Gikinahanglan ba Nato ang Bibliya?
SI Oxana, usa ka Rusong batan-ong babaye, nalipay sa dihang namatikdan niya ang usa ka Bibliya nga gitanyag sa usa ka tinderog mga libro sa dalan sa Moscow. Ang iyang kauban, si John, kinsa naggikan sa usa ka nasod diin ang Bibliya daling mabatonan, nakadayeg sa kaikag ni Oxana. “Ako—usa ka ateyista—buot mopalit niadto alang kaniya,” miangkon siya. Bisan pag sa sinugdan mitutol si Oxana, ngadtongadto iyang gidawat ang gasa ni John.
Daghan, sama ni Oxana, adunay dako kaayong tinguha nga makabatog Bibliya. Matuod kini ilabina diha sa mga nasod diin ang Bibliya gipig-otan sa daghang katuigan. Pananglitan, ang mga magpapatik niining magasina nagabudlay pag-ayo aron makanunot sa panginahanglan ug mga Bibliya diha sa kanhi Sobyet nga mga republika, ingon man sa ubang mga bahin sa kalibotan. Sa unang panahon, daghang katawhan niining mga dapita may kahigayonan sa pagsusi sa tukma sa Bibliya—ug daghang katawhan nadani sa gamhanang mensahe niini.
Mga Tigsaway ug mga Nagduhaduha
Naghulagway sa kaatbang sa gihisgotan sa ibabaw, ilabina sa amihanang Uropa, ang Bibliya gipasagdan nga maabogan diha sa estanteg libro. “Patay nga kasaysayan!” moingon ang uban, nga modugang: “Gisulat kana alang sa laing kaliwatan. Wala kiniy kalabotan sa modernong tawo.” Bisan ang iladong mga klerigo miluwat ug publikong mga pahayag nga nagdaot sa Bibliya. Ang Anglikanong arsobispo nga si Desmond Tutu gitaho diha sa The Star, usa ka mantalaan sa Habagatang Aprika, nga miingon: “Adunay mga bahin sa Bibliya nga walay malungtarong bili.” Ang mga pahayag nga sama niana nakapahibulong sa daghan kon unsa ka dako ang ilang pagtuo sa Bibliya.
Panginahanglan sa Giya
Ang mga tigsaway ug mga magtutuo kinahanglang modawat nga, labaw pa kay sukad masukad, ang kalibotan nagkinahanglag mga solusyon nga molampos. “Gawas kon ang tawo makapugong dayon sa katulinon sa kausaban sa iyang personal nga mga kahimtang ingon man sa katilingban sa katibuk-an,” misulat si Alvin Toffler diha sa iyang librong Future Shock, “kita modangat gayod sa labihan ka dakong . . . kagun-oban.” Kanang pasidaana giluwatan kapig 20 ka tuig nga miagi. Ang kagun-obang gihisgotan ni Toffler morag nagakahitabo na karon mismo.
Samtang kining sigloha hapit nang matapos, ang teknolohikanhong mga kaugmaran ug tawhanong mga pilosopiya napakyas sa pagpatunghag malig-on nga kalibotan. Ang mga paglaom karong bag-o alang sa usa ka bag-ong tibuok-kalibotang kahikayan gipulihan sa kahiubos, ug ang mga kinabuhi sa daghan mius-os na lang ngadto sa matag-adlawng pakigbisog aron mabuhi.
Ang mga estadistika nagpadayag nga ang gintang sa pangabuhi sa dato ug pobre nahimong bung-aw. Usa ka bag-ong pagtuon nagpailang 82.7 porsiento sa bahandi sa kalibotan gipanag-iya sa 20 porsiento lamang sa mga lumolupyo niini. Ikatingala ba diay nga kaylap ang gubat, kagutmanan, sakit, mga kagubot, ug anarkiya diha sa daghang nasod? Ang kabug-at sa pagsagubang sa nagkaus-os nga kalidad sa kinabuhi nagapahinabog dakong kadaot sa mga emosyon sa katawhan. Ingong resulta, bisan ang labing pasukaranang yunit sa katilingban, ang pamilya, nagakadaot.
Bisan pag ang daghan, sama kang Toffler, misugyot nga responsabilidad sa tawo nga “mangita ug bug-os bag-ong mga paagi sa pagkaplag sa kalig-on ug kasegurohan,” ang ebidensiya nagpamatuod nga ang mga tawo walay katakos sa pagtagana sa ilang kaugalingong mga solusyon.
Ang Bugtong Kapaingnan
Ang Balaang Bibliya, nga ang pagsulat niana misugod ug mga 3,500 ka tuig nga miagi, wala mausab latas sa kasiglohan. Ang iyang mga prinsipyo nagpabiling wala-mabalhin. Pananglitan, ang mga pulong sa Jeremias 10:23 napadayag nga labaw pang tinuod kay sukad masukad: “Dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.” Kon ang mga tawo dili makaarang sa pagtultol sa ilang dalan, kinsa may makaarang? Gipunting sa Bibliya ang bugtong Tinubdan sa pagtultol: “Ako, si Jehova, mao ang imong Diyos, ang Usa nga nagatudlo kanimo sa pagpahimulos, ang Usa nga nagapalakaw kanimo sa dalan nga angay nimong pagalaktan.”—Isaias 48:17.
Latas sa mga panid sa Bibliya, si Jehova nga Diyos nagtudlo kanato sa pagtabang sa atong kaugalingon. Puno kinig tambag nga nagpakita kanato sa dalan nga angay natong pagalaktan. Ang tambag niini angayan karong adlawa sama ra sa adlaw nga gisulat kini. Ang mosunod nga artikulo motukib sa pagkapraktikal sa Bibliya alang sa atong modernong panahon. Sa nagkadaiyang mga butang, gikan sa maayong panglawas ngadto sa bahandi, pamilyahanong kinabuhi, ug personal nga kagawian, ikaw makasabot nga ang Bibliya sa pagkatinuod maoy usa ka di-matarog nga bato diha sa mabalhinong balas sa kalibotan karong adlawa.
[Hulagway sa panid 4]
Ang Bibliya maoy usa ka lig-ong angkla sa gubot nga kalibotan karong adlawa