Nakahinumdom Ka Ba?

Nakaplagan ba nimo nga ang dili pa dugayng mga isyu sa Ang Bantayanang Torre may mapuslanong bili alang kanimo? Nan nganong dili sulayan ang imong panumdoman sa mosunod nga mga pangutana:

▫ Nganong ang mga Saksi ni Jehova padayong nagaduaw sa ilang mga silingan?

Buot sa mga Saksi ni Jehova ang panalangin sa Diyos pinaagi sa gisaad nga Gingharian, ug tungod sa gugma alang sa ilang mga silingan, buot nila ang samang panalangin alang kanila. Busa, sa pagsunod sa panig-ingnan ni Jesus, sila natukmod sa dili-mahakogong gugma sa pagduaw sa ilang mga silingan. (Mateo 6:9, 10; 22:37-39)​—8/15, mga panid 8, 9.

▫ Nganong ang pagtuo sa ebolusyon maoy butang sa pagtuo?

Ang mga siyentipiko wala gayod makapaniid sa mga mutation​—bisan gani sa mga beneficial mutation​—nga nagapatunghag bag-ong mga matang sa kinabuhi, apan ang mga ebolusyonista nangangkon nga kini mao gayoy paagi nga mitungha ang bag-ong mga espesye. Wala masaksihi sa mga ebolusyonista ang kinaugalingong pagtungha sa kinabuhi, apan miinsister sila nga kini mao ang paagi sa pagsugod sa kinabuhi.​—9/1, panid 5.

▫ Sa unsang paagi madumala natog maayo ang pagkaluya sa buut nga mosangpot gumikan sa mga restriksiyon sa kinabuhi?

Bisan unsa ang atong kahimtang, kon kita motunong sa pagtagad diha sa kon unsay atong maarangan sa pagbuhat inay magbagulbol bahin sa atong dili maarangan sa pagbuhat, ang kinabuhi mahimong makapatagbaw, ug kita makakaplag ug kalipay diha sa pag-alagad sa Diyos. (Salmo 126:5, 6)​—9/1, panid 28.

▫ Unsa ang mga kaayohan sa pagpasaylo?

Ang pagpasaylo sa uban mopalambo sa maayong mga relasyon (Efeso 4:32); kini mohatag dili lamang kalinaw uban sa mga isigkatawo kondili usab kalinaw sa kahiladman (Roma 14:19; Colosas 3:13-15); ang pagpasaylo sa uban maghatag ug dalan sa atong mga sala nga mapasaylo (Mateo 6:14); usab, kini nagatabang kanato sa paghinumdom nga kita mismo nagkinahanglan sa pagpasaylo. (Roma 3:23)​—9/15, panid 7.

▫ Sa unsang paagi ang panig-ingnan sa manalagnang si Amos motabang kanato diha sa atong kalihokan sa pagsangyaw?

Sama kang Amos, wala nato usba o sambogi ang mensahe sa Diyos. Hinunoa, kita masinundanong nagamantala niana bisan unsa pay reaksiyon sa atong mga tigpatalinghog.​—9/15, panid 17.

▫ Unsang mga hiyas sa Diyos ang angay natong sundogon?

Ang duha ka hinungdanong mga hiyas mao ang organisasyonal nga katakos ni Jehova ug ang iyang kalipay. (1 Corinto 14:33; 1 Timoteo 1:11) Kining mga hiyasa sa Diyos maoy timbang, aron ang usa niini dili mahimong labaw nga magdaot sa laing hiyas.​—10/1, panid 10.

▫ Unsa ang pipila ka positibong mga lakang ang himoon sa mga ginikanan aron tabangan ang ilang mga anak nga makaalagad kang Jehova?

Usa ka hinungdanong yawi mao ang pagsugod ug sayo. Ang mga nasilsil nga mga butang ug mga leksiyon nga nakat-onan sa dihang linghod pa magpabilin sa tibuok kinabuhi. (Proverbio 22:6) Hinungdanon nga tudloan sila sa pagkamasinugtanon ug pagtahod kang Jehova ug sa iyang pagsimba sa tanang tigom. Ang malamposong mga ginikanan nakakat-on sa pag-ila sa daotang mga hilig, ug ilang gitabangan ang ilang mga anak sa pagtul-id niini. (Proverbio 22:15) Sa kataposan, sugdi ug sayo ang pagbutang ug teokratikanhong mga tumong alang sa imong anak nga makataronganon niyang makab-ot.​—10/1, mga panid 27-8.

▫ Unsang talagsaong bahin sa pagpasaylo ni Jehova ang angay natong paningkamotan nga ipadapat?

Si Jehova nagapasaylo ug nagalimot. (Jeremias 31:34) Kini lisod buhaton sa tawhanong mga linalang. Ang bili sa pagbuhat niana maoy gipasiugda ni Jesus, ingon sa narekord sa Mateo 6:14, 15.​—10/15, mga panid 25-6.

▫ Unsa ang tulo ka babag sa atong pagkamabination?

Tungod sa atong makasasalang tawhanong kinaiyahan, ang mga pagbati sa kasina daling makagamot. Kon kita nasina sa usa ka tawo, sa unsang paagi atong matagad siya nga uban ang malumong pagkamabination? Ang dili-kinahanglanong pagladlad sa kapintasan maoy laing babag. Kini motukmod kanato sa pagkadili-mobati sa pag-antos sa uban. Dugang pa, ang usa ka tawong mahunahunaon sa kaugalingon lagmit usab kulang ug pagkamabination. (1 Juan 3:17)​—11/1, panid 19, 20.

▫ Unsang mga pagtulon-an ang makat-onan gikan sa asoy sa Kasulatan maylabot kang Job?

Ang asoy bahin kang Job dugang nga magpamatikod kanato sa mga paagi ni Satanas ug motabang kanato nga makita kon sa unsang paagi ang pagkasoberano ni Jehova sa uniberso nalangkit sa tawhanong pagkamaunongon. Sama kang Job, ang tanan nga nahigugma sa Diyos kinahanglang masulayan. Kita makalahutay usab sama kang Job, nga pamatud-an si Satanas nga bakakon, ug tagamtamon ang mga panalangin sa Gingharian sa Diyos.​—11/15, panid 20.

▫ Sa unsang paagi ang tsirman sa usa ka lawas sa mga ansiano makapakitag hustong pag-ila ngadto sa matag ansiano?

Kon posible ang tsirman kinahanglang motagana ug usa ka hilisgotan nga sayo pa aron adunay panahon ang ubang mga ansiano alang sa mainampingon ug mainampoon nga paghunahuna sa matag punto nga hisgotan. Sa panahon sa miting sa mga ansiano, siya dili maningkamot sa pag-impluwensiya sa hunahuna sa mga ansiano apan dasigon sila sa pagbaton ug “kagawasan sa pagsulti” bahin sa mga butang nga gihisgotan. (1 Timoteo 3:13)​—12/1, panid 30.