Mga Magmamantala sa Gingharian Nagtaho

Mga Batan-ong Nagadayeg sa Diyos sa Demokratikanhong Republika sa Congo

KASIGLOHAN kanhi, ang salmista mainitong nagdapit sa mga batan-on nga moduyog sa pagdayeg sa Hari sa kahangtoran: “Kamong mga batan-ong lalaki ug usab kamong mga ulay, kamong tigulang nga mga lalaki uban sa mga batang lalaki . . . , dayega ang ngalan ni Jehova, kay ang iyang ngalan lamang ang hataas uyamot.” (Salmo 148:​12, 13) Ang mosunod nga mga kasinatian gikan sa Demokratikanhong Republika sa Congo nagpasiugda niining walay katumbas nga pribilehiyo.

• Ang tag-iya sa balay nga giabangan sa usa ka espesyal payunir nakadayeg sa panggawi sa mga Saksi ni Jehova. Busa iyang gitugotan ang mga Saksi nga tun-an sa Bibliya ang iyang singko-anyos nga batang babaye, si Fifi. Human makamatikod sa pag-uswag ni Fifi sa pagtuon sa Akong Basahon sa mga Estorya sa Bibliya,a gitugotan siya sa iyang amahan sa pagtambong sa mga tigom sa Kingdom Hall. Didto, ang batang si Fifi nakakat-on sa mga awit sa Gingharian gikan sa alawiton sa mga Saksi. Siya ilabinang nakagusto sa awit numero 4, nga nag-ulohang “Saad sa Diyos sa Paraiso.”

Usa ka adlaw ang amahan ni Fifi mihukom sa pagdala kaniya ngadto sa iyang simbahan. Sa kahibulong sa tanan, si Fifi midumili sa pag-awit sa mga awit sa simbahan. Ngano? Tungod kay gibati niya nga ang mga awit nga giawit sa simbahan sa iyang amahan wala mahiuyon sa iyang nakat-onan gikan sa iyang pagtuon sa Bibliya. Sa kamaisogon, siya miawit hinuon sa iyang paboritong awit sa Gingharian.

Human sa ubay-ubayng wala molampos nga mga pagsulay sa pag-usab sa iyang hunahuna, ang mga lider sa simbahan mihukom sa pagpalagpot sa singko-anyos nga si Fifi! Bisan pa niining dili maayong pagtratar, ang iyang amahan nagpabiling kalmado. Siya mapasigarbohon nga si Fifi mibarog nga malig-on sa kon unsay iyang gituohan. Buot sa amahan ug inahan ni Fifi nga magpadayon siya sa pagpakig-uban sa mga Saksi ni Jehova.

• Sa dihang ang tin-edyer nga batang lalaki nga ginganlag Lukodi mihukom sa pagtuon sa Bibliya uban sa mga Saksi ni Jehova, ang iyang amahan supak kaayo. Sa usa ka okasyon sa dihang si Lukodi andam na sa pagtambong sa tigom sa Kingdom Hall, gihulga siya ug sundang sa iyang amahan. Sa laing okasyon ang amahan ni Lukodi nagbunal kaniya pinaagig lipak, nga nakasamad ug lalom sa iyang likod. Bisan pa sa grabeng pagsupak, si Lukodi nagpabiling malig-on sa iyang desisyon nga mahimong usa sa mga Saksi ni Jehova. Siya nagpadayon sa pag-uswag ug nabawtismohan. Karon siya nag-alagad ingong usa ka regular payunir.

Si Sona, manghod nga babaye ni Lukodi, nakadayeg kaayo sa baroganan sa iyang igsoon nga siya usab nagtuon sa Bibliya uban sa mga Saksi ni Jehova. Aron mapugngan siya sa pagtuon, hinunoa, ang ilang amahan nagpadala kang Sona sa eskuylahan sa laing balangay, diin walay mga Saksi. Bisan pa niana, gihimong batasan ni Sona ang paghisgot ngadto sa uban bahin sa mga butang nga iyang nakat-onan. Ingong resulta, ang iyang ig-agaw nahimong interesado usab.

Sa dihang nadungog sa mga Saksi gikan sa kasikbit nga balangay ang bahin sa kalihokan sa pagsangyaw ni Sona, sila miduaw kaniya ug naghikay alang kaniya ug usa ka regular nga pagtuon sa Bibliya sa balay. Siya nagpadayon sa pag-uswag ug wala madugay miduyog sa iyang igsoong lalaki ingong dedikado, bawtismadong Saksi ni Jehova. Dugang pa, ang iyang ig-agaw usa na karon ka di-bawtismadong magmamantala, ug usa ka pagtuon sa libro ang ginahimo diha niini nga balangay.

Pagkakahibulongan ug pagkamakapadasig sa dihang ang mga batan-on moduyog sa pagdayeg sa ngalan ni Jehova!

[Mga footnote]