Aduna bay mga Manulonda Uban Kanato?
Kalit kaayo kadtong nahitabo. Kay namalandong ug wala magpakabana sa iyang palibot, si Marilynn misubay sa riles sa tren. Sa hinanali, siya nakabatig kusog nga dahunog. Miyahat siya, nga nakadiskobre nga nagtindog siyang direkta sa agianan sa taliabot nga tren! Wala makalihok si Marilynn, nga naparalisar sa kahadlok. Ang tren duol na kaayo nga iyang nakita ang asul nga mga mata ug nalisang nga dagway sa makinista sa tren. Si Marilynn dili gayod makalimot sa sunod nga nahitabo. “Nahisama kadtog usa ka higante ang nagtuklod kanako gikan sa luyo,” matod niya. “Daw milupad ako gikan sa riles sa tren ug nahagbong diha sa mga abo sa karbon sa kilid ra gayod sa riles.” Nga nagarasan ug diyutay, si Marilynn mibakod aron pasalamatan ang iyang manluluwas—apan walay usa nga nakita! Iyang panghinapos? “Ang akong anghel nga magbalantay maoy nagluwas sa akong kinabuhi,” matod ni Marilynn. “Kinsa pay lain nga nagluwas kanako?”
ANG usa ka maduhaduhaong kalibotan kalit nga nalinga sa mga manulonda. Sa di pa dugayng katuigan, ang langitnong mga linalang mao ang ulohan sa mga salida sa telebisyon, mga sine, ug bisan sa usa ka dula sa Broadway. Ang mga libro bahin sa mga manulonda anaa sa itaas sa listahan sa himalitang mga relihiyosong libro. Adunay mga klab labot sa manulonda, mga seminar, ug mga sulat-balita. Ang mga workshop giporma sa pagtabang kanimo—sumala sa giingon sa usa ka artikulo—aron pagpagawas sa “imong ‘manulonda sa kahiladman.’”
Nagpahimulos sa kalihokan labot sa manulonda ang oportunistang mga negosyante nga nagpasundayag ug way-kataposang agos sa mga produkto. “Bisan unsang butang nga may mga manulonda niana maoy hisapian nga paninda,” matod sa kasosyo sa usa ka tindahan sa Tinipong Bansa. Dugang pa sa pagbaligyag daghang libro bahin sa mga manulonda, iyang gilista ang “manulondang mga estatuwa, mga barpin, mga monyeka, mga T-shirt, mga poster ug mga kard sa pangomosta”—ang tanan naghipos sa gitawag sa usa ka magsusulat nga “langitnong mga ganansiya.”
Apan dili lamang kini uso, miinsister ang mga tigpasiugda sa manulonda. Aron suportahan ang ilang pangangkon, ilang gipresentar ang sunodsunod nga mga testimoniya—“tinuod-kinabuhi” nga mga pakigtagbo sa mga manulonda. Giingon sa pipila nga nakakita silag usa ka manulonda sa dagway nga tawo. Ang uban nakakitag kahayag, nakabatig tingog, nakamatikod sa presensiya, o mibatig pag-aghat nga, sa ilang pagtuo, maoy manulondaanon. Daghan, sama kang Marilynn, nag-ingon nga usa ka manulonda ang nagluwas sa ilang kinabuhi.
Unsay nagakahitabo? “Sa akong hunahuna adunay pagbutho sa espirituwalidad,” matod ni Joan Wester Anderson, kinsa nakasulat ug duha ka libro bahin sa “supernatural” nga mga pakigtagbo. Si Alma Daniel, kinsa mitabang pagsulat ug laing libro, nagpahayag ug labaw pa. Siya nag-ingon nga ang mga manulonda “karon gipahimangnoan nga ipaila ang ilang kaugalingon aron maabot ang daghan ug daghan pang tawo. Ang katarongan nga daghan kanila ang atong nakit-an mao nga gusto nila kana. Sila ang naghimo niini.”
Tinuod ba kini? O adunay lain pa luyo sa pagkalinga karon bahin sa mga manulonda? Aron masuta, kinahanglan nga atong susihon ang Pulong sa Diyos. Anaa sa Bibliya ang kamatuoran bahin sa mga manulonda, sumala sa ato unyang makita.
[Picture Credit Line sa panid 2]
Panid 3 ug 4: The New Testament: A Pictorial Archive from Nineteenth-Century Sources, by Don Rice/Dover Publications, Inc.