Ang Bibliya Tinuod ba nga Gasa Gikan sa Diyos?
“NAGTUO ako nga ang Bibliya mao ang labing maayong gasa nga nahatag sukad sa Diyos sa tawo.” Gisulti kanang pulonga ni Abraham Lincoln, ang ika-16 nga presidente sa Tinipong Bansa.a Siya wala mag-inusara sa iyang pagpabili niining karaang libro.
Ang ika-19ng siglong estadista nga si William E. Gladstone miingon: “Ang Bibliya maila pinaagi sa Pagkalinain sa Gigikanan niini, ug layo kaayog biya ang tanang mga libro gikan niini.” Sa susamang hunahuna, ang ika-18ng siglong estadistang Amerikano nga si Patrick Henry miingon: “Ang Bibliya bililhon kay sa tanang ubang mga libro nga napatik sukad.” Dayag nga nakadayeg sa Kasulatan, ang Pranses nga imperador nga si Napoléon Bonaparte mikomento: “Dili usa ka yanong libro ang Bibliya, apan usa ka Buhing Linalang, nga may gahom nga nagadaog sa tanang nagabatok niana.”
Alang sa pipila, ang Bibliya nahimong tuboran sa tabang ug paglipay. Ang Amerikanong Confederate nga si heneral Robert E. Lee miingon: “Diha sa tanan ko nga mga suliran ug mga kalisdanan, ang Bibliya wala gayod magpakyas sa paghatag kanako ug kadan-agan ug kalig-on.” Ug tungod sa iyang pagpabili niining libroha, ang presidente sa U.S. nga si John Quincy Adams miingon: “Daghan nang katuigan nga gibatasan ko ang pagbasa sa tibuok Bibliya kausa sa usa ka tuig.”
Kon gihatag sa Labing Hataas ang Bibliya ngadto sa katawhan, aduna gayoy pamatuod nga kini balaan nga pagkadasig. Kinahanglang mas bantogan kini kay sa bisan unsang ubang libro. Ug aron ang Bibliya mahimong usa ka tinuod nga tuboran sa kalig-on ug pagtudlo, kini kinahanglang bug-os nga kasaligan. Busa, adunay nagpabiling pangutana, Ang Bibliya tinuod ba nga gasa gikan sa Diyos? Atong sunod susihon ang tubag sa maong pangutana.
[Footnote]
[Hulagway sa panid 3]
William E. Gladstone
[Credit Line]
Hulagway sa U.S. National Archives
Abraham Lincoln
[Credit Line]
Hulagway sa U.S. National Archives
Patrick Henry
[Credit Line]
Harper’s U.S. History
Napoléon Bonaparte
[Credit Line]
Dibuho ni E. Ronjat
John Quincy Adams
[Credit Line]
Harper’s U.S. History
Robert E. Lee
[Credit Line]
Hulagway sa U.S. National Archives