Ang Ipasabot sa mga Balita
Mga Homoseksuwal—Managsama ba Atubangan sa Diyos?
Diha sa estado sa Queensland sa Australia, ang homoseksuwal nga mga buhat—bisan diha sa pribado sa nagkasabot nga mga kaparis—supak sa balaod. Dili pa dugay, usa ka dakong grupo sa maong estado migulang kusganon batok sa maong mga balaod; gusto nila nga ang homoseksuwalidad himoon nga legal.
Sumala pa sa mantalaang The Courier-Mail, kining Joint Church Social Group gilangkoban sa mga sakop sa Anglican, Romano Katoliko, Lutheran, Baptist, ug Uniting nga mga simbahan ug mga Quakers (Sosyedad sa mga Higala). Nangangkon nga ang mga balaod batok sa mga homoseksuwal gipasukad sa pagkawalay-kahibalo ug pagpihig, ang grupo nag-ingon: “Ang among pagpaluyo alang niini nga baroganan gipasukad sa pagtuo nga ang tanang tawo managsama sa atubangan sa Diyos ug angay nga managsama sa atubangan sa balaod. Kami nagtuo nga ang usa ka tawong homoseksuwal maoy tawo usab sama sa usa ka tawong heteroseksuwal.”
Samtang tinuod nga ang tanang tawo nahimugsong managsama, unsay hunahuna sa Diyos bahin sa homoseksuwalidad? Diha sa Bibliya, ang tanang homoseksuwal nga mga buhat gihukman ingong dili-kinaiyanhon ug takos sa pagkawala sa pag-uyon sa Diyos, nga motultol sa kamatayon. Kini matuod dili lamang sa karaang Israel kondili sa panahon usab sa mga Kristohanon. (Levitico 18:22; Roma 1:26, 27) Ang paghukom klaro ug dili magkinahanglag interpretasyon: “Walay makihilawason, . . . ni mga lalaki nga gihuptan alang sa dili-kinaiyanhong mga katuyoan, ni mga lalaki nga modulog sa mga lalaki . . . ang makapanunod sa Gingharian sa Diyos.”—1 Corinto 6:9, 10.
Inay manawag sa paghimo sa homoseksuwalidad nga legal, ang matuod nga mga Kristohanon nag-awhag niadtong nagapaulipon niining nagapasipala sa Diyos nga buhat sa pagbulag gikan niana pinaagi sa pagbali ngadto sa kamatuoran nga Pulong sa Diyos.
Nagpadayon ang Riyesgo sa Dugo
Usa ka dili pa dugay nga pagsusi nagbutyag nga nakahimog ginatos ka sayop ang American Red Cross sa pag-atiman sa nakontaminar nga dugo. Hapit katunga sa 12 milyones ngadto sa 15 milyones ka yunit sa dugo nga gigamit sa Tinipong Bansa sa usa ka tuig gisuplay sa American Red Cross. Sa dihang ipagula ang bisan unsang yunit sa dugo nga makaplagang nakontaminar, ang FDA (Food and Drug Administration), usa ka ahensiya sa pederal nga kagamhanan, kinahanglang pahibaloon. Ugaling, ang The New York Times nag-ingon nga ang pederal nga inspektor nag-ingon nga ang Red Cross kanunayng mapakyas sa paghimo niini. Siya nag-ingon nga ang pagtuki sa ilang mga rekord nagbutyag nga 380 ka higayon diin ang sayop nga pag-atiman sa nakontaminar nga dugo wala gayod itaho ngadto sa kagamhanan. Dugang pa, gikan sa 228 ka kaso sa AIDS nga tingali gipahinabo sa mga pag-abuno sa dugo, nadiskobrehan sa inspektor nga ang Red Cross nagtaho lamang ug 4 ngadto sa FDA.
Samtang daghan naglantaw niana nga makaluwas ug kinabuhi, ang giabunong dugo maoy hinungdan sa kamatayon sa libolibo matag tuig. Bisan pa, ang matuod nga mga magsisimba sa Diyos, sa pagbantay sa iyang mga balaod maylabot sa pagtahod sa dugo, sa samang higayon napanalipdan gikan sa mga kapeligrohan sa pag-abuno. Ang Diyos nagsugo: “Dili ka magakaon sa dugo; iyabo kini sa yuta sama sa tubig . . . aron kini mamaayo alang kanimo ug sa imong mga anak sa ulahi nimo, kay nagabuhat ka sa matarong.”—Deuteronomio 12:23-25, New International Version.
Ang Papa Maylabot sa Pagserbisyo sa Militar
Sa miaging tuig ang papa nakigtagbo sa kapin sa 7,000 ka kadet sa militar sa garison sa Roma sa Cecchignola. Sa maong panahon upat ka batan-ong mga opisyal nga naghawas sa garison nangutana sa papa kon ang pagserbisyo sa militar nahiuyon ba sa Kristohanong konsensiya. Sa espisipiko, sumala sa mantalaang L’Osservatore Romano sa Vatican City, sila nangutana: “Ang usa mahimo bang matinumanong Kristohanon ug, sa samang higayon, usa ka matinumanong sundalo?” Ang papa mitubag: “Dili malisod o imposible ang paghiusa sa Kristohanong bokasyon uban sa pagserbisyo sa militar. Kon motan-aw kita sa ulahi nga posibilidad, makita kini nga matahom, takos ug maayong butang.”
Ang mao ba nga hunahuna, hinunoa, nahiuyon sa neyutralidad nga gihuptan sa unang mga Kristohanon? Diha sa iyang librong An Historian’s Approach to Religion, si Arnold Toynbee nagkutlo sa kaso ni Maximilianus, usa ka ikatulong-siglong martir si kinsa, sa dihang gihulga sa kamatayon korte sa Roma tungod sa pagdumili nga matawag sa militar, miingon: “Dili ako moalagad. Punggoti na lang ninyo ako sa ulo, dili gihapon ako moalagad sa mga gahom Niining Kalibotana; Ako moalagad sa akong Diyos.” Ngano, sa atubangan sa tino nga kamatayon, midumili siya sa pagserbisyo sa militar? Tungod kay iyang giisip ang matuod nga mga sumusunod ni Jesus nga “dili bahin sa kalibotan” sama nga si Jesus dili bahin sa kalibotan. Dugang pa, iyang giisip ang Kristohanong gubat ingon nga espirituwal, nahiuyon sa mga pulong ni Pablo: “Kami wala makiggubat pinasubay sa among pagkaunod. Kay ang mga hinagiban sa among pakiggubat dili man mga hinagiban sa unod.”—Juan 17:16; 2 Corinto 10:3, 4.