Mga Magmamantala sa Gingharian Nagtaho
Maayong Balita sa Gingharian Gikan sa Ubos nga Yuta
SAMA sa ubang 211 ka kayutaan, ang maayong balita sa Gingharian ginamantala nga masiboton sa mga Saksi ni Jehova sa ubos nga yutang Australia. Ang kapin sa 49,000 ka Saksi didto nakapahimulos sa dagayang mga panalangin. Daghang tawo gikan sa nagkalainlaing nasyonalidad namalhin didto latas sa katuigan, busa karon adunay 58 ka etnikong mga kongregasyon nga nagtaho sa ilang pag-alagad sa kanataran. Ang makapadasig nga mga kasinatian giasoy kanato sa sangang buhatan sa Watch Tower Society.
Kagiw nga Vietnamese
Usa ka kagiw nga Vietnamese, nga karon nagpuyo sa Australia, ang nagdako uban sa pagsimba sa katigulangan, Confucianismo, ug Budhismo, uban ang Sidlakanhon ug Kasadpanhong pilosopiya. Hangtod niadtong 1975 siya usa ka sundalo sa Habagatang Vietnam. Niadtong 1979 siya giputlan sa iyang walang bukton tungod sa tumor diha sa iyang pulso. Kay nangandoy ug kagawasan, gilayasan niya ang Vietnam niadtong 1983, kuyog sa 24 pa ka tawo, diha sa usa ka gamayng sakayan. Human sa makahahadlok nga panagtagbo sa mga pirata, ang ilang sakayan gianod nga walay tumong sa Dagat sa Habagatang Tsina sulod sa unom ka naglagiting nga mga adlaw, hangtod nga sila sa kataposan nahidunggo sa Malaysia. Human sa paggugol ug lima ka bulan sa kampo sa mga kagiw, siya gitugotang makasulod sa Australia. Tulo ka bulan sa ulahi nakakontak siya sa kamatuoran. Ang mga pulong ni Jesus sa Juan 8:32 mitubag sa iyang tim-os nga pagpangita sa kagawasan: “Inyong mahibaloan ang kamatuoran, ug ang kamatuoran magapahigawas kaninyo.” Ang mga igsoon mipakita kaniyag dakong gugma. Karon siya usa sa mga Saksi ni Jehova nga nahimong galamiton sa pagtabang sa ubang tawong nagsultig Vietnamese nga pinulongan nga makakat-on sa kamatuoran nga makapahigawas sa usa.
Usa ka Nitibo Midawat sa Kamatuoran
Sa amihanan-kasadpang bahin sa Australia usa ka batan-ong payunir nga lalaki ug iyang kauban ang miduaw sa usa ka Nitibong babaye sa lugar sa tribo nga gitawag woolshed o alotanan sa karnero. Human nga makadungog sa katuyoan kon nganong sila giduaw, ang babaye mikuha sa yawi nga diha sa iyang liog ug gibuksan ang dakong asirong kaban. Sa ilang katingala, ilang nakita sa sulod uban sa iyang pila ka butang ang duha sa mga brosyur sa Watch Tower ug usa ka daang kopya sa Bibliya. Nga nangyaka sa yuta, ilang gisugdan ang panagtuon nga ginamit ang usa sa mga brosyur. Bisan tuod ang babaye dili makabasa o makasulat, iyang tim-os nga gipabilhan ang mga brosyur nga iyang nabatonan. Sa iyang kalipay, karon usa na ka regular nga panagtuon ang gidumala.
Wala-tuyoa nga Tawag sa Telepono
Sa siyudad sa Sydney, nga adunay populasyon nga tulo ka milyon, ang usa ka gamayng tres-anyos nga batang babaye nagdula sa telepono ug midayal sa mga numero nga walay tumong. Ang numerong sulagmang natawagan mao ang numero sa telepono sa usa ka Saksi. Ang sister mitubag, nga naghunahunang ang iyang apo ang mitawag kaniya. Unya iyang nadunggan ang usa ka hamtong nga tingog. Kadto ang inahan sa gamayng batang babaye, nga nangayog pasaylo para sa iyang anak. Misangpot ang pagkulokabildohay, diin ang atong igsoon nga babayeng Saksi mihatag pamatuod. Ang babaye mituwaw: “Ako nagalaom nga ang mga Saksi moduaw pag-usab sa akong balay. Gusto ko nga mahimong usa sa mga Saksi ni Jehova!” Siya miingon nga duha ka bulan na nga miagi, siya miduaw sa Peru ug nakadayeg sa iyang iyaan ug pamilya nga karon mga Saksi na ni Jehova. Siya miingon: “Ang mga anak sa akong paryente kaniadto maoy gagmayng mga demonyo, apan karon sila gagmay nang mga anghel!” Ang mga kahikayan gihimo alang sa usa ka panagtuon sa Bibliya, ug ang babaye nga interesado padayong miuswag—ang tanan tungod sa usa ka wala-tuyoang tawag sa telepono sa iyang gamayng batang babaye.