Asdang, Kamong mga Saksi!
“Ning panahona hugot ang tinguha,/Sa paglaban ta sa maayong balita./Bisag gisuklan ta ang Yawa,/Nagpadayon sa pagmantala.”
Kini mao ang pangbukas nga mga linya sa awit numero 29 sa libro sa alawiton sa mga Saksi ni Jehova, Mag-awit ug mga Pagdayeg Kang Jehova. Ang imong pagpabili niining awita mas molalom pa sa mahibaloan mo nga ang honi gihimo diha sa kampong konsentrasyon sa Nazi Alemanya. Dili pa dugay, mga 500 ka trabahante sa pamilyang Bethel sa Alemanya sa Selters namati sa usa ka giteyp nga pagsultihay uban sa naghimo sa awit, si Erich Frost, kinsa mitaho sa mosunod.
“‘Asdang, Kamong mga Saksi!’—mao kini ang tinguha sa among kasingkasing bisan niadto, bisag mabug-at pa ang trabaho nga among gihimo sa kampong konsentrasyon. Ang hunahuna sa kompositor naglaylay kanunay sa nagkalainlaing mga honi, busa ang honi sa awit diha na sa akong hunahuna sa dugayng panahon. Ang grupo sa mamumuo nga niini usa ako, gilangkoban ug 40 ka Saksi, ug magmartsa sa tunga sa oras kada-adlaw paingon sa planta sa imburnal sa gawas sa kampo. Sa among pagpaingon sa usa ka buntag, ang hunahuna misantop kanako: ‘Panahon na sa pagbutang ug mga pulong sa honi, aron kini maawit,’ ug wala magdugay ang unang garay misugod sa pagkaporma sa akong hunahuna.
“Ang akong trabaho mao ang paghakot sa bungdo sa yuta pinaagig karomata sa gilay-ong mga 30 ka metro. Ang pagsultihay sa panahon sa trabaho gidili. Apan, mipilig tukmang panahon, sekreto nakong gipangutana ang igsoon nga nagtrabaho sa duol kon may maayo ba siyag memorya. Miingon siya nga oo, busa gihatagan nako siya sa unang garay. Tapos sa usa ka oras, akong gipangutana ang laing isgoon, sa ulahi ang ikatulo, ug dayon ang ikaupat. Ang matag usa gihangyo sa pagsag-ulo sa garay.
“Balik sa kampo niadtong gabhiona, gisobli sa upat ang mga garay kanako, sunodsunod. Busa, nakahatag akog mga pulong ngadto sa mga nota. Walay makalusot sa SS kon nahulog pa kining mga notaha sa ilang mga kamot. Apan karon misamot ka lisod ang kahimtang. Kon nadakpan pa nila ako uban sa mga pulong sa awit, gibitay na unta nila ako. Unsaon man nako sa pagtago niining awita?
“Usa ka tigulang nga igsoon ang nag-atiman sa kawadra sa gawas sa kampo diin dinhi gipaatiman sa pila ka SS ang ilang mga kuneho. Diha ning maong kuwadra, nakakita siyag dapit nga katagoan sa espirituwal nga mga mutya—kompletong mga gula sa Ang Bantayanang Torre ug usa o duha sa mga libro sa Sosyedad. Gipameligro niining igsoona ang iyang kinabuhi pinaagi sa pagpalusot niining mga butanga ngadto sa kampo, busa nakahatag kanamog materyal nga katun-an. Dinhi niya gitago ang akong awit. Usa ka adlaw siya miingon: ‘Erich, ang imong awit napadala ko na. Nakakita akog tawo nga mipadala niini ngadto sa Switzerland.’ Nakaginhawa ako sa kahupayan.
“Gipadala kini sa igsoon nga taga Switzerland ngadto sa Brooklyn, diin miabot kini sa mga kamot sa Nagamandong Lawas sa mga Saksi ni Jehova. Ang akong bati nga mga pulong sa awit nahimong tulo ka matahom nga mga garay. Nalipay kaayo ako sa nakita nako kining awita diha sa bag-ong libro sa alawiton sa mga Saksi ni Jehova.a Karon, ingong alawiton numero 29, kini nagaawhag gihapon sa tanang mga Saksi sa pagbarog nga malig-on alang kang Jehova ug sa kamatuoran!”
[Mga footnote]
a Giawit kini sa unang higayon sa Tinipong Bansa pinaagi sa mga koro sa mga estudyante sa ika-11ng klase sa Watchtower Bible School of Gilead ingong pangunang bahin sa ilang programa sa graduwasyon, sa Agosto 1, 1948.
[Kahon sa panid 21]
Natapos ni Erich Frost ang iyang kurso sa yuta niadtong Oktubre 30, 1987 sa panuigong 86. Natawo sa Disyembre 22, 1900, siya gibawtismohan sa Marso 4, 1923, ug misulod sa bug-os panahong ministeryo sa 1928. Sa 1936, siya ang gipadumala sa tagong buluhaton sa gilutos nga mga saksi ni Jehova sa Alemanya, nakaatiman ug maayo nianang tinudlong-buluhaton sulod sa walo ka bulan hangtod nga gibilanggo siya sa kampong konsentrasyon. Human sa gubat, gikan sa 1945 ngadto sa 1955, nag-alagad siya ingong magtatan-aw sa sangang buhatan sa Watch Tower Society sa Alemanya. (Tan-awa ang The Watchtower, Abril 15, 1961, mga panid 244-9.) Tapos niadto, nagpadayon siya sa pag-alagad kang Jehova nga matinumanon. Ang Diyos dili makalimot sa trabaho niining dinihogang mga Kristohanon o sa gugma nga ilang gipakita alang sa iyang ngalan.—Hebreohanon 6:10.