Mga Lalaking “May mga Pagbating Sama sa Atoa”

SIYA usa ka hari ug manalagna apan usab usa ka mahigugmaong amahan. Usa sa iyang mga anak nagdako nga nahimong walay pulos ug mapahitas-on. Sa usa ka determinadong pagsulay nga ilogon ang trono, kining maong anak naglansad ug usa ka sibil nga gubat, nga may katuyoang patyon ang iyang amahan. Apan sa gubat nga misunod, ang anak maoy namatay. Sa dihang nahibaloan sa amahan nga namatay ang iyang anak, siya miadto sa lawak-sa-atop nga nag-inusara ug mihilak: “Anak kong Absalom, anak ko, anak kong Absalom! Oh nga ako unta ang namatay, ako mismo, inay ikaw, Absalom anak ko, anak ko!” (2 Samuel 18:33) Ang amahan mao si Haring David. Sama sa ubang mga manalagna ni Jehova, siya maoy “usa ka tawo nga may mga pagbating sama sa atoa.”​—Santiago 5:17.

Sa panahon sa Bibliya ang mga lalaki ug mga babaye nga namulong alang kang Jehova maoy gikan sa tanang kahimtang sa kinabuhi ug maoy ordinaryong mga tawo. Sama kanato, sila may mga problema ug nag-antos tungod sa mga pagkadi-hingpit. Kinsa ang pipila sa maong mga manalagna, ug sa unsang paagi ang ilang mga pagbati sama sa atoa?

Si Moises Nagbag-o Gikan sa Sobrang Pagsalig Ngadto sa Pagkamaaghop

Si Moises maoy usa ka prominenteng manalagna sa una-Kristohanong kapanahonan. Bisag nag-edad ug 40 anyos, hinunoa, siya dili pa andam sa pag-alagad ingong tigpamaba ni Jehova. Ngano? Samtang ang iyang mga igsoon gidaogdaog ni Paraon sa Ehipto, si Moises gipadako sa panimalay ni Paraon ug maoy “gamhanan sa iyang mga pulong ug mga buhat.” Ang rekord mitug-an kanato: “Siya nagdahom nga ang iyang mga igsoon makasabot nga ang Diyos nagahatag kanilag kaluwasan pinaagi sa iyang kamot.” Sa sobrang pagsalig, siya milihok nga agresibo sa pagpanalipod sa usa ka Hebreohanong ulipon, nga mipatay sa usa ka Ehiptohanon.​—Buhat 7:​22-​25; Exodo 2:​11-​14.

Niadtong tungora si Moises napugos sa pagkalagiw, ug siya migugol sa sunod upat ka dekada ingong usa ka magbalantay sa halayong Midian. (Exodo 2:15) Sa natapos ang maong panahon, si Moises, nga niadtong tungora 80 anyos na, gisugo ni Jehova ingong usa ka manalagna. Apan si Moises dili na sobra ka masaligon. Gibati gayod niya nga dili-takos sa pagkaagi nga iyang gikuwestiyon ang pagsugo ni Jehova kaniya isip usa ka manalagna, nga migamit sa mga ekspresyong sama sa, “Kinsa ba ako nga ako moadto kang Paraon?” ug, “Unsay akong ipamulong?” (Exodo 3:​11, 13) Pinaagi sa mahigugmaong pasalig ug tabang ni Jehova, si Moises nagpadayon sa pagtuman sa iyang tinudlong buluhaton nga may dakong kalamposan.

Ikaw ba, sama kang Moises, nagtugot sukad sa sobrang pagsalig nga motultol kanimo sa pagbuhat o pagsulti sa mga butang nga napamatud-ang dili maalamon? Kon mao, dawata ang dugang pagbansay uban ang pagkamapaubsanon. O gibati ba nimong dili-takos sa pagtuman sa pipila ka Kristohanong mga kaakohan? Imbes nga mobalibad, dawata ang tabang nga gitanyag ni Jehova ug sa iyang organisasyon. Ang Usa nga mitabang kang Moises makatabang usab kanimo.

Si Elias May mga Pagbating Sama sa Atoa sa Panahon sa Pagdisiplina

“Si Elias usa ka tawo nga may mga pagbating sama sa atoa, apan diha sa pag-ampo siya miampo nga dili moulan; ug wala moulan sa yuta sulod sa tulo ka tuig ug unom ka bulan.” (Santiago 5:17) Ang pag-ampo ni Elias maoy uyon sa kabubut-on ni Jehova sa pagdisiplina sa usa ka nasod nga mitalikod Kaniya. Bisan pa niana, nahibalo si Elias nga ang hulaw nga iyang giampo magpahinabog pag-antos sa katawhan. Ang Israel sa kinadak-an maoy pang-agrikultura; ang yamog ug ulan maoy panginabuhi sa mga tawo. Ang nagpadayong hulaw magdalag hilabihang kagul-anan. Mangamatay ang mga tanom; dili na mohatag ug mga abot. Ang binuhing mga hayop nga gigamit sa pagtrabaho ug pagkaon mangamatay, ug ang pipila ka panimalay mameligrong magutman. Kinsay mag-antos pag-ayo? Ang ordinaryong mga tawo. Usa ka babayeng balo sa ulahi miingon kang Elias nga siya may usa ka hakop na lamang nga harina ug diyutay nga lana. Siya nagdahom gayod nga sa dili madugay siya ug ang iyang anak lalaki magutman hangtod mamatay. (1 Hari 17:12) Alang kang Elias nga miampo, siya kinahanglang adunay malig-ong pagtuo nga si Jehova magaatiman sa Iyang mga alagad​—dato o kabos​—kinsa wala mobiya sa matuod nga pagsimba. Ingon sa gipakita sa rekord, si Elias wala mahigawad.​—1 Hari 17:​13-​16; 18:​3-5.

Tulo ka tuig sa ulahi, sa dihang gipaila ni Jehova nga siya magpaulan sa dili madugay, ang tim-os nga tinguha ni Elias nga makitang matapos na ang hulaw makita diha sa iyang balikbalik, kinasingkasing nga pag-ampo samtang siya “mitikubo sa yuta ug gibutang ang iyang nawong taliwala sa iyang mga tuhod.” (1 Hari 18:42) Sa subsob, iyang giawhag ang iyang alagad: “Tumungas ka, palihog. Lantawa ang dagat” alang sa pipila ka timailhan nga gidungog ni Jehova ang iyang mga pag-ampo. (1 Hari 18:43) Pagkadako gayod sa gibati niyang kalipay sa dihang sa kataposan, sa pagtubag sa iyang mga pag-ampo, “ang langit mihatag ug ulan ug ang yuta mipatungha sa bunga niini”!​—Santiago 5:​18.

Kon ikaw usa ka ginikanan o usa ka ansiyano sa Kristohanong kongregasyon, ikaw tingali kinahanglang makigbisog sa dulot nga mga pagbati sa dihang nagapahamtang ug pagtul-id. Bisan pa niana, ang maong tawhanong mga emosyon kinahanglang mapasibo uban ang pagtuo nga may mga panahong gikinahanglan ang pagdisiplina ug nga sa dihang kini gipahamtang nga may gugma, kini “magpatunghag madaitong bunga, nga mao, ang pagkamatarong.” (Hebreohanon 12:11) Ang mga resulta sa pagsunod sa mga balaod ni Jehova maoy tilinguhaon kanunay. Sama kang Elias, kita kinasingkasing nga moampo nga kini sila pagasundon.

Si Jeremias Nagpakitag Kadasig Bisan pa sa Pagkawala-sa-Kadasig

Sa tanang magsusulat sa Bibliya, si Jeremias tingali mao ang usa nga misulat ug daghan kaayo bahin sa iyang kaugalingong mga pagbati. Ingong batan-on, siya nagpanuko sa pagdawat sa iyang buluhaton. (Jeremias 1:6) Bisan pa niana siya nagpadayon uban ang dakong kadasig sa pagmantala sa pulong sa Diyos, nga nakasugamak lamang sa mabangis nga pagsupak gikan sa mga isigka-Israelinhon​—gikan sa hari ngadto sa ordinaryong tawo. Usahay ang maong pagsupak nagpasuko ug nagpahilak kaniya. (Jeremias 9:​3; 18:​20-​23; 20:​7-​18) Sa laing mga okasyon siya nabiktima sa magubtanong panon, gihapak, gigaid sa tangkol, gibilanggo, gibaharang patyon, ug gibiyaan aron mamatay sa lapok sa ilalom sa walay sulod nga atabay. Usahay bisan ang mensahe ni Jehova nagpasubo, ingon sa giilustrar pinaagi sa iyang mga pulong: “Oh ang akong tinai, ang akong tinai! Gisakitan gayod ako diha sa mga bungbong sa akong kasingkasing.”​—Jeremias 4:19.

Sa gihapon, gihigugma niya ang pulong ni Jehova, nga nag-ingon: “Ang imong pulong alang kanako maoy kalipay ug pagmaya sa akong kasingkasing.” (Jeremias 15:16) Sa samang panahon, ang kahigawad mitultol kaniya sa pagtuaw kang Jehova: “Ikaw alang kanako nahimo gayong sama sa limbongan, sama sa mga tubig nga napamatud-ang dili-kasaligan,” ingon niadtong mga tuboran nga daling mohubas. (Jeremias 15:18) Bisan pa niana, nasabtan ni Jehova ang iyang nagkasumpaking mga pagbati ug nagpadayon sa pagpaluyo kaniya aron siya makatuman sa iyang buluhaton.​—Jeremias 15:​20; tan-awa usab ang 20:​7-9.

Ikaw ba, sama kang Jeremias, nagaatubang ug kahigawad o pagsupak sa pagtuman sa imong ministeryo? Dangop kang Jehova. Padayong sunda ang iyang pagtultol, ug si Jehova magaganti usab sa imong mga paningkamot.

Si Jesus May mga Pagbating Sama sa Atoa

Ang labing bantogang manalagna sa tanang panahon mao ang kaugalingong Anak sa Diyos, si Jesu-Kristo. Bisag siya usa ka tawong hingpit, wala niya sugpoa ang iyang mga pagbati. Sagad natong mabasa ang iyang sulodnong mga pagbati, nga makita gayod sa iyang nawong ug sa iyang reaksiyon ngadto sa uban. Si Jesus sagad ‘giabot ug kaluoy,’ ug gigamit niya ang samang pamulong sa pagbatbat sa mga karakter diha sa iyang mga ilustrasyon.​—Marcos 1:​41; 6:​34; Lucas 10:33.

Gipadako gayod niya ang iyang tingog sa dihang giabog niya ang mga negosyante ug mga hayop gikan sa templo pinaagi sa mga pulong: “Kuhaa kining mga butanga gikan dinhi!” (Juan 2:​14-16) Ang sugyot ni Pedro, “Magmaluloton ka sa imong kaugalingon, Ginoo,” nakaanig kusganong tubag, “Palikod kanako, Satanas!”​—Mateo 16:​22, 23.

Si Jesus may linaing pagbati ngadto kanilang may linaing pagkasuod kaniya. Si apostol Juan gibatbat ingong ang “tinun-an kinsa gihigugma ni Jesus.” (Juan 21:​7, 20) Ug atong mabasa: “Karon gihigugma ni Jesus si Marta ug ang iyang igsoong babaye ug si Lazaro.”​—Juan 11:5.

Si Jesus masakitan usab. Nasubo sa trahedya sa kamatayon ni Lazaro, ‘si Jesus mihilak.’ (Juan 11:​32-36) Nagbutyag sa kasakit nga gipahinabo sa pagbudhi ni Judas Iskariote kaniya, si Jesus mikutlog masakit nga pamulong gikan sa Salmo: “Siya nga nagakaon sa akong tinapay nag-alsa sa iyang tikod batok kanako.”​—Juan 13:​18; Salmo 41:9.

Bisag nakasinati sa hilabihang kasakit diha sa estaka, gipakita ni Jesus ang giladmon sa iyang pagbati. Siya sa kalumo nagtugyan sa iyang inahan ngadto “sa tinun-an kinsa iyang gihigugma.” (Juan 19:​26, 27) Sa dihang nakita niya ang ebidensiya sa paghinulsol sa usa sa mga mamumuhat ug daotan nga gilansang tapad kaniya, si Jesus mabinationg miingon: “Ikaw mahiuban kanako sa Paraiso.” (Lucas 23:43) Bation nato ang pag-ulbo sa iyang emosyon diha sa iyang pagtuaw: “Diyos ko, Diyos ko, nganong gitalikdan mo ako?” (Mateo 27:46) Ug ang iyang himalatyong mga pulong nagpadayag ug kinasingkasing nga gugma ug pagsalig: “Amahan, nganha sa imong mga kamot itugyan ko ang akong espiritu.”​—Lucas 23:46.

Pagkadako sa pasalig nga gihatag niining tanan kanato! “Kay kita adunay ingong hataas nga saserdote, dili usa nga dili makasimpatiya sa atong mga kaluyahon, apan usa [si Jesus] nga nasulayan sa tanang paagi sama kanato, hinuon walay sala.”​—Hebreohanon 4:15.

Pagsalig ni Jehova

Wala gayod basoli ni Jehova ang iyang piniling mga tigpamaba. Siya nahibalo sa ilang pagkamaunongon kaniya, ug siya mabinationg nagpalabay sa mga kahuyangan niadtong kinsa dili-hingpit. Bisan pa niana nagdahom siya nga tumanon nila ang ilang buluhaton. Pinaagi sa iyang tabang sila nakabuhat niana.

Sa pagkamapailobon ipakita nato ang pagsalig sa atong maunongong mga igsoong lalaki ug babaye. Sila maoy mga dili-hingpit kanunay niining sistema sa mga butang, ingon man usab kita. Sa gihapon, dili gayod nato angayng hukman ang atong mga igsoon ingong dili-takos sa atong gugma ug pagtagad. Si Pablo misulat: “Hinunoa, kita nga mga lig-on angay mopas-an sa mga kaluyahon niadtong mga dili lig-on, ug dili kay magapahimuot sa atong kaugalingon.”​—Roma 15:1; Colosas 3:​13, 14.

Ang mga manalagna ni Jehova nakasinati sa tanang mga pagbati nga atong nasinati. Bisan pa niana, sila misalig kang Jehova, ug si Jehova nagpalig-on kanila. Labaw pa niana, si Jehova naghatag kanilag mga katarongan sa kangaya​—usa ka maayong tanlag, kaamgohan sa iyang pag-uyon, maunongong mga kauban nga nagpalig-on kanila, ug pasalig sa usa ka malipayong umaabot. (Hebreohanon 12:​1-3) Magpabilin usab kita kang Jehova uban ang bug-os nga pagsalig samtang atong sundogon ang pagtuo sa mga manalagna sa kakaraanan, mga lalaking “may mga pagbating sama sa atoa.”