Mga Magmamantala sa Gingharian Nagtaho
“Ang Matag Kasulatan nga Iyang Gibasa Nakatandog sa Akong Kasingkasing”
“ANG pulong sa Diyos buhi ug gamhanan,” matud ni apostol Pablo. (Hebreohanon 4:12) Kini nagmatuod diha sa kinabuhi sa usa ka babaye nga taga-Vietnam nga nagdako ingong usa ka Buddhista. Kini mao ang iyang estorya.
“Ang akong mga ginikanan, nga tua pa sa Vietnam, maoy mga Buddhista sa ngalan, mao nga ako nagdako ingong usa ka Buddhista hangtod sa akong pagkaminyo sa edad nga 22. Ang pamilya sa akong bana misulay sa pagpugos kanako nga mabunyagan sa Iglesya Katolika. Sila miingon nga ang akong patay nang ugangang-babaye gipugngan sa pag-adto sa langit tungod kay ako Buddhista! Sa sinugdan ako mibalibad, apan sa ulahi ako nabunyagan aron sa pagpahimuot kanila. Bisan pa niana, sa kahiladman sa akong kasingkasing, gibati kong kataw-anan kay gidumtan ko ang pagkasalingkapaw diha sa Iglesya Katolika. Kadto sama ra sa Buddhistang relihiyon. Kadto samang nalangkit sa gubat ug politika, ug ang duha ka relihiyon nagdasig sa pagsimba sa katigulangan.
“Kon nagpabilin pa ako sa Vietnam, ako unta gamay rag higayon sa pagkat-on sa kamatuoran. Ako nagtubo sa panahong ang politikanhong kagubot mikaylap sa South Vietnam, ug ako nagpuyo sa usa ka lungsod nga layo kaayo gikan sa Saigon. Busa usa ka panalangin nga ako nakaeskapo paingon sa Australia.
“Ako usa sa mas bulahang katawhan sa sakayan. Uban sa akong duha ka bulang masuso diha sa akong mga bukton, ako midalagan sa kangitngitan aron makaeskapo gikan sa mga polis ug makasakay sa gamayng sakayan sa pangisda. Tapos sa pito ka adlaw sa dagat, nakaabot kami sa Malaysia, diin kami miestar ug pila ka bulan sa usa ka kampong dangpanan una makaabot sa Australia.
“Tapos sa duha ka tuig ug tunga sa Australia, ako nakontak sa mga Saksi ni Jehova sa ilang balay-balay nga ministeryo. Sa unang pagduaw, gidawat nako ang regular nga pagtuon sa Bibliya kay gisabot nako nga kadto maayong higayon sa pagkat-on ug Ingles. Apan ang batasan sa Saksi nga nakakita kanako ug ang kamatuorang iyang gitudlo kanako nakapahingangha kaayo nako. Ang matag kasulatang iyang gibasa nakatandog sa akong kasingkasing, ug ako wala makakitag pagkasalingkapaw diha sa organisasyon ni Jehova. Tapos sa pagtuon sa Bibliya sulod sa usa ka tuig ug tunga, gipahinungod ko ang akong kinabuhi kang Jehova ug nabawtismohan.
“Igaingon ko nga ang kamatuoran nagbag-o sa akong tibuok nga panglantaw sa kinabuhi. Ang akong bana dili magtutuo, apan si Jehova nagtabang ug naglig-on kanako, kauban sa akong gamayng pamilya. Siya mao ang akong Dakong Instruktor ug nagtudlo kanako nga mahimong mas maayong asawa ug inahan. Ako nagpadayon sa pagpasalamat kang Jehova nga ako iyang gitabangan sa paggawas sa espirituwal nga kangitngitan ngadto sa kahayag sa kamatuoran sa Bibliya.”
Sa pagkamatuod, ang dinasig nga Pulong sa Diyos gamhanan alang sa kaayohan niining kasoha. Ang pagtuon sa Bibliya ug pagpadapat kon unsay nakat-onan naghatag kahulogan ug katuyoan sa kinabuhi ug motultol sa kinabuhing dayon sa bag-ong kalibotan sa Diyos. Sumala sa gipahayag ni Moises nga giinspirar sa Diyos, “kini dili kay butang walay pulos alang kaninyo, apan kini nagkahulogan sa inyong kinabuhi.”—Deuteronomio 32:47.