Akong Kaliwatan—Talagsaon ug Bulahan Kaayo!

Sumala sa gisugid ni Melvin Sargent

DAGHANG batan-on karong adlawa ang nangatawo sa pamilyang mga Saksi ni Jehova. Apan niadtong 1896 kana tagsaon gayong pribilehiyo. Sukad sa pagkabata, gitudloan ako ni Mama sa pagkahadlok sa tukmang paagi kang Jehova ug pagpabili sa halad lukat nga gihimo sa iyang Anak. Busa ako iya sa talagsaon ug bulahan kaayong kaliwatan​—diha sa igong edad nga nakakita sa sinugdanan sa ilhanan sa presensiya ni Kristo niadtong 1914 ug lagmit batan-on pa gihapon ug buhi nga makakita sa pagkatapos niini sa Armageddon—Mateo 24:3, 33, 34.

Maayong Pagsugod Uban sa TLC

Sa pagkabata, gihatag kanako ang gitawag TLC nga pagtagad, Tender Loving Care o mahigugmaong pag-atiman. Apan may panahong kanang pag-atimana gipasundayag sa mga paagi nga tingali isipong estrikto sa pipila karong adlawa. Ako makahinumdom nga dihang ako nabatian ni Mama nga nakigdula sa mas edarang bata nga kalit misultig mga pulong nga bag-o alang kanako. “Daotan kanang mga pulonga nga dili gayod nimo angay gamiton,” ako gisultihan niya, nga gisilsil kanako dili lamang pinaagi sa mga pulong! Apan nakaamgo ako nga ang iyang disiplina maoy pagpahayag sa iyang mahigugmaong pag-atiman, ug makahinumdom ako nga nahibulong nganong ang inahan ni Jimmie wala magdisiplina kaniya. Tinuod kaha siyang nahigugma kaniya?

Kami lamang ang pamilyang Saksi sa Jewell County, Kansas. Si Papa dili dedikadong alagad ni Jehova, apan siya misugot sa pagdumalag pagtuon sa Bibliya uban kanamo nga mga anak. Ang akong igsoong babaye si Eva mao ang kinamagulangan, ug si Walter magulang nako ug 16 ka bulan. Kada gabii kami gidahom nga moapil sa paghugas sa mga plato. Apan kasagarang si Walter may pasumangil ug dili mohugas. Si Eva ug ako, hinunoa, migamit niadtong buluhatona ingong adlaw-adlaw nga higayon sa paghisgot sa mga kamatuoran sa Bibliya, mao nga kadto panalangin nga nagtakoban. Sa ulahi napabilhan ko nga ang mga tawong dili modawat ug mga responsabilidad sa kinabuhi dili makadawat ug daghang panalangin. Kini nahitabo kang Walter, kinsa mitalikod sa ulahi sa kamatuoran.

Ang among TLC nga pagtagad misangpot sa maayong mga resulta niadtong Agosto 4, 1912. Si Eva ug ako mibangon sa wala pay banagbanag ug mibiyaheg napulo ka milya (16 km) pinaagig kabayo ug karomata aron makasakop sa sayong tren paingon sa Jamestown, Kansas. Ang usa ka pilgrim, ang pagtawag sa nagpanawng mga Estudyante sa Bibliya, nagduaw didto, ug kadto mao ang among unang tigom uban sa mga Estudyante sa Bibliya sa gawas sa among balay mismo. Kadto usab ang adlaw sa among bawtismo.

Bisan tuod 16 anyos pa lang, nangutana ako sa pilgrim nga igsoong lalaki kon makasulod ba sa bug-os-panahong ministeryo, nga niadto gitawag colporteur nga buluhaton. Gidasig niya ako sa pagsulat sa Watch Tower Society. Sanglit ako gikinahanglan pa man sa balay, hinunoa, kadto nalangan. Kasamtangan, akong gigamit ang akong libreng panahon sa pagtabang nga regular sa Jamestown Bible Students sa pagpanagtag sa mga pulyeto sa tanang 75 ka siyudad ug lungsod sa palibot.

Ako nagsangyaw usab sa ubang panahon. Sa dihang ang tag-iya sa yutang among gipuy-an kausa mianha sa lungsod kay may tuyong pamatigayon ug mipuyo sa amo sa pila ka adlaw, gihatagan ko siyag usa ka pulyeto. Tinong natandog siya pag-ayo niadto. Apan tapos sa iyang pag-uli sa iyang pinuy-anan sa Iowa, 30 anyos pa ang milabay una ko siya makita pag-usab. Siya nahimong Adbentista ug dili interesado sa ‘akong relihiyon.’ Hinuon, siya may asyenda nga kinahanglang atimanon, ug kay walay nailhang “tinuod Kristohanong tawo” sa iyang relihiyon nga iyang kasaligan, siya miliso kanako. Ang suweldo nga iyang gihatag kanako nakatabang sa pagbuhi kanako samtang diha sa bug-os-panahong ministeryo sa daghang tuig. Usa ka pamatuod gayod sa Ecclesiastes 11:1: “Isalibay ang imong tinapay sa ibabaw sa katubigan, kay kini imong hikaplagan pag-usab tapos sa daghang adlaw.” O sa kas-a giingon ni Jesus: “Nan, magpadayon sa pagpangita pag-una sa gingharian ug sa iyang pagkamatarong, ug kining tanang ubang butang igadugang ra kaninyo.”​—Mateo 6:33.

Dili-Hikalimtang mga Handumanan

Ako mitambong sa una kong kombensiyon niadtong 1913. Ako natandog sa pagkakita sa 41 ka bag-ohan nga nabawtismohan, ug nadasig usab ako sa paghunahunang tungod sa akong pagkaabante (ako bawtismadog pulo na ka bulan), ako may diyutayng paglaom nga makaugmad sa “samag-Kristo nga kinaiya” sa pagka 1914, aron himoon nga tino ang akong ‘pagkatawag ug pagkapili.’ Natandog usab ako sa pagkakitag daghan kaayong pula ug dalag nga laso. Ang mga colporteur nga nangitag mga kauban nagtaod ug pulang mga laso, ug si bisan kinsang buot makigparis kanila nagtaod ug dalag nga laso.

Alang kanako, ang usa ka lutaw nga punto sa 1914 nga kombensiyon mao ang pagtan-aw sa Photo-Drama of Creation ug pagkakita kang Igsoong Russell sa duol. Siya madasigon ug nagpakitag dakong tinguha sa pagpasag makapadasig nga impormasyon ngadto sa iyang mga mamiminaw. Siya mabination ug andam mamati niadtong moduol kaniya uban ang mga suliran. Apan siya dili kaayo dako nga dili na masiawan panagsa sa usa ka tin-edyer. Usa ka gabii samtang ako nanghatag sa mga laraw sa programa sa Photo-Drama, siya nagdali nga miagi. Gitunolan ko siyag kopya, nga nagpakaaron-ingnong wala makaila kaniya. Sa sinugdan siya miagi, apan dayon miliso ug nagkatawang nagpasalamat kanako, nga nagpahibalo kanakong siya nakasabot sa pasiaw.

Sa kataposan niadtong 1917, sa 21 anyos, ako nakasulod sa colporteur nga buluhaton. Ang Gubat sa Kalibotan I nagpadayon sa duolag tulo na ka tuig. Uban ang usa ka maleta sa kamot, daghang libro, ug $30.00 sa akong bulsa, ako mipadulong sa Nebraska uban sa akong kauban, si Ernest Leuba, usa ka mas edaran eksperyensiadong colporteur. Kami may positibo ug negatibong mga kasinatian. Pananglitan, ako mahinumdom sa dihang gihukom namo ang paggamit sa dinaliang paagi sa pagpahimutang ug mga libro. Kami may gipaemprentang mga tarheta nga nagtanyag sa mga tawo sa libreng duha-ka-adlaw nga pagsusi sa librong The Finished Mystery, uban ang pribilehiyong makuha kana sa 60 cents sa among pagbalik. Usa ka buntag nakapahulam kamig napulo ka libro sa matag usa niining paagiha. Duha ka adlaw sa ulahi, ako nakapahimutang ug pito, samtang si Igsoong Leuba, kinsa nagsangyaw sa silinganan nga kadaghanan Katoliko, nakapahimutang lamag usa. Aron mabawi ang usa sa mga librong iyang gipahulaman, kinahanglang adtoon niya ang lokal Katolikong pari nga gipasahan niadto. Busa sa wala madugay gihukom namo nga ang among dinaliang paagi dili gayod sama kaayo sa paggugol ug daghang panahon nga makigsulti sa mga tawo.

Hinuon, diyutay kaayo ang among kuwarta, nga nagkahulogang kami batid kaayo usahay sa paghunahunag mga paagi sa pagdaginot. Busa sa dihang sa ulahi kami mibalhin ngadto sa usa ka bag-ong asaynment sa Boulder, Colorado, mipalit kamig tiket alang sa kinaduolang estasyon lapas sa utlanan sa estado. Dayon kami nanaog sa tren ug mipalit ug laing tiket alang sa nahibiling biyahe sa sunod tren. Ngano? Tungod kay ang pletehan sulod sa usa ka estado maoy duha ka cents sa usa ka milya, apan ang pletehan tali sa mga estado mas mahal. Gawas nga nakadaginot ug kuwarta, among nagugol ang panahon sa among paghapit nga mihimog dipormal nga pagsangyaw.

Mga Suliran Panahon sa Gubat ug Bag-ong Sinugdanan

Kadto 1918 na, ug ang Tinipong Bansa nalambiggit kaayo sa gubat. Ang usa ka bagyo sa pagsupak nagsugod sa dayag batok sa mga Estudyante sa Bibliya, nga nagpaila niadtong hadlokan ug niadtong dili. Ang pila ka igsoong diha sa edad nga kuhaong sundalo, bisan pag tutol tungod sa konsensiya, miuyon sa paghimo sa dili-moaway nga serbisyo militar.

Sa dihang ako nagparehistro, ako nangayog eksempsiyon ingong ministro. Sa akong hunahuna ang akong mga argumento maayog pasikaranan, ug nalangan ang akong pagsulod samtang ang akong kaso gipadala ngadto sa hunta sa apelasyon. Lain ang ilang hunahuna ug wala itugot ang akong gipangayo. Hinuon, kadtong pagkalangan nakatabang kanako nga dili mapriso kay panahon na kadto sa ting-ani ug ako gilangan hangtod matapos kadtong hinungdanong trabaho sa uma sa akong mga ginikanan. Sa kataposan ang akong pagsulod gieskedyul sa Nobyembre 15. Ang gubat natapos sa Nobyembre 11. Nakalingkawas ako sa prisohan sa upat lang ka adlaw.

Ang uban nga sa kawalay-kahadlok nagpaluyo sa Kristohanong neyutralidad dili maayog gisangpotan. Sa usa ka kombensiyon sa Denver, akong nahibalag ang usa kanila. Sa pagpatin-aw nganong siya naupaw, ang igsoon misugilon nga siya gihigot sa usa ka kahoy sa usa ka panatikong grupong manggugubot nga mibubo kaniyag init nga alkitran. “Ang mga babaye sa grupo,” siya miingon, “mao ang kinagrabehan.” Siya nagpakiskis sa iyang buhok aron mawala ang alkitran. Dayon siya mipahiyom ug dako ug miingon bahin sa iyang eksperyensiya: “Dili ko hinuon kadto ibaylo sa bisan unsa pa.”

Tungod sa ilang dili-mokompromisong pagbarog, ang pipila sa mga opisyal sa Watch Tower Society gipriso nga dili makataronganon. Apan niadtong 1919, samtang didto pa sa prisohan, sila napili pag-usab sa ilang mga katungdanan sa Sosyedad, bisan pa sa paninguha sa mga apostata sa pagpuli kanila. Gidawat kadto sa matinumanong mga igsoon ingong ilhanan sa pag-uyon ni Jehova. Sila, nga puno sa kalipay, nadasig sa bag-ong agos sa balaang espiritu, sa maong panahon labi pang determinado kay sukad masukad sa pagtuman na usab sa buluhatong pagwali sa Gingharian ug pagyagyag sa klero tungod sa ilang sinalingkapaw nga pagkapakyas sa pagpaluyo sa Gingharian sa Diyos. Nagsugod ang kompletong pagbulag sa Babilonya.

Niadtong Pebrero 24, 1918, didto sa Los Angeles, California, tapos sa pagkalambiggit sa Tinipong Bansa sa Gubat sa Kalibotan I sa Abril 6, 1917, si Igsoong Rutherford nagpahayag sa unang panahon sa makapaukyab nga pakigpulong “Milyonmilyong Buhi Karon Dili na Gayod Mamatay.”

Dagkong mga Kausaban Latas sa Katuigan

Sulod sa pito ka tuig si Lydia Tannahill ug ako nagpadayong managhigala pinaagi ilabina sa pagsulatay. Tapos sa mainampoong pagpalandong, among gihukom niadtong 1921 nga labing maayong among pahimuslan ang gitugot ni Pablo sa nagtambag sa pagkatagsaanon, nga mao, siya nga “nagahatag sa iyang kaulay sa kaminyoon nagabuhat ug maayo.” (1 Corinto 7:38) Ang among kaminyoon usa ka gasa gikan ni Jehova ug nakapalipay sa among mga kasingkasing. Hinuon, sa wala madugay giatubang namo ang usa ka suliran. Tungod sa biyahe ang daang sakit sa bukobuko ni Lydia migrabe, ug ang akong kasingkasing, bisan tuod maunongon ug mahigugmaon, maoy hinay, “usa ka nahago nga kasingkasing” sumala sa pagtawag niadto sa mga doktor. Tungod niadto ang anemia misulod. Kaming duha nawad-ag kusog. Gitambagan kami sa pag-ilis sa klima ug paglimite sa among adlaw-adlaw nga mga biyahe. Ang among balayng mobile labing maayo sa pagtabang kanamo sa pagsunod sa maong tambag, ug mao nga gigugol namo ang Septiyembre 1923 diha sa dalan paingon sa California.

Kay iya sa bulahan kaayong kaliwatan, ako gitugotan sa pagtan-aw nga ang makita nga organisasyon ni Jehova naugmad latas sa katuigan. Ako didto niadto dihang ang Los Angeles unang gihan-ay sa indibiduwal nga mga teritoryong sangyawanan, sa dihang nagsugod ang pagsangyaw sa Dominggo, ug sa dihang among nadawat ang bag-o namong ngalan, ang mga Saksi ni Jehova, niadtong 1931. Dako kaayo ang kalipay nga makitang nahimo ang mga pagpasibo nga gihimo sa 1932 ug 1938 nga nagpasalig sa teokratikanhon, inay sa demokratikanhong pagtudlo sa mga ansiano. Ug usa ka kalipay ang pagkasabot nga natin-aw ang dili-klaro nga mga isyu ug mga pangutana, sama niadtong bahin sa neyutralidad ug sa pagkabalaan sa dugo.

Bisan tuod ako mihunong sa colporteur nga buluhaton niadtong 1923, gihuptan ko kanunay ang espiritu sa pagpayunir. Busa niadtong 1943 ako nakaduyog na usab sa kusog-nagatubong mga ranggo sa mga payunir. Niadtong 1945 ako nakapribilehiyo gani nga mahimong espesyal payunir, nga nag-alagad ug siyam ka tuig sa maong kapasidad hangtod ang akong “nahago nga kasingkasing” nakapaluya na usab kanako. Sukad 1954 ako nag-alagad nga regular payunir.

Ang akong kaminyoon kang Lydia milungtad ug 48 ka tuig hangtod nga sa 1969 siya mibalhin ngadto sa usa ka bag-ong asaynment, usa ka panulondon alang kaniya “nga gitagana sa mga langit,” usa ka asaynment nga gilaoman ko, usab, nga madawat sa nahaigong panahon. (1 Pedro 1:4) Bisan pag wala mapanalanginig mga anak, kami napanalanginan sa gitawag sa daghan nga sulundang kaminyoon. Bisan pag dako ang akong kapildihan, ang pagpabiling puliki sa teokratikanhong intereses nakatabang nako sa pagsagubang niini. Sa ulahi ako naminyo sa usa ka eksperyensiadong payunir nga akong nailhan sa daghang tuig, si Evamae Bell. Among gipahimuslan ang 13 ka tuig nga panag-uban hangtod siya, usab, namatay.

Akong Kaliwatan—Talagsaon sa Linaing Paagi

Usahay ako suknaon: “Unsa man ang imong kinalabwang kasinatian sa kamatuoran?” Nga walay pagpanuko ako motubag: “Ang pagtan-aw nga natuman sulod sa akong kaliwatan ang mga tagna sa Bibliya nga gisulat sa inspirado ug dedikadong mga tawo kasiglohan kanhi.”

Ang mga membro sa akong kaliwatan sa gawas sa teokratikanhong organisasyon, hinuon, misangpot nga nahisama gayod sa giingon sa Photo-Drama of Creation sa 1914: nabuang sa kuwarta, nabuang sa kalingawan, ug nabuang sa himaya. Kadtong anaa sa sulod sa organisasyon sa Ginoo, sa tanang paaging posible, naningkamot sa pagliso sa ilang pagtagad ngadto sa mensahe sa kinabuhi. Among gigamit ang mga eslogan, tibuok-panid nga mga anunsiyo, radyo, mga sakyanang may mga trompa, mabitbit nga mga ponograpo, dagko kaayong mga kombensiyon, mga parada sa mga nagbaktas nga may impormasyon nga nagdalag mga karatula, ug nagadaghang panon sa balay-balay nga mga ministro. Kining buluhatona nagabahin sa katawhan​—kadtong dapig sa natukod nga Gingharian sa Diyos sa usa ka kiliran, kadtong supak niini sa pikas nga kiliran. Kana ang buluhatong gitagna ni Jesus alang sa akong kaliwatan!​—Mateo 25:31-46.

Hangtod kining “nahago nga kasingkasing” nako mopitik sa kataposang pitik niini, kini mopadayon sa pagpitik ingong apresasyon sa pribilehiyong akong gipahimuslan sa pagkaiya sa talagsaong kaliwatan. Kini mopadayon sa pagpitik sa kadasig tungod sa pribilehiyong akong nabatonan karon sa pagtan-aw sa milyonmilyong mapahiyomong nawong nga destinado sa pagpadayon sa pagpahiyom sa walay kataposan.

[Hulagway sa panid 23]

Si Melvin ug Lydia Sargent, mga colporteur, 1921

[Hulagway sa panid 24]

Si Melvin ug Evamae Sargent, 1976