Nagapangita Ka bag Kauban sa Kinabuhi?
“WALA nay mas maanindot pa, mas mahigalaon ug mas matahom nga relasyon, pagsandurotay o pag-ubanay kay sa usa ka maayong kaminyoon.” Mao kini ang ginaingon. Busa, dili ikahibulong nga milyonmilyong dili minyo gustong makabaton ug kauban sa kinabuhi.
Ang uban modangop sa kompiyoter sa pagpangitag kauban, ang uban sa mga bitoon. Apan unsa ka maayo ang pagdangop sa atong Maglalalang, ang Tigmugna sa kaminyoon! (Genesis 2:18-24) Ang mahigugmaong kaikag sa Diyos ug kaalam naghatag malig-ong sukaranan sa pagsalig sa iyang tambag ug mga prinsipyo nga makatabang kanato kon unsay pangitaon diha sa kauban sa kaminyoon. (Salmo 19:7) Ang iyang Pulong nagsugo kanato sumala sa mosunod
‘Pagminyo Diha Lamang sa Ginoo’
Ngano? Tungod kay nagatagad si Jehova sa atong walay kataposang kaayohan. Ang tambag ni apostol Pablo sa ‘pagminyo diha lamang sa Ginoo’ sibo sa batasan sa unang mga alagad ni Jehova nga namili ug mga kapikas sa kaminyoon nga mga tinuod nga mga magsisimba usab. (1 Corinto 7:39; Deuteronomio 7:3, 4) Ang mga kaayohan sa pagbuhat niini daghan ug maoy angay nga isilsil sa hunahuna.
Pananglitan, ang diyosnong kapikas sa kaminyoon makaamot ug mapinadayonong pagkamaunongon sa atong mahigugmaong langitnong Amahan. (Itandi sa Ecclesiastes 4:9-12.) Ang Kristohanong mga kapikas makadasig sa usag usa ug silang duha malamposong makabuntog sa nagkalainlaing mga pagsulay. Magkausa, sila makasukol sa mga kapig-otan nga makahuyang sa bugkos sa kaminyoon. Sanglit silang duha nagatan-aw kang Jehova ug nagapadapat sa iyang katingalahang tambag, sila sa dakong kahapsay makasulbad sa malisod nga mga kahimtang ug magbinuligay imbes mag-indigay. Ang ilang tim-os nga mga paningkamot sa pag-alagad kang Jehova ug sa paghulma sa ilang mga kinabuhi sumala sa iyang mga paagi makaamot ug malamposong kaminyoon nga makapasidungog sa atong Maglalalang.
Sa mga katuigang milabay, usa ka batan-ong ginganlag Gloria nakigsuod sa usa ka lalaki nga tigtambongan sa Kristohanong mga tigom ug tigkomento na gani sa Pagtuon sa Bantayanang Torre. Gitambagan siya sa paghunong na sa pagpakigsuod niining dili-bawtismadong lalaki, apan, siya “nahigugma pag-ayo” nga tungod niana iyang gipalabay lang ang tambag. Apan, nasayod siya nga maayo ang tambag. Busa usa ka adlaw tim-os siyang miampo kang Jehova, nangayo sa iyang tabang niining butanga. Wala magdugay tapos niadto, nadiskobrehan nga imoral ang lalaki, ug busa giputol dayon ni Gloria ang panaghigala. Sa ulahi naminyo siya ug usa ka buotang Kristohanon. Karon, usa na siya ka tinudlong ansiano, ug ang ilang duha ka anak aktibo na sa kamatuoran. Sa nanumdom siya sa miagi, siya miingon: “Salamat kang Jehova, nalikayan ko ang daghang mga suliran. Tungod sa iyang pagtultol, nadawat ko ang labing maayong tambag, nga nakahatag kanako ug malipayong kinabuhi uban sa usa ka mahigugmaong bana.”
Nganong Mangita sa Laing Dapit?
Nan, nganong ang tawong dedikado kang Jehova mangita sa laing dapit ug kaparis sa kaminyoon? Dili ba kombinsido ang Kristohanon nga nasayod si Jehova ug nagatinguha sa labing maayo alang kanato? (Proverbio 3:1-7; Salmo 145:16) Ikaw komusta? Nagtuo ka ba nga si Jehova mao “ang Diyos sa kamatuoran”? (Salmo 31:5) Kon mao, nan seguradong nasayod ka nga siya mohatag kanunay ug kasaligang tambag nga tukma ug mapuslanon. (Isaias 48:17, 18) Sa pagkatinuod, ang atong langitnong amahan mohatag ug tambag uban ang atong walay kataposang kaayohan diha sa hunahuna, apan tingali sa mubo nga panglantaw atong ginalimitahan ang atong mga plano sa hinanali nga umaabot. Apan, kon mangitag kauban sa kinabuhi, dili ba angay nga magplano kita ug labaw pa kay sa hinanali nga umaabot?—Salmo 37:11, 29.
Nagtuo ka ba gayod nga haduol na ang Gingharian ug sa dili madugay molihok sa paghinlo sa yuta? Ug imo bang nakita ang imong kaugalingon diha sa gitagnang tibuok-yuta nga Paraiso? O nagatinguha ka ba sa pagtagamtam sa presenteng sistema sa mga butang sa bug-os? Nagapangita ka bag kauban sa kaminyoon nga may katakos sa pagtagana kanimo ug maayong estilo sa kinabuhi? O nagapangita ka bag usa nga ang ginauna kanunay mao ang tinuod nga pagsimba? (Mateo 6:33) Sa pagkatinuod, unsa ang labing bililhon sa imong kinabuhi? Maalamong atong susihon ang atong kinasulorang mga hunahuna ug mga motibo. Nan, kon gikinahanglan, mohimo kitag mga pagpasibo ug busa malikayan ang buhat nga dili makapahimuot kang Jehova.—Itandi sa Salmo 78:40, 41.
Ang Atong Malimbongong Kasingkasing
Ang Jeremias 17:9 nagpasidaan nga “ang kasingkasing mas malimbongon kay sa bisan unsang butang.” Busa kinahanglang atong sugpoon kana. Maayong hinumdoman usab nga kadtong misalikway sa dinasig nga tambag sa Bibliya ug sa mga pahinumdom nga ihatag sa mga ansiano sa kongregasyon ug sa uban nakapatulog daghang mga luha ug nag-antos sa mga kasakit.
‘Apan nganong makaingon ka man niana?’ tingali may mangutana. ‘May nailhan akong igsoon nga wala magminyo ug isigkamagsisimba, ug karon silang duha nag-alagad kang Jehova.’ Tinuod, adunay pipila ka hitabo nga midangat nianang kahimtanga, ug nalipay kami nga ang duha ka paris karon “nagalakaw na sa kamatuoran.” (3 Juan 4) Bisan pa, ang igsoong nagminyo ug dili-bawtismadong tawo masinupakon. Kana ba unyang independenteng espiritu motungha pag-usab? Dili ba kaha matintal siya sa paghunahuna nga mas nasayod siya kay sa Diyos ug busa isalikway ang tambag sa Bibliya ug mosalig sa iyang kaugalingong kaalam sa lain pa nga situwasyon? Kita gidasig sa ‘pagsalig kang Jehova uban sa atong bug-os nga kasingkasing.’ (Proverbio 3:5) Nagpasabot kana ug mapasakopong pagsunod sa balaang kabubut-on diha sa tanang butang. Busa buot natong ugmaron ang usa ka masundanong kasingkasing, usa ka kasingkasing nga makabuntog sa pagsulay sa pagkamasundanon bisan sa gagmayng mga butang. (Lucas 16:10) Kon atong supakon ang Diyos, unsang matanga sa sumbanan ang atong ginaugmad? Ang igsoong lalaki nga wala ‘magminyo diha sa Ginoo’ tingali karon midawat sa iyang mga kasaypanan sa pagbuhat ug mga butang sa iyang kaugalingong paagi ug nakapangayo nag pasaylo kang Jehova. Apan mao ba kana ang gusto mo nga pagasugdan ang imong kaminyoon?
‘Apan ang akong tratong lalaki nagsugod na sa pagtuon sa Bibliya ug nagtambongan na sa Kristohanong mga tigom,’ tingali may moingon. Oo, apan nganong nagtuon siya? Aron sa pagdani ug kauban sa kaminyoon o sa pagtuon mahitungod kang Jehova nga Diyos ug sa pag-alagad kaniya? Sa panahon sa panagtratohay tingali kaduhaduhaan ang mga motibo sa tawo. Unsay imong madiskobrehan tapos sa adlaw sa kasal? Siyempre, maghulat ka hangtod nga mabawtismohan ang imong trato ug tapos gilayon niana magtakda nang petsa sa kasal. Sa inistriktong pagkasulti, ikaw ‘nakigminyo diha sa Ginoo.’ Apan nagalihok ka ba sibo sa espiritu nianang tambaga?
Nakamatikod ka ba kon kanus-a irekomendar ang igsoong lalaki sa mga pribilehiyo sa pag-alagad? Igo na ba ang pagkahimong bawtismado? Dili, hinunoa, ang maong igsoon kinahanglang “sulayan una kon takos ba.” (1 Timoteo 3:10) May makuha ba kitang pagtulon-an gikan niana? Oo. Hunong, tan-aw, ug pamati. Hunong ug palandonga ang pagkaseryoso sa kaminyoon. Tan-awa ang indibiduwal, dili pinaagi sa hanap nga mga mata sa binuta nga gugma, kondili sa matinumongon. Ug pamati usab. Siya ba (lalaki o babaye) kinasingkasing nga nagapahayag sa mahigugmaong mga ekspresyon sa pagdayeg sa Diyos? Sa makataronganong yugto sa panahon, nakahatag ba siyag pamatuod sa Kristohanong kauswagan? Tapos nga nakapakita siya sa iyang pagkamtinumanon ug espirituwal nga mga kuwalipikasyon, igo nang magsugod sa paglantaw kaniya ingong posibleng kauban sa kinabuhi. Kutloon ta ang siaw nga magbabalak:
“Inday! ang asoy kong isugid
May leksiyong ihubit—
Pilig buotang pamanhonon,
Ug pagminyo sa hustong panahon.”
Unsay mahitabo kon ang atong kasingkasing maoy mopalihok kanato sa pagsalikway sa tambag ug sa matumonganong pangatarongan? Malagmit dili maayo ang sangpotanan niini. Hinumdomi, ang Bibliya nagtambag kanato nga
‘Imong Anihon ang Imong Ipugas’
Palandonga ang nahitabo kang Jacqueline. Gitambagan siya sa usa ka ansiano bahin sa iyang pagpakighigala sa usa ka batan-ong lalaki gawas sa Kristohanong kongregasyon. Sanglit iyang gibati nga sobra ra kaayo ka istrikto ang mga igsoon, wala niya panumbalinga ang binase sa Bibliya nga mga sugyot. Nagpalandong sa iyang kaugalingong tinamdan, siya sa ulahi miadmiter: “Makita sa usa ang gusto niyang makita ug dili sa makita ug ginapamulong ni Jehova.” Misugod sa pagtuon sa Bibliya ang batan-ong lalaki ug sa ulahi nabawtismohan. Sulod sa tulo ka bulan, nagminyo sila.
Mitungha dayon ang mga problema. Sa pagkatinuod, nagsugod kini sa ilang hanimon! Ang dili maayong mga batasan nga wala makita ni Jacqueline o ginapalabay lamang dayag na. Nangandoy siyag malipayon ug nahiusang kaminyoon, apan, makasubo, nahitabo ang sukwahi niini. Napalagpot ang iyang bana ug gibiyaan siya ug ang ilang duha ka gagmayng anak. Karon dili lang kay atubangon niya ang mga kalisod sa panalapi niining nagakadunot nga sistema kondili ang hagit usab sa pagpadakog duha ka bata, ang pag-atiman sa ilang pisikal ug emosyonal nga mga panginahanglan. Unsay nakat-onan ni Jacqueline ning mapait nga kasinatian? “Pagkamasundanon,” siya miingon. “Bisag daw istrikto o daw dili kini ang labing maayo alang kanimo, isipa nga gikan kini ni Jehova ug sundon gayod kana sa bug-os.”—Galacia 6:7; Salmo 86:11.
Palandonga ang laing pananglitan. Nakita ni Maritza ang iyang pamanhonon diha sa trabahoan. Gipakita sa lalaki kaniya ang tanang butang sa kalibotan nga wala pa niya makita—ug daw dili kini daotan kaayo alang kaniya. Edukado ang lalaki, maayog batasan, ug makapahayag sa makinaadmanong paagi sa daghang mga ulohan. Bisan pag gihatagan siyag daghang mga pasidaan sa Kasulatan, wala gayod kini motuhop kaniya. Siya “nahigugma” pag-ayo.
Sa ulahi ang Kristohanong mga tigom daw puol na alang kang Maritza, kay wala kanang gagilakgilak maukyabong mga gabii uban sa iyang makalipay nga kauban. Sa wala pa sila magminyo, misaad ang lalaki nga dili siya manghilabot sa iyang Kristohanong mga tigom, ug tinuod man. Apan, sa anam-anam nakita niya ang iyang kaugalingon nga okupado sa ubang mga butang nga nabutang na lang sa ikaduhang dapit ang iyang espirituwal nga mga kalihokan, ug siya nahimong dili-aktibo.
Komusta kadtong makalingaw nga panagkabildohay? Hinayhinay nga nawala kini, ug sa ulahi gibulagan siya sa iyang bana, gibiyaan siya uban sa upat ka anak gikan sa kuwatro ngadto sa nuybe anyos nga panuigon. Tungod sa kakalit sa hitabo daw nawala sa kaugalingon si Maritza, ug milabay una ang tulo ka tuig nga mibati siyag may igong kalinaw sa pagtimbangtimbang kon unsay nahitabo ug kon unsay iyang buhaton sa iyang kinabuhi. Ginasultihan niya kanunay ang iyang kaugalingon: “Ang kinabuhi pulos pag-antos.” Apan wala siya matagbaw niana tungod kay mahinumdoman pa niya ang mga tuig dihang malipayon siya, dihang gikalipayan niya bisag ang mabugnaw huyohoy nga mosaphig sa iyang aping sa nag-alagad sa kanataran, nagpakigbahin sa uban sa maayong balita sa Gingharian.
“Oh, pagkadako sa kasakit ug kaguol ang malikayan ko unta kon namati pa ako!” miingon si Maritza. Pinaagi sa kauban sa tunghaan sa iyang mga anak, siya nakakontak pag-usab sa mga Saksi ni Jehova. Ang iyang kaikag sa kamatuoran ug ang iyang gugma alang kang Jehova napukaw, ug karon siya ug ang iyang mga anak aktibo na sa pag-alagad. Karon si Maritza kinasingkasing nga mirekomendar: “Pagtuon sa pagpasakop sa pagtultol nga gihatag ni Jehova ug dawata nga gamiton ni Jehova ang mga tawo nga wala mo damha aron mapadayag ang iyang kabubut-on.” Sumala sa giingon ni Jesu-Kristo: “Magbantay kamo sa inyong pagpamati.” (Lucas 8:18) Oo, hunong, tan-aw, ug pamati!
Paniid sa sunod nga tigom diha sa Kingdom Hall. Ikaw sa walay duhaduha makakitag daghang malipayong Kristohanong mga minyong magtiayon ug makamatikod sa ilang kalipay nga duyog nagapakigbahin sa panahon ug mga kasinatian. Sa laing bahin, tingali makakita ka ug pipila nga atua didto nga nag-inusara tungod kay dili magtutuo ang ilang mga kapikas. Oh, pagkadako sa ilang tinguha nga ang ilang mga bana o mga asawa uban unta kanila! Kasagarang magdali sila sa pagpauli tapos sa tigom ug sayloan na lang ang makadasig nga mga pag-istoryahay ug pagsandurotay sa kaubang mga magtutuo. Andam ka ba nga modangat ka sa maong kahimtang tungod sa pagsalikway sa tambag sa ‘pagminyo diha lamang sa Ginoo’? Hinunoa, pagkamaalamon ang pagsunod sa mga instruksiyon ni Jehova ug busa malikayan ang makasubong mga sangpotanan!—Salmo 119:9; Proverbio 28:26.
Paghulat Kang Jehova
‘Apan,’ tingali moingon ka, ‘Wala gayod akoy makita diha sa kongregasyon. Diyutay ra sila nga sama nakog edad.’ Tingali tinuod kana. Apan kombinsido ka ba nga nagtinguha si Jehova nga magmalipayon ka? “Siya may kahangawa kanimo.” (1 Pedro 5:6, 7) Mahinumdoman mo ba ang sanglitanan nga nag-ingon: “Ang usa ka buotang asawa gikan kang Jehova”? (Proverbio 19:14) Nan, nganong dili palandongon ang ulohan sa kaminyoon diha sa pag-ampo?—Filipos 4:6, 7.
Nakahinumdom ka ba kang Ana ug sa iyang pangandoy nga makabaton ug anak? Unsay iyang gihimo? Iyang gibubo ang iyang kasingkasing sa pagpangaliyopo kang Jehova, misalig kaniya sa bug-os. Dayon iyang gitugyan kining butanga sa iyang mga kamot. Sa ulahi, nakadawat siyag katingalahang tubag sa iyang pag-ampo—ang pagkatawo sa usa ka anak.—1 Samuel 1:9-11, 18-20; Salmo 62:8.
Bisan ug pipila lang ang mga batan-on nga sama nimog edad sa lokal nga kongregasyon, komusta diha sa sirkitong mga asembliya ug distritong mga kombensiyon? Kita manambong niining mga tigoma alang sa espirituwal nga mga katarongan. Apan kadtong mobuluntaryo sa ilang mga serbisyo niining mga panahona may katagbawan sa pag-alagad sa uban ug makahimamat ug mga igsoong lalaki ug babaye nga nagaalagad kang Jehova sa bug-os kalag. Ug niining mga okasyona, adunay posibilidad nga makahibalag kag imong umaabot nga kauban sa kinabuhi.
Apan bisag dili ka makakitag takos nga Kristohanong kaparis, salig kang Jehova sa mainampoon sa pagtabang kanimo nga makapadayon ug maligdong nga kinabuhi ingong dili-minyo. Ug samtang dili pa minyo, ugmara ang mga hiyas ug mga abilidad nga makahimo kanimo nga maayong bana ug amahan o maayong asawa ug inahan. (Galacia 5:22, 23) Daghan ang natabangan nga nakahimo niana pinaagi sa pagsulod sa bug-os panahong ministeryo ingong mga payonir. Pagkamaayo niini nga paagi sa paggamit sa imong panahon ug kusog!
Kon nagapangita kag kauban sa kinabuhi, nan, asa ka magsugod? Hinaot diha taliwala sa aktibong isigkamagtutuo ni Jehova, nga may sama kanimog tumong sa kinabuhi ug nga may dulot nga tinguha sa pag-alagad kaniya sa walay kataposan. (2 Timoteo 2:22) Ug kon panalanginan ka ni Jehova ug mahadlokog Diyos nga kauban sa kinabuhi, hinaot ang imong kaminyoon mahimong usa nga magapasidungog sa atong mahigugmaong Diyos.
[Blurb sa panid 29]
“Oh, pagkadako sa kasakit ug kaguol ang malikayan ko unta kon namati pa ako!”