Agosto

Matikdi ang duha ka importanteng punto sa teksto karong adlawa: (1) Ang matarong nga mga tawo makaatubang ug mga problema. (2) Luwason ta ni Jehova gikan sa atong mga kalisdanan. Unsaon ta pagluwas ni Jehova? Ang usa ka paagi mao ang pagtabang kanato nga makabatog balanseng panglantaw sa kinabuhi niining sistemaha. Tinuod, nagsaad si Jehova nga magmalipayon ta sa pag-alagad kaniya. Pero wala siya moingon nga dili na ta makaatubang ug mga problema. (Isa. 66:14) Gidasig ta niya nga magpokus sa umaabot—sa panahon dihang maangkon na nato ang kinabuhing walay kataposan nga maoy gusto niya para nato. (2 Cor. 4:​16-18) Sa pagkakaron, gitabangan ta niya nga makapadayon sa pag-alagad kada adlaw. (Lam. 3:​22-24) Unsay atong makat-onan sa matinumanong mga alagad ni Jehova sa panahon sa Bibliya ug sa atong panahon karon? Tingali makaatubang tag wala damhang mga problema. Pero kon mosalig ta kang Jehova, tabangan gyod ta niya.—Sal. 55:22. w23.04 14-15 ¶3-4

Makakat-on ta sa ehemplo ni Jose ug Maria, kinsa andam mosunod sa labaw nga mga awtoridad bisag dili ni kombenyente para nila. (Luc. 2:​1-6) Dihang mga siyam ka bulan nang mabdos si Maria, nasulayan ang ilang pagkamasinugtanon ni Jose. Si Agusto, nga nagmando sa Imperyo sa Roma, nagpagawas ug sugo nga ang tanan kinahanglang mouli sa ilang lungsod aron magparehistro. Si Jose ug Maria kinahanglang moadto sa Betlehem, nga mobiyaheg 150 kilometros (93 ka milya) agi sa daghang bungtod. Lisod gyod ni nga biyahe, ilabina kang Maria. Posible nga nabalaka sila sa iyang safety ug sa ilang anak nga wala pa matawo. Unsa na lag manganak siya samtang gabiyahe? Ang bata nga iyang gibuntis mao baya ang umaabot nga Mesiyas. Himoon kaha nila ning rason aron dili sundon ang gisugo sa gobyerno? Bisag naay mga rason si Jose ug Maria nga mabalaka, gisunod gihapon nila ang balaod. Gipanalanginan ni Jehova ang ilang pagkamasinugtanon. Si Maria luwas nga nakaabot sa Betlehem, nanganak ug himsog nga bata, ug nakatabang pa gani nga matuman ang tagna sa Bibliya.—Miq. 5:2. w23.10 8 ¶9; 9 ¶11-12

Komosta kon makulbaan kaayo kang mokomento? Makatabang ang pagpangandam pag-ayo. (Prov. 21:5) Kon mas pamilyar ka sa tun-anan, mas naa kay kompiyansa nga mokomento. Dugang pa, mub-a lang ang imong komento. (Prov. 15:23; 17:27) Kon mubo ang imong tubag, dili kaayo ka kulbaan. Kon mohatag kag mubong komento sa imong kaugalingong mga pulong, mapakita nimo nga nangandam ka pag-ayo ug nakasabot gyod ka sa tun-anan. Komosta kon gihimo na nimo ni nga mga sugyot pero kulbaan gihapon kang mohatag ug kapin sa usa o duha ka komento? Makaseguro ka nga maapresyar ni Jehova ang imong sinserong mga paningkamot nga himoon ang imong maarangan. (Luc. 21:​1-4) Gusto ni Jehova nga himoon nimo ang imong kinamaayohan, pero wala na magpasabot nga himoon nimo ang labaw kay sa imong makaya. (Filip. 4:5) Susiha kon unsay kaya nimong buhaton, paghimog tumong, ug pag-ampo nga hatagan kag kalmadong kasingkasing. Sa sinugdan, puwede nimong himoong tumong nga mohatag ug usa ka mubong komento. w23.04 21 ¶6-8

Gipakasama ta ni apostol Pablo sa mga sundalo nga alerto ug nagsul-ob ug kompletong armadura sa gubat. Ang usa ka sundalo gidahom nga andam kanunay sa pagpakiggubat. Ingon ana pod ta. Makapabilin tang andam sa adlaw ni Jehova kon isul-ob nato ang panagang sa dughan nga mao ang pagtuo ug gugma, ug ang helmet nga mao ang paglaom. Ang panagang sa dughan manalipod sa kasingkasing sa sundalo. Ang pagtuo ug gugma manalipod sa atong simbolikong kasingkasing. Makatabang ni nato nga padayong alagaron ang Diyos ug sundon si Jesus. Kon naa tay pagtuo, makasalig ta nga panalanginan ni Jehova ang atong paningkamot nga alagaran siya sa tibuok natong kasingkasing. (Heb. 11:6) Kini mopalihok nato nga magpabiling maunongon sa atong Lider, si Jesus, bisan pa sa mga kalisdanan. Mapalig-on nato ang atong pagtuo ug malahutay ang mga kalisdanan kon mokat-on ta sa ehemplo sa mga igsoon nga nagpabiling matinumanon bisan pag gilutos o nalisdan sa panginabuhi. Ug malikayan nato ang pagkahimong materyalistiko kon sundogon nato kadtong nagpasimple sa ilang kinabuhi aron unahon ang Gingharian. w23.06 10 ¶8-9

Ang pagpugong sa kaugalingon nagpasabot nga kontrolahon nato ang atong mga pagbati ug mga lihok. Kini gikinahanglan aron mapalihok ta sa pagkab-ot sa atong mga tumong, ilabina kon lisod kab-oton ang atong tumong o wala tay gana nga himoon kini. Hinumdomi nga ang pagpugong sa kaugalingon apil sa bunga sa espiritu. Busa pangayog balaang espiritu kang Jehova aron maugmad pa nimo kining importante nga hiyas. (Luc. 11:13; Gal. 5:​22, 23) Ayaw paghulat ug maayo kaayong kahimtang. Niining kalibotana, posibleng dili gyod moabot ang maayo kaayong mga kahimtang. Kon ato nang hulaton, basig dili na hinuon nato makab-ot ang atong tumong. Mawad-an tingali tag gana kon ang atong tumong morag lisod kaayong kab-oton. Kon kanay imong kahimtang, puwede ba kang mohimog ginagmay nga tumong aron makab-ot ang imong pinakatumong? Kon tumong nimo nga ugmaron ang usa ka hiyas, unsa kaha kon maningkamot una ka nga ipakita na sa ginagmayng paagi? Kon tumong nimo nga mabasa ang tibuok Bibliya, puwede ba kang mag-eskedyul lang una ug mugbong panahon sa pagbasa? w23.05 29 ¶11-13

Niining kataposang mga adlaw, gigamit ni Jehova ang iyang organisasyon aron padayon tang tagan-an ug espirituwal nga pagkaon nga makatabang natong tanan sa pagsubay sa “Dalan sa Pagkabalaan.” (Isa. 35:8; 48:17; 60:17) Kadtong modawat ug pagtuon sa Bibliya naay kahigayonan nga mosubay sa “Dalan sa Pagkabalaan.” Naay mga tawo nga mosugod pagsubay niana nga dalan ug mohawa ra pod dayon. Ang uban determinado nga magpabilin niana nga dalan hangtod nga makaabot sila sa ilang destinasyon. Unsa na nga destinasyon? Alang niadtong may langitnong paglaom, ang “Dalan sa Pagkabalaan” motultol ngadto sa “paraiso sa Diyos” didto sa langit. (Pin. 2:7) Alang niadtong may yutan-ong paglaom, kana nga dalan motultol ngadto sa kahingpitan sa kataposan sa 1,000 ka tuig. Kon nagsubay na ka nianang dalana karon, ayawg lingi sa luyo. Ug ayawg biya niana hangtod nga makaabot ka sa bag-ong kalibotan. w23.05 17 ¶15; 19 ¶16-18

Dihang imong hunahunaon ang tanang gihimo ni Jehova para nimo, mapalihok ka nga magpahinungod sa imong kaugalingon kaniya. (Sal. 116:​12-14) Ang Bibliya nag-ingon nga si Jehova ang Maghahatag sa “matag maayong gasa ug matag hingpit nga regalo,” ug tinuod gyod na. (Sant. 1:17) Ang kinalabwang regalo ni Jehova mao ang halad lukat sa iyang Anak, si Jesus. Hunahunaa kon unsa na ka talagsaon! Tungod sa lukat, puwede kang makabaton ug suod nga relasyon kang Jehova. Ug gihatagan ka niyag paglaom nga mabuhi sa walay kataposan. (1 Juan 4:​9, 10) Ang pagpahinungod sa imong kaugalingon kang Jehova maoy usa ka paagi nga mapakita nimo nga mapasalamaton ka nianang kinadak-ang ekspresyon sa gugma, apil na sa tanang panalangin nga gihatag ni Jehova kanimo.—Deut. 16:17; 2 Cor. 5:15. w24.03 5 ¶8

Bahin sa ubos nga moralidad sa kalibotan karon, gibati sab nato ang gibati sa matarong nga si Lot. “Naguol [siya] pag-ayo tungod sa walay kaulaw nga paggawi sa masinupakong katawhan,” kay nahibalo siya nga gidumtan sa atong langitnong Amahan ang daotang binuhatan. (2 Ped. 2:​7, 8) Ang iyang kahadlok ug gugma sa Diyos nagpalihok kang Lot nga dumtan ang imoral nga binuhatan sa mga tawo sa iyang palibot. Kita sab napalibotan ug mga tawo nga wala kaayoy pagtahod o nagsalikway gyod sa moral nga mga sukdanan ni Jehova. Bisan pa niana, makapabilin tang hinlo sa moral kon padayon natong higugmaon ang Diyos ug ugmaron ang hustong kahadlok kaniya. Aron ato nang mahimo, si Jehova mahigugmaong naghatag ug pagdasig pinaagi sa basahon sa Proverbio. Ang tanang Kristohanon, lalaki ug babaye, bata ug tigulang, makabenepisyo gyod sa maalamong mga tambag niini nga basahon. Kon naa tay kahadlok kang Jehova, mag-amping ta nga dili makighigala niadtong naghimog daotang mga buhat. w23.06 20 ¶1-2; 21 ¶5

Tingali gisupak ka sa mga membro sa imong pamilya, o kaha gisakripisyo nimo ang mga kahigayonan nga makabaton ug dugang materyal nga mga butang aron unahon ang Gingharian. (Mat. 6:33) Kon mao, makaseguro ka nga nakita ni Jehova ang tanan nimong gihimo para niya. (Heb. 6:10) Tingali, naeksperyensiyahan nimo nga tinuod ang giingon ni Jesus: “Kadtong mibiya sa iyang balay o mga igsoon o inahan o amahan o mga anak o kaumahan tungod kanako ug sa maayong balita, makabaton karon ug 100 ka pilo niini—mga balay, igsoon, inahan, anak, ug kaumahan, uban ang mga paglutos—ug sa umaabot nga sistema sa mga butang, kinabuhing walay kataposan.” (Mar. 10:​29, 30) Ang mga panalangin nga imong nadawat mas labaw gyod kon itandi sa mga sakripisyo nga imong gihimo.—Sal. 37:4. w24.03 9 ¶5

Dihang ang mga Kristohanon sa Judea nakasinatig grabeng kagutom, ang mga igsoon sa kongregasyon sa Antioquia midesisyon “nga magpadalag hinabang ngadto sa mga igsoon nga nagpuyo sa Judea, ang matag usa sumala sa iyang maarangan.” (Buh. 11:​27-30) Bisag layo ang gipuy-an sa mga igsoon nga naapektohan sa gutom, ang mga Kristohanon sa Antioquia determinado nga motabang nila. (1 Juan 3:​17, 18) Karon, makapakita pod tag kaluoy sa mga igsoon dihang maapektohan sila sa kalamidad. Molihok dayon ta sa pagtabang nila. Tingali mangutana ta sa mga ansiyano kon puwede ba tang motabang sa usa ka proyekto. Puwede pod tang mo-donate sa tibuok kalibotang buluhaton, ug puwede natong iampo kadtong naapektohan sa kalamidad. Ang atong mga igsoon magkinahanglan pod tingalig tabang para sa ilang pangunang mga panginahanglan. Dihang ang atong Hari, si Kristo Jesus, moabot aron ipahamtang ang paghukom, hinaot nga makita ta niya nga nagpakitag kaluoy ug imbitahon ta nga ‘makapanunod sa Gingharian.’—Mat. 25:​34-40. w23.07 4 ¶9-10; 6 ¶12

Gisundog ni Jesus ang pagkamakataronganon ni Jehova. Gipadala siya sa yuta aron sangyawan ang “nawalang mga karnero sa nasod sa Israel.” Pero nagmakataronganon siya sa pagtuman sa maong asaynment. Pananglitan, dihay dili Israelinhong babaye nga nagpakiluoy kang Jesus nga ayohon ang iyang anak nga “nag-antos pag-ayo kay . . . gidemonyohan.” Naluoy kaayo si Jesus, maong giayo niya ang anak sa babaye. (Mat. 15:​21-28) Nia pay laing pananglitan. Panahon sa iyang ministeryo, si Jesus miingon: “Si bisan kinsa nga molimod kanako . . . , ilimod usab nako.” (Mat. 10:33) Pero sa ulahi dihang gilimod siya ni Pedro sa tulo ka higayon, gilimod pod ba niya si Pedro? Wala. Nakita ni Jesus nga si Pedro naghinulsol ug may pagtuo. Human mabanhaw si Jesus, nagpakita siya kang Pedro. Lagmit gipasaligan niya si Pedro nga iya siyang gipasaylo ug gimahal. (Luc. 24:​33, 34) Si Jehova nga Diyos ug si Jesu-Kristo makataronganon. Pero komosta ta? Gidahom ni Jehova nga magmakataronganon ta. w23.07 21-22 ¶6-7

Unsang mga pasalig ang puwede natong isulti sa uban aron makatuo sila nga matuman gyod ang saad sa Diyos nga Paraiso? Una, si Jehova mismo ang nagsaad. Kini ang narekord sa basahon sa Pinadayag: “Ang Usa nga naglingkod sa trono miingon: ‘Tan-awa! Ginabag-o nako ang tanang butang.’” Si Jehova dunay kaalam, gahom, ug tinguha nga tumanon ang iyang saad. Ikaduha, segurado kaayo nga matuman ang iyang saad, kay sa panglantaw ni Jehova kini samag nahitabo na. Mao nga siya miingon: “Kining mga pulonga kasaligan ug matuod. . . . Nahitabo na kini!” Ikatulo, dihang naay sugdan si Jehova, iya gyod ning humanon hangtod nga molampos kini, sumala sa gipasiugda niini nga ekspresyon: “Ako ang Alfa ug ang Omega.” (Pin. 21:6) Pamatud-an ni Jehova nga bakakon gyod si Satanas ug dili siya makapugong kang Jehova sa pagtuman sa Iyang katuyoan. Busa kon naay moingon, “Nindot na, pero morag imposible man nang mahitabo,” basaha ug ipatin-aw ang Pinadayag 21:​5, 6. Ipakita kon sa unsang paagi si Jehova naggarantiya sa iyang saad pinaagi sa “pagpirma” niini.—Isa. 65:16. w23.11 7 ¶18-19

Dihang gisaad kini ni Jehova kang Abraham, siya 75 anyos na ug wala pay anak. Nakita ba ni Abraham nga natuman ang maong saad? Dili sa bug-os. Human makatabok sa Suba sa Euprates, 25 ka tuig pa ang milabay ayha nakita ni Abraham ang milagrosong pagkatawo sa iyang anak nga si Isaac, ug milabay pa ang laing 60 ka tuig ayha natawo ang iyang mga apo nga si Esau ug Jacob. (Heb. 6:15) Pero wala makita ni Abraham nga nahimong dakong nasod ang iyang mga kaliwat ug nakapanunod sa Yutang Saad. Bisan pa niana, kining matinumanong alagad suod kaayo sa iyang Maglalalang. (Sant. 2:23) Ug dihang banhawon na si Abraham, seguradong malipay siyang mahibalo nga ang iyang pagtuo ug pailob miresultag panalangin sa tanang kanasoran! (Gen. 22:18) Unsay atong makat-onan? Tingali dili pa dayon nato personal nga makita ang pagkatuman sa tanang saad ni Jehova. Pero kon magpailob ta sama ni Abraham, seguradong gantihan ta ni Jehova karon ug ilabina didto sa Iyang gisaad nga bag-ong kalibotan.—Mar. 10:​29, 30. w23.08 24 ¶14

Sa batan-on pa si Haring Uzzias, mapainubsanon siya. Nakakat-on siya nga ‘mahadlok sa matuod nga Diyos.’ Ug gipanalanginan siya ni Jehova sa kadaghanang bahin sa iyang 68 ka tuig nga kinabuhi. (2 Cron. 26:​1-4) Gipildi ni Uzzias ang daghang kaaway sa Juda ug gipalig-on ang depensa sa Jerusalem. (2 Cron. 26:​6-15) Seguradong nalipay si Uzzias sa tanang tabang nga gihatag sa Diyos kaniya. (Eccl. 3:​12, 13) Naanad si Haring Uzzias nga sundon kanunay sa uban ang iyang mga instruksiyon. Kana kahay rason nga naghunahuna siya nga puwede ra niyang himoon ang bisan unsa nga iyang gusto? Usa ka adlaw, si Uzzias misulod sa templo ni Jehova ug mapangahasong nagsunog ug insenso sa halaran, nga dili angayng himoon sa mga hari. (2 Cron. 26:​16-18) Gibadlong siya sa hataas nga saserdoteng si Azarias, pero nasuko pag-ayo si Uzzias. Makapaguol kay gidaot ni Uzzias ang iyang maayong rekord sa pag-alagad ug gisilotan siyag sanla. (2 Cron. 26:​19-21) Lahi ra gyod unta ang gidangatan sa iyang kinabuhi kon nagpabilin pa siyang mapainubsanon! w23.09 10 ¶9-10

Bisag dinihogang Kristohanon na si apostol Pedro, nakigbisog gihapon siya sa iyang mga kahuyangan. Niadtong 36 C.E., presente si Pedro dihang gidihogan sa Diyos ug balaang espiritu ang dili tinuling Hentil nga si Cornelio. Kini klarong nagpakita nga “ang Diyos dili mapihigon” ug ang mga dili Hudiyo puwede nga mahimong bahin sa Kristohanong kongregasyon. (Buh. 10:​34, 44, 45) Human adto, si Pedro mikaon na uban sa mga Hentil, nga wala pa niya himoa kaniadto. Pero naay pipila ka Hudiyong Kristohanon nga mibati nga ang mga Hudiyo ug Hentil dili angayng mag-uban sa pagpangaon. Dihang ang uban nga ingon anag panghunahuna miabot sa Antioquia, si Pedro wala mokaon uban sa Hentil nga mga igsoon. Lagmit nahadlok siya nga masuko ang Hudiyong mga Kristohanon. Dihang nakita ni apostol Pablo ang pagpakaaron-ingnon ni Pedro, iya siyang gibadlong atubangan sa daghang tawo. (Gal. 2:​13, 14) Bisag nasayop si Pedro, wala siya mohunong sa pag-alagad. w23.09 22 ¶8

Kon matinud-anon nimong susihon ang imong kaugalingon, naa tingali kay makita nga mga kahuyangan, pero ayawg kadismayar. ‘Maayo ang Ginoo,’ ug tabangan ka niya nga mouswag. (1 Ped. 2:3) Si apostol Pedro nagpasalig kanato: “Ang Diyos . . . magtapos mismo sa inyong pagbansay. Palig-onon mo niya.” Dihay higayon nga mibati si Pedro nga dili siya takos nga makig-uban sa Anak sa Diyos. (Luc. 5:8) Pero tungod sa mahigugmaong tabang ni Jehova ug Jesus, si Pedro nakalahutay ingong sumusunod sa Kristo. Busa si Pedro gitugotan nga “makasulod sa walay kataposang Gingharian sa atong Ginoo ug Manluluwas nga si Jesu-Kristo.” (2 Ped. 1:11) Pagkadakong panalangin! Kon molahutay ka sama kang Pedro ug magpabansay kang Jehova, madawat pod nimo ang ganti nga kinabuhing walay kataposan. ‘Ang imong pagtuo moresulta sa imong kaluwasan.’—1 Ped. 1:9. w23.09 31 ¶16-17

Ang karaang tabernakulo naay usa ka hawanan—kinoralan, lapad nga hawanan diin ginahimo sa mga saserdote ang ilang buluhaton. Naa dinhi ang dakong tumbaga nga halaran alang sa mga halad nga sinunog. Naa pod dinhi ang kawakawa nga tumbaga nga punog tubig, nga gigamit sa mga saserdote sa paghinlo sa ilang kaugalingon sa dili pa nila himoon ang ilang sagradong pag-alagad. (Ex. 30:​17-20; 40:​6-8) Karon, ang nahibilin nga mga dinihogang igsoon sa Kristo matinumanong nag-alagad dinhi sa yuta sa sulod nga hawanan sa espirituwal nga templo. Ang dakong kawakawa sa tubig maoy importanteng pahinumdom para nila ug sa tanang Kristohanon nga angay silang magpabiling hinlo sa moral ug espirituwal. Pero asa nag-alagad ang “dakong panon”? Nakita sila ni apostol Juan nga “nagbarog atubangan sa trono,” buot pasabot nagbarog sila sa yuta sa gawas nga hawanan, diin “sila naghatag [sa Diyos ug] sagradong pag-alagad adlaw ug gabii diha sa iyang templo.” (Pin. 7:​9, 13-15) Mapasalamaton gyod ta nga apil ta sa kahikayan ni Jehova sa putling pagsimba! w23.10 28 ¶15-16

Ang usa ka paagi nga gigamit ni Jehova aron hatagan tag kusog mao ang mga ansiyano. (Isa. 32:​1, 2) Busa dihang mabalaka ka, isulti kana sa mga ansiyano. Dihang motanyag silag tabang, ayaw pagduhaduha sa pagdawat niana. Pinaagi nila, si Jehova magpalig-on nimo. Ang atong binase sa Bibliya nga paglaom nga kinabuhing walay kataposan—diha man sa Paraisong yuta o sa langitnong Gingharian—makahatag sab natog kusog nga molahutay. (Roma 4:​3, 18, 19) Ang atong paglaom makahatag natog kusog sa paglahutay sa mga pagsulay, sa pagsangyaw sa maayong balita, ug paghimo sa atong lainlaing asaynment diha sa kongregasyon. (1 Tes. 1:3) Kana pod nga paglaom ang nakapalig-on kang apostol Pablo. Siya ‘gipiit pag-ayo,’ ‘naglibog,’ ‘gilutos,’ ug ‘natumba.’ Nameligro pa gani ang iyang kinabuhi. (2 Cor. 4:​8-10) Si Pablo nakabatog kusog nga molahutay kay nagpokus siya sa iyang paglaom. (2 Cor. 4:​16-18) Nagpokus siya sa iyang madawat sa umaabot nga kinabuhing walay kataposan sa langit. Gipamalandong ni Pablo ang maong paglaom, ug tungod ana, gibati niya nga siya “ginabag-o sa adlaw-adlaw.” w23.10 15-16 ¶14-17

Dihang mag-ampo, hunahunaa kon panahon na ba nga tubagon ni Jehova ang imong gihangyo. Mobati tingali ta nga kinahanglan na dayon nato ang tubag sa atong mga pag-ampo. Pero ang tinuod, si Jehova nahibalo kon kanus-a ang pinakamaayong panahon nga tabangan ta. (Heb. 4:16) Dihang dili dayon nato madawat ang atong gihangyo, maghunahuna tingali ta nga ‘Dili’ ang tubag ni Jehova. Pero basig ang iyang tubag maoy ‘Dili pa.’ Pananglitan, ang usa ka batan-ong brader nag-ampo nga maulian siya sa iyang sakit. Pero wala siya maayo. Kon giayo siya ni Jehova pinaagig milagro, basig moingon si Satanas nga ang brader padayong nag-alagad kang Jehova tungod lang kay giayo siya. (Job 1:​9-11; 2:4) Dugang pa, si Jehova naa nay gitakdang panahon sa pag-ayo sa tanang sakit. (Isa. 33:24; Pin. 21:​3, 4) Sa pagkakaron, dili ta makadahom nga ayohon ta ni Jehova sa atong mga sakit. Busa mas maayong hangyoon sa brader si Jehova nga hatagan siyag kusog ug kalinaw sa hunahuna aron makalahutay siya sa iyang sakit ug makapadayon sa pag-alagad nga matinumanon. w23.11 23 ¶13

Si Samson nakahimog seryosong sayop, pero wala siya mohunong sa pag-alagad kang Jehova. Nangita siyag kahigayonan nga tumanon ang asaynment nga gihatag sa Diyos kaniya nga pildihon ang mga Filistehanon. (Maghu. 16:​28-30) Si Samson nagpakiluoy kang Jehova: “Tugoti kong makapanimalos sa mga Filistehanon.” Gitubag sa matuod nga Diyos ang hangyo ni Samson ug gibalik ang iyang talagsaong kusog. Ingong resulta, si Samson mas daghag napatay nga Filistehanon niining higayona kay sa nangaging mga panahon. Bisag nag-antos si Samson sa pait nga resulta sa iyang sayop, naningkamot gihapon siya nga himoon ang kabubut-on ni Jehova. Busa kon makahimo tag sayop ug tul-iron ta o mawad-ag pribilehiyo, dili ta angayng mosurender. Hinumdomi nga si Jehova andam mopasaylo nato. (Sal. 103:​8, 9) Bisan pa sa atong mga sayop, puwede gihapon tang gamiton ni Jehova, sama kang Samson. w23.09 6 ¶15-16

Kon molahutay ka, mabatonan nimo ang pag-uyon ni Jehova. Wala ni magpasabot nga si Jehova nalipay nga nag-atubang kag mga pagsulay o problema. Hinuon, nalipay siya sa imong paglahutay. Dako gyong panalangin nga mabatonan ang pag-uyon sa Diyos! (Sal. 5:12) Hinumdomi nga si Abraham milahutay sa mga pagsulay ug nakabaton sa pag-uyon sa Diyos. Giisip siya ni Jehova ingong Iyang higala ug ingong matarong nga tawo. (Gen. 15:6; Roma 4:​13, 22) Ug posible pod na kanato. Ang pag-uyon sa Diyos wala magdepende sa gidaghanon sa atong gihimo sa pag-alagad kaniya o sa atong mga pribilehiyo. Hinuon, mabatonan nato ang iyang pag-uyon kon matinumanon tang molahutay. Ug bisan unsay atong edad, sirkumstansiya, o katakos, kitang tanan puwedeng makalahutay. Naa ba kay pagsulay karon nga matinumanon nimong ginaatubang? Mahupayan ka sa pagkahibalo nga nabatonan nimo ang pag-uyon sa Diyos. Ang pagkahibalo niini makapalig-on gyod sa atong paglaom. w23.12 11 ¶13-14

Ang mga brader kinahanglang maningkamot nga mahimong maayo sa pagpakigkomunikar. Ang usa ka lalaki nga maayong makigkomunikar maminaw ug mosabot sa hunahuna ug pagbati sa uban. (Prov. 20:5) Masabtan niya ang ilang tono sa tingog, ekspresyon sa nawong, ug linihokan. Dili ni nimo makat-onan kon dili ka makig-uban sa mga tawo. Kon pirme kang mogamit ug electronic nga mga tool sa pagpakigkomunikar, sama sa email ug text, basin mas malisdan ka nga mahimong maayo sa pagpakigkomunikar sa personal. Busa pangitag mga kahigayonan nga personal nimong maestorya ang uban. (2 Juan 12) Aron mohamtong ang usa ka brader, kinahanglang makakat-on pod siya nga suportahan ang iyang kaugalingon ug ang iyang pamilya. (1 Tim. 5:8) Maayo gyod nga makakat-on kag skill nga makatabang nimo sa pagpangitag trabaho. (Buh. 18:​2, 3; 20:34; Efe. 4:28) Pagkugi ug seguroa nga mahuman nimo ang trabaho nga imong sugdan. Mamatikdan ni sa uban ug makatabang ni nga makabaton kag maayong reputasyon. Kon imo ning himoon, mas dali kang makakitag trabaho ug makapabilin niana. w23.12 27 ¶12-13

Dihang ang Bibliya maghisgot bahin sa “adlaw ni Jehova,” kini nagtumong sa panahon nga laglagon ni Jehova ang iyang mga kaaway ug luwason ang iyang katawhan. Kaniadto, may mga panahon nga si Jehova nagpahamtang ug silot sa iyang mga kaaway. (Isa. 13:​1, 6; Ezeq. 13:5; Sof. 1:8) Sa atong panahon, ang “adlaw ni Jehova” magsugod dihang atakehon ang Bantogang Babilonya ug matapos sa gubat sa Armagedon. Aron maluwas nianang adlawa, kinahanglan tang mangandam karon. Gitudloan ta ni Jesus nga dili lang kay basta mahimo tang andam sa “dakong kasakitan,” kondili “andam kanunay” alang niini. (Mat. 24:21; Luc. 12:40) Sa unang sulat ni Pablo sa mga taga-Tesalonica, migamit siyag mga ilustrasyon aron tabangan ang mga Kristohanon nga mahimong andam sa dakong adlaw ni Jehova sa paghukom. Nahibalo si Pablo nga ang adlaw ni Jehova dili pa moabot niadtong panahona. (2 Tes. 2:​1-3) Pero iya gihapong gidasig ang mga Kristohanon kaniadto nga mangandam nianang adlawa, nga sama bag moabot kana pagkasunod adlaw, ug mapadapat pod nato ang iyang tambag. w23.06 8 ¶1-2

Niadtong 1978, ang 60 ka andana nga bilding sa Tokyo, Japan natukod. Ang mga tawo naghunahuna kon makaya kaha sa bilding ang mga linog nga pirmeng mahitabo sa maong siyudad. Unsay sekreto sa mga engineer? Ilang gidisenyo ang bilding nga lig-on pero flexible ra sa mga pag-uyog sa yuta. Ang mga Kristohanon parehas nianang taas nga bilding. Sa unsang paagi? Ang usa ka Kristohanon kinahanglang balanse sa pagpakitag kalig-on ug pagka-flexible. Kinahanglang lig-on siya ug dili matarog kon bahin sa pagsunod sa mga balaod ug sukdanan ni Jehova. Siya “andam mosunod” ug dili mokompromiso. Pero kinahanglang “makataronganon,” o flexible, pod siya kon itugot sa kahimtang o kon gikinahanglan. (Sant. 3:17) Ang Kristohanon nga balanse niining bahina dili sobra ka estrikto o sobra ka luag. w23.07 14 ¶1-2

Kinahanglang suklan ni Jesus ang mga tentasyon ni Satanas nga Yawa, apil na ang direktang mga pag-atake sa iyang pagkamaunongon sa Diyos. (Mat. 4:​1-11) Si Satanas determinado sa pagtental kang Jesus aron makasala siya ug dili niya mahatag ang lukat. Sa ministeryo ni Jesus dinhi sa yuta, daghan pa siyag giatubang nga pagsulay. Gilutos siya ug gisulayag patay sa iyang mga kaaway. (Luc. 4:​28, 29; 13:31) Kinahanglan pod niyang pailoban ang pagkadili-hingpit sa iyang mga sumusunod. (Mar. 9:​33, 34) Dihang gihusay siya, gipaantos siya ug gipakaulawan. Dayon gipatay siya ingong kriminal. Sakit gyod kaayo to ug makauulaw. (Heb. 12:​1-3) Kinahanglan niyang lahutayon ang kataposang bahin sa iyang pagsulay nga wala ang tabang ug proteksiyon ni Jehova. (Mat. 27:46) Klaro nga dako kaayo ang gibayad ni Jesus aron mahatag ang lukat. Dili ba mas molalom ang atong gugma kang Jesus dihang mamalandong ta sa tanang sakripisyo nga kinabubut-on niyang gihimo para nato? w24.01 10-11 ¶7-9

Ang pailob makatabang aron naa tay maayong relasyon sa uban. Makatabang ni nato nga maminaw pag-ayo dihang mosulti ang uban. (Sant. 1:19) Ang pailob makaamot pod sa kalinaw. Kon mapailobon ta, dili dayon ta mo-react ug mosultig sakit nga mga pulong dihang ma-stress ta. Dili pod ta daling masuko kon naay masulti o mahimo ang uban nga makapasakit nato. Imbes nga mobalos, kita ‘padayong magpailob sa usag usa ug kinasingkasing nga magpinasayloay.’ (Col. 3:​12, 13) Ang pailob makatabang pod nato sa paghimog maayong desisyon. Imbes nga magdalidali, mogahin tag panahon sa pag-research bahin sa atong mga kapilian ayha modesisyon kon unsay pinakamaayong himoon. Pananglitan, dihang mangita tag trabaho, basig dawaton na lang dayon nato ang unang trabaho nga itanyag kanato. Pero kon mapailobon ta, mogahin tag panahon nga konsiderahon ang posibleng epekto sa trabaho diha sa atong pamilya ug espirituwal nga kalihokan. Pinaagi sa pagpailob, malikayan nato ang paghimog dili maayong desisyon. w23.08 22 ¶8-9

Maluya tingali ka tungod sa imong sayop nga mga tinguha. Pero kon imong hunahunaon ang imong panaad kang Jehova dihang nagpahinungod ka kaniya, molig-on ang imong determinasyon nga suklan ang tentasyon. Ngano? Dihang nagpahinungod ka kang Jehova, imo nang gidumilian ang imong kaugalingon. Nagpasabot na nga gisalikway na nimo ang mga tinguha ug ambisyon nga dili makapalipay kang Jehova. (Mat. 16:24) Busa dihang mag-atubang kag pagsulay, dili na ka kinahanglang magsigeg hunahuna kon unsay himoon. Nakadesisyon na ka nga dumilian kanang tanan ug magpabiling matinumanon kang Jehova. Determinado ka nga lipayon siya. Pinaagi ana, imong gisundog si Job. Bisag nag-atubang siyag lisod kaayo nga mga pagsulay, siya determinadong miingon: “Dili gyod nako wad-on ang akong integridad!”—Job 27:5. w24.03 9 ¶6-7

Si Jehova, “ang Diyos sa gugma,” nagauban kanato! (2 Cor. 13:11) Interesado siya sa matag usa kanato. Kombinsido ta nga “gipalibotan [ta] sa Iyang maunongong gugma.” (Sal. 32:10) Kon pamalandongon nato pirme kon giunsa niya pagpakita ang iyang gugma kanato, mas bation nato nga gimahal gyod ta niya. Ug tungod ana, mas masuod ta kaniya. Makaampo ta niya bisag kanus-a ug puwede natong isulti nga kinahanglan kaayo nato ang iyang gugma. Masulti pod nato kaniya ang tanan natong gikabalak-an, kay nahibalo ta nga makasabot siya ug gusto kaayo niyang motabang nato. (Sal. 145:19) Sama nga mangita tag kainit panahon sa tingtugnaw, mangita pod ta sa mainitong gugma ni Jehova. Bisag gamhanan ang gugma ni Jehova, kini sab mabination. Busa dawata ang gugma ni Jehova diha sa imong kinabuhi. Ug hinaot kitang tanan makaingon: “Gihigugma nako si Jehova”!—Sal. 116:1. w24.01 31 ¶19-20

Wala lang basta sultihi ni Jesus ang mga tawo nga Jehova ang ngalan sa Diyos. Ang mga Hudiyo nga gitudloan ni Jesus nahibalo na niana. Hinuon, si Jesus nanguna sa ‘pagpatin-aw Kaniya.’ (Juan 1:​17, 18) Pananglitan, gipakita sa Hebreohanong Kasulatan nga si Jehova maluluy-on ug mabination. (Ex. 34:​5-7) Pero mas gipatin-aw kana ni Jesus pinaagi sa paghatag ug ilustrasyon bahin sa milayas nga anak ug sa iyang amahan. Mabasa nato nga “samtang layo pa” ang mahinulsolong anak, nakita na siya sa iyang amahan. Midagan ang amahan aron sugaton siya, gigakos siya, ug kinasingkasing siyang gipasaylo. Kini nga ilustrasyon klarong nagpakita kon unsa ka maluluy-on ug mabination si Jehova. (Luc. 15:​11-32) Gipakita gyod ni Jesus kon unsang klaseha sa Amahan si Jehova. w24.02 10 ¶8-9

Ang paghupay gikan kang Jehova makarepresko niadtong nabug-atan sa mga problema. Unsaon nato pagsundog si Jehova, kinsa mibatig kaluoy ug naghupay sa uban? Ang usa ka paagi mao ang pag-ugmad ug mga hiyas nga magpalihok sa atong kasingkasing nga hupayon ang uban. Unsa ang pipila niini nga mga hiyas? Unsay makatabang aron mamentinar nato ang gugma nga atong gikinahanglan aron ‘makapadayon [ta] sa paghupay sa usag usa’ kada adlaw? (1 Tes. 4:18) Kinahanglan natong ugmaron ang mga hiyas sama sa simpatiya, inigsoong pagmahal, ug pagkamaayo. (Col. 3:12; 1 Ped. 3:8) Nganong makatabang nato kini nga mga hiyas? Kon ang kaluoy ug ang mga hiyas nga konektado niini mahimo nang bahin sa atong personalidad, mapalihok gyod ta nga hupayon ang mga nag-antos. Sama sa giingon ni Jesus, “gikan sa kadagaya sa kasingkasing ang baba mosulti. Ang maayong tawo magsultig maayo kay maayong mga butang ang anaa sa iyang kasingkasing.” (Mat. 12:​34, 35) Ang atong paghupay sa mga igsoon maoy importante kaayong paagi nga mapakita nato ang atong gugma kanila. w23.11 10 ¶10-11

Kinahanglang mangayo tag tabang aron masabtan nato ang mga tagna sa Bibliya. Konsideraha ni nga ilustrasyon. Imadyina nga miadto ka sa usa ka lugar nga dili ka pamilyar. Pero kauban nimo ang imong higala nga suheto kaayo sa lugar. Kabalo siya kon asa na mo dapita ug kon asa padulong ang matag dalan. Seguradong nalipay ka nga giubanan ka sa imong higala! Sa samang paagi, nahibalo si Jehova kon asa na ta sa dagan sa panahon ug kon unsay naa sa unahan. Busa aron masabtan ang mga tagna sa Bibliya, kinahanglang mapainubsanon tang mangayog tabang kang Jehova. (Dan. 2:28; 2 Ped. 1:​19, 20) Sama sa usa ka maayong ginikanan, gusto ni Jehova nga ang iyang mga anak makabaton ug malipayong kaugmaon. (Jer. 29:11) Pero dili sama sa tawhanong ginikanan, nahibalo si Jehova kon unsay mahitabo sa umaabot, ug dili gyod siya masayop. Iyang gipasulat ang mga tagna sa Bibliya aron mahibalo ta bahin sa importanteng mga hitabo sa dili pa kini moabot.—Isa. 46:10. w23.08 8 ¶3-4