Ikaw ba Nagapabili sa Yutan-ong Organisasyon ni Jehova?

TAN-AWA ang usa ka maayong-pagkakorte, hamili nga diamante, ug unsay imong makita? Usa ka mutya nga sa tinuoray nindot nga butang. Karon susiha kanang diamanteha ilalom sa mikroskopyo, ug unsa ang imong makita? Lagmit adunay gasgas, liki, tatsa, o lain pang mga apan.

Imo bang daoton o isalibay ang diamante tungod sa iyang panagway ilalom sa mikroskopyo? Sa pagkatinuod dili! Sibog lag diyutay gikan sa mikroskopyo, ug ikaw sa gihapon motamod sa kaanindot ug sa katagsaon sa gilak nga nagpahimo niana nga molabaw tali sa ubang mga mutya.

Maingon sa diamante, ang yutan-ong organisasyon ni Jehova nagalabaw sa daghang paagi. Walay laing organisasyon sa yuta ang nagatagamtam ug usa ka suod nga relasyon uban sa Maglalalang. Diha sa sulat para sa unang-siglo dinihogan nga mga Kristohanon, kinsa nanaghupot sa langitnong paglaom, si apostol Pedro nagtumong niining linain nga relasyon. Siya miingon: “Kamo maoy usa ‘ka kaliwatan nga pinili, ang kahugpongan sa mga harianong saserdote, ang nasod nga balaan, ang katawhan nga iyang kaugalingon sa Diyos.’” (1 Pedro 2:9) Karong adlawa usa ka dakong panon sa “ubang karnero,” nga dunay paglaom sa kinabuhing dayon ibabaw sa yuta, nakig-uban sa mga nanghibilin nianang “balaang nasod” sa pagsimba sa Diyos. (Juan 10:16) Nga nahiusa kining duruha ka grupo nabalay nga usa ka organisasyon nga naglabaw sama sa usa ka anindot ug tagsaon magilakong mutya.

Likayi ang Hinawayong Paglantaw sa Uban

Apan kinahanglan atong dawaton nga kining tibuok-kalibotang organisasyon inapilan sa dili hingpit nga mga tawo. Busa, unsay mahitabo kon atong aninagon kana ilalom sa simbolikong mikroskopyo? Oo, kita makakaplag ug mga makasasalang kiling ug daghang mga apan sa personalidad sa mga tawo nga sakop niana.​—Roma 3:23.

Ang apostol nga si Pablo miangkon nga siya dunay maong mga apan. Siya miingon: “Sa dihang buot ko nang buhaton ang maayo, ang daotan duol kanako.” (Roma 7:21) Ang matag Kristohanon nakasinati sa samang bugno. Ang tanan masayop. Dugang pa, sa madali o madugay daghan ang nagaantos tungod sa mga sayop sa uban. Angay ba kita nga mawad-ag kadasig o mabugnaw sa dihang ang mga apan ug di-pagkahingpit sa kaubang Kristohanon madayag? Kana ba makapakunhod sa atong pagpabili sa organisasyon ni Jehova? Sa pagkatinuod dili! Hinuon, kita angay nga magbaton ug usa ka halapad nga panlantaw.

Ang Kasulatan naglista ug ubay-ubayng mga taras nga magpaila kanila kang kinsa ang balaang espiritu nagalihok. Ang pipila niini maoy “gugma, kalipay, kalinaw, pailob, pagkamapuangoron, pagkamaayo, pagkamatinumanon, kaaghop, pagpugong sa kaugalingon.” (Galacia 5:22, 23) Sa kasukwahi, ang relihiyoso, politikal, ug negosyong mga organisasyon ning kalibotana kasagaran magpasundayag sa gitawag sa Bibliya nga mga buhat sa unod: “mga dinumtanay, mga pakigbingkil, pangabubho, kapungot, sinupakay, pundokpundok, kasina, huboghubog, hudyaka-bahakhak, ug mga butang nga maingon-ingon niini.” (Galacia 5:20, 21) Mao nga, sama sa usa ka magilakong diamante tali sa mga ordinaryong mga bato, ang katawhan ni Jehova nagbarog nga labaw sa tunga sa kalibotan nga dunot sa espirituwal nga kahimtang.​—Mateo 5:14-16.

“Angay nga Paghiusa Diha sa Mao Rang Panghunahuna”

Usa ka tagsaong kinaiya sa diamante mao ang iyang hugot-nga-pagkatagik, lig-ong pagkahigot nga atomikong gambalay. Kaamgid niini, ang yutan-ong organisasyon ni Jehova nagpakita ug dili hitupngang panaghiusa sa doktrina ug panagsoon. Kadto silang bahin nianang organisasyona nagpadapat sa tambag nga makaplagan sa Bibliya diha sa 1 Corinto 1:10, nga nag-ingon: “Apan magahangyo ako kaninyo, mga igsoon, tungod sa ngalan sa atong Ginoong Jesu-Kristo, nga unta kamong tanan magasulti sa mao rang usa ka butang ug nga wala unta kaninyoy mga pagkabahinbahin, kondili mausa, unta hinuon kamo diha sa mao rang paagiha sa paghunahuna ug sa mao rang hunahuna.”

Ang mga Saksi ni Jehova minglabaw usab ibabaw sa rasanhong pagpihig ug nasodnong garbo. Nga nagbaton “sa kaalam gikan sa itaas,” sila wala ‘magabuhat ug mapiliong pag-ila.’ (Santiago 3:17) Kami nagahatag himaya kay Jehova alang sa iyang napalampos maylabot niini diha sa usa ka organisasyon nga gilangkoban sa dili hingpit nga mga tawo.

Sa kaatbang, ang magasing The Christian Century, nga naghisgot sa tuig 1990, nag-ingon nga “ang kalibotan morag labihang nabahin kay niadto pinaagi sa relihiyosong mga partido ug sa kaliwatanon ug nasodnong mga pagbati nga may halalom nga kalabotan sa relihiyosong mga pagtuo. Gikan sa India ngadto sa Uropa ug gikan sa Tungang Silangan ngadto sa Pasipiko, ang relihiyon mingsalmot uban sa kaliwatanon ug nasodnong panagkumbuya​—kasagaran naay huyang politikal nga mga sangpotanan.” Tin-aw, kadtong buot moalagad sa Diyos makadangop lamang sa usa ka organisasyon nga nagpahimulos sa espiritu ug panalangin ni Jehova.

‘Maingon sa Diamante, Akong Gibuhat ang Imong Agtang’

Ang diamante maoy pinakagahing butang sa kinaiyahan nga nailhan sa tawo. Ang Bibliya nagtumong sa mga gamit sa diamante diha sa pagkagis o pagkulit sa gahiang mga galam-on. (Jeremias 17:1) Matikdi, usab, ang pulong ni Jehova kang Ezekiel: “Tan-awa! akong gibuhat ang imong nawong sa tukma ingon ka gahi sa ilang mga nawong ug ang imong agtang sa tukma ingon ka gahi sa ilang mga agtang. Maingon sa diamante, mas gahi kay sa santik, akong gibuhat ang imong agtang.” (Ezekiel 3:8, 9) Si Jehova naghatag kay Ezekiel ug samag diamante kalig-on nga determinasyon nga nagpaarang kaniya sa pagpanagna ngadto sa gahig-ulo nga mga tawo.​—Ezekiel 2:6.

Susama karong adlawa, si Jehova nagtugyan sa iyang katawhan ug samag-diamante nga kagahi sa atubangan sa dakong pagsupak. Ang mga Saksi ni Jehova nakaantos sa mga legal nga pagbando, pag-atake sa masamokong grupo, pagpatay, pagbunal, dili makataronganong pagbilanggo, kasakitan, usahay silot sa kamatayon. Bisan pa niana, ilang napakita ang ilang pagtuo nga dili mabungkag.

“Ang Akong mga Alagad Maglipay”

Ang Bibliya nagtagna ug panahon sa dihang ang katawhan makabaton ug “dagway sa tinuohan ” apan “nagapanghimakak sa gahom niini.” (2 Timoteo 3:1, 5) Usa ka mantalaan nagtaho nga “mga Protestante, Romano Katoliko, ug mga Judio tanan nabalaka sa pag-us-os” sa ilang mga simbahan ug mga sinagoga. Ang mga Saksi ni Jehova, sa laing bahin, maoy seryosong mga estudyante sa Bibliya. Sa nagtubong gidaghanon, batan-on ug tigulang, lalaki ug babaye, tanan sila motambong sa daghang mga tigom matag-semana. Usa ka sulat ngadto sa mantalaan nag-ingon bahin nila nga “ang ilang relihiyon mao ang pinakabililhong butang nga ilang nabatonan, ug ang ilang kahangawa mao ang pagpakig-ambit niana sa uban.”

Ang ingong tinamdan nakapahimo sa organisasyon ni Jehova nga molabaw sama sa bililhong diamante. Ug ang dungog mopadulong ngadto sa Usa kinsa nagapalig-on ug nagagiya sa dili-hingpit nga mga tawo pinaagi sa iyang balaang espiritu.

Ang propetang si Isaias nagtagna: “Mao kini ang giingon sa Soberanong Ginoo nga si Jehova: ‘Tan-awa! Ang akong kaugalingong mga alagad magakaon. . . . Tan-awa! Ang akong kaugalingong mga alagad magainom. . . . Tan-awa! Ang akong kaugalingong mga alagad magakalipay. Tan-awa! Ang akong kaugalingong mga alagad managsinggit sa kasadya tungod sa maayong kahimtang sa kasingkasing.’”​—Isaias 65:13, 14.

Karong adlawa atong makita ang katumanan niining propesiya. Ang Diyos nagaatiman sa iyang katawhan diha sa tagsaong paagi! Busa, kon ikaw makig-uban kanila, ayawg tugoti ang bisag unsang negatibong panghunahuna sa paghikaw kanimo sa imong kalipay. Tan-aw sa tibuok hulagway ug hinumdomi: Walay laing organisasyon ibabaw sa yuta ang nagapahimulos sa tagsaong pag-atiman ug pagpanalipod sa Diyos. Ayaw hunongi sa pagtipig ang imong pribilehiyo ingong bahin niana.