Mga Magmamantala sa Gingharian Nagtaho

Pagkamalahutayon sa Ilang Balaang Buluhaton

GIISIP sa mga Saksi ni Jehova nga ugdang kaayo ang ilang balaang komisyon o buluhaton nga iwali ang maayong balita sa Gingharian sa Diyos. (1 Corinto 9:16; Buhat 20:26, 27) Gibati sa usa ka magtiayon sa Pransiya ang gibug-aton sa maong sugo nga ipaabot sa tanan ang maayong balita. Sa ilang teritoryo dihay usa ka sak-anang balay nga gipuy-an sa politikanhong mga kagiw ug mga batan-ong langyawng magbubuhat. Misaysay ang magtiayon: “Kami nahibulong kon unsaon namo pagsulod gawas nga kami dapiton sa usang nagpuyo didto. Mao nga gihukom namong makigsulti sa mga tawo sa gawas lamang ug basi dapiton sa pagduaw kanila sa sulod. Usa ka batan-ong lalaki maikagong midawat sa mga magasin ug mihangyo nga duawon.

“Giduaw namo kining batan-ong lalaki, ug ang usa ka pagtuon nasugdan dayon. Sa unang panahon presente ang usa niya ka higala, apan ang higala walay tingog. Dihang, pagkatapos sa ikaduhang pagtuon, nangutana kami kon gusto ba usab niyang makakat-on ug dugang bahin sa Pulong sa Diyos, siya mitubag: ‘Nganong dili man?’ Busa nasugdan ang ikaduhang pagtuon. Gidapit namo sila sa mga tigom sukad sa sinugdan, ug sila wala makapalta bisan kas-a sukad. Dayag kaayo ang ilang pag-uswag, ilabina didto sa balayng sak-anan, diin misugod dayon sila sa pagsulti bahin sa mga butang ilang nakat-onan, nga misangpot sa pagsugod sa ikatulong pagtuon uban sa usa ka magtiayon. Usa ka adlaw ang tibuok grupo diha sa entrada, nga andam molakaw alang sa tigom, dihang ang laing higala mihukom sa pagkuyog usab. Ang babaye masiboton kaayo ug buot niyang ang iyang trato mahibalo bahin nianang tanan. Silang duha nagsugod sa pagtuon.

“Hangtod sa maong panahon lima ka pagtuon ang gidumala. Ang matag usa nahisamag tigom! Ang tanan mitambong sa pagtuon sa lain, ug ang mga bag-ohan mikuyog usab. Silang tanan naghisgot bahin sa kamatuoran, ug ingong sangpotanan, ang ikaunom nga pagtuon nasugdan uban sa laing lalaki, nga misugod usab sa pagtambong sa mga tigom ug misangyaw ngadto sa iyang trato.

“Hinuon, kanang tanan talagsaong pamatuod diha sa balayng sak-anan. Dili sayon sa maong mga batan-on ang pagsul-ob ug bag-ong pagkatawo. Kinahanglang buntogon nila ang pagsigarilyo, alkoholismo, kabangisan, malaw-ayng mga moral, ug daotang panag-uban. Gitino ni Satanas nga ang mga kanhi higala maningkamot sa pagbabag sa ilang pag-uswag, nga naghangyo kanila sa pagtabako o pagbatog masabang mga parti. Usa sa mga lalaking interesado minyoonon na sa usa ka babayeng sakop sa usa ka kulto. Gisulayan niya nga patalikoron siya sa kamatuoran. Bisan pa niana, sa kataposan siya misugod sa pagtuon ug may dakong pag-uswag.

“Sumala sa kinaulahiang balita,” mitaho ang magtiayon, “usa sa mga batan-ong lalaki napriso tungod sa iyang neyutral nga baroganan. Sa walay usa ka tuig, unom pa ang nabawtismohan, nga lima kanila misulod dayon sa auxiliary payunir nga pag-alagad. Sa tibuok grupo, unom karon maoy regular nga payunir, uban sa espesyal payunir nga buluhaton ingong ilang tumong.”

Gibaslan sa tugob kining magtiayona tungod sa ilang pagkamalahutayon sa pagtuman sa ilang balaang buluhaton sa pagpangita sa mga karnerohon! Tinong gipanalanginan ni Jehova ang ilang matinumanong paningkamot. Bisan tingalig wala kita makabaton sa maong talagsaong mga kasinatian, buot natong tumanong matinumanon sa kanunay ang atong balaang sugo sa pagwali sa maayong balita sa Gingharian.—Mateo 24:14.

[Hulagway sa panid 21]

Ang magtiayon sa Pransiya uban sa unom ka regular payunir