Pagkatago sa Ngalan sa Ginoo
ANG usa ka pag-atake sa makahilong gas diha sa usa ka subwey sa Tokyo, Hapon, niadtong Marso 1995 mipatay ug 12 ka tawo, nakapaluya sa linibong dugang pa, ug mitabang sa pagpadayag ug tinagoan. Ang relihiyosong sekta nga nailhang Aum Shinrikyo (Supremong Kamatuoran) tinagong nagtigom ug gas nga sarin nga gamiton sa pagpangagpas sa misteryosong mga tumong.
Usa ka bulan sa ulahi ang usa ka pagbuto sa bomba naggun-ob sa usa ka pederal nga tinukod sa Siyudad sa Oklahoma, T.B.A., ug mipatay sa 167 ka tawo. Ang ebidensiya daw nagpakita nga ang pag-atake sa usa ka paagi konektado sa panagbangi sa gobyerno ug sa Branch Davidian nga relihiyosong kulto sa Waco, Texas, eksaktong duha ka tuig nga sayosayo pa. Niadtong panahona mga 80 ka membro sa kulto ang nangamatay. Ang pagbuto sa bomba nagpadayag usab sa kon unsay wala mahibaloi sa kadaghanang tawo: Daghang paramilitar nga mga grupong sundalo nagalihok karon sa Tinipong Bansa, labing menos ang pipila kanila gidudahan nga tinagong nagplano ug aksiyon batok sa gobyerno.
Sa ulahi, samtang naghinapos ang 1995, ang nasunog nga mga lawas sa 16 ka tawo nakaplagan sa lasang duol sa Grenoble, Pransiya. Sila maoy mga membro sa Orden sa Solar nga Templo, usa ka gamayng relihiyosong kulto nga sa Oktubre 1994 nabalita sa Switzerland ug Canada sa dihang 53 sa mga membro niini naghikog o gipamatay. Apan bisan human niining maong trahedya, ang sekta nagpadayon sa paglihok. Karong adlawa ang panukmod ug mga tumong niini nagpabiling tinagoan.
Ang Kapeligrohan sa Relihiyosong Pagkatinago
Tungod sa maong mga panghitabo, ikahibulong ba nga daghang tawo ang mabinantayon sa relihiyosong mga grupo? Sa pagkatinuod walay usa ang buot mosuportar ug usa ka tinagong organisasyon—relihiyoso o dili-relihiyoso—nga sayop nga naggamit sa iyang pagsalig ug magpahinabo kaniya nga mangagpas sa mga tumong nga wala niya mauyoni. Hinunoa, unsay mahimo sa mga tawo aron malikayan nga mahulog sa bitik nga malangkit sa tinagong mga kapunongan nga kaduhaduhaan ang kinaiya?
Dayag, ang si bisan kinsang naghunahuna nga magpamembro sa usa ka tinago nga kapunongan maalamong magsusi una sa tinuod nga mga tumong niini. Ang pagpugos sa mga higala ug mga kaila kinahanglang bantayan, ug ang mga desisyon kinahanglang ipasikad dili sa pagbati kondili sa mga kamatuoran. Hinumdomi, lagmit ang indibiduwal mismo—dili ang uban—ang mag-antos sa bisan unsang sangpotanan.
Ang pagsunod sa mga prinsipyo sa Bibliya mao ang labing segurong paagi sa paglikay sa peligrosong mga grupo kansang mga motibo dili dungganon. (Isaias 30:21) Kini naglakip sa pagpabiling neyutral sa politika, pagpakitag gugma sa uban, bisan sa mga kaaway, paglikay sa “mga buhat sa unod,” ug pag-ugmad sa mga bunga sa espiritu sa Diyos. Labaw sa tanan, ang matuod nga mga Kristohanon kinahanglang dili bahin sa kalibotan, maingon nga si Jesus dili bahin, ug kining dalana maoy pasiuna sa pag-apil sa tinagong mga kapunongan sa kalibotan.—Galacia 5:19-23; Juan 17:14, 16; 18:36; Roma 12:17-21; Santiago 4:4.
Ang mga Saksi ni Jehova maoy sinserong mga estudyante sa Bibliya nga nag-isip sa ilang relihiyon nga hinungdanon ug dayag nga naningkamot sa pagkinabuhi sumala niana. Sa tibuok kalibotan, sila nailhan ingong relihiyosong grupo nga ‘nagapangita sa pakigdait ug nagapangagpas niini.’ (1 Pedro 3:11) Ang ilang libro nga Mga Saksi ni Jehova—Mga Magmamantala sa Gingharian sa Diyos tukmang nag-ingon: “Ang mga Saksi ni Jehova sa bisan unsang diwa dili usa ka tinago nga kapunongan. Ang ilang pinasikad-sa-Bibliya nga mga pagtulon-an bug-os nga gisaysay sa mga publikasyon nga mabatonan ni bisan kinsa. Dugang pa, sila naningkamot pag-ayo sa pagdapit sa publiko sa pagtambong sa mga tigom aron makita ug madungog mismo kon unsay nagakahitabo.”
Ang matuod nga relihiyon dili gayod tinagoan. Ang mga magsisimba sa matuod nga Diyos gisugo nga dili itago ang ilang pagkamao o ililong ang ilang katuyoan ingong mga Saksi ni Jehova. Ang unang mga tinun-an ni Jesus nagpuno sa Jerusalem sa ilang pagtulon-an. Dayag ang ilang mga pagtulon-an ug kalihokan. Mao usab ang mga Saksi ni Jehova karon. Masabot, sa dihang ang diktador nga mga rehimen sayop nga magkuto sa kagawasan sa pagsimba, ang mga Kristohanon kinahanglang mainampingon ug maisogong magpadayon sa ilang kalihokan, nga magtuman sa “Diyos ingong magmamando kay sa mga tawo,” usa ka kahimtang nga gipugos diha kanila tungod sa ilang maisogong publikong pagsangyaw.—Buhat 5:27-29; 8:1; 12:1-14; Mateo 10:16, 26, 27.
Kon ugaling misantop sa imong hunahuna nga ang mga Saksi ni Jehova maoy usa tingali ka tinago nga kulto o sekta, lagmit tungod kana kay diyutay ka lang ug nahibaloan mahitungod kanila. Mao gayod kana ang kahimtang sa daghan sa unang siglo.
Ang Buhat kapitulo 28 naghisgot kanato bahin sa usa ka panagkatigom ni apostol Pablo sa Roma uban “ang pangunang mga lalaki sa mga Hudiyo.” Sila miingon kaniya: “Among gihunahuna nga husto nga maminaw gikan kanimo kon unsay imong mga hunahuna, kay sa pagkamatuod mahitungod niini nga sekta nahibaloan namo nga sa bisan diin kini ginasultihan ug pagbatok.” (Buhat 28:16-22) Sa pagtubag, “gipatin-aw [ni Pablo] kanila ang mga butang pinaagi sa paghatag ug bug-os nga pagpanaksi mahitungod sa gingharian sa Diyos,” ug “ang pipila misugod sa pagtuo.” (Buhat 28:23, 24) Kini maoy alang gayod sa ilang dumalayong kaayohan nga makuha ang aktuwal nga mga kamatuoran mahitungod sa matuod nga Kristiyanidad.
Tungod kay sila dedikado sa dayag ug publikong pag-alagad sa Diyos, ang mga Saksi ni Jehova malipay sa pagpadayag sa yanong mga kamatuoran sa ilang kalihokan ug mga pagtulon-an ngadto kang bisan kinsa nga buot masayod sa mga kamatuoran. Nganong dili magsusi mismo, sa ingon maanaa sa kahimtang nga tukmang nahibalo sa ilang pagtuo?
[Hulagway sa panid 6]
Ang mga Saksi ni Jehova malipay sa pagpadayag kon kinsa sila ug kon unsay ilang ginabuhat