Oktubre

Malisdan ba ka usahay sa pagsunod? Naeksperyensiyahan na ni Haring David, maong miampo siya sa Diyos: “Pukawa ang akong tinguha nga motuman kanimo.” (Sal. 51:12) Gimahal ni David si Jehova. Pero naay mga panahon nga nalisdan siya sa pagsunod, ug ingon ana pod ta. Ngano? Una, napanunod nato ang tendensiya nga mosupak. Ikaduha, si Satanas kanunayng nag-aghat nato nga morebelde, sama sa iyang gihimo. (2 Cor. 11:3) Ikatulo, napalibotan tag mga tawo nga rebelyosog kinaiya, “ang espiritu nga nagalihok karon sa mga anak sa pagkadili-masinugtanon.” (Efe. 2:2) Busa dili lang ang atong tendensiya nga magpakasala ang kinahanglan natong suklan. Kinahanglan pod natong suklan ang mga paningkamot sa Yawa ug niining kalibotana sa pag-impluwensiya nato nga mosupak. Angay gyod tang maningkamot nga sundon si Jehova ug kadtong mga gihatagan niyag awtoridad. w23.10 6 ¶1

Unsay atong makat-onan sa milagro nga gihimo ni Jesus? Makakat-on tag leksiyon bahin sa pagkamapainubsanon. Wala manghambog si Jesus sa iyang gihimo; gani, wala gyod siya manghambog sa bisan unsa nga iyang nalampos. Hinuon, mapainubsanon ug balikbalik niyang gihatag ang tanang himaya ug pasidungog ngadto sa iyang Amahan. (Juan 5:​19, 30; 8:28) Masundog nato ang pagkamapainubsanon ni Jesus kon balanse tag panglantaw sa kaugalingon ug dili ta manghambog sa atong mga nalampos. Manghambog ta dili sa atong kaugalingon, kondili sa gamhanang Diyos nga atong gialagaran. (Jer. 9:​23, 24) Ihatag nato ang pasidungog nga angay kaniya. Kay kon buot hunahunaon, unsa may atong mahimo kon wala ang tabang ni Jehova? (1 Cor. 1:​26-31) Kon mapainubsanon ta, dili ta magdahom nga pasidunggan ta sa maayong mga butang nga atong gihimo para sa uban. Kontento na ta kay nahibalo ta nga nakita ug gipabilhan ni Jehova ang atong mga gihimo. (Itandi ang Mateo 6:​2-4; Heb. 13:16) Seguradong malipay si Jehova kon atong sundogon ang pagkamapainubsanon ni Jesus.—1 Ped. 5:6. w23.04 4 ¶9; 5 ¶11-12

Ubos sa paggiya sa Diyos, gidasig ni apostol Pablo ang mga Kristohanon nga hunahunaon ang kaayohan sa uban. Unsaon nato na pagpadapat panahon sa tigom? Atong hinumdoman nga sama nato, ang uban gusto pong mokomento. Hunahunaa ni. Dihang kauban nimo ang imong mga higala, ikaw ra bay magsigeg estorya? Siyempre dili! Gusto nimo nga naa pod silay higayon nga makaestorya. Ingon ana pod sa mga tigom. Gusto nato nga daghan pa ang makakomento. Gani, ang usa sa pinakamaayong paagi nga madasig nato ang mga igsoon mao ang paghatag nilag higayon nga mapahayag ang ilang pagtuo. (1 Cor. 10:24) Busa mohatag tag mubo lang nga mga komento aron naa pay panahon ang uban nga makakomento. Bisag mubo ra ang imong komento, likayi ang paghisgot ug daghan kaayong punto. Kon hutdon nimog hisgot ang parapo, wala nay ikakomento ang uban. w23.04 22-23 ¶11-13

Kinahanglan natong hinumdoman kon unsa ka importante nga padayon natong tabangan ang uban, ilabina pinaagi sa atong ministeryo. Sa atong ministeryo, kinahanglan tang magpailin-ilin. Mailaila nato ang mga tawo nga lainlaig tinuohan, kinaiya, kultura, ug kahimtang sa kinabuhi. Si apostol Pablo mapailin-ilinon, ug makakat-on ta sa iyang ehemplo. Gitudlo siya ni Jesus ingong “apostol sa kanasoran.” (Roma 11:13) Busa si Pablo nagsangyaw sa mga Hudiyo, Grego, edukado, ordinaryong mga tawo, opisyales, ug mga hari. Aron matandog ni Pablo ang kasingkasing sa lainlaing mamiminaw, ‘nahimo siyang sama sa tanang matang sa katawhan.’ (1 Cor. 9:​19-22) Gikonsiderar niya ang kultura, kagikan, ug tinuohan sa iyang mamiminaw, ug gipahiuyon niya ang iyang paagi sa pagsangyaw. Sama kang Pablo, molampos ta sa atong ministeryo kon magpailin-ilin ta ug maghunahunag epektibong mga paagi sa pagtabang sa atong mamiminaw. w23.07 23 ¶11-12

Ang lumo nga tawo lig-on, dili huyang. Nagkinahanglag kalig-on aron ang usa makapabiling kalmado sa lisod nga situwasyon. Ang kalumo apil sa “bunga sa espiritu.” (Gal. 5:​22, 23) Ang Gregong pulong nga gihubad ug “kalumo” gigamit usahay sa paghubit sa idlas nga kabayo nga nahimo nang anad. Imadyina ang idlas nga kabayo nga dili na agresibo. Bisag nahimo na ning buotan, kusgan gihapon ni. Ingong mga tawo, unsaon nato pag-ugmad ang kalumo, ug sa samang higayon lig-on gihapon? Dili nato ni mahimo sa atong kaugalingong paningkamot. Kinahanglang mag-ampo ta alang sa espiritu sa Diyos ug hangyoon siya nga tabangan ta nga maugmad kining nindot nga hiyas. Daghang eksperyensiya ang nagpakita nga posible ni. Daghang Saksi ang nagpakitag kalumo dihang nakaatubang silag mga magsusupak, ug tungod ana nakahatag silag maayong impresyon sa uban.—2 Tim. 2:​24, 25. w23.09 14 ¶3

Sa makapahinganghang panan-awon, si apostol Juan nakakitag 24 ka ansiyano didto sa langit nga nagsimba kang Jehova. Ilang gidayeg ang Diyos ug giila nga takos siya nga modawat sa “himaya ug sa dungog ug sa gahom.” (Pin. 4:​10, 11) Ang matinumanong mga anghel daghan pod kaayog rason nga dayegon ug pasidunggan si Jehova. Kauban nila si Jehova sa langit ug nakaila sila pag-ayo kaniya. Nakita nila ang mga hiyas ni Jehova diha sa iyang ginahimo. Tungod ana, napalihok sila sa pagdayeg kaniya. (Job 38:​4-7) Gusto pod natong dayegon si Jehova sa atong mga pag-ampo ug sultihan siya kon nganong gimahal ug gitahod nato siya. Samtang imong basahon ug tun-an ang Bibliya, matikdi kon unsa nga mga hiyas ni Jehova ang naapresyar kaayo nimo. (Job 37:23; Roma 11:33) Dayon sultihi si Jehova sa imong gibati niana nga mga hiyas. Dayegon pod nato si Jehova kay gitabangan ta niya ug ang mga igsoon sa tibuok kalibotan.—1 Sam. 2:​1, 2. w23.05 3-4 ¶6-7

Pagka-1919, ang katawhan sa Diyos nakagawas sa Bantogang Babilonya. Nianang tuiga, gitudlo ang “matinumanon ug maalamong ulipon” ug ilang gitabangan ang sinserong mga tawo nga makasugod pagsubay sa bag-ong nabuksan nga “Dalan sa Pagkabalaan.” (Mat. 24:​45-47; Isa. 35:8) Tungod sa matinumanong mga tawo kaniadto nga nag-andam sa dalan, kadtong nagsubay niana nga dalan mas makakat-on bahin sa mga katuyoan ni Jehova. (Prov. 4:18) Mapahiuyon pod nila ang ilang kinabuhi sa mga sukdanan ni Jehova. Nahibalo si Jehova nga dili dayon mahimo sa iyang katawhan ang tanang gikinahanglang kausaban. Busa anam-anam niyang gidalisay ang iyang katawhan. Pagkanindot gyod dihang mapalipay na nato ang atong Diyos sa tanan natong himoon! Ang mga dalan nagkinahanglag regular nga maintenance. Sukad sa 1919, ang “Dalan sa Pagkabalaan” padayong gimentinar aron mas daghan pa ang makabiya sa Bantogang Babilonya. w23.05 17 ¶15; 19 ¶16

Personal nga ginabansay sa Nagamandong Lawas ang mga brader nga nagsilbing katabang sa lainlaing komite sa Nagamandong Lawas. Kini nga mga brader matinumanong nagtuman sa ilang bug-at nga mga responsibilidad. Kay nabansay sila, andam gyod silang ipadayon ang pag-atiman sa mga karnero sa Kristo. Dihang ang kataposan sa nahibiling mga dinihogan mosaka na sa langit sa hapit nang matapos ang dakong kasakitan, ang putling pagsimba magpadayon dinhi sa yuta. Ubos sa pagpanguna ni Jesu-Kristo, ang mga alagad sa Diyos dili gyod mohunong sa pagsimba kang Jehova. Tinuod, nianang panahona, atakehon ta sa alyansa sa kanasoran nga gitawag ug Gog sa Magog. (Ezeq. 38:​18-20) Pero ang maong mubo nga pag-atake mapakyas; dili ni makapugong sa katawhan sa Diyos sa pag-alagad kang Jehova. Seguradong luwason Niya sila! Sa panan-awon, nakita ni apostol Juan ang “dakong panon” sa ubang mga karnero sa Kristo. Si Juan gisultihan nga kining dakong panon “nakalabang sa dakong kasakitan.” (Pin. 7:​9, 14) Oo, panalipdan gyod sila ni Jehova! w24.02 5-6 ¶13-14

Unsay atong himoon aron madawat ang balaang espiritu? Ato kining iampo, tun-an ang Pulong sa Diyos, ug magpabilin sa organisasyon nga giniyahan sa balaang espiritu. Kon ato ning himoon, maugmad nato “ang bunga sa espiritu.” (Gal. 5:​22, 23) Kadto lang nagpabiling hinlo sa hunahuna ug panggawi ang hatagan sa Diyos sa iyang espiritu. Dili niya padayong ihatag ang iyang espiritu kon magsige tag hunahunag hugawng mga butang ug mohimo niana. (1 Tes. 4:​7, 8) Aron padayong madawat ang balaang espiritu, kinahanglang dili pod nato ‘tamayon ang mga tagna.’ (1 Tes. 5:20) Kini nga “mga tagna” nagtumong sa mga mensahe nga gihatag ni Jehova pinaagi sa iyang balaang espiritu, apil ang bahin sa adlaw ni Jehova ug ang pagkadinalian sa atong panahon. Dili ta maghunahuna nga layo pa ang maong adlaw, nga ang Armagedon dili moabot sa atong panahon. Hinuon, ipakita nato nga kombinsido ta nga duol na kaayo ni pinaagi sa pagpabiling hinlo sa atong binuhatan ug padayong pagkugi sa “mga buhat nga nagpakitag debosyon sa Diyos.”—2 Ped. 3:​11, 12. w23.06 12 ¶13-14

Ingong mga Kristohanon, unsay angay natong himoon kon kalit nga motungha ang pornograpikong mga hulagway sa atong gadyet? Kinahanglang isalikway dayon nato kini. Mahimo nato na kon atong hinumdoman kon unsa gyoy pinakaimportante para nato—ang atong relasyon kang Jehova. Ang tinuod, ang mga hulagway nga dili ra pornograpiko posibleng makapukaw gihapon sa seksuwal nga mga tinguha. Nganong angay nato ning likayan? Kay dili nato gustong mohimog bisan gamayng butang nga moresultag pagpanapaw diha sa atong kasingkasing. (Mat. 5:​28, 29) Si David, ansiyano sa Thailand, miingon: “Pangutan-on nako ang akong kaugalingon: ‘Bisag dili ra tingali pornograpiko ang mga hulagway, malipay ba si Jehova kon padayon kong magtan-aw ani?’ Ang mga pangutana nga sama niini nakatabang nako nga mohimog maalamong desisyon.” Aron makahimo tag maalamong desisyon, makatabang ang pag-ugmad ug hustong kahadlok nga mapasuko si Jehova. Ang pagkahadlok sa Diyos mao “ang sinugdan,” o pundasyon, “sa kaalam.” w23.06 23 ¶12-13

Ang “kinasulorang mga lawak” mahimong magtumong sa atong mga kongregasyon. Panahon sa dakong kasakitan, madawat nato ang proteksiyon nga gisaad ni Jehova kon padayon tang makig-uban sa mga igsoon. Busa kinahanglang maningkamot ta karon nga dili lang basta dawaton ang mga igsoon, kondili higugmaon pod sila. Ang atong kaluwasan posibleng magdepende niana! “Ang dakong adlaw ni Jehova” magpahinabog grabeng kasakit sa mga tawo. (Sof. 1:​14, 15) Ang katawhan ni Jehova makaatubang pod ug mga kalisdanan. Pero kon mangandam ta karon, makapabilin tang kalmado ug makatabang ta sa uban. Malahutay nato ang bisan unsang pagsulay nga atong maatubang. Dihang mag-antos ang mga igsoon, maningkamot ta nga tabangan sila pinaagi sa pagpakitag kaluoy ug pagtagana sa ilang mga panginahanglan. Ug mounong gyod ta sa atong mga igsoon, nga nakat-onan na natong higugmaon. Ingong ganti, hatagan ta ni Jehova ug kinabuhing walay kataposan sa kalibotan diin dili na mahinumdoman pa ang tanang kalisdanan ug kasakit.—Isa. 65:17. w23.07 7 ¶16-17

Ang Pulong sa Diyos sagad naghisgot sa matinumanong mga lalaki ingong lig-on o kusgan. Pero dihay mga panahon nga mibati silang huyang. Pananglitan, may mga higayon nga si Haring David mibating ‘lig-on samag bukid,’ pero sa ubang higayon, siya “nalisang.” (Sal. 30:7) Bisag kusgan kaayo si Samson dihang gipalihok siya sa espiritu sa Diyos, giila niya nga kon wala ang gahom nga naggikan sa Diyos, siya “maluya . . . ug maparehas sa ubang lalaki.” (Maghu. 14:​5, 6; 16:17) Kining matinumanong mga lalaki nahimo lang lig-on ug kusgan tungod sa kusog nga gihatag ni Jehova kanila. Si apostol Pablo nahibalo nga gikinahanglan pod niya ang kusog nga gikan kang Jehova. (2 Cor. 12:​9, 10) Siya may mga problema sa panglawas. (Gal. 4:​13, 14) Usahay, malisdan siya sa paghimo kon unsay husto. (Roma 7:​18, 19) Ug diha poy mga higayon nga nabalaka siya ug nahadlok kon unsay posibleng mahitabo niya. (2 Cor. 1:​8, 9) Pero dihang huyang si Pablo, siya nahimong gamhanan. Sa unsang paagi? Gihatagan ni Jehova si Pablo sa kusog nga iyang gikinahanglan. Gilig-on niya si Pablo. w23.10 12 ¶1-2

Kon mobati ta usahay nga wala tay pulos, atong hinumdoman nga si Jehova mismo ang nagkabig nato. (Juan 6:44) Nakita niya ang atong maayong mga hiyas nga tingali wala nato makita sa atong kaugalingon, ug nahibalo siya sa atong kasingkasing. (2 Cron. 6:30) Busa makasalig ta sa iyang giingon nga bililhon kaayo ta para niya. (1 Juan 3:​19, 20) Sa wala pa makakat-on sa kamatuoran, ang uban nato nakahimog dili maayong mga butang, ug tingali nakonsensiya gihapon ta niana hangtod karon. (1 Ped. 4:3) Bisan ang matinumanong mga Kristohanon naningkamot nga masuklan ang ilang mga kahuyangan. Gihukman ba ka sa imong kasingkasing? Kon mao, mahupayan ka sa pagkahibalo nga mao pod nay gibati sa matinumanong mga alagad ni Jehova kaniadto. Pananglitan, si apostol Pablo naguol pag-ayo ug mibati nga makaluluoy kaayo siya tungod sa iyang mga kasaypanan. (Roma 7:24) Siyempre, si Pablo naghinulsol na sa iyang mga sala ug nagpabawtismo. Pero gitawag gihapon niya ang iyang kaugalingon ingong ang “labing ubos sa mga apostoles” ug “kinalabwan” sa mga makasasala.—1 Cor. 15:9; 1 Tim. 1:15. w24.03 27 ¶5-6

Ang usa ka leksiyon nga atong makat-onan sa sayop nga desisyon ni Haring Jehoas mao ang kaimportante sa pagpilig mga higala nga maayog impluwensiya kanato—mga higala nga nahigugma kang Jehova ug gusto nga mapalipay siya. Dili lang mga kaedad nato ang atong suoron; makighigala pod ta sa mga edaran o mas bata kanato. Hinumdomi nga si Jehoas mas bata kay sa iyang higala nga si Jehoiada. Bahin sa imong gipili nga mga higala, pangutan-a ang imong kaugalingon: ‘Gitabangan ba ko nila nga molig-on ang akong pagtuo kang Jehova? Ginadasig ba ko nila nga sundon ang mga sukdanan sa Diyos? Nagahisgot ba sila bahin kang Jehova ug sa importanteng mga kamatuoran? Gitahod ba nila ang mga sukdanan sa Diyos? Sultihan lang ba ko nila sa akong gustong madungog, o naa ba silay kaisog nga tambagan ko dihang makahimo kog sayop nga mga desisyon?’ (Prov. 27:​5, 6, 17) Sa tinuod lang, kon ang imong mga higala wala mahigugma kang Jehova, dili nimo sila kinahanglan. Pero kon ang imong mga higala nahigugma kang Jehova, ayawg biya nila—makatabang gyod sila nimo!—Prov. 13:20. w23.09 9-10 ¶6-7

Ang letrang alfa mao ang sinugdanan sa Grego nga alphabet, ug ang omega mao ang kataposan. Pinaagi sa pagsulti nga siya “ang Alfa ug ang Omega,” gipakita ni Jehova nga kon naa siyay sugdan, iya gyod ning humanon hangtod nga molampos kini. Human buhata ni Jehova si Adan ug Eva, Siya miingon kanila: “Panganak mo ug pagdaghan, pun-a ang yuta ug gamhi kini.” (Gen. 1:28) Nianang tungora, si Jehova samag miingon ug “Alfa.” Klaro niyang gisulti ang iyang katuyoan: Moabot ang panahon nga pun-on sa hingpit, masinugtanong mga kaliwat ni Adan ug Eva ang yuta ug himoon kining paraiso. Nianang panahona sa umaabot, si Jehova samag moingon ug “Omega.” Dihang nahuman ni Jehova paglalang “ang langit ug ang yuta ug ang tanang naa niini,” siya naghatag ug garantiya nga iya gyong tumanon ang iyang katuyoan para sa tawo ug sa yuta. Kini bug-os nga matuman sa kataposan sa ikapitong adlaw.—Gen. 2:​1-3. w23.11 5 ¶13-14

Lisod ang pagbiyahe gikan sa Babilonya ngadto sa Israel, ug moabot nig mga upat ka bulan. Pero nagsaad si Jehova nga wad-on niya ang bisan unsa nga makapugong sa ilang pagbalik. Para sa matinumanong mga Hudiyo, ang mga sakripisyo nga ilang himoon wala ra kon itandi sa mga benepisyo kon mobalik sila sa Israel. Ang kinadak-ang panalangin nga ilang madawat konektado sa ilang pagsimba. Walay templo ni Jehova sa Babilonya. Walay halaran diin makatanyag ang mga Israelinhon ug mga halad nga gisugo sa Moisesnong Balaod, ug wala poy mga saserdote nga motanyag niana. Dugang pa, ang katawhan ni Jehova gamay ra gyod kaayo kon ikompara sa paganong mga tawo didto kinsa walay pagtahod kang Jehova o sa iyang mga sukdanan. Busa ang linibo ka Hudiyo nga nahigugma kang Jehova naghinamhinam gyod nga mobalik sa ilang yutang natawhan diin mapasig-uli nila ang putling pagsimba. w23.05 14-15 ¶3-4

Gikinahanglan nato ang tabang sa balaang espiritu sa Diyos aron padayon tang mogawi ingong “mga anak sa kahayag.” Ngano? Kay dili gyod sayon nga magpabiling hinlo niining imoral nga kalibotan. (1 Tes. 4:​3-5, 7, 8) Ang balaang espiritu makatabang nato nga masuklan ang panghunahuna sa kalibotan, apil na ang mga pilosopiya ug ideya nga supak sa panghunahuna sa Diyos. Ang balaang espiritu makatabang pod nato nga mapakita ang “tanang matang sa pagkamaayo ug pagkamatarong.” (Efe. 5:9) Ang usa ka paagi nga makadawat tag balaang espiritu mao ang pagpangayo niana diha sa pag-ampo. Si Jesus miingon nga si Jehova “mohatag ug balaang espiritu niadtong nagapangayo kaniya.” (Luc. 11:13) Dihang dayegon nato si Jehova sa mga tigom, madawat pod nato ang balaang espiritu. (Efe. 5:​19, 20) Ug ang maayong impluwensiya sa balaang espiritu sa Diyos makatabang nato nga magkinabuhi sa paagi nga makapalipay sa Diyos. w24.03 23-24 ¶13-15

Nagkinahanglan ba kag dugang pailob? Kon mao, pag-ampo nga mahimong mas mapailobon. Ang pailob apil sa bunga sa balaang espiritu. (Gal. 5:​22, 23) Busa makaampo ta alang sa balaang espiritu ug hangyoon si Jehova nga tabangan ta nga maugmad ni nga hiyas. Kon makaatubang tag situwasyon nga magsulay sa atong pailob, kita ‘magpadayon sa pagpangayo’ ug balaang espiritu aron makapakita tag pailob. (Luc. 11:13) Makahangyo pod ta kang Jehova nga tabangan ta nga makita ang atong situwasyon sumala sa iyang panglantaw. Dayon humag ampo, kinahanglang maningkamot ta pag-ayo nga magpailob kada adlaw. Kon padayon tang moampo alang sa pailob ug maningkamot sa pagpakita niini, kini nga hiyas mas mogamot sa atong kasingkasing ug mahimong bahin sa atong personalidad. Makatabang pod ang pagpamalandong sa mga ehemplo sa Bibliya. Ang Bibliya daghag ehemplo sa mga tawong mapailobon. Pinaagi sa pagpamalandong sa ilang ehemplo, makakat-on ta kon unsaon pagpakitag pailob. w23.08 22-23 ¶10-11

Gipasaligan ni Jesus si apostol Pedro nga tabangan siya ni Jehova. Ang nabanhawng si Jesus naghatag kang Pedro ug sa iyang kaubang mga apostoles ug usa pa ka milagro—nakakuha na pod silag daghan kaayong isda. (Juan 21:​4-6) Kini nga milagro seguradong nagpasalig kang Pedro nga si Jehova makatagana gyod sa iyang materyal nga panginahanglan. Tingali nahinumdoman ni Pedro ang giingon ni Jesus nga si Jehova motagana niadtong ‘nag-una kanunay sa pagpangita sa Gingharian.’ (Mat. 6:33) Nakatabang ni kang Pedro nga himoong prayoridad ang ministeryo, dili ang negosyo nga pagpangisda. Maisogon siyang nagsangyaw sa adlaw sa Pentekostes 33 C.E., ug linibo ang iyang natabangan nga modawat sa maayong balita. (Buh. 2:​14, 37-41) Human niana, iyang gitabangan ang mga Samarianhon ug mga Hentil sa pagdawat sa Kristo. (Buh. 8:​14-17; 10:​44-48) Seguradong gigamit ni Jehova si Pedro sa talagsaong paagi aron tabangan ang tanang klase sa tawo nga mahimong bahin sa kongregasyon. w23.09 20 ¶1; 23 ¶11

Mga duha ka tuig human laglaga sa mga Babilonyanhon ang Jerusalem, si Haring Nabucodonosor sa Babilonya nahadlok tungod sa iyang damgo bahin sa dako kaayong estatuwa. Siya nanghulga nga iyang patyon ang tanan niyang maalamong tawo, apil si Daniel, kon dili nila masulti kon unsay iyang damgo ug kon unsay kahulogan niana. (Dan. 2:​3-5) Kinahanglang molihok dayon si Daniel kay kon dili, daghang tawo ang mamatay. Siya “miadto sa hari ug mihangyo nga hatagan siyag panahon aron iyang masulti sa hari ang kahulogan sa damgo.” (Dan. 2:16) Nagkinahanglan gyod tog dakong kaisog ug pagtuo. Ngano? Kay walay rekord nga nakahubad na siyag damgo kaniadto. Iyang gihangyo ang iyang mga kauban “nga mag-ampo alang sa kaluoy sa Diyos sa langit bahin niini nga tinago.” (Dan. 2:18) Gitubag ni Jehova ang ilang mga pag-ampo. Sa tabang sa Diyos, nahatag ni Daniel ang kahulogan sa damgo ni Nabucodonosor. Naluwas ang kinabuhi ni Daniel ug sa iyang mga kauban. w23.08 3 ¶4

Konsideraha ang mga kaayohan kon magpailob ta. Kon mapailobon ta, mas malipayon ta ug kalmado. Busa, ang pailob makatabang sa atong mental ug pisikal nga kahimsog. Kon magpailob ta sa uban, mas maayo ang atong relasyon nila. Ang atong kongregasyon mas magkahiusa. Kay dili man ta daling masuko, malikayan nato nga mograbe ang situwasyon kon naay makapalagot nato. (Sal. 37:​8, footnote; Prov. 14:29) Pero labaw sa tanan, gisundog nato ang atong langitnong Amahan ug mas masuod ta kaniya. Pagkanindot nga hiyas ang pailob ug kitang tanan makabenepisyo gyod niini! Usahay, malisdan tingali ta nga magpailob. Pero sa tabang ni Jehova, padayon natong maugmad kini nga hiyas. Ug samtang mapailobon tang naghulat sa bag-ong kalibotan, makaseguro ta nga “ang mata ni Jehova nagtan-aw niadtong mga nahadlok kaniya, niadtong naghulat sa iyang maunongong gugma.” (Sal. 33:18) Hinaot nga kitang tanan determinado nga padayong ugmaron ug ipakita ang pailob. w23.08 22 ¶7; 25 ¶16-17

Si Santiago miingon nga ang usa ka tawo mangangkon tingali nga naa siyay pagtuo, pero makita ba ni sa iyang binuhatan? (Sant. 2:​1-5, 9) Gihisgotan pod ni Santiago ang usa ka tawo nga nakakita sa ‘igsoong lalaki o babaye nga kulag sinina o walay igong pagkaon’ pero wala siya motabang. Moingon tingali ang maong tawo nga naa siyay pagtuo, pero dili ni makita sa iyang binuhatan, maong walay pulos ang iyang pagtuo. (Sant. 2:​14-16) Gihisgotan ni Santiago si Rahab ingong maayong ehemplo sa pagtuo nga inubanan ug buhat. (Sant. 2:​25, 26) Nakadungog si Rahab bahin kang Jehova ug iyang giila nga gisuportahan ni Jehova ang mga Israelinhon. (Jos. 2:​9-11) Gipakita niya ang iyang pagtuo diha sa iyang binuhatan—iyang gipanalipdan ang duha ka Israelinhong espiya dihang nameligro ang ilang kinabuhi. Tungod ana, kining dili hingpit ug dili Israelinhong babaye gipahayag ingong matarong, sama ni Abraham. Ang iyang ehemplo nagpakita nga importante nga ang atong pagtuo inubanan ug buhat. w23.12 5 ¶12-13

Ingong mga Kristohanon, dili ta kontento nga mahibalo lang sa pangunang mga kamatuoran sa Bibliya. Sa tabang sa balaang espiritu sa Diyos, gusto natong makat-onan “bisan ang lawom nga mga butang sa Diyos.” (1 Cor. 2:​9, 10) Unsa kahag mag-research ka bahin sa usa ka topiko nga mas makapasuod nimo kang Jehova? Pananglitan, puwede nimong susihon kon giunsa niya pagpakita ang iyang gugma sa iyang mga alagad kaniadto ug kon nganong nagpamatuod na nga gimahal pod ka niya. Puwede pod nimong tun-an ang kahikayan ni Jehova sa pagsimba sa Israel ug ikompara kana sa kahikayan sa pagsimba sa mga Kristohanon karon. O kaha tun-i pag-ayo ang mga tagna bahin kang Jesus nga natuman panahon sa iyang kinabuhi ug ministeryo dinhi sa yuta. Malingaw gyod ka nga tun-an kini nga mga topiko gamit ang Watch Tower Publications Index o Giya sa Pagpanukiduki Para sa mga Saksi ni Jehova. Kon tun-an nimo pag-ayo ang Bibliya, makapalig-on ni sa imong pagtuo ug makatabang nimo nga “makaplagan ang kahibalo sa Diyos.”—Prov. 2:​4, 5. w23.10 18-19 ¶3-5

Ang pulong nga gigamit ni apostol Pedro para sa “init” literal nga nagkahulogang “giinat.” Ang ikaduhang bahin sa bersikulo naghisgot sa epekto sa init nga gugma. Kini magtabon sa sala sa atong mga igsoon. Puwede nato ning iilustrar niining paagiha: Ang atong gugma gunitan nato sa atong duha ka kamot, nga samag naggunit tag mainat nga tela. Dayon, ato ning inaton pag-ayo hangtod nga matabonan niini dili lang ang usa o duha ka sala, kondili ang “daghang sala.” Ang pagtabon nagpasabot ug pagpasaylo. Sama nga ang tela makatabon sa mansa, ang gugma makatabon sa kahuyangan ug kasaypanan sa uban. Ang atong gugma sa uban kinahanglang lig-on kaayo aron mapasaylo nato ang kasaypanan sa atong mga igsoon, bisan pag usahay lisod nang himoon. (Col. 3:13) Kon magpasaylo ta, atong gipakita nga lig-on ang atong gugma ug gusto natong mapalipay si Jehova. w23.11 11-12 ¶13-15

Sa dihang 26 anyos na si Haring Josias, gisugdan niya ang pag-renovate sa templo. Samtang giayo ang templo, nakit-an “ang basahon sa Balaod ni Jehova nga gihatag pinaagi ni Moises.” Gipabasa ni sa hari ug natandog siya sa iyang nadungog, maong milihok dayon siya aron sundon kini. (2 Cron. 34:​14, 19-21) Gusto ba nimong basahon ang Bibliya kada adlaw? Kon imo na ning ginahimo, komosta ang imong pagbasa? Nag-enjoy ba ka? Ginatiman-an ba nimo ang mga teksto nga makatabang nimo? Dihang mga 39 anyos si Josias, mihimo siyag sayop nga desisyon nga miresulta sa iyang kamatayon. Misalig siya sa iyang kaugalingon imbes mangayog giya kang Jehova. (2 Cron. 35:​20-25) Unsay leksiyon? Bisag pila pay atong edad o bisag dugay na tang nagtuon ug Bibliya, kinahanglang padayon tang mangita kang Jehova. Nagpasabot na nga regular tang mag-ampo niya alang sa giya, magtuon sa iyang Pulong, ug maminaw sa tambag sa hamtong nga mga Kristohanon. Kon ato nang himoon, malikayan nato ang paghimog seryosong mga sayop ug mas magmalipayon ta.—Sant. 1:25. w23.09 12 ¶15-16

Gihisgotan sa Bibliya ang daghang babaye nga nahigugma kang Jehova ug nag-alagad kaniya, ug maayo sila nga ehemplo. Sila “may pagpugong sa kaugalingon” ug “matinumanon sa tanang butang.” (1 Tim. 3:11) Dugang pa, ang mga sister makakitag hamtong nga Kristohanong mga babaye diha sa ilang kongregasyon nga puwede nilang sundogon. Mga batan-ong sister, naa ba moy nailhan nga hamtong nga mga babayeng Kristohanon nga puwede ninyong sundogon? Matikdi ang ilang nindot nga mga hiyas, dayon hunahunaa kon unsaon ninyo kana pagsundog. Ang pagkamapainubsanon importante kaayo aron mahimong hamtong nga Kristohanon. Kon ang usa ka babaye mapainubsanon, mabatonan niya ang maayong relasyon kang Jehova ug sa uban. Pananglitan, ang usa ka babaye nga nahigugma kang Jehova mapainubsanong mosunod sa kahikayan sa pagkaulo nga naggikan sa iyang langitnong Amahan. (1 Cor. 11:3) Kana nga kahikayan mapadapat diha sa kongregasyon ug sa iyang pamilya. w23.12 18-19 ¶3-5

Gidahom ni Jehova nga higugmaon sa bana ang iyang asawa ug itagana ang iyang pisikal, emosyonal, ug espirituwal nga panginahanglan. Ang pag-ugmad ug katakos sa panghunahuna, pagtahod sa mga babaye, ug pagkahimong kasaligan, makatabang aron mahimo kang maayong bana. Kon maminyo ka, posible kang mahimong amahan. Unsay imong makat-onan kang Jehova bahin sa pagkahimong maayong amahan? (Efe. 6:4) Gisulti gyod ni Jehova sa iyang Anak nga si Jesus nga iya siyang gimahal ug giuyonan. (Mat. 3:17) Kon mahimo kang amahan, paneguroa nga pirme nimong mapasaligan ang imong mga anak nga gimahal nimo sila. Komendahi sila kanunay sa maayong mga butang nga ilang mahimo. Ang mga amahan nga nagsundog sa ehemplo ni Jehova makatabang sa ilang mga anak nga mahimong hamtong nga Kristohanon. Makapangandam ka para niini nga responsibilidad kon pakitaan nimog pagmahal ang mga membro sa inyong pamilya ug ang kongregasyon ug kon magkat-on ka nga ipahayag ang imong gugma ug apresasyon kanila.—Juan 15:9. w23.12 28-29 ¶17-18

Ingong matinumanong mga alagad ni Jehova, makaatubang tag mga kalisdanan ug masakit sama sa masinatian sa tanang tawo. Basin kinahanglan pod tang molahutay sa pagsupak o paglutos gikan niadtong nagdumot sa katawhan sa Diyos. Bisag dili pugngan ni Jehova nga mahitabo kanato ang maong mga kalisdanan, nagsaad siya nga tabangan ta niya. (Isa. 41:10) Pinaagi sa iyang tabang, makapabilin tang malipayon, makahimog maayong mga desisyon, ug makapabiling maunongon kaniya bisan sa pinakalisod nga mga situwasyon. Si Jehova nagsaad nga ihatag niya kanato ang gitawag sa Bibliya ug “kalinaw nga gikan sa Diyos.” (Filip. 4:​6, 7) Kini nga kalinaw nagtumong sa pagkakalmado sa atong hunahuna ug kasingkasing nga resulta sa atong suod nga relasyon kaniya. Kini ‘molabaw sa tanang pagsabot’; sobra pa ni sa kaya natong ma-imagine. Nakasulay na ba mo nga human ninyog ampo nga kinasingkasing kang Jehova mikalma mo pag-ayo? Kana nga pagbati mao ang “kalinaw nga gikan sa Diyos.” w24.01 20 ¶2; 21 ¶4

Ang gugma para sa Diyos nagpalihok sa matinumanong mga tawo nga dayegon nga kinasingkasing ang iyang ngalan. Nasabtan ni Haring David nga pinaagi sa pagdayeg sa ngalan ni Jehova, madayeg niya si Jehova mismo. Ang ngalan ni Jehova konektado sa iyang reputasyon, busa magpahinumdom ni sa tanan niyang nindot nga mga hiyas ug makapahinganghang mga buhat. Giisip ni David nga balaan ang ngalan sa iyang Amahan ug gusto niya kining dayegon. Gusto niya kanang himoon sa iyang “tibuok nga pagkatawo”—buot pasabot, kinasingkasing. Sa susama, ang mga Levihanon nanguna sa pagdayeg kang Jehova. Mapainubsanon nilang giila nga ang ilang mga pulong dili gyod bug-os makahatag sa pagdayeg nga angay para sa balaang ngalan ni Jehova. (Neh. 9:5) Seguradong nakapalipay sa kasingkasing ni Jehova ang ilang mapainubsanon ug kinasingkasing nga pagdayeg. w24.02 9 ¶6

Dili ka isipon ni Jehova nga pakyas kon dili nimo makab-ot ang tumong nga imposible para nimo. (2 Cor. 8:12) Hunahunaa kon nganong wala nimo mahimo ang imong mga giplano. Hinumdomi kon unsa nay imong nalampos. Ang Bibliya nag-ingon nga “ang Diyos matarong, ug dili niya kalimtan ang inyong buhat.” (Heb. 6:10) Busa ayaw pod kalimti ang imong nalampos. Pamalandonga kon unsa nay imong nahimo—tingali ang pagpakigsuod kang Jehova, pagsulti sa uban bahin niya, o pagpabawtismo. Sama nga miuswag ka ug nakab-ot nimo ang imong espirituwal nga mga tumong kaniadto, mahimo pod kang mouswag sa pagkab-ot sa imong tumong karon. Sa tabang ni Jehova, kaya nimong kab-oton ang imong tumong. Ma-enjoy nimo ang pagkab-ot sa imong espirituwal nga tumong kon imong makita kon giunsa ka pagtabang ug pagpanalangin ni Jehova. (2 Cor. 4:7) Kon dili ka mosurender, mas daghan pa gyong panalangin ang imong madawat.—Gal. 6:9. w23.05 31 ¶16-18

Ginapakita gyod ni Jehova ang iyang pag-uyon sa mga tawo nga iyang gimahal. Sa Bibliya, duha ka higayon nga gisultihan ni Jehova ang iyang Anak nga iya siyang gihigugma ug giuyonan. (Mat. 3:17; 17:5) Gusto ba nimong madungog nga giuyonan pod ka ni Jehova? Si Jehova dili makig-estorya nato gikan sa langit, pero makig-estorya siya nato pinaagi sa iyang Pulong. “Madungog” nato ang pag-uyon ni Jehova dihang basahon nato ang giingon ni Jesus sa Ebanghelyo. Hingpit nga gisundog ni Jesus ang personalidad sa iyang Amahan. Busa dihang mabasa nato nga gipahayag ni Jesus ang iyang pag-uyon sa dili hingpit pero matinumanon niyang mga sumusunod, ma-imagine pod nato si Jehova nga nagsulti nianang mga pulonga kanato. (Juan 15:​9, 15) Kon makaagom tag mga pagsulay, wala kana magpasabot nga wala na ta uyoni sa Diyos. Hinuon, naghatag ni natog kahigayonan nga pamatud-an kon unsa ka dako ang atong gugma ug pagsalig sa Diyos.—Sant. 1:12. w24.03 28 ¶10-11