Tibuok-Yutang Pagmantala sa Maayong Balita
NAGAMANDO na ang Gingharian sa Diyos! Kini mao ang pinakamaayong balita. Kana ang hinungdang sa 1989 kapig 3,700,000 nga mga Saksi ni Jehova sa tibuok kalibotan madasigong nagmantala sa “maayong balita” nga gitagna ni Jesus ug sa “makalipay nga balita” nga gipahayag sa manulonda diha sa panan-awon ni Juan. (Mateo 24:14; Pinadayag 14:6) Sumala sa giingon ni apostol Pablo: “Ang ilang tingog milanog ngadto sa tibuok nga yuta, ug ang ilang mga pulong ngadto sa mga kinatumyan sa pinuy-anang yuta.” (Roma 10:18) Ug ang mga indibiduwal sa hapit tanang nasod ug banay ug pinulongan ug katawhan malipayong misanong sa ilang awhag nga “kahadloki ninyo ang Diyos ug ihatag kaniya ang himaya.”—Pinadayag 14:7.
Wala nay “Life Insurance” o Seguro sa Kinabuhi
Usa niana mao ang usa ka lalaki sa Inglaterra nga nanginabuhi gikan sa kadili-piho sa kinabuhi. Si Ken usa ka namaligyag seguro o insurance, ug sa miduaw siya sa usa ka panimalay sa mga Saksi ni Jehova, sila misukna kaniya: “Buot ba nimong mopuyo sa kalibotan diin dili na kinahanglanon ang seguro sa kinabuhi?” Unsay ilang gipasabot? Nga sumala sa Bibliya, ubos sa Gingharian sa Diyos daghang butang nga nagahimo sa kinabuhing dili gayod piho karon, apil ang sakit ug kamatayon, mawala na.
Posible ba ang maong butang? Oo, ang Diyos mismo nagsaad niini. Pananglitan, ang Bibliya nagaingon: “Ang Diyos magauban kanila [katawhan]. Ug iyang pagapahiran ang tanang luha gikan sa ilang mga mata, ug mawala na ang kamatayon, ni may pagbalata ni paghilak ni kasakit. Ang unang mga butang miagi na.” (Pinadayag 21:3, 4) Unsay mopatungha sa maong kausaban? Ang Gingharian sa Diyos. Sumala sa Pulong sa Diyos, kini sa dili madugay “magadugmok ug magalaglag niining tanan [modernong-adlawng politikanhong] mga gingharian, ug kini mismo mobarog sa mga panahong walay tino.”—Daniel 2:44.
Ang mga kasulatang sama niini giawhag sa mga Saksi ni Jehova sa pagtagad sa ginatos ka milyong tawo panahon sa ilang tibuok-yutang pagwali nga kampanya. Daghan, sama kang Ken, nakaamgo nga kini dili ra kay panghanduraw. Ang ebidensiya makapatuo. Kining balaang mga saad kasaligan ug duol nang matuman.
Nabag-ong Hugpong sa mga Sukdanan
Kadtong nagapamati sa mga Saksi ni Jehova samtang gipalanog nila ang masadyaong pagmantala sa manulonda nakaamgo nga ang pagkahadlok sa Diyos ug paghatag kaniyag himaya nagalangkit ug labaw pa kay sa pagtuo lamang sa mga saad sa Bibliya. Nagausob kini sa tibuok nilang panglantaw ug nagahupay sa kadaghanan sa mga kapakyasan sa kinabuhi.
Nakaplagan ni Rafael ug sa iyang asawa nga kini tinuod. Sila nagapuyo sa Argentina, ug sa naminyo sila kapig 40 ka tuig nga miagi, gihimo nilang dakong tumong sa ilang kinabuhi ang pagkugi ug pagtigom alang sa kaugmaon nga may kasegurohan. Ugaling, 21 ka tuig sa ulahi, ang ila lamang ikapakita sa ilang pagkugi mao ang gamayng balay nga kinahanglag kanunay nga pag-ayo. Wala sila mobatig kasegurohan sama ra sa dihang sila naminyo sa sinugdan.
Dayon sila nakadungog sa maayong balita gikan sa mga Saksi ni Jehova ug nahibalo mahitungod sa labi pang maayong matang sa bahandi ug labi pang maayong matang sa kasegurohan. Si Jesus, diha sa iyang Wali sa Bukid, naghisgot niini sa miingon siya: “Hunong na kamo sa pagtigom alang sa inyong kaugalingon ug bahandi sa yuta, diin ang tangkob ug taya nagakutkot, ug diin ang mga kawatan nagapanglungkab ug nagapangawat. Hinunoa, pagtigom kamo sa inyong kaugalingon ug bahandi sa langit, diin ang tangkob ug taya dili magakutkot, ug diin ang mga kawatan dili magapanglungkab ug magapangawat.”—Mateo 6:19, 20.
Bisan tuod ang Bibliya wala magtudlo kanato nga mahimong dili praktikal kon mahitungod sa materyal nga bahandi, kini nagaagda kanato nga dili ibutang ang atong paglaom sa maong mga butang. (Ecclesiastes 7:12) Hinunoa, angay nga kita maningkamot sa pagbatog espirituwal nga bahandi pinaagi sa pagtuon sa Bibliya, pagkat-on sa kabubut-on sa Diyos, ug paghimo sa pagbuhat sa maong kabubut-on nga unang butang sa atong mga kinabuhi. (Mateo 6:33) Gisugdan ni Rafael ug sa iyang asawa ang pagtigom niining espirituwal nga bahandi, ug karon gibati nilang tinuod nga bahandianon, dili tungod sa ilang kahimtang sa panalapi, kondili tungod sa ilang relasyon uban sa Diyos. (Pinadayag 3:17, 18) Ang mensahe sa Gingharian sa Diyos maoy maayo gayod nga balita alang kanila.
Usa ka Naayom-ayom nga Kaminyoon
Ang maayong balita may tinuod nga gahom sa paghimog maayo. Pananglitan, si John, kinsa nagapuyo sa Inglaterra, dili interesado sa Bibliya, apan ang iyang asawa ug mga anak interesado. Busa misugod sila sa pagtambong sa mga tigom sa mga Saksi ni Jehova samtang si John nakig-inom kauban sa iyang mga higala. Ingong sangpotanan, nalangkit siya sa hinobrang pag-inom, pagtabako, ug, sa kataposan, sa imoralidad. Sa kataposan, gibiyaan niya ang iyang asawa aron makig-ipon sa laing babaye.
Gisugdan ang mga palakaw sa diborsiyo. Apan si John natingala sa pagkakita nga ang iyang asawa—nga nakakat-on ug Kristohanong pamatasan gikan sa iyang pagtuon sa maayong balita—nagtratar gihapon kaniyang may konsiderasyon. Si John wala makasabot ngano. Tulo ka semana una makompleto ang diborsiyo, ang Kristohanong pamatasan sa asawa ni John nakahatag epekto. Ang bana mipahayag ug tinuod nga paghinulsol sa iyang kagawian, ug wala idayon ang palakaw sa diborsiyo. Sa maong panahon si John misusi sa maayong balita alang sa iyang kaugalingon ug nagtuon sa Bibliya uban sa mga Saksi ni Jehova. Karon siya usa na usab ka Kristohanon, ug, uban sa iyang asawa, nagasugilon sa uban sa maayong balita sa Gingharian.
Niining mga adlawa sa nagkagun-ob nga pamilyahanong mga sukdanan, daghan nagakinahanglan sa tabang nga ginatanyag sa gibase-sa-Bibliya nga maayong balita. Usa sa mga Saksi ni Jehova sa Peru naglingkod tapad sa usa ka koronel sa kasundalohan panahon sa usa ka pagsakay sa ayroplano. Sila nagkaestoryahay ug ang koronel misugod sa pagpahungaw sa iyang mga suliran sa pamilya, apil ang kamatuorang ang iyang asawa nagiyan sa mga droga ug talibiya kaniya tungod sa usa ka batan-ong lalaki. Mataktikanhong gipakita kaniya sa Saksi nga ang Bibliya nagahatag ug maayo, makataronganong tambag bahin sa pamilyahanong mga butang ug nga kana nakatabang niya sa personal sa pagsulbad sa kaugalingon niyang mga suliran sa pamilya.—Efeso 5:21–6:4.
Gipasalamatan sa koronel ang Saksi tungod sa iyang makahupayng mga pulong ug misuskribir sa mga magasing Bantayanang Torre ug Pagmata! aron siya makadugang sa iyang kahibalo sa maayong balita. Dayon, sa dihang ang Saksi talibiya na sa ayroplano, usa ka batan-ong magtiayon nagdali sa pag-agpas kaniya ug mihangyong makigsulti kaniya. “Naglingkod kami sa imong atubangan,” matud niya, “ug nadungog namo ang inyong estorya uban sa lalaki. Buot usab namong mosuskribir sa maong mga magasin.” Buot usab nilang makahibalo sa maayong balita nga makapaarang-arang sa mga kinabuhi.
Usa ka Nabag-ong Kinabuhi
Dugang pa, ang gibase-sa-Bibliya nga maayong balita nagausob sa katawhan. Sumala sa giingon ni apostol Pablo: “Ang pulong sa Diyos buhi ug gamhanan.” (Hebreohanon 4:12) Kini matuod sa kaso sa usa ka batan-ong lalaki sa Macedonia, Gresya. Nahingangha siya sa pagkasayod nga, sumala sa Bibliya, ang ngalan sa Diyos maoy Jehova. Busa gihangyo niya ang usa ka higala nga makakontak siya sa mga Saksi ni Jehova sa labing madali. Duha ka panaghisgot gihikay kauban sa mga Saksi, nga ang matag usa milungtad sa mga upat ka oras. Unya ang batan-ong lalaki misugod sa regular nga pagtuon sa Bibliya, nga ang nahauna milungtad hangtod sa alas dos sa buntag!
Sukad niadtong unang pagtuon, ang batan-ong lalaki daling nagpahiuyon sa iyang kinabuhi ngadto sa mga sukdanan sa Bibliya. Mitambong siya sa mga tigom alang sa pagsimba uban sa mga Saksi ni Jehova ug nahidangat sa paghigugma pag-ayo sa Maglalalang. Ug si Jehova sa baylo nagpanalangin kaniya. Sa unang semana sa iyang pagtuon sa Bibliya, giputlan niya ang taas niyang buhok. Sa ikaduhang semana, mihunong siya sa pag-adto sa mga restawran ug mga diskohan sa pagpangitag makapaukyab nga mga kauban. Sa ikatulong semana, gilabay niya ang kataposan niyang sigarilyo. Tapos sa pagtuon sa duha ka bulan, misugod siya sa pagkuyog sa mga Saksi sa pagsugilon sa uban sa maayong balita sa Gingharian. Oo, siya nalipay nga gidala sa mga Saksi ni Jehova ang maayong balita ngadto sa iyang bahin sa yuta.
Ang Maayong Balita Sulod sa Prisohan
Bisan ang mga rehas sa prisohan dili babag sa maayong balita. Sa Espanya ang usa ka batan-ong lalaki nga ginganlag si José nagasilbig taas nga sentensiya sa prisohan tungod sa armadong pagpanulis ug ubang kriminal nga buhat. Bisan pa niana, ang mga Saksi ni Jehova nakasugilon kaniya sa maayong balita, ug ang mensahe sa Bibliya bug-os nagbag-o sa iyang panglantaw. Si Jehova ‘mihatag ug gahom’ kaniya.—Filipos 4:13.
Si José miingon nga basi gugolon niya ang nahibilin niyang kinabuhi niining sistema sa mga butang sulod sa prisohan tungod sa kanhi niyang kagawian. Apan siya nabawtismohan ug karon usa na ka Kristohanon. Ang iyang asawa lig-ong nagapaluyo kaniya, ug siya naningkamot sa paghatag sa ilang batang lalaki sa Kristohanong pagmatuto. Kasamtangan, si José nagapakig-ambit sa maayong balita uban sa kaubang mga priso, mga tawong lisod maabot niadtong nagapuyo sa gawas sa mga bungbong sa prisohan. Karon ang iyang kauban sa selda usa na usab ka bawtismadong Kristohanon.
Kini pila ra ka panig-ingnan sa pagpakita sa sangpotanan sa tibuok-yutang pagwali nga kampanya sa mga Saksi ni Jehova. Sa pagkatinuod, ang maayong balitang gipahayag sa di-makitang manulonda gipalanog sa mga Saksi ni Jehova “ingong makalipayng balita alang sa mga nagapuyo sa yuta, ug sa tanang nasod ug banay ug pinulongan ug katawhan.”
Kini maoy pinakamaayong balita, ug kini ang bugtong paglaom sa katawhan. Ginaagda ka namo sa pagpamati niini. Sama kang Ken ug John sa Inglaterra, sama kang Rafael ug iyang asawa sa Argentina, sama kang José sa Espanya, ug sama sa kapid-an pang uban, kami nagaduyog sa manulonda sa pag-agda sa tanan nga “kahadloki ninyo ang Diyos ug ihatag kaniya ang himaya, tungod kay miabot na ang takna sa iyang paghukom, ug busa simbaha ang Usa nga nagbuhat sa langit ug sa yuta ug sa dagat ug sa mga tubod sa katubigan.”—Pinadayag 14:7.