Kawalay-Kaangayan​—Katuyoan ba Kini sa Diyos?

Ang tubag sa usa ka pulong maoy dili. Tan-awon nato kon ngano.

KATUYOAN sa Diyos nga ang tanang tawo dunay managsamang mga kahigayonan sa pagtagamtam sa kinabuhi ug kalipay. Bahin sa paglalang sa tawo, atong mabasa: “Miingon ang Diyos: ‘Buhaton nato ang tawo sumala sa atong larawan, sumala sa atong dagway, ug pabut-an kanila ang mga isda sa dagat ug ang naglupad nga mga linalang sa kalangitan ug ang anad nga mga hayop ug ang tibuok yuta ug ang matag nagalihok nga mananap nga nagalihok diha sa yuta.’” Pagkahuman sa paglalang sa yuta, “nakita sa Diyos ang tanan nga iyang gibuhat ug, tan-awa! kadto maayo kaayo.”​—Genesis 1:26, 31.

Makaingon ba ang Diyos nga ang makaluluoy nga kahimtang karon sa kawalay-kaangayan “maayo kaayo”? Dili gayod, kay “ang Diyos gugma.” (1 Juan 4:8) Gikaingon bahin kaniya nga siya “wala magpihig kang bisan kinsa” ug nga “hingpit ang iyang kalihokan, kay ang tanan niyang dalan hustisya. Usa ka Diyos sa pagkamatinumanon, nga kaniya walay inhustisya; matarong ug matul-id siya.” (Deuteronomio 10:17; 32:4; itandi ang Job 34:19.) Ug si apostol Pedro mihinapos: “Sa tino naila ko nga ang Diyos dili mapihigon, apan sa matag nasod ang tawo nga magakahadlok kaniya ug magabuhat ug pagkamatarong dalawaton kaniya.”​—Buhat 10:34, 35.

Sanglit ang Diyos mahigugmaon, dili-mapihigon, maangayon, matul-id, ug matarong, nganong lalangon man niya ang mga tawo uban ang kinaiyanhong kawalay-kaangayan bahin sa ilang katungod sa pagtagamtam sa kalipay? Ang pagtugot sa diskriminasyon taliwala sa katawhan ug pagbutang kanila diha sa usa ka sistema sa kawalay-kaangayan direktang mosukwahi sa iyang personalidad. Iyang katuyoan nga silang tanan “matawong gawasnon ug managsama sa dignidad ug sa mga katungod.” Apan, karon ang mga kahimtang dayag nga dili ingon niana. Nganong dili?

Ang Hinungdan sa Kawalay-Kaangayan

Nga ang Diyos naglalang sa mga tawo aron mahimong managsama wala magpasabot nga katuyoan niya nga silang tanan managsama sa tanang bahin. Mahimo silang magkalahi sa mga katakos, interes, ug personalidad. Mahimo usab silang magkalahi sa kahimtang o sa sukod sa awtoridad. Pananglitan, ang lalaki ug babaye dili managsama sa tanang bahin, apan ang Diyos naglalang sa babaye “ingong katimbang” sa lalaki. (Genesis 2:18) Ang mga ginikanan ug mga anak dayag nga magkalahi sa awtoridad. Apan, bisan pa niining maong mga kalainan ang tanan​—lalaki, babaye, ug mga bata—​makatagamtam ingong hinatag-Diyos nga katungod ug managsamang mga kahigayonan sa pagtagbaw sa paninugdang mga kinahanglanon alang sa kalipay. Silang tanan makatagamtam ug managsamang dignidad ug baroganan atubangan sa Diyos.

Sa susama, ang espiritung mga anak sa Diyos, nga gilalang una pa sa mga tawo, gihatagan ug lahi nga mga asaynment ug mga responsabilidad. (Genesis 3:24; 16:7-11; Isaias 6:6; Judas 9) Bisan pa niana, sulod sa mga utlanan nga gihatag kanila, ang tanan nakatagamtam sa mga tagana sa Diyos alang sa kinabuhi ug kalipay sa managsamang gilapdon. Sila sa ingon nagsumbalik-silaw sa pagkadili-mapihigon sa Diyos sa kahibulongang paagi.

Ikasubo, usa ka espiritung linalang ang wala makontento sa dili-mapihigong kahikayan sa Diyos. Buot niya ug labaw pa kay sa gihatag sa Diyos kaniya, nga nangandoy sa mas taas, mas tinuboy, nga posisyon. Pinaagi sa paghambin niining sayop nga tinguha, iyang gipahimutang ang iyang kaugalingon ingong kaindig ni Jehova, kinsa ingong Maglalalang angayang maghupot sa posisyon nga supremo sa tanan. Kining rebelyosong espiritung anak sa Diyos sa ulahi naghaylo sa mga tawo sa pagpangayo sa Diyos ug labaw pa kay sa Iyang gihatag kanila. (Genesis 3:1-6; itandi ang Isaias 14:12-14.) Sa ingon, ang tagana ni Jehova aron ang mga tawo makatagamtam ug kinabuhi ug kalipay daw nahimo gayong dili-timbang. Kining espiritung rebelde, nga gipaila sa Pinadayag 20:2 ingong “Yawa ug Satanas,” nahimong daotan nga tighulhog sa kawalay-kaangayan sa tawo.

Mausab pa Kaha ang Kahimtang?

Ang tubag maoy usa ka pulong nga oo!

Apan kinsa ang makapahinabo sa gitinguhang mga kausaban? Ang tawhanong mga lider, ang pipila sa walay duhaduha sa katim-os gayod, nanglimbasog sulod sa kasiglohan sa pagbuhat niana. Ang ilang kalamposan limitado, nga nagtultol sa daghang tawo sa paghinapos nga dili-realistikanhon ang pagdahom nga ang suliran sa kawalay-kaangayan sa tawo masulbad pa. Ang panglantaw sa Diyos, hinunoa, gisulat diha sa Isaias 55:10, 11: “Ingon nga ang ulan mobunok, ug ang niyebe, gikan sa mga langit ug dili mobalik sa maong dapit, gawas kon ang yuta matumog gayod niini ug magpabunga ug magpasalingsing niini, ug ang binhi igahatag gayod ngadto sa magpupugas ug ang tinapay ngadto sa kumakaon, maingon niana ang akong pulong nga mogula gikan sa akong baba. Kini dili mobalik kanako nga walay sangpotanan, apan kini tinong magbuhat nianang akong gikahimut-an, ug kini tinong magpalampos sa butang nga tungod niana kini akong gipadala.”

Pagkamakapahupay ang pagkahibalo nga si Jehova nga Diyos nag-ingon nga iyang tumanon ang iyang orihinal nga katuyoan sa pagtagana sa tanang tawo ug managsamang mga kahigayonan sa kinabuhi ug kalipay! Ingong Diyos sa kamatuoran, iyang giobligar ang iyang kaugalingon sa pagtuman sa iyang gisaad. Ikalipay, siya dunay kabubut-on ug gahom sa paghimo niana. Unsaon niya pagpalampos kini?

Ang tubag nahasandig sa Gingharian nga gitudlo ni Jesu-Kristo nga iampo sa tanan niyang mga sumusunod: “Amahan namo sa mga langit, . . . Paanhia ang imong gingharian. Ipahinabo ang imong kabubut-on, maingon sa langit, nganhi usab sa yuta.” (Mateo 6:9, 10) Oo, ang Gingharian sa Diyos mao ang paagi nga gamiton ni Jehova sa ‘pagdugmok ug pagtapos niining tanang gingharian [nga naglungtad karon], ug kini mobarog hangtod sa panahong walay tino.’​—Daniel 2:44.

Ubos sa pagmando sa langitnong Gingharian, usa ka bag-ong tawhanong katilingban ang motungha. Bahin niini, si apostol Juan misulat diha sa kataposang basahon sa Bibliya, ang Pinadayag: “Nakita ko ang usa ka bag-ong langit ug usa ka bag-ong yuta; kay ang kanhing langit ug ang kanhing yuta nahanaw na man.” (Pinadayag 21:1) Mawala na ang tanang mangil-ad nga dagway sa kawalay-kaangayan​—kakabos, sakit, kawalay-alamag, diskriminasyon, ug ubang kagul-anan sa tawo.a

Sulod sa kapin sa usa ka siglo, ang mga Saksi ni Jehova nagapunting sa pagtagad sa katawhan ngadto sa maong Gingharian. (Mateo 24:14) Pinaagi sa mga basahon ug sa personal nga tabang, sila nanglimbasog sa pagtabang sa mga tawo sa pagbaton ug kahibalo sa katuyoan sa Diyos sumala sa gisulat diha sa Bibliya. Ang ilang tibuok-kalibotang edukasyonal nga buluhaton, hinunoa, wala lamang maghatag sa mga tawo ug paglaom nga mabuhi sa kaangayan ug kalipay sa umaabot kondili usab nagdalag mga bentaha bisan karon sa pagpukgo sa hampak sa kawalay-kaangayan. Tan-awon nato kon sa unsang paagi.

[Footnote]

[Blurb sa panid 5]

Katuyoan sa Diyos nga ang tanang tawo dunay managsamang mga kahigayonan sa kinabuhi ug kalipay