Septiyembre

Ang Diyos naghatag kang Jesus ug gahom sa pagsulbad sa tanang problema sa mga tawo. Pinaagi sa iyang mga milagro, gipakita ni Jesus nga naa siyay gahom sa pagsulbad sa mga problema nga dili nato kayang sulbaron. Pananglitan, naa siyay gahom sa pagsulbad sa pinakahinungdan sa mga problema sa tawo—ang napanunod nga sala ug ang mga epekto niini, ang sakit ug kamatayon. (Mat. 9:​1-6; Roma 5:​12, 18, 19) Ang iyang mga milagro nagpamatuod nga kaya niyang ayohon ang “tanang matang sa sakit” ug makabanhaw pa gani siyag mga patay. (Mat. 4:23; Juan 11:​43, 44) Naa pod siyay gahom sa pagkontrol sa kusog kaayong mga unos ug sa pagpildi sa daotang mga espiritu. (Mar. 4:​37-39; Luc. 8:2) Makapadasig gyong mahibaloan nga gihatagan ni Jehova ang iyang Anak ug ingon ana ka dakong gahom! Makasalig gyod ta nga matuman ang tanang gisaad nga mga panalangin sa Gingharian sa Diyos. Ang mga milagro nga gihimo ni Jesus kaniadto nagtudlo nato kon unsay iyang himoon sa tibuok yuta ingong langitnong Hari sa Gingharian sa Diyos. w23.04 3 ¶5-7

Kon dako ang inyong kongregasyon ug dili ka pirmeng matawag, basin maghunahuna ka nga di na lang mokomento. Pero ayaw padala sa imong gibati ug paningkamot gihapon nga mokomento. Puwede kang mag-andam ug pipila ka komento kada tigom. Kon dili ka matawag sa unang mga parapo, makakomento gihapon ka sa sunod nga mga parapo. Dihang mangandam sa Pagtuon sa Bantayanang Torre, hunahunaa kon unsay koneksiyon sa matag parapo sa katibuk-ang tema sa artikulo. Kon imo nang himoon, makaandam kag maayong mga komento sa tibuok pagtuon. Puwede pod kang mag-andam ug komento sa mga parapo nga naghisgot sa lawom nga mga kamatuoran nga mas lisod ipatin-aw. Ngano? Kay gamay ra tingali ang mokomento nianang mga parapoha. Pero unsay imong buhaton kon wala gihapon ka matawag sa pipila na ka tigom? Sa dili pa magsugod ang tigom, sultihi ang tigdumala kon asa nga parapo ka gustong motubag. w23.04 21-22 ¶9-10

Si Jose andam mosunod sa direksiyon ni Jehova, ug tungod ana nahimo siyang mas maayong bana. Sa Bibliya, dihay tulo ka higayon nga nakadawat siyag instruksiyon sa Diyos bahin sa iyang pamilya. Sa matag higayon, misunod dayon siya, bisan pag dili to sayon himoon. (Mat. 1:20; 2:​13-15, 19-21) Kay gisunod ni Jose ang direksiyon sa Diyos, iyang naprotektahan ug naatiman si Maria ug natagan-an ang iyang panginahanglan. Seguradong nakapalalom ni sa gugma ug pagtahod ni Maria kang Jose! Mga bana, masundog ninyo si Jose pinaagi sa pagpangitag tambag diha sa Bibliya bahin sa pag-atiman sa inyong pamilya. Kon inyong ipadapat ni nga tambag bisan pag usahay lisod ning himoon, inyong gipakita nga gimahal ninyo ang inyong asawa ug mas molig-on ang inyong kaminyoon. Ang usa ka sister sa Vanuatu, nga kapig 20 ka tuig nang minyo, miingon: “Dihang ang akong bana mangita ug mosunod sa giya ni Jehova, mas modako ang akong pagtahod niya. Kampante ko, ug naa koy pagsalig sa iyang mga desisyon.” w23.05 21 ¶5

Ang mga Hudiyo nga mamalik gikan sa Babilonya mahimo unyang “balaang katawhan” para sa ilang Diyos. (Deut. 7:6) Pero wala na magpasabot nga sila dili na kinahanglang mohimog mga kausaban aron mapalipay si Jehova. Kadaghanang Hudiyo nga didto na natawo sa Babilonya tingali naanad na sa panghunahuna ug paagi sa pagkinabuhi sa mga taga-Babilonya. Daghang tuig human makabalik ang unang grupo sa mga Hudiyo sa Israel, si Gobernador Nehemias nakurat dihang nahibaloan niya nga ang mga bata nga natawo sa Israel dili gani makasulti sa pinulongan sa mga Hudiyo. (Deut. 6:​6, 7; Neh. 13:​23, 24) Unsaon man nila paghigugma ug pagsimba kang Jehova kon dili sila makasabot sa pinulongang Hebreohanon—ang pangunang gigamit sa pagsulat sa Pulong sa Diyos? (Esd. 10:​3, 44) Busa ang namalik nga mga Hudiyo kinahanglan gyong mohimog dagkong kausaban, pero mas sayon ning himoon kay naa na sila sa Israel, diin ang putling pagsimba anam-anam nang gibalik.—Neh. 8:​8, 9. w23.05 15 ¶6-7

Dili kalikayan nga bisag ganado kaayo ta o disiplinado, naay mga panahon nga dili nato mahimo ang atong giplano. Pananglitan, ang mga “wala damhang panghitabo” makakuha sa atong panahon nga para unta sa pagkab-ot sa atong tumong. (Eccl. 9:11) Usahay, naa poy mga problema nga makapaluya nato. (Prov. 24:10) Ug kay dili ta hingpit, naa tingali tay mahimo nga makapugong nato sa pagkab-ot sa atong tumong. (Roma 7:23) O kaha gikapoy lang gyod ta. (Mat. 26:43) Unsay makatabang nato nga dili maluya kon naay mga panahon nga dili nato mahimo ang atong giplano? Hinumdomi nga kon wala nimo mahimo ang imong giplano, wala na magpasabot nga pakyas na ka. Ang Bibliya nag-ingon nga mahimong balikbalik tang makasinatig mga problema o kalisdanan. Pero klaro pod ning nag-ingon nga makabangon ra ta. Oo, kon mopadayon ka bisag lisod usahay, imong mapakita kang Jehova nga gusto nimo siyang lipayon. Seguradong malipay si Jehova nga makita ka nga naningkamot sa pagkab-ot sa imong tumong! w23.05 30 ¶14-15

Ang pagpayunir makatabang sa mga batan-on nga makakat-on sa pagpakig-uban sa lainlaing personalidad. Makatabang pod ni nila nga makakat-on sa pag-budget. (Filip. 4:​11-13) Ang maayong paagi aron maandam sa bug-os panahong pag-alagad mao ang pag-oksilyare payunir, nga makatabang nila nga maandam sa pagregular payunir. Ang pagpayunir mag-abli sa ubang kahigayonan sa bug-os panahong pag-alagad, apil na ang pag-alagad ingong construction servant o Bethelite. Ang mga brader kinahanglang naay tumong nga mahimong kuwalipikado sa pag-alagad sa mga igsoon ingong ansiyano. Ang Bibliya nag-ingon nga ang mga brader nga nangab-ot niini nga pribilehiyo “nagtinguhag maayong buhat.” (1 Tim. 3:1) Una, ang usa ka brader kinahanglang mokuwalipikar ingong ministeryal nga alagad. Ang ministeryal nga mga alagad nagtabang sa mga ansiyano sa daghang praktikal nga paagi. Ang mga ansiyano ug ministeryal mapainubsanong nag-alagad sa mga igsoon ug madasigong nakigbahin sa ministeryo. w23.12 28 ¶14-16

Si Haring Josias batan-on pa dihang misugod siya sa pagpangita kang Jehova. Gusto siyang mahibalo bahin kang Jehova ug himoon ang Iyang kabubut-on. Pero dili sayon ang kinabuhi niining batan-ong hari. Kinahanglan niyang depensahan ang putling pagsimba sa panahon nga kaylap kaayo ang bakak nga pagsimba. Ug gihimo gyod to niya! Sa wala pa mag-20 anyos si Josias, gisugdan niya pagwagtang ang bakak nga pagsimba sa Juda. (2 Cron. 34:​1, 2) Bisag batan-on pa kaayo ka, masundog nimo si Josias pinaagi sa pagpangita kang Jehova ug pagkat-on bahin sa Iyang nindot nga mga hiyas. Kon imo nang himoon, mapalihok ka nga ipahinungod ang imong kaugalingon kaniya. Unsay gipasabot niana sa imong pagkinabuhi? Si Luke, nga nabawtismohan sa edad nga 14, miingon, “Sukad karon, unahon nako sa akong kinabuhi ang pag-alagad kang Jehova ug maningkamot ko nga mapalipay siya.” (Mar. 12:30) Maayo gyod ang resulta kon imo pod nang himoon! w23.09 11 ¶12-13

Dihang gisulatan ni apostol Pablo ang mga Kristohanon sa Tesalonica, wala pay usa ka tuig ang ilang kongregasyon. Posible nga ang mga nagdumala didto dili pa eksperyensiyado ug nakahimog mga sayop. Pero angay gihapon silang tahoron. Samtang magkaduol ang dakong kasakitan, kinahanglan tingali tang mas mosalig sa mga ansiyano para sa direksiyon, nga labaw pa sa atong ginahimo karon. Mawad-an tingali tag kontak sa hedkuwarter ug sangang buhatan maong karon pa lang, importante nga atong higugmaon ug tahoron ang mga ansiyano. Bisag unsa pay mahitabo, huptan nato ang maayong panghunahuna, nga dili magpokus sa ilang sayop o kahuyangan. Hinuon, hunahunaon nato nga si Jehova ang naggiya niining matinumanong mga lalaki pinaagi sa Kristo. Sama sa helmet nga manalipod sa ulo sa sundalo, ang atong paglaom sa kaluwasan manalipod sa atong panghunahuna. Isipon nato nga walay pulos ang mga butang nga gitanyag sa kalibotan. (Filip. 3:8) Ang atong paglaom makatabang nato nga magpabiling kalmado ug lig-on. w23.06 11-12 ¶11-12

Kadtong nakadungog sa “babayeng buangbuang” kinahanglang modesisyon: Dawaton ba nila ang iyang imbitasyon o dili? Naay seryoso kaayong mga rason kon nganong angay natong likayan ang seksuwal nga imoralidad. Ang “babayeng buangbuang” nag-ingon: “Tam-is ang kinawat nga tubig.” (Prov. 9:17) Unsa ang “kinawat nga tubig”? Sa Bibliya, ang seksuwal nga relasyon sa magtiayon gipakasamag makarepresko nga tubig. (Prov. 5:​15-18) Ang bana ug asawa malipay sa haom nga seksuwal nga mga buhat sulod sa ilang kaminyoon. Pero lahi kaayo ang “kinawat nga tubig.” Kini mahimong nagtumong sa gidili, imoral nga pakigsekso. Sagad ginahimo ni sa tago, sama sa kawatan nga sagad mangawat sa tago. Ang “kinawat nga tubig” daw tam-is para niadtong naghunahuna nga dili sila masakpan sa ilang sala. Pero giilad lang nila ang ilang kaugalingon! Nakita ni Jehova ang tanan. Wala nay mas pait pa kay sa mawad-an sa pag-uyon ni Jehova; dili gyod na “tam-is.”—1 Cor. 6:​9, 10. w23.06 22 ¶7-9

Komosta kon mibati ka nga dili na kinasingkasing ang imong mga pag-ampo o dili na kaayo ka ganahang mosangyaw? Kon mao ni ang imong gibati, ayawg hunahunaa nga wala na ka uyoni ni Jehova. Kay dili ka hingpit, mag-usab-usab ang imong emosyon. Kon dili na sama kaniadto ang imong kadasig, pamalandonga ang ehemplo ni apostol Pablo. Bisag naningkamot siya nga sundogon si Jesus, nahibalo siya nga usahay wala siyay gana nga himoon kon unsay gikinahanglan. Determinado si Pablo nga tumanon ang iyang ministeryo bisag unsa pay iyang gibati nianang higayona. Sa susama, ayawg tugoti nga ang imong emosyon maoy modiktar sa imong mga desisyon. Magmadeterminado nga himoon kon unsay husto bisag unsa pay imong gibati. Kon padayon nimong himoon kon unsay husto, sa ngadtongadto mausab ra pod ang imong gibati.—1 Cor. 9:16. w24.03 11-12 ¶12-13

Makapakita tag gugma sa atong mga igsoon pinaagi sa pagpakighigala ug paggahin ug panahon kanila. (2 Cor. 6:​11-13) Sa daghang kongregasyon, ang mga igsoon lainlaig kagikan ug personalidad. Mapalig-on nato ang atong gugma kanilang tanan kon magpokus ta sa ilang maayong mga hiyas. Kon sundogon nato ang panglantaw ni Jehova sa mga igsoon, atong gipamatud-an nga gimahal nato sila. Importante ang gugma panahon sa dakong kasakitan. Dihang magsugod na ang dakong kasakitan, unsaon ta pagpanalipod ni Jehova? Matikdi kon unsay gisugo ni Jehova sa iyang katawhan dihang giatake ang karaang Babilonya: “Lakaw, akong katawhan, sulod sa inyong kinasulorang mga lawak, ug sirhi ang mga pultahan. Panago usa mo kadiyot hangtod nga ang kasuko molabay.” (Isa. 26:20) Posibleng mapadapat pod nato na panahon sa dakong kasakitan. w23.07 6-7 ¶14-16

Paningkamoti nga mailhan ka sa uban ingong makataronganong tawo. Pangutan-a imong kaugalingon: ‘Nailhan ba ko sa mga tawo ingong makataronganon, andam magpaubos, ug masinabtanon? O para ba nila estrikto o isog ko? Maminaw ba ko nila ug mosunod sa ilang gusto kon posible?’ Kon maningkamot ta nga magmakataronganon, atong gipakita nga gisundog nato si Jehova ug Jesus. Mapakita nato ang pagkamakataronganon kon andam tang mo-adjust dihang mausab ang atong kahimtang. Ang maong mga kausaban usahay moresultag wala damhang mga kalisdanan. Basin kalit tang masakit. O kaha kalit nga mausab ang kahimtang sa ekonomiya o politika ug maapektohan pag-ayo ang atong kinabuhi. (Eccl. 9:11) Malisdan pod tingali ta kon mausab ang atong asaynment sa organisasyon ni Jehova. Maka-adjust ta sa bag-ong kahimtang kon himoon nato kining upat ka butang: (1) dawata ang realidad, (2) pagpokus sa umaabot, (3) pabiling positibo, ug (4) paghimog maayo sa uban. w23.07 22 ¶7-8

Si propetang Daniel batan-on pa dihang gibihag siya gikan sa iyang yutang natawhan ug gidala sa Babilonya. Pero nakadayeg ang mga opisyales sa Babilonya sa ilang nakita kang Daniel—siya “walay depekto, maayog barog,” ug naggikan sa prominenteng pamilya. (1 Sam. 16:7) Tungod ana, ila siyang gibansay aron mag-alagad sa palasyo. (Dan. 1:​3, 4, 6) Gimahal ni Jehova si Daniel tungod sa iyang desisyon nga magkinabuhi sa paagi nga makapalipay kang Jehova. Gani, mga 20 pa tingali ang edad ni Daniel dihang si Jehova miingon nga si Daniel matarong nga tawo sama ni Noe ug Job, kinsa matinumanong nag-alagad sa Diyos sa daghang katuigan. (Gen. 5:32; 6:​9, 10; Job 42:​16, 17; Ezeq. 14:14) Ug padayong gihigugma ni Jehova si Daniel hangtod sa iyang pagkatigulang.—Dan. 10:​11, 19. w23.08 2 ¶1-2

Kon magplano kang mopalit ug balay, gusto nimong susihon ang tanang detalye sa balay nga imong puy-an sa umaabot. Puwede pod nato nang himoon dihang magbasa ta ug magtuon sa Bibliya. Kon dalidalion lang nimo nig basa, makat-onan lang tingali nimo ang pangunang mga kamatuoran—ang “simpleng mga butang bahin sa sagradong mga pahayag sa Diyos.” (Heb. 5:12) Pero sama sa balay, kinahanglan kang “mosulod” aron makita ang daghang detalye niini. Ang usa ka maayo kaayong paagi sa pagtuon sa Bibliya mao ang pagsusi kon sa unsang paagi ang lainlaing bahin sa mensahe niini konektado sa usag usa. Paningkamoti nga masabtan kon unsa nga mga kamatuoran ang imong gituohan ug kon nganong nagtuo ka niana. Aron bug-os natong masabtan ang Pulong sa Diyos, kinahanglan natong tun-an ang lawom nga mga kamatuoran sa Bibliya. Gidasig ni apostol Pablo ang iyang mga isigka-Kristohanon nga magkugi sa pagtuon sa Pulong sa Diyos aron “bug-os [nilang] masabtan kon unsa ang gilapdon ug gitas-on ug gihabogon ug giladmon sa kamatuoran.” Pinaagi niana, ang ilang pagtuo mas ‘makagamot ug lig-ong matukod.’ (Efe. 3:​14-19) Kinahanglan pod nato nang himoon. w23.10 18 ¶1-3

Ang Bibliya daghan pag ehemplo sa mga tawong mapailobon. Puwede nimong himoong study project ang pagsusi sa ilang ehemplo. Pananglitan, batan-on pa kaayo si David dihang gidihogan siya ingong sunod nga hari sa Israel, pero naghulat pa siyag daghang tuig ayha siya naentrono ingong hari. Si Simeon ug Ana matinumanong nagsimba kang Jehova samtang nagpaabot sa gisaad nga Mesiyas. (Luc. 2:​25, 36-38) Samtang imong tun-an ang ilang ehemplo, pangitaa ang tubag niini nga mga pangutana: Unsa kahay nakatabang nila nga magpailob? Sa unsang paagi nakabenepisyo sila sa ilang pagpailob? Unsaon nako sila pagsundog? Makakat-on pod ka kon imong tun-an kadtong wala magpakitag pailob. (1 Sam. 13:​8-14) Hunahunaa ni: ‘Ngano kahang nawad-an silag pailob, ug unsay resulta niini?’ w23.08 25 ¶15

Si apostol Pedro maunongon; wala niya tugoti nga naay makapahunong niya sa pag-alagad. Pananglitan, dihay higayon nga naay gisulti si Jesus nga wala masabti sa iyang mga tinun-an. (Juan 6:68) Daghan ang wala mangutana kon unsa gyoy gipasabot ni Jesus ug mihunong sa pagsunod kaniya. Pero lahi si Pedro. Giila niya nga si Jesus lang ang dunay “mga pulong nga motultol sa kinabuhing walay kataposan.” Nahibalo si Jesus nga biyaan siya ni Pedro ug sa ubang apostoles. Bisan pa niana, gipahayag ni Jesus ang iyang pagsalig nga si Pedro mobalik ug magpabiling matinumanon. (Luc. 22:​31, 32) Nakasabot si Jesus nga “andam ang espiritu, apan luya ang unod.” (Mar. 14:38) Busa bisag gilimod siya ni Pedro, wala mawad-ig paglaom si Jesus kaniya. Human mabanhaw si Jesus, nagpakita siya kang Pedro—dayag nga dihang nag-inusara si Pedro. (Mar. 16:7; Luc. 24:34; 1 Cor. 15:5) Seguradong nakadasig gyod to sa naguol kaayo nga apostol! w23.09 22 ¶9-10

Pasayloon, o papason, sa Diyos ang mga sala niadtong magpakitag pagtuo kaniya. Bug-os niya silang pasayloon ug dili na niya hinumdoman pa ang ilang mga sala. (Sal. 32:​1, 2) Isipon niya ang maong mga tawo ingong walay ikasaway ug matarong tungod sa ilang pagtuo. Bisag gitawag sila nga matarong, si Abraham, David, ug ang ubang matinumanong magsisimba sa Diyos dili gihapon hingpit. Pero tungod sa ilang pagtuo, giisip sila sa Diyos ingong walay ikasaway, ilabina kon ikompara niadtong wala mag-alagad kaniya. (Efe. 2:12) Sama sa gipatin-aw ni apostol Pablo sa iyang sulat, ang pagtuo importante kaayo aron naa tay suod nga relasyon sa Diyos. Si Abraham ug David giisip nga mga higala sa Diyos tungod sa ilang pagtuo kaniya. Masuod pod ta sa Diyos kon duna tay pagtuo. w23.12 3 ¶6-7

Pribilehiyo sa tanang Kristohanon karon nga magtanyag ug mga halad kang Jehova pinaagi sa paggamit sa ilang panahon, kusog, ug materyal nga mga butang para sa Gingharian sa Diyos. Mapakita nato nga atong gipabilhan ang atong pribilehiyo sa pagsimba kang Jehova pinaagi sa paghatag kaniya sa atong kinamaayohan. Gihisgotan ni apostol Pablo ang lainlaing bahin sa atong pagsimba nga dili nato angayng balewalaon. (Heb. 10:​22-25) Apil niini ang pag-ampo kang Jehova, pagsangyaw bahin sa atong paglaom, pagtigom ingong kongregasyon, ug pagdinasigay sa usag usa “ilabina gyod samtang makita [nato] nga ang adlaw [ni Jehova] nagkaduol na.” Sa ulahing mga kapitulo sa Pinadayag, ang anghel ni Jehova kaduha miingon agig pagpasiugda: “Ang Diyos maoy simbaha!” (Pin. 19:10; 22:9) Hinaot nga dili nato kalimtan kining lawom nga espirituwal nga kamatuoran bahin sa dakong espirituwal nga templo ni Jehova ug ang atong talagsaong pribilehiyo nga simbahon ang atong Labing Gamhanang Diyos! w23.10 29 ¶17-18

Gusto natong tanan nga ‘padayong higugmaon ang usag usa.’ Pero angay natong hinumdoman ang pasidaan ni Jesus nga “mobugnaw ang gugma sa kadaghanan.” (Mat. 24:12) Si Jesus wala mag-ingon nga mahitabo ni sa kadaghanan sa iyang mga tinun-an. Bisan pa niana, kinahanglan tang magpabiling alerto aron dili ta maimpluwensiyahan sa kawalay-gugma sa mga tawo sa atong palibot. Busa atong konsiderahon kining importanteng pangutana: Naa bay paagi aron mahibaloan nato kon lig-on ba ang atong gugma sa mga igsoon? Ang usa ka paagi aron mahibaloan kon lig-on ba ang atong gugma mao ang pagsusi kon giunsa nato pag-atubang ang pipila ka situwasyon. (2 Cor. 8:8) Gihisgotan ni apostol Pedro ang usa niana nga situwasyon: “Labaw sa tanan, batoni ang init nga gugma sa usag usa, kay ang gugma magtabon sa daghang sala.” (1 Ped. 4:8) Busa ang atong reaksiyon sa kahuyangan ug kasaypanan sa mga igsoon magpaila kon lig-on ba ang atong gugma kanila. w23.11 10-11 ¶12-13

Dili nato masunod ang sugo ni Jesus bahin sa gugma kon pipila lang ka igsoon sa kongregasyon ang atong pakitaag gugma. Tinuod, mas suod tingali ta sa ubang igsoon, sama sa kahimtang ni Jesus. (Juan 13:23; 20:2) Pero gipahinumdoman ta ni apostol Pedro nga kinahanglang maningkamot ta nga magpakitag “inigsoong pagmahal” sa tanan natong igsoon, nga samag pamilya nato sila. (1 Ped. 2:17) Gidasig ta ni Pedro nga ‘higugmaon pag-ayo ang usag usa nga kinasingkasing.’ (1 Ped. 1:22) Niini nga konteksto, ang paghigugma “pag-ayo” nagpasabot nga higugmaon nato ang usa ka tawo bisag lisod ning himoon. Pananglitan, komosta kon napasakitan ka sa usa ka igsoon? Sa primero, basin gusto natong mobalos imbes magpakitag gugma. Pero nakakat-on si Pedro kang Jesus nga ang pagbalos dili makapalipay sa Diyos. (Juan 18:​10, 11) Si Pedro misulat: “Ayaw balosig kadaot ang kadaot o balosig insulto ang insulto. Hinuon, balosi kinig panalangin.” (1 Ped. 3:9) Kon naa kay dakong gugma, mapalihok ka nga magpakitag kaayo ug konsiderasyon. w23.09 29 ¶9-11

Ang bata paspas gyong modako ug mohamtong, nga mora bag awtomatiko ning mahitabo. Pero ang pagkahimong hamtong nga Kristohanon dili gyod awtomatiko; nagkinahanglan nig paningkamot. (1 Cor. 13:11; Heb. 6:1) Aron mahimong hamtong nga Kristohanon, kinahanglang naa tay suod nga relasyon kang Jehova. Gikinahanglan pod nato ang iyang balaang espiritu samtang nag-ugmad tag maayong mga hiyas, nagkat-on ug praktikal nga mga skill, ug nangandam sa umaabot nga mga responsibilidad. (Prov. 1:5) Gihimo ni Jehova ang mga tawo nga lalaki o babaye. (Gen. 1:27) Klaro nga ang lalaki ug babaye managlahi sa pisikal, pero managlahi pod sila sa ubang paagi. Pananglitan, gihimo ni Jehova ang lalaki ug babaye nga naay espesipikong mga responsibilidad, maong nagkinahanglan silag mga hiyas ug skill nga motabang nila sa paghimo niini nga mga responsibilidad.—Gen. 2:18. w23.12 18 ¶1-2

Gusto ba ni Jesus nga gamiton sa uban ang personal nga ngalan sa iyang Amahan? Oo. Ang ubang panatiko nga mga lider sa relihiyon niadtong panahona lagmit nagtuo nga sagrado ra kaayo ang ngalan sa Diyos maong dili ni angayng litokon. Pero wala tugoti ni Jesus ang maong dili Kasulatanhong panghunahuna nga mopugong niya sa pagpasidungog sa ngalan sa iyang Amahan. Konsideraha kon unsay nahitabo dihang giayo niya ang tawong gidemonyohan didto sa rehiyon sa mga Gerasanhon. Ang mga tawo nahadlok kaayo ug gihangyo nila si Jesus nga mobiya, busa wala siya magpabilin nianang lugara. (Mar. 5:​16, 17) Pero gusto ni Jesus nga mailhan sa mga tawo didto ang ngalan ni Jehova. Busa gisugo niya ang tawo nga iyang giayo nga sultihan ang uban, dili kon unsay gihimo ni Jesus para niya, kondili kon unsay gihimo ni Jehova. (Mar. 5:19) Kana poy gusto niya karon—nga atong ipaila ang ngalan sa iyang Amahan sa tibuok kalibotan! (Mat. 24:14; 28:20) Kon ato nang himoon, mapalipay nato ang atong Hari, si Jesus. w24.02 10 ¶10

Panalangin gyod nga mahimong bahin sa organisasyon ni Jehova niining lisod kaayo nga kataposang mga adlaw. Nagkagrabe na ang kahimtang sa kalibotan, pero si Jehova naghatag natog mga igsoon nga andam motabang nato. (Sal. 133:1) Gitabangan sab ta niya nga mahimong malipayon ang atong pamilya. (Efe. 5:33–6:1) Ug gihatagan ta niyag kaalam ug pagsabot aron naa tay kalinaw sa hunahuna. Pero kinahanglan tang maningkamot nga makapadayon sa pag-alagad nga matinumanon kang Jehova. Ngano? Kay usahay tungod sa pagkadili-hingpit, naay masulti o mahimo ang uban nga makapasakit nato. Maluya pod tingali ta dihang masayop ta, labina kon balikbalik na ang sayop nga atong nahimo. Kinahanglang molahutay ta sa pag-alagad kang Jehova (1) dihang mapasakitan ta sa igsoon, (2) dihang madismayar ta sa atong kapikas, ug (3) dihang madismayar ta sa atong kaugalingon. w24.03 14 ¶1-2

Usahay, makadungog kag mga eksperyensiya sa mga igsoon nga misakripisyo aron makahimog dugang sa pag-alagad. Tingali mieskuwela sila sa School for Kingdom Evangelizers o mibalhin sa lugar nga mas dakog panginahanglan. Kon posible na sa imong kahimtang, himoa nang tumong. Gusto gyod sa katawhan ni Jehova nga magpalapad sa ilang ministeryo. (Buh. 16:9) Pero komosta kon dili pa na nimo mahimo karon? Ayawg hunahunaa nga mas ubos ka kon itandi niadtong makahimo niana. Ang importante, molahutay ka sa pag-alagad. (Mat. 10:22) Hinumdomi nga gipabilhan ni Jehova ang imong pag-alagad kaniya sumala sa makaya sa imong kahimtang. Importante na nga paagi aron padayon nimong masunod si Jesus human sa imong bawtismo.—Sal. 26:1. w24.03 10 ¶11

Ang atong langitnong Amahan nagsaad nga pasayloon ta niya kon mahinulsolon ta. (Sal. 86:5) Busa kon naghinulsol gyod ta sa mga sala nga atong nahimo, makasalig ta sa giingon ni Jehova—nga iya na tang gipasaylo. Hinumdomi nga si Jehova makataronganon. Wala siya magdahom ug sobra sa kaya natong himoon. Naapresyar niya ang bisan unsa nga atong gihimo para niya, basta kay gihimo nato ang atong pinakamaayo. Hunahunaa pod ang mga pananglitan sa Bibliya niadtong mga nag-alagad kang Jehova nga kinasingkasing. Usa nila mao si apostol Pablo. Daghang tuig nga nagkugi siya pag-ayo sa pag-alagad, nga mibiyaheg linibo ka kilometro ug nagtukod ug daghang kongregasyon. Pero dihang limitado na lang ang iyang mahimo sa pagsangyaw, nawad-an ba siya sa pag-uyon sa Diyos? Wala. Padayon niyang gihimo ang iyang maarangan ug gipanalanginan siya ni Jehova. (Buh. 28:​30, 31) Sa susama, mausab usahay ang kaya natong ihatag kang Jehova. Pero ang importante kang Jehova mao ang atong motibo sa pag-alagad kaniya. w24.03 27 ¶7, 9

Pinaagi sa iyang kaugalingong mga pag-ampo kang Jehova, si Jesus naghatag ug maayong ehemplo sa iyang mga tinun-an. Sa tibuok ministeryo ni Jesus, kanunay siyang nag-ampo. Kinahanglan siyang mogahin ug panahon sa pag-ampo kay pirme siyang busy ug daghag tawo sa iyang palibot. (Mar. 6:​31, 45, 46) Mobangon siya sayo sa buntag aron makaampo siya nga siya lang usa ug walay makabalda niya. Diha pa gani higayon nga nag-ampo siya sa tibuok gabii una siya mihimog importanteng desisyon. (Luc. 6:​12, 13) Ug sa gabii una siya mamatay, balikbalik nga nag-ampo si Jesus aron matuman niya ang pinakalisod nga bahin sa iyang asaynment dinhi sa yuta. (Mat. 26:​39, 42, 44) Ang ehemplo ni Jesus nagtudlo nato nga bisag unsa pa ta ka busy, kinahanglan tang mag-eskedyul o mogahin ug panahon sa pag-ampo. Sama kang Jesus, momata tingali tag sayo o ma-late gamay sa pagkatulog aron mag-ampo. Kon ato nang himoon, atong gipakita kang Jehova nga giapresyar nato kining espesyal nga regalo. w23.05 3 ¶4-5

Sa orihinal nga pinulongan, kini nga bersikulo naghatag ug ideya nga ang gugma ni Jehova sa mga dinihogan kusganon kaayo sama sa pag-agos sa suba. Pagkadako sa gugma ni Jehova kanila! Nahibalo ang mga dinihogan nga sila “gihigugma sa Diyos.” (Jud. 1) Gisulat ni apostol Juan ang ilang gibati: “Hunahunaa kon unsang matanga sa gugma ang gipakita sa Amahan kanato, kay gitugotan niya nga tawgon tang mga anak sa Diyos!” (1 Juan 3:1) Mga dinihogan lang ba ang gimahal ni Jehova? Dili. Gipamatud-an ni Jehova nga gimahal niya ang tanang tawo. Unsa ang kinalabwang pamatuod sa gugma ni Jehova? Ang halad lukat. Kini ang kinalabwang ekspresyon sa gugma sa tibuok uniberso!—Juan 3:16; Roma 5:8. w24.01 28 ¶9-10

Gipakita sa teksto karong adlawa ang laing paagi nga nakatabang kang David aron mawala ang iyang kahadlok. Bisag nameligro ang iyang kinabuhi, gipamalandong niya kon unsa pay himoon ni Jehova para niya sa umaabot. Nahibalo si David nga luwason siya ni Jehova sa hustong panahon. Kon buot hunahunaon, gisulti na ni Jehova nga si David ang sunod nga hari sa Israel. (1 Sam. 16:​1, 13) Para kang David, ang tanang gisaad ni Jehova seguradong matuman. Unsay gisaad ni Jehova nga iyang himoon para nimo? Wala siya magsaad nga dili ta makasinatig mga problema karon. Pero bisag unsa pang pagsulay ang atong maatubang niining sistemaha, wad-on kana ni Jehova sa umaabot nga bag-ong kalibotan. (Isa. 25:​7-9) Ang atong Maglalalang gamhanan kaayo, ug kaya niyang banhawon ang mga patay, ayohon ang atong pisikal ug emosyonal nga kasakit, ug laglagon ang tanan natong kaaway.—1 Juan 4:4. w24.01 6 ¶12-13

Hinumdomi kon nganong nagpahinungod ka ug nagpabawtismo. Gihimo to nimo kay gusto nimong modapig kang Jehova. Hinumdomi kon unsay nakatabang nimo nga makombinsir nga mao ni ang kamatuoran. Mikuha kag tukmang kahibalo bahin kang Jehova, ug nakakat-on ka nga tahoron ug higugmaon siya ingong imong langitnong Amahan. Naugmad nimo ang pagtuo ug napalihok ka nga maghinulsol. Ang imong kasingkasing nagpalihok nimo nga biyaan ang sayop nga mga buhat ug magkinabuhi sumala sa kabubut-on sa Diyos. Nahupayan ka dihang gibati nimo nga napasaylo na ka sa Diyos. (Sal. 32:2) Mitambong ka sa mga tigom ug misugod pagsulti sa uban bahin sa nindot nga mga butang nga imong nakat-onan. Ingong dedikado ug bawtismadong Kristohanon, nagsubay na ka karon sa dalan sa kinabuhi, ug determinado ka nga dili mobiya niana. (Mat. 7:​13, 14) Hinaot mobarog kang lig-on sa imong debosyon kang Jehova ug tumanon nimo kanunay ang iyang mga sugo. w23.07 17 ¶14; 19 ¶19

Ang pagpamalandong sa imong pag-ampo dihang nagpahinungod ka kang Jehova makapalig-on nimo sa pagsukol sa bisan unsang tentasyon. Pananglitan, makig-flirt ba ka sa minyo na? Siyempre dili! Nakadesisyon na ka daan nga dili gyod na nimo buhaton. Pinaagi ana, malikayan nimo ang pait nga resulta kon makig-flirt ka. Busa dili gyod nimo tugotan nga ayha pa ka molihok dihang nakagamot na ang sayop nga mga pagbati. ‘Mopalayo’ ka sa “dalan sa daotan.” (Prov. 4:​14, 15) Sama kang Jesus kinsa determinado nga mapalipay ang iyang Amahan, suklan dayon nimo ang bisan unsa nga dili makapalipay sa Diyos kay naa kay panaad Kaniya. (Mat. 4:10; Juan 8:29) Sa tinuod lang, ang mga pagsulay ug mga tentasyon naghatag nimog kahigayonan sa pagpakita nga determinado ka nga padayong mosunod kang Jesus. Ug makaseguro ka nga tabangan ka ni Jehova sa paghimo niana. w24.03 9-10 ¶8-10