglan ug mga brader nga naay katakos sa pagtudlo ug paghatag ug tambag nga gibase sa Bibliya. Kon maayo kang mobasa ug mosulat, makaandam kag mga komento ug pakigpulong nga makapalig-on sa pagtuo ug makahatag ug kaayohan sa uban. Makahimo pod kag mapuslanong mga note nga makatabang nimo sa pagpalig-on sa imong pagtuo ug sa pagdasig sa uban. w23.12 26-27 ¶9-11

Dihang mahadlok ka, pamalandonga ang himoon ni Jehova sa umaabot dihang wala na si Satanas. Sa 2014 nga rehiyonal nga kombensiyon, naay pasundayag diin gihisgotan sa usa ka amahan uban sa iyang pamilya kon unsa kahay pagkabalay sa 2 Timoteo 3:​1-5 kon nagtagna ni bahin sa kinabuhi sa Paraiso: “Sa bag-ong kalibotan moabot ang labing malipayong mga panahon. Kay ang mga tawo unya mahigugmaon na sa uban, mahigugmaon sa espirituwal nga bahandi, makasaranganon, mapainubsanon, magadayeg na sa Diyos, masinugtanon sa mga ginikanan, mapasalamaton, maunongon, may dakong gugma sa ilang pamilya, daling ikasabot, dili na mabutangbutangon, may pagpugong sa kaugalingon, malumo, mahigugmaon sa pagkamaayo, kasaligan, mapinasakopon, dili garboso, mahigugmaon sa Diyos imbes mahigugmaon sa kalipayan, naay tinuod nga diyosnong debosyon; ug angay kang makigsuod niini nga mga tawo.” Ginahisgotan ba ninyo sa inyong pamilya o sa mga igsoon sa kongregasyon kon unsa unyay kinabuhi sa bag-ong kalibotan? w24.01 6 ¶13-14

Makapahupay gyod ang pagkahibalo nga giuyonan ni Jehova ang iyang katawhan ingong grupo! Ang Bibliya nag-ingon: “Si Jehova nalipay sa iyang katawhan.” (Sal. 149:4) Pero usahay, ang uban madismayar kaayo maong makahunahuna sila, ‘Giuyonan ba gyod ko ni Jehova?’ Daghang matinumanong magsisimba ni Jehova sa panahon sa Bibliya ang mibati pod ana. (1 Sam. 1:​6-10; Job 29:​2, 4; Sal. 51:11) Klarong gipakita sa Bibliya nga ang dili hingpit nga mga tawo puwedeng makadawat sa pag-uyon ni Jehova. Sa unsang paagi? Kinahanglan tang magpakitag pagtuo kang Jesu-Kristo ug magpabawtismo. (Juan 3:16) Pinaagi ana, atong gipakita atubangan sa daghan nga naghinulsol na ta sa atong mga sala ug nanaad sa Diyos nga himoon ang iyang kabubut-on. (Buh. 2:38; 3:19) Malipay kaayo si Jehova dihang himoon nato kining mga butanga aron masuod kaniya. Ug kon padayon natong tumanon ang atong panaad sa pagpahinungod, uyonan ta ni Jehova ug isipon ingong iyang suod nga higala.—Sal. 25:14. w24.03 26 ¶1-2

Masundog nato ang mga tinun-an kon mopadayon ta sa pagsangyaw bisan pag idili kini sa gobyerno. Makasalig ta nga tabangan ta niya nga molampos sa atong ministeryo. Busa pag-ampo para sa kaisog ug kaalam. Pangayog tabang kang Jehova aron makaya nimo ang imong mga problema. Daghan nato ang nag-atubang ug mga kalisdanan sama sa sakit o problema sa emosyon, kamatayon sa minahal, lisod nga situwasyon sa pamilya, paglutos, o uban pa. Ug ang mga panghitabo sama sa pandemic ug gubat nakapasamot pa gyod sa atong mga problema. Isulti kang Jehova ang tanan nimong gibati. Sultihi siya bahin sa imong kahimtang, nga sama bag nakig-estorya ka sa usa ka suod nga higala. Makasalig ka nga si Jehova “molihok alang kanimo.” (Sal. 37:​3, 5) Ang kanunay nga pag-ampo makatabang nato nga ‘makalahutay sa kasakitan.’ (Roma 12:12) Nahibalo si Jehova kon unsay ginasagubang sa iyang mga alagad—“iyang dunggon ang ilang pagtuaw alang sa tabang.”—Sal. 145:​18, 19. w23.05 5-6 ¶12-15

Dihang mohimog importanteng mga desisyon, kinahanglan natong sabton “kon unsa ang kabubut-on ni Jehova” ug molihok uyon niana. (Efe. 5:17) Dihang atong hunahunaon kon unsa nga mga prinsipyo sa Bibliya ang mapadapat sa atong situwasyon, atong gipakita nga naningkamot ta nga masabtan ang panghunahuna sa Diyos. Ug dihang ipadapat nato ang iyang mga prinsipyo, makahimo tag maayong mga desisyon. Ang “usa nga daotan,” ang atong kaaway nga si Satanas, naningkamot nga ma-busy ta sa mga butang sa kalibotan aron wala na tay panahon sa pag-alagad sa Diyos. (1 Juan 5:19) Basig unahon na sa usa ka Kristohanon ang kuwarta, edukasyon, o trabaho imbes ang pag-alagad kang Jehova. Kon mao, nagpakita kana nga naimpluwensiyahan na siya sa panghunahuna sa kalibotan. Siyempre, wala ray sayop niining mga butanga, pero dili kini ang angay natong unahon sa atong kinabuhi. w24.03 24 ¶16-17