Ang Ipasabot sa mga Balita
“Dili Bahin sa Kalibotan”
Sa dihang nagtigom ang kapin sa usa ka gatos ka libo ka tawo sa Olympic Stadium sa West Berlin sa kataposang sesyon sa Komperensiya sa Evangelical Church sa Alemanya, giawhag sila sa presidente sa iglesya si Helmit Simon sa pag-apil sa politika.
Gilakip ni Simon ang mga isyu sama sa hustong paggamit sa mga kahinguhaan, pagtipig sa ekolohiya, pagtukod ug usa ka timbang ekonomikanhong sistema, pagtapos sa lumba sa armas, ug pagwagtang sa pagkawalay-trabaho. Iyang gibati nga apil kini sa wala-masulbad nga mga hulga sa katawhan. Aron madasig ang iyang mga mamiminaw sa pagkadinalian niining mga isyuha, ang peryodikong Frankfurter Allgemeine Zeitung sa Alemanya mitaho nga “walay maayong butang ang mahitabo sa komunidad sa Kasadpan ug sa Sidlakan gawas kon moapil ang ilang mga lungsoranon sa politika.” Gidasig ni Simon ang tanang tumatambong “sa pagpalandong sa maong pagpalangkit ingong katungdanan ug sa paglantaw sa komperensiya sa iglesya ingong usa ka Protestanteng kalihokan sa sibil nga mga katungod.”
Apan, angay bang magpalangkit ang matuod nga mga Kristohanon sa politikanhong kalihokang sama niini? Dili ba nag-ingon si Jesus nga ang iyang mga sumusunod “dili bahin sa kalibotan, sama nga [siya] dili bahin sa kalibotan”? (Juan 17:16) Gitudloan ni Jesus ang iyang mga sumusunod sa pag-ampo sa Gingharian sa Diyos ingon nga mao lamang ang matuod nga paglaom alang sa katawhan. Ngano? Tungod kay, sumala sa gitagna ni propetang Daniel sa karaan, ang Gingharian sa Diyos “magadugmok ug magaut-ot” sa nangapakyas nga mga kagamhanan sa kalibotan, “ug kini molungtad sa walay kataposan.”—Daniel 2:44.
Dili Sala ang Pagpangawat?
Sala ba ang pagpangawat? Dili sa tanang panahon, matud pa sa Katolikong pari si Ivo Storniolo. Ang O Estado de S. Paulo, usa ka peryodiko sa Brazil, mikutlo kang Storniolo nga mipahayag nga “panalanginan sa Diyos ug ipakamatarong ang pagpangawat nga ginahimo sa kabus.” Sa ulahi, siya miingon nga ang iyang gipunting mao “ang kabus lamang nga nagapangawat aron mabuhi.” Sumala sa hunahuna niini nga pari, ang delingkuwenteng mga batan-on nga nagapangawat dili angay silotan, kay sila “sa nangagi gipangawatan sa gamhanan.” “Sa iyang opinyon,” matud pa sa O Estado, “ang marginais [mga tinamay sa katilingban o mga walay katakos, kabus, walay-trabaho] apil usab ‘sa mga pinili sa Diyos.’”
Ang Bibliya nagapaluyo ba sa maong pangatarongan? Wala gayod. Samtang gidasig ni Jesus ang iyang mga sumusunod sa pagpakitag kahangawa sa kabus, wala gayod siya moingon nga ang mga sulirang katilingbanon, sama sa kakabus, katarongan na sa pagpangawat. Hinunoa, si apostol Pablo misulat: “Ang kawatan kinahanglan dili na magpangawat; kondili magbudlay hinoon siya nga magbuhat sa maayong trabaho pinaagi sa iyang kamot aron may ikahatag siya ngadto sa nagkinahanglan.”—Efeso 4:28, The New Jerusalem Bible.
Idolatrosong Komersiyo
Ang nasodnong pasundayag sa relihiyosong mga butang ug mga muwebles, nga gihimo sa amihanang Italya, nagtugot sa 97 ka kompaniya sa pagpakita sa ilang mga produkto. Apil sa mga butang nga gidispley mao ang gipainit, may panagang sa kasaba nga kompisalanan nga may libre-sa-kagaw nga rehas-rehas ug kinutsanang lingkoranan. Adunay walay-baho nga mga igdadakot nga kandila ni “Papa Juan” nga may 40-oras nga mga taymir; kompiyutersadong mga konsiyerto sa mga kampana sa simbahan; “samag-kaha” may panagang nga mga kahon sa hinabang; edukasyonal nga mga video alang sa mga kabataan (i.e., The Bible according to Johnny); ug pulopanit nga mga portpolyo nga nasudlan sa mga gamit alang sa Misa nga ginahimo sa gawas.
Apil usab sa perya mao ang mga uso nga besti sa pari. Duha ka “may etikita nga mga sotana sa pari” matud pa sa giasaoy ngadto sa peryodikong La Stampa sa Italya nga ‘labaw sa tanan, ang mga paring batan-on gusto ug bag-ong panagway, estilong Aleman nga pagkabordang de-lana, rebite, uniporme, simple apan matahom. Ug ang negosyo, salamat sa Diyos, maayo.’
Ang relihiyosong turismo nakahatag usab ug buhis sa negosyo. “Matag tuig dunay 15 milyones ka tawo ang nagapanaw alang sa relihiyosong mga katarongan, ug ang mga tigpalakaw sa biyahe, relihiyoso o dili, nagkompetensiyahay nga makuha sila,” mitaho ang peryodikong La Repubblica sa Italya. Nagailustrar niini, ang peryodikong Il Messaggero sa Italya miingon mahitungod sa basilika sa “San” Antonio sa Padua nga “manghulog ang mga tawo ug minilyon dili lamang diha sa mga otel kondili diha sa mga kahon sa kuwarta sa basilika alang sa mga larawan ug mga handumanan.”
Dili ikahibulong nga sa dihang ang Kakristiyanohan, apil sa tanang bakak nga relihiyon, laglagon, ‘ang nagapanaw nga mga magpapatigayon sa yuta managhilak ug managminatay kaniya.’ Sumala sa gipadayon sa Pinadayag 18:11: “Kay wala nay mopalit sa ilang mga baligya.”