“Nagabarog nga Malig-on Ingong Usa ka Panon” sa Chad
Sama sa ilang kaubang mga Kristohanon sa tibuok kalibotan, ang mga Saksi ni Jehova sa Chad nagapabili sa tinuig nga mga asembliya nga gihikay alang sa ilang espirituwal nga kalig-on. Ania ang asoy sa usa ka biyahe sa seryal sa mga adlaw sa special assembly nga gihimo sa habagatang bahin niining gilibotag yuta, sentral nga nasod sa Aprika.
Tungod sa kalay-on ug sa kalisod sa pagbiyahe, ang mga asembliya sa Chad kasagarang himoon sa ginagmayng mga grupo, ang ilang petsa himoon sumala sa klima. Gikan sa Hunyo ug Septiyembre, ang ting-ulan nagapalisod sa pagbiyahe ug diha sa ubang mga lugar imposible. Ang mga adlaw sa special assembly ginahimo sa paglabay sa kusog nga mga pag-ulan. Ang kataposan sa tuig nga mga pista opisyal mao ang kombenyenteng panahon alang sa mas dako nga mga kombensiyon. Ug sa dili pa mosugod ang ting-ulan sa Hunyo, ang duha-ka-adlaw nga sirkitong mga asembliya ginahimo.
INIT ug umogon kadto nga hapon sa Dominggo. Ang Kingdom Hall sa N’Djamena, ang kaulohan sa Chad, napuno sa 184 ka tawo. Bisan pa sa kainit, sila namati pag-ayo sa pangunang pakigpulong, “Nagabarog nga Malig-on Diha sa Usa ka Espiritu.” Niadtong buntaga sila malipayon sa pagsaksi ug tulo ka tawo nga nagpasimbolo sa ilang pahinungod kang Jehova nga Diyos pinaagi sa bawtismo sa tubig. Kadto mao ang una sa unom ka special assembly nga mga adlaw nga usa ka lokal nga nagapanawng ministro ug ako nakapribilehiyo sa pag-alagad.
Ang tema sa mga seryal, “Nagabarog nga Malig-on Ingong Usa ka Panon,” ilabinang gipabilhan sa 267 ka Saksi sa Chad. Sila nagpuyo nga halayo gikan sa kaubang mga Kristohanon sa ubang mga nasod. Bisan pa, ang ilang pagdawat sa samang espirituwal nga pagkaon ug pag-atiman sa samang paagi nagdasig kanila sa pagpadayon sa pagbuhat diha sa panaghiusa uban sa ilang mga igsoon sa tibuok-yuta. Ang praktikal nga tambag niini nga programa naglig-on usab kanila sa pagbarog nga malig-on batok sa malalangong impluwensiya sa kalibotan ni Satanas ug sa mga hangin sa paglutos o pagsupak.
Sa N’Djamena
Ang unang kongregasyon sa mga Saksi ni Jehova sa Chad naporma sa N’Djamena sa 1964. Karon kini adunay kapin sa 90 ka magmamantala sa maayong balita sa Gingharian. Makalilipay kaayo ang pagtan-aw sa tumatambong ug sa pagkakita ug daghan nga matinumanong nag-alagad sukad sa unang mga adlaw sa buluhaton sa Chad. Ang usa ka brader adunay tulo ka asawa sa dihang iyang unang nakat-onan ang kamatuoran sa Bibliya. Dayon iyang nakita ang panginahanglan sa pagpahiangay sa iyang kinabuhi sumala sa mga sukdanan sa Bibliya. Iyang gipakaslan sumala sa balaod ang iyang unang asawa ug gibulagan ang uban, apan naghimog mga kahikayan sa pag-atiman alang kanila. Siya gibawtismohan sa 1973 ug nahimong aktibo sa buluhaton sukad niadto.
Ang usa ka ansiano nga nakigbahin sa programa nakaagom ug malisod kaayo nga pagsulay sa pagtuo. Niadtong 1975 ang kagamhanan sa maong panahon nagpakanaog ug balaod sa pag-apil sa pipila ka mga kustombre nga gipasukad sa pagsimba sa mga patay; ang bisan kinsa nga dili mosunod ipapatay. Sa dihang mibarog ang igsoong lalaki nga malig-on ug wala gayod mokompromiso sa iyang pagtuo, ang mga awtoridad misugod sa pagpangita kaniya. Ang kausaban sa kagamhanan lamang niadtong malisod nga panahon ang nakaluwas kaniya.
Mibiyahe Paingon sa Pala
Human sa N’Djamena, ang biyahe pahabagatan sa pag-alagad sa nahibiling lima ka asembliya gisugdan. Kami tig-agian sa maong dalan niadto apan sa ting-init lamang. Karon, sa ulahing Septiyembre sa hinapos sa ting-ulan, ang tanan lunhaw ug labong. Makawiwili kadtong panahona sa pagbiyahe. Kami milabay sa kaumahan sa dawa. Ang mga uhay sa taas nga mga lindog naglinya sa dalan nga karon nagkahinog na. Sa dili madugay kini anihon, paughon, ug ipundo sa konog-pormang mga kamarin nga hinimo gikan sa yutang kolonon nga natuldok-tuldok sa kabanikanhan. Ang dawa mao ang pangunang kalan-on sa kadaghanang mga taga Chad. Kini lubkon diha sa lusong nga kahoy nga adunay alho nga mas taas kay sa tawong nagagamit niana. Unya ang harina isagol sa nagbokal nga tubig ug pormahog lingin nga isula sa may sarsa nga hinimo sa okra o mani.
Nakakita kamig dugang ug dugang mga uma sa gapas samtang nagbiyahe kami sa halayong habagatan. Sanglit patag man ang yuta niining bahina sa nasod, ang mga kaumahang nagapamulak daw nakaabot sa kapunawpunawan. Sa dili magdugay ang tibuok nga mga pamilya mangutlog mga gapas. Ang gapas mao ang labing pangunang halinon nga abot sa tanom sa Chad, 133,000 ka tonilada ang naani sa 1988. Sa pagkahapon, milabay kami sa Linaw Léré. Bukiron kining lugaraha ug matahom kaayo, ilabina niining panahona sa tuig. Miabot didto sa hustong panahon, nakapalit kami ug bag-o pang nadakpang isdang karpa nga gimantikaan diha mismo sa dalan. Kadto maoy usa ka pagkaon nga magarbohong idalit ni bisan kinsang tagbalay.
Usa ka butang nga nakapalisod sa pagbiyahe niining panahona mao nga kon moulan man ugaling, ang dalan alihan aron walay makaagi. Ngano? Aron dili madaot ang dalan. Busa nahugno ang among kasingkasing sa dihang among nakita ang panganod nga kalit nga midagtom sama sa tinta. Dili gayod kami gustong magkamping sa ulan diha sa daplin sa dalan. Apan labing hinungdanon, maulahi kami alang sa sunod nga adlaw sa special assembly. Makalilipay, ang kusog nga pag-ulan wala mobunok diha sa dalan. Bisan tuod naghulat kami makadiyut diha sa daghang ali, ulahi niadtong gabhiona luwas kaming miabot sa Pala, usa ka lungsod nga gipuy-an sa duolan sa 32,000 ka tawo. Pagkatalagsaon ang naghulat kanamo! Ang walay bulan nga langit human sa ulan naghatag kanamo ug matahom nga talan-awon sa mga bitoon ug sa Milky Way, usa ka makahihilap nga talan-awon nga dili gayod makita sa kadaghanang mga molupyo sa siyudad. Kadto nakapahinumdom kanamo sa hinungdan sa among pagbarog nga malig-on—sa paghimaya sa Dakong Maglalalang sa katingalahang uniberso.
Duha ka gamayng kongregasyon ug usa ka hilit nga grupo ang nagtigom sa Pala. Tulo ka batan-ong mga brader nagbaktas ug kapin sa 100 ka kilometros ngadto niining maong asembliya. Sanglit ang mga asembliya sa habagatan gagmay ug diyutay ra ang mga ansiano, ang ubang mga bahin sa programa girekord alang sa asembliya sa N’Djamena ug gipatokar pag-usab. Kini nagpaseguro sa maayong mga programa bisan sa diyutay ra nga tumatambong. Kami nalipay nga adunay usa ka kandidato alang sa bawtismo.
Ang Madasigong Grupo sa Kélo
Sunod, ang among biyahe paingon sa Kélo dili ra kaayo layo, diin 194 ang mitambong sa programa sa Dominggo. Daghang pamilya nga adunay mga anak nga bata pa mibaktas ug kapin sa 30 ka kilometros aron sa pagtambong. Duha ka bag-ong dedikadong mga tawo ang gibawtismohan. Sa panahon sa ting-init, ang bawtismo problema gayod kon ang asembliya dili himoon duol sa suba; busa, pipila ka tawo gibawtismohan diha sa usa ka barel. Apan ang among presensiya didto sa kataposan sa ting-ulan nagpasayon sa mga butang. Bisan pa, kinahanglang momaneho ka pag kapin sa 20 kilometros alang sa usa ka maayong lugar.
Ang usa sa mga kandidato sa bawtismo maoy usa ka batan-ong babaye kansang pagtuo nasulayan sa hilabihan. Gisaaran siya sa iyang pamilya nga ipakasal sa usa ka lalaki nga dili interesado sa pagtuon sa Bibliya. Labot pa, ang lalaki mas gusto nga kaslon sumala sa kustombre sa tribo inay sa usa ka legal nga kasal. Tungod kay andam man ang lalaki sa pagbayad ug mahal nga bugay, gipugos siya sa iyang pamilya. Siya napugos sa pagbalhin ug puyo sa makadiyut aron makalikay sa dili-kasulatanhong pagminyo nga maoy gusto sa iyang pamilya. Siya mibarog nga malig-on niining tanan ug nakahimog maayong kauswagan. Sukad sa iyang bawtismo, ang pagbatok sa pamilya mihunong. Kami nagpasalamat kang Jehova nga kami adunay ingon niini ka matinumanong indibiduwal sa among taliwala.
Ang mga igsoon dinhi adunay ubang mga rason nga magmapasalamaton kang Jehova. Ang Chad nag-antos ug mapait nga sibil nga gubat ug unya, sa 1984, dihay grabe kaayo nga kagutom. Usa ka lokal nga ansiano nakahinumdom nga sa usa ka yugto sa panahon sa kagutom, iyang gitan-aw ang palibot sa Kingdom Hall ug nahibulong kon ang presente ba niadtong tungora mabuhi pa hangtod sa pipila ka bulan. Hinunoa, ang organisasyon ni Jehova mihatag ug tabang sa porma sa pagkaon, nakapahupay sa ilang kahimtang. Ang ilang apresasyon alang niana gipakita karon diha sa ilang madasigong pag-alagad. Anaa ang kusganong espiritu sa pagpayunir sa Kélo. Niadtong Oktubre 1989, kapin sa tulo ka bahin sa mga magmamantala sa Gingharian naghikay sa ilang mga kalihokan aron sila makabahin sa buluhatong pagsangyaw sa bug-os panahon.
Ang ilang naagoman sa kagutom nagtudlo kanila nga sila usab magmahinatagon. Sa miaging tuig usa ka ansiano sa kongregasyon kalit nga nagkasakit ug namatay. Iyang gibiyaan ang usa ka pamilya sa siyam ka anak, ang kamanghuran maoy pipila pa lamang ka bulan. Giatubang sa iyang asawa ang pag-ipit sa pakigbahin sa mga rituwal sa pagbangotan nga nalangkit sa pagsimba sa mga patay. Gihatagan siya sa mga igsoon sa gikinahanglang pagpaluyo, busa siya nakalikay sa grabe nga pag-piit. Unya ang kongregasyon mihikay sa pagtukod ug balay alang kaniya ug sa mga anak, dugang pa sa pagtabang sa materyal sa nagkalainlaing mga paagi. Kini misangpot ug maayong pamatuod sa lungsod, nga nagpakita sa malipayong sangpotanan sa Kristiyanidad nga nagalihok.—Buhat 20:35.
Koumra, Doba, ug Bongor
Ang among sunod nga gihunongan mao ang Koumra. Ang grinabahang mga dalan nakapasayon sa among 300 ka kilometrong pagbiyahe. Sa among pagpaingon didto, miagi kami sa siyudad sa Moundou, usa ka industriyal nga sentro nga dunay kapin sa usa ka gatos ka libo ka tawo. Setentay-uno ang mitambong sa Koumra. Usa ka batan-on nga wala gayod makadawat ug pormal nga pag-eskuyla mihatag ug pakigpulong sa plataporma. Iyang gisaysay kon sa unsang paagi ang programang pagtuon sa pagbasa-ug-pagsulat nga gitudlo diha sa Kingdom Hall nakatabang kaniya ug naghatag kaniya sa gikinahanglang pagsalig. Siya karon nagadumalag mga pagtuon sa Bibliya uban sa upat ka tawo.
Human sa adlaw sa special assembly sa Koumra, mibiyahe kamig balik paingon sa N’Djamena, ang among sunod nga gihunongan mao ang Doba alang sa ikalimang asembliya sa among seryal. Ang uban niadtong mitambong naabtan sa ulahing ulan ug nagpalabay sa gabii diha sa daplin sa dalan. Sa gihapon, ang tanan miabot sa eksaktong panahon sa pagsugod sa programa sa Doba. Singkuwentay-uno ang mitambong, ug usa ka tawo ang mipresentar alang sa bawtismo.
Ang kataposang gihunongan mao ang Bongor. Kini maoy kahumayan nga lugar, ug kami nahibulong sa pagkapatag sa lugar. Ang tumatambong sa Bongor nakaabot sa total nga 630 niadtong nakadungog sa programa sa Chad. Ug uban sa duha nga gibawtismohan, ang total nga gidaghanon sa mga tawong nabawtismohan maoy siyam.
Ang among pagbalik sa N’Djamena nakakompleto sa among biyahe nga duolan sa 2,000 ka kilometro. Makalilipay kaayo ang pakig-uban uban sa mga alagad sa Diyos nga nagbarog nga malig-on sa daghang katuigan, ug sa paghimamat ug daghang bag-ohan nga nakahimog katingalahang kauswagan. Ang ilang kadasig alang sa ministeryo maoy ilabinang makadasig. Sa Oktubre 1989, dihay bag-o labing taas nga gidaghanong 267 ka magmamantala sa Chad, nga maoy 20-porsiento nga pag-uswag kay sa miaging tuig.
Nahiusa Bisan Halayo
Ang pagbiyahe latas sa nasod nakaapresyar kanamo sa kadako sa hagit sa pagpakaylap sa maayong balita diha sa usa ka yuta diin kapin sa 200 ka pinulongan ang gisulti. Bisag ang Pranses ug Arabiko mao ang opisyal nga mga pinulongan sa Chad, diha sa matag usa ka adlaw sa special assembly, ang programa gihubad gikan sa Pranses ngadto sa nagkalainlaing pinulongan. Bisan pa, daghan kinsa nangabot sa lokasyon sa asembliya dili makasabot sa pinulongan sa maong rehiyon, busa suliran gihapon ang pagtabang kanila sa pagsabot sa programa.
Diha sa tanang dapit nga among gibisitahan, maabiabihong gitagad kami sa among igsoong mga lalaki ug babaye. Ang pagkaon kasagaran dawa o harinang humay nga gilingin-lingin ug isula sa sarsa nga may panakot nga gihisgotan sa sinugdan. Usahay dalhon sa batan-ong babaye ang pagkaon diha sa bandeha nga tinabonan ug panapton nga mahayag kaayog kolor. Ang bandeha balanse kaayong ilukdo sa iyang ulo, ug makadayeg ka sa iyang kahusay.
Ang populasyon sa amihanang Chad kadaghanan mga Muslim; ang mga tawo sa habagatan kadaghanan mga Katoliko, Protestante, o tigsimbag mga hayop. Ang kagamhanan nagalaban sa polisa sa kagawasan sa relihiyon, ug kami malipayon sa pakigtigom nga may kagawasan.
Ang programa sa adlaw sa special assembly nakatabang sa gamayng pundok sa mga Saksi sa Chad sa pagpabili nga bisag sila sa geograpikanhon halayo gikan sa ilang mga igsoon sa ubang bahin sa kalibotan, sila sa pagkamatuod tinuod nga nahiusa diha sa usa ka panon uban kanila. Kini nagpahimo kanila sa ‘pagbarog nga malig-on diha sa usa ka espiritu’ bisan pa sa mga pagpiit ug pagsupak nga ilang naagoman.—Filipos 1:27.