Magkauban sa Pagpayunir sa Tibuok Kinabuhi
Sa usa ka hapsay ug yanog adornong kuwarto sa Cardiff, Wales, bag-o pang nahuman ang pagtuon sa Basahon sa Kongregasyon. Gipasalamatan sa magdudumala sa pagtuon ang duha ka payunir nga mga igsoong babaye, si Maud Clark ug si Mary Grant, nga karon 90 na ang panuigon, tungod sa ilang pagkamaabiabihon ug nagdasig kanila sa paghinumdom . . .
Maud: May 65 ka tuig na sukad si Mary ug ako unang nagkahibalag ug nagsugod sa pag-uban sa pagpayunir.
Mary: Oo, kadto maoy niadtong 1923, sa bugnaw, niyebehong gabii sa Enero! Nahinumdom ka, Maud? Gikuha ko ikaw gikan gayod sa Much Wenlock nga estasyon sa tren ug gidala sa akong sak-anan. Kita nangaon ug diyutay, ug dayon atong gitun-an nga duha ang Tabernacle Shadows. Sa pagkabuntag kita nanglakaw nga sakay sa atong mga bisikleta aron mosangyaw sa mga mag-uuma sa Shropshire.
Unang mga Pakigtagbo
Maud: Hinuon, kita andam alang niadto. Abi mo, kami nakapayunir na sa taastaas nga panahon. Bisan sa bata pa ako, ang Pulong sa Diyos kanunay nakaikag kanako. Aw, makahinumdom ako nga mopahayag sa pito ka salmo sa simbahan aron makabatog libreng Bibliya! Maoy niadtong 1908, sa dihang ako 11 anyos, nga nabasa sa among kinamagulangang babaye ang librong The Divine Plan of the Ages ug mibulag sa iglesya nga among gitambongan, nga nahimong usa ka Estudyante sa Bibliya. Ang mga kamatuoran sa Bibliya nahimong topiko sa among mga kabildohay sa balay. Apan sa dihang namatay ang akong amahan, ako misugod sa pagkahibulong, ‘Hain ba ang mga patay?’
Makalipay kaayo ang pagkaplag sa tubag sa dihang ako milantaw sa The Photo-Drama of Creation, nga gipasalida sa akong lungsod-natawhan sa Sheffield! Niadtong sineha nga gipabagay sa mga rekord sa ponograpo, akong nakita nga gihulagway ang pagbanhaw sa anak nga lalaki sa babayeng Sunamitanhon. Oo, akong nasayran nga ang mga patay walay hunahuna hangtod nga banhawon.-2 Hari 4:32-37.
Miluwat ako dayon gikan sa Iglesya Anglikano ug misulod sa gitawag pastoral nga buluhaton, nga nagtanyag sa mga basahon sa Bibliya didto mismo sa lugar diin ako nailhang tigtagtag sa mga magasin sa simbahan. Nagpasimbolo ako sa akong pahinungod kang Jehova sa Agosto 1918 sa usa ka asembliya sa haduol nga siyudad sa Leeds.
Tapos sa paggugol ug malipayong mga panahon kauban sa duha ka colporteur nga mga igsoong babaye sa Derbyshire, gihukom nako nga himoon ang payunir nga pag-alagad nga tibuok-kinabuhi kong buluhaton. Sa Agosto 1922, gikuha ko ang akong unang asaynment: Biggleswade sa Bedfordshire.
Usa sa mga colporteur miingon kanako: “Kon makalahutay kag unang unom ka bulan, maayo unya ang imong kahimtang.” Kadtong unang mga bulan dili sayon. Naaksidente ako sa akong bisikleta. Unya ang akong unang payunir nga kauban mipauli. Apan determinado akong mopadayon, busa misulat ako sa Sosyedad nga nangayog kauban. Ug gihatag kanako ni Jehova si Mary! Mary, ikaw mas nauna nako sa pagbarog dapig sa kamatuoran, dili ba?
Mary: Oo, Maud. Niadtong panahona kami nagpuyo sa Cardiff, South Wales. Sa dihang ako 16 anyos na, giimbitar ako sa akong apohang babaye sa pagbasa sa librong The Divine Plan of the Ages, nga iyang nakuha sa usa ka publikong miting nga giorganisar sa mga Estudyante sa Bibliya. Kanunay akong nagtinguha sa pagsabot sa Bibliya ug mahimong misyonaryo inigkadako nako. Samtang gibasa nako kadtong tomoha, nasayran ko nga akong nakaplagan ang kamatuoran.
Nagsugod ako sa pagtambong sa mga miting sa mga Estudyante sa Bibliya, bisan pa sa dakong pagtutol sa akong inahan. Abi mo, ang akong mga ginikanan dato, ug kay wala nila ako tugoti sa pagtrabaho, estrikto kaayo ang kahimtang sa among balay. Bisan pa niana, nakahimo ako sa pagbaton sa uban sa hugpong sa mga tabang sa pagtuon sa Bibliya. Sa nadiskobrehan kana sa akong inahan, masuk-anon niyang gisunog ang mga libro ug gisultihan ako nga ako bata pa kaayo aron mahihalo nianang mga butanga. Sa pagpuli kanila kinahanglang ako moyuhot sa mga libro sa akong balay nga tinagsatagsa, tapos sa mga pagduaw sa sayo sa buntag sa balay sa usa sa mga Estudyante sa Bibliya mga 3 kilometros ang kalayo. Akong basahon kini sila nga maikagon sa dili pa mangmata ang uban sa panimalay, nga tagoan sila sa silonganan sa hardin sa maadlaw.
Niadtong 1913, sa dihang ako 17 anyos, ako miadto sa London alang sa bakasyon aron sa pagtan-aw sa mga talan-awon. Ikalipay, kadto nahiatol sa pagduaw ni Igsoong Russell sa usa ka asembliya nga gihimo sa Kingsway Hall. Didto gipahayag ko ang akong tinguha nga mabawtismohan. Ang colporteur nga igsoong babaye nga nag-alagad sa Cardiff miduol kang Igsoong Russell sa pagsukna kaniya kon siya naghunahuna nga ako bata pa kaayo. Nangutana siya kanako kon pilay akong edad ug nagsukitsukit kanako sa pagsusi kon ako bang nasabtan ang Kasulatan ug pagtino kon ako nakapahinungod na sa akong kinabuhi kang Jehova. Ingong sangpotanan, akong gisul-ob ang taas itom nga biste ug miduyog sa ubang kandidato sa bawtismo sa London Tabernacle. Mahinumdom kaayo ako mga pulong nga among giawit samtang kami nanggula sa tubig:
“Gilubong uban ni Kristo
ug gibangon usab uban niya,
Unsa man ang akong pagabuhaton?
Hunongon lang ang
pakigbisog ug away,
Molakaw lamang sa kabag-o sa kinabuhi.”
Human niadto ako nagtrapo sa akong kaugalingon, miduol kanako ang usa ka igsoon ug miingon: “Ikaw mao gayod ang kataposan sa 144,000 nga misulod; mubo na lang ang panahon nga nahibilin sa paghimong tino sa imong pagkatawag ug pagkapili.” Kana ang mga hunahuna sa daghan nga nag-isip sa nagsingabot nga tuig, 1914, uban ang dakong kahinam. Hinuon, alang kanako, kadto maoy panahon sa pagsulay samtang giantos ko ang dakong pagsupak sa balay. Motambong ako sa mga tigom kutob sa akong maarangan. Niadtong 1916, nakapribilehiyo ako sa pagsilbing tigpahiluna sa lingkoran panahon sa pagsalida sa The Photo-Drama of Creation sa Cardiff. Tapos sa pagkompleto sa akong pagbansay ingong nars didto sa Manchester, gisugdan ko ang bug-os-panahong payunir nga pag-alagad sa 1922.
Pagsangyaw sa Banika
Maud: Kami gayod ang manguna niadto. Giingnan namo ang tanan nga kami nagbuhat sa Kristohanong buluhaton. Ang mga tawo niadtong mga adlawa himasa. Gitanyag namo ang The Harp of God ug ang seryeng Studies in the Scriptures. Hinuon, gikinahanglan namo ang dakong bag aron sa pagdala niadtong tanang basahon. Ang akoa labihang dakoa nga sa pat abot nako sa usa ka nahilit nga umahan usa ka adlaw, ang asawa sa mag-uuma naghunahunang ako usa ka paryenteng gikan sa Canada nga moduaw. Labihan namong katawa!
Kay ang payuniring mao man ang among kanabuhi, kami nakadawat sa among pangabuhian gikan sa trabaho sa pagtagtag sa mga librong naundan sa mensahe sa Gingharian. Gigamit namong mainampingon ang among salapi ug nagkinabuhing daginotan, nga nagbaylo sa mga libro sa mantekilya ug ubang abot sa uma ug nagpunit ug patatas, swedes, ug repolyo nga nahulog gikan sa mga karomata sa lisod, abogon nga kadalanan. Kami nahanas sa pagpilot sa mga ligid nga nahiyos sa among mga bisikleta, ug nahimo kaming maayong mga mananahi, nga nagtahi sa among kaugalingong mga sinina.
Samtang ang mga igsoong lalaki nga nag-alagad nga tigpanawng mga mamumulong nagpahayag ug mga pakigpulong sa Bibliya sa kalungsoran, si Mary ug ako nagsunod kanila aron sa pagsundal sa interes nga gihaling sa ilang pagsangyaw. Ang gagmayng mga grupo sa mga interesado nanungha sa Shrewsbury ug sa ubang kalungsoran. Ug mahinamon kaayo kaming naghulat sa mga asembliya! Sa akong hunahuna ang kombensiyon sa London sa 1926 maoy talagsaon. Napahimuslan namo didto ang dugang pribilehiyo sa pagtagtag sa pulyetong The Standard for the People sa kadalanan sa kaulohan. Unya midako ang among kaukyab samtang gibasa namo ang unod sa usa ka sulat gikan sa Sosyedad. Kadto usa ka kausaban sa asaynment alang kanamo: Amihanang Irlandiya.
Pagpayunir sa Bag-ong mga Teritoryo
Nangabot kami sa County Antrim, Amihanang Irlandiya, sa pagpayunir taliwala sa katawhan nga nabahin sa relihiyon. Kami miestar sa Greenisland. Kadto ting-ulan ug tugnaw, ug kami walay mga daob sa daghang semana tungod sa welga sa karbon sa Inglaterra. Ako makahanduraw pa karon nga kami, nga naglingkod nga nagsul-ob sa among mga kupo ug mga guwantis sa mga magabii, nga nagsulay sa pagtuon samtang nangurog sa katugnaw. Dayon miabot ang ting-init, ug dako gayod ang pasalamat namo kang Jehova tungod sa pribilehiyo sa pag-alagad diha sa maanindot nga palibot sa Antrim nga kapatagan. Ang mga tawo nagpatalinghog pag-ayo sa mensahe sa Gingharian. Ah, oo, kadaghanan sila moergo, apan sila maluluton. “Come awa’ in,” sila moingon, ug ilang itak-ang ang kaldero sa greesha (init kaayong dugta sa tanom) aron mobukal, ug magpadayon ang among mga panaghisgot.
Mary: Kay upat na kaming mga payunir nga babaye niadto sa among asaynment, kami nagsunod sa bug-os teokratikanhong eskedyul sa mga tigom. Kada buntag among hisgotan ang usa ka teksto sa Kasulatan ug basahon ang “Akong Hukom sa Buntag,” nga nag-ingon, sa bahin, ‘Kada adlaw akong hinumdoman sa Trono sa Langitnong Grasya ang malangkobong intereses sa buluhatong pagpangani, ilabina ang bahin nga maoy akong pribilehiyo nga napahimuslan sa maong buluhaton, ug sa minahal nga kaubang mga magbubuhat sa Bethel ug sa bisan diin.’ Sa gabii sa Miyerkoles kami dunay among Pag-ampo, Pagdayeg, ug Pamatuod nga Miting. Sa ma-Dominggo among gitun-an ang The Watchtower nga hiusa, ug kami magtapok sa gagmayng organo nga kadaghanan hikaplagan sa mga balay sa katawhan sa pag-awit gikan sa Hymns of the Millennial Dawn, sama sa:
“Ayawg isipang imo nang kadaogan,
Ni ikaw molingkod dayon
Hagong buhat dili mahuman
Hangtod purongpurong maangkon.”
Maud: Dako kadtong kausaban sa dihang kami naasayn sa usa ka espesyal nga buluhatong gibuksan—kami nahimong “business-house pioneers.” Unsaon namo pagsangyaw ngadto sa mga negosyante, mga manedyer sa bangko, ug ang susama? Kadtong dagkong mga tinukod sa Belfast kahadlokang tan-awon. Apan nahinumdom kami sa Filipos 4:13: “Alang sa tanang butang ako adunay kusog tungod kaniya nga nagahatag kanakog gahom.” Ug kami dili maka-hunahuna sa pagbalibad sa among asaynment. Talagsaon ang among mga kasinatian nga nakigsulti niadtong mga tawhana ug nakapahimutang ug daghang basahon kanila! Sa pagka 1931 natapos namo ang komersiyal nga mga tinukod ug nakagugol ug lima ka tuig sa Amihanang Irlandiya. Nahibulong kami kon hain ang sunod namong asaynment. Sa among katingala kadto ang komersiyal nga mga balay sa Dublin.
Ngadto sa Tarsis o sa Nineve?
Pagaangkonon nga, sa sinugdan, gibati namong sama kang Jonas, nga giasayn sa pagwali ngadto sa Nineve ug mipadulong hinuon sa Tarsis. Pilion unta namo ang laing asaynment. Sa wala madugay naamgohan namo nga kinahanglang mosalig kami kang Jehova. Apan, makahahadlok gayod ang pagbarog tupad sa Nelson’s Pillar sa Dublin ug pagkakita sa mga dalan nga punog mga pari ug mga madre, mga lalaking nagtukas sa ilang mga kalo ug mga babayeng nangurus sa pagpasidungog sa ‘ang bulahang Birhen.’ Niadtong panahona may upat ra ka Estudyante sa Bibliya sa Dublin.
Nakakuha kamig mga kuwarto uban sa usa ka Romano Katolikong panimalay. Hinuon, kinahanglang tagoan namo ang among mga basahon sa ilalom sa katre, kay ang pari naghimog regular nga mga pagduaw sa balay. Usa ka adlaw ang usa ka negosyante sa Dublin miduaw sa among sak-anan, nga miingon: ‘Nagbilin kag mga libro sa akong bangko.’ Siya nalipay kaayo niana nga iyang giadto ang tanang tindahan sa pagtan-aw kon nagbaligya ba silag mga libro ni Huwes Rutherford. Dayon misulat siya sa New York ug gihatagan sa among adres. Iyang gihikay ang usa ka parti alang sa tanan niyang higala aron sultihan sila kabahin sa iyang natun-an.
Sa kaulahian niadtong tuiga, mitambong kami sa usa ka kombensiyon sa Liverpool, Inglaterra, diin among nasayran ang bahin sa among bag-ong ngalan, ang mga Saksi ni Jehova. Sa pagbalik namo sa Dublin, kami miapil sa kampanya sa pagtagtag sa pulyetong The Kingdom, the Hope of the World, nga naundan sa resolusyon sa kombensiyon. Kami nagduaw sa tanang monasteryo, mga kombento, ug mga komersiyal nga balay, nga naghatag ug libreng mga kopya sa pulyeto. Ang tanan gidawat!
Mary: Usa ka adlaw among nakita ang usa ka barkong naglawig sa subang Liffey, ug kadto naghatag kanako sa ideya sa pagsangyaw ngadto sa mga tripulante sa mga barkong midunggo. Sa gisulayan namong mosulod ea pantalan, kadto gibantayan sa usa ka polis, kinsa nangutana kon unsay among gibuhat. Sa pagpakita kaniya sa mga libro, siya miingon, “Sige, padayon.” Kami nakakaplag ug daghang kapitan sa barko gikan sa ubang nasod nga nakaila sa mga Saksi. Kon kami maghinumdom sa maong mga kasinatian, kami mahibulong sa paagi sa pag-atiman ni Jehova kanamo samtang kami sa tinagsa mosaka sa mga barko.
Pagsangyaw Panahon sa Pag-atake Gikan sa Kahanginan
Maud: Niadtong 1939 sa pag-ulbo sa gubat kami namalik ngadto sa Liverpool ug mikuyog sa 20 pa ka payunir nga nagpuyo sa balay sa payunir. Niadtong panahona kami nagkinabuhi latas sa mga pangatake ug mga pamomba nagsangyaw sa bisan diin nga mamati ang mga tawo. Kadaghanan kami magpahimutang sa mga rekord diha sa among mga ponograpo, maghisgot sa mensahe sa Gingharian, ug dayon modalagan balik sa balay sa payunir, o modalagan sa kalit gikan sa usa ka silonganan panahon sa atake ngadto sa sunod. Nianang tibuok nga panahon, kami wala mahadlok, kay among gibuhat ang buluhaton sa Ginoo.
Sa makadaghan samtang manglakaw kami sa kadalanan, ang mga tawo moyawyaw ug mga pasipala kanamo tungod sa neyutral nga baroganan nga gihuptan sa mga Sakai nianang panahona sa away. Ako mahinumdom nga sa usa ka balay ang usa ka batan-ong lalaki namati sa mga rekord ug midawat ug regular nga pagtuon sa Bibliya. Mitungha ang usa ka suliran. Bag-o pa siyang miboluntaryo nga moduyog sa British Navy. Misulat siyag sulat ngadto sa mga awtoridad nga nagpahayag sa iyang neyutral nga baroganan ug nakadawat ug kompletong eksemsiyon gikan sa militaryong katungdanan. Sa ulahi siya miduyog kanamo sa bug-os-panahong pag-alagad.
Mary: Dili gayod nako hikalimtan kadtong mga adlaw sa gubat, Maud. Mahinumdom ka bag unsay nahitabo sa mibalhin kita ngadto sa Knutsford sa Cheshire niadtong 1942? Gisinggitan kita sa usa ka babaye, ‘Unsay inyong ginabuhat alang sa katibuk-ang panlimbasog sa gubat?’ Sa wala pa kami makatubag, mitubag ang usa ka umalagi, ‘Ginabuhat niya ang usa ka buluhaton nga kita walay kaisog sa pagbuhat.’ Ang usa ka tigulang lalaki midugang, ‘Sila nagabuhat sa usa ka maayong buluhaton.’
Maud: Sa tinuoray, ang buluhatong pagtuon sa Bibliya mao ang dakong butang. Nakabaton akog talagsaong kasinatian sa dihang ako miduaw sa usa ka uma ug nakahibalag sa usa ka babaye nga nagsulti kanako nga ang iyang batang lalaki namatay sa usa ka aksidente sa dalan. Gipahimutang ko kaniya ang pulyetong Hope for the Dead ug gisugdan ang usa ka pagtuon sa Bibliya. Tapos sa pito lamang ka pagtuon, ang maong babaye misugod sa pagkuyog kanako sa buluhatong pagsangyaw. Pila ka bulan sa ulahi ang iyang bana midawat sa kamatuoran, ug sa duha ka tuig kining magtiayona nagbaligya sa ilang uma ug misugod sa pagpayunir. Ang ilang anak babaye sa ulahi mikuyog kanila sa bug-os-panahong buluhaton, ug karon siya ug ang iyang bana nagaalagad sa Bethel sa London.
Sa 1941 Leicester nga asembliya, si Igsoong Schroeder mipahibalo nga ang espesyal nga mga payunir magadawat ug gamayng alawans nga kuwarta sa pagtabang kanila sa mga kinahanglanon sa kinabuhi. Sulod sa halos 20 anyos, si Jehova nagpanalangin sa among buluhaton sa pagtagtag sa mga basahon ug niining paagiha nagtagana kanamo kon unsay among gikinahanglan. Wala gayod kami pakyasa ni Jehova. Napamatud-an namo nga “walay usa ka pulong sa tanan niyang maayong saad ang napakyas.”—1 Hari 8:56.
Pagpangitag “mga Karnero” sa Wales
Niadtong 1954 kami didto sa Milford Haven, Wales. Bisan pa sa pagsupak sa klero, kami misangyaw ug nakakaplag ug pila ka karnerohon nga misanong. Sila among giorganisar nga usa ka grupo ug gipakita kanila kon unsaon pagdumala ang mga miting ug paghatag sa mugbo, makahuloganong mga komento. Sadya gayod kadtong okasyona nga makita ang pito gibawtismohan sa usa ka digoan sa karnero nga gipuno sa dagaang nga tubig nga gidala didto pinaagig mga balde sa gatas!
Sa Welsh walog nga lungsod sa Abercynon, ang usa ka pagduaw sa ruta sa magasin nagpatunghag maayong mga sangpotanan. Bisan tuod ang babaye nga regular nagdawat ug mga kopya sa magasin miingon, “Dili ko motuo sa inyong gisulti kanako,” siya misugot sa pagbasa sa mga magasin. Sa usa ka pagduaw sa ulahi, naabotan nako ang bana nga puliking nagdekorar sa balay. Tapos sa usa ka mahigalaong estoryahay, gihimo ang kahikayan sa pagsugod sa pagtuon sa Bibliya sa sunod semana. Nahigala namo ang tulo ka anak lalaki nga miduyog sa pagtuon. Sa kataposan, ang inahan ug iyang mga anak nagpahinungod sa ilang mga kinabuhi kang Jehova ug nabawtismohan. Sa pagkakaron, 35 ka membro nianang pamilya nagdawat sa kamatuoran, nga ang pipila nag-alagad ingong mga ansiano ug auxiliary, regular, o espesyal nga mga payunir, ug ang pipila mga ansiano. Karon kami ania sa Cardiff, nga naghinumdom sa among mga kinabuhi. Kami walay mga pagbasol. Gitagana ni Jehova ang tanan namong panginahanglan sa materyal. Kami may kahi-bulongang kinabuhi nga kaubang nag-alagad ingong mga payunir, ug giisip gihapon namo ang bug-os-panahong pag-alagad ingong among kinadakoang bahandi sa kinabuhi. Karon ang among mga kasingkasing malipay sa pagtan-aw sa nagadaghang payunir. Ug ang tanang mga batan-on nga nagasulod niining bililhong pag-alagad—dako ang among kalipay! Si Mary ug ako nagkauban sa pagpayunir sulod sa 65 ka tuig. Ang among mga kinabuhi yano apan puliki, hago apan magantihon. Gisugyot gayod namo ang pagpayunir sa tibuok kinabuhi.
[Hulagway sa panid 23]
Si Maud (wala) ug Mary nagaisip gihapon sa bug-os-panahong pag-alagad kang Jehova nga ilang kinadakoang bahandi