Usa ka Makasaysayanhong Pagduaw Nakapalipay sa Usa ka Isla
Ang Cuba, usa ka matahom nga isla sa Caribbeano, di pa dugayng nakasinati ug wala-pa-masinati-sukad nga panahon sa espirituwal nga pagpalagsik. Ang pagtak-op sa 1998 nagpahinabog dugay-nang-gipaabot nga panalangin alang sa mga Saksi ni Jehova nga nagpuyo niining nasora sa West Indies. Sa unang higayon sa kapin sa 30 ka tuig, ang mga membro sa Nagamandong Lawas sa mga Saksi ni Jehova miduaw, ug gikuyogan sila sa 15 ka uban pang mga delegado. Ang mga bisita maoy mga lungsoranon sa Australia, Austria, Belgium, Gran Britanya, Italya, New Zealand, ug Puerto Rico.
KINI maoy usa ka makasaysayanhong hitabo alang sa 82,258 ka magmamantala sa Gingharian didto ug sa 87,890 nga miduyog kanila sa pagsaulog sa Panihapon sa Ginoo sa tingpamulak sa 1998.
Gikan sa Disyembre 1 hangtod 7, 1998, si Lloyd Barry, John Barr, ug Gerrit Lösch miduaw sa Balayng Bethel sa Havana ug mitambong sa pipila sa “Iya sa Diyos nga Dalan sa Kinabuhi” Distritong mga Kombensiyon nga gihimo sa Cuba. Sila nalipay nga makahimamat sa nagapanawng mga ansiyano ug dugang nga masinati sa mga opisyales sa kagamhanan sa Cuba.
“Kadto maoy usa ka teokratikanhon nga bililhong okasyon sa tibuok kinabuhi alang kanako ug sa akong asawa,” matod ni John Barr. “Ang atong hinigugmang mga igsoong lalaki ug babaye sa Cuba napuno kaayo sa kasibot alang sa kamatuoran! Akong gibati nga ang atong tibuok-kalibotang panag-igsoonay maoy bililhon gayod!” “Kining maong hinungdanong semana nagtabang kanako sa pagbaton ug mas maayong pagsabot sa kahimtang sa atong kaigsoonan didto,” midugang si Lloyd Barry.
Sulod sa miaging lima ka tuig, ang mga Saksi ni Jehova sa Cuba gihatagan ug mas dakong kagawasan sa pagsimba, ug ang mga komento sa mga awtoridad sa Cuba motultol sa usa sa pagtuo nga sila nagtinguha nga magpadayon kining maong kiling.
Sa Septiyembre 1994, ang usa ka kalihokan sa pag-imprenta gihimo diha sa Balayng Bethel sa Havana. Sa makausa pa, ang mga Saksi ni Jehova makahimo sa pagtigom nga dayag ug sa pagpanaksi sa balay ug balay. Sa ulahi, sa 1998, ang mga awtoridad mitugot niining maong pagduaw sa usa ka internasyonal nga delegasyon sa 18 ka Saksi ni Jehova, apil ang tulo ka membro sa Nagamandong Lawas.
Malipayon nga Panag-usa Pag-usab
Sa dihang miabot ang delegasyon sa erport sa José Martí sa Havana, sila maabiabihong gidawat sa grupo sa opisyales sa kagamhanan ug sa grupo gikan sa Balayng Bethel, lakip kanila mao ang usa ka igsoong lalaki kinsa nahinumdom sa kataposang pagduaw sa Cuba sa usa ka membro sa Nagamandong Lawas—si Milton Henschel—niadtong 1961. Ang igsoon 12 anyos niadtong tungora; karon usa na siya ka nagapanawng magtatan-aw.
Sa dihang ang mga delegado miabot sa Balayng Bethel, gisugat sila ug mga pungpong sa mga gladiolus, rosas, hasmin, ug dalag ug pula nga mga daisy, nga gitanom sa usa ka igsoong lalaki alang gayod niining okasyona. Midagayday ang mga luha samtang giabiabi sa pamilyang Bethel ang mga delegado. Sa ulahi, nangaon silag Cubanong inasal nga baboy, kan-on ug mga balatong, ensalada, yucca nga dunay mojo (usa ka sarsa nga ginama sa ahos ug lana sa olibo), ug preskong prutas. Human sa pagpangaon ang matag membro sa Nagamandong Lawas mihatag ug makapalig-ong pakigpulong mahitungod sa bahandi sa pag-alagad sa Bethel. Ang mga komento ni Igsoong Lösch ilabinang nakapatandog, sanglit misulti siyag Kinatsila ngadto sa mga igsoon. Ang pamilyang Bethel gilangkoban sa 48 ka regular nga boluntaryong mga trabahante ug 18 ka temporaryong mga magtatabang.
Bisan pag giimprenta sa Italya ang mga libro ug mga Bibliya alang sa mga igsoon sa Cuba, ang itom-ug-puti nga mga edisyon sa Ang Bantayanang Torre ug Pagmata! nga mga magasin ginahimo diha sa nasod mismo, pinaagi sa duha ka mimyograp nga mga makina. Gikinahanglan ang daghang oras ug balikbalik kinamot nga trabaho diha sa piot nga mga lawak aron magama ang tanang magasin nga gikinahanglan. Gipabilhan sa mga boluntaryo ang ilang bahandi sa pag-alagad kang Jehova diha sa usa ka espesyal kaayong paagi.—2 Corinto 4:7.
Hinungdanong mga Bahin sa Kombensiyon
Ang 18-ka-membrong delegasyon nabahin ngadto sa tulo ka grupo aron motambong sa distritong mga kombensiyon nga gihimo sa tulo ka lokasyon—sa Havana, Camagüey, ug Holguín. Sa matag usa sa tulo ka adlaw, usa ka dakong grupo sa mga igsoong lalaki ug babaye, lakip ang daghang ansiyano ug mga payunir, ang gidapit sa pagtambong sa matag lokasyon. Ang lokal nga mga Saksi giingnan nga kini maoy usa ka espesyal nga okasyon, apan wala sila masayod nga may mga membro sa Nagamandong Lawas nga motambong. Handurawa ang ilang kakurat sa pagkakita niining hinigugmang mga igsoong lalaki ug ilang mga asawa nga nanaog sa giabangan nga mga bus sa Biyernes sa buntag!
Ang mga kombensiyon gihimo diha sa walay-bungbong nga mga pasilidad nga gitukod sa mga igsoon uban ang pagtugot sa mga awtoridad. Sa dapit nga gihimoan sa kombensiyon sa Havana, gikulit diha sa usa sa mga bato sa entrada ang kinutlo nga “Salmo 133:1.” Kini nagpahinumdom sa mga igsoon sa mga pulong nga makaplagan nianang tekstoha: “Tan-awa! Pagkamaayo ug pagkamalipayon gayod sa mga magsoon nga magtipon pagpuyo diha sa panaghiusa!” Sa pagkatinuod, sa panahon sa kombensiyon, may maayo ug makapahimuot nga Kristohanong panag-ubanay diha sa maong lokasyon.
Ang mga bisita mikomento sa ekselenteng pagkapahayag sa mga pakigpulong ug sa mga interbiyo, ug nakadayeg sila sa pagpasundayag sa drama, nga pinasikad sa estorya sa Bibliya sa Daniel kapitulo 3, nga nahitabo sa karaang Babilonya. Mikomento ang usa ka igsoong babaye: “Maayo kaayo ang tanang artista, ug ang pagdungan sa tingog ug aksiyon maayo kaayong pagkahimo nga dili ka makamatikod nga ang tingog giteyp na diayng daan. . . . Ang daotang Babilonyanhon daotan gayong tan-awon, ug ang tulo ka Hebreohanon maoy lig-on ug determinado.”
Ang mga hawas sa Office of Religious Affairs ug ubang mga opisyales sa gobyerno nga miadto sa pagtan-aw sa mga kombensiyon midayeg sa mga igsoon sa ilang pagkaorganisado ug maayong panggawi. Gipahayag ni Igsoong Barry ang iyang tim-os nga pasalamat alang sa ekselenteng pagtagad nga gipakita sa mga awtoridad sa Cuba ngadto sa nagduaw nga mga delegado. Pinaagig pagtindog nga namakpak, nga sagad miabot ug pipila ka minuto, gipahayag sa mga igsoon ang ilang apresasyon alang sa mga pakigpulong ug alang usab sa pagtugot sa mga awtoridad sa maong mga kombensiyon. “Labaw pa kini kay sa among gidahom—usa ka gamayg-sukod nga internasyonal nga kombensiyon!” matod sa usa ka Kristohanong pamilya. “Talagsaon gayod kini, tungod kay naghatag kinig pamatuod sa dakong gahom ni Jehova sa paghimo sa iyang mga saad nga matinuod.”
Ang mga kombensiyon nagtagana usab ug kahigayonan alang sa uban nga mas masinati sa mga Saksi. Usa sa mga drayber sa bus mitambong sa kombensiyon sa Sabado ug usab sa Dominggo. Siya miingon nga nakadungog siyag daghang butang maylabot sa mga Saksi ni Jehova, apan karon siya nasayod nga sila maayo, malinawong mga tawo.
“Mga Butang nga Dili Gayod Namo Malimtan”
Ang mga delegado nakadayeg sa mga tawo sa Cuba tungod sa ilang kamainiton ug kamahigalaon. Ang mga taga-Cuba kugihan, may prinsipyo, ug maluloton. “Dili lang kay kas-a nga ang mga tawong dili gayod namo kaila motanyag sa pagtabang kanamo,” matod sa usa ka delegado.
Ang mga delegado nakadayeg ug dako sa pagtuo, kalipay, ug gugma nga gipasundayag sa mga isigka-Saksi sa Cuba. Bisan pa sa dagko kaayong mga kababagan, sila naghimo kang Jehova nga ilang salipdanan. (Salmo 91:2) Si John Barr miingon: “Daghan kaayong butang ang nakapahingangha kanako bahin niini, ang akong unang pagduaw sa Cuba—ang katahom sa nasod, ang maayohong kinaiya sa mga tawo nga akong nahimamat, ug labaw sa tanan, ang hilabihang kalipay sa mga Saksi sa Cuba. Sa akong kinabuhi wala pa gayod ako makadungog ug ingon niadtong kinasingkasing nga pag-awit sa atong mga awit sa Gingharian ug ingon niadtong taas nga pagpamakpak sa dihang matandog ang ilang mga kasingkasing sa espirituwal nga mga butang! Mao kiniy mga butang nga dili gayod namo malimtan. Kanunay namo kining pabilhan.”
Ang Salmo 97:1 nag-ingon: “Papaglipaya ang daghang isla.” Sa pagkamatuod, ang mga Saksi ni Jehova sa isla sa Cuba malipayon tungod sa ilang dugang nga kagawasan sa pagsimba sa Diyos ug tungod sa makasaysayanhong pagduaw niining internasyonal nga delegasyon.
[Mga hulagway sa panid 8]
Daghang pamilya mitambong sa espesyal nga “Iya sa Diyos nga Dalan sa Kinabuhi” Distritong mga Kombensiyon sa Cuba
[Hulagway sa panid 8]
Ang Balayng Bethel sa Havana gibuksan pag-usab niadtong 1994
[Hulagway sa panid 8]
Mga membro sa Nagamandong Lawas misulat diha sa gasang mga Bibliya alang sa mga opisyales sa kagamhanan