Nobyembre

Kon ginikanan ka, tabangi ang imong gagmayng mga anak sa pag-andam ug mga komento nga haom sa ilang edad. Usahay, hisgotan panahon sa pagtuon ang seryosong mga butang, sama sa problema sa magtiayon o mga buhat nga gidumtan sa Diyos, pero naa tingali mga parapo nga makakomento ang mga bata. Tabangi sab ang imong mga anak nga masabtan kon nganong naay mga panahon nga dili sila matawag dihang moisa sila sa ilang kamot. Makatabang ni nga dili mangluod ang imong mga anak kon dili sila matawag. (1 Tim. 6:18) Kitang tanan makaandam ug komento nga makapasidungog kang Jehova ug makadasig sa mga igsoon. (Prov. 25:11) Usahay puwede tang mohatag ug mubong personal nga eksperyensiya, pero angay natong likayan ang pagsigeg hisgot bahin sa atong kaugalingon. (Prov. 27:2; 2 Cor. 10:18) Hinuon, angay tang magpokus kang Jehova, sa iyang Pulong, ug sa iyang katawhan.—Pin. 4:11. w23.04 24-25 ¶17-18

Ang gugma importante aron magpabilin tang nagmata ug mahuptan ang maayong panghunahuna. (Mat. 22:​37-39) Ang atong gugma sa Diyos motabang nato nga mopadayon sa pagsangyaw bisan pag moresulta nig mga kalisdanan. (2 Tim. 1:​7, 8) Kay gihigugma nato kadtong wala mag-alagad kang Jehova, padayon tang mosangyaw, nga mosangyaw pa gani pinaagig telepono ug sulat. Dili ta mawad-ag paglaom nga ang mga tawo magbag-o ug mosugod sa pagbuhat kon unsay husto. (Ezeq. 18:​27, 28) Gihigugma pod nato ang atong mga igsoon. Mapakita nato ni pinaagi sa ‘pagdinasigay ug paglig-onay’ sa usag usa. (1 Tes. 5:11) Samag mga sundalo nga nagtinabangay panahon sa gubat, kita magdinasigay sa usag usa. Dili gyod nato tuyoon nga pasakitan ang atong mga igsoon o manimalos nila. (1 Tes. 5:​13, 15) Mapakita pod nato ang atong gugma pinaagi sa pagtahod sa mga brader nga nanguna sa kongregasyon.—1 Tes. 5:12. w23.06 10 ¶6; 11 ¶10-11

Ang usa ka paagi nga mapalig-on nato ang atong pagtuo mao ang pagpamalandong sa lukat. Ang lukat maoy garantiya nga seguradong matuman ang mga saad sa Diyos. Kon atong hunahunaon pag-ayo kon nganong gihatag ang lukat ug kon unsa ka dako ang gisakripisyo ni Jehova, molig-on ang atong pagtuo nga matuman gyod ang gisaad sa Diyos nga kinabuhing walay kataposan sa usa ka nindot kaayo nga kalibotan. Nganong makaingon ta ana? Unsa diay ka dako ang gisakripisyo ni Jehova aron mahatag ang lukat? Gipadala ni Jehova gikan sa langit ang iyang pinangga ug panganay nga Anak, ang iyang suod kaayo nga kauban, aron mahimong hingpit nga tawo. Samtang dinhi si Jesus sa yuta, naeksperyensiyahan niya ang tanang klase sa kalisdanan. Dayon siya nag-antos ug nakaagom ug sakit kaayo nga kamatayon. Pagkadako sa gisakripisyo ni Jehova! Dili gyod tugotan sa atong mahigugmaong Diyos nga mag-antos ug mamatay ang iyang Anak aron lang hatagan tag maayong kinabuhi pero sa kadiyot ra kaayo nga panahon. (Juan 3:16; 1 Ped. 1:​18, 19) Kay dako kaayo ang gibayad ni Jehova, seguroon gyod niya nga makabaton tag walay kataposang kinabuhi sa bag-ong kalibotan. w23.04 27 ¶8-9

Gusto ba gyod ni Jehova nga banhawon ang mga patay? Siyempre. Iyang gigiyahan ang daghang magsusulat sa Bibliya sa pagsulat bahin sa iyang saad nga pagkabanhaw. (Isa. 26:19; Pin. 20:​11-13) Ug dihang mosaad si Jehova, iya gyod nang tumanon. (Jos. 23:14) Gani, si Jehova naghinamhinam sa pagbanhaw sa mga patay. Konsideraha ang giingon ni Job. Segurado si Job nga bisan pag mamatay siya, si Jehova mangandoy nga makita siya pag-usab nga buhi. (Job 14:​14, 15) Ingon ana pod ang pagbati ni Jehova sa tanan niyang alagad nga namatay. Naghinamhinam siya nga banhawon sila nga himsog ug malipayon. Komosta ang binilyon nga namatay nga wala makabatog kahigayonan nga makakat-on bahin kang Jehova? Gusto pod silang banhawon sa atong mahigugmaong Diyos. (Buh. 24:15) Gusto niya silang hatagag kahigayonan nga mahimong iyang mga higala ug mabuhi sa yuta hangtod sa hangtod.—Juan 3:16. w23.04 9 ¶5-6

Sa unsang paagi nimo mapalig-on ang imong paglaom? Kon ang imong paglaom mao ang kinabuhing walay kataposan dinhi sa yuta, basaha ang giingon sa Bibliya bahin sa Paraiso ug pamalandonga kana. (Isa. 25:8; 32:​16-18) Hunahunaa kon unsa unya ang kinabuhi sa bag-ong kalibotan. Imadyina nga tua na ka didto. Kon kanunay tang maghunahuna sa atong paglaom sa bag-ong kalibotan, makita nato nga ang atong mga problema “kadiyot lang ug gaan.” (2 Cor. 4:17) Pinaagi sa paglaom nga gihatag ni Jehova kanimo, makabaton kag kusog sa paglahutay sa mga pagsulay. Gihatag na niya ang imong gikinahanglan aron makadawat kag kusog gikan kaniya. Busa kon magkinahanglan kag tabang aron mahimo ang usa ka asaynment, malahutay ang usa ka pagsulay, o makapabiling malipayon, pag-ampo nga kinasingkasing kang Jehova ug pangayog giya niya pinaagi sa personal nga pagtuon. Dawata ang pagdasig gikan sa mga igsoon. Hunahunaa kanunay ang imong paglaom sa umaabot. Dayon, ‘ang dakong gahom sa Diyos maglig-on kanimo aron makalahutay ka sa tanang butang uban ang pailob ug kalipay.’—Col. 1:11. w23.10 17 ¶19-20

Daghan tag rason nga pasalamatan si Jehova diha sa pag-ampo. Puwede nato siyang pasalamatan sa bisan unsang maayong butang nga naa nato, kay ang tanang maayong regalo naggikan kaniya. (Sant. 1:17) Pananglitan, puwede nato siyang pasalamatan sa atong nindot kaayong planeta ug sa makapahinganghang mga butang nga iyang gilalang. Pasalamatan pod nato siya kay gihatagan ta niyag kinabuhi, pamilya, mga higala, ug paglaom. Ug gusto natong pasalamatan si Jehova kay gitugotan ta niya nga makigsuod kaniya. Kinahanglan tingali tang maningkamot pag-ayo nga hunahunaon ang mga rason kon nganong angay tang magpasalamat kang Jehova. Daghang tawo karon ang dili mapasalamaton. Sagad, nagpokus lang sila sa kon unsay ilang gusto imbes magpakitag apresasyon sa kon unsay naa nila. Kon maimpluwensiyahan ta niana nga panghunahuna, basin ang atong mga pag-ampo pulos na lang hangyo. Aron malikayan na, kinahanglang padayon natong ugmaron ug isulti ang atong apresasyon sa tanang gihimo ni Jehova para nato.—Luc. 6:45. w23.05 4 ¶8-9

Ingong atong mahigugmaong Amahan, dili gusto ni Jehova nga makita tang nag-antos. (Isa. 63:9) Pero dili sa tanang higayon nga panalipdan ta niya sa mga pagsulay, nga gipakasamag mga suba o kalayo. (Isa. 43:2) Bisan pa ana, nagsaad siya nga tabangan ta nga ‘makatabok’ o ‘makalatas’ niana. Ug bisan unsa pang pagsulay ang atong giatubang karon, seguroon ni Jehova nga posible gihapon tang makaalagad niya. Hatagan pod ta ni Jehova sa iyang gamhanang balaang espiritu aron makalahutay ta. (Luc. 11:13; Filip. 4:13) Busa makaseguro ta nga ihatag gyod niya kon unsay atong gikinahanglan aron makalahutay ta ug makapabiling matinumanon kaniya. Gidahom ni Jehova nga mosalig ta niya. (Heb. 11:6) Usahay, mobati tingali ta nga dili nato kaya ang atong mga problema. Basin magduhaduha pa gani ta kon tabangan ba ta ni Jehova. Pero ang Bibliya nagpasalig nato nga pinaagi sa gahom sa Diyos kita “makakatkat ug paril.” (Sal. 18:29) Busa imbes magpadaog sa atong mga pagduhaduha, kinahanglang mag-ampo ta uban ang bug-os nga pagtuo, nga mosalig nga tubagon ni Jehova ang atong mga pag-ampo.—Sant. 1:​6, 7. w23.11 22 ¶8-9

Pagkanindot nga deskripsiyon sa tinuod nga gugma! Kini dunay makapalig-on nga pasalig para sa mga magtiayon: Posible gyod nga dili moawop ang inyong gugma sa usag usa. Aron dili moawop ang gugma sa magtiayon sa usag usa, kinahanglang naa silay buhaton. Sa pag-ilustrar, ang daob magpabilin rang magsiga kon padayon ning sugnoran. Kon pasagdan ni, mapalong ang kalayo. Ingon ana pod ang gugma sa bana ug asawa. Magpabilin ra ning lig-on kon ila ning atimanon. Usahay, mobugnaw ang gugma sa magtiayon, ilabina dihang naa silay mga problema sa pinansiyal, sakit, o nalisdan sa pag-atiman sa ilang mga anak. Busa aron dili mapalong ang “kalayo ni Jah,” kinahanglang palig-onon sa bana ug asawa ang ilang relasyon kang Jehova. w23.05 20-21 ¶1-3

Aron maugmad ang kaisog, unsay kinahanglan natong himoon? Tingali dasigon ta sa atong mga ginikanan nga magmaisogon, pero dili nila mapasa kanato kini nga hiyas nga sama bag panulondon kini sa pamilya. Ang pag-ugmad ug kaisog parehas sa pagkat-on ug bag-ong kahanas, o skill. Ang usa ka paagi nga mohawod ka sa usa ka skill mao ang pagpaniid pag-ayo sa ginahimo niadtong hanas niini, ug dayon sundogon siya. Mao pod nay atong himoon kon gusto ta nga mahimong maisogon. Maniid ta pag-ayo kon giunsa pagpakita sa uban kini nga hiyas ug sundogon sila. Sama kang Daniel, kinahanglang tun-an nato pag-ayo ang Pulong sa Diyos. Makigsuod ta kang Jehova pinaagi sa kanunay nga pagpakig-estorya kaniya ug pagsulti sa atong gibati. Ug kinahanglang mosalig ta kang Jehova, nga kombinsido nga iya gyod tang tabangan. Dayon dihang masulayan ang atong pagtuo, makapakita tag kaisog. Ang mga tawo nga nagpakitag kaisog sagad tahoron sa uban. Makatabang pod sila nga madani ang sinserong mga tawo kang Jehova. Maayo gyod na nga mga rason nga ugmaron nato ang kaisog. w23.08 2 ¶2; 4 ¶8-9

Ang Gregong pulong nga gihubad ug “seguroa” gigamit may kalabotan sa paagi sa pagsulay sa bililhong mga metal, sama sa bulawan ug silver, aron maseguro kon tinuod ba kini. Busa kinahanglan natong seguroon kon tinuod ba ang atong nadunggan o nabasa. Labaw na gyod nga ato nang himoon samtang nagkaduol ang dakong kasakitan. Imbes motuo dayon sa giingon sa uban, gamiton nato ang atong maayong panghunahuna ug ikomparar ang atong nabasa o nadungog sa kon unsay giingon sa Bibliya ug sa organisasyon ni Jehova. Kon ato nang himoon, dili ta mailad sa bisan unsang propaganda sa mga demonyo o sa sayop nga mga impormasyon. (Prov. 14:15; 1 Tim. 4:1) Ingong grupo, ang katawhan sa Diyos maluwas sa dakong kasakitan. Pero ang matag usa nato wala mahibalo kon unsay mahitabo kanato sa umaabot. (Sant. 4:14) Makalabang buhi man ta sa dakong kasakitan o mamatay sa dili pa na moabot, makadawat tag kinabuhing walay kataposan kon magpabilin tang matinumanon. Hinaot nga kitang tanan magpokus sa atong nindot kaayong paglaom ug magpabiling andam sa adlaw ni Jehova! w23.06 13 ¶15-16

Wala ta mahibalo kon sa unsang paagi matuman ang ubang tagna sa Bibliya. (Dan. 12:​8, 9) Pero bisag wala ta bug-os mahibalo kon sa unsang paagi matuman ang usa ka tagna, wala na magpasabot nga dili kana matuman. Seguradong makasalig ta nga ipadayag ni Jehova kanato kon unsay kinahanglan natong mahibaloan sa hustong panahon, sama sa iyang gihimo kaniadto. Dunay mahitabong proklamasyon sa “kalinaw ug kasegurohan.” (1 Tes. 5:3) Dayon, atakehon sa mga gobyerno sa kalibotan ang bakak nga relihiyon ug wagtangon kini. (Pin. 17:​16, 17) Human ana, ilang atakehon ang katawhan sa Diyos. (Ezeq. 38:​18, 19) Kini nga mga panghitabo mosangko sa kataposang gubat, ang Armagedon. (Pin. 16:​14, 16) Makaseguro ta nga kining tanan hapit nang mahitabo. Sa pagkakaron, padayon natong ipakita ang atong apresasyon sa atong mahigugmaong langitnong Amahan pinaagi sa pagbantay sa katumanan sa mga tagna sa Bibliya ug pagtabang sa uban nga himoon kana. w23.08 13 ¶19-20

Dihang si apostol Pablo naghisgot bahin sa pagtuo, paglaom, ug gugma, siya miingon nga “ang kinalabwan niini [nga mga hiyas] mao ang gugma.” (1 Cor. 13:13) Nganong nakaingon si Pablo niana? Sa umaabot, dili na ta kinahanglang magpakitag pagtuo sa mga saad sa Diyos bahin sa bag-ong kalibotan o molaom niini nga mga saad kay natuman na kini. Pero kinahanglan natong higugmaon kanunay si Jehova ug ang mga tawo. Gani, ang atong gugma para nila padayong motubo hangtod sa hangtod. Dugang pa, ang gugma mao ang ilhanan sa tinuod nga mga Kristohanon. Giingnan ni Jesus ang iyang mga apostoles: “Kon kamo dunay gugma sa usag usa, ang tanan makaila nga kamo akong mga tinun-an.” (Juan 13:35) Dugang pa, kon maghigugmaay ta, padayon tang magkahiusa. Si Pablo miingon nga gugma “ang hingpit nga bugkos sa panaghiusa.” (Col. 3:14) Si apostol Juan misulat sa mga Kristohanon: “Kadtong nahigugma sa Diyos kinahanglang mahigugma sab sa iyang igsoon.” (1 Juan 4:21) Dihang magpakita tag gugma sa usag usa, atong gipakita nga gihigugma nato ang Diyos. w23.11 8 ¶1, 3

Sa Bibliya, ang atong kinabuhi ingong mga Kristohanon gipakasama sa usa ka lumba. Ang mga magdadagan nga makaabot sa finish line gantihan ug kinabuhing walay kataposan. (2 Tim. 4:​7, 8) Kinahanglang maningkamot ta pag-ayo nga magpadayon sa pagdagan, ilabina kay duol na kaayo ta sa finish line. Si apostol Pablo naghisgot kon unsay makatabang nato nga makadaog sa lumba. Gidasig ta niya nga ‘tangtangon ang tanang kabug-at ug modagan nga malahutayon sa lumba nga gibutang sa atong atubangan.’ Buot bang ipasabot ni Pablo nga wala nay kinahanglang dad-on ang usa ka Kristohanon? Dili kana ang iyang punto. Hinuon, ang iyang gipasabot mao nga angay natong tangtangon ang tanang wala kinahanglanang kabug-at. Kini nga klase sa kabug-at makapugong ug makapaluya nato. Aron makalahutay, kinahanglang abtik tang magmatikod sa wala kinahanglanang mga kabug-at nga makapahinay sa atong pagdagan ug tangtangon dayon kana. Pero dili pod nato angayng tangtangon ang mga butang nga kinahanglan natong dad-on. Kay kon ato nang himoon, dili na ta puwedeng mopadayon sa lumba.—2 Tim. 2:5. w23.08 26 ¶1-2

Ang pagkamakataronganon makatabang nato nga tahoron ang opinyon sa uban. Pananglitan, ang ubang sister ganahang mag-makeup, pero ang uban dili. Ang ubang Kristohanon moinom ug alkoholikong ilimnon nga dili ra magpalabi, pero ang uban dili gyod moinom. Kitang tanan gustog maayong panglawas, pero lainlain tag paagi sa pag-atiman sa atong lawas. Kon maghunahuna ta nga kita pirme ang sakto ug kombinsihon nato ang uban nga sundogon ang atong mga desisyon, posibleng mapandol ang uban ug mabahinbahin ang kongregasyon. (1 Cor. 8:9; 10:​23, 24) Pananglitan, imbes hatagan tag estriktong mga balaod kon unsay angay natong isul-ob, gihatagan ta ni Jehova ug mga prinsipyo nga makagiya nato. Ang atong sininaan kinahanglang haom para sa mga ministro sa Diyos ug nagpakitag pagkamakataronganon, pagtahod sa kaugalingon ug sa uban, ug “maayong panghunahuna.” (1 Tim. 2:​9, 10) Busa dili nato gusto nga mapokus kanato ang atensiyon sa mga tawo tungod sa atong sininaan. Ang mga prinsipyo sa Bibliya makatabang pod sa mga ansiyano nga malikayan ang paghimog kaugalingon nilang mga balaod bahin sa sininaan ug estilo sa buhok. w23.07 23-24 ¶13-14

Gipakita ni Jehova kon sa unsang paagi ta makabatog kinabuhi nga punog kalipay ug mga panalangin. Kadtong midawat sa imbitasyon sa sabaan ug ‘buangbuang nga babaye’ nagpokus sa “tam-is,” tinagotago nga kalipay. Sila mopadulong “sa kinailadman sa Lubnganan.” (Prov. 9:​13, 17, 18) Lahi ra gyod kaayo ang kahimtang niadtong midawat sa imbitasyon sa “matuod nga kaalam”! (Prov. 9:1) Nakakat-on ta nga higugmaon kon unsay gihigugma ni Jehova ug dumtan ang iyang gidumtan. (Sal. 97:10) Ug nalipay ta nga dapiton ang uban aron makabenepisyo pod sila sa “matuod nga kaalam.” Sama bag kita ‘nanawag diha sa habog nga mga dapit sa siyudad: “Bisan kinsa nga walay kasinatian, paanhia siya.”’ Kita ug kadtong modawat niini nga imbitasyon makabatog mga panalangin dili lang karon kondili sa umaabot pod. Kita “mabuhi” hangtod sa hangtod samtang padayon tang ‘nagsubay sa dalan sa pagsabot.’—Prov. 9:​3, 4, 6. w23.06 24 ¶17-18

Unsay imong bation dihang pangutan-on ka sa imong katrabaho o schoolmate bahin sa imong mga gituohan? Kulbaan ba ka? Kanay sagad nga bation nato. Pero ang iyang pangutana maghatag natog ideya kon unsay iyang gihunahuna o gituohan, maong mas dali na para nato nga sultihan siya sa maayong balita. Pero usahay, dili tingali maayo ang paagi sa pagpangutana sa uban. Dili na ta matingala ana, kay ang uban nila nakadungog ug sayop nga mga ideya bahin sa atong tinuohan. (Buh. 28:22) Dugang pa, nagkinabuhi na ta sa “kataposang mga adlaw,” diin daghan ang lisod ikasabot ug “bayolente” pa gani. (2 Tim. 3:​1, 3) Tingali maghunahuna ka, ‘Sa unsang paagi ko makapabiling kalmado ug buotan kon naay gustong makiglalis nako bahin sa akong mga gituohan sa Bibliya?’ Unsay makatabang nimo? Ang kalumo. Ang lumo nga tawo dili daling masuko, hinuon makontrol niya ang iyang kaugalingon dihang naay makapalagot niya o dihang wala siya mahibalo kon unsay itubag. w23.09 14 ¶1-2

Ang organisasyon naghatag ug mga tambag aron panalipdan ta. Pananglitan, gipasidan-an ta nga dili higugmaon ang kuwarta ug likayan ang bisan unsa nga posibleng moresulta sa paglapas sa mga balaod sa Diyos. Kon mosunod ta niini nga mga giya ni Jehova, makabenepisyo ta. (Isa. 48:​17, 18; 1 Tim. 6:​9, 10) Segurado nga si Jehova padayong mogamit ug mga tawo sa paggiya nato panahon sa dakong kasakitan ug bisan panahon sa Usa ka Libo ka Tuig nga Pagmando. Padayon ba tang mosunod sa maong direksiyon? Mas dakog purohan nga mosunod ta nianang panahona kon karon pa lang, nagpagiya na ta kang Jehova. Busa padayon natong sundon ang paggiya ni Jehova, apil na ang giya niadtong mga gitudlo nga magbantay kanato. (Isa. 32:​1, 2; Heb. 13:17) Ug daghan gyod tag rason nga mosalig sa atong Tiggiya, si Jehova, kinsa nagtabang nato nga makalikay sa espirituwal nga mga kapeligrohan ug makaabot sa atong destinasyon—ang kinabuhing walay kataposan sa bag-ong kalibotan. w24.02 25 ¶17-18

Malipayon si apostol Pablo sa iyang pag-alagad kang Jehova, pero daghan siyag kalisdanan nga naatubang. Sagad, lagyo ang mga biyahe ni Pablo, ug dili to sayon sa iyang panahon. Sa iyang mga pagbiyahe, usahay makaatubang siyag “kapeligrohan sa mga suba” ug “sa mga tulisan.” Diha poy mga panahon nga gidagmalan siya sa mga magsusupak. (2 Cor. 11:​23-27) Ug may mga higayon nga ang mga igsoon wala magpakitag apresasyon sa sinserong mga paningkamot ni Pablo nga tabangan sila. (2 Cor. 10:10; Filip. 4:15) Unsay nakatabang kang Pablo nga magpadayon sa pag-alagad kang Jehova? Daghag nakat-onan si Pablo bahin sa personalidad ni Jehova tungod sa iyang pagtuon sa Kasulatan ug tungod sa iyang mga naeksperyensiyahan. Busa kombinsido si Pablo nga gimahal siya ni Jehova nga Diyos. (Roma 8:​38, 39; Efe. 2:​4, 5) Ug mas milalom ang iyang gugma kang Jehova. Gipakita ni Pablo ang iyang gugma kang Jehova “pinaagi sa pag-alagad ug sa padayon [niyang] pag-alagad sa mga balaan.”—Heb. 6:10. w23.07 9 ¶5-6

Daghan ang moingon nga kinahanglan nato ang mga gobyerno ug nga angay natong sundon ang pipila sa mga balaod nga gipatuman niining “labaw nga mga awtoridad.” Pero kon ang usa ka balaod morag dili makataronganon o sobra ra ang gipangayo, tingali magduhaduha na sila sa pagsunod niini. Gipakita sa Bibliya nga ang mga gobyerno sa tawo nagpahinabog pag-antos, kontrolado ni Satanas, ug hapit nang laglagon. (Sal. 110:​5, 6; Eccl. 8:9; Luc. 4:​5, 6) Kini sab nag-ingon nga “kadtong mosukol sa awtoridad misukol sa kahikayan sa Diyos.” Ang atong relatibong pagpasakop sa labaw nga mga awtoridad apil sa temporaryong kahikayan ni Jehova sa pagmentinar sa kahapsay. Busa angay natong “ihatag ngadto sa tanan ang nahiangay kanila,” apil na ang pagbayad ug buhis, pagpakitag pagtahod, ug pagkamasinugtanon. (Roma 13:​1-7) Tingali para nato ang usa ka balaod dili praktikal, dili makataronganon, o dakog gasto kon sundon. Pero sundon nato si Jehova, ug gisugo niya nga mosunod ta niini nga mga awtoridad basta wala ra silay ipabuhat nga supak sa iyang mga sugo.—Buh. 5:29. w23.10 8 ¶9-10

Dihang gipanganak si Samson, ang nasod sa Israel gimandoan ug gidaogdaog sa mga Filistehanon. (Maghu. 13:1) Grabe gyod ang pag-antos sa mga Israelinhon tungod sa ilang pintas nga pagmando. Gipili ni Jehova si Samson nga “manguna sa pagluwas sa Israel gikan sa kamot sa mga Filistehanon.” (Maghu. 13:5) Kinahanglan siyang mosalig kang Jehova aron iya ning matuman. Dihay higayon nga miabot ang kasundalohan sa mga Filistehanon aron dakpon si Samson sa Lehi, nga posibleng naa sa Juda. Nahadlok ang mga tawo sa Juda maong midesisyon sila nga itugyan si Samson sa mga kaaway. Sila mismo ang migapos kang Samson gamit ang duha ka bag-ong pisi ug gidala siya ngadto sa mga Filistehanon. (Maghu. 15:​9-13) Pero “ang espiritu ni Jehova naghatag niyag kusog” maong nabugto niya ang mga pisi. Dayon, “nakakita siyag bukog sa apapangig sa asno” ug gigamit niya kini sa pagpatay sa 1,000 ka Filistehanong lalaki!—Maghu. 15:​14-16. w23.09 2-3 ¶3-4

Anam-anam nga gipadayag ni Jehova diha sa Bibliya ang iyang “dumalayong katuyoan.” Bisag unsa pang paagi ang gamiton ni Jehova, kanunay siyang molampos kay gihimo niya ang tanan aron matuman ang iyang katuyoan. (Prov. 16:4) Ug ang mga resulta sa gihimo ni Jehova magpabilin hangtod sa hangtod. Unsa ang katuyoan ni Jehova, ug unsang mga kausaban ang iyang gihimo aron matuman kini? Giingnan sa Diyos ang unang magtiayon kon unsay iyang katuyoan para nila: “Panganak mo ug pagdaghan, pun-a ang yuta ug gamhi kini. Gamhi . . . ang matag buhing linalang sa yuta.” (Gen. 1:28) Dihang mirebelde si Adan ug Eva, nga tungod niana nahimong makasasala ang mga tawo, wala ni makapausab sa katuyoan ni Jehova. Gi-adjust niya ang iyang paagi sa pagtuman niini. Midesisyon dayon siya nga magtukod ug Gingharian sa langit nga magtuman sa iyang orihinal nga katuyoan sa tawo ug sa yuta.—Mat. 25:34. w23.10 20 ¶6-7

Tabangan ta ni Jehova nga makapadayon sa pag-alagad kaniya. Tingali dili ni sayong himoon, ilabina kon naa tay kahuyangan nga padayon natong gisuklan. Usahay, ang atong mga kahuyangan mas lisod tingaling suklan kay sa mga kahuyangan ni apostol Pedro. Pero si Jehova makahatag sa kusog nga atong gikinahanglan aron makapadayon ta. (Sal. 94:​18, 19) Pananglitan, sa wala pa makakat-on sa kamatuoran, dihay brader nga homoseksuwal ug pagkinabuhi sa daghang tuig. Bug-os siyang nagbag-o ug gibiyaan niya ang iyang imoral nga pagkinabuhi. Pero usahay, motungha gihapon ang iyang sayop nga mga tinguha. Unsay nakatabang niya nga molahutay? Siya miingon: “Ginapalig-on ta ni Jehova.” Siya midugang: “Sa tabang sa espiritu ni Jehova . . . , nakita nako nga kaya gyod diay natong magkinabuhi sumala sa iyang mga sukdanan . . . Gigamit ko ni Jehova, ug bisan pa sa akong pagkadili-hingpit, padayon ko niyang gipalig-on.” w23.09 23 ¶12

Mga batan-ong brader, dili awtomatiko nga mahimo mong hamtong nga Kristohanon. Kinahanglan mong mopilig maayong mga ehemplo nga inyong sundogon, mag-ugmad ug katakos sa panghunahuna, mahimong kasaligan, magkat-on ug praktikal nga mga skill, ug mangandam sa umaabot nga mga responsibilidad. Usahay, mabug-atan tingali mo dihang inyong hunahunaon ang mga butang nga kinahanglan ninyong himoon. Pero molampos mo sa paghimo ana. Hinumdomi nga si Jehova gusto kaayong motabang ninyo. (Isa. 41:​10, 13) Siyempre, tabangan pod mo sa mga igsoon sa kongregasyon. Dihang makab-ot ninyo ang inyong bug-os nga potensiyal ingong hamtong nga Kristohanon, ang inyong kinabuhi magmalipayon gyod. Gimahal mo namo, mga batan-ong brader! Hinaot si Jehova dagayang magpanalangin ninyo samtang naningkamot mo nga mahimong hamtong nga Kristohanon. w23.12 29 ¶19-20

Imadyina nga miadto ka sa usa ka tapoktapok uban sa pipila ka igsoon. Lingaw kaayo ka ug nag-selfie ka uban nila. Gani, mikuha kag duha pa ka picture enkasog dili okey ang unang picture. Karon, naa na kay tulo ka picture. Pero sa usa niana, nagkusmod ang usa ka brader. Busa imo ning i-delete kay naa pa kay duha nga nag-smile ang tanan, apil ang brader. Sagad, daghan tag maayong memories sa mga igsoon. Pero ibutang ta nga sa usa ka higayon naay nasulti o nahimo ang usa ka igsoon nga nakapasakit nimo. Unsay imong himoon niana nga memory? Imo nang i-delete, sama nga gi-delete nimo ang usa sa maong mga picture. (Efe. 4:32) Kaya nato nang himoon kay daghan pa tag maayong memories uban niya. Kadto nga mga memories ang gusto natong tipigan ug pabilhan. w23.11 12-13 ¶16-17

Ang Gregong mga pulong nga gigamit dinhi nagpasiugda nga ang sininaan sa Kristohanong babaye kinahanglang magpakitag pagtahod ug konsiderasyon sa pagbati o opinyon sa uban. Proud gyod ta sa atong minahal nga Kristohanong mga sister kay makasaranganon silag sininaan! Ang katakos sa pag-ila maoy laing hiyas nga kinahanglang ipakita sa tanang sister. Unsa ang katakos sa pag-ila? Kini maoy katakos sa pag-ila kon unsay husto ug sayop ug sa pagpili kon unsay maalamong buhaton. Konsideraha ang ehemplo ni Abigail. Ang iyang bana mihimog dili maayong desisyon nga naa unyay dakong epekto sa iyang tibuok panimalay. Si Abigail milihok dayon. Ang iyang maayong panghukom nakaluwas ug kinabuhi. (1 Sam. 25:​14-23, 32-35) Ang katakos sa pag-ila makatabang pod nato sa pagkahibalo kon kanus-a mosulti ug kon kanus-a maghilom. Ug makatabang ni nato nga dili manghilabot sa kinabuhi sa uban dihang magpakitag personal nga interes kanila.—1 Tes. 4:11. w23.12 20 ¶8-9

Gisulat kana ni apostol Pablo ngadto sa kongregasyon sa Roma. Ang mga igsoon didto nakakat-on bahin kang Jehova ug Jesus, nagpakitag pagtuo, ug nahimong mga Kristohanon. Busa ang Diyos ‘nagpahayag na [kanila] nga matarong tungod sa pagtuo,’ ug gidihogan sila pinaagi sa balaang espiritu. (Roma 5:1) Oo, nabatonan nila ang kasaligan ug nindot kaayong paglaom. Sa ulahi, si Pablo misulat sa dinihogang mga Kristohanon sa Efeso bahin sa paglaom nga gihatag sa Diyos kanila. Makadawat silag “panulondon para sa mga balaan.” (Efe. 1:18) Gihisgotan pod ni Pablo sa mga taga-Colosas kon asa nila madawat ang ilang ganti. Iya kining gitawag ug “paglaom nga giandam alang kaninyo sa langit.” (Col. 1:​4, 5) Busa ang dinihogang mga Kristohanon naay paglaom nga mabuhi sa walay kataposan didto sa langit, diin magmando sila uban sa Kristo.—1 Tes. 4:​13-17; Pin. 20:6. w23.12 9 ¶4-5

Ang orihinal nga pulong para sa “magbantay” maoy usa ka ekspresyon nga nagtumong sa pagbantay sa mga sundalo sa usa ka siyudad aron mapanalipdan ni gikan sa mga kaaway. Ang mga nagpuyo niana nga siyudad makatulog nga malinawon kay nahibalo sila nga ang mga guwardiya nagbantay sa mga ganghaan. Sa susama, dihang ang kalinaw sa Diyos magbantay sa atong kasingkasing ug hunahuna, mobati tang kalmado kay nahibalo ta nga luwas ta. (Sal. 4:8) Sama sa nahitabo kang Ana, bisag dili dayon mausab ang atong kahimtang, puwede gihapon tang mobatig kalinaw. (1 Sam. 1:​16-18) Ug kon kalmado ta, mas sayon para nato nga maghunahunag tarong ug mohimog maalamong mga desisyon. Unsay atong mahimo? Dihang mabalaka, tawga ang tigbantay, ingnon ta. Sa unsang paagi? Pag-ampo hangtod nga bation nimo ang kalinaw nga gikan sa Diyos. (Luc. 11:9; 1 Tes. 5:17) Kon nag-atubang kag kalisdanan, lahutay sa pag-ampo, ug imong maeksperyensiyahan kon sa unsang paagi ang kalinaw sa Diyos magbantay sa imong kasingkasing ug hunahuna.—Roma 12:12. w24.01 21 ¶5-6

Aron mabalaan ang ngalan sa iyang Amahan, gilahutay ni Jesus ang tanang kasakit, insulto, ug akusasyon batok kaniya. Nahibalo siya nga gisunod niya ang iyang Amahan sa tanang butang; wala siyay angayng ikaulaw. (Heb. 12:2) Nahibalo pod siya nga direkta siyang giatake ni Satanas niadtong lisod kaayo nga panahon. (Luc. 22:​2-4; 23:​33, 34) Seguradong naglaom si Satanas nga mabungkag niya ang integridad ni Jesus, pero wala gyod siya molampos! Lig-ong gipamatud-an ni Jesus nga bakakon si Satanas ug nga si Jehova naa gyoy maunongong mga alagad nga magpabiling matinumanon bisan sa pinakalisod nga mga pagsulay! Gusto ba nimong mapalipay ang imong nagamando na nga Hari? Kon mao, padayong dayega ang ngalan ni Jehova pinaagi sa pagtabang sa uban nga mahibaloan kon unsa siyang klaseha sa Diyos. Kon imo nang himoon, gisundog nimo ang ehemplo ni Jesus. (1 Ped. 2:21) Sama kang Jesus, mapalipay nimo ang kasingkasing ni Jehova ug imong mapamatud-an nga ang Iyang kaaway, si Satanas, bakakon gyong dako! w24.02 11-12 ¶11-13

Sa miaging lima ka tuig, kapin sa usa ka milyong tawo ang nagpabawtismo ingong mga Saksi ni Jehova. Dihang imong ipahinungod ang imong kaugalingon kang Jehova, modesisyon ka nga mahimong tinun-an ni Jesu-Kristo ug himoong pinakaimportante sa imong kinabuhi ang pagbuhat sa kabubut-on sa Diyos. Unsay pasabot sa imong pagpahinungod? Si Jesus miingon: “Kon dunay buot mosunod kanako, angay niyang dumilian ang iyang kaugalingon.” (Mat. 16:24) Kon magpahinungod na ka kang Jehova, kinahanglan nimong dumilian ang bisan unsa nga supak sa iyang kabubut-on. (2 Cor. 5:​14, 15) Apil ana ang pagdumili sa “mga buhat sa unod,” sama sa seksuwal nga imoralidad. (Gal. 5:​19-21; 1 Cor. 6:18) Kini ba nga mga restriksiyon makapalisod sa imong kinabuhi? Dili. Kon imong gimahal si Jehova ug kombinsido ka nga ang iyang mga balaod maoy para sa imong kaayohan, dili ka mobati niana.—Sal. 119:97; Isa. 48:​17, 18. w24.03 2 ¶1; 3 ¶4

Ihatag ni Jehova ang iyang balaang espiritu ngadto sa mga tawo nga iyang giuyonan. (Mat. 12:18) Puwede natong pangutan-on ang atong kaugalingon, ‘Napakita ba nako ang mga bahin sa bunga sa espiritu sa Diyos?’ Pananglitan, mas mapailobon ba ka karon kay sa niadtong wala pa ka makaila kang Jehova? Sa tinuod lang, kon maningkamot ta nga mapakita ang bunga sa espiritu sa Diyos, mas makombinsir ta nga giuyonan ta ni Jehova! Ipadapat ni Jehova ang bili sa lukat ngadto sa mga tawo nga iyang giuyonan. (1 Tim. 2:​5, 6) Pero komosta kon gibati nato nga wala gihapon ta uyoni ni Jehova bisag naa tay pagtuo sa lukat ug bawtismado na? Hinumdomi nga dili ta pirmeng makasalig sa atong pagbati, pero makasalig ta kang Jehova. Giisip niya nga matarong kadtong nagpakitag pagtuo sa lukat, ug nagsaad siya nga panalanginan niya sila.—Sal. 5:12; Roma 3:26. w24.03 30 ¶15; 31 ¶17