Ang Kamatuoran Mahitungod sa mga Manulonda

Ang pagkaila sa usa sagad nga naglakip sa kasayoran bahin sa iyang pamilya. Susama kini sa pagkaila kang Jehova nga Diyos. Labaw pa ang nalangkit kay sa pagkahibalo lamang sa iyang ngalan. Kinahanglan usab nga kita dunay kasayoran mahitungod sa iyang “pamilya” sa langit. (Itandi ang Efeso 3:14, 15.) Ang Bibliya nagtawag sa mga manulonda ingong “mga anak” sa Diyos. (Job 1:6) Sa pagtagad sa ilang hinungdanong papel diha sa Bibliya, buot natong masayod ug labaw pa mahitungod kanila aron masabtan ang ilang dapit diha sa katuyoan sa Diyos.

USA ka bag-ong gamayng grupo ang nagakaugmad. Dili lamang kay daghang tawo ang nagaingon nga nagtuo sila sa mga manulonda; usa ka nagatubong gidaghanon ang nangangkon nga apektado sila niini nila sa usa ka paagi. Sa dihang gipangutana ang 500 ka Amerikano, “Sa personal ba gibati nimo sukad nga dunay manulonda sa imong kinabuhi?” halos tersiya ang mitubag ug oo. Katingad-an usab nga daghang batan-on ang nangangkong nagtuo nga dunay mga manulonda​—sumala sa usa ka surbi sa Tinipong Bansa, usa ka sirado 76 porsiento! Dayag, ang mga tawo interesado sa mga manulonda. Apan sa unsang paagi ang panghunahuna karon bahin sa mga manulonda mosibo sa kamatuoran sa Bibliya?

Pagpalubog sa Papel ni Satanas

Sa paghisgot sa mga manulonda, kinahanglang dili nato kalimtan ang daotang mga manulonda, langitnong mga linalang nga giingon sa Bibliya mirebelde batok sa Diyos. Ang nanguna kanila mao si Satanas. Usa ka popular nga basahong nag-ulohang Ask Your Angels nagsugyot nga si Satanas usa lamang ka “dagway sa Diyos” nga nagatabang sa mga tawo aron molig-on ang ilang “espirituwal nga mga muskolo” pinaagi sa makanunayong pagsulay. Bisan pa sa “mahigugmaong mga katuyoan” ni Satanas, ang mga awtor nagpahayag, latas sa daghang siglo nasaypan siya ingong daotan. Sila midugang nga si Satanas ug si Jesus, “bisan pag dili eksaktong nagkomplementohay sa usag-usa, sa labing menos nagbarog sa samang kiliran, di-malaksing mga bahin sa mao rang persona.” Kini maoy katingad-ang mga pagpatuo, apan unsay ginaingon sa Bibliya?

Gitin-aw sa Bibliya nga si Satanas dili “usa ka dagway sa Diyos” kondili usa ka kaaway sa Diyos. (Lucas 10:18, 19; Roma 16:20) Iyang gisuklan ang pagkasoberano ni Jehova, ug ang iyang mga katuyoan sa tawo maoy dili “mahigugmaon.” Sa kawalay kaluoy iyang gipahimungtan ang yutan-ong mga alagad sa Diyos. Gisumbong niya sila sa atubangan sa Diyos sa adlaw ug sa gabii!a (Pinadayag 12:10, 12, 15-17) Buot gayod silang daoton ni Satanas bisag unsay sangpotanan. Ang iyang walay-kaluoy nga paglutos sa matarong nga tawo nga si Job nagyagyag sa iyang walay-pagbati nga tinamdan bahin sa pag-antos sa tawo.​—Job 1:13-19; 2:7, 8.

Tino nga wala “magbarog sa samang kiliran,” si Satanas ug si Jesus hingpit nga magkaaway. Aw, sa walay duhaduha gihulhogan ni Satanas si Herodes aron momando nga patyon ang daghang bata​—sa tinguha nga mapatay ang batang si Jesus! (Mateo 2:16-18) Ug ang walay hunong nga mga pag-atake ni Satanas nagpadayon hangtod mismo sa kamatayon ni Jesus. (Lucas 4:1-13; Juan 13:27) Mao nga, inay mahimong “di-malaksing mga bahin sa mao rang persona,” si Jesus ug si Satanas maoy hingpit nga magkasukwahi. Gipakita sa propesiya sa Bibliya nga ang ilang away dili kalikayan. (Genesis 3:15) Haom, ang gibanhawng si Jesus maoy molaglag kang Satanas sa nahaigong panahon sa Diyos.​—Pinadayag 1:18; 20:1, 10.

Mga Pag-ampo Kang Kinsa?

Ang pila ka tigpaluyo sa kalihokan labot sa manulonda nagrekomendar sa meditasyon ug ubang mga teknik aron makigkomunikar sa mga manulonda. “Ang sinserong hangyo alang sa kontak uban sa bisan unsang miyembro sa langitnong pamilya dili igasalikway,” matod sa usa ka basahon. “Pangayo ug kamo pagatubagon.” Si Miguel, Gabriel, Uriel, ug Rafael nahilakip sa mga manulondang girekomendar sa basahon nga konsultahon.b

Hinunoa, gitudloan ni Jesus ang iyang mga sumusunod sa pag-ampo ngadto sa Diyos, dili ngadto sa mga manulonda. (Mateo 6:9, 10) Sa susama, si Pablo nagsulat: “Sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya ngadto sa Diyos.” (Filipos 4:6) Busa, sa ilang mga pag-ampo ang mga Kristohanon dili moduol kang bisan kinsa gawas kang Jehova, ug ila kining himoon diha sa ngalan ni Jesu-Kristo.c​—Juan 14:6, 13, 14.

Wala bay Denominasyon ang mga Manulonda?

Sumala kang Eileen Elias Freeman, nga nagdumala sa AngelWatch Network, “ang mga manulonda mopaibabaw sa tanang relihiyon, tanang pilosopiya, tanang tinuhoan. Sa pagkatinuod, ang mga manulonda walay relihiyon sumala sa atong nahibaloan kini.”

Hinunoa, ang Bibliya nagpatin-aw nga ang matinumanong mga manulonda dunay relihiyon; sila nagasimba sa matuod nga Diyos, si Jehova, nga dili motugot ug pakig-indig gikan sa ubang mga diyos. (Deuteronomio 5:6, 7; Pinadayag 7:11) Mao nga, ang maong usa ka manulonda naghubit sa kaugalingon niini kang apostol Juan ingong “isigkaulipon” niadtong nagasugot sa mga mando sa Diyos. (Pinadayag 19:10) Wala kitay mabasa sa Bibliya mahitungod sa matinumanong mga manulonda nga nagtuboy sa ubang matang sa pagsimba. Sila naghatag kang Jehova ug eksklusibong debosyon.​—Exodo 20:4, 5.

“Ang Amahan sa Bakak”

Daghang gikaingong mga pakigtagbo sa manulonda naglangkit sa komunikasyon uban sa mga patay. “Gibati nako nga ang akong uyoan nakakitag paagi sa pag-abot kanako ug pagpahibalo kanako nga sa kataposan siya malipayon na,” matod sa usa ka babaye nga ginganlag Elise human madawat ang butang nga iyang gituohang usa ka timailhan. Si Terri sa susamang paagi nahinumdom sa usa ka mitaliwang minahal nga higala. “Usa ka semana human sa lubong,” matod niya, “miduol siya kanako sa paagi nga abi nako kon usa kadto ka damgo. Iya akong giingnan nga dili ako angay magbangotan tungod sa iyang pagtaliwan, tungod kay siya malipayon ug malinawon.”

Apan ang Bibliya nagaingon nga ang mga patay “walay kasayoran sa bisan unsa.” (Ecclesiastes 9:5) Kini usab nag-ingon nga sa dihang mamatay ang usa ka tawo, “nianang maong adlaw ang iyang hunahuna mawala.” (Salmo 146:4) Hinunoa, si Satanas mao “ang amahan sa bakak.” (Juan 8:44) Siya ang nagmugna sa kabakakan nga ang tawhanong kalag magpabiling buhi human sa kamatayon. (Itandi ang Ezekiel 18:4.) Daghang tawo karon nagtuo niini, nga nahiangay sa katuyoan ni Satanas, tungod kay kini supak man sa panginahanglang motuo sa pagkabanhaw​—usa ka pundamental nga doktrina sa Kristiyanidad. (Juan 5:28, 29) Busa, ang pagpakisayod sa mga patay o ang pagkadawat kunohay ug mga mensahe gikan kanila maoy lain pang dagway sa kalihokan labot sa manulonda nga wala uyoni sa Diyos.

Pagduol sa mga Manulonda o sa mga Demonyo?

Ang kadaghanan sa kalihokan labot sa manulonda karon nalangkit sa okulto. Tagda ang kasinatian ni Marcia. “Gikan sa Septiyembre ngadto sa Disyembre 1986,” matod niya, “nagsugod akog dawat ug mga mensahe gikan ‘sa dili-kinaiyanhong tinubdan.’ Nakakita akog mga panan-awon ug nagdamgog talagsaong mga damgo sa ‘kanhiayng kinabuhi.’ Nakontak nako ang mga higala nga namatay ug daghan pa akog naeksperyensiyahang mga katingad-ang hitabo diin masayran nako ang mga butang mahitungod sa mga tawo nga bag-o lang nako nahibalag. Nabulahan usab ako nga makabaton ug gasa sa awtomatikong pagsulat ug nakapadalag mga mensahe gikan sa mga patay. Ang pipila, nga wala nako mahibalag niadtong buhi pa sila, mopadalag mensahe ngadto sa ubang tawo pinaagi kanako.”

Ang paggamit ug pagpanagna ingong paagi sa “pagpakigkomunikar” sa mga manulonda maoy kasagaran. Usa ka basahon prangkang nagdasig sa mga tigbasa niini nga mogamit ug mga rune stone, mga kard nga tarot, I Ching nga mga sensilyo, panghimalad, ug astrolohiya. “Tugoti ang nagatugkad sa kahiladman nimong kaugalingon nga agakon ka ngadto sa hustong panagna,” sulat sa mga awtor, “ug saligi nga usa ka manulonda ang motagbo kanimo didto.”

Hinunoa, sumala sa Bibliya ang bisan unsang ‘motagbo kanimo didto’ sa walay duhaduha maoy dili usa sa mga manulonda sa Diyos. Ngano? Tungod kay ang pagpanagna dayag nga supak sa Diyos, ug ang matuod nga mga magsisimba​—sa langit ug sa yuta​—walay kalabotan niini. Aw, sa Israel ang pagpanagna maoy sala nga kamatayon ang silot! “Ang tanan nga nagabuhat niining mga butanga maoy usa ka butang nga dulumtanan kang Jehova,” sumala sa Balaod.​—Deuteronomio 13:1-5; 18:10-12.

‘Usa ka Manulonda sa Kahayag’

Dili kita angay matingala nga mahimong pagawason sa Yawa nga makaayo ang pagpanagna, gani usa ka butang nga gikan sa manulonda. Ang Bibliya nag-ingon nga si Satanas “mismo kanunayng nagahimo sa iyang kaugalingon nga usa ka anghel sa kahayag.” (2 Corinto 11:14) Gani makagamagama siyag mga tilimad-on ug dayon pahinaboon kana, nga gilimbongan ang mga tumatan-aw ngadto sa paghunahuna nga ang tilimad-on nagagikan sa Diyos. (Itandi ang Mateo 7:21-23; 2 Tesalonica 2:9-12.) Apan ang tanang buhat ni Satanas​—bisag unsa pa ka maayo o unsa ka daotan kini sila—​nagsilbi sa usa sa duha ka katuyoan: sa pagpaliso sa mga tawo batok kang Jehova o yanong butaan ang ilang mga panghunahuna aron nga ‘ang banwag sa mahimayaong maayong balita bahin sa Kristo dili makalapos paglamdag.’ (2 Corinto 4:3, 4) Kining ulahing paagi sa paglimbong maoy subsob nga labing epektibo.

Tagda ang asoy sa Bibliya mahitungod sa usa ka sulugoong babaye niadtong unang siglo. Ang iyang mga panagna nakadalag dakong salapi ngadto sa iyang mga agalon. Sulod sa daghang adlaw iyang gisundan ang mga tinun-an, nga nag-ingon: “Kining mga tawhana maoy mga ulipon sa Labing Hataas nga Diyos, kinsa nagamantala kaninyo sa dalan sa kaluwasan.” Ang iyang gipamulong tinuod. Apan, ang asoy nagatug-an kanato nga siya gigamhan, dili sa usa ka manulonda, kondili sa “usa ka demonyo sa pagpanagna.” Sa kataposan, si Pablo “miliso ug miingon ngadto sa espiritu: ‘Ako nagamando kanimo sa ngalan ni Jesu-Kristo sa paggula kaniya.’ Ug kini migula nianang taknaa mismo.”​—Buhat 16:16-18.

Nganong gipalagpot ni Pablo kining maong espiritu? Total, kini nakahatag ug dakong kita ngadto sa mga agalon sa gigamhan-sa-demonyo nga babaye. Pinaagi sa dili-kinaiyanhong mga gahom, ang sulugoong babaye mahimong nakasulti sa mga mag-uuma kon kanus-a magpugas, sa mga dalaga kon kanus-a magminyo, ug sa mga minero kon asa mangitag bulawan. Nan, kining maong espiritu nagpalihok pa gani sa batang babaye sa pagsultig pipila ka mga pulong sa kamatuoran, sa publikong pagdayeg sa mga tinun-an!

Bisan pa niana, kadto maoy “usa ka demonyo sa pagpanagna.” Ingong demonyo, wala siyay katungod sa pagpahayag mahitungod kang Jehova ug sa iyang tagana alang sa kaluwasan. Ang madayegong mga pulong niini, tingali aron himoong katuhoan ang mga panagna sa sulugoong batang babaye, nakapalinga sa mga tig-usyoso gikan sa tinuod nga mga sumusunod ni Kristo. Uban sa maayong katarongan, gipasidan-an ni Pablo ang mga taga-Corinto: “Dili kamo mahimong magaambit sa ‘lamesa ni Jehova’ ug sa lamesa sa mga demonyo.” (1 Corinto 10:21) Dili ikatingala, ang unang-siglong mga Kristohanon nagsunog sa tanan nilang mga basahon nga nalangkit sa pagpanagna.​—Buhat 19:19.

Usa ka ‘Manulonda nga Nagalupad sa Katung-ang Langit’

Ingon sa atong nakita, ang Bibliya nagyagyag ug dako sa kalihokan sa manulonda karon ingong nalangkit ug suod kaayo sa Kaaway sa Diyos, si Satanas nga Yawa. Kini ba nagpasabot nga ang balaang mga manulonda wala malangkit sa mga kalihokan sa tawo? Sa kasukwahi, sila karon nagabuhat sa usa ka gamhanang buluhaton sa yuta. Unsa kana? Sa pagtubag, kinahanglang tan-awon nato ang basahon sa Bibliya nga Pinadayag. Ang mga manulonda gihisgotan ug daghang beses niining maong basahon kay sa bisan haing ubang basahon sa Bibliya.

Sa Pinadayag 14:6, 7, atong mabasa ang rekord ni apostol Juan mahitungod sa usa ka matagnaong panan-awon nga iyang nadawat: “Nakita ko ang laing anghel nga nagalupad sa katung-ang langit, ug siya adunay walay-kataposang maayong balita nga ipahayag ingon nga makangayang mensahe ngadto sa mga nagapuyo sa yuta, ug ngadto sa matag nasod ug tribo ug dila ug katawhan, nga sa makusog nga tingog nagaingon: ‘Kahadloki ninyo ang Diyos ug ihatag kaniya ang himaya, tungod kay ang takna sa iyang paghukom miabot na, ug busa simbaha ang Usa nga naghimo sa langit ug sa yuta ug dagat ug mga tuboran sa mga tubig.’”

Kining maong teksto nagpasiugda sa labing mahinungdanong buluhaton sa mga manulonda karong adlawa. Sila nalangkit sa usa ka unahonong asaynment​—kana mao ang pagpahayag sa maayong balita sa Gingharian sa Diyos. May kalabotan niining maong buluhaton nga si Jesus nagsaad sa iyang mga sumusunod: “Ako uban kaninyo sa tanang mga adlaw hangtod sa katiklopan sa sistema sa mga butang.” (Mateo 28:18-20) Sa unsang paagi si Jesus uban sa iyang mga sumusunod? Usa ka paagi mao ang pagtagana kanila ug tabang pinaagi sa manulonda aron nga kining dako kaayong buluhaton mahimong matuman.

Ang mga Saksi ni Jehova naggugol ug kapin sa usa ka bilyong oras matag tuig nga nagawali sa maayong balita sa Gingharian sa Diyos. Samtang nagtuman niining maong buluhaton, nakakita silag pamatuod sa manulondaanong direksiyon. Sa ilang pultahan-ngadto-pultahan nga ministeryo, subsob nga mahitabo nga sila makakontak ug mga indibiduwal nga bag-o lang nag-ampo alang sa usa nga motabang kanila nga masabtan ang mga katuyoan sa Diyos. Ang manulondaanong giya, uban sa kaugalingong inisyatibo sa mga Saksi, misangpot sa gatosan ka libo nga nakakat-on kang Jehova matag tuig!

Ikaw ba nagapaminaw sa manulonda nga nagalupad sa katung-ang langit? Sa dihang moduaw ang mga Saksi ni Jehova, nganong dili makighisgot uban kanila nga mas bug-os pa niining manulondaanong mensahe?

[Mga footnote]

[Kahon sa panid 8]

KINSA ANG MGA MANULONDA?

SUKWAHI sa gituohan sa daghan, ang mga manulonda dili mao ang mibulag nga mga kalag sa mga tawo nga namatay. Tin-awng giingon sa Bibliya nga ang mga patay “wala mahibalo sa bisan unsa.” (Ecclesiastes 9:5) Nan, diin ba diay gikan ang mga manulonda? Gipaila sa Bibliya nga gilalang sila sa Diyos nga tinagsatagsa sa wala pa matukod ang yuta. (Job 38:4-7) Ang gidak-on sa langitnong pamilya sa Diyos tingali maoy ginatos ka milyon, nga tingali bilyonbilyon o mas daghan pa! Ang ubang mga manulonda miduyog kang Satanas sa iyang rebelyon.​—Daniel 7:10; Pinadayag 5:11; 12:7-9.

Sanglit si Jehova maoy Diyos sa kahusay, dili katingad-an nga organisado ang iyang dako kaayong pamilya sa mga manulonda.​—1 Corinto 14:33.

• Ang kinalabwang manulonda, sa gahom ug awtoridad, mao ang arkanghel, si Jesu-Kristo, nga ginganlan usab ug Miguel. (1 Tesalonica 4:16; Judas 9) Ubos sa iyang pagbulot-an mao ang mga serapin, kerubin, ug mga manulonda.

• Ang mga serapin nagaalagad sa trono sa Diyos. Ang ilang buluhaton dayag naglangkit sa pagpahayag sa pagkabalaan sa Diyos ug pagtipig sa iyang katawhan nga mahinlo.​—Isaias 6:1-3, 6, 7.

• Ang mga kerubin makita usab diha sa presensiya ni Jehova. Ingong mga magdadala o mga eskorte sa trono sa Diyos, sila nagtuboy sa pagkahalangdon ni Jehova.​—Salmo 80:1; 99:1; Ezekiel 10:1, 2.

• Ang mga manulonda (nga nagkahulogang “mga mensahero”) maoy mga ahente ug mga diputado ni Jehova. Sila nagtuman sa balaang kabubut-on, kon kaha naglangkit kana sa pagluwas sa katawhan sa Diyos o paglaglag sa mga tuman-kadaotan.​—Genesis 19:1-26.

[Hulagway sa panid 7]

Ikaw ba nagapaminaw sa manulonda nga nagalupad sa katung-ang langit?