Disyembre

Naa bay gahom si Jehova nga banhawon ang mga patay? Siyempre! Siya ang “Labing Gamhanan.” (Pin. 1:8) Busa kaya niyang pildihon ang bisan unsang kaaway, bisan ang kamatayon. (1 Cor. 15:26) Naa pay laing rason kon nganong makasalig ta nga ang Diyos makabanhaw gyod sa mga patay. Walay limitasyon ang memorya ni Jehova. Ang tanang bituon gitawag niya sa ilang ngalan. (Isa. 40:26) Dili pod siya malimot sa mga namatay. (Job 14:13; Luc. 20:38) Mahinumdom siya bisan sa kinagamyang detalye niadtong iyang banhawon, apil ang ilang hitsura, personalidad, mga eksperyensiya, ug memorya. Klaro nga makasalig ta sa saad ni Jehova nga pagkabanhaw kay nahibalo ta nga gusto ug kaya na niyang tumanon. Nia pay laing rason nga makasalig ta sa saad sa Diyos nga pagkabanhaw: Nahimo na kini ni Jehova. Sa kapanahonan sa Bibliya, daghang matinumanong tawo, apil si Jesus, ang gihatagan niyag gahom sa pagbanhawg mga patay. w23.04 9-10 ¶7-9

Kon pilion nato ang atong isulti ug moestorya ta nga may kalumo, mas dakog purohan nga maminaw ang mga tawo ug mapadayon nato ang panag-estoryahay. Siyempre, kon naay tawo nga gusto lang makigdebate ug magyagayaga sa atong mga gituohan, dili ta obligado nga ipadayon ang panag-estorya. (Prov. 26:4) Pero basin talagsa ra na. Naa tingali uban—o daghan pa gani—nga gustong maminaw. Dako gyod ug kaayohan kon maningkamot ta nga maugmad ang kalumo. Hangyoa si Jehova nga hatagan kag kalig-on aron makapabilin kang kalmado dihang motubag sa kontrobersiyal nga mga pangutana o sa way basehanang mga komento bahin nato. Hinumdomi nga kon magpakita kag kalumo, ang magkalahi nga opinyon dili mograbe ug dili moresultag away. Ug ang imong kalmado, matinahorong tubag basin magpalihok sa uban nga usbon ang ilang opinyon bahin nato ug sa mga kamatuoran sa Bibliya. Busa magmadeterminado nga mahimong “andam kanunay sa pagdepensa” sa imong pagtuo, ug “buhata kana nga may kalumo ug lawom nga pagtahod.” (1 Ped. 3:15) Oo, ipakita ang imong kalig-on pinaagi sa pagpabiling lumo! w23.09 19 ¶18-19

Konsideraha ang upat ka paagi nga makapakita tag pailob. Una, ang mapailobong tawo dili daling masuko. Maningkamot siya nga magpabiling kalmado ug dili mobalos dihang naay makapalagot niya o ma-stress siya. (Ex. 34:6) Ikaduha, ang mapailobong tawo kalmadong makahulat. Kon kinahanglan siyang maghulat ug dugay kay sa iyang gidahom, maningkamot siya nga dili mapul-an sa paghulat o mahimong iritable. (Mat. 18:​26, 27, footnote) Ikatulo, ang mapailobong tawo dili magdalidali. Kon ang mapailobong tawo naay importanteng buluhaton nga kinahanglang himoon, dili niya kini dalidalion pagsugod o dalidalion paghuman. Hinuon, mogahin siyag igong panahon sa pagplano sa iyang himoon. Dayon, mohatag siyag igong panahon sa paghimo sa buluhaton aron maayo ang resulta. Ikaupat, ang mapailobong tawo maningkamot nga molahutay sa mga pagsulay, nga dili moreklamo. Maningkamot siya nga molahutay ug magpabiling positibo. (Col. 1:11) Ingong mga Kristohanon, kinahanglan natong ipakita ang pailob niining upat ka paagi nga gihisgotan. w23.08 20-21 ¶3-6

Ang usa ka importanteng rason nga panalipdan nato ang atong simbolikong kasingkasing mao nga ginasusi kini ni Jehova. Nagpasabot ni nga makita ni Jehova dili lang kon unsay makita sa uban kanato, kondili kon kinsa gyod ta. Higugmaon ta niya kon pun-on nato ang atong hunahuna sa iyang kaalam, nga makahatag natog kinabuhing walay kataposan. (Juan 4:14) Kon ato nang himoon, dili makasulod sa atong hunahuna ang makahilong impluwensiya ni Satanas ug sa iyang kalibotan. (1 Juan 5:​18, 19) Dihang mas masuod ta kang Jehova, mas molalom ang atong gugma ug pagtahod niya. Kay dili nato gustong pasakitan ang atong Amahan, dumtan gyod nato bisan ang paghunahuna pa lang nga mohimog sala. Si Marta, sister nga taga-Croatia, gitental sa paghimog imoralidad. Siya misulat: “Naglisod kog kontrol sa akong hunahuna. Lisod pod suklan ang tinguha nga i-enjoy ang temporaryong kalipay sa pagpakasala. Pero ang kahadlok kang Jehova nakapanalipod nako.” Sa unsang paagi? Si Marta miingon nga iyang gipamalandong ang daotang mga resulta kon mohimo siyag sayop nga desisyon. Mahimo pod nato na. w23.06 20-21 ¶3-4

Nahibalo si Jesus nga katuyoan ni Jehova nga balaanon ang Iyang ngalan, nga limpiyohan kini sa tanang pasipala. Kanay hinungdan nga gitudloan ni Jesus ang iyang mga sumusunod sa pag-ampo: “Amahan namo nga anaa sa mga langit, balaanon unta ang imong ngalan.” (Mat. 6:9) Nahibalo si Jesus nga kini ang kinadak-ang isyu nga giatubang sa tanang linalang. Wala nay laing tawo o anghel ang mas dakog nahimo sa pagbalaan sa ngalan ni Jehova kay kang Jesus. Pero dihang gidakop si Jesus, unsay giakusar sa iyang mga kaaway kaniya? Iya kunong gipasipalahan ang Diyos! Seguradong gibati ni Jesus nga ang pagdaot ug pagpasipala sa balaang ngalan sa iyang Amahan mao ang pinakabug-at sa tanang sala. Nasakitan kaayo siya nga akusahan ug hukman siyang sad-an niini nga krimen. Kana tingali ang pangunang rason kon nganong “grabe kaayo ang iyang kasakit” sa mga oras una siya gidakop.—Luc. 22:​41-44. w24.02 11 ¶11

Sa lumba sa kinabuhi, kinahanglang molabaw ang atong gugma kang Jehova ug Jesus kay sa atong pamilya. (Mat. 10:37) Pero wala ni magpasabot nga pasagdan na lang nato ang atong mga responsibilidad sa pamilya, nga mora bag nakapugong ni nato sa paglipay sa Diyos ug sa Kristo. Aron mahimo tang dalawaton sa Diyos ug sa Kristo, angay natong tumanon ang atong papel diha sa pamilya. (1 Tim. 5:​4, 8) Kon ato nang himoon, mas magmalipayon ta. Gidisenyo ni Jehova ang mga pamilya nga magmalipayon kon higugmaon ug tahoron sa bana ug asawa ang usag usa, kon higugmaon ug bansayon sa mga ginikanan ang ilang mga anak, ug kon sundon sa mga anak ang ilang mga ginikanan. (Efe. 5:33; 6:​1, 4) Bisag unsay imong papel diha sa pamilya, salig sa kaalam nga naa sa Bibliya imbes sa imong gibati, kultura, o sa mga tawo nga giisip nga eksperto. Pahimusli ang atong binase sa Bibliya nga mga publikasyon. Naa ni praktikal nga mga sugyot kon unsaon pagpadapat ang mga prinsipyo sa Bibliya. w23.08 28 ¶6-7

Ang Kristohanong mga babaye kinahanglang makakat-on ug praktikal nga mga skill. Ang ubang skill nga makat-onan sa usa ka babaye sa bata pa siya makatabang niya sa tibuok niyang kinabuhi. Pananglitan, pagkat-on nga mahimong maayo sa pagbasa ug pagsulat. Sa ubang kultura, ang pagbasa ug pagsulat wala giisip nga importanteng skill nga kinahanglang makat-onan sa mga babaye. Pero importante ni nga skill para sa tanang Kristohanon. (1 Tim. 4:13) Busa ayawg tugoti nga naay makapugong nimo sa pagkat-on nga mahimong maayo sa pagbasa ug pagsulat. Unsang mga benepisyo ang imong madawat kon imo ning himoon? Kini nga mga skill motabang nimo nga makakitag trabaho ug magpabilin niana. Mahimo kang maayong estudyante ug magtutudlo sa Pulong sa Diyos. Labaw sa tanan, mas masuod ka kang Jehova samtang imong basahon ang iyang Pulong ug pamalandongon kini.—1 Tim. 4:15. w23.12 20 ¶10-11

Pangayog tabang kang Jehova aron masuklan ang mga tentasyon. Kay dili ta hingpit, kinahanglan tang maningkamot kanunay nga suklan ang tentasyon nga mohimog daotan. Ginahimo ni Satanas ang tanan aron maglisod pa gyod ta nga masuklan ang tentasyon. Ang usa nga iyang gigamit aron maimpluwensiyahan ang atong panghunahuna mao ang dili maayong mga kalingawan. Kini nga mga kalingawan makahugaw sa atong hunahuna, nga makadaot sa atong relasyon kang Jehova ug puwedeng moresultag seryosong sala. (Mar. 7:​21-23; Sant. 1:​14, 15) Kinahanglan nato ang tabang ni Jehova aron masuklan nato ang tentasyon sa paghimog daotan. Sa modelong pag-ampo ni Jesus, iyang giapil kini nga hangyo: “Ayawg itugot nga madaog mi sa tentasyon, apan luwasa mi gikan sa usa nga daotan.” (Mat. 6:13) Si Jehova gustong motabang nato, pero kinahanglan tang mangayog tabang niya. Kinahanglan pod tang molihok uyon sa atong mga pag-ampo. w23.05 6-7 ¶15-17

Dihang pabilhan sa magtiayon ang ilang relasyon sa ilang langitnong Amahan, andam nilang sundon ang iyang tambag. Tungod ana, ilang malikayan ug makaya ang mga problema nga posibleng makabugnaw sa ilang gugma sa usag usa. Ang mga tawo nga maayog espirituwalidad maningkamot pod nga sundogon si Jehova ug mapakita ang iyang mga hiyas, sama sa pagkamaayo, pailob, ug pagpasaylo. (Efe. 4:32–5:1) Kon ipakita sa magtiayon kini nga mga hiyas, mas molig-on ang ilang gugma sa usag usa. Ang sister nga si Lena, nga kapig 25 ka tuig nang minyo, miingon, “Mas sayong higugmaon ug tahoron ang tawo nga maayog espirituwalidad.” Konsideraha ang usa ka pananglitan sa Bibliya. Dihang mipili si Jehova kon kinsay mahimong ginikanan sa umaabot nga Mesiyas, Iyang gipili si Jose ug Maria. Sa kadaghan sa kaliwat ni David, nganong sila ang Iyang gipili? Kay silang duha parehong suod kang Jehova, ug nahibalo si Jehova nga ila siyang unahon diha sa ilang kaminyoon. w23.05 20-21 ¶3-4

Bisag hingpit ang atong Lider nga si Jesus, dili hingpit ang mga tawo nga iyang gigamit nga manguna dinhi sa yuta. Usahay, malisdan tingali ta sa pagsunod kanila, ilabina kon naa silay ipabuhat nga dili nato gustong himoon. Dihay higayon nga si apostol Pedro nagduhaduha sa pagsunod. Dihang giingnan siya sa anghel nga kaonon ang mga hayop nga gidili sa Moisesnong Balaod, si Pedro mibalibad—dili lang kas-a, kondili tulo ka beses! (Buh. 10:​9-16) Ngano? Naglibog siya sa bag-ong direksiyon. Sa laing bahin, si apostol Pablo misunod dihang ang Kristohanong mga ansiyano sa Jerusalem naghatag niyag direksiyon nga magdalag upat ka lalaki ngadto sa templo ug hinloan ang iyang kaugalingon sa seremonyal nga paagi aron ipakita nga gasunod siya sa Balaod. Nahibalo si Pablo nga ang mga Kristohanon dili na ubos sa Balaod ug nga wala siyay gihimong sayop. Bisan pa niana, “pagkasunod adlaw gidala ni Pablo ang [maong] mga tawo ug gihinloan ang iyang kaugalingon sa seremonyal nga paagi uban kanila.” (Buh. 21:​23, 24, 26) Ang pagkamasinugtanon ni Pablo nakaamot sa panaghiusa.—Roma 14:​19, 21. w23.10 10 ¶15-16

Wala tingali ka maghunahuna nga ang kahadlok maoy importanteng hiyas sa maayong panaghigalaay. Pero kadtong gusto nga masuod kang Jehova kinahanglang ‘mahadlok kaniya.’ Bisag unsa na ta ka dugay nga nag-alagad kang Jehova, kinahanglang dili nato wad-on ang atong kahadlok kaniya. Pero unsay kahulogan sa pagkahadlok sa Diyos? Ang tawo nga naay hustong kahadlok sa Diyos nahigugma Kaniya ug dili gustong mohimog bisan unsa nga makadaot sa iyang relasyon Kaniya. Si Jesus nagpakitag ingon ana nga “kahadlok sa Diyos.” (Heb. 5:7) Dili kalisang ang iyang gibati kang Jehova kondili lawom nga gugma, ug gusto niyang sundon si Jehova. (Isa. 11:​2, 3; Juan 14:​21, 31) Sama kang Jesus, mibati tag lawom nga pagtahod ug kahingangha kang Jehova kay Siya mahigugmaon, maalamon, patas, ug gamhanan. Nahibalo sab ta nga gihigugma ta ni Jehova ug maapektohan siya sa atong reaksiyon sa iyang paggiya—mahimong mapasakitan nato si Jehova o mapalipay siya.—Sal. 78:41; Prov. 27:11. w23.06 14 ¶1-2; 15 ¶5

Dihang nahimong gamhanan si Haring Uzzias, nalimot siya nga si Jehova ang naghatag niyag kusog ug naghimo niyang malamposon. Unsay leksiyon? Angay natong hinumdoman pirme nga ang mga panalangin ug pribilehiyo nga atong nadawat naggikan kang Jehova. Imbes manghambog sa atong mga nalampos, angay natong ihatag kang Jehova ang pasidungog. (1 Cor. 4:7) Kinahanglang mapainubsanon natong ilhon nga dili ta hingpit ug nagkinahanglan tag disiplina. Ang usa ka brader nga mga 60 anyos misulat: “Nakakat-on ko nga dili mangluod o maluya dihang sultihan ko sa uban bahin sa akong sayop nga nahimo. Usahay, tul-iron ko tungod sa akong mga sayop, pero naningkamot ko nga mouswag ug magpadayon sa pag-alagad.” Ang tinuod, kon naa tay kahadlok kang Jehova ug magpabiling mapainubsanon, magmalipayon gyod ang atong kinabuhi.—Prov. 22:4. w23.09 10 ¶10-11

Ang unang mga Kristohanon kinahanglang molahutay. Gawas sa komon nga mga problema nga ilang giatubang, naa pa gyod silay giatubang nga mga pagsulay. Daghan nila ang gilutos, dili lang sa Hudiyong mga lider sa relihiyon ug sa Romanong mga awtoridad, kondili sa ila pong mga pamilya. (Mat. 10:21) Ug sulod sa kongregasyon, dihay mga higayon nga kinahanglan nilang suklan ang impluwensiya ug ang makapabahinbahin nga pagtulon-an sa mga apostata. (Buh. 20:​29, 30) Pero nakalahutay ang maong mga Kristohanon. (Pin. 2:3) Ngano? Ilang gipamalandong ang ehemplo niadtong mga milahutay, sama kang Job. (Sant. 5:​10, 11) Miampo sila nga hatagan silag kusog. (Buh. 4:​29-31) Ug nagpokus sila sa maayong mga resulta sa ilang paglahutay. (Buh. 5:41) Makalahutay pod ta kon regular natong tun-an ug pamalandongon ang mga ehemplo niadtong milahutay, nga mabasa diha sa Bibliya ug sa atong mga publikasyon. w23.07 3 ¶5-6

Si Jehova ug Jesus dili gyod mobiya kanato. Human ilimod ni apostol Pedro si Jesus, kinahanglan siyang mohimog importanteng desisyon. Mohunong ba siya, o magpadayon ingong tinun-an sa Kristo? Si Jesus nag-ampo kang Jehova nga unta ang pagtuo ni Pedro dili moangka. Gisultihan ni Jesus si Pedro bahin niana nga pag-ampo, ug gipahayag ni Jesus ang iyang pagsalig nga sa ulahi, mapalig-on ni Pedro ang iyang mga igsoon. (Luc. 22:​31, 32) Seguradong nadasig gyod si Pedro dihang mahinumdom siya sa giingon ni Jesus! Dihang kinahanglan tang mohimog importanteng desisyon, gamiton tingali ni Jehova ang mahigugmaong mga magbalantay aron pasaligan ta nga makapabilin tang matinumanon. (Efe. 4:​8, 11) Sama nga gitagana ni Jehova ang materyal nga panginahanglan ni Pedro ug sa ubang apostoles, itagana pod Niya ang atong materyal nga panginahanglan kon unahon nato ang ministeryo sa atong kinabuhi. w23.09 24-25 ¶14-15

Makita ni Jehova ang tanang kaayo nga atong gihimo sa uban, bisan unsa pa ni ka gamay. Giisip ni niya ingong bililhong halad ug ingong utang nga iyang bayran. Kon nag-alagad ka kaniadto ingong ministeryal o ansiyano, dili malimot si Jehova sa imong mga paghago kaniadto ug sa gugma nga nagpalihok nimo sa paghimo niana. (1 Cor. 15:58) Nahibalo pod siya sa gugma nga padayon nimong gipakita. Gusto ni Jehova nga molalom ang atong gugma para niya ug sa uban. Mapalig-on nato ang atong gugma kang Jehova pinaagi sa pagbasa ug pagpamalandong sa iyang Pulong ug regular nga pag-ampo kaniya. Molalom ang atong gugma sa mga igsoon kon ato silang tabangan sa praktikal nga mga paagi. Kon mas molalom ang atong gugma, mas masuod ta kang Jehova ug sa mga igsoon. Ug kana nga kasuod magpadayon hangtod sa hangtod! w23.07 10 ¶11; 11 ¶13; 13 ¶18

Ang matag Kristohanon maoy modesisyon kon unsaon niya pag-atiman ang iyang panglawas. Dihang mopili silag paagi sa pagtambal, kinahanglan nilang sundon ang balaod sa Bibliya nga likayan ang dugo ug espiritismo. (Buh. 15:20; Gal. 5:​19, 20) Pero sa mga butang nga walay espesipikong giingon ang Bibliya, puwede silang modesisyon kon unsang paagi sa pagtambal ang ilang dawaton. Bisag kombinsido kaayo ta sa atong gipili nga paagi sa pagtambal, kinahanglan natong tahoron ang katungod sa atong mga igsoon sa paghimog mga desisyon bahin sa pag-atiman sa ilang panglawas. Busa angay natong hinumdoman kini nga mga punto: (1) Ang Gingharian sa Diyos lang ang bug-os ug permanenteng makasulbad sa atong mga problema sa panglawas. (Isa. 33:24) (2) Ang matag Kristohanon kinahanglang “bug-os nga kombinsido” kon unsay pinakamaayo para niya. (Roma 14:5) (3) Dili nato hukman ang uban o mohimog bisan unsa nga makapandol nila. (Roma 14:13) (4) Ang mga Kristohanon magpakitag gugma ug unahon nila ang panaghiusa sa kongregasyon kay sa ilang kagawasan sa paghimog personal nga mga desisyon.—Roma 14:​15, 19, 20. w23.07 24 ¶15

Imo bang gipabilhan ang imong relasyon kang Jehova? Siyempre! Sukad pa sa una, daghang tawo ang nagpabili sa ilang relasyon kang Jehova. (Sal. 104:​33, 34) Mihimo silag mga sakripisyo sa pagsimba kaniya. Kanay gihimo sa mga Nazareo sa karaang Israel. Ang pulong nga “Nazareo” nagkahulogang “Usa nga Gipahinungod.” Haom ni nga deskripsiyon sa madasigong mga Israelinhon kinsa mihimog personal nga mga sakripisyo aron alagaron si Jehova sa espesyal nga paagi. Gitugot sa Moisesnong Balaod nga ang usa ka tawo mohimog espesyal nga panaad kang Jehova pinaagi sa pagkinabuhi ingong Nazareo sulod sa pipila ka panahon. (Num. 6:​1, 2) Apil niana nga seryosong panaad ang pagsunod sa pipila ka balaod nga dili kinahanglang sundon sa ubang Israelinhon. Busa nganong modesisyon ang usa ka Israelinhon nga mahimong Nazareo? Posible nga napalihok siya sa iyang dakong gugma kang Jehova ug kinasingkasing nga apresasyon sa mga panalangin nga iyang nadawat.—Deut. 6:5; 16:17. w24.02 14 ¶1-2

Sa Bibliya, ang Hebreohanong pulong para sa “pagkamaunongon,” o “maunongong gugma,” nagtumong sa gugma ug suod nga pagbati. Kining pulonga sagad gigamit sa paghubit sa gugma sa Diyos para sa iyang mga alagad. Gigamit pod ni sa paghubit sa gugma nga gipakita sa mga alagad sa Diyos sa usag usa. (2 Sam. 9:​6, 7) Ang atong pagkamaunongon puwedeng mas molig-on paglabay sa panahon. Konsideraha kon sa unsang paagi tinuod kini sa kahimtang ni Daniel. Sa tibuok kinabuhi ni Daniel, kadaghan nasulayan ang iyang pagkamaunongon kang Jehova. Pero ang usa sa kinadak-ang pagsulay nahitabo niadtong kapig 90 anyos na siya. Ang mga opisyal sa palasyo naglagot kang Daniel ug wala magtahod sa Diyos nga iyang gisimba. Busa naghimo silag plano aron mapatay si Daniel. Ilang gidani ang hari nga magpagawas ug mando nga magsulay kon kang kinsa magmaunongon si Daniel—sa iya bang Diyos o sa hari. Ang kinahanglan lang himoon ni Daniel aron pamatud-an ang iyang pagkamaunongon sa hari ug magustohan siya sa tanan mao ang dili pag-ampo kang Jehova sulod sa 30 ka adlaw. Wala gyod mokompromiso si Daniel.—Dan. 6:​12-15, 20-22. w23.08 5 ¶10-12

Gusto ni Jehova nga padayon natong pakitaag gugma ang atong mga igsoon. Kon naay mga panahon nga dili maayog pagtratar ang usa ka igsoon kanato, hunahunaon lang nato nga wala na niya tuyoa ug nga gusto gyod niyang sundon ang mga prinsipyo sa Bibliya. (Prov. 12:18) Gimahal sa Diyos ang iyang matinumanong mga alagad bisan sa ilang pagkadili-hingpit. Dihang makahimo tag sayop, isipon gihapon ta niya nga higala ug dili siya magdumot. (Sal. 103:9) Importante kaayo nga sundogon nato ang atong mapinasayloong Amahan! (Efe. 4:32–5:1) Hinumdoman pod nato nga samtang nagkaduol ang kataposan, kinahanglan tang magpabiling suod sa mga igsoon. Makadahom ta nga mograbe pa ang paglutos. Basin mapriso pa gani ta tungod sa atong pagtuo. Mas kinahanglan nato ang mga igsoon nianang panahona.—Prov. 17:17. w24.03 15-16 ¶6-7

Ang Bibliya naghisgot ug mga batan-on nga nakigsuod kang Jehova, giuyonan niya, ug nagmalipayon sa ilang kinabuhi. Usa nila mao si David. Batan-on pa lang siya dihang gipili niya nga simbahon ang Diyos, ug sa ulahi nahimo siyang maunongong hari. (1 Hari 3:6; 9:​4, 5; 14:8) Madasig gyod ka kon imong tun-an ang kinabuhi ug matinumanong pag-alagad ni David. Puwede pod nimong tun-an ang kinabuhi ni Marcos o Timoteo. Sukad sa ilang pagkabata, matinumanon silang nag-alagad kang Jehova. Tungod ana, napalipay nila si Jehova ug nagmalipayon pod sila. Ang imong kaugmaon nagdepende sa kon giunsa nimo paggamit ang imong kinabuhi karon. Kon mosalig ka kang Jehova ug dili sa imong kaugalingong pagsabot, giyahan ka Niya sa paghimog maalamong mga desisyon. Puwede kang makabaton ug malipayon ug makapatagbaw nga kinabuhi. Hinumdomi, gipabilhan ni Jehova ang imong ginahimo para niya. Naa pa bay molabaw sa paggamit sa imong kinabuhi sa pag-alagad sa atong mahigugmaong langitnong Amahan? w23.09 13 ¶18-19

Si apostol Pablo nahibalo nga ang mga igsoon diha sa kongregasyon dili hingpit. Pananglitan, sa bag-o pa siya nahimong Kristohanon, naay mga igsoon nga nanghukom niya. (Buh. 9:26) Sa ulahi, gipanabi siya sa ubang mga igsoon aron daoton ang iyang reputasyon. (2 Cor. 10:10) Nakita pod ni Pablo ang usa ka ansiyano nga mihimog sayop nga desisyon nga posibleng nakapandol sa uban. (Gal. 2:​11, 12) Ug nadismayar pod kaayo siya sa gihimo sa iyang suod nga higala nga si Marcos. (Buh. 15:​37, 38) Puwede unta nga dili na makig-uban si Pablo niadtong mga nakapasakit niya. Bisan pa niana, positibo gihapon ang iyang panglantaw sa mga igsoon ug nagpabilin siyang dasig sa pag-alagad kang Jehova. Unsay nakatabang kang Pablo sa paglahutay? Gimahal ni Pablo ang mga igsoon. Tungod ana, nagpokus siya sa ilang maayong mga hiyas, dili sa ilang mga kahuyangan. Ang gugma nakatabang pod kang Pablo nga ipadapat ang giingon sa teksto karong adlawa. w24.03 15 ¶4-5

Ang Bibliya daghag asoy nga nagpakita sa kaimportante sa kalumo. Tagda pananglitan si Isaac. Dihang nagpuyo siya sa Gerar, nga teritoryo sa mga Filistehanon, ang iyang mga silingan nasina niya. Tungod ana, gitabonan nilag yuta ang mga atabay nga gikalot sa mga sulugoon sa iyang amahan. Imbes makig-away para sa iyang katungod, si Isaac ug ang iyang panimalay mibalhin sa laing lugar ug nagkalot didto ug laing mga atabay. (Gen. 26:​12-18) Pero miingon na pod ang mga Filistehanon nga silay tag-iya sa tubig nianang lugara. Bisan pa niana, si Isaac nagpabiling kalmado ug wala makig-away. (Gen. 26:​19-25) Unsay nakatabang niya nga magpabiling lumo bisag balikbalik siyang gihagit sa uban? Seguradong nakakat-on siya sa ehemplo sa iyang ginikanan. Nakita niya ang pagkamakigdaiton ni Abraham ug ang “kalmado ug lumo nga personalidad” ni Sara.—1 Ped. 3:​4-6; Gen. 21:​22-34. w23.09 15 ¶4

Mahigugmaong gipadala ni Jehova ang iyang panganay nga Anak dinhi sa yuta aron tudloan ang mga tawo bahin sa Gingharian ug ihalad ang iyang kinabuhi aron malukat ta sa sala ug kamatayon. Dayon si Jesus gibanhaw ngadto sa langit aron magmando ingong Hari sa Gingharian sa Diyos. Ang pangunang tema sa Bibliya mao ang pagbindikar sa ngalan ni Jehova samtang iyang tumanon ang iyang katuyoan sa yuta pinaagi sa iyang Gingharian ubos sa pagmando sa Kristo. Ang katuyoan ni Jehova dili gyod mausab. Siya mismo ang naggarantiya nga matuman kini. (Isa. 46:​10, footnote; Heb. 6:​17, 18) Sa ngadtongadto, ang yuta mahimong paraiso nga puy-an sa hingpit, matarong nga mga kaliwat ni Adan ug Eva, ug “mabuhi [sila] hangtod sa hangtod.” (Sal. 22:26) Pero dili lang kana ang katuyoan ni Jehova. Ang iyang pinakadakong katuyoan mao nga magkahiusa ang tanan niyang intelihenteng linalang sa langit ug yuta. Dayon ang tanan maunongong magpasakop kaniya ingong ilang Soberano. (Efe. 1:​8-11) Dili ba makapahingangha ang paagi ni Jehova sa pagtuman sa iyang katuyoan? w23.10 20 ¶7-8

Wala madugay human makaabot sa Jerusalem ang mga Hudiyo nga gikan sa Babilonya, naapektohan sila sa kalisod sa ekonomiya, gubot nga kahimtang sa politika, ug pagsupak. Tungod niana, ang uban wala na makapokus sa pagtukod pag-usab sa templo ni Jehova. Busa si Jehova nagpadalag duha ka propeta, si Haggeo ug Zacarias, aron mabalik ang kadasig sa katawhan, ug maayo kinig resulta. (Hag. 1:1; Zac. 1:1) Pero halos 50 ka tuig sa ulahi, naluya na pod ang mga Hudiyo. Si Esdras, nga hanas nga tigkopya sa Balaod, miabot sa Jerusalem gikan sa Babilonya aron dasigon ang katawhan sa Diyos nga himoong prayoridad ang matuod nga pagsimba. (Esd. 7:​1, 6) Ang mga tagna ni Haggeo ug Zacarias nakatabang sa katawhan sa Diyos kaniadto nga padayong mosalig kang Jehova panahon sa pagsupak. Makatabang pod ni nato karon nga padayong mosalig nga tabangan ta ni Jehova bisag unsa pang kalisdanan ang moabot sa atong kinabuhi.—Prov. 22:19. w23.11 14-15 ¶2-3

Unsaon nato pagpakita ang atong gugma sa mga igsoon? Ang usa ka paagi mao ang paghupay kanila. Kita ‘makapadayon sa paghupay sa usag usa’ kon naa tay kaluoy. (1 Tes. 4:18) Unsaon nato pagpalig-on ang atong gugma sa usag usa? Pinaagi sa pagpaningkamot nga mapasaylo ang sayop sa uban. Nganong importante ilabina karon nga magpakita tag gugma sa usag usa? Matikdi ang rason nga gihatag ni Pedro: “Ang kataposan sa tanang butang duol na. Busa . . . batoni ang init nga gugma sa usag usa.” (1 Ped. 4:​7, 8) Samtang mas nagkaduol ang kataposan niining daotang kalibotan, unsay atong madahom? Bahin sa iyang mga sumusunod, si Jesus nagtagna: “Dumtan mo sa tanang kanasoran tungod sa akong ngalan.” (Mat. 24:9) Aron makalahutay niana nga pagdumot, kinahanglan tang magpabiling nahiusa. Kon ato nang himoon, dili molampos si Satanas sa iyang mga paningkamot nga magkabahinbahin ta, kay kita nabugkos sa gugma.—Filip. 2:​1, 2. w23.11 13 ¶18-19

Ang mga kamatuoran sa Pulong sa Diyos gamhanan kaayo. Pinaagi sa pagtudlo sa mga tawo bahin kang Jehova ug kon unsa siyang klaseha sa Diyos, makita nato ang nindot kaayong mga resulta. Mapahigawas sila sa mga bakak ni Satanas ug makita nila ang nindot kaayong mga hiyas sa atong Amahan. Mahingangha kaayo sila sa iyang walay kinutobang gahom. (Isa. 40:26) Makakat-on sila sa pagsalig kaniya tungod sa iyang hingpit nga hustisya. (Deut. 32:4) Makabenepisyo sila sa iyang dakong kaalam. (Isa. 55:9; Roma 11:33) Ug mahupayan sila sa pagkahibalo nga siya ang personipikasyon sa gugma. (1 Juan 4:8) Samtang makigsuod sila kang Jehova, ang ilang paglaom nga mabuhi sa walay kataposan ingong iyang mga anak mahimong segurado. Pagkadakong pribilehiyo nga makatabang ta sa mga tawo nga masuod sa ilang Amahan! Dihang ato nang himoon, isipon ta ni Jehova ingong iyang mga “isigkamagbubuhat.”—1 Cor. 3:5. w24.02 12 ¶15

Kon Bible study ka o anak ug Saksi, naghunahuna ba ka nga magpabawtismo? Maayo na nga tumong! Pero sa dili pa ka magpabawtismo, kinahanglan una kang magpahinungod sa imong kaugalingon kang Jehova. Unsaon nimo pagpahinungod sa imong kaugalingon kang Jehova? Manaad ka niya diha sa pag-ampo nga siya lang ang imong simbahon ug nga unahon nimo sa imong kinabuhi ang pagbuhat sa iyang kabubut-on. Sa ato pa, manaad ka kang Jehova nga padayon nimo siyang higugmaon “sa tibuok mong kasingkasing, sa tibuok mong kalag, sa tibuok mong hunahuna, ug sa tibuok mong kusog.” (Mar. 12:30) Ang imong pagpahinungod himoon sa pribado, tali lang nimo ug kang Jehova. Sa laing bahin, ang pagpabawtismo himoon atubangan sa daghan. Pinaagi ani, makita nila nga nagpahinungod na ka kang Jehova. Ang imong pagpahinungod maoy sagrado nga panaad. Gidahom ni Jehova nga imo nang tumanon, ug mao pod nay imong gidahom sa imong kaugalingon.—Eccl. 5:4. w24.03 2 ¶2; 3 ¶5

Dili gyod kalikayan ang problema sulod sa kaminyoon. Ang Bibliya prangkang nag-ingon nga ang magtiayon makasinati gyod ug “kasakitan sa ilang unod.” (1 Cor. 7:28) Ngano? Kay ang bana ug asawa parehong dili hingpit, ug lainlain silag kinaiya, gusto, ug dili gusto. Tingali lainlain silag kultura o kahimtang nga gidak-an. Ug naa tingali mogawas nga mga batasan nga wala nila makita sa wala pa sila magminyo. Kining tanan puwedeng mahimong hinungdan sa mga dili pagsinabtanay. Imbes dawaton nga ang matag usa nila naay naamot sa problema ug maningkamot nga masulbad kana, basig ila hinuong basolon ang ilang kapikas. Basin ganig maghunahuna sila nga magbulag o magdiborsiyo na lang. Pero mao ba gyod na ang solusyon? Dili. Gidahom ni Jehova nga tahoron sa mga magtiayon ang kahikayan sa kaminyoon bisan kon ang ilang kapikas lisod ikasabot. w24.03 16 ¶8; 17 ¶11

Human ka magpahinungod ug magpabawtismo, ang imong paglaom nga mabuhi sa walay kataposan sa Paraisong yuta padayong mitubo samtang nagkat-on kag dugang ug mas mihamtong sa espirituwal. (Heb. 5:13–6:1) Lagmit naeksperyensiyahan nimo ang gihisgotan sa Roma 5:​2-4. Tingali nasinatian nimo ang lainlaing kasakitan, pero milahutay ka ug nakita nimo nga giuyonan ka sa Diyos. Kay segurado ka nga imong napalipay ang Diyos, naa na kay mas dakong rason sa pagdahom nga madawat nimo ang iyang mga gisaad. Ang imong paglaom mas milig-on pa kay sa sinugdan. Nahimo ning mas tinuod ug mas personal para nimo. Dako kaayo nig epekto sa tanang bahin sa imong kinabuhi, ug nakaapektar ni sa imong pagtratar sa pamilya, paghimog mga desisyon, ug bisan sa paggamit nimo sa imong panahon. Si apostol Pablo dugang naghisgot ug importante kaayong punto bahin sa paglaom nga imong nabatonan human nimo madawat ang pag-uyon sa Diyos. Siya miingon nga ang imong gilaoman matuman.—Roma 15:13. w23.12 12-13 ¶16-19

Dihang mag-atubang ug lisod nga pagsulay, ang atong pagbati ug panghunahuna basin mahimong dili balanse ug maapektohan tingali ang atong reaksiyon. Samag barko nga gikusokuso sa kusog nga mga balod, mobati pod tingali ta nga gikusokuso ta sa lainlaing emosyon. Sa unsang paagi si Jehova motabang nato dihang malumsan ta sa maong mga emosyon? Nagpasalig siya nga hatagan ta niyag kasegurohan, sa laing pagkasulti, tabangan ta niya nga mahimong balanse. Dihang ang barko makaatubang ug bagyo, magtuyatuya tingali ni. Pero aron magpabiling balanse, daghang barko ang naay mga stabilizer (nga morag katig) sa isigkakilid ilalom sa tubig. Makatabang ni aron ang barko dili kaayo magtuyatuya ug ang mga pasahero mas luwas ug dili kaayo malisdan sa biyahe. Pero kini nga mga stabilizer mas epektibo kon ang barko padayong nagdagan. Sa susama, tabangan ta ni Jehova nga mahimong balanse kon padayon tang mag-alagad kaniya nga matinumanon panahon sa mga pagsulay. w24.01 22 ¶7-8

Dihang mahadlok ka, pangutan-a ang kaugalingon, ‘Unsa nay nahimo ni Jehova?’ Pamalandonga ang iyang mga gilalang. Pananglitan, dihang atong ‘panid-an pag-ayo’ kon giunsa pag-atiman ni Jehova ang mga langgam ug bulak—nga wala lalanga sumala sa iyang larawan ug dili makasimba niya—molig-on ang atong pagsalig nga iya pod tang atimanon. (Mat. 6:​25-32) Pamalandonga pod ang nahimo ni Jehova para sa iyang mga magsisimba. Puwede nimong tun-an ang usa ka karakter sa Bibliya nga nagpakitag talagsaong pagtuo, o puwede pod kang magbasa ug eksperyensiya sa mga alagad ni Jehova sa modernong panahon. Dugang pa, pamalandonga kon giunsa ka pag-atiman ni Jehova. Sa unsang paagi ka niya gikabig sa kamatuoran? (Juan 6:44) Giunsa niya pagtubag ang imong mga pag-ampo? (1 Juan 5:14) Sa unsang paagi ka nakabenepisyo kada adlaw tungod sa halad lukat sa iyang pinanggang Anak?—Efe. 1:7; Heb. 4:​14-16. w24.01 3 ¶6; 7 ¶17