Ikaw ba Nagagugol ug Panahon Uban sa Imong Pamilya?

ANG mga Amahang Hapones Gimahal​—Bisag Puliking Nagtrabaho ug Wala Makigdula sa Ilang mga Anak.” Sa mga katuigang dili pa dugay kining ulohana migula sa Mainichi Shimbun. Ang artikulo nagtaho nga 87.8 porsiyento sa kabataang Hapones nga nakigbahin sa surbi sa gobyerno mipadayag sa tinguha nga moatiman sa ilang mga amahan sa umaabot. Apan, diha sa Iningles nga edisyon sa mantalaan, ang mao gihapong artikulo migula ubos sa lahi nga ulohan. Kini mabasang “Mga Amahan ug mga Anak: Usa ka Kaso sa Pagpasagad.” Dili sama sa edisyong Hapones, gipasiugda sa artikulo ang laing bahin sa mao gihapong surbi: Sa matag adlaw sa pagtrabaho, ang mga amahang Hapones nagagugol lamang ug 36 minutos uban sa ilang mga anak. Kon itandi, ang mga amahan sa Kasadpang Alemanya nagagugol ug 44 minutos uban sa ilang mga anak sa mga adlaw sa semana, ug sa Tinipong Bansa, ang numero maoy 56 minutos.

Dili lamang mga amahan ang nagagugol ug gamayng panahon uban sa ilang mga anak. Nagkadaghang inahan ang nagtrabaho gawas sa balay. Pananglitan, daghang nag-inusarang mga inahan kinahanglang motrabaho aron sa pagsuportar sa pamilya. Tungod niini, ang gidaghanon sa panahong gigugol sa mga ginikanan​—mga amahan ug mga inahan—​uban sa ilang mga anak nagkamenos.

Ang 1997 nga pagtuon sa kapin sa 12,000 ka Amerikanong mga tin-edyer nakakaplag nga ang mga batan-on nga dunay suod nga relasyon uban sa ilang mga ginikanan menos ang purohang mag-antos sa emosyonal nga kalisod, maghunahuna sa paghikog, makigbahin sa kapintasan, o mogamit ug makapagiyan nga mga substansiya. Ug ang usa sa mga tigdukiduki nga nalangkit sa mausisaon nga pagtuon nag-ingon: “Dili mo mabati ang pagkasuod sa mga anak gawas kon ikaw anaa alang kanila.” Ang paggugol ug panahon uban sa imong mga anak ug pagpakigsulti kanila hinungdanon gayod.

Ang Pagkakulang sa Komunikasyon

Ang labawng makadaot sa komunikasyon mao ang mga pamilya diin ang usa ka ginikanan nagpuyo layo sa balay tungod sa trabaho. Siyempre, ang pagkakulang sa komunikasyon dili iya lamang sa mga pamilya nga may ginikanang nagpuyo layo sa balay. Ang ubang mga ginikanan, bisan pag nagpuyo sa balay, moadto sa trabahoan nga natulog pa ang ilang mga anak ug moabot sa balay nga sila nangatulog na. Aron mahulipan ang pagkakulang sa panagkita, ang ubang mga ginikanan mogugol ug panahon uban sa pamilya sa mga hinapos sa semana ug sa mga pista opisyal. Sila maghisgot bahin sa paggugol ug “de-kalidad” nga panahon uban sa ilang mga anak.

Bisan pa, ang kakulang ba sa kantidad mahulipan sa kalidad? Ang tigdukiduking si Laurence Steinberg nagtubag: “Sa katibuk-an, ang kabataan nga nagagugol ug daghang panahon uban sa ilang mga ginikanan mas maayog lakat kay sa kabataan nga nagagugol ug menos nga panahon. Daw malisod kaayong hulipan kanang pagkakulang sa panahon. Ang ideya bahin sa de-kalidad nga panahon gipasobrahan ra kaayo.” Mao gayod kanay gibati sa usa ka babayeng taga-Burma. Ang iyang bana​—usa ka tipikal nga Hapones—​moabot gikan sa trabaho sa ala una o alas dos kada buntag. Bisan pag nagagugol siya ug panahon uban sa iyang pamilya sa mga hinapos sa semana, ang iyang asawa miingon: “Ang pagkaanaa sa balay matag Sabado ug Dominggo dili makahulip sa pagkadili-makauban sa pamilya sa nahibilin sa semana. . . . Makalaktaw ka ba sa tanang pagpangaon sa mga adlaw sa semana ug kaonon ang tanang pagkaon alang sa semana matag Sabado ug Dominggo?”

Tininuod nga Paningkamot Gikinahanglan

Ang paghupot ug maayong komunikasyon sa pamilya mas sayon isulti kay sa buhaton. Ang panginahanglan sa pagpangitag pangabuhi ug pagtagana alang sa pamilya dili masayon alang sa usa ka amahan o sa usa ka nagtrabahong inahan sa paggugol ug panahon uban sa pamilya. Daghan kansang mga kahimtang nagkinahanglan kanila nga malayo gikan sa balay nakigkomunikar nga regular pinaagi sa pagtawag sa telepono o pagsulat. Apan magkauban man sa balay o dili, ang tininuod nga paningkamot gikinahanglan aron mahuptan ang maayong komunikasyon sa pamilya.

Ang mga ginikanan nga dili makigkomunikar sa ilang pamilya magbayad sa ilang pagpasagad. Usa ka amahan nga nagagugol ug gamayng panahon uban sa iyang pamilya, nga dili gani makigsalo kanila sa pagpangaon, nakaatubang ug dili maayong mga sangpotanan. Ang iyang anak nga lalaki nahimong mapintas, ug ang iyang anak nga babaye nadakpan nga nangawat sa tindahan. Samtang ang amahan nangandam sa pag-adto sa dulaanan sa golf usa ka Dominggo sa buntag, ang anak nga lalaki masuk-anong mitubag. “Si Mama ba lamang ang ginikanan niining pamilyaha?” siya misinggit. “Si Mama ang naghimog desisyon sa tanang butang sa pamilya. Pa, ikaw wala gayoy . . . ,” mulo pa sa batan-ong lalaki.

Kadtong mga pulonga nagpahunahuna sa amahan. Sa kataposan siya mihukom nga, agig pagsugod, siya kinahanglang mamahaw uban sa pamilya. Sa sinugdan, siya lamang ug ang iyang asawa ang magdungan sa pagpamahaw. Sa ngadtongadto, ang mga anak nakigdungan sa pagpangaon, ug ang lamesa sa pamahaw nahimong dapit sa panagsultihay. Kini misangpot sa dungan nga pagpanihapon kanunay. Busa, ang amahan naningkamot sa pagluwas sa iyang pamilya gikan sa bug-os nga pagkahugno.

Tabang Gikan sa Pulong sa Diyos

Ang Bibliya nagdasig sa mga ginikanan nga mogahin ug panahon sa pagpakigsulti sa ilang mga anak. Pinaagi kang manalagnang Moises, ang mga Israelinhon gisugo: “Magpatalinghog, Oh Israel: Si Jehova nga atong Diyos maoy usa lamang ka Jehova. Ug higugmaon mo si Jehova nga imong Diyos sa bug-os mong kasingkasing ug sa bug-os mong kalag ug sa bug-os mong kusog. Ug kining mga pulonga nga akong gisugo kanimo karong adlawa kinahanglang magapaibabaw sa imong kasingkasing; ug igatudlo mo kini sa dakong kakugi sa imong anak ug magasulti ka mahitungod niini sa magalingkod ikaw sa imong balay ug sa magalakaw ikaw sa dalan ug sa imong paghigda ug sa imong pagbangon.” (Deuteronomio 6:4-7) Oo, kadtong taliwala kanato kinsa mga ginikanan kinahanglang mohimog lakang sa paggugol ug panahon uban sa atong pamilya aron atong ikapasilsil ang mga pulong sa Diyos diha sa mga hunahuna ug mga kasingkasing sa mga anak.

Makaiikag, ang gihisgotan sa sinugdan nga surbi sa 1997 sa kapin sa 12,000 ka Amerikanong kabataan nag-ingon nga “taliwala sa halos 88% . . . sa populasyon nga gitaho nga adunay relihiyon, ang giangkon nga hinungdanon ang relihiyon ug pag-ampo nakahatag ug proteksiyon.” Ang tinuod nga mga Kristohanon nahibalo nga ang hustong relihiyosong pagtudlo diha sa balay magpanalipod sa mga batan-on batok sa mga butang sama sa pag-abuso sa makagiyan nga mga substansiya, emosyonal nga kalisod, paghikog, kapintasan, ug uban pa.

Ang ubang mga ginikanan nagtuo nga lisod ang pagkakitag panahon alang sa ilang pamilya. Tinuod kini ilabina sa nag-inusarang mga inahan, kinsa malipayng mogugol ug panahon uban sa ilang mga anak apan kinahanglang manginabuhi. Sa unsang paagi sila makagahin ug bililhong panahon aron makauban sa ilang pamilya? “Ampingi ang praktikal nga kaalam ug ang katakos sa panghunahuna,” nag-awhag ang Bibliya. (Proverbio 3:21) Ang mga ginikanan makagamit sa “katakos sa panghunahuna” sa paggahin ug panahon alang sa pamilya. Sa unsang paagi?

Kon usa ikaw ka nagtrabahong inahan nga lapoy na kaayo human sa tibuok adlaw nga pagtrabaho, nganong dili nimo hangyoon ang imong mga anak sa pagtabang kanimo sa pagluto? Ang panahong magugol nga magkauban mohatag ug higayon nga magkasuod sa usag usa. Sa sinugdan, ang pagpatabang sa imong mga anak tingali makalangan. Apan, sa ngadtongadto, imong makita nga makalingaw ug makadaginot pa kini ug panahon.

Tingali usa ikaw ka amahan nga adunay listahan nga puno sa mga butang nga pagahimoon sa mga hinapos sa semana. Nganong dili atimanon ang pipila niining mga buluhatona uban sa imong mga anak? Mahimong makigsulti ka kanila samtang mag-uban kamo sa pagtrabaho ug sa samang higayon makahatag kanila ug bililhong pagbansay. Ang tambag sa Bibliya nga ipasilsil ang mga pulong sa Diyos diha sa imong mga anak modasig kanimo sa pagsulti ngadto kanila ‘sa dihang naglingkod ka diha sa imong balay, sa naglakaw sa dalan’​—sa pagkatinuod, sa tanang higayon. Usa ka pasundayag sa “praktikal nga kaalam” ang pagpakigsulti sa imong mga anak samtang mag-uban kamo sa pagtrabaho.

Ang paggugol ug panahon uban sa imong pamilya adunay malungtarong mga ganti. “Kadtong magkinonsultahay adunay kaalam,” nag-ingon ang sanglitanan sa Bibliya. (Proverbio 13:10) Pinaagi sa paggahin ug panahon sa pagpakigsulti sa imong pamilya, ikaw makahatag kanila ug maalamong pagtultol sa mga pagpangamas sa adlaw-adlaw nga kinabuhi. Ang maong pagtultol nga ihatag karon makadaginot ug daghang panahon ug kaguol sa kasingkasing sa umaabot. Dugang pa, kini makahatag kalipay kanimo ug kanila. Aron mahatag ang maong pagtultol, kinahanglan nimong gamiton ang dagayang pondo sa kaalam nga makita diha sa Pulong sa Diyos, ang Bibliya. Gamita kini sa pagtudlo sa imong mga anak ug sa pagtultol sa mga lakang sa imong pamilya.​—Salmo 119:105.

[Hulagway sa panid 4]

Ang mga batan-on nga dunay suod nga relasyon uban sa ilang mga ginikanan menos ang purohang mag-antos sa emosyonal nga kalisod

[Hulagway sa panid 5]

Ang maayong komunikasyon adunay dagayang mga ganti sa pamilyahanong kinabuhi

[Hulagway sa panid 6]

Samtang mag-uban kamog trabaho sa imong anak, ikaw makapakigsulti ug makahatag ug bililhong pagbansay